MWAHA WOOSOMIYA 23
“Ncina ninyu nireerihiye”
“Oo Yehova, ncina naa khanimmalamala.”—ISAA. 135:13.
NCIPO 10 A Jeová Vou Agradecer!
NINHALA WIITTHUCANI? *
1-2. Myahani Masaahiti a Yehova cinoonaaya ukhala cuulupale?
CIHAAVO myaha cuulupale cinene hiiva cinlamuliyeehu waakihera ilelo—ulamulela ni ureerihiya ncina na Nluku. Hiivano Masaahiti a Yehova unaanicivela cinene wuuluma nnyo myahannyo. Kontha nnyo cikhanle myaha cofayita. Masi ulamulela wa Nluku ni ureerihiya ncina nawe cikhanle citthu cihinhiyana.
2 Hiiva niheetthuca wiira ncina na Nluku nihaana nireerihiyaka nhina wo citthu cotheene cowoothiya ninoolumeliyaaya. Ciicammo, hiiva ninaacuwela wiira nihaana nithoonyeraka wiira ulamulela wa Yehova phiri womaana. Phimaana, nnya myaha miilinnya cikhanle cuulupale.
3. Ncina na Yehova ninaaca isiyani?
3 Khweeliini, ncina na Yehova ninaaca makhalelo otheene arinaawe Nlukweehu awula mananna uyova ciryaawe, woohihiya uttuli mananna cinlamulelaawe. Phimaana, noolumaka wiira mwaha muulupale cinene ukhanle ureerihiya ncina na Yehova nhina wo citthu cowoothiya, ciicammo maanaaya wiira nihaana nithoonyeraka wiira mananna uyo cinlamulelaawe phiri khweeliini omaana. Ncina na Yehova ciicammo ninaaca mananna uyo cinlamulelaawe khampa Nkhulupale Nakuru-Cotheene.—Uwehe ikwaaturu “ Miphantte co mwaha muulupale unlamuliyeehu waakihera.”
4. Isaalimu 135:13 inooluma isiyani nhina ncina na Nluku, ni makohoni anhala waakhuliya nhina ula mwahoola?
4 Ncina na Yehova khaninlikananiya. (Nsome Isaalimu 135:13. *) Kontha isiyani ncina na Nluku nikhanlyaaya nofayita cinene? Nno ncinanno ukatini wancenryaaya wuulumeliya citthu cowoothiya? Manannani Nluku cinreerihaawe ncina nawe? Ni ninhala ukavihera cani waakihera ncina nawe? Ala phi makoho anhaleehu waakhula nhina ula mwahoola.
ISIYANI INLEMELIHA NCINA?
5. Isiyani atthu akhwaawe inkohaaya yoopuwelaka ureerihiya ncina na Nluku?
5 Yesu hohimya itthu yuulupale cinene ninlamuliyeehu ulepela ukati unonlompeehu Nluku. Uyo heera: “Ncina ninyu nireerihiye.” (Mat. 6:9) Masi atthu akhwaawe pooti wiikoha co: ‘Ncina na Yehova nikhanle nowaarya ni nooreera. Vano nlattuni ninlamuliyaaya ureerihiya?’ Wiira naakhule nna nikohonna, nihaana nipacaka wuupuwela “ncina” isiyani?
6. Isiyani inlemeliha ncina na ntthu?
6 Ncina khaninakhala paahi nuulumo nowantikhiya wanikhantani awula nowuulumiha wamalakuni. Woone itthu Ibiiblya inhimyaaya: “Phataari ukhalana ncina nomaana, uhiya ukhalana mihakhu cinci.” (Miru. 22:1; Ekles. 7:1) Isiyani inlemeliha ncina na ntthu? Itthu inlemeliha ncina na ntthu akhanle makhalelwaawe mwaneene nno ncinanno ni mananna atthu akhwaawe cinonweheraaya. Phimaana, mananna cinantikhiyaaya ncina na ntthu awula mananna cinromoliyaaya, kahi phi itthu yuulupale. Masi itthu yuulupale akhanle mananna atthu cinoopuwelaaya yoonaka awula yeewaka nno ncinanno.
7. Manannani atthu cinnanarihaaya ncina na Nluku?
7 Atthu yamuulumaka pusya Yehova ni yamootheryaka citthu coohiloka, ayo anaawiiriha atthu akhwaawe wuupuwela wiira Yehova khanle oohinamaana. Atthu yoonaka cikhumelelaka citthu coohinamaana, ayo ananromola Nluku ni anaananariha ncina nawe. Ikwaha yoopacera Nluku woolumiyaawe pusya ni waananarihiyaaya ncina nawe, waari unlavani no Eeteni. Nttwee noone isiyani inniitthucihaaya itthu yaakhumelenle u Eeteni.
IKWAHA YOOPACERA NAANANARIHIYAAYA NCINA NA NLUKU
8. Atamu ni Hawa yaacuwela isiyani, ni makohoni yaakhumelenle?
8 Atamu ni Hawa yancuwela ncina na Yehova ni ciicammo yancuwela ikhweeli cinci ca Mwaneene nno ncinanno. Wootakihera, ayo yancuwela wiira Yehova phumpale citthu cotheene ni yancuwela wiira uyo phaavahale citthu cotheene caarinaaya—ukumi, ipeephoni yomaana ni uthelanaca waya. (Upha. 1:26-28; 2:18) Masi niireke wiira Atamu ni Hawa yanhala wuupuwela citthu cotheene caavahiyaaya ni Yehova? Niireke wiira ayo yanhala unfenta ni unsukhuru Mwaneene nno ncinanno? Waakhuliya waya ala makohwaala woonannyaale ukati waattehiyaaya ni nwanani a Nluku.
9. Toko cinhimyaaya Uphattuwaca 2:16, 17 ni 3:1-5, isiyani Yehova yaahimyenryaawe Atamu ni Hawa, ni Sotwani aavirikanihale cani itthu yaahimyalyaawe Yehova?
9 Nsome Uphattuwaca 2:16, 17 ni 3:1-5. * Avarelaka nteko inwaa, Sotwani ahonkoha Hawa: “Iyo phi itthu Nluku khweeliini yiiralyaawe, wiira nhilyeeni miri co wanlavani cotheene?” Nna nikohonna naanaamuuluma pusya Nluku ni Hawa ahancera uhinwehera ratta Nluku. Masi itthu khweeliini Nluku yanhimyenryaawe Atamu ni Hawa, eerale wiira yaalamuliya ulya miri cotheene, masi mwiri mmoca khayaalamuliya ulya. Ni khweeliini cahaavo mihokorokho coovirikana cinci u Eeteni. (Upha. 2:9) Khweeliini, Yehova khanle namavaha. Uyo aawiirenle Atamu ni Hawa wiira ahilye mwiri mmoca paahi. Phimaana, nikoho naakumihacalyaawe Sotwani nahompankiha Atamu ni Hawa wuupuwela wiira Nluku aanawaathuwa itthu yomaana. Hawa atthunaka aheekoha co: ‘Kiireke wiira Nluku ihaavo itthu yomaana inkithuwaawe?’
10. Manannani Sotwani coolumalyaawe pusya ncina na Nluku, ni iyo ikumihacale isiyani?
10 Mpaka ule ukatyuule, Hawa ammwiiwelela Yehova. Ni ukati waamwaakhulaawe Sotwani, uyo ahoturuwela wuuluma itthu yaahimyeriyaawe ni Nluku. Ni Hawa mpaka ahooluma wiira ayo khayaalamuliya uvara ule mwiryuule. Uyo aanaacuwela wiira aahiiweleleke itthu yaahimyeriyaawe ni Nluku, anhala ukhwa. Masi Sotwani enre co: “Nyuuva khweeliini khannohala ukhwa.” (Upha. 3:2-4) Mpaka va, wootha wa Sotwani wahokhumela vate. Uyo ahooluma pusya ncina na Nluku ni waakhala toko aamwiirela Hawa wiira Yehova khanle Nluku owootha. Ala manannaala, Sotwani hokhala Tiyapu, awula namootha. Hawa ahothepiya ni ahomwaamini Sotwani. (1 Tim. 2:14) Uyo ahonkhuluvela Sotwani, uhiya unkhuluvela Yehova. Iyo yahomwiiriha Hawa uthanla itthu yoohiloka: uhimwiiwelela Yehova. Ahancera ulya nhokorokho Yehova waakhottihalyaawe ni wahoolo ahonvaha Atamu, ni uyo ciicammo aholya.—Upha. 3:6.
11. Isiyani asipaapeehu oopacera yaalamuliyaaya upanka, masi yahaapankalyaaya?
11 Muupuwele vakaani itthu Hawa yaalamuliyaawe umwaakhula Sotwani. Nnoonela cani unari wiira Hawa ahomwaakhula Sotwani co: “Mi akinoocuwela, masi kinawaacuwela Apaapa, Yehova. Mi kinanfenta Nluku ni kinankhuluvela. Citthu cotheene cirineehu mi ni Atamu Yehova phinivahale. Umpani we wiira uwuulume pusya Apaapa, Yehova? Ukhume va!” Yehova anhala ukhala ootteeliya cinene nlattu woomoona mwanawe ookhuluvelya aakhulaka ala manannaala! (Miru. 27:11.) Masi Hawa khanfenta Yehova ni Atamu ciicammo. Nlattu wo iyo, ayo khayaakihenre ncina na Athumwanaya wiira nihuulumiye pusya.
12. Manannani Sotwani campankihalyaawe Hawa uhinwehera ratta Yehova, ni isiyani Atamu ni Hawa yahaapankalyaaya?
12 Khampa coonaleehu, itthu yoopacera Sotwani yaapankalyaawe waari umpankiha Hawa uhinwehera ratta Yehova. Uyo ahomwiiriha Hawa wiikoha wakhala wiira Yehova aari Nluku omaana awula mena. Vano, Atamu ni Hawa khayaakihenre ncina na Yehova wiira nihuulumiye pusya ni Sotwani. Ayo yahomwiiwelela Sotwani ni yahaarukunuwela Athumwanaya. Ilelo ciicammo Sotwani novarela nteko itapha cimocaaru. Uyo nanlelo nawuuluma pusya ncina na Yehova. Ni atthu anaamini citthu cowoothiya ca Sotwani, anawaakuva uthepiya ni anaakhotta ulamulela wosariya wa Yehova.
YEHOVA NAAREERIHA NCINA NAWE
13. Manannani Ezekiyeli 36:23 cinttonkacaaya sana-saana mwaha muulupale wo mbiiblyani?
13 Ukati Yehova woolumiyaawe pusya ni Sotwani, niireke uyo khaapankale itthu? Mena! Ibiiblya yotheene inaahimya citthu Yehova cipankalyaawe wiira areerihe ncina nawe nhina citthu cotheene cootheriyaawe u Eeteni. (Upha. 3:15) Khweeliini, mwaha muulupale unoolumaaya Ibiiblya yotheene, phuula: Yehova naareeriha ncina nawe avarelaka nteko Umwennyaawe, unlamuleliya ni Mwanawe, ni naawaana nnema ni isariya watuninyani. Myaha co mbiiblyani cinaanikavihera ucuwela mananna Yehova cinhalaawe ukhitiri ureeriha ncina nawe.—Nsome Ezekiyeli 36:23. *
14. Hataa arukunuweliyaka u Eeteni, manannani Yehova cinthoonyeraawe wiira nanlelo ri mooreeriha ncina nawe?
14 Sotwani naapanka yotheene inkhitiryaawe wiira itthu impheelaawe Yehova ihiirannye. Masi khula itthu immananihaawe upanka khinonkhumela saana. Ibiiblya inaathoonyera citthu cimpankaawe Yehova ni ciicammo inaathoonyera wiira Yehova akhanle Apaapeehu onifento ni akhanle nhooleli omaana. Ninaacuwela wiira Yehova naakhala ooriipiya nrima nlattu woorukunuweliya ni Sotwani ni naatthu otheene anonkavihera. (Isaa. 78:40) Masi uyo naacuwela waanana ayo marikarikwaayo athoonyeraka ucuwelaca, uvilela ni isariya. Yehova ciicammo naathoonyera ikuru cawe cuulupale ni mananna menci. Venci-venci, nifento nawe ninawoonannya nhina wo citthu cotheene cimpankaawe. (1 Jo. 4:8) Khweeliini, Yehova khanhiya ureeriha ncina nawe.
Sotwani ahomuuluma pusya Yehova anhimyeraka Hawa citthu cowoothiya ni myaakha cinvirannya va, uyo nanlelo naamuuluma pusya Nluku (Nwehe iparaagarafu 9-10, 15) *
15. Ilelo, manannani Sotwani cinoolumaawe pusya ncina na Nluku, ni isiyani inkhumelela nlattu wo iyo?
15 Ilelo, Sotwani nanlelo nawuuluma pusya ncina na Nluku. Uyo naamananiha waapankiha atthu uhimoona Nluku ukhala nakuru, nasariya, ncuweli ni nanifento. Wootakihera, Sotwani naamananiha waakupaliha atthu wiira Yehova khanakhala ompale citthu cirivo. Ni hataa yakupaliki wiira Nluku haavo, Sotwani naamananiha waapankiha atthu wuupuwela wiira malamulo a Nluku khanakhala osariya ni naanikhottiha citthu comaana. Uyo naawiitthuciha atthu wiira Yehova khanle nakhirini ni khanle ootakhala nrima; ni ciicammo wiira nawaapaha atthu umooroni. Atthu yaaminiki nnya citthu cowoothiyannya, khunaarika ukhotta ulamulela wosariya wa Yehova. Uhinaphiya ukati unhalaawe umalamalihiya, Sotwani khanhala uhiya wuuluma pusya ncina na Yehova ni khanhala uhiya umananiha wuuhapusani nyuuva. Niireke uyo naahala ukhitiri wuuhapusani?
NYUUVA NNAAKELA NHINA UYO MWAHOOYO
16. Isiyani inhaleenyu upanka yahaapankalyaaya Atamu ni Hawa?
16 Yehova honivaha hiiva apinaatamu oopahuwa iparakha yookavihera ureeriha ncina nawe. Khweeliini, nyuuva pooti upanka itthu ihipankalyaaya Atamu ni Hawa. Nyuuva hataa nkhalaka ntuninyani yoocara atthu anooluma pusya ni anveeha ncina na Yehova, pooti uthanla ukhala mphantte wa Nluku ni wuuluma ikhweeli—wiira Yehova khanle owaarya, nasariya, namaana ni nanifento. (Isai. 29:23) Ni nyuuva pooti uthoonyera wiira nnaakavihera ulamulela wawe. Mwaakavihere atthu akhwawe woona wiira mananna Yehova cinlamulelaawe phiri khweeliini osariya ni uyo paahi phinhala ukhitiri waawaanela atthu otheene nnema ni utteeliya.—Isaa. 37:9, 37; 146:5, 6, 10.
17. Manannani Yesu caacuwelihalyaawe atthu ncina na Athumwaane?
17 Nakaviheraka ureeriha ncina na Yehova, nimpaka itthu yaapankalyaawe Yesu Kristu. (Joau 17:26.) Yesu ahaacuweliha atthu ncina na Athumwaane. Uyo khaaromolaca ncina na Nluku paasi, masi aanaawiitthuca atthu mananna Yehova ciryaawe. Wootakihera, mafarisewu yaanawaapankiha atthu umoona Yehova ukhala nakhirini, ntakhali, ookhala uttayi ni oohiwoonela atthu uthunku. Masi Yesu khaari commo, uyo aanawaakavihera atthu uwoona Athumwaane wiira akhanle ooreera nrima, oovilela, onifento ni oolevelela. Yesu ciicammo aanaatakiha ratta-raatta makhalelo aathumwaane. Ala manannaala, atthu yaanaacuwela khweeliini mananna Yehova ciryaawe.—Joau 14:9.
18. Isiyani ninlamuliyeehu upanka wiira nikavihere umaliha citthu cinoothaceriyaawe Yehova?
18 Khampa Yesu, hiiva pooti waahimyacera atthu citthu cincuweleehu ca Yehova, niwiitthucihaka wiira Nluku khanle nanifento ni namaana. Napankaka iyo, hiiva pooti ukavihera umaliha citthu cinoothaceriyaawe Yehova. Hiiva ciicammo pooti untakiha Yehova; ni iyo inaakhitirya hataa nikhalaka atthu oopahuwa. (Efesu 5:1, 2) Khula nihuku, citthu cinoolumeehu ni citthu cimpankeehu, cihaana caathoonyeraka atthu mananna Nlukweehu, Yehova ciryaawe. Napankaka citthu cotheene nnya, hiiva ninaareeriha ncina na Nluku ni ninawaakavihera atthu uwehera nno ncinanno khampa nowaarya. Hiiva ninaalemeliha ncina na Nluku kontha ninawaakavihera atthu umaliha citthu coohiloka cinoopuwelaaya nhina nno ncinanno. * Ninaathoonyera wiira unaakhitirya apinaatamu oopahuwa uhihiya ukhala ookhuluvelya.—Jó 27:5.
Nimpheela waakavihera atthu anaasomiheehu Ibiiblya ucuwela wiira Yehova khanle nanifento ni namaana (Nwehe iparaagarafu 18-19) *
19. Toko cinhimyaaya Isaiya 63:7, itthuni yuulupale ninlamuliyeehu utotha upanka ukati unwiitthuciheehu akhwiihu Ibiiblya?
19 Ihaavo itthu ikhwaawe ninlamuliyeehu upanka wiira nireerihe ncina na Yehova. Ukati unwiitthuciheehu atthu Ibiiblya, hiiva ninaawuulumaka ulamulela wa Yehova, awula ninaawiitthuciha wiira uyo phirina isariya yoolamulela ituninya yotheene. Ni iyo ikhanle ikhweeli. Masi unookhalaru wiira unaareera uwiitthuciha atthu malamulo a Nluku, itthu yuulupale cinene ninlamuliyeehu utotha upanka ukhanle waakavihera ayo atthwaayo waaswalela Apaapeehu, Yehova ni waavaresesa. Phimaana, khula ukati waathoonyere atthu makhalelo omaana a Yehova. Waathoonyere mananna khweeliini ciryaawe Yehova, mwaneene nno ncinanno. (Nsome Isaiya 63:7. *) Nawiitthucihaka atthu ala manannaala, ninawaakavihera unfenta Yehova. Coo, anaahala upheela unvaresesa ni uhihiya umwiiwelela.
20. Ninhala wiitthucani nhina mwaha nkhwaawe unhaleehu usoma?
20 Isiyani inlamuliyeehu upanka wiira meettelweehu ni mananna nineetthuciheehu attitthimihe ncina na Yehova ni yaavare nrima atthu enci? Mwaha nkhwaawe unhaleehu usoma unaahala waakhula nna nikohonna.
NCIPO 2 O Teu Nome É Jeová
^ par. 5 Uhaavo mwaha muulupale cinene unlamuliyaaya ukavihera apinaatamu ni malayikha. Mwahani? Nlattuni uyo mwahooyo ukhanlyaaya muulupale? Ni hiiva ninkela cani nhina uyo mwahooyo? Unaareera cinene ucuwela waakhuliya waya ala makohwaala ni makoho makhwaawe toko ala, kontha unaahala ulipihaca upatthani urineehu ni Yehova.
^ par. 4 Isaalimu 135:13 Oo Yehova, ncina naa khanimmalamala. Oo Yehova, uttitthima waa unaakhala ukati wotheene.
^ par. 9 Uphattuwaca 2:16 Yehova Nluku ahonruma ciicammo nlopwana anhimyeraka co: “Miri cotheene co wanlavani pooti ulya niiraati. 17 Masi mwiri umphwanyiha ankhili omaana ni oohinamaana, uhilyeeni, kontha, nihuku ninhalaa ulya, weeva khweeliini unaahala ukhwa.” 3:1 Inwaa yaari yootepa uwalaalaca uvikana inama co ntakhwani cotheene, Yehova caapankalyaawe. Coo, inwaa yahomwiirela nthiyana: “Iyo phi itthu Nluku khweeliini yiiralyaawe, wiira nhilyeeni miri co wanlavani cotheene?” 2 Nthiyana ahaakhula eeraka co: “Niholeveliya ulya mihokorokho cotheene co miri ciri wanlavani va. 3 Masi, nhokorokho wo mwiri mmoca umphwanyannya iriyari nlava, Nluku eerale co: ‘Nhilyeeni ni nhikwanye; kontha nnaarwaa ukhwa.’” 4 Vano inwaa yahowiirela nthiyana co: “Nyuuva khweeliini khannohala ukhwa. 5 Kontha Nluku naacuwela wiira nihuku ninhaleenyu ulya, nnaahala utthukuwa meetho ni nnaahala unlikanana Nluku, ncuwelaka yooreera ni yootakhala.
^ par. 13 Ezekiyeli 36:23 ‘Mi khweeliini kinaahala ureeriha ncina naka nuulupale, ninanarihiye naatthu olapo cotheene, ni ninanarihaleenyu nyuuva wamoca naayo atthwaayo; ni ukati unhalaaka ureerihiya iriyariinyu ayo yoonaka, atthu olapo cotheene anaahala ucuwela wiira mi kikhanle Yehova,’ neera Nkhulupale Pwiiya Yehova.
^ par. 18 Itthu inkupaliihu nhina ureerihiya ncina na Yehova ihotaphuleliya wa nkutthaanoni wo mwaakha wo 2017.—Uwehe iporokaraama yo Janeiro 2018 nhina jw.org®. Ukele wantikhiye BIBLIOTECA > JW BROADCASTING®.
^ par. 19 Isaiya 63:7 Kinaahala uromolaca miteko ca Yehova co nifento nookhuluvelya, miteko ca Yehova cimphwanela uttottopeliya, nlattu wo citthu cotheene cinipankenlyaawe, citthu comaana cinci cipankenlyaawe nloko no Isarayeli, nlattu wokiriri cawe ni nlattu wo nifento nawe nuulupale nookhuluvelya.
^ par. 66 ILATARATO: Sotwani homuuluma pusya Nluku ukati waamwiirenlyaawe Hawa wiira Nluku aanawootha. Uvira waya myaakha cinci, Sotwani homwarusela citthu cowoothiya, toko Nluku khanle nakhirini ni khawumpale apinaatamu.
^ par. 68 ILATARATO: Ukati munna nonsomihaawe ntthu Ibiiblya, uyo nanhimyera makhalelo omaana a Nluku.
