CIPANDE CA KUSAMBILILAMO 23
“Izina Lyako Licindikwe”
“Izina lyako, we [Yeova] i lya muyayaya.”—MASA. 135:13.
LWIMBO NA. 10 Lumbanyini Yeova Leza Witu!
VINO TUMASAMBILILAPO *
1-2. I milandu ci iyacindama sana kuli ya Nte Yakwe Yeova?
IMILANDU icindame sana yatukuma ndakai kuli kuti ukateeka wakwe Leza nu kuleenga izina lyakwe ukucindikwa. Swe ya Nte yakwe Yeova twatemwa sana ukulanda pa malyasi yaa. Nomba cico cisikupiliula ukuti ukateeka wakwe Leza nu kucindika izina lyakwe vyaya i vintu viili vipusane.
2 Swensi kwene twiza twamanya ukuti izina lyakwe Leza lilinzile ukucindikwa. Nupya twasambilila ukuti miteekele yakwe Yeova ilinzile ukumanyikwa ukuti ali miteekele yampomvu. Fwandi imilandu ii yoili yacindama sana.
3. I vyani vyaya umwi zina lyakuti Yeova?
3 Alino, izina lyakuti Yeova likalondolola na vyonsi vino waya ukwikako ni miteekele yakwe. Fwandi ndi cakuti twalanda ukuti izina lyakwe Yeova ali mulandu ucindame sana, ale tukulanda nu kuti imiteekele yakwe ilinzile ukumanyikwa ukuti i yampomvu. Izina lyakwe Yeova lyalemana sana ni miteekele yakwe iya Papelapela.—Lolini kambokosi kakuti “ Ivintu Ivyaya Umu Mulandu Ukalamba Pali Ukateeka Wakwe.”
4. Uzye ilembelo lya Masamu 135:13 likalanda vyani api zina lyakwe Leza, nupya a mauzyo ci amaasukwa umu cipande cii?
4 Izina lyakuti Yeova lyaiyela sana. (Welengini Masamu 135:13.) U mulandu ci uno izina lyakwe Leza lyacindamila sana? Uzye lyazewanyile uli pa kutandika? Uzye Leza akalenga uli ukuti licindikwe? Nupya tungacita uli pakuti twazwilizyeko ukukucingilila izina lyakwe? Lekini twasuke mauzyo yayo?
MULANDU UNO IZINA LYACINDAMILA
5. I vyani limwi vino yamwi yakauzya ndi cakuti yuvwa ukuti izina lyakwe Leza lilinzile ukucindikwa?
5 “Izina lyako licindikwe.” (Mate. 6:9) Cii ali cino Yesu walanzile ukuti cilinzile ukuya icicindame sana lino tukupepa. Nomba uzye amazwi yakwe Yesu yalozyanga mwi? Ukucindika cimwi kukapiliula ukucilenga ukuya ica muzilo, ica usaka nanti icisanguluke. Nomba yamwi yangelenganya ukuti, ‘Uzye izina lyakwe Yeova litaya mpiti ilya muzilo, ilya usaka nupya ilisanguluke?’ Pakuti twasuke iuzyo lilyo, tulinzile ukwelenganya pali vino vyaya umwi izina kwene lilyo.
6. I cani icikalenga izina ukucindama?
6 Izina asi izwi sile ilya kulembwa pipepala. Uvwini vino Baibo ikalanda, ikati: “Izina licindame lyazipa penepo ukuluta ukukwata ivyuma ivingi.” (Mapi. 22:1; Kasa. 7:1) U mulandu ci uno izina lyacindamila sana? A pa mulandu wakuti mwaya na vino antu yauze yakaelenganya pa mwineco wi zina lilyo. Fwandi vino izina likalembwa nanti vino likalumbulwa vitacindama, icicindame a vino antu yakaelenganya nga yalola nanti ukuvwa izina lya muntu wiyo.
7. Uzye antu yazewanya uli izina lyakwe Leza?
7 Ndi cakuti antu yakulanda ivya ufi pali Yeova, ala yakulonda yauze yaelenganya iviipe pali aliwe. Ndi cakuti antu yelenganya apa viipe vivyo, yakatandika ukupeela Leza imilandu nu kuzewanya izina lyakwe. Umuku wa kutandikilapo lino umwi walanzile iviipe api zina lyakwe Leza nu kulenga yauze ukutandika ukwelenganya iviipe pali aliwe wali u mu calo ca Edeni. Lekini tulande pali vino tungasambilila kuli cii.
VINO IZINA LYAKWE LEZA LYAZEWANYIZIWE
8. I vyani vino Adamu na Eva yamanyile, nupya a mauzyo ci yauze yano tunguzya?
8 Adamu na Eva yamanyile ukuti izina lyakwe Leza a Yeova, nupya yamanyile ni vintu ivicindame sana pali aliwe. Yamanyile ukuti wali a Kaumba, Wino wayapeezile umi, incende isuma umwa kwikala na ya wao amalilike. (Utan. 1:26-28; 2:18) Nomba uzye yali nu kutwalilila ukwelenganya pali vyonsi vino Yeova wayacitiile? Uzye yali nu kutwalilila ukutemwa nu kutaizya Yeova? Mauzyo yayo yaswikwe lino umulwani wakwe Leza wayezizye.
9. Ukulingana ni lembelo lya Utandiko 2:16, 17 na 3:1-5, i vyani vino Yeova wanenyile atwalane ya kutandikilapo, nupya Satana walesile uli yelenganye ivipusaneko na vino Yeova wali?
9 Welengini Utandiko 2:16, 17 na 3:1-5. Satana waomvizye inzoka pa kulanda na Eva, wamuzizye ati: “Uzye icacumi Leza wamuinda ukulya iviseekwa vyaku miti yonsi ya mu calo?” Satana uzizye iuzyo umwali ufi pali Leza, nupya Eva watandike ukwelenganya ivipusaneko na vino Leza wali. Leza walanzile ukuti yangalya ivisekwa vya ku muti uli onsi ukufumyako sile onga. Adamu na Eva yali nu kulalya ivisekwa vya miti ipusanepusane iingi. (Utan. 2:9) Mu cumi cumi Yeova a kapekape. Nomba Leza walesizye Adamu na Eva ukulya ivizao vya ku muti onga sile. Fwandi Satana wapilike iuzyo. Satana walenzile ciloleke kwati Leza atali na ukapekape. Eva afwile welenginye ukuti, ‘Uzye kuli cimwi cino Leza asilonda ukuti nkwate?
10. Uzye Satana wazewanyizye uli izina lyakwe Leza apaswe, nupya i vyani ivyacitike?
10 Lino Satana uzizye iuzyo lii, Eva acili wali ni cuvwila kuli Yeova. Wanenyile Satana ningo vyonsi vino Leza wayanenyile. Walanzile nu kuti yatalinzile nu ku kumya ku muti uwo. Wamanyile nu kuti ukukanauvwila vino Leza wayacelwile kwali nu kuleta imfwa. Nomba Satana wamwaswike ukuti: “Cico cisi cacumi, mutalafwa awe.” (Utan. 3:2-4) Satana atalandanga sile ukuti Yeova wabefile. Wazewanyizye izina lyakwe Leza apaswe, nu kunena Eva ukuti Yeova u wa ufi. Acino Satana wizile ayela ciwa nanti kazewanya. Eva wabefilwe nupya wataile vino Satana wamunenyile. (1 Tim. 2:14) Wataile sana Satana ukucila Yeova. Cii calenzile afilwe ukupingulapo ningo. Wapingwilepo ukukanauvwila Yeova. Watozile icizao cino Yeova wayalesizye atandika nu kulya. Pa cisila wapeezileko Adamu cimwi.—Utan. 3:6.
11. I vyani vino avyazi itu akutandikilako yali nu kucita, nomba i vyani vino yafizilwe ukucita?
11 Elenganyini panono pali vino Eva wali nu kunena Satana. Elenganyini ukuti walanzile amazwi yaa: “Ntakumanyile, namanya Tata wane Yeova nupya namutemwa nu kumutaila. Watupeela na Adamu vyonsi vino twakwata. U mulandu ci uno ukulandila iviipe pali aliwe? Fuma pano!” Ala Yeova nga uvwile ningo sana ukuvwa umwanakwe umukazyana uwaya nu kutemwa walanda amazwi yaa asuma! (Mapi. 27:11) Nomba Adamu na Eva yataatemilwe Yeova nu mwenzo wao onsi. Adamu na Eva yafizilwe ukucingilila izina lyakwe Isi kuli kazewanya pa mulandu wakuti yataakweti ukutemwa.
12. Uzye Satana walenzile uli Eva ukutandika ukutwisika, nupya i vyani vino Adamu na Eva yafizilwe ukucita?
12 Wakwe vino itulola, Satana walenzile Eva ukutandika ukutwisika. Walenzile atandike ukutwisika ndi cakuti Yeova a Isi uwaya nu kutemwa. Adamu na Eva yafizilwe ukucingilila izina lyakwe Yeova ku ufi uno Satana wamubepizye. Nupya ci calenzile ukuti yuvwile Satana nu kupondokela Isi. Satana akaomvya imicenjelo ili imwi ndakai. Akazanza izina lyakwe Yeova lino akulizewanya. Antu aakauvwila ufi wakwe Satana yakata ukulondela ukateeka usuma wakwe Yeova.
YEOVA AKACINDIKA IZINA LYAKWE
13. Uzye ilembelo lyakwe Ezekelo 36:23, likatunena ukuti i lyasi ci licindame ilyaya muli Baibo?
13 Uzye Yeova akazizimizya sile apa ufi uno yakamubepezya ukwaula ukucitapo cimwi? Awe, asicita vivyo! Baibo ikatunena vino Yeova wacita pakulangilila ukuti iviipe vino Satana walanzile pali aliwe mu calo ca Edeni ivya ufi. (Utan. 3:15) Fwandi tungati: Yeova wacindika izina lyakwe ukuomvya Uwene wakwe uno Umwanakwe ali kateeka uulalenga kuye uwololoke nu mutende pano nsi. Muli Baibo mwaya ivyeo ivikatwazwa kumanya vino wacita pa kulenga izina lyakwe ukucindikwa.—Welengini Ezekelo 36:23.
14. Uzye vino Yeova wacisile lino yamupondokiile mu calo ca Edeni vikalanga uli ukuti watwalilila ukucindika izina lyakwe?
14 Satana wezya na maka ukulesya Yeova ukucita ukulonda kwakwe. Nomba Satana wafilwa ukucita vivyo pa miku iingi. Baibo ikalangilila vino Yeova wacita, nupya ikalangilila nu kuti Yeova a Tata uwaya nu kutemwa nupya Kateeka musuma. Icacumi, ukupondoka kwakwe Satana alino na yonsi aakamulondela kwalenga Yeova ukusoka sana. (Masa. 78:40) Lelo watwalilila ukuya na mano, kuteekela nu mulinganya nanti icakuti antu yapondokela izina lyakwe. Nupya walanga ukuti aliwe wakwata amaka ya kuteeka umu nzila izingi. Ni cicindamisye i cakuti watwalilila ukulanga ukutemwa muli vyonsi vino akacita. (1 Yoa. 4:8) Yeova watwalilila ukucindika izina lyakwe.
Satana wabefile Eva pali Yeova, nupya apa myaka iingi Ciwa watwalilila ukuzewanya Leza (Lolini mapalaglafu 9-10, 15) *
15. Uzye Satana akazewanya uli izina lyakwe Leza ndakai, nupya i vyani vyacitika?
15 Na ndakai kwene Satana watwalilila ukuzewanya izina lyakwe Leza. Akalenga antu yatwisika amaka yakwe Leza, umulinganya, amano nu kutemwa. Satana akaezya ukulenga antu ukuzumila ukuti Yeova asi Kaumba. Nupya ndi cakuti yazumila ukuti Leza akuno waya, Satana akaezya ukulenga yalola kwati amasunde yakwe Leza yakayapoka untungwa nupya yataya ningo. Nupya akasambilizya na antu ukuti Yeova ataya nu kutemwa nupya umunkalwe aakaoca antu mu moto usyazima. Ndi cakuti yazumila ufi uwo, cikayangukila sana ukukana ukateeka wakwe Yeova. Satana alatwalilila ukuzewanya izina lyakwe Yeova nu kwezya ukulenga antu yakane imiteekele yakwe Yeova ukufikila akononwe. Uzye alacimvya?
VINO MULINZILE UKUCITA PA MULANDU UU UCINDAME
16. I vyani vino mungacita vino Adamu na Eva yafizilwe ukucita?
16 Yeova wazumilizya antu aatamalilika ukwazwilizyako mu kucindika izina lyakwe. Fwandi mungacita vino Adamu na Eva yafizilwe ukucita. Asi mulandu nu kwikala umu nsi umwaya antu aakazewanya izina lyakwe Yeova, mwakwata isyuko lya kulanda icumi pali Yeova ukuti waya u musanguluke, umololoke, waya ningo nupya waya nu kutemwa. (Eza. 29:23) Mungatungilila ukateeka wakwe. Mungaazwa antu ukumanya ukuti ukateeka wakwe Yeova uwololoke uulaleta umutende ni nsansa ku viumbwa vyonsi.—Masa. 37:9, 37; 146:5, 6, 10.
17. Uzye Yesu wacisile uli pa kulenga izina lyakwe Isi ukumanyikwa?
17 Nga tukucingilila izina lyakwe Leza, ala tukukolanya Yesu Klistu. (Yoa. 17:26) Yesu walenzile izina lyakwe Isi ukumanyikwa, asi sile lino waliomvyanga lelo na lino wasambilizyanga antu pali vino Yeova waya. Insita imwi, walungike Afaliseo, asambilizyanga ukuti Yeova u munkalwe, akalonda kumupeela vino antu yatanga yakwanisye, waya ukutali nupya ataakwata uluse. Yesu wayazwile ukulola ukuti Isi akalangulukilako, wateekela, waya nu kutemwa nupya akaeleela. Nupya wazwilizye antu kumanya vino Yeova waya, pano muli vyonsi vino wacitanga wakolanyanga imiyele yakwe Isi.—Yoa 14:9.
18. Uzye tungacita uli pakuti tusisyepo ufi nu muzewanya uno antu yakaleta pali Yeova?
18 Wakwe vino Yesu wacitanga, tunganenako yauze pali vino twamanya pali Yeova, vino waya nu kutemwa alino nu luse. Nga tukucita vivyo ale tukufumyapo ufi nu muzewanya api zina lyakwe Yeova. Tukacindika izina lyakwe Yeova, kulilenga ukuya ilya muzilo mu melenganyo nu mu myenzo ya antu. Naswe kwene tungakolanya Yeova. Nanti icakuti tutamalilika, tungakwanisya. (Efeso 5:1, 2) Ndi cakuti vino tukalanda nu kucita vikalanga antu vino Yeova waya umu cumi cumi, tulaazwilizyako ukucindika izina lyakwe. Tukalenga izina lyakwe Leza ukucindikwa nga tukwazwa antu ukumanya icumi pali Leza. * Nupya tukalanga ukuti antu atamalilika yangatwalilila ukuya na ucisinka kuli Leza.—Yobo 27:5.
Tukalonda ukwazwa asambi ya Baibo ukumanya imiyele yakwe Yeova ili wakwe cikuuku nu kutemwa (Lolini mapalaglafu 18-19) *
19. Uzye ilembelo lyakwe Ezaya 63:7 likatwazwa uli ukumanya umulandu ucindame uno tukasambilizizya?
19 Kuli na vyuze vino tungacita pa kucindika izina lyakwe Yeova. Nga tukusambilizya yauze icumi icaya muli Baibo, tukalanda sana pali ukateeka wakwe Leza nu kuti Yeova sile u wakwata amaka ya kuteeka nupya ali kateeka musuma. Lelo, nanti icakuti cacindama ukulanda pa masunde yakwe Leza, cino tulinzile ukwikisyako sana amano u kuyazwa kutemwa Yeova, Tata witu nu kutwalilila ukuya acumi kuli aliwe. Tulinzile ukuyasambilizya pa miyele isuma yakwe Yeova, nu kulanda sana pali vino Yeova waya. (Welengini Ezaya 63:7.) Nga tukusambilizya umu nzila iyo, tulaazwa yauze kutemwa Yeova nu kulamuvwila pa mulandu wa kuti yakulonda ukuya acisinka kuli aliwe.
20. I vyani vino tulasambilila umu cipande cilondelelilepo?
20 Uzye lyene tungalenga uli yauze ukwelenganya ivisuma pali Yeova muli vino tukacita lino tukuyasambilizya? Icipande icilondelilepo cilaasuka iuzyo lilyo.
LWIMBO NA. 2 Wewe Yeova
^ pala. 5 U mulandu ci ucindame sana ku antu nu ku angeli? I cani cino umulandu uwo wacindamila nupya umulandu uwo watukuma uli? Kumanya amasuko ku mauzyo yaa na yauze akoline na yaa kumatwazwa ukukomya ucuza witu na Yeova.
^ pala. 18 Insita zimwi impapulo zitu zyalanzile ukuti tutalinzile ukulanda ukuti “Izina lyakwe Yeova lilinzile kuya ilya muzilo.” U mulandu ci? Pano kutaatala kwaya uwalanda ukuti Leza atakwata insambu zya kwamwa ukuti Yeova. Nomba pa kukomaana kwa pa mwaka ukwa mu 2017 kwali ukusenuka. Ceyamani walanzile ukuti: “Citaipa ukupepa ukuti izina lyakwe Yeova liye ilya muzilo pa mulandu wakuti izina lii likalondekwa ukucindikwa.”—Lolini Puloglamu ya mu Januwale pa jw.org®. Mulole apakuti LAIBULALE > JW BROADCASTING®.
^ pala. 62 ULONDOLOZI WA CIKOPE: Ciwa wazewanyizye Leza, ukunena Eva ukuti Leza u wa ufi. Pa myaka iingi, Satana Wasambilizya visambilizyo vya ufi wakwe icisambilizyo cakuti Leza umunkalwe nupya asi aliwe waumvile antu.
^ pala. 64 ULONDOLOZI WA CIKOPE: Umwina akulanda sana pa miyele yakwe Leza lino akutungulula isambililo.
