1-2. Hadia gabula dödö sebua sinangea laʼila ira Samaduhuʼö Yehowa?

NO TEFARAHU ita ba gabula dödö si tohude soʼamakhaita ba waʼasinangea Yehowa ba wamatörö hegöi fangamoniʼö töinia. Börö me Samaduhuʼö Yehowa ita, tatu adöni sibai dödöda ba wangiʼila zi dombua ngawalö andre.

² Tatu taʼila wa moguna muʼamoniʼö döi Yehowa. No göi tafahaʼö ita wa moguna fao ita ba wamaduhuʼö wa no fondrege zi sökhi lala Yehowa ba wamatörö. Daʼö mbörö wa moguna taʼameʼegö tödö sibai zi dombua ngawalö andre. Hizaʼi, hadia faoma moʼamakhaita gabula dödö si dombua andre? Tatu manö.

3. Hadia zoʼamakhaita ba döi Yehowa?

³ Fefu hadia ia zoʼamakhaita khö Lowalangida Yehowa, farahu daʼö ba döi niʼokhögönia. Daʼö mbörö wa moʼamakhaita döi Yehowa ba lalania ba wamatörö. Andrö, na tawaʼö tödöda wa no fondrege zi tohude wangamoniʼö töi Yehowa, sindruhunia daʼa göi zangoromaʼö wa omasi ita tafaduhuʼö wa no fondrege zi sökhi lala Yehowa ba wamatörö. Sindruhu-ndruhu wa moʼamakhaita sibai döi Yehowa ba lalania ba wamatörö si tobali Samatörö Fondrege Zalawa.​—Faigi kotak ” Si Farahu ba Wangamoniʼö Töi Lowalangi”.

4. Hadia niwaʼö Zinunö 135:13 sanandrösa ba döi Lowalangi, ba hadia wanofu-nofu nitutunöda ba artikel daʼa?

⁴ Tohude sibai döi Yehowa andrö. (Baso Zinunö 135:13.) Hana wa tohude sibai döi Lowalangi? Hadia zalua me teʼobousi döinia si oföna sibai? Hewisa lala Lowalangi ba wangamoniʼö töinia? Ba hewisa wa tola fao ita ba wangoʼawögö töinia? Datatutunö wanema linia ba artikel daʼa.

5. Hadia wanofu zi tumbu ba dödöda me tarongo sanandrösa ba wangamoniʼö töi Lowalangi?

⁵ ”Yateʼamoniʼö döimö.” (Mat. 6:9) Daʼa ngawua wehede sabölö iʼofönaiʼö Yesu ba wangandrönia. Hadia geluaha wehede Yesu andrö? Fangamoniʼö, yaʼia daʼö famorege nifalua  enaʼö lö taʼunö mazui lö raʼiö zi sambua ngawalö. Hizaʼi, te so ösa niha sangumaʼö, ”No teʼamoniʼö döi Yehowa, lö taʼunö, ba lö raʼiö. Na simanö, hana wa moguna muʼamoniʼö nasa döinia?” Ba wameʼe fanema li ba wanofu andrö, moguna aboto ba dödöda hadia manö zi farahu ba döi niʼokhögöda.

6. Hana wa tohude sibai döi niʼokhögöda?

⁶ Tohude sibai döi niʼokhögöda. Tenga ha ngawua wehede nisura mazui nitötöi daʼö. Nehegö hadia niwaʼö Zura Niʼamoniʼö, ”Sebua böli döi si sökhi moroi ba ganaʼa sebua.” (Gamd. 22:1; Zango. 7:1) Hana wa tohude sibai döi si sökhi andrö? Börö me moʼamakhaita daʼö ba lala wangera-ngera niha sanandrösa khö zi samösa niha. Börö daʼö, tenga lala wanura mazui fanötöi yaʼia zabölö tohude, hizaʼi hadia niʼangeragö niha na labaso mazui na larongo döi daʼö.

7. Hadia lala niforege niha ba wamakiko töi si sökhi niʼokhögö Lowalangi?

⁷ Ato niha samorege ba wamakiko töi si sökhi niʼokhögö Yehowa. Börö daʼö, oya walimosa nifazaewera sanandrösa khö Yehowa enaʼö lö sökhi lala wangera-ngera niha sanandrösa khö Lowalangi. Alua daʼö si oföna sibai ba Kabu Edena. Datatutunö zalua andrö.

8. Hadia zaboto ba dödö Gadamo hegöi Khawa, ba hadia manö wanofu-nofu si tola tumbu ba dödöda sanandrösa khöra?

⁸ Aboto ba dödö Gadamo hegöi Khawa wa töi Lowalangi yaʼia daʼö Yehowa, ba oya göi waʼaboto ba dödö si tohude niʼokhögöra sanandrösa khönia. Duma-dumania, laʼila wa Yehowa andrö no Somböi sameʼe khöra faʼauri, nahia waʼatoröi si sökhi hegöi foʼomo soʼahonoa. (1 Moz. 1:26-28; 2:18) Hizaʼi, hadia lö aetu-aetu laʼogunaʼö lala wangera-ngerara soʼahonoa ba woʼangerönusi fefu howu-howu nitemara moroi khö Yehowa? Hadia laforege enaʼö itugu laʼomasiʼö ba laʼosinangegö ia? Tebeʼe wanema li ba wanofu-nofu andrö ba ginötö itandraigö ira udu Lowalangi.

9. Moloʼö 1 Moze 2:16, 17 ba 3:1-5, hadia niwaʼö Yehowa khö Gadamo ba Khawa, ba hewisa lala Zatana ba wolimo yaʼira?

⁹ Baso 1 Moze 2:16, 17 ba 3:1-5. Iʼogunaʼö gulö Satana ba wanofu khö Khawa,  ”Hadia, duhu no iwaʼö Lowalangi: Löʼö manö miʼa mbua geu ba kabu?” Iforege Satana ba wolimo Khawa enaʼö so khönia lala wangera-ngera si lö sökhi sanandrösa khö Lowalangi. Sindruhunia, ha sageu döla zinanö si no itatugöi Yehowa enaʼö lö laʼa mbuania. Hizaʼi, tola laʼa mbua geu tanö böʼö. Tatu oya sibai ngawalö mbua geu si tola laʼa ira Adamo ba Khawa. (1 Moz. 2:9) Oböwö sibai khöra Yehowa. Sindruhunia, falimosa nösi wanofu Zatana andrö. Idönisi lala wangera-ngera Khawa enaʼö iwaʼö tödönia wa atali Lowalangi. Tola manö manofu-nofu dödö Khawa, ’Hadia so nibiniʼö Lowalangi khögu?’

10. Hewisa lala Zatana ba wangobousi töi Lowalangi, ba hadia lua-luania?

¹⁰ Me isofu daʼö Satana, moloʼö nasa Khawa khö Yehowa si tobali Samatörö yaʼia. Ifatunö khö Zatana Khawa sanandrösa ba goroisa si no ihaogö itutunö Lowalangi. Iwaʼö göi Khawa wa tebai lababaya döla geu andrö. Aboto ba dödönia wa hasambalö mate ira na lö laʼoʼö niwaʼö Lowalangi. Hizaʼi, imane Satana, ”Maʼifu sa lö mate ami.” (1 Moz. 3:2-4) Iadaʼa, lö saʼae ibiniʼö Satana ba wamatunö wa si falimo Lowalangi. Iböbögö zi lö duhu khö Lowalangi ba ifakiko döi si sökhi niʼokhögönia. Daʼö mbörö wa mufotöi ia Afökha, eluahania samöbögö si lö duhu. Telimo Khawa irege faduhu dödönia ba wehede Zatana. (1 Tim. 2:14) Börö me abölö faduhu dödönia khö Zatana moroi khö Yehowa, ihalö gangetula si fasala. Lö iʼoʼö niwaʼö Yehowa, ba iʼa mbua geu si no itatugöi Lowalangi enaʼö böi laʼa. Ba gafuriata, ibeʼe göi mbua geu andrö khö Gadamo.​—1 Moz. 3:6.

11. Hadia menaʼö zinangea lafalua ira Adamo ba Khawa me iʼobousi döi Yehowa Satana?

¹¹ Angeragö hewisa zinangeania Khawa ba wameʼe fanema li khö Zatana. Khalaigö na simane daʼa niwaʼönia, ”Lö uʼila haniha ndraʼugö. Hizaʼi, aboto ba dödögu hewisa zindruhunia Namagu andrö sotöi Yehowa. Uʼomasiʼö ba faduhu dödögu khönia. No ibeʼe khöma fefu hadia ia. Hana wa barani sibai ndraʼugö wangumaʼö simane daʼö! Ofanö!” Na lö faröi Khawa, ba iwaʼö wehede simane daʼö, tatu omuso sibai dödö Yehowa! (Gamd. 27:11) Hizaʼi, lö laʼokhögö waʼomasi si lö faröi khö Yehowa ira Adamo hegöi Khawa. Daʼö mbörö wa lö laʼoʼawögö döi Yehowa me iböbögö khönia zi lö duhu Satana.

12. Hewisa lala Zatana enaʼö so waʼaombö dödö khö Khawa, ba hadia zi lö lafalua ira Adamo ba Khawa?

¹² Simane si no tatutunö, no ibörögö Satana ba wangobousi töi Lowalangi ba Kabu Edena. Iforege enaʼö aombö dödö Khawa wa Ama si sökhi Yehowa andrö. Ba börö me lö laʼoʼawögö döi Yehowa ira Adamo ba Khawa, mofozu Zatana ba wondrönisi tödöra irege mamadaö ira khö Namara. Iadaʼa, iʼogunaʼö göi lala si fagölö Satana. Ifazaewe walimosa sanandrösa khö Yehowa enaʼö tekiko döi si sökhi niʼokhögönia. Ato  niha si faduhu tödö ba walimosa Zatana andrö. Lua-luania, alio sibai tedönisi dödöra irege lö omasi ira na Yehowa zi tobali Samatörö yaʼira.

13. Simane nisura ba Hezekieli 36:23, hadia nösi Zura Niʼamoniʼö sabölö tohude?

¹³ Hadia itehegö manö Yehowa na iʼobousi döinia Satana? Löʼö. No itutunö khöda Sura Niʼamoniʼö hadia manö zi no ifalua Yehowa ba wangoromaʼö wa fasala niböbögö Zatana khönia ba Kabu Edena. (1 Moz. 3:15) Sindruhunia, tola tahalö rahu-rahu wa ösi Zura Niʼamoniʼö sabölö tohude yaʼia daʼö: Iʼogunaʼö Wamatörö nidöniaʼö Nononia Yehowa ba wangamoniʼö töinia hegöi ba wangaʼasogö faʼahono dödö ba gulidanö, ba ifönui gulidanö andre niha satulö tödö. Börö daʼö, na tabaso Zura Niʼamoniʼö, tola aboto ba dödöda hewisa lala Yehowa ba wangamoniʼö töinia.​—Baso Hezekieli 36:23.

14. Hadia nifalua Yehowa ba wangamoniʼö töinia me no aefa wamadaö nifalua ba Kabu Edena?

¹⁴ Oya lala si no ifalua Satana ba wanaisi ohitö dödö Yehowa. Hizaʼi, lö irai mofozu ia. Itutunö khöda Sura Niʼamoniʼö hadia manö zi no ifalua Yehowa si tobali tandra wa yaʼia andrö Ama sebua faʼomasi ba Samatörö fondrege zi sökhi. Sindruhu sa, afökhö sibai dödö Yehowa me molawa khönia Zatana hegöi fefu zi fao khönia. (Zin. 78:40) Hewaʼae simanö, lö tebulö iforomaʼö Yehowa waʼatua-tua, faʼatulö, ba faʼebolo dödö ba wamalua hadia ia. No hauga kali göi iforomaʼö kuasonia sahöli-höli dödö. Ba sabölö tohudenia, ifalua fefu hadia ia si fao faʼomasi. (1 Yoh. 4:8) Sindruhu-ndruhu wa iforege Yehowa ba wangamoniʼö töinia.

15. Hewisa wangobousi Zatana döi Lowalangi iadaʼa, ba hadia lua-luania?

¹⁵ Irugi iadaʼa, lö iböhöli Satana ba wangobousi töi Lowalangi. Iforege enaʼö aombö dödö niha hadia sindruhu-ndruhu sebua kuaso Lowalangi andrö, atulö, atua-tua ba sebua faʼomasi. Duma-dumania, iforege ba wamaduhuʼö ba dödö niha wa lö hadöi Somböi. Ba hewaʼae na so niha si faduhu tödö wa so Lowalangi, iforege Satana  enaʼö lawaʼö tödöra wa lö atulö Lowalangi ba talafo fatandro gamakhoitania. Ifazaewe wamahaʼö wa Yehowa andrö Lowalangi si lö sökhi ba si lö tödö, sanunu niha ba galitö narako. Na faduhu dödö niha ba walimosa Zatana, tola manö latimbagö Yehowa tobali samatörö yaʼira. Fatua lö mufakiko Zatana, lö iböhöli ba wangobousi töi Yehowa, ba iforege göi ba wondrönisi tödömö. Hadia mofozu ia?

16. Hadia zi tola öfalua, si tebai lafalua ira Adamo ba Khawa?

¹⁶ Itehegö Yehowa na fao niha si lö moʼahonoa ba wangamoniʼö töinia. Börö daʼö, tola öfalua hadia zi tebai lafalua ira Adamo ba Khawa. Hewaʼae na no lafasui ndraʼugö niha sangobousi ba sangoʼaya töi Yehowa, tola öfatunö khöra wa Yehowa andrö no Lowalangi sindruhu, niʼamoniʼö, si sökhi, ba sebua faʼomasi. (Yes. 29:23) Tola göi ötuhini wamatörö Yehowa. Tola öfatunö ba niha wa ha famatörö Yehowa wondrege zi sökhi ba ha famatörönia andrö zi tola manolo yaʼita ba wangokhögö faʼauri safönu faʼahono dödö hegöi faʼomuso dödö.​—Zin. 37:9, 37; 146:5, 6, 10.

17. Hadia nifalua Yesu enaʼö laʼila niha sato döi Namania?

¹⁷ Ba ginötö taʼoʼawögö döi Yehowa, no taʼoʼö duma-duma Yesu Keriso. (Yoh. 17:26) Iforege Yesu enaʼö laʼila niha döi Namania. Hewisa lalania ba wamalua daʼö? Tenga ha iʼogunaʼö döi Yehowa, ifatunö göi ba niha tanö böʼö zindruhu sanandrösa khö Namania. Duma-dumania, iforomaʼö wa fasala wamahaʼö niha Farizaiʼo. Lafahaʼö niha wa Yehowa andrö no Lowalangi samuʼi, si lö faʼahakhö dödö, abua sibai ba wangomusoiʼö tödönia, ba tebai fahuwu ita khönia. Hizaʼi, itolo niha böʼö Yesu enaʼö laʼila wa Amania andrö, no sebolo tödö, sebua faʼomasi, somasi mangefaʼö sala, ba tola taʼomusoiʼö dödönia. Iʼoʼö göi Yesu mbua-bua Namania ba lala waʼaurinia sero maʼökhö. Me ifalua daʼö, itolo niha enaʼö itugu aboto ba dödöra Yehowa.​—Yoh. 14:9.

18. Hewisa wangoromaʼöda wa fasala fefu wamobahulu niböbögö khö Yehowa?

¹⁸ Simane Yesu, tola göi tafatunö ba niha sanandrösa khö Yehowa, ba tafahaʼö ira wa Yehowa andrö no Lowalangi si sökhi ba sebua faʼomasi. Na tafalua daʼö, no taforomaʼö  wa lö atulö fefu wamobahulu niböbögö khö Yehowa, irege tola aboto ba dödö niha wa teʼamoniʼö sibai döi Yehowa andrö. Tola göi taʼoʼö mbua-bua Yehowa hewaʼae na niha si lö moʼahonoa ita. (Ef. 5:1, 2) Moroi ba wehede hegöi amuatada, tola taforomaʼö hewisa zindruhunia Yehowa andrö. Na tafalua daʼö, no taʼamoniʼö döinia. No tatolo niha enaʼö teʼefaʼö ira moroi ba wamahaʼö si fasala sanandrösa khö Lowalangi. Ba no taforomaʼö göi wa so niha si lö moʼahonoa si tola mondrorogö faʼalöfaröira khö Lowalangi.​—Yob. 27:5.

19. Hewisa Yesaya 63:7 ba wanolo yaʼita ba wangiʼila hadia gohitö dödöda si oföna ba wamahaʼö niha böʼö?

¹⁹ So danö böʼö zi tola tafalua ba wangamoniʼö töi Yehowa. Ba ginötö tafahaʼö zindruhu si so ba Zura Niʼamoniʼö ba niha böʼö, asese tafadunö-dunö sanandrösa ba waʼasinangea Lowalangi ba wamatörö banua si yawa awö danö. Atulö sa wa moguna sibai tafalua daʼö. Hizaʼi, ohitö dödöda si oföna yaʼia daʼö ba wanolo niha nifahaʼöda ba Zura Niʼamoniʼö enaʼö laʼomasiʼö Namada sotöi Yehowa ba lö faröi ira khönia. Andrö, baero ba wanutunö sanandrösa ba goi-goi si no itatugöi Lowalangi, moguna asese tadunö-dunö sanandrösa ba gamuata Yehowa. Omasi ita taforomaʼö hewisa zindruhunia gamuata Lowalangi sotöi Yehowa andrö. (Baso Yesaya 63:7.) Na tafalua daʼö, tola tumbu ba dödöra waʼomasi khö Yehowa, ba laʼoʼö niwaʼö Yehowa börö me sindruhu-ndruhu omasi ira ba wamalua daʼö.

20. Hadia nitutunöda ba artikel aefa daʼa?

²⁰ Moguna tatolo niha böʼö ba woʼangeragö ngawalö zi sökhi sanandrösa khö Yehowa na larongo döi daʼö, ba tafarou dödöra ba wangahatöʼö yaʼira khönia. Börö daʼö, hewisa zinangeania gamuatada hegöi lalada ba wamahaʼö? Artikel aefa daʼa zanutunö sanandrösa ba wanofu andrö.