1, 2. ¿Tlake tlamachtili kinpaktia kamanaltisej Jehová itlajtoltemakauaj?

ONKA ome tlamantli tlen tlauel ipati: tijnextisej san Jehová kuali tlanauatia uan tijmanauisej itoka. Jehová itlajtoltemakauaj tlauel kinpaktia kamanaltisej tlen ni tlamachtili. Uan, ¿kenke ni ome tlamantli nelia tlauel ipati?

² Nochi tijyekojtokej tlauel moneki tijmanauisej o kejuak tipajpakasej toTeotsij itoka uan tijnextisej san Jehová tlauel kuali tlanauatia. Kinamiki tijpatiitasej ni ome tlamantli.

3. ¿Tlake kinextia toTeotsij itoka?

³ Jehová itoka kinextia kenijkatsa nelnelia eli toTeotsij, uan nojkia kenijkatsa tlanauatia. Yeka, tlaj tikijtouaj tlauel moneki tijmanauisej toTeotsij iToka, uajka nojkia tikijtouaj tlauel moneki tijnextisej san Jehová kuali tlanauatia. Itoka kuali kinextia kenijkatsa kitekiuia itlanauatil kema tlanauatia (xikita nopa recuadro “ Se keski tlamantli tlen moneki monankilis”).

4. ¿Tlake kiijtoua Salmo 135:13 tlen toTeotsij itoka, uan tlake tlajtlanili tijnankilisej?

⁴ San toTeotsij kitekiuia nopa tokajyotl Jehová uan nelia tlauel ipati (xijpoua Salmo 135:13 *). ¿Kenke itoka tlauel ipati? ¿Kenijkatsa kitlaijiljuijkej o kejuak kisokiuijkej itoka? ¿Kenijkatsa toTeotsij kiueyichiua o kipajpaka itoka? ¿Uan kenijkatsa uelis tojuantij tijmanauisej itoka? Ma tikitakaj ipan ni tlamachtili.

5. ¿Tlake uelis motlatsintokiaj sekij kema kikakij toTeotsij itoka moneki moueyichiuas?

⁵ “Ma kiueyichiuakaj motoka” (Mat. 6:9). Jesús kiijtok  tlauel moneki titlajtlanisej ni kema timomaijtosej pampa nelia tlauel ipati. ¿Tlake kiijtosneki tlen Jesús kiijtok? Nopa tlajtoli tlen Jesús kitekiuik kiijtosneki kipajpakchiuasej se tlenijki, ma eli tlatsejtseloltik, chipauak o amo ma sokiyojto. Tlaj ya nopa kiijtosneki, ¿uajka toTeotsij itoka amo tlatsejtseloltik o tlapajpaktik? ¿Kenke moneki tipajpakchiuasej? Tlaj tijnekij tijmatisej ni, achtoui moneki tijmatisej kenijkatsa motekiuia se tokajyotl o tlake kiixnextia.

6. ¿Kenke se tokajyotl tlauel ipati?

⁶ Se tokajyotl amo san eli se tlajkuiloli tlen motlalia ipan se amatl o tlen sekinok kitenkixtiaj. Biblia kiijtoua ni: “Más kuali mitskualitasej para tiitstok xitlauak uan axpara tijpiaskia oro uan plata hasta mokaua” (Prov. 22:1; Ecl. 7:1). Uajka, ¿kenke tlauel ipati se tokajyotl? Pampa ika se tokajyotl kiixmatij se akajya uan kinextia kenijkatsa kiitaj sekinok. Yeka, maske amo ipati kenijkatsa moijkuiloua o motenkixtia se tokajyotl, kena ipati tlen sekinok moiljuiaj kema kikakij nopa tokajyotl o kema kiitaj nopa maseuali katli kiampa itoka.

7. ¿Kenijkatsa kisokiuijtokej toTeotsij itoka?

⁷ Kema se akajya kiistlakauia Jehová, kichiua sekinok ayokmo kuali ma kiitakaj o kisokiuilia itoka. Ipan xochimili Edén, pejkej kisokiuiliaj toTeotsij itoka uan yeka maseualmej ayokmo kuali kiitakej. Ma tikitakaj tlake techmachtia tlen panok.

8. 1) ¿Tlake kimatiyayaj Adán uan Eva? 2) ¿Tlake sekinok tlajtlanili uelis timotlatsintokiaj?

⁸ Adán uan Eva kimatiyayaj kenijkatsa itoka toTeotsij, uan kimatiyayaj sekinok tlamantli tlen ya, kej tlachijchijketl uan katli kinmakatoya nemilistli, se yejyektsi xochimili uan kenijkatsa inijuantij amo eliyayaj tlajtlakolejkej (Gén. 1:26-28; 2:18). Maske Jehová kinmakatoya nochi ni tlamantli, ¿nojua moiljuiskiaj ipan tlen ya kinmakatoya? ¿Kinextiskiaj nojua tlauel kiikneliyayaj uan kitlaskamatiliyayaj? Nopa tlamantli neski kema toTeotsij ikualankaitaka kinyejyekok.

9. Kej kiijtoua Génesis 2:16, 17 uan 3:1-5, ¿tlake kiniljuik Jehová Adán uan Eva, uan kenijkatsa Satanás kipatlak tlen Jehová kiijtojtoya?

 ⁹ (Xijpoua Génesis 2:16, 17; 3:1-5). Satanás kitekiuik se kouatl kema kiiljuik Eva: “¿Axinmechiljuijtok Dios para amo xijkuakaj itlajka niyon se kuauitl ipan ni xochimili?”. Kiijtok se istlakatili kema kitlatsintokik nopa. ToTeotsij kiijtojtoya ueliskiaj kikuasej nochi tlen onkayaya, uan san setsi kuauitl itlajka amo ueliskiaj kikuasej. Kampa itstoyaj Adán uan Eva onkayaya miak kuatlajkayotl uan ueliskiaj kitlapejpenisej tlen kinekiskiaj (Gén. 2:9). Jehová kinextik amo eliyaya itskuimitl pampa kinmakatoya miak tlamantli. San setsi kuauitl itlajka kiniljuijtoya amo ma kikuakaj. Uajka, Satanás kipatlak tlen Jehová kiijtojtoya uan kichijki ma nesi Jehová eliyaya itskuimitl. Uelis Eva moiljuik Jehová amo kinekiyaya kimakas se tlamantli tlen kuali.

10. ¿Kenijkatsa Satanás kisokiuik itoka Jehová, uan tlake panok?

¹⁰ Kema panok nopa, Eva nojua kiitayaya Jehová kej iTlanauatijka. Uan kema kinankilik Satanás, xitlauak kiijtok tlen toTeotsij kiniljuijtoya. Uan kiijtok amo monekiyaya kiitskisej yon se kentsi nopa kuauitl. Eva kuali kimajtoya toTeotsij kiniljuijtoya mikiskiaj tlaj amo kineltokaskiaj. Uajka, Satanás ayokmo kitemolik kenijkatsa kikajkayauaskia uan nimantsi kiiljuik: “Axneli, axinmikisej” (Gén. 3:2-4). Kiampa kiistlakauik Jehová uan kisokiuik itoka pampa kiijtok san kinkajkayajtoya. Kiampa Satanás mokuepki se istlakatiketl o diablo. Tlauel kikajkayajkej Eva; kineltokak tlen Satanás kiiljuik (1 Tim. 2:14). Motemachik ipan ya uan amo ipan Jehová, yeka kitlapejpenik kichiuas tlen tlauel amo kuali: amo kineltokak Jehová uan kikuajki tlen kinauatijtoyaj amo ma kikua. Teipa, nojkia kimakak Adán nopa kuatlajkayotl (Gén. 3:6).

11. ¿Tlake monekiyaya kichiuasej Adán uan Eva?

¹¹ Ma timoiljuikaj kenijkatsa Eva ueltoskia kinankilis Satanás. Ueltoskia kiiljuis: “Na amo nimitsixmati, uan noTata Jehová kena nikixmati. Nikiknelia uan nimotemachia ipan ya. Na uan Adán techmakatok nochi tlen tijpiaj. ¿Kenke tikistlakauia? ¡Ayokmo tleno xikijto!”. Jehová tlauel yolpaktoskia tlaj Eva kinextijtoskia kiiknelia uan kimanauijtoskia pampa kinextijtoskia amo kitlauelkaua (Prov. 27:11). Ya uan iueue amo nelia kiikneliyayaj. Yeka, inijuantij amo kimanauijkej ininTata itoka.

12. ¿Tlake kichijki Satanás ma moiljui Eva, uan tlake amo kichijkej Adán uan Eva?

¹² Satanás pejki kisokiuia Jehová itoka kema kiistlakauik uan kichijki Eva ma moiljui Jehová amo eliyaya se kuali teTaj. Uan Adán uan Eva amo kimanauijkej Jehová itoka. Inijuantij kineltokakej tlen Satanás  kiniljuik uan kiijixnamijkej ininTata. Nama, Satanás nojkia kiampa kichiua. Kisokiuia toTeotsij itoka kema kiistlakauia uan kichiua maseualmej amo ma kitlepanitakaj Jehová.

13. ¿Kenijkatsa Ezequiel 36:23 kinextia tlake moixtoma ipan Biblia?

¹³ ¿San mokajki Jehová kema kiistlakauijkej uan kisokiuijkej itoka? Amo, pampa nochi tlen ijkuilijtok ipan Biblia kinextia tlake kichijtok Jehová uan kiampa kinextis Satanás san kiistlakauik ipan Edén (Gén. 3:15). Nochi tlen ijkuilijtok ipan Biblia uelis tikixtomasej san ika se keski tlajtoli: Jehová kipajpakchiua itoka ika iTlanauatijkayo, kampa tekichiua iKone, uan kichiua ipan Tlaltipaktli ma onka tlaseuilistli uan ma mochiua tlen xitlauak. Biblia kiijtoua se keski tlamantli tlen techpaleuia ma tijkuamachilikaj kenijkatsa Jehová kiueyichiua o kipajpakchiua itoka (xijpoua Ezequiel 36:23).

14. ¿Kenijkatsa kej Jehová kiixnamiktok kuesoli tlen pejki ipan Edén kinextijtok kipajpakchijtok itoka?

¹⁴ Maske Satanás miakpa kitekiuijtok miak tlamantli pampa amo kineki Jehová ma kichiua tlen mosentlalijtok, amo ueltok kitsakuilia. Jehová tlauel moyolkokojtok pampa Satanás tlaijixnamijki uan pampa maseualmej kipaleuiaj (Sal. 78:40). Maske mokuesoua, Jehová kiixnamiktok nopa kuesoli ika tlalnamikilistli uan ika xitlaualistli, uan nojkia kinextijtok ueyi iyolo. Nojkia kinextijtok ichikaualis ipan miak tlamantli. Uan kinextijtok itlaiknelijkayo ipan nochi tlen kichijtok (1 Juan 4:8). Jehová nochipa tekititok pampa kineki kipajpakchiuas itoka.

15. ¿Kenijkatsa Satanás ipan ni tonali kiistlakauia itoka Jehová uan kenke kiampa kichiua?

¹⁵ Ipan ni tonali, Satanás nojua kiistlakauia o kisokiuia Jehová itoka. Ya kinkajkayaua maseualmej uan kichiua ma moiljuikaj toTeotsij amo kipia nochi chikaualistli, amo tlauel tlalnamiki, amo kichiua tlen xitlauak uan amo nelia teiknelia. Nojkia, kichiua maseualmej ma moiljuikaj Jehová  amo nelia itstok. Uan, tlaj se akajya kena kineltoka, kineki ma moiljui itlanauatiljuaj amo eli xitlauak uan amo kinkaua ma yolpakikaj. Uan kichijtok ma kineltokakaj Jehová kipaktia kintlaijiyouiltis maseualmej ipan tlitl. Katli kineltokaj nopa istlakatili ayokmo kinekij Jehová ma kinnauati yon kitlepanitaj. Pampa Satanás ayamo kintsontlamiltiaj, nojua kimoyauas istlakatili uan kinekis xijtlauelkaua Jehová. ¿Tijkauas ma mitsuejkatlali?

16. ¿Kenijkatsa uelis tijnextisej amo tijchiuaj kej Adán uan Eva?

¹⁶ Maske tielij titlajtlakolejkej, Jehová techkaua ma tijpaleuikaj kipajpakchiuas itoka. Yeka, nochi tojuantij uelis tijchiuasej tlen Adán uan Eva amo kichijkej. Maske maseualmej kinpaktia kitlaijiljuisej uan kiistlakauisej Jehová itoka, tojuantij uelis tijmanauisej tlen nelia melauak: Jehová eli tlatsejtseloltik, kichiua xitlauak, kuali iyolo uan teiknelia (Is. 29:23). Uelis tijnextisej tijnekij ma eli toTlanauatijka uan tikiniljuisej sekinok san iTlanauatijkayo eli xitlauak uan san ya uelis kichiuas ma tiitstokaj ika tlaseuilistli uan ika pakilistli (Sal. 37:9, 37; 146:5, 6, 10).

17. ¿Tlake kichijki Jesús uan kiampa kinnextilik sekinok kenijkatsa itoka iTata?

¹⁷ Kema tijmanauiaj itoka Jehová tijchiuaj kej Jesús kichijki (Juan 17:26). Ya amo san kinnextilik maseualmej kenijkatsa itoka iTata kema kitekiuiyaya, nojkia kenijkatsa eliyaya Jehová. Kema fariseos kiijtojkej Jehová kinchiualtiyaya maseualmej ma kichiuakaj se tlenijki, amo tekuamachilia, mosisinia uan tetlaijiyouiltia, Jesús kinpaleuik maseualmej ma kiitakaj iTata kinkuamachiliyaya, kipia ueyi iyolo, teiknelia uan tetlasojtla. Nojkia kinpaleuik maseualmej ma kiixmatikaj iTata kema kinextik ipan nochi inemilis nopa kuajkuali tlamantli tlen iTata kinextia (Juan 14:9).

18. ¿Kenijkatsa uelis tijmanauisej Jehová itoka kema ikualankaitakauaj kitlaijiljuiaj uan kiistlakauiaj?

¹⁸ Tojuantij nojkia uelis tijchiuasej kej Jesús uan uelis tikiniljuisej sekinok Jehová tlauel teiknelia uan kipia kuali iyolo. Kiampa tijnextisej san istlakatij tlen ikualankaitakauaj kiijtouaj. Tojuantij tijpajpakchiuaj  Jehová itoka, uan tikinpaleuiaj maseualmej nojkia ma kiitakaj tlatsejtseloltik. Uan maske titlajtlakolejkej, uelis tijnextisej kuajkuali tlamantli kej Jehová (Efes. 5:1, 2). Ika tlen tikijtouaj uan ika tlen tijchiuaj, tikinnextiliaj sekinok kenijkatsa nelnelia eli Jehová uan tijpajpakchiuaj itoka. Uan kema tikinpaleuiaj maseualmej ma kimatikaj tlen melauak tlen toTeotsij, tijueyichiuaj itoka. * Nojkia, tijnextiaj amo kema tijtlauelkauasej toTeotsij maske titlajtlakolejkej (Job 27:5).

19. Kej kiijtoua Isaías 63:7, ¿tlake tlamantli moneki tijpankixtisej kema titlamachtiaj ika Biblia?

¹⁹ Pampa tijnekij tiuejkapantlalisej Jehová itoka uelis tijchiuasej seyok tlamantli. Kema tikinmachtiaj sekinok ika Biblia nochipa tikiniljuiaj san Jehová kinamiki ma eli toTlanauatijka. Uan san ya kinamiki tlanauatis ipan nochi Tlaltipaktli. Maske kena tlauel moneki tikiniljuisej sekinok tlen toTeotsij itlanauatiljuaj, tlauel tijnekij tikinpaleuisej ma kiiknelikaj toTata Jehová uan amo ma kitlauelkauaj. Yeka, tlauel ipati tijpankixtisej nopa yejyektsitsij kuajkuali tlamantli tlen kinextia uan kenijkatsa nelnelia eli (xijpoua Isaías 63:7). Tlaj kiampa tijchiuasej, sekinok tlauel kiiknelisej Jehová uan kineltokasej pampa amo kinekisej kitlauelkauasej.

20. ¿Tlake tijnankilisej ipan seyok tlamachtili?

²⁰ Ipan seyok tlamachtili tijnankilisej ni tlajtlanili, ¿kenijkatsa ika tlen tijchiuaj uan kema titlamachtiaj titlapaleuiaj ma mouejkapantlali Jehová itoka, uan titlapaleuiaj sekinok nojkia ma monechkauikaj iuaya?