CILONGESA 23
‘Bajelese Lizina Lyobe’
‘Yehova bakatumbula lizina lyobe ku myaka yoshe.’—MYASO 135:13.
MWASO 10 Mulumbeke Jehova, Mulimu Waluna!
BILI MUNO MU CILONGESA *
1-2. Biñanda muka binapu byakama kuli Bakaleho ba Yehova?
KULI biñanda binatukundama. Ebi biñanda binapu kukundwiya ciyulo ca Njambi na kujelesa lizina lyendi. Co lalo bikebyo bituli na kwambulula manene yetu Bakaleho ba Yehova. Kukundwiya ciyulo ca Njambi kukwalisezele na kujelesa lizina lyendi.
2 Tubaboshe tuzibuka ngwetu tunapande kujelesa lizina lya Njambi. Tuzibuka lalo ngwetu tunapande kukundwiya ciyulo ca Njambi na kucimona ngwetu cikeco cacibwa manene. Ebi biñanda byoshe binapu byakama kuli yetu.
3. Lizina lya Yehova linambateselela byuma muka?
3 Lizina lya Yehova linambateselela byuma byoshe hali Njambi yetu. Linambateselela na ciyulo cendi. Ngeci, omwo tujelesa lizina lya Yehova, co tumwesa lalo ngwetu ciyulo cendi cikeco cacibwa manene. Lizina lya Yehova lyendelela na ciyulo cendi ha kupwa Mwene wa nzili yoshe.—Taleni cipalo ca “ Byuma Byalibungila mu Ñanda Yakama.”
4. Bika biunendeka mukanda wa Myaso 135:13, ha lizina lya Njambi, co bihula muka bitukumbulula muno mu cilongesa?
4 Lizina lya Yehova lyapwa lya kulitila. (Tandeni Myaso 135:13.) Mwafwa bika? Balijwalesele bati ha kulibanga? Njambi ali na kulijelesa bati? Co bika bitunapande kulinga mangana tulijelese? Tukumbululeni ebi bihula.
LIZINA LYAPWA LYA SEHO
5. Banu bamo basa kwendeka bika ha kujelesa lizina lya Njambi?
5 “[Bajelese] lizina lyobe.” (Mateo 6:9) Yesu wamwesele ngwendi cuma cimo ca seho citunapande kulombelela, cinapu kujelesa lizina lya Njambi. Bika byalumbunwine Yesu? Kujelesa cuma kulumbununa kucitundisa mazilo. Oloni bamo banasa kwendeka ngwabo, ‘Lizina lya Yehova lyapwa lya kujela na laja.’ Tusimutwiyeni tahi byalibungila mu lizina.
6. Bika bitwendekela ngwetu lizina lya munu lyapwa lya seho?
6 Lizina kulyapwile lika lya kutumbula mukanwa nambe kulisoneka lika ha lipapelo embwe. Mbimbiliya ngwayo: ‘Lizina lyalibwa linapu lya seho kutubakana siliba na ngolinde.’ (Visi 22:1; Kwambu 7:1) Bika bitwendekela ngwetu lizina lya munu lyapwa lya seho? Mwafwa likalingisa banu basinganyeke byuma bimo hali owo munu. Ngeci, mubanasonekela lizina lya munu nambe mubanalitumbwila, keti cikeco cuma ca seho. Oloni cuma ca seho cinapu byuma bibasinganyeka banu hali owo munu mubatanda lizina lyendi nambe kuliziba.
7. Banu banabiisa bati lizina lya Njambi?
7 Banu mubali na kwendeka makuli hali Yehova, bali na kulingisa bakwabo basinganyeke byuma byabibi hali ikeye. Ngeci, bali na kubiisa lizina lyendi. Lizina lya Njambi balibiisile lwa kulibanga mu citungu ca Edeni. Tusimutwiyeni mubabiisilile lizina lya Njambi nebi bitulilongesako.
LIZINA LYA NJAMBI BALIBIISILE BATI LWA KULIBANGA?
8. Bika byazibukile Adama na Eva, co tunasa kulihula bihula muka?
8 Adama na Eva bazibukile ngwabo lizina lya Njambi ikeye Yehova. Bazibukile lalo byuma byabingi hali ikeye. Bazibukile ngwabo ikeye Ishamatanga wabo, uje wabanene kuyoya na limbo lyalibwa lya Paladaisi na munu wa kulyambata nendi wa kulumbunuka. (Kusha 1:26-28; 2:18) Kuma batwaleleleho kupangesa mana abo a kulumbunuka mu kusinganyekesesa ha byuma byoshe byabalingile Yehova ndi? Kuma batwaleleleho kuzema Yehova na kumwesa kukandelela kuli ikeye ndi? Byuma bibalingile omwo citozi umo wabiisile lizina lya Njambi bitukwasa tuwane cikumbululo.
9. Kwesekesa na Kushangumuka 2:16, 17 na 3:1-5, Yehova walekele bika ba Adama na Eva, co cihula ca Satana camwesele bika?
9 Tandeni Kushangumuka 2:16, 17 na 3:1-5. Satana wapangesele linyoka mu kusimutwiya na Eva, co wamwihwile ngwendi: “Kuma mwa busunga bene Njambi namileka ngwendi keti mulye ku bushuka bwa ku muti woshe-woshe wa muno mu lihya ndi?” Cihula ca Satana camwesele ngwe Njambi wapwa muka-makuli. Co walingisile Eva ashangumuke kumona Njambi mu ngila yaibi. Njambi wabalekele ngwendi basa kulya ku miti yoshe ya mu lihya, oloni wababindikile lika ku muti umo. Kwakele miti yaingi ya kuliseza-seza ibapandele kulya ba Adama na Eva. (Kusha 2:9) Yehova wapwa muka-kwana. Oloni wabindikile Adama na Eva kulya bushuka bwa ku muti umo lika. Satana wamwesele ngwe Njambi wapwa muka-litsita. Ngeci, hamo Eva walihwile ngwendi, ‘Kuma kuli byuma bimo byabibwa bije byanatumina Njambi ndi?’
10. Satana wabiisile bati lizina lya Njambi, co bika byatundilemo?
10 Ha simbu ije, Eva wakele na kwononoka Yehova na kumumona ngwendi ikeye lika asa kumuyula. Ngeci, wendekele majwi mpundu ashikile Njambi omwo wakumbulwile Satana. Wamukumbulwile lalo ngwendi Njambi nababindika kukwata kuje ku muti. Wazibukile ngwendi nga kubakabangeya byabalekele Njambi, co batsa. Oloni Satana wakumbulwile Eva ngwendi: “Kumukatsi embwe.” (Kusha 3:2-4) Satana wamwesele ngwendi Yehova wapwa muka-makuli. Co wabiisile lizina lya Njambi. Ngeci, Satana wapwile liyabolo nambe muka-kubangeya. Eva bamukwisile, co watolililile Satana. (1 Tima 2:14) Wakulahelele manene Satana kutubakana Yehova, mukemwo kwamupwilililile kwakwasi kulinga byuma byabibi. Watengulukilile Yehova. Co walile bushuka buje bwababindikile Yehova. Co waneneko na Adama.—Kusha 3:6.
11. Bika bibapandele kulinga bisemi betu ba kulibanga, oloni bonowele kulinga bika?
11 Eva wapandele kukumbulula bati Satana? Batico ngwe wamukumbulwile ngwendi: “Yobe kunjikuzibuka, njizibuka lika Tate Yehova, co njamuzema na kumukulahela. Nange na Adama tuli na byuma byoshe bije byanatwana Yehova. Utunda kuli yobe ubangeya Tate ñanda ya makuli? Katukomu!” Yehova ngwe wabwahelelele manene kuziba majwi a munendi uje namwononoka. (Visi 27:11) Oloni Eva kononokele Yehova, co Adama nendi kononokele. Kujeneka kwononoka Yehova kwalingisile Adama na Eva bonowe kwimanena Yehova omwo Satana wamubiisile lizina.
12. Satana watanganesele bati Eva, co Adama na Eva bonowele kulinga bika?
12 Ngwe mutunamwena, Satana wendekele mu ngila ije yatanganesele Eva. Wabiisile lizina lya Yehova omwo walingisile Eva asinganyeke ngwendi Yehova kapwile Cisemi wamubwa. Adama na Eva bonowele kwimanena Yehova omwo Satana wamubiisile lizina. Ngeci, bongumukile na makuli a Satana, co batengulukilile Ishabo. Satana anga acili na kupangesa mulali wa kulifwa. Ali na kubiisa lizina lya Yehova omwo ali na kwendeka byuma bya makuli hali ikeye. Banu bali na kubyana ciyulo ca Yehova, mwafwa bali na kungumuka na makuli a Satana.
YEHOVA AJELESA LIZINA YENDI
13. Mukanda wa Ezekiyele 36:23, unamwesa ñanda muka ya seho ili mu Mbimbiliya?
13 Kuma Yehova nalingiko bimo mangana ajelese lizina lyendi ndi? Eyo. Mbimbiliya inendeka byuma byanalingi Yehova mangana ajelese lizina lyendi lije libabiisile mu citungu ca Edeni. (Kusha 3:15) Biñanda byoshe bili mu Mbimbiliya twasa kubyendeka mu bwihi ngwetu: Yehova akajelesa lizina lyendi na kunena kwoloka ha kaye kupangesa Bumwene bwali na kuyula Munendi. Mu Mbimbiliya muli biñanda bije bimwesa Yehova mwakajelesela lizina lyendi.—Tandeni Ezekiyele 36:23.
14. Bifwa muka byali na kumwesa Yehova omwo ali na kujelesa lizina lyendi lije libabiisile mu citungu ca Edeni?
14 Satana nalingi mwoshe mwanasela mangana onowese Yehova kushulisilila biyongola Byendi. Oloni nonowa. Mbimbiliya inendeka byuma byanalingi Yehova bije binapu bukaleho bumwesa ngwabo Yehova wapwa Cisemi wamubwa, co lalo wapwa Muka-kuyula wamubwa. Bilinga bya Satana nebi bya banu baje banalikwatasana nendi, bili na kuzibisa Yehova kubabala ku mbunge. (Myaso 78:40) Nameme lizina lyendi linabihya, oloni Yehova ali na kumwesa mana na mbunge ya kubandamena na kwakula mu busunga omwo ajelesa lizina lyendi. Co lalo ali na kumwesa nzili yendi mu bingila bya kuliseza-seza. Co byuma byoshe byali na kulinga bili na kusholola cizemo cendi. (1 Yowa 4:8) Yehova ali na kutwalelelaho kujelesa lizina lyendi.
Satana walekele Eva byuma bya makuli hali Yehova, co kutunda haje bene, natwalelelaho kubiisa lizina lya Njambi (Taleni palagilafu 9-10, 15) *
15. Satana ali na kubiisa bati lizina lya Yehova ano matangwa, co bika bili na kutundamo?
15 Satana anga acili na kubiisa lizina lya Yehova. Ashaka ngwendi banu keti bakulahele ngwabo Njambi akasompo mu busunga, co lalo wakala na nzili na mana na cizemo. Cakumwenako, ali na kulingisa banu bakulahele ngwabo Yehova keti ikeye Ishamatanga. Nga amona ngwendi banu banakulahela ngwabo Njambi kwakala, co abalingisa bamone ngwabo mashiko a Njambi apwa amakalu kuwakabangeya. Akalongesa banu ngwendi Njambi kakele na ngozi, wapwa cikenya uje akenyeka banu mu tuhya. Nga banu bakulahela awa makuli a Satana, co kubapwila kwakwasi kubyana ciyulo ca Yehova. Satana atwalelelaho kubiisa lizina lya Yehova kweta noho ha bakamunyongesela. Co alinga mwoshe mwasela mangana neni amyungumune. Kuma mumutabesa amyungumune ndi?
KWASENI MU KUJELESA LIZINA LYA YEHOVA
16. Bika bimwasa kulinga bije byonowele kulinga Adama na Eva?
16 Yehova natabesa banu ba kujeneka kulumbunuka bakwase mu kujelesa lizina lyendi. Mwasa kulinga byuma byonowele kulinga Adama na Eva. Tuli mu kaye kanashulu banu baje bali na kubiisa lizina lya Yehova na kulishaula. Oloni yetu twasa kumwimanena na kubaleka busunga ngwetu Yehova wapwa wa kujela, akalingi byuma mu kusungama, wapwa wamubwa, co lalo wakala na cizemo. (Isaya 29:23) Mwasa kukundwiya ciyulo ca Yehova nga mukwasa banu bamone ngwabo ciyulo cendi cikeco cacibwa kyeho, co cikanena kwoloka na kubwahelela ku byuma byoshe byakutanga.—Myaso 37:9, 37; 146:5, 6, 10.
17. Yesu washolwele bati lizina lya Ishe?
17 Nga tujelesa lizina lya Yehova, co tutembwinina Yesu Kilistu. (Yowa 17:26) Yesu washolwele lizina lya Ishe omwo walipangesele nomwo wakele na kulongesa banu mwafwila Ishe. Cakumwenako, wapayele Bafaliseo baje bakele na kumwesa ngwe Yehova wapwa cikenya, wapwa wamukalu kumupangela, wakala kulyala na banu, co lalo kakele na ngozi. Yesu wakwasele banu bamone ngwabo Ishe wapwa muka-kuzibisisa, wakala na mbunge ya kubandamena na cizemo, co lalo muka-kusambesa. Wakwasele lalo banu bazibuke Yehova omwo watembwininine bifwa byendi mwamubwa.—Yowa 14:9.
18. Twasa kujelesa bati lizina lya Yehova?
18 Ngwe mwalingile Yesu, netu twasa kulekako bakwetu byuma bituzibuka hali Yehova. Twasa kubaleka ngwetu Yehova wakala na cizemo na ngozi. Umona tulinga ngoco, co tujelesa lizina lya Yehova na kukwasa bakwetu balimone kupwa lya kujela. Yetu banu kutwalumbunukile, oloni twasa kutembwinina Yehova. (Efeso 5:1, 2) Nga banu bamona ngwabo tuli na kutembwinina Yehova mu byuma bitulinga nebi bitwendeka, co tujelesa lizina lyendi. Tulijelesa lalo nga tulongesa banu bazibuke busunga hali Njambi. Co lalo tumwesa ngwetu nameme banu ba kujeneka kulumbunuka basa kupwa ba kulongwa kuli Njambi.—Yombi. 27:5, NWT.
Tunapande kukwasa batukalilongesa nabo Mbimbiliya bazibuke ngwabo Yehova wakala na ngozi na cizemo (Taleni palagilafu 18-19) *
19. Kwesekesa na mukanda wa Isaya 63:7, bika bitunapande kuleka manene banu omwo tubalongesa?
19 Kuli byuma bikwabo lalo bitwasa kulinga mangana tujelese lizina lya Yehova. Kakangi, mutukalongesa banu busunga bwa mu Mbimbiliya, tukaka manene mana ku kubaleka ngwetu Yehova ikeye napande kuyula byuma byoshe. Co kukwabihile kubaleka ngoco. Nameme ngoco, cilengo cetu cakama cinapande kupwa ca kubakwasa bazeme Tate yetu Yehova na kupwa ba kulongwa kuli ikeye. Ngeci, tunapande kubaleka manene bifwa byabibwa bya Yehova mangana tubakwase bamuzibuke mwamubwa. (Tandeni Isaya 63:7.) Umona tulinga ngoco, co tubakwasa bazeme Yehova na kumwononoka, mwafwa bashaka kupwa ba kulongwa kuli ikeye.
20. Bika bitusimutwiya mu cilongesa cinatako?
20 Mu cilongesa cinatako, tusimutwiya byuma bitunapande kulinga mangana bilinga byetu na bingila bitulongeselamo banu keti bishawise lizina lya Yehova, oloni bikwase banu balikute busamba nendi.
MWASO 2 Jehova ki Lona Libizo Lahao
^ par. 5 Ñanda muka yakama ije inakundama tungelo na banu? Mwafwa bika inapu yakama, co inatukundama bati? Nga tuwana bikumbululo ku bihula ebi na bihula bikwabo, co tukanyamesa busamba bwetu na Yehova.
^ par. 61 KULUMBUNUNA BIKUPULO: Satana wabiisile lizina lya Njambi omwo walekele Eva ngwendi Njambi wapwa muka-makuli. Ha myaka yaingi, Satana nashongangeya banu balongese makuli. Bali na kulongesa ngwabo Njambi wapwa cikenya, co lalo keti ikeye watangele banu.
^ par. 63 KULUMBUNUNA CIKUPULO: Ndolome ali na kulongesa munu Mbimbiliya, co ali na kumuleka manene bifwa bya Njambi.
