OSHITOPOLWA SHOKUKONAKONWA 23
“Edhina lyoye nali yapulwe”
“Omuwa, edhina lyoye otali simanekwa aluhe sigo aluhe.” — EPS. 135:13.
EIMBILO 10 Hambeleleni Jehova, Kalunga ketu
ELALAKANO LYOSHITOPOLWA *
1-2. Iinima yini ya simanenena Oonzapo dhaJehova dhi hole okupopya kombinga yayo?
KUNENA otwa taalelwa kompata ya simanenena, yi na ko nasha nuunamapangelo waJehova nokuyukipalitha edhina lye. Tu li Oonzapo dhaJehova, iinima mbyoka oyo tu hole okupopya kombinga yayo. Ihe mbela uunamapangelo waKalunga nokuyapulwa kwedhina lye, iinima ya yoolokathana? Hasho nando.
2 Atuheni otwe shi mona kutya edhina lyaKalunga oli na okuyapulwa. Otwi ilonga wo kutya opu na okukala uumbangi tawu ulike kutya uunamapangelo waJehova nenge omukalo gwe gwokupangela, ogwo gwa dhenga mbanda. Iinima ayihe mbyoka otwa pumbwa oku yi simaneka nokugandja eitulomo kuyo.
3. Edhina Jehova olya kwatela mo shike?
3 Odhoshili kutya edhina Jehova olya kwatela mo kehe shimwe kombinga yaKalunga, mwa kwatelwa omukalo gwe gwokupangela. Onkee ano, ngele otatu ti kutya osha simana okuyapulitha edhina lyaJehova, nena otatu zimine wo kutya opu na okukala uumbangi mboka tawu ulike kutya omukalo gwe gwokupangela ogwo gwa dhenga mbanda. Edhina lyaJehova oli na ekwatathano nomukalo moka ha pangele e li Omunamapangeloagehe. — Tala oshimpungu “ Shoka sha kwatelwa mompata onene.”
4. Episalomi 135:13, otali popi shike kombinga yedhina lyaKalunga, nomapulo geni tatu ka yamukula moshitopolwa shika?
4 Edhina Jehova olyi ikalekelwa. (Lesha Episalomi 135:13.) Oshike sha ningitha edhina lyaKalunga li kale lya simana? Olya nyatekwa ngiini oshikando shotango? Kalunga ohe li yapulitha ngiini? Ongiini tatu vulu oku li popila? Natu ka kundathaneni kombinga yomapulo ngoka.
ESIMANO LYEDHINA
5. Oshike tashi vulika tu ipule kombinga yasho, ngele tashi ya pokuyapulwa kwedhina lyaKalunga?
5 “Edhina lyoye nali yapulwe.” (Mat. 6:9) Jesus okwa ulike kutya shoka osho oshinima sha simanenena tu na okukala hatu galikana kombinga yasho. Ihe okwa li a hala okutya shike? Okuyapula oshinima shontumba, otashi ti oku shi ikalekela, nenge oku shi kaleka sha yela. Yamwe yomutse otashi vulika tu ipule tatu ti: ‘Ngele edhina lyaJehova eyapuki nale, lya yogoka nolya yela, omolwashike lya pumbwa okuyapulwa?’ Opo tu mone eyamukulo, otwa pumbwa okudhiladhila kombinga yaashoka edhina lya kwatela mo.
6. Oshike hashi ningitha edhina li kale lya simana?
6 Edhina kali shi owala oondanda dha nyolwa pombapila nenge nkene hali tumbulwa. Ombiimbeli otayi ti: ‘Edhina ewanawa, olya simana li vule omaliko ogendji.’ (Omayel. 22:1; Omuuv. 7:1) Omolwashike edhina lya simana? Omolwaashoka olya kwatela mo nkene aantu ya tala ko mwene gwalyo. Onkene omukalo moka edhina hali nyolwa nenge hali tumbulwa hagwo gwa simana, ihe shoka sha simanenena osho kutya edhina ndyoka olyalye, naashoka aantu haya dhiladhila uuna ye li mono nenge ye li uvu.
7. Omomukalo guni aantu ya nyateka edhina lyaKalunga?
7 Uuna aantu taya longo yalwe iifundja kombinga yaJehova, kungawo otaya nyatekitha edhina lye. Ngele yalwe ya tala iinima iiwinayi tayi ningwa, ohaya pe Kalunga uusama nokunyateka edhina lye. Oshikando shotango edhina lyaKalunga lya popilwa muuwinayi, omeyana lyaEden, naashoka osha ningitha aantu ye mu tale ko nayi. Natu ka taleni shoka tatu ilongo kompata ndjoka.
NKENE EDHINA LYAJEHOVA LYA NYATEKWA OSHIKANDO SHOTANGO
8. Adam naEva oya li ye shi shike, naashoka osha pendutha omapulo geni?
8 Adam naEva oya li ye shi edhina lyaKalunga, Jehova, noya li wo ye shi iinima oyindji ya simanenena kombinga ye. Oya li ye shi kutya oye Omushiti, ngoka e ya pa omwenyo, ehala ewanawa lyokukala nokwe ya hokanitha ye li ookuume kopandjokana ya gwanenena. (Gen. 1:26-28; 2:18) Nonando ongawo, mbela oya li ngaa taya ka tsikila okutedhatedha kombinga yiinima ayihe mbyoka Jehova e ya ningila? Mbela oya li ngaa taya ka tsikila okukokeka olupandu nosho wo ohole yawo yoku mu hola? Eyamukulo olya yela mo, sho omutondi gwaKalunga e ya makele.
9. Shi ikolelela kuGenesis 2:16, 17 nosho wo 3:1-5, Jehova okwa li a lombwele shike aayihokani yotango, nongiini Satana a li a pengitha oshili?
9 Lesha Genesis 2:16, 17 nosho wo 3:1-5. Satana okwa ningitha eyoka li kale lya fa olyo tali popi nokwa pula Eva ta ti: “Kalunga okwe mu lombwele shili, mwaa lye komiti adhihe dhomeyana?” Epulo ndyoka olya li lya kwatela mo iifundja iitokele kombinga yaKalunga nolya ningitha Eva a kale a tala ko Kalunga momukalo omwiinayi. Kalunga okwa li owala e ya lombwele kutya otaya vulu okulya komiti adhihe, kakele kagumwe. Adam naEva oya li taya vulu okulya komiti odhindji dhi ili nodhi ili. (Gen. 2:9) Odhoshili kutya Jehova oku li Kalunga ha gandja. Nonando ongawo, okwa li i indike Adam naEva yaa lye oshiyimati shokomuti gumwe gwi ikalekelwa. Onkee ano, epulo lyaSatana olya li lya pilike oshili. Satana okwe ya ningitha ya dhiladhile kutya Kalunga omuluya. Eva otashi vulika a li ti ipula ta ti: ‘Mbela Kalunga oti indike ndje sha oshiwanawa?’
10. Satana okwa nyateke ngiini edhina lyaKalunga, noshilanduliko oshini?
10 Pethimbo mpono, Eva okwa li natango ha vulika kuJehova. Okwa lombwele Satana shoka Kalunga e ya lombwela. Eva okwa ti wo kutya omuti kaye na nokuli oku gu guma. Okwa li e shi kutya okwaavulika kuJehova otaku fala meso. Ihe Satana okwe mu yamukula a ti: “Itamu si shili.” (Gen. 3:2-4) Satana ka li owala ta ti kutya Kalunga okwe ya fundja. Ihe okwa li ta nyateke edhina lyaKalunga, mokulombwela Eva kutya Jehova omufundja. Kungawo, Satana okwa ningi ondiyapoli, nenge omulundili. Eva okwa li a kotokelwa lelalela kuSatana, e te mu itaale. (1 Tim. 2:14) Okwa li i inekela Satana, shi vulithe puJehova. Shoka oshe shi ningi oshipu kuEva, a ninge etokolo ewinayi noonkondo. Eva okwa tokola kaa vulike kuJehova. Okwa tameke okulya oshiyimati shoka Jehova e mu indika. Lwanima, okwe shi pe wo Adam. — Gen. 3:6.
11. Oshike aavali yetu yotango ya li taya vulu okuninga, noshike ya ndopa okuninga?
11 Dhiladhila kashona kombinga yaashoka Eva a li e na okulombwela Satana. Natu tye ando okwa tile: “Ngaye kandi ku shi, ihe Tate, Jehova, ondi mu shi. Ondi mu hole nonde mu inekela. Oye e tu pa ashihe shoka tu na. Ito vulu oku mu popila muuwinayi ngawo. Za po nokuli.” Ando inashi nyanyudha tuu Jehova, okuuva oohapu ndhoka oombwanawa, tadhi popiwa komwanakadhona omuholike! (Omayel. 27:11) Ihe ohole yaAdam naEva yokuhola Jehova kaya li yomuule. Molwaashoka kaya li ye hole He, Jehova, oya nyengwa okupopila edhina lye kaali nyatekwe.
12. Satana okwa kunu ngiini omalimbililo momadhiladhilo gaEva, noshike Adam naEva ya nyengwa okuninga?
12 Ngaashi twa zi noku shi kundathana, Satana okwa li a tameke okukuna omalimbililo momadhiladhilo gaEva. Okwe mu ningitha a kale a limbililwa ngele Jehova oku li ngaa He omwaanawa. Opo ihe, Adam naEva oya ndopa okupopila edhina lyaJehova. Shoka oshe shi ningi oshipu kuyo ya pulakene kuSatana noya tukululile Jehova oshipotha. Oomwigo ndhoka nokunena Satana odho ha longitha. Oha ponokele Jehova mokunyateka edhina lye. Aantu mboka yi itaala iifundja yaSatana, ohaya nwethwa mo nuupu ya tinde epangelo lyaJehova ndyoka li li pauyuuki.
JEHOVA OHA YAPULITHA EDHINA LYE
13. Hesekiel 36:23, otayi tsu ngiini omuthindo enenedhiladhilo lyetumwalaka lyOmbiimbeli?
13 Mbela Jehova ohi idhidhimikile iifundja yaSatana, nopwaa na okuninga po sha? Hasho nando. Ombiimbeli otayi popi shoka Jehova a ninga, opo u ulike kutya iinima mbyoka ya popiwa kombinga yedhina lye muEden, kayi shi yoshili. (Gen. 3:15) Uushili owo kutya otatu vulu okungonga enenedhiladhilo lyetumwalaka lyOmbiimbeli ngaashi tashi landula: Jehova oha yapulitha edhina lye okupitila mUukwaniilwa mboka wu li kohi yepangelo lyOmwana note ke etulula uuyuuki nombili kombanda yevi. Ombiimbeli oyi na uuyelele mboka tawu tu kwathele tu uve ko nkene Jehova ha yapulitha edhina lye. — Lesha Hesekiel 36:23.
14. Omukalo moka Jehova i inyenge kuunashipotha womuEden, ogwa yapulitha ngiini edhina lye?
14 Satana okwa ningi ashihe shoka ta vulu, opo andola Jehova kaa gwanithe po elalakano lye. Ihe Satana ina pondola nando. Ombiimbeli otayi ulike shoka Jehova a ningi po, notayi gandja uumbangi kutya oku li shili Tate yetu omunahole nomupangeli omwaanawa. Odhoshili kutya uunashipotha waSatana naayehe mboka ya gama kombinga ye, owu uvitha nayi Jehova noonkondo. (Eps. 78:40) Nonando ongawo, okwa ungaunga niifundja yaSatana noondunge, neidhidhimiko nosho wo pauyuuki. Oku ulike wo oonkondo dhe oonenenene, momikalo odhindjidhindji. Shoka sha simanenena, ohole ye oyi iwetikile mukehe shoka ha ningi. (1 Joh. 4:8) Jehova okwa kala ta longo kee na oluthuwo, a yapulithe edhina lye.
Satana okwa li a fundju Eva kombinga yaJehova Kalunga, nuule womimvo omathele Omuhindadhi okwa tsikile nokunyateka edhina lyaKalunga (Tala okatendo 9-10, 15) *
15. Ongiini Satana ta nyateke edhina lyaKalunga kunena, noshizemo oshini?
15 Kunena Satana onkee ngaa ta nyatekitha edhina lyaKalunga. Oha ningitha aantu ya kale ya limbililwa ngele Kalunga oku li ngaa shili omunankondo, omuyuuki, omunandunge nomunahole. Pashiholelwa, Satana oha kambadhala okwiitaalitha aantu kutya Jehova haye Omushiti. Uuna aantu yi itaala kutya Kalunga oko e li, Satana oha kambadhala oku ya itaalitha kutya Kalunga nomithikampango dhe, odha ngambeka aantu nokadhi li pauyuuki. Oha longo nokuli aantu kutya Jehova oku li Kalunga kee na ohenda nomukwanyanya, ngoka ha fike aantu momulilo gwoheli. Uuna yi itaala iifundja mbyoka, ohashi kala oshipu kuyo ya tinde epangelo lyaJehova ndyoka li li pauyuuki. Manga Satana inaa hanagulwa po kuJehova, ota ka tsikila okunyateka edhina lye nota ka kambadhala oku ku ningitha wu pilamene Jehova. Mbela ota ka pondola ngaa?
ONKANDANGALA NDJOKA TO DHANA MOMPATA NDJOKA ONENE
16. Oshike to vulu okuninga, shoka Adam naEva ya nyengwa okuninga?
16 Jehova okwa pitika aantu inaaya gwanenena ya kuthe ombinga mokuyapulitha edhina lye. Onkee ano, oto vulu okuninga shoka Adam naEva ya nyengwa okuninga. Nonando muuyuni mbuka omu udha aantu mboka haya nyateke edhina lyaJehova noku li sheka, oto vulu oku li popila nokulombwela aantu kutya ye omuyapuki, omuyuuki, omwaanawa nomunahole. (Jes. 29:23) Oto vulu oku shi ulika kutya oye wa hala a kale omupangeli gwoye. Oto vulu okukwathela aantu ya uve ko kutya epangelo lyaJehova olyi li pauyuuki nolyo owala tali vulu okweetela aantu ayehe ombili nenyanyu. — Eps. 37:9, 37; 146:5, 6, 10.
17. Jesus okwa li a popile ngiini edhina lyaHe?
17 Uuna tatu popile edhina lyaJehova, kungawo otatu holele Jesus Kristus. (Joh. 17:26) Ka li owala a tseyithile aantu edhina lyaHe noku li longitha, ihe okwa li wo e li popile. Pashiholelwa, ka li a fa Aafarisayi mboka ya ningitha aantu ya tale ko Jehova e li omukwanyanya, ha pangele aantu, e li kokule natse noke na ohenda. Jesus okwa li ha kwathele aantu ya mone kutya He oku na ondjele, omwiidhidhimiki, omunahole noha dhimine po. Okwa li wo a kwathele aantu ya tseye Jehova, okupitila momukalo moka a li a holele thiluthilu omaukwatya gaHe, monkalamwenyo ye yakehe esiku. — Joh. 14:9.
18. Ongiini tatu vulu okwaaneka pomutenya iifundja yaSatana nokuyeleka edhina lyaJehova?
18 Ngaashi Jesus, otatu vulu okulombwela yalwe shoka tu shi kombinga yaJehova, kutya ye omunahole nomunalukeno. Ngele otwa ningi ngawo, nena otatu aneke pomutenya iifundja yaSatana nokuyeleka edhina lyaJehova. Ohatu yapulitha edhina lyaJehova mokukwathela aantu ya kale ye li tala ko eyapuki. Ngaashi Jesus, natse otatu vulu wo okuholela Jehova. Shoka otatu vulu oku shi ninga nonando inatu gwanenena. (Ef. 5:1, 2) Uuna tatu ulukile aantu moohapu nomiilonga kutya Jehova omuntu naanaa a tya ngiini, kungawo otatu yapulitha edhina lye. Ohatu yukipalitha edhina lye mokukwathela aantu yi ilonge oshili kombinga yaKalunga. * Ohatu ulike wo kutya aantu inaaya gwanenena, otaya vulu okukala aadhiginini. — Job 27:5.
Otwa hala okukwathela aakonakonimbiimbeli yetu yi ilonge kombinga yuukwatya uuwanawa waJehova (Tala okatendo 18-19) *
19. Jesaja 63:7, ote tu kwathele ngiini tu mone kutya elalakano lyetu lyokulonga aantu oli na okukala lini?
19 Opu na sha shilwe shoka tatu vulu okuninga, tu yapulithe edhina lyaJehova. Uuna tatu longo aantu oshili yOmbiimbeli, olundji ohatu tsu omuthindo uunamapangelo waKalunga, kutya oye e na uuthemba wokupangela eshito alihe, shoka shi li paushili. Nonando osha simana oku ya longa oompango dhaKalunga, elalakano lyetu olyo oku ya kwathela ya kale ye hole Tate yetu, Jehova, nokukala aadhiginini kuye. Onkee ano, otwa pumbwa okutsa omuthindo omaukwatya omawanawa gaJehova, unene tuu kutya edhina Jehova olyomuntu a tya ngiini. (Lesha Jesaja 63:7.) Ngele otwa kala hatu longo aantu momukalo ngono, otatu ke ya kwathela ya kale ye hole Jehova nokuvulika kuye, molwaashoka ya hala okukala aadhiginini kuye.
20. Oshike tatu ka kundathana moshitopolwa tashi landula?
20 Ongiini nduno tatu vulu okushilipaleka kutya eihumbato lyetu nosho wo omukalo gwetu gwokulonga aantu, otagu ke ya kwathela ya kale ya tala ko Jehova momukalo omwaanawa noya kale ya hala okuhedha popepi naye? Oshitopolwa tashi landula otashi ka yamukula epulo ndyono.
EIMBILO 2 Edhina lyoye oJehova
^ okat. 5 Ompata yini ya simana ya taalela iishitwa ayihe iinandunge? Oshike sha ningitha ompata ndjoka yi kale ya simanenena, nonkandangala yini tatu dhana moku yi kandula po? Ngele otwa kala tu shi omayamukulo gomapulo ngoka nagalwe ge ga pamba, otashi ke tu kwathela tu koleke ekwatathano lyetu naJehova.
^ okat. 18 Pethimbo limwe, iileshomwa yetu oya popile kutya edhina lyaJehova inali pumbwa okuyukipalithwa. Omolwashike mbela? Omolwaashoka kapu na nando ogumwe a ludhike kutya Kalunga ke na uuthemba wokukala nedhina Jehova. Ihe pokugongala kwokomumvo kwomo 2017, euvoko ndyoka olya li lya pepalekwa. Omunashipundi okwa tile: “Oku shi popya paunathangwa, inashi puka okugalikana edhina lyaJehova li yukipalithwe, molwaashoka olya nyatekwa.” — Tala Opolohalama yaJanuali 2018 kepandja lyetu, jw.org. Inda mpoka pwa nyolwa IILESHOMWA > OPOLOHALAMA YOTIIVII JW.”
^ okat. 62 OMATHANO: Ondiyapoli oya nyateke edhina lyaKalunga, sho ya lombwele Eva kutya Kalunga omufundja. Uule womathelemimvo, Satana okwa kala nokuhumitha komeho omalongo giifundja, ngaashi elongo kutya Kalunga omukwanyanya nosho wo kutya haye a shita aantu.
^ okat. 64 OMATHANO: Omumwatate ta tsu omuthindo omaukwatya gaJehova, sho ta konakona nomuntu.
