ISIFUNDO 23
“Kalingcweliswe Ibizo Lakho”
“Ibizo lakho, O Jehova, limi kuze kube nininini.”—HUBO. 135:13.
INGOMA 10 Dumisani UJehova UNkulunkulu Wethu!
ESIZAKUFUNDA *
1-2. Yiziphi indaba eziqakathekiswa kakhulu ngoFakazi bakaJehova?
UBUKHOSI bukaJehova kanye lokulwelwa kwebizo lakhe zindaba eziqakatheke kakhulu kithi. Thina oFakazi bakaJehova siyakuthanda ukuxoxa ngazo. Kodwa indaba yobukhosi bukaNkulunkulu ayihambelani yini leyokungcweliswa kwebizo lakhe? Iyahambelana.
2 Sonke siyakwazi ukuthi ibizo likaNkulunkulu kumele lingcweliswe njengoba abantu belingcolisa. Sesikwazi lokuthi abantu bonke kumele babone ukuthi ubukhosi bukaJehova loba indlela abusa ngayo ingcono kulazo zonke. Kumele siziqakathekise indaba lezi.
3. Ibizo likaJehova ligoqelani?
3 Ibizo likaJehova ligoqela konke okumayelana loNkulunkulu wethu okuhlanganisa indlela abusa ngayo. Yikho nxa sisithi indaba yokungcweliswa kwebizo likaJehova iqakatheke kulazo zonke siyabe sisithi abantu bonke kumele babone lokuthi indlela yakhe yokubusa ingcono kulazo zonke. Ibizo likaJehova lihamba ndawonye lendlela abusa ngayo.—Khangela ibhokisi elithi “ Ukungcweliswa Kwebizo LikaJehova Kugoqelani?”
4. IHubo 135:13 lithini ngebizo likaNkulunkulu njalo yiphi imibuzo esizayiphendula esihlokweni lesi?
4 Ibizo likaJehova liqakatheke kakhulu. (Bala iHubo 135:13.) Kuyini okwenza liqakatheke kangaka? Laqala njani ukungcoliswa? UNkulunkulu ulingcwelisa njani? Kuyini esingakwenza ukuze sililwele? Asiphenduleni imibuzo le.
OKWENZA IBIZO LIQAKATHEKE
5. Yiwuphi umbuzo abanye abangazibuza wona nxa besizwa ukuthi ibizo likaNkulunkulu kumele lingcweliswe?
5 “Kalingcweliswe ibizo lakho.” (Mat. 6:9) UJesu wathi lokhu ngokunye okuqakatheke kakhulu okumele sikukhulekele. Kodwa atshoni amazwi akhe? Ukungcwelisa ulutho oluthile kutsho ukulwenza lube ngcwele, luhlanzeke kumbe lubemsulwa. Abanye bangazibuza bathi, ‘Ibizo likaJehova liyabe lingcweliselwani lona livele lingcwele, lihlanzekile futhi limsulwa?’ Ukuze siphendule umbuzo lo kumele sixoxe ngokuthi ibizo ligoqelani.
6. Kuyini okwenza ibizo liqakatheke?
6 Ibizo akusibala nje elingabhalwa phansi kumbe libizwe. IBhayibhili lithi: “Ibizo elihle liyathandeka kulenotho enengi.” (Zaga. 22:1; UmTshu. 7:1) Kungani ibizo liqakatheke kangaka? Liqakathekile ngoba lenza abantu bacabange okuthile ngomnikazi walo. Yikho indlela ibizo elibhalwa ngayo kumbe elibizwa ngayo ayiqakathekanga kangako. Okuqakathekileyo yikuthi abantu bacabangani nxa belibona loba belizwa.
7. Abantu balingcolisa njani ibizo likaNkulunkulu?
7 Nxa abantu bekhuluma amanga ngoJehova benza ukuthi abanye bacabange izinto ezimbi ngaye. Bayabe bengcolisa ibizo lakhe. Ibizo likaNkulunkulu laqala ukungcoliswa esivandeni sase-Edeni futhi kulapho omunye azama khona ukwenza abantu bacabange izinto ezimbi ngoNkulunkulu. Ake sixoxeni ngalokho esikufunda endabeni le.
UKUNGCOLISWA KWEBIZO LIKANKULUNKULU E-EDENI
8. Kuyini u-Adamu lo-Eva ababekwazi futhi yiphi imibuzo esingazibuza yona?
8 U-Adamu lo-Eva babekwazi ukuthi ibizo likaNkulunkulu nguJehova futhi babesazi izinto ezinengi eziqakathekileyo ngaye. Ngokwesibonelo, babesazi ukuthi nguye owayebadalile, wabanika ukuphila lekhaya labo elihle eliyipharadayisi. Wabadala baba yindoda lomfazi abafanelanayo. (Gen. 1:26-28; 2:18) Kodwa babezaqhubeka yini becabangisisa ngakho konke uJehova ayebenzele khona? Babezaqhubeka bemthanda futhi bembonga yini? Lokhu kwakhanya ngesikhathi belingwa yisitha sikaNkulunkulu.
9. Ngokwalokho okutshiwo kuGenesisi 2:16, 17 lo– 3:1-5, kuyini uJehova akutshela u-Adamu lo-Eva njalo uSathane wenzani ukuze bacabange izinto ezingayisizo ngoNkulunkulu?
9 Bala uGenesisi 2:16, 17 lo-3:1-5. USathane wakhuluma lo-Eva esebenzisa inyoka, wathi: “Kambe uNkulunkulu watsho ngeqiniso wathi, ‘Lingadli noma yisiphi isihlahla esivandeni?’” Umbuzo lo wawulamanga acatshileyo mayelana loNkulunkulu futhi lokhu kwenza u-Eva waqalisa ukucabanga okungayisikho ngoJehova. UNkulunkulu yena wayethe bangadla izithelo zezihlahla zonke, ngaphandle kwezithelo zesihlahla esisodwa. Kumele ukuthi zazizinengi okwamagama izihlahla ezitshiyeneyo u-Adamu lo-Eva ababengazidla. (Gen. 2:9) UJehova uyaphana sibili. Lanxa kunjalo wathi bangadli izithelo zesihlahla esisodwa. Yikho umbuzo kaSathane wenza bacabanga izinto ezingayisizo ngoNkulunkulu. USathane wenza kwakhanya angani uNkulunkulu uyancitshana. Mhlawumbe u-Eva wazibuza wathi, ‘Kambe kukhona okuhle uNkulunkulu angafuni ngibe lakho?’
10. USathane walingcolisa njani ibizo likaNkulunkulu futhi lokhu kwabangelani?
10 Ngesikhathi uSathane ebuza umbuzo lo, u-Eva wayesamlalela uJehova. Watshela uSathane umthetho kaNkulunkulu ocacileyo. Waphinda wathi kwakungamelanga basithinte isihlahla leso. Wayekwazi ukuthi uNkulunkulu wayethe bazakufa nxa bangayekela ukulalela. Kodwa uSathane wamphendula wathi: “Kalisoze life ngempela.” (Gen. 3:2-4) Lapha uSathane wayengasagudli iguma. Khathesi wayeselingcolisa mgceke ibizo likaNkulunkulu ngoba amazwi akhe ayesitsho ukuthi uJehova uqamba amanga. Lokhu kwenza uSathane waba nguDeveli loba umnyundeli. U-Eva waqilwa ngokupheleleyo wamkholwa uSathane. (1 Tim. 2:14) Wamthemba kakhulu ukwedlula uJehova. Lokhu kwabangela ukuthi u-Eva enze iphutha elibi kulawo wonke. Wakhetha ukungalaleli uJehova ngokudla isithelo ayethe angasidli. Ngemva kwalokho wanika u-Adamu laye wadla.—Gen. 3:6.
11. Kuyini okwakungenziwa ngu-Adamu lo-Eva kodwa kuyini abehluleka ukukwenza?
11 Ake ucabange ngalokho u-Eva okwakumele akutshele uSathane. Ubona angani kwakuzakwenzakalani aluba wathi: “Angikwazi wena, kodwa ngiyamazi uBaba wami uJehova futhi ngiyamthanda njalo ngiyamthemba. Konke esilakho sikunikwe nguye. Ukuthatha ngaphi ukuthi ukhulume kubi ngaye? Suka lapha!” UJehova wayezathokoza kakhulu esizwa amazwi anjalo ekhulunywa yindodakazi yakhe ayithandayo. (Zaga. 27:11) Kodwa u-Eva wayengamthandi ngenhliziyo yonke uJehova futhi lo-Adamu wayenjalo. U-Adamu lo-Eva behluleka ukungcwelisa ibizo likaYise ngesikhathi lingcoliswa ngoba babengelathando oluqotho.
12. USathane wenzani ukuze u-Eva aqale ukuthandabuza futhi kuyini u-Adamu lo-Eva abehluleka ukukwenza?
12 Sesibonile ukuthi uSathane waqala ukungcolisa ibizo likaJehova ngokwenza u-Eva athandabuze ukuthi uJehova unguBaba omuhle. U-Adamu lo-Eva behluleka ukulwela ibizo likaJehova ngesikhathi uSathane ekhuluma amanga ngaye. Lokhu kwabangela ukuthi bahlamukele uYise njalo balalele uSathane. Lalamuhla uSathane usebenzisa amaqhinga afananayo. Ulokhu engcolisa ibizo likaJehova. Nxa abantu bekholwa amanga kaSathane kuba lula ukuthi benze lokho okwenziwa ngu-Adamu lo-Eva.
UJEHOVA UNGCWELISA IBIZO LAKHE
13. UHezekheli 36:23 uwuveza njani umlayezo weBhayibhili oyisiqokoqela?
13 UJehova uyagoqa izandla engenzi lutho yini nxa ibizo lakhe lingcoliswa kanje? Hatshi. IBhayibhili lonke nje lisitshela ngalokho uJehova akwenzileyo ukuze atshengise ukuthi izinto ezimbi ezakhulunywa ngaye e-Edeni zingamanga. (Gen. 3:15) Phela umlayezo weBhayibhili oyisiqokoqela yilo: uJehova ungcwelisa ibizo lakhe njalo abuyisele ukulunga lokuthula emhlabeni esebenzisa uMbuso okhokhelwa yiNdodana yakhe. Yikho nxa singabala iBhayibhili sizazwisisa ukuthi uJehova ulingcwelisa njani ibizo lakhe.—Bala uHezekheli 36:23.
14. Okwenziwa nguJehova ngemva kokuhlamuka okwenzakala e-Edeni kulingcwelise njani ibizo lakhe?
14 USathane uzama ngazo zonke izindlela ukuthi intando kaJehova ingagcwaliseki. Kodwa uhlala esehluleka. IBhayibhili lisitshela lokho uJehova akwenzileyo njalo lenza kucace ukuthi unguBaba osithandayo loMbusi ongcono kulabo bonke. Kuliqiniso ukuthi ukuhlamuka kukaSathane labo bonke abamsekelayo kumzwise ubuhlungu obukhulu. (Hubo. 78:40) Kodwa utshengise ukuthi uhlakaniphile, uyabekezela lokuthi wahlulela kuhle endleleni aphathe ngayo indaba yokungcoliswa kwebizo lakhe. Uphinde watshengisa ngezindlela ezinengi ukuthi unguSomandla. Okuqakatheke kakhulu yikuthi utshengise uthando kukho konke akwenzayo. (1 Joh. 4:8) UJehova ubelokhu elingcwelisa ibizo lakhe.
USathane watshela u-Eva amanga ngoJehova futhi okweminyaka eminengi uDeveli ubelokhu ekhuluma amanga ngoNkulunkulu (Khangela indima 9-10 lo-15) *
15. USathane ulingcolisa njani ibizo likaNkulunkulu futhi lokhu kubangeleni?
15 USathane ulokhu engcolisa ibizo likaNkulunkulu. Uqila abantu ngokwenza bathandabuze ukuthi uNkulunkulu ulamandla, wahlulela kuhle, uhlakaniphile futhi ulothando. Ngokwesibonelo, uzama ukwenza abantu bakholwe ukuthi uJehova kasuye Mdali. Nxa abantu bekholwa ukuthi uNkulunkulu ukhona uSathane uzama ukubenza babone angathi imithetho kaNkulunkulu iyacindezela. Uphinda afundise abantu ukuthi uJehova nguNkulunkulu olesihluku otshisa abantu esihogweni. Nxa bengakholwa amanga la kuba lula ukuthi bahlamukele uJehova. USathane uzaqhubeka engcolisa ibizo likaJehova futhi uzazama lokukwenza uhlamukele uJehova kuze kube yisikhathi ebhujiswa. Kodwa uzaphumelela yini?
ONGAKWENZA
16. Kuyini okwehlula u-Adamu lo-Eva ongenelisa ukukwenza?
16 UJehova uvumela abantu abalesono ukuthi bangcwelise ibizo lakhe. Yikho ungenelisa ukwenza lokho u-Adamu lo-Eva abehluleka ukukwenza. Lanxa uphila emhlabeni ogcwele abantu abangcolisa ibizo likaJehova futhi bakhulume kubi ngaye, ungenelisa ukulilwela njalo utshele abantu ukuthi ungcwele, ulungile, muhle futhi ulothando. (Isaya. 29:23) Ungatshengisa ukuthi ufuna abe nguMbusi wakho. Ungancedisa abantu bazwisise ukuthi ukubusa kukaJehova yikho kodwa okulungileyo njalo okuzaletha ukuthula lentokozo ebantwini bonke.—Hubo. 37:9, 37; 146:5, 6, 10.
17. UJesu wenza njani ukuthi ibizo likaYise laziwe?
17 Nxa silwela ibizo likaJehova siyabe silingisela uJesu Khristu. (Joh. 17:26) UJesu kazange enze ibizo likaYise laziwe ngokulisebenzisa kuphela kodwa waphinda wafundisa abantu ukuthi uJehova unjani sibili. Ngokwesibonelo, wayengavumelani labaFarisi ababesenza uJehova akhanye elesihluku, enguNkulunkulu ofuna abantu benze okwedlula lokho abangenelisa ukukwenza, okhatshana labo futhi ongelasihawu. Wancedisa abantu bazwisisa ukuthi uYise kakhangelelanga ukuthi benze lokho abangenelisi ukukwenza, uyabekezela, ulothando njalo uyathethelela. Waphinda wabancedisa bamazi uJehova ngokulingisela ubuntu bakhe ngokupheleleyo kukho konke ayekwenza.—Joh. 14:9.
18. Singenzani ukuze sitshengise ukuthi izinto ezimbi ezikhulunywe ngabaphikisi ngoJehova zingamanga?
18 Lathi singalingisela uJesu ngokutshela abantu ngoJehova. Nxa singenza njalo bazalazi futhi balihloniphe ibizo likaNkulunkulu elingcwele. Singabafundisa lokuthi unguNkulunkulu olothando lomusa. Nxa sisenza njalo siyabe sitshengisa ukuthi izinto ezimbi ezikhulunywe ngabaphikisi ngoJehova zingamanga. Singcwelisa ibizo likaJehova ngokuncedisa abantu ukuthi balibone lingcwele. Lathi singenelisa ukulingisela uJehova. Lokhu singakwenza sibili lanxa silesono. (Efe. 5:1, 2) Nxa amazwi ethu lezenzo zethu kutshengisa abantu ukuthi uJehova unjani sibili siyabe sincedisa ukungcwelisa ibizo lakhe. Silwela ibizo lakhe ngokubancedisa ukuthi balazi iqiniso ngaye. * Kanti njalo siyabe sitshengisa ukuthi abantu abalesono bangenelisa ukuhlala bethembekile kuye.—Jobe. 27:5.
Sifuna ukuncedisa esibafundisa iBhayibhili bazwisise ukuthi uJehova ulomusa futhi ulothando (Khangela indima 18 lo-19) *
19. Ngokwalokho okutshiwo ku-Isaya 63:7, kuyini okumele sikuqakathekise kakhulu nxa sifundisa abantu?
19 Kulokunye esingakwenza ukuze singcwelise ibizo likaJehova. Nxa sifundisa abantu iqiniso eliseBhayibhilini sijayele ukugcizelela ubukhosi bukaNkulunkulu, ukuthi nguye olelungelo lokubusa futhi siyabe siqinisile nxa sisitsho njalo. Lanxa kuqakathekile ukuthi sibafundise ngemithetho kaNkulunkulu, esikuqakathekisa kakhulu yikubancedisa ukuthi bathande uJehova uBaba wethu futhi babe qotho kuye. Yikho kumele sigxile ekubafundiseni ngobuntu bukaJehova, sigcizelela ukuthi unguMuntu onjani. (Bala u-Isaya 63:7.) Nxa singafundisa ngaleyondlela sizanceda abanye ukuthi bathande uJehova njalo bamlalele ngoba befuna ukuba qotho kuye.
20. Sizaxoxa ngani esihlokweni esilandelayo?
20 Kodwa singenzani ukuze siqiniseke ukuthi indlela esiziphatha ngayo lendlela esifundisa ngayo kwenza ibizo likaJehova lingcweliswe futhi abantu bafise ukusondela kuye? Umbuzo lo uzaphendulwa esihlokweni esilandelayo.
INGOMA 2 Ibizo Lakho UnguJehova
^ indima 5 Yiphi indaba eqakathekileyo ebantwini lasezingilosini? Kungani iqakathekile futhi singena njani endabeni le? Ukuzwisisa izimpendulo zemibuzo le kanye leminye kuzasinceda siqinise ubungane bethu loJehova.
^ indima 18 Kwezinye izikhathi amabhuku ethu ebesithi akumelanga sithi, “Ibizo likaJehova kumele lilwelwe.” Abesitsho njalo ngoba akulamuntu oyake athi ibizo elithi Jehova alimfanelanga uNkulunkulu. Kodwa ngo-2017 emhlanganweni owenziwa minyaka yonke indaba le yachasiswa kuhle. Umngcinisihlalo wathi: ‘Lula nje, kuqondile ukukhulekela ukuthi ibizo likaJehova lilwelwe, ngoba indlela abantu abambona ngayo kumele ilungiswe ukuze kuvezwe egcekeni ukuthi ulungile.’—Bukela i-Broadcasting kaJanuary 2018 ku-jw.org®. Khangela ngaphansi kwengxenye ethi IZINTO EZIKHONA > JW BROADCASTING®.
^ indima 62 OKUSEMFANEKISWENI: UDeveli wangcolisa ibizo likaNkulunkulu ngokutshela u-Eva ukuthi uNkulunkulu ungumqambimanga. Okweminyaka eminengi uSathane ubesenza abantu bakholwe ukuthi uNkulunkulu ulesihluku futhi kazange adale abantu.
^ indima 64 OKUSEMFANEKISWENI: Umzalwane ugcizelela ubuntu bukaNkulunkulu ngesikhathi eqhuba isifundo seBhayibhili.
