1-2. Ta men ko me rej kãitoklimoik Ri-Kõnnaan ro an Jeova?

EWÕR jet men ko raorõk rej jelõt kõj rainin​—rej kõn irooj bõtata eo an Anij im an kwõjarjar ãt eo etan. Ãinwõt Ri-Kõnnaan ro an Jeova, eaorõk ippãd kõnono kõn men kein rekãitoktoklimo. Bõtab irooj bõtata eo an Anij im an kwõjarjar ãt eo etan, men kein reoktak ke jãn doon? Rejjab.

² Kõj aolep em̦õj ad loe bwe ej juon menin aikuj ñan kokkwõjarjare ãt eo etan Anij. Em̦õj ad bar katak bwe ej menin aikuj ñan kam̦ool bwe irooj bõtata eo an Jeova ak wãween an tõl, ej wãween eo em̦m̦antata. Ealikkar bwe el̦ap an aorõk men kein ruo.

3. Ãt eo etan Jeova ej bar kitibuj ta?

³ Ilo m̦ool, ãt eo etan Jeova ej kitibuj aolep wãween ko kõn Anij eo ad, ekoba wãween an tõl. Innem ñe jej ba bwe men eo eaorõktata ej ñan karreoik etan Jeova jãn aolep riab ko, jej bareinwõt ba bwe ej juon menin aikuj ñan kam̦ool bwe wãween an Jeova tõl ej wãween eo em̦m̦antata. Ãt eo etan Jeova ej ekkejell̦o̦k ñan wãween an tõl ãinwõt eo ej Irooj bõtata.​—Lale bo̦o̦k eo “ Ta ko Rej M̦õttan Men Eo me El̦ap an Aorõk?”

4. Ewi wãween an Sam 135:13 kõmel̦el̦e kõn etan Anij, im ta kajjitõk ko jenaaj uwaaki ilo katak in?

⁴ Ãt in Jeova ej juon ãt ejejuwaan. (Riit Sam 135:13.) Etke ãt eo etan Anij elukkuun aorõk? Ewi wãween kar jino kõnanaik ãt eo etan? Ewi wãween an Anij kokkwõjarjare ãt eo etan? Im ewi wãween ad maroñ jipañ jojomare etan? Jenaaj etali uwaak ko ñan kajjitõk kein.

5. Ta eo jet remaroñ kajjitõk ñe rej roñ bwe ej menin aikuj ñan kokkwõjarjare ãt eo etan Anij?

⁵ “En kwõjarjar etam̦.” (Matu 6:9) Eñin ej juon iaan men ko raorõktata Jesus ear ba bwe jen jar kake. Bõtab ta mel̦el̦ein naan ko an Jesus? Ñan kokkwõjarjar ej mel̦el̦ein ñan kõm̦m̦an bwe en kwõjarjar im erreo. Bõtab, jet remaroñ kajjitõk im ba, ‘Ãt eo etan Jeova ejjab kwõjarjar im erreo kadede ke?’ Ñan uwaake kajjitõk in, jej aikuj lale ta eo juon ãt ej kitibuj.

6. Ta eo ej kõm̦m̦an an aorõk juon ãt?

⁶ Juon ãt ejjab baj kobain lõta ko rej je ioon juon peba ak me armej rej ba. Lale ta eo Baibõl̦ ej ba: “Em̦m̦an kããlõt juon ãt em̦m̦an, m̦okta jãn m̦weiuk ko rel̦ap.” (JK. 22:1; Ekl. 7:1) Etke ãt ej juon men el̦ap an aorõk? Kõnke ej kitibuj wãween an ro jet l̦õmn̦ak kõn eo ej bõk ãt eo. Innem wãween an wal̦o̦k etan juon armej ioon juon peba ak wãween an armej ro ba ãt eo etan, ejjab men ko kein me raorõktata. Ijoke, men eo eaorõktata ej kõn ta ko rej pãd ilo l̦õmn̦ak ko an armej ro ñe rej loe im roñ ãt eo.

7. Ewi wãween an armej kar kajjioñ ko̦kkure etan Anij?

⁷ Ñe armej rej kõnono riab n̦ae Jeova, rej kajjioñ kõm̦m̦an bwe armej ro ren l̦õmn̦ak nana kõn e. Ñe armej ro rej lo men ko renana, ekkã aer n̦aruon Anij im kõnanaik etan. Jinointata in an juon kar ba men ko renana kõn Anij im kajjioñ kõm̦m̦an bwe armej ren bõk l̦õmn̦ak ko renana kõn e, ej ilo kar jikin kallib in Iden. L̦õmn̦ak kõn ta eo jemaroñ katak jãn iien in.

8. Ta ko Adam im Iv rar jel̦ã, im ta kajjitõk ko jemaroñ kajjitõk ikijjeen men kein?

⁸ Adam im Iv rar jel̦ã etan Jeova, rar bareinwõt jel̦ã kõn men ko rem̦ool kõn Eo ej bõk ãt in. Rar jel̦ã bwe e eo ej ri-Kõm̦anm̦an eo aer, bwe ear lel̦o̦k mour ñan er, juon jikin aiboojoj ñan aer jokwe, im juon mourin m̦are eweeppãn. (Jen. 1:26-28; 2:18) Ijoke, rar ke wõnm̦aanl̦o̦k wõt im kõjerbale kõl̦mãnl̦o̦kjen̦ eo aer eweeppãn ñan kõl̦mãnl̦o̦kjen̦ kõn aolep men ko Jeova ear kõm̦m̦ani ñan er? Rar ke wõnm̦aanl̦o̦k wõt im kal̦apl̦o̦k yokwe eo aer im  aer kam̦m̦oolole Eo ej jutak kõn ãt in? Ear alikkar uwaak ko ñan kajjitõk kein ke ri-kõjdat eo an Anij ear mãlejjoñe erro.

9. Ekkar ñan Jenesis 2:16, 17 im 3:1-5, ta eo Jeova ear ba ñan rippãlele ro m̦oktata, im ewi wãween an kar Setan kõm̦m̦an bwe en bõd aer l̦õmn̦ak kõn Jeova?

⁹ Riit Jenesis 2:16, 17 im 3:1-5. Ilo an kar Setan kõjerbal juon jedpãnit bwe en kõnono ñan Iv, ear kajjitõk ippãn Iv im ba: “Em̦ool ke Anij ear ba, ‘Kom̦win jab m̦õñã jãn wõjke otemjej ilo jikin kallib eo’?” Kajjitõk in ear kwal̦o̦k kõn juon riab me ear jab lukkuun alikkar, ãinwõt juon baijin ettino. Ilo m̦ool, Anij ear ba bwe erro maroñ m̦õñã jãn jabdewõt wõjke, ijello̦kun juon wõt wõjke. Emaroñ kar lukkuun lõñ oran wõjke ko remaroñ kar m̦õñã jãni. (Jen. 2:9) Aet, Jeova el̦ap an jouj ilo an lel̦o̦k. Bõtab, juon wõt wõjke Anij ear kamo an Adam im Iv m̦õñã jãne. Innem alikkar bwe kajjitõk eo an Setan ear kõm̦m̦an bwe en bõd aer l̦õmn̦ak kõn Jeova. Setan ear kõm̦m̦an bwe ren l̦õmn̦ak bwe Anij ejjab jouj. Iv emaroñ kar l̦õmn̦ak, ‘Anij ej ke dãpij juon men em̦m̦an jãn ña?’

10. Ewi wãween an kar Setan kajju kõnanaik etan Anij, im ta eo ear wal̦o̦k jãn an kõm̦m̦ane men in?

¹⁰ Ilo tõre in, Iv ear watõk Jeova ãinwõt eo ej Tõl e. Ear uwaake Setan ilo an lukkuun kaalikkar naanin tõl ko jãn Jeova. Ear bar ba bwe joñan, rejjab maroñ uñũri wõjke eo. Ear jel̦ã bwe an jab pokake naanin kakkõl eo jãn Anij naaj tõll̦o̦ke ñan mej. Bõtab Setan ear uwaake im ba: “Kom̦ jãmin mej otem mej.” (Jen. 3:2-4) Kiiõ ejako an Setan kajjioñ kwal̦o̦k bwe Jeova ear riab. Ak ej kajju kõnanaik etan Anij, ej ãinwõt ñe ej ba ñan Iv bwe Anij ej juon ri-riab. Eñin wãween eo Setan ear erom tepil̦ eo, ak ri-ruruwe. El̦ap an kar m̦on̦e Iv, im Iv ear tõmake Setan. (1 Tim. 2:14) El̦apl̦o̦k an kar lõke Setan jãn Jeova. Men in ear kõm̦m̦an bwe en pidodo an Iv kõm̦m̦ane jokãlõt eo enanatata. Ear pepe in jab pokake Jeova. Ear jino m̦õñã jãn leen wõjke eo Jeova ear kamo an m̦õñã jãne. Innem tokãlik, ear lel̦o̦k kijen Adam.​—Jen. 3:6.

11. Ta eo jemãd im jined ro m̦oktata remaroñ kar kõm̦m̦ane, ijoke ta eo rar likjab in kõm̦m̦ane?

¹¹ Baj l̦õmn̦ak jidik m̦õk kõn men ko Iv en kar ba ñan Setan. L̦õmn̦ak el̦aññe ear ba naan kein, ãinwõt: “Ijaje kõn kwe, ak ijel̦ã kõn Jema, Jeova, im ij yokwe im lõke e. Ear letok men ko otemjej rej pãd ippemro Adam. Wõn kwe bwe kwõn kõnanaiki? Etal jãn jen̦e!” Jeova enaaj kar m̦õn̦õn̦õ in roñ naan kein jãn kõrã eo nejin etiljek! (JK. 27:11) Bõtab ear ejjel̦o̦k ippãn Iv juon yokwe em̦ool ñan Jeova, bareinwõt Adam. Kõn an kar ejjel̦o̦k aer yokwe rot in ñan Jemãer, Adam im Iv rar likjab in jojomare etan Jeova jãn aer kõnanaiki.

12. Ewi wãween an kar Setan jino jeor ineen pere ilo l̦õmn̦ak eo an Iv, im ta eo Adam im Iv rar likjab in kõm̦m̦ane?

¹² Ãinwõt kar kwal̦o̦k kake, ilo kõkkar, Setan ear jino jeor ineen pere ilo l̦õmn̦ak eo an Iv. Ear kõm̦m̦an bwe Iv en pere kain Anij rot eo ej jutak kõn ãt in Jeova. Innem Adam im Iv rar  likjab in jojomare etan Jeova jãn riab ko an Setan. Rar kõm̦m̦an bwe en pidodo aerro po ilo riab ko an Setan im ñan jum̦ae Jemãer. Ilo raan kein, Setan ej bar kõjerbal ejja wãween kein wõt ñan kapo ro jet. Ej kajjioñ ko̦kkure etan Jeova ilo an kõnanaiki. Armej ro rej tõmake naanin riab ko an Setan, epidodo aer jum̦ae tõl eo an Jeova me ewãnõk.

13. Ewi wãween an Ezekiel 36:23 kwal̦o̦k kõn men eo el̦aptata an Baibõl̦ kwal̦o̦k kake?

¹³ Jeova ej ke kõtl̦o̦k bwe juon en ruruwe e ilo wãween in im jab jojomare e make? Jaab, ejjab! Aolepen Baibõl̦ eo ej kwal̦o̦k kõn men ko em̦õj an Jeova kõm̦m̦ani ñan kam̦ool bwe men ko renana kar ba kõn e ilo jikin kallib in Iden, rejjab m̦ool. (Jen. 3:15) Ilo m̦ool, jemaroñ kwal̦o̦k ilo tukadu kõn men eo el̦ap an Baibõl̦ kwal̦o̦k kake, ej eñin: Jeova ej kokkwõjarjar etan ikijjeen Aelõñ eo an me eo Nejin ej tõle im enaaj kõjepl̦aaktok wãnõk im aenõm̦m̦an ñan lal̦ in. Baibõl̦ eo ej kwal̦o̦k kõn mel̦el̦e ko me rej jipañ kõj ñan jel̦ã ewi wãween an Jeova kokkwõjarjare ãt eo etan.​—Riit Ezekiel 36:23.

14. An Jeova em̦m̦akũt ñan men eo ear wal̦o̦k ilo jikin kallib in Iden, ewi wãween an men in kokkwõjarjare etan?

¹⁴ Setan ear kõmaat joñan an maroñ ñan kabõjrak Jeova jãn an kajejjet ankilaan. Bõtab elõñ alen in an Setan jab lo tõprak. Baibõl̦ eo ej kwal̦o̦k kõn wãween an kar Jeova em̦m̦akũt, im ej kam̦ool bwe ejjel̦o̦k bar juon me ej ãinwõt Jeova Anij. Em̦ool, bwe Setan im aolep ro rej rejetake ilo aer bar jum̦ae el̦ap aer kõmetake Jeova. (Sam 78:40) Bõtab, Jeova ear kõm̦adm̦õde apañ in ilo mãlõtlõt, ilo an kijenmej, im ekajet jim̦we. Ear bareinwõt kwal̦o̦k kajoor eo an el̦ap ilo elõñ wãween ko. Men eo el̦aptata, yokwe eo an ej alikkar ilo men otemjej ej kõm̦m̦ani. (1 Jon 4:8) Jeova ejjañin bõjrak jãn an kõm̦m̦an bwe en kwõjarjar etan.

15. Ewi wãween an Setan kõnanaik etan Anij rainin, im ta ko rej wal̦o̦k itok wõt jãn an ãindein?

¹⁵ Setan ej wõnm̦aanl̦o̦k wõt im kõnanaik etan Anij ilo raan kein. Ej m̦õn̦e armej ro ilo an kõm̦m̦an bwe ren pere bwe Anij ej juon eo ekajoor, ej ekajet ilo jim̦we, emãlõtlõt, im  ewõr yokwe ippãn. Ñan waanjoñak, Setan ej kajjioñ kõm̦m̦an bwe armej ren jab tõmak bwe Jeova ej ri-Kõm̦anm̦an eo. Im ñe armej rej tõmak bwe Anij ej pãd im mour, Setan ej kajjioñ kõm̦m̦an bwe ren tõmak bwe el̦ap an pen kien ko an Anij im bwe rejjab jim̦we. Ej bareinwõt katakin armej ro bwe Jeova ej juon Anij ejjel̦o̦k tũriam̦o ippãn im juon eo elãj me ej tile armej ro ilo juon kijeek ebwil ilo hell. Ñe rej tõmaki naanin riab kein, ejjel̦o̦k pere bwe renaaj kiiõ wõnm̦aanl̦o̦k im jum̦ae tõl eo an Jeova me ejejjet im jim̦we. Innem, m̦ae iien eo Jeova enaaj lukkuun ko̦kkure Setan, Setan enaaj wõnm̦aanl̦o̦k wõt im kõnanaik Jeova im kajjioñ kapoik eok bwe kwõn bar el̦l̦o̦k jãn e. Enaaj ke lo tõprak?

16. Ta eo jemaroñ kõm̦m̦ane me Adam im Iv rar likjab in kõm̦m̦ane?

¹⁶ Jeova ej kõtl̦o̦k bwe armej ro rejjab weeppãn ren maroñ bõk kun̦aaer ñan kokkwõjarjare etan. Ilo juon wãween, kwõmaroñ kõm̦m̦ane men eo Adam im Iv rar likjab in kõm̦m̦ane. Meñe jej mour ilo juon lal̦ eobrak kõn armej ro rej kõnanaik etan Jeova, ak jemaroñ jojomare etan Jeova ilo ad kwal̦o̦k ñan armej ro bwe Jeova eokkwõjarjar, ewãnõk, em̦m̦an, im ej yokwe. (Ais. 29:23) Jemaroñ rejetake tõl eo an. Jemaroñ kwal̦o̦k bwe wãween tõl eo an Jeova wõt ewãnõk im enaaj bõktok aenõm̦m̦an im m̦õn̦õn̦õ ñan aolep menin kõm̦anm̦an ko.​—Sam 37:9, 37; 146:5, 6, 10.

17. Ewi wãween an kar Jesus kwal̦o̦k kõn etan Jemãn?

¹⁷ Ñe jej jojomare etan Jeova, jej l̦oore joñak eo an Jesus Christ. (Jon 17:26) Jesus ear jab kõm̦m̦an wõt bwe armej ro ren jel̦ã kõn etan Jemãn ilo an kar kõjerbale etan, ak ear bareinwõt jojomare ãt eo etan. Ñan waanjoñak, ear oktak jãn Parisi ro me rar kwal̦o̦k bwe Jeova ej juon eo elãj, ekõbbo̦o̦jo̦j, ettol̦o̦k jãn kõj, im ejjel̦o̦k tũriam̦o ippãn. Ijoke, Jesus ear jipañ armej ro ñan kile bwe Jemãn ej juon eo ejel̦ã kõmmaanwa, ejel̦ã kijenmej, ej juon eo ej yokwe, im ejel̦ã jeorl̦o̦k bõd. Ear bareinwõt jipañ armej ro ñan jel̦ã kajjien Jeova ikijjeen an kar jejjet im jim̦we wãween an anõke kadkad ko kadkadin Jemãn ilo mour eo an kajjojo raan.​—Jon 14:9.

18. Ewi wãween ad maroñ kariabi naanin riab ko im naanin kõnanaik ko n̦ae Jeova?

¹⁸ Ãinwõt Jesus, jemaroñ kwal̦o̦k ñan ro jet  kõn men ko jejel̦ã kõn Jeova ilo ad katakin er bwe ej juon Anij in yokwe im ejouj. Ilo ad ãindein, jej kariabe naan ko reriab im naanin kõnanaik ko n̦ae Jeova. Jej kokkwõjarjare etan Jeova ilo ad kõm̦m̦an bwe en kwõjarjar etan ilo bũruon im l̦õmn̦ak ko an armej ro. Kõj bareinwõt jemaroñ anõke Jeova. Jemaroñ kõm̦m̦ane men in meñe jejjab weeppãn. (Eps. 5:1, 2) Ñe naan ko ad im kõm̦m̦an ko ad rej kaalikkar ñan armej ro kõn kain lukkuun Anij rot Jeova, jej jipañ kokkwõjarjare etan. Jej kokkwõjarjare etan ilo ad jipañ armej ro bwe ren rõl̦o̦k jãn aer kõm̦akoko ium̦win riab ko kõn etan. * Jej bareinwõt kam̦ool bwe armej ro rejjab weeppãn remaroñ dãpij wõt aer tiljek ñan Anij.​—Job 27:5.

19. Ewi wãween an Aiseia 63:7 jipañ kõj ñan kile ta eo en kar unleplepin ad katakin ro jet?

¹⁹ L̦õmn̦ak kõn bar juon men eaorõk me jemaroñ jerbale. Ñe jej katakin ro jet kõn katak ko rem̦ool jãn Baibõl̦, ekkã wõt ad kwal̦o̦k kõn irooj bõtata eo an Anij, mel̦el̦ein bwe ewõr an Jeova jim̦we im maroñ ñan tõl ijoko otemjej ilo lañ im lal̦, im men in elukkuun m̦ool. Em̦ool bwe eaorõk ñan ad l̦õmn̦ak kõn kien ko an Anij, bõtab mejãnkajjik eo ad el̦aptata ej ñan jipañ ro jet ñan yokwe Jemãdwõj, Jeova, im ñan tiljek wõt ñan e. Kõn men in, jej aikuj kwal̦o̦k kõn kadkad ko rem̦m̦an kadkadin Jeova, im kaalikkar kõn kain Anij rot eo ãt in Jeova ej jutak kake. (Riit Aiseia 63:7.) Ilo ad katakin ro jet ilo wãween in, jenaaj jipañ er ñan yokwe Jeova im ñan pokake e kõnke rekõn̦aan tiljek ñane.

20. Ta eo jenaaj etale ilo katak eo tok juon?

²⁰ Innem, ewi wãween ad maroñ lukkuun lale bwe kõm̦m̦an ko ad im wãween ad katakin ro jet en nõbar etan Jeova im kõm̦m̦an aer ruwaakl̦o̦k ñane? Jenaaj lo uwaakin kajjitõk in ilo katak eo tok juon.