1-2. Miyaha taani iri soochuneyaxa wa Anamoona a Yehova?

HIYAANO ninnavoloweliwa ni miyaha soochuneyaxa—otokweene wa Muluku ni weelihiwa nsina nawe. Nave hiyaano, Anamoona a Yehova, ninnasiveliwa oloca miyaha seiha. Miyaha iha ti soochuneyaxa! Apwanne otokweene wa Muluku ni weelihiwa nsina nawe, ichu soohiyana? Hooye.

² Noohuserya wi nsina na Muluku nnaphwanela weelihiwa wa sawootha soothene nnaloceliwaaya. Noosuwela tho wi otokweene wa Yehova, naari wi mukhalelo awe wa olamulela, ti woophwanelela. Mwawiihiiha, miyaha seiha miili ti soochuneya wa hiyaano.

3. Nsina na Yehova nnaphitaanyerya eheeni?

³ Mweeparipari, nsina nawi Yehova nnavolowela mikhalelo soothene sa Muluku ahu, ophitaanyerya mukhalelo awe wa olamulela. Mwawiihiiha, vaavaa nnalocaahu wi mwaha woochuneyaxa ori weeliha nsina na Yehova wa sawootha soothene, emohamoha oloca tho wi ti woochuneya wooniherya wi mukhalelo wa olamulela wawe ti woophwanelela. Nsina na Yehova nniiwanana ni mukhalelo owo onalamuleleiye ntoko Mwene Aikuru soothesene.—Moone ekaaxa “ Makupa a Mwaha Mutokweene.”

4. Tiheeni Salumu 135:13 onaloceiye vooloca sa nsina na Muluku, nave makoho taani anahaala waakhuliwa mmwaha yoola?

⁴ Nsina nawi Yehova ti navameekhaaya. (Mwaalakhanye Salumu 135:13, NN.) Ntakhara heeni nsina na Muluku ti noochuneya? Ti liini nipacenryaaya oloceliwa sawootha? Muluku oneeliha hai nsina nawe? Nave nni nikhaviherye hai waakiha nsina nawe? Ti yeeyo nnahaalaahu othokororya mmwaha yoola.

5. Nikoho taani ancipale anapakaaya vaavaa anuupuwelelaaya sa weelihiwa wa nsina na Muluku?

⁵ Yesu oohiya vanlakani mwaha woochuneya nnaphwanelaahu olocaka mmavekelo ahu. Owo oriye: “Nsina nanyu neelihiwe.”  (Mat. 6:9) Eyo enataphulela eheeni? Weeliha onataphulela weeriha echu okhala yaweela, yooreera ni yaphaama. Akhweya akina anniikoha: ‘Apwanne nlelo nsina na Yehova tahi naweela, nooreera ni naphaama?’ Wi naakhule nikoho nenla, nnaphwanela wuupuwela ichu soothene inavolowela nsina.

6. Tiheeni eneeriha nsina okhala noochuneyaxa?

⁶ Nsina tahi pahiru ileetera seiho sirempwe vamoha va epaaxina, naari nsu nenlo muchu onaloceiye moovuwa. Moone yeeyo Piipiliya onaloceiye: “Muthanle ovuwa waphaama opwaha muhakhu muncipale.” (Masi. 22:1; Ezek. 7:1) Mu elocelo ya Ehepiri, masu awi “ovuwa waphaama” anataphulela “nsina naphaama.” Tiheeni eneeriha nsina okhala noochuneya? Nthowa nawi nsina nnavolowela omuchu, yeeyo achu akina anuupuwelaaya vooloca sa mwaneene a nsina. Mwawiihiiha, mukhalelo nnarempwaaya nsina naari mukhalelo nnalociwaaya, tahi ichu soochuneyaxa. Echu eri yoochuneyaxa ti yeeyo enarwa mmuupuweloni wa achu vaavaa anoonaaya naari aniiwaaya nsina nenlo.

7. Mmukhalelo taani achu ananyemulaaya nsina na Muluku?

⁷ Vaavaa achu analocaaya sawootha ntakhara Yehova, awo ananyemula omuchu awe. Nave vaavaa achu ananyemulaaya omuchu awe, awo anariipiha nsina nawe. Onyemuliwa woopacerya wa nsina ni omuchu wa Muluku weeren’ye woopaceryani wa miyaha sa achu. Nnahaala woona tiheeni nnahuseryaahu orweela wa munyemu yoola.

8. Tiheeni Atamu ni Eva yaasuwelaaya, nave makoho taani anakhumelela?

⁸ Tahi wi Atamu ni Eva yaasuwenle pahiru nsina nawi Yehova, nyenya tho yaanasuwela iparipari soochuneya vooloca sa mwaneene a nsina. Ntoko yootakiherya, awo yaanasuwela wi Yehova aari Mpatuxa, nave wi ichu soothene yaaryaayano—okumi, parataiso ooreeraxa ni onthamwene yaaryaayano wa mukina ni mukhwaawe—saarweela wa Yehova. (Map. 1:26-28; 2:18) Apwanne Atamu ni Eva yaahipharihela muupuwelo aya woophaameya wi yuupuwelele ichu soothene Yehova aapankeiye ntakhara yaawo? Apwanne yaahooniherya osivela ni othamalela ntakhara Mwaneene a nsina? Maakhulo yoonen’ye vaavaa yeereryiwaaya ni mwiicani a Muluku.

9. Mwawiiwanana ni Maphatxuwelo 2:16, 17 ni 3:1-5, tiheeni Yehova aalonceiye wa Atamu ni Eva, nave Satana aaruhenle hai minikwa?

 ⁹ Mwaalakhanye Maphatxuwelo 2:16, 17 ni 3:1-5. Apharihelaka enowa, Satana aamukoha Eva: “Evelevelo wi Muluku ooloca wi muhilyeekeru sawiima sa miri soothene sa mmacani mmo?” Nikoho nenla naahiipithiha yawootha yawoopiha. Echu Muluku aalonceiye yaari wi Atamu ni Eva yaaphwanela olyaaka sawiima sa miri soothene, nyenya mmoha hiyaaphwanela olya. Tiyawooneya wi miri saavaha sawiima mu Eteni, saari sincipale. (Map. 2:9) Moohikhwa minikwa, Yehova ta mahala. Pahiru haawemerenrye olya yawiima ya mwiri mmoha. Nthowa na yeeyo, nikoho na Satana naahaaruuhela minikwa vooloca sa yeeyo Muluku aaleenleiye. Satana aachuna ooweeriha wuupuwela wi Muluku haari a mahala. Akhweya Eva aahuupuwela: ‘Apwanne Muluku onakihiiherya echu yaphaama?’

10. Satana oothenrye hai nsina na Muluku, nave teevi yaari yookhumelela?

¹⁰ Ophiyerya elukuluku yeele, Eva nlelo aanamwiiwelela Yehova. Eva amwaakhulaka Satana, aahuuluulela masu yaawo Muluku aalonceiye, nave aahaaceererya wi hiyaaphwanela naari mano ophara mwiri yoole. Yene aanasuwela olopola wa Muluku, wi wakhala wi hiiwelenle aahaala okhwa. Nyenya Satana aalonce ariki: “Nyuwo hamukhwaru.” (Map. 3:2-4) Mwawiihiiha yawootha ya Satana hiyaari yoovitheya. Owo chiryene aahiloca yawootha ntakhara nsina na Muluku, yaari ntoko wi amuleela Eva ariki Yehova nawoothe. Tihiiha Satana aathatunweiye okhala Musaserya naari nawoothe. Eva aahiwokiwa moomalela; nave aamwiiwelela Satana. (1 Tim. 2:14) Eva aamuroromenle Satana omuhiya Yehova. Eyo yaaheeriha okhala wookhweya wa Eva opaka yoolakelela yoothananiha: Ohimwiiwelela Yehova. Owo aahipacerya olya yawiima yaakhwatiihiwe ni Yehova. Nave voocharela aahimvaha Atamu.—Map. 3:6.

11. Echu taani makholo ahu oopacerya yaaphwanelaaya weera nave tiheeni yaahensaaya opaka?

¹¹ Nkuupuwelani mukhalelo Eva aahaaleiye omwaakhula Satana. Mwaanyiherye wi aamwaakhunle ariki: “Miyaano nkoosuwenle, pahiru kimusuwenle Tiithi aka Yehova. Kinnamusivela Muluku nave kinnamuroromela. Ichu soothene nryaahuno miyaano ni aiyaka nivahiwe ni Yehova. We waani wi onamuloca Yehova moonanara? Opwahevo!” Yehova aahaala ohakalala omoona mwanawe a mwamuthiyana oosiveliwa alocaka masu yaala! (Masi. 27:11) Nyenya Eva haarino osivela woororomeleya wa Yehova. Nave Atamu tho haarino. Mwawiihiiha, awo hiyaawenrye waakiha nsina na Tiithi aya ntakhara yawootha.

12. Satana aamuruuhenle hai minikwa Eva, nave tiheeni Atamu ni Eva yaapankaaya?

¹² Ntoko noonnaahu, echu yoopacerya Satana aapankeiye yaari omuruuhela minikwa Eva. Owo aahimweeriha Eva okhalano minikwa vooloca sa Mwaneene a nsina nawi Yehova. Mwawiihiiha, Atamu ni Eva hiyaakinhe nsina vamoha ni omuchu wa Yehova ntakhara sawootha sa Musaserya. Awo yaahiwokiwa ni Satana nave yaahikhala mmakupa awe mu ommwareela Tiithi aya.  Olelo, Satana onnapharihela miraakho soolikana. Owo onnatitelela oloca sawootha ntakhara nsina na Yehova. Yaale aneemererya sawootha sa Satana annahuwelihiwa nave annakhooca olamulelo weekhaikhai wa Yehova.

13. Ti mwawiihai Ezekiyeli 36:23 onavuwiheiye michaka sa Mpiipiliyani?

¹³ Apwanne Yehova orimoona wiiwa sawootha iho ni aheeravo echu? Tahi yeeyo! Piipiliya onnaloca ichu seiho Yehova onapakeiye wi eelihe nsina nawe wa sawootha soothene saalociwe mu Eteni. (Map. 3:15) Mweeparipari, mwaha onavuwihiwa Mpiipiliyani mookwasa onaloca ha: Yehova onneeliha nsina nawe moorweela wa Omwene awe, yoowo onalamuleliwa ni Mwanawe, nave onahaala oruuha murecele ni wookololowa veelaponi yoothene. Miyaha sa Mpiipiliyani sinnanikhaviherya wiiwexexa mukhalelo Yehova onahaaleiye weeliha nsina nawe.— Mwaalakhanye Ezekiyeli 36:23.

14. Moohiphwacha omwareya weeren’ye o Eteni, Yehova onooniherya hai wi onneeliha nsina nawe?

¹⁴ Satana onnapaka soothene onaweryeiye wi yookhwela ya Yehova ehaakhwanele. Nto, hiwaavo muraakho oni okhumelele phaama. Piipiliya onnooniherya mukhalelo Yehova onaakhuleleiye, nave wi haavovo onalikana ni Yehova Muluku. Eparipari wi, omwareya wa Satana ni yaale anamukhaviherya onnamuthananiha Yehova. (Sal. 78:40) Nyenya Yehova onnahoolela ohipheliwa wuuwu mwamiruku, moopisa murima ni mwawookololowa. Yehova tho onnooniherya owerya wawe otokotoko mmikhalelo soohiyanahiyana. Nave opwaha soothene, osivela wawe onnooneya mu ichu soothene onapakeiye. (1 Yoh. 4:8) Moohikhwa minikwa, Yehova hantonko ohiya weeliha nsina nawe.

15. Mmahiku ahu yaala, Satana onootherya hai nsina na Muluku, nave ni sookhumelela taani?

¹⁵ Mmahiku ahu yaala, Satana onnatitelela oloca sawootha ntakhara nsina na Muluku. Owo onnaweeriha achu okhwa minikwa waakhanle wi Muluku toowerya, tawookololowa, tamiruku, ni oosivela. Ntoko yootakiherya, Satana onneererya waahuweliha achu wi Yehova tahi Mpatuxa. Naamwi awo yeemereryaka wi Muluku ookhala, Satana onnaweeriha achu wuupuwela wi Muluku vamoha ni malamulo Awe tahi awookololowa ni  oovila ochariha. Ophiyerya wi owo onnahusiha wi Yehova, Muluku awuuma murima yoowo onaweeyela achu o cukucha a mooro. Vaavaa achu aneemereryaaya sawootha seiha, onakhala wookhweya okhooca olamulelo wawookololowa wa Yehova. Satana ahaakumve otoloxiwa moomalela, owo onahaala otitelela olocaka sawootha ntakhara nsina na Yehova, nave onamweererya woolekechaani wi mukhale mmakupa awe. Apwanne owo onahaala owerya?

16. Tiheeni munaweryaanyu weera yeeyo Atamu ni Eva ahiwenryaaya?

¹⁶ Yehova, oonivaha hiyaano achu oohiphaameya, ekari ya opaka makupa mu weeliha nsina nawe. Mweeparipari, nyuwaano munanwerya opaka echu yeeyo Atamu ni Eva ahiwenryaaya. Naamwi mukhalaka mu elapo yeeyo esaren’ye ni achu yaawo analoca sawootha ni onyemula nsina na Yehova, nyuwaano mookhalano ekari ya okhala mmakupa a Muluku ni oloca eparipari—wi Yehova taweela, awookololowa, aphaama ni oosivela. (Isa. 29:23) Nave nyuwaano munanwerya wooniherya wi munnakhaviherya olamulelo awe. Mwaakhaviherye achu akina woona wi mukhalelo Yehova onalamuleleiye ti wawookololowa nave wi ti yooworu onahaala oruuha murecele ni ohakalala wa achu oothene.—Sal. 37:9, 37; 146:5, 6, 10.

17. Yesu eerinhe hai wi nsina na Tiithi awe nsuweliwe?

¹⁷ Vaava nnaakihaahu nsina na Yehova, nneerano emohamoha yeeyo Yesu Kristu eenreiye. (Yoh. 17:26) Yesu aaheeriha wi nsina na Atiithaawe nsuweliwe. Owo tahi wi aamoona opharihela nsina na Muluku, nyenya tho aanaakiha omuchu wa Yehova. Ntoko yootakiherya, Afarisi yaanananariha makhalelo a Yehova. Awo yaanapaka ichu wi Muluku ooniweke okhala awuuma murima, ooceenya, oohaacameleya ni oohimoriwa ikharari. Nyenya meerelo a Yesu yaari oohiyana. Owo aanaakhaviherya achu omoona Tiithi awe okhala oophimelela, oopixa murima, oosivela, ni ookhurumuwela. Nave tho Yesu aanatakiherya moophaameya mikhalelo sa Atiithaawe. Mwawiihiiha, achu yaanawerya wiiwexexa mukhalelo wa Yehova.—Yoh. 14:9.

18. Mmukhalelo taani nnahaalaahu ooviihavo sawootha seiho Yehova onaloceliweiye?

¹⁸ Hiyaano nnanwerya oviihavo sawootha seiho Yehova onaloceliweiye. Mwawiihai? Ntakiheryaka echu Yesu enreiye. Hiiha ntoko yene, nnanwerya waaleela akina echu nsuwenlaahu  vooloca sa Yehova ni wooniherya mukhalelo Muluku oreiye oosivela ni aphaama. Hiyaano tho, nnanwerya omutakiherya Yehova. Eyo ti yooweryeya naamwi nri achu oohiphaameya. (Éfe. 5:1, 2) Ichu soothene nneeraahu ni nnapakaahu nihiku ti nihiku, sooniheryeke wi Muluku nnamulapaahu ti Yehova. Vaavaa nneerahuno soothene, ninneeliha nsina na Muluku, nave ninnaakhaviherya achu woona nsina nawe okhala naweela. Hiyaano ninneeliha nsina na Muluku, nave ninnaakhaviherya achu ohiya moonelo wooheseya aryaayano ntakhara nsina nawe. * Nave tho ninnooniherya wi achu oohiphaameya ananwerya otitelela okhala oororomeleya.—Yobi 27:5.

19. Mwawiiwanana ni Isaiya 63:7 tiivi enaphwanela okhala yoolakelelaahu vaavaa nnaahusihaahu akina?

¹⁹ Moone nihusiheryo nikina noochuneya. Vaavaa nnaahusihaahu akina Piipiliya, ti yawooneya wi ninnaloca otokweene wa Muluku, naari wi owo ookhalano owerya wa olamulela elapo yoothene. Chiryene, eyo ti yeeparipari. Nyenya, naamwi ori woochuneya waahusiha achu malakiheryo a Muluku, yoolakelelaahu yoochuneyaxa, ori waakhaviherya achu omusivela Yehova Tiithi ahu, ni okhala oororomeleya wa yoowo. Nthowa na yeeyo, ilukuluku soothene muloceke makhalelo aphaama a Yehova. Mooniherye Muchu a mukhalelo taani oneemelela nsina nawi Yehova. (Mwaalakhanye Isaiya 63:7.) Vaavaa nnahusihaahu mmukhalelo yoola, ninnaakhaviherya achu omusivela Yehova. Hiihaa, awo anamukhwela okhala oororomeleya ni otitelela omwiiwelela.

20. Tiheeni nnahaalaahu woona mmwaha onacharela?

²⁰ Tiheeni nnaphwanelaahu weera wi meecelo ni ohusiha wahu ocicimihe nsina na Yehova ni waakhaviherya omusuwela yoowo? Mwaha onacharela onahaala waakhula nikoho nenla.