1-2. Ishwiro japi jinosisira maningi ku Zvapupu Jehovha?

TESE takasotana no shwiro jinosisira maningi, ukuru-kuru wa Jehovha no kuceneswa ko zina rake. Zve itusu, Zvapupu zva Jehovha, tinodakarira maningi kubhuya ngo pamusoro po shwiro iji. Ngokuti ijona jinosisira maningi. Waro kureva kuti ukuru-kuru wa Mwari no kuceneswa ko zina rake zvakasiyana here? Haiwa.

² Takajija kuti zina ra Mwari rinodikana kuva rakacena ku manyepo ese akabhuiwa. Zvinosisiravo kuvonesa kuti ukuru-ukuru hwa Jehovha, kana, matongero ake, ngo akanaka. Ngo ndava yazvo, shwiro mbiri iji, jinosisira maningi kwatiri.

3. Zina ra Jehovha rinobatanijenyi?

³ Zvokadi kamare, zina ra Jehovha zvinobatanija zvese ngo pamusoro pa Mwari, kubatanijavo no matongero ake. Ngo kudaro, patinonanga kuti shwiro inosisira maningi ngo yo kucenesa zina ra Jehovha mu manyepo ese, tinonga tecinanga kuti matongero ake zvokadi akanaka. Zina ra Jehovha rakanasa kubatana no matongero ake inga Mukuru-kuru wo Masimba Ese.​—Vonanyi bhokiso rinoti “ Ngozvapi Zvinobatinijwa pa Shwiro Iyi Inosisira Maningi?”

4. Nduyo 135:13, inonangenyi ngo pamusoro pa Mwari zve muvhunjo japi jaticazodavira pa jijo iyi?

⁴ Zina ra Jehovha ndi rimwe basi. (Verenganyi Nduyo 135:13.) Ngenyi zina ra Mwari rinosisira maningi? Zina ra mwari rakatanga kushohwa rini? Mwari anoitisa kudini kuti acenese zina rake? Zve tingabeseresa kudini pa kujivirira zina rake? Ndizvona zvaticavona pa jijo iyi.

5. Vamweni vanojivhunjisa kudini pavanorangarira ngo kuceneswa ko zina ra Mwari?

⁵ Jesu wakajekesa pambhene shwiro jinosisira maningi pa mukumbiro  jedu. Iyena wakati: “Zina renyu ngariceneswe.” (Mateu 6:9, Shanduro yeNyika Itsva) Izvi zvinoda kurevenyi? Kucenesa zvinoreva kuita kuti ciroco cicene. Vamweni kangaije vangarangarira kuti: ‘Waro zina ra Jehovha arizivi kucena?’ Kuti tidavire muvhunjo uu, tinodikana kurangarira zvese zvinobatanijwa pa zina.

6. Zvicinyi zvinoita kuti zina rive rinosisira maningi?

⁶ Zina, rinopinda maretera akatahwa pa pheji kana gama rinonangwa ngo mundhu ngo izwi guru. Vonanyi zvinonanga Bhaibheri: “Zina rakanaka riri nane kupinda upfumi hwakawanda.” (Mazwi Akangwara 22:1; Mucumaeri 7:1) Ngenyi zina rinosisira maningi? Ngokuti rinobatanija mugariro zve zvinobatanija zviro zvinorangarihwa ngo vandhu ngo pamusoro mundhu ano zinero. Ngo kudaro, matarihwe arinoitwa zina no madanijihwe aro, azvisisiri maningi. Zvinosisira maningi ngo zvo kuti, vandhu vamweni vanorangarirenyi povanovona no kuzwa zinero.

7. Mu njira japi vandhu vangasvipisa zina ra Mwari?

⁷ Vandhu pavanonanga zviro zvakashata ngo pamusoro pa Jehovha, vanonga vecisvipisa mugariro wake. Pavanonga vecisvipisa mugariro wa Mwari, vanonga vecieja kusvipisa zina rake. Zina ra Mwari no mugariro wake, zvakatanga kusvipiswa pakutanga ko ndhorovondho yo vandhu. Ngativonenyi zvatingajija ngo pamusoro pazvo.

8. Adhamu na Evha vaizivenyi zve muvhunjo japi jakavepo?

⁸ Adhamu na Evha avacaiziva basi zina ra Jehovha, asi ivona vaiziva zvokadi zvizinji zvinosisira ngo pamusoro po mune wo zinero. Inga muezaniso, ivona vaiziva kuti Jehovha, Musiki. Zve zvese zvovainga nazvo, zvakadari inga upenyu, Paradhiso pomwe no ushamwari wovainga nawo umwe no umweni, zvaivha ka Jehovha. (Genesi 1:26-28; 2:18) Kunanga kuti Adhamu na Evha vakaenderera mberi vecishandisa murangariro wavo wakakwana kuti varangarijisise ngo pamusoro po zvese zvovainga vakaitihwa ndi Jehovha here? Kunanga kuti ivona vakakhombija rudo no kubongesera Jehovha here? Mupinguro jo muvhunjo iji, jakanasa kuvoneka paya povakaejwa ngo muvengi wa Mwari.

9. Mukuzwirana na Genesi 2:16, 17; 3:1-5, Jehovha wakavhunjenyi Adhamu na Evha zve Sathana wakacinjisa kudini zvokadi zvese?

⁹ Verenganyi Genesi 2:16, 17; 3:1-5. Sathana  ecishandisa nyoka, wakavhunjisa Evha kudari: “Bzokadi Mwari wakananga kuti: amutendehwi kuha ku miti yese yo mu munda?” Muvhunjo uwu wainga no manyepo akashata maningi. Kunasa kunanga, Mwari wainga wakavhunja Adhamu na Evha kuti vahe mucero jo muti jese jo mu munda, kusiyapo umwe basi. Cimwenizve, mucero jakasiyana-siyana jainga mu munda jainga jakawanda. (Genesi 2:9) Pacina kukana-kana, Jehovha, mundhu anokova. Asi, iyena wakarambisa Adhamu na Evha kuti vatame kuha mucero wo muti umwe basi. Ngo kudaro, muvhunjo wa Sathana wakacinja zvokadi zvese. Iyena waida kuvonesa kuti Mwari aakovi. Kangaije Evha wakarangarira kudari: ‘Kunanga kuti Mwari ari kundirambisa kuva no zviro zvakanaka here?’

10. Sathana wakarevesa kudini zina ra Mwari zve zvakava no muviyo wapi?

¹⁰ Sathana paakaita muvhunjo uwu, Evha wainga mundhu waizwira Mwari. Ngokuti paakadavira muvhunjo wa Sathana, iyena wakaphinda zvainga zvakanangwa ndi Mwari. Iyena wakatoengejera kuti avacaidikana no kuupsasa. Evha waiziva ngwajo ya Mwari, yo kuti kudari vakatama kuzwira mupango uu vaizofa. Asi, Sathana wakati: “Andibzopi, amuzofi.” (Genesi 3:2-4) Sathana aaripi kunanga basi kuti Jehovha munyepi. Iyena ari kushora zina ra Mwari. Zvoita inga kuti waivhunja Evha kuti Jehovha, munyepi. Izvo ndizvona zvakaitisa kuti Sathana agume pa kuva Dhiabhu kana murevi. Evha wakacengejwa wozwira Sathana. (1 Timoti 2:14) Iyena wakathemba maningi Sathana kusiyapo kuthemba Mwari. Zvakamurerukira maningi kutema civaringo cakashata co kutama kuzwira Jehovha. Iyena wakatanga kuha mucero waainga akarambijwa ndi Jehovha, perapo wopavo Adhamu.​—Genesi 3:6.

11. Zvicinyi zvaidikana kuthwa ngo vabari vedu vokutanga asi ngo zvapi zvavacikazivi kuita?

¹¹ Ecimborangariranyi padoko ngo zviro zvaidikana kunangwa ndi Evha ecivhunja Sathana. Amborangariranyi kuti iyena wakadavira kudari: “Inini andikuzivi asi ndinoziva Baba wangu, Jehovha. Inini ndinoda Mwari zve ndinomuthemba. Zvese zvatinazvo takazvipuwa ndi Jehovha. Ndiwe ani iwewe kuti ubhuye zvakashata ngo pamusoro pake? Ivhai pano apa!” Jehovha waizodakara maningi ngo kuzwa mwanake waimuda zve wakagondeka ecinanga zvese izvi! (Mazwi Akangwara 27:11) Adhamu na Evha avacainga no rudo wokugondeka kuna Jehovha. Ngo ndava yazvo, ivona avazivi kukwanisa kujivirira zina ra Baba wavo pa kureviwa uku, kwakaitari Sathana.

12. Sathana wakaitisa kudini kuti Evha akane-kane mu murangariro mwake zve ngozvapi zvovacikazivi kuita?

¹² Inga zvotapera kuvona, Sathana wakatanga kusvipisa zina ra Jehovha, ngo kueja kuita kuti Evha akane-kane mu murangariro kuti Jehovha ndi Baba waushoni kana kuti haiwa. Perapo, Adhamu na Evha avazivi kujivirira zina no mugariro wa Jehovha ku manyepo a Sathana. Ivona vakabatana na Sathana pa kupandukira kwaakaitira Baba wake. Sathana anoshandisa mazano akafanana nyamasi uno. Iyena aciri  kureva zina ra Jehovha. Vaya vanotenda manyepo a Sathana vanocengejwa ndiyena zve vanoramba kubesera utongi wakarurama wa Jehovha.

13. Ezekieli 36:23, inokhombijisa kudini masoko makuru ari mu Bhaibheri?

¹³ Kunanga kuti Jehovha wakazwa manyepo aya wotama kuita ciri cese here? Haiwa, aazivi kuita kudaro! Bhaibheri rese rinokhombija zviri kuita Jehovha kuti acenese zina rake ku manyepo ese akanangwa mu munda wo Edheni. (Genesi 3:15) Kunasa kunanga, masoko makuru o Bhaibheri angagurisihwa ngo magama aya: Jehovha anocenesa zina rake ecishandisa Umambo uri kutongwa ngo Mwana wake zve anomusijira runyararo no urungami pa nyika. Masoko ari mu Bhaibheri anotibesera kuti tizwisise manera anoita Jehovha kuti acenese zina rake.​—Verenganyi Ezekieli 36:23.

14. Pikija no kupandukira kwakaitwa mu Munda wo Edheni, Jehovha ari kucenesa kudini zina rake?

¹⁴ Sathana ari kuita zvese zvaanokwanisa kuti cidisiso ca Mwari citame kukwanirisika. Asi mazano ake ese aazivi kushanda. Bhaibheri rinokhombija njira inoita Jehovha zviro zve rinokhombija kuti akuna mundhu umweni wakafanana naye. Kunasa kunanga, kupandukira kwakaitari Sathana no vaya vanokubesera kuno nyangajisa maningi Jehovha. (Nduyo 78:40) Pikija no zvese izvi, iyena anokhombija uzivi, kusengerera no urungami. Jehovha anokhombijazve simba rake mu njira jakasiyana-siyana. Pa nyezuru po zvese, rudo hwake hwunovoneka pa zvese zvaanoita. (1 Johani 4:8) Pacina kukana-kana, Jehovha aciri kundocenesa zina rake.

15. Sathana ari kurevesa kudini zina ra Mwari nyamasi uno zve ngowapi muviyo wakona?

¹⁵ Nyamasi uno, Sathana aciri kundoreva zina ra Mwari. Iyena anoeja kuita kuti vandhu vakane-kane kuti Mwari ano simba, wakarurama, ano zivo no rudo. Inga muezaniso, Sathana anoeja kukhohwesa vandhu kuti Jehovha andiepi musiki. Pikija kuti ivona vanotenda kuti Mwari ariyo, Sathana anoeja kuita kuti ivona varangarire kuti Mwari no ndhungamiro jake ajizivi kurungama zve jinovarambisa kuita zvovanoda. Cimwenizve, anojijisa kuti Jehovha  ndi Mwari wakashata zve anopisa vandhu mu gomba ro muriro. Povanotenda manyepo ese aya, zvinovarerukira kuramba kutongwa ndi Jehovha. Sathana acito aparajwa mukuperera, anozoenderera mberi ecindoreva zina ra Jehovha zve anodoeja kumukhohwesa kuti muve ku divi rake. Kunanga kuti iyena anozozvikwanisa here?

16. Ngozvapi zvamungaita zvicizivi kuizwa ndi Adhamu na Evha?

¹⁶ Jehovha anopa itusu vandhu vacizivi kukwana, mukana wo kucenesa zina rake. Zvokadi kamare, imwimwi mungaita zvicikazivi kuitwa ndi Adhamu na Evha. Pikija tiri kupona mu nyika yakazara ngo vandhu vanoreva no kutuka zina ra Jehovha, imwimwi muno mukana wo kuva ku divi ra Mwari no kubhuya cokwadi cokuti Jehovha wakacena, wakarungama, wakanaka zve ano rudo. (Isaia 29:23) Imwimwi mungakhombija kuti munobesera utongi hwake. Beseranyi vamweni vavone kuti matongero a Jehovha akarungama zve ndiona ega anokwanisa kuviisa runyararo no mudakaro ku vandhu vese.​—Nduyo 37:9, 37; 146:5, 6, 10.

17. Jesu wakaitisa kudini kuti zina ra Babake rizivike?

¹⁷ Patinojivirira zina ra Jehovha, tinonga tecitevejera muezaniso wa Jesu Kristu. (Johani 17:26) Jesu wakaita kuti zina ra Babake rizivike. Kusiyapo kushandisa zina ra Mwari, iyena waijivirira mugariro wa Jehovha. Inga muezaniso, iyena waisiyana no Vafarisi, avo vakaita kuti Jehovha avoneke inga kuti ano hasha maningi, anonesa, ari ndhambo zve aana unyasha. Asi Jesu waiita zviro mu njira yakasiyana. Iyena waibesera vandhu kuti vavone kuti Babake vainga vakaezanana, vanosengerera, vano rudo no kuregerera. Cimwenizve, Jesu wainasa kutevejera mugariro ja Babake. Ngaizvo, vandhu vaizokwanisa kuzwisisa kuti Jehovha wakadini.​—Johani 14:9.

18. Tingavhisisa kudini pambhene manyepo no kureviwa kunoitwa Jehovha?

¹⁸ Itusu tingavhisa pambhene manyepo no kureviwa kunoitwa Jehovha. Tingazviitisa kudini? Ngo kutevejera zvakaita Jesu. Inga ndiyena, ndingavhunja vamweni zvatinoziva ngo pamusoro pa Jehovha no kuvakhombija kuti Mwari ano rudo zve wakanaka mwoyo. Tingakwanisavo kutevejera Jehovha. Izvo zvinokwanisika pikija atizivi kukwana. (VaEfeso 5:1, 2) Mukuvo wese, zvese zvatinoita no kunanga zvinodikana kukhombija  mugariro ja Jehovha. Tikaita zvese izvi, tinocenesa zina ra Mwari zve tinobesera vamweni kuti varivone kuva rakacena. Tinojivirira zina ra Mwari ngo kubesera vandhu kuti vazive cokwadi ngo pamusoro pake. * Tinokhombijazve kuti vandhu vacizivi kukwana vangaenderera mberi vakagondeka kuna Mwari.​—Jobe 27:5.

19. Mukuzwirwana na Isaia 63:7 ngo capi cinodikana kuva cinangwa cedu patinojijisa vamweni?

¹⁹ Vonanyi ci jijo cimweni cinosisira. Patinojijisa vamweni Bhaibheri, kazinji tinonasa kujekesa ukuru-kuru hwa Jehovha, kuti ndiyena anofanera kutonga. Hina, izvi izvokadi kamare. Pikija zvecisisira maningi kujijisa mupango ja Mwari, cinangwa cedu ngo cokubesera vandhu kuti vade Jehovha, Baba wedu zve kuti vave vakagondeka kwaari. Ngo kudaro, kazinji vonesanyi mugariro jakanaka ja Jehovha. Vonesanyi kuti zina rokuti Jehovha rino khombija mundhu wo mushovonyi. (Verenganyi Isaia 63:7.) Patinojijisa ngo munjira iyi, tinobesera vandhu kuti vade Jehyovha. Ngo kudaro, vanozoda kuva vakagondeka zve voramba vecizwira.

20. Tinozovonenyi pa jijo inotevera?

²⁰ Ngo zvapi zvatingaita kuti mufambiro wedu no majijisiro edu zviviise rukujo ku zina ra Jehovha no kukwevera vandhu kwaari? Jijo inotevera inozodavira muvhunjo uwu.