1-2. Yel-bʋs yell goam n noom a Zeova Kaset rãmbã?

YEL-KÃSEMS n pak tõnd rũndã-rũndã: Yaa nebã fãa na bãng t’a Zeova a ye tãa n tar sor n na n dɩ naam, la a yʋʋrã na paam waoogrã. Yel-kãensã yell goam nooma tõnd a Zeova Kaset rãmbã. La Wẽnnaam naamã yellã, la a yʋʋrã na paam waoogrã pa bũmb a yiib sẽn welg toor-toor ye.

² Tõnd fãa wa n bãngame tɩ Wẽnnaam yʋʋrã segd n paama waoogre. D leb n bãngame tɩ segdame tɩ nebã fãa yã vẽeneg t’a Zeova naamã, bɩ a sẽn dɩt a naamã to-to wã la sõma n yɩɩda. Yel-kãensã b yiibã paka tõnd hal wʋsgo.

3. Bõe n naag a Zeova yʋʋrẽ wã?

³ Togs sɩdã, a Zeova yʋʋrã bilgda bũmba fãa tõnd Wẽnnaamã wɛɛngẽ, a sẽn dɩt a naamã to-to wã sẽn naage. Rẽnd b sã n yeel t’a Zeova yʋʋrã na paam waoogrã tara yõod n yɩɩd bũmb fãa, rat n yeelame me tɩ nebã fãa tog n bãnga vẽeneg t’a Zeova sẽn dɩt a naamã to-to wã la sõma n yɩɩda. A Zeova sẽn yaa yĩngr la tẽng Naab n dɩt a naamã to-to wã, ne a yʋʋrã sẽn dat n yɛɛlgã tũuda taaba.—Ges-y zĩ-gũbr ning sẽn yaa “ Yel-kãseng sẽn tar nens toor-toore.”

4. Bõe la Yɩɩn-sõamyã 135:13 yet Wẽnnaam yʋʋrã wɛɛngẽ, la sogs-bʋs la d na n leok sõs-kãngã pʋgẽ?

⁴ A Zeova yʋʋrã ka to ye. (Karm-y Yɩɩn-sõamyã 135:13.) Bõe yĩng tɩ Wẽnnaam yʋʋrã tar yõod wʋsg woto? Wãn to la b wa n sãam a yʋʋrã? Wãn to la a kɩtd t’a yʋʋrã paamd waoogre? Bõe la d tõe n maan n sõng t’a yʋʋrã paam waoogre? D na n leoka sogs-kãensã.

5. B sã n gomd Wẽnnaam yʋʋrã na paam waoogr yelle, bõe la neb kẽer yeta?

⁵ “Bɩ yãmb yʋʋr paam waoogre.” (Mat. 6:9) A Zeezi wilgame tɩ woto la d segd n deng n kos d pʋʋsg pʋgẽ. A gomdã võor yaa bõe? Gom-bil ning b sẽn lebg tɩ “paam waoogrã” rat n yeelame tɩ “maan tɩ yɩ yɩlemde, wall sõngo.” Tõe tɩ neb kẽer yeel yaa: ‘A Zeova yʋʋrã pa zoe n yaa yɩlemd la sõng la?’ Sẽn na yɩl n leoke, rẽnda d bao n bãng yʋʋr sẽn wilgd bũmb ninga.

6. Bõe n kɩtd tɩ yʋʋr tar yõodo?

⁶ Yʋʋr pa gʋls-biis sẽn be sebr zug bɩ b sẽn boond noorẽ bal ye. Biiblã yetame: “Yʋ-noog n são arzegs wʋsgo.” (Yel. 22:1; Koɛ. 7:1) Bõe yĩng tɩ ned yʋʋr tar yõod wʋsg woto? Bala yʋʋr tẽegda neb a taabã tagsg sẽn yaa to-to a soabã zugu. Rẽnd pa yʋʋr sẽn gʋls to-to, wall b sẽn boond-a to-to wã la sard ye. Sẽn tar yõod n yɩɩdã yaa neb a taabã sẽn tagsde, bɩ b sẽn yet a soabã zugã.

7. Wãn to la nebã sãamd Wẽnnaam yʋʋrã?

⁷ Nebã sẽn togsd yɛl sẽn pa sɩd a Zeova zugã, b sãamda a yʋʋrã. B sẽn maand woto wã, b ningd-a-la taal la b kãnegd-a. Yɩɩ Edɛn zẽedẽ wã la b sɩng Wẽnnaam yʋʋrã sãoongo. D ges yam ning d sẽn tõe n dɩk yel-kãngã pʋgẽ.

8. Bõe la a Ãdem ne a Awa ra mi, la bõe me la d sokd d menga?

⁸ A Ãdem ne a Awa ra mii a Zeova yʋʋrã, la b ra mi bũmb ka tɛk sẽn tar yõod wʋsg a mengã zugu. B ra miime tɩ yaa yẽ la Naandã, soab ning sẽn kõ-b vɩɩmã, zĩ-neer tɩ b vɩ a pʋgẽ, la a lugl b kãadmã tɩ zems zãngã. (Sɩng. 1:26-28; 2:18) La rẽ yĩnga, ne b sẽn da tõe n tags tɩ zemsã, b na n kell n bʋgsa a Zeova sẽn maan bũmb nins fãa n kõ-bã zug bɩ? B na n kell n bao n nonga a Zeova n paasdẽ, la b kell n wilg me tɩ b sũur nooma ne-a bɩ? Wẽnnaam bɛ wã sẽn wa n mak-bã, sogs-kãensã leoorã lebga vẽenega.

9. Sẽn zems ne Sɩngr 2:16, 17 la 3:1-5 wã, bõe la a Zeova yeel a Ãdem ne a Awa, la wãn to la a Sʋɩtãan golem sɩdã?

⁹ Karm-y Sɩngr 2:16, 17 la 3:1-5. A Sʋɩtãan tũnuga ne waaf n sok a Awa yaa: “Sɩd-sɩdã, rẽ yĩnga, Wẽnnaam yeela yãmb tɩ  y ra rɩ tɩɩsã fãa sẽn be zẽedã zĩigẽ wã biis sɩda?” A Sʋɩtãan sokrã naaga ne ziri Wẽnnaam zugu, t’a Awa sɩng masã n tagsd wẽng Wẽnnaam zugu. Wẽnnaam yaool n da yeelame tɩ b tõe n dɩɩ tɩɩsã fãa biisi, sã n pa tɩɩg a ye bala. Tɩɩs nins a Ãdem ne a Awa sẽn da tõe n dɩ b biisã ra yaa ka tɛka. (Sɩng. 2:9) Hakɩɩka, a Zeova sɩd yaa kõat meng-menga. La tɩɩg a ye bal la Wẽnnaam yeel a Ãdem ne a Awa tɩ b pa segd n dɩ a biisã ye. Rẽnd a Sʋɩtãan sokrã pʋgẽ, a golma sɩdã. A maaname tɩ yaa wa Wẽnnaam pa kõat ye. Tõe t’a Awa ra sokda a meng yaa: ‘Bõn-sõng la Wẽnnaam solgd n pa rat tɩ m paam bɩ?’

10. Wãn to la a Sʋɩtãan sãam Wẽnnaam yʋʋrã vẽeneg-vẽenega, la baasa wãna?

¹⁰ Hal n tãag sasa ning a Sʋɩtãan sẽn sok a Awa sokrã, t’a Awa ra ket n sakda a Zeova. A togsa a Sʋɩtãan noor ning a Zeova sẽn da kõ wã vẽenega. A pʋd n paasame tɩ yẽ ne a sɩdã pa segd n sɩɩs tɩɩgã meng ye. Pagã ra miime tɩ Wẽnnaam keoog-b-la vẽeneg tɩ b sã n kɩɩse, b na n kiime. La a Sʋɩtãan yeelame yaa: “Yãmb ka na n tol n ki ye!” (Sɩng. 3:2-4) A Sʋɩtãan pa le gomd n yɛgd ye. Masã wã, yaa Wẽnnaam yʋʋrã la a sãamd vẽenega, n yet a Awa t’a Zeova yaa ziri yagda. A Sʋɩtãan sẽn maan woto wã, a lebga munaafɩɩk bɩ kãnegda. A belga a Awa fasɩ, hal t’a tẽ-a. (1 Tɩm. 2:14) A Awa kɩsa a Sʋɩtãan sɩd n yɩɩd a Zeova. Rẽ kɩtame tɩ yɩ nana ne a Awa t’a yãk yam sẽn tolg n yaa wẽnga. A yãka yam n kɩɩs a Zeova noore. A yãka tɩɩg ning a Zeova sẽn yeel tɩ b ra rɩ wã bil n dɩ. Rẽ poore, a kõo a Ãdem me t’a rɩ.—Sɩng. 3:6.

11. Bõe la d yaab a Ãdem ne a Awa ra tõe n maane, la bõe la b pa tõog n maane?

¹¹ Tags-y bilf n ges-y-yã a Awa sẽn da segd n leok a Sʋɩtãan tɩ bũmb ninga. Mams-y wa a sẽn da na n yeel-a yaa: “Mam pa mi foo ye. La m mii m Ba a Zeova, n nong-a la m kɩs-a sɩda. A kõo maam ne a Ãdem bũmb fãa. Fo yɩta wãn n gomd a yell wẽnga? Kẽng n looge!” A Awa sã n da yeel woto, a Zeova sũur da na n yɩẽ-la noog wʋsg ne a bi-puglã, bala ra na n wilgame t’a maanda sɩd ne-a. (Yel. 27:11) La a Awa ne a Ãdem fãa ra pa nong a Zeova ne nonglem hakɩɩk ye. Woto kɩtame tɩ b pa tõog n sõng tɩ b Ba wã yʋʋrã paam waoogre, b sẽn wa n sɩng yʋʋrã sãoongã ye.

12. Wãn to la a Sʋɩtãan kɩt tɩ sãmbs sɩng a Awa sũurẽ wã, la bõe la a Ãdem ne a Awa pa maane?

¹² Wa d sẽn yã wã, a Sʋɩtãan reng n kɩtame tɩ sãmbs sɩng a Awa sũurẽ wã. A kɩtame t’a Awa maan sãmb-sãmb a Zeova sã n sɩd yaa Ba sẽn nong a kamba. A Ãdem ne a Awa pa bao n na n waoog a Zeova yʋʋrã, n kɩɩs a Sʋɩtãan ziri wã ye. B kelga a Sʋɩtãana, n kɩɩs b Ba wã nana-nana. Yaa woto me la a Sʋɩtãan maand rũndã-rũndã. A kãnegda a Zeova n sãamd a yʋʋrã.  Neb nins sẽn tẽed a Sʋɩtãan ziri wã sakda nana-nana, n kɩɩs a Zeova naamã a sẽn dɩt ne tɩrlmã.

13. Wãn to la Ezekɩyɛll 36:23 wilgd Biiblã gom-zugu?

¹³ Rẽ yĩnga, a Zeova sĩndame, n pa baood n na n puk a Sʋɩtãan kãnegrã bɩ? Ayo. Biiblã sẽn gomd bũmb ning yell n tɩ yɩɩda, yaa a Zeova sẽn maand to-to n na n wilg tɩ bũmb ning b sẽn yeel yẽ zug Edɛnnã yaa ziri. (Sɩng. 3:15) Sɩd me, ad d sẽn tõe n kʋms Biiblã koɛɛgã to-to: A Zeova na n kɩtame t’a yʋʋrã paam waoogr ne Rĩungã a sẽn ning a Bi-riblã nugẽ wã maasem, la a kɩt me tɩ tɩrlem la laafɩ le zĩnd tẽngã zugu. Biiblã tara kibay sẽn sõngd tõnd tɩ d bãng a Zeova sẽn kɩtd t’a yʋʋrã paamd waoogr to-to.—Karm-y Ezekɩyɛll 36:23.

14. Wãn to la a Zeova sẽn tall manesem ning b sẽn wa n kɩɩs-a Edɛnnã kɩt t’a yʋʋrã paam waoogre?

¹⁴ A Sʋɩtãan maana a sẽn tõe fãa n na n gɩdg a Zeova raabã pidsgu. La a sẽn mak bũmb ninsã fãa pa yãk neng ye. Biiblã wilgda a Zeova sẽn maand bũmb ninsã, la a wilgdẽ me t’a Zeova yaa Ba sẽn nong a kamba, la t’a naamã sõmblem ka to ye. Togs sɩdã, a Sʋɩtãan ne a poorẽ dãmbã kɩɩsgã sãama a Zeova sũur wʋsgo. (Yɩɩn. 78:40) La baa b sẽn sãam a yʋʋrã woto wã, a bao n na n welga yellã ne yam, sũ-mar la tɩrlem. A wilga naoor ka tɛk me t’a pãngã ka to ye. Sẽn yɩɩd fãa, a nonglmã pukda a sẽn maand fãa pʋgẽ. (1 Zã 4:8) A Zeova tʋmda wakat fãa a yʋʋrã waoogr yĩnga.

15. Wãn to la a Sʋɩtãan sãamd Wẽnnaam yʋʋrã rũndã-rũndã, la rẽ wata ne bõe?

¹⁵ A Sʋɩtãan ket n sãamda Wẽnnaam yʋʋrã rũndã-rũndã. A belgda nebã tɩ b sãmbd Wẽnnaam sã n sɩd yaa pãn-kãsenga, tɩrlem, yam la nonglem soaba. Wala makre, a Sʋɩtãan makdame n na n kɩt tɩ nebã tẽ tɩ pa a Zeova n naan bũmba fãa ye. La nebã sã n tẽed tɩ Wẽnnaam beeme, a Sʋɩtãan makdame n na n kɩt tɩ b tẽ tɩ Wẽnnaam yaa dem-deme, la t’a noyã  tũub yaa toogo, n leb n pa zems ye. A Sʋɩtãan pʋd n zãmsda nebã t’a Zeova pa nimbãan-zoɛta, la t’a yaa nen-kɛglem soab sẽn yõogd nebã bugum yiri. Nebã sã n tẽed ziri a woto, nana-nana bala, b wat n zãgsa a Zeova naamã sẽn yaa tɩrgã. Hal t’a Zeova wa sãam a Sʋɩtãan zãng fasɩ, a Sʋɩtãan na n ket n kãnegd-a lame, la a bao n kɩt tɩ yãmb me kɩɩs-a. Y na n basame t’a tõog-y bɩ?

16. Bõe la a Ãdem ne a Awa pa tõog n maane, tɩ yãmb tõe n maane?

¹⁶ A Zeova kõo sor tɩ ninsaalb sẽn pa zems zãng tõe n naag n sõng t’a yʋʋrã paam waoogre. Sɩd me, yãmb tõe n maana bũmb ning a Ãdem ne a Awa sẽn pa tõog n maanã. Baa ne dũni ning pʋgẽ d sẽn be wã sẽn pid ne neb sẽn kãnegd a Zeova la b sãamd a yʋʋrã, y tõeeme n sɩd kɩt t’a yʋʋrã paam waoogre, la y wilg nebã t’a Zeova yaa sõngo, tɩrga, maan-neer la nonglem soaba. (Eza. 29:23) Y tõe n wilgame tɩ y sakda a naamã. Y tõe n sõnga nebã tɩ b bãng tɩ yaa a Zeova sẽn dɩt a naamã to-to wã bal n sɩd zemse, la tɩ yaa yẽ bal n tõe n kɩt tɩ bõn-naandsã fãa paam laafɩ la sũ-noogo.—Yɩɩn. 37:9, 37; 146:5, 6, 10.

17. Bõe la a Zeezi maan-yã, tɩ kɩt tɩ b bãng a Ba wã yʋʋre?

¹⁷ D sã n waoogd a Zeova yʋʋrã, yaa a Zeezi togs-n-taar la d rɩkda. (Zã 17:26) A Zeezi sẽn da pʋt a Ba wã yʋʋrã, a kɩtame tɩ nebã bãng yʋʋrã. La pa rẽ bal ye. A ra sõngda nebã me tɩ b bãngd a Zeova sẽn sɩd yaa Wẽnnaam ning buudã. Wala makre, Fariziẽ-rãmbã ra maaname tɩ yaa wa a Zeova yaa Wẽnnaam sẽn yaa dem-deme, sẽn pa tar nimbãan-zoeere, sẽn zãr ne ninsaalbã, la sẽn pa sugr kõata. La a Zeezi kɩɩsa Fariziẽ-rãmbã sẽn da yetã, n sõng nebã tɩ b bãng t’a Ba wã pa dem-deme, t’a yaa sũ-mar la nonglem soaba, la sugr kõata. A sẽn da rɩkd a Ba wã togs-n-taar kɛpɩ a sẽn da maand fãa pʋgẽ wã, rẽ me sõnga nebã tɩ bãng a Zeova.—Zã 14:9.

18. Wãn to la d tõe n kɩt tɩ nebã bãng ziri nins b sẽn yelgd a Zeova zugã?

¹⁸ D tõe n maana wa a Zeezi, n wilg nebã bũmb nins tõnd sẽn mi a Zeova zugã, n sõng-b tɩ b bãng t’a yaa Wẽnnaam sẽn  sɩd yaa nonglem la maan-neer soaba. D sã n maand woto, d na n puka ziri nins b sẽn yelg a Zeova zugã. D kɩtdame t’a Zeova yʋʋrã paamd waoogre, n kɩtdẽ tɩ nebã getẽ tɩ yaa yʋʋr sẽn welg toore, n yaa sõngo. Tõnd me tõe n dɩka a Zeova togs-n-taare. Yaa bũmb sẽn tõe, baa ne tõnd sẽn pa zems zãngã. (Efɛ. 5:1, 2) Tõnd no-goamã la d tʋʋm-tʋmdɩ wã sã n sõngd nebã tɩ b bãngd a Zeova sẽn sɩd yaa Wẽnnaam ning buudã, d kɩtdame t’a yʋʋrã paamd waoogre. D sã n sõngd nebã tɩ b bãngd sɩdã Wẽnnaam zugu, d kɩtdame me t’a yʋʋrã paamd waoogre. D wilgdame me tɩ baa ninsaalb sẽn pa zems zãng tõe n kell n maana sɩd ne Wẽnnaam baa toog pʋgẽ.—Zoob 27:5.

19. Bõe la Ezayi 63:7 wã yeta, tɩ sõngd tõnd tɩ d bãng bũmb ning d sẽn dat n tɩ yɩɩd nebã zãmsgã wɛɛngẽ?

¹⁹ Bũmb a to la d tõe n maan n kɩt t’a Zeova yʋʋrã paam waoogre. D sã n wa zãmsd d taabã Biiblã sẽn sɩd yetã, d nong n gomda Wẽnnaam naam sẽn ka to wã yelle, n yetẽ t’a Zeova bal n tar sor n na n yɩ yĩngr la tẽng Naaba. Woto sɩd zemsame. Yaa sɩd tɩ d segd n sõng-b lame tɩ b bãng Wẽnnaam noyã. La d sẽn dat n tɩ yɩɩdã yaa d sõng nebã tɩ b wa nong d Ba a Zeova, la b maan sɩd ne-a. Dẽnd d segd n sõng-b lame tɩ b bãng a Zeova zʋg-sõma wã neere, la d wilg-b a Zeova sẽn sɩd yaa Wẽnnaam ning buudã. (Karm-y Ezayi 63:7.) D sã n zãmsd nebã woto, d na n sõng-b lame tɩ b nong a Zeova la b sak-a, b sẽn dat n maan sɩd ne-a wã yĩnga.

20. Bõe la d na n yã sõsg ning sẽn pʋgdã pʋgẽ?

²⁰ La bõe la d tõe n maane, tɩ d yel-manesmã la d sẽn zãmsd nebã to-to wã sõng-b tɩ b waoog a Zeova yʋʋrã, la kɩt me tɩ b rat a zoodo? Sõsg ning sẽn pʋgdã na n leoka sok-kãngã.