1-2. Ko e heigoa e tau matakupu kua aoga lahi ke he Tau Fakamoli a Iehova?

KO E tau matakupu aoga lahi kua fehagai mo tautolu mogonei​—pule katoatoa he Atua mo e fakatokoluga he higoa haana. Ha ko e Tau Fakamoli a Iehova kua fiafia a tautolu ke tutala ke he tau matakupu omoomoi ia. Ka e nakai ke fakatatai e pule katoatoa he Atua ke he fakatapuaga he higoa haana, ha kua matutaki e tau mena ua nei.

² Kua iloa mogoia e tautolu oti kua lata e higoa he Atua ke fakatapu. Iloa foki e tautolu ko e pule katoatoa, po ke puhala pule ha Iehova kua lata ke fakakite ai kua mua atu e mitaki. Ti kua aoga e tau matakupu ua nei.

3. Ko e heigoa ne putoia he higoa Iehova?

³ Ko e higoa Iehova kua ha ha ai e tau mena oti hagaao ke he Atua ha tautolu, putoia e puhala pule haana. Ti ka pehē a tautolu ko e fakameā e higoa ha Iehova mai he tau ekefakakelea oti ko e matakupu kua mua atu e aoga, kua pehē foki a tautolu ko e puhala pule ha Iehova kua lata ke fakakite kua mua e mitaki. Ko e higoa ha Iehova kua tata lahi ke he puhala ne pule a ia ko e Pule Katoatoa.​—Kikite puha “ Tau Vala Foki he Matakupu Lahi.”

4. Fakamaama fēfē he Salamo 135:13 e higoa he Atua, mo e ko e heigoa e tau hūhū ka tali e tautolu he vala tala nei?

⁴ Ko e higoa Iehova kua uho pauaki. (Totou Salamo 135:13.) Ko e ha kua aoga lahi e higoa he Atua? Puhala fe ne ekefakakelea fakamua ai? Fakatapu fēfē ai he Atua? Ti lagomatai fēfē e tautolu ke lalago e higoa haana? To tali e tautolu e tau hūhū ia.

5. Ko e heigoa kua liga manamanatu a tautolu ki ai ka fakatutala ke he fakatapu he higoa he Atua?

⁵ “Kia tapu hau a higoa.” (Mata. 6:9) Ko e mena ia ne talahau e Iesu ko e taha mena aoga lahi ke tuku fakamua he liogi. Ka ko e heigoa e kakano he tau kupu ha Iesu? Ke fakatapu e taha mena kua kakano ke taute ai ke tapu, meā, po ke tavana. Ka e liga manatu e falu, ‘Nakai kia kua fitā e higoa ha Iehova he tapu, meā, mo e tavana?’ Ke tali, lata ke manamanatu ke he tau mena ne putoia ke he higoa.

6. Ko e heigoa ati aoga lahi e higoa?

⁶ Ko e higoa ne nakai ni ko e tau matatohi hokoia he laupepa po ke talahau fakaleolahi. Mailoga e talahauaga he Tohi Tapu: “Kia mua e manako ke talahaua mitaki ke he manako ke he tau koloa loga.” (Fakatai 22:1; Fakama. 7:1) Ko e tau kupu he vagahau fakamua ma e “talahaua mitaki” ne kakano “ko e higoa.” Ko e ha kua aoga lahi pihia e higoa? Ha kua putoia e talahaua mitaki, mena ne manamanatu e falu ke he tagata he higoa ia. Ti ko e puhala ne tohi po ke fakaleo aki e higoa, kua nakai aoga lahi; ko e mena ne mua e aoga ko hai mo e ko e heigoa ne manamanatu e tau tagata ki ai hagaao ke he higoa ia.

7. Ekefakakelea fēfē he tau tagata e higoa he Atua?

⁷ Ka talahau he tau tagata e tau tala fakavai hagaao ki a Iehova, kua lali a lautolu ke ekefakakelea e higoa mitaki haana. He ekefakakelea e lautolu e higoa mitaki haana, kua lali a lautolu ke moumou e higoa haana. Ne ekefakakelea fakamua e higoa mitaki he Atua he kaina ko Etena. Manamanatu ke he fakaakoaga ka moua e tautolu mai he ekefakakelea nei.

8. Ko e heigoa ne iloa e Atamu mo Eva, mo e ko e heigoa e tau hūhū ne lagā mai?

⁸ Iloa e Atamu mo Eva e higoa ha Iehova, mo e tau tala mooli hagaao ki a Ia he higoa ia. Iloa e laua ko Iehova ko e Tufuga, ko Ia ne foaki age e moui, kaina Parataiso fulufuluola ha laua, mo e hoa mitaki katoatoa. (Kene. 1:26-28; 2:18) Ka e to matutaki nakai a laua ke fakaaoga e manamanatuaga mitaki katoatoa ke manamanatu fakahokulo ke he tau mena oti kua taute e Iehova ma laua? To fakatumau nakai a laua ke atihake e fakaalofa mo e loto fakaaue ki a Iehova? Kitia maali e tau tali he mogo ne kamatamata he fī he Atua a laua.

9. Ia Kenese 2:16, 17 mo e 3:1-5, ko e heigoa ne poaki e Iehova ke he hoa fakamua, mo e puhala fe ne fakahehē e Satani e tala mooli?

 ⁹ Totou Kenese 2:16, 17 mo e 3:1-5. He fakaaoga e Satani e gata mo gutuvagahau, ne hūhū a ia ki a Eva: “Ko e moli kia kua pehe mai e Atua, aua neke kai e mua ke he tau akau oti he kaina?” Ha ha he hūhū ia e pikopiko ne tuga e mena kona ne fufū i ai. Poaki e Atua kua maeke a laua ke kai mai he tau akau oti ka e taha e akau ka nakai kai e laua. Loga lahi e tau akau kehekehe kua maeke a Atamu mo Eva ke kai. (Kene. 2:9) Ē, kua fakamokoi mooli a Iehova. Ka e nakai fakaatā he Atua a Atamu mo Eva ke kai e fua lakau he taha e akau ne kotofa e Ia. Ti kua fakahehē he hūhū ha Satani e tala mooli. Taute e Satani ke tuga kua nakai fakamokoi e Atua. Liga manamanatu a Eva, ‘Kua fai mena mitaki kia ne nakai foaki mai he Atua ki a au?’

10. Puhala fe ne ekefakakelea e Satani e higoa he Atua, mo e ko e heigoa e fua?

¹⁰ He mogo ne hūhū e Satani e hūhū nei, ne omaoma agaia a Eva ki a Iehova. Tali e ia a Satani he liu fatiaki e poakiaga maaliali he Atua. Lafi e ia kua nakai lata foki a laua ke pipiki ke he akau. Iloa e ia e hatakiaga he Atua ka nakai omaoma to mamate ai. Ka e tali atu a Satani: “Nakai ni mamate a mua.” (Kene. 3:2-4) Kua nakai fakagalogalo a Satani mogonei. Ne ekefakakelea e ia e higoa he Atua he tala age ki a Eva kua pikopiko a Iehova. Ti kua eke a Satani mo tiapolo, po ke pikopiko. Kua fakavai ki a Eva; ne talitonu a ia ki a Satani. (1 Timo. 2:14) Lahi atu e falanaki haana ki a Satani ke he falanaki haana ki a Iehova. Ko e mena ia ati mukamuka lahi a Eva ke taute e fifiliaga ne mua atu e kelea. Fifili e ia ke nakai omaoma ki a Iehova. Kamata a ia ke kai e fua lakau ne nakai fakaatā e Iehova a ia ke kai. Fakamui, age ai foki e ia ki a Atamu.​—Kene. 3:6.

11. Ko e heigoa ne lata he tau matua uluaki ha tautolu ke taute, ka ko e heigoa e mena ne kaumahala a laua ke taute?

¹¹ Manamanatu fakakū la ke he mena kua lata a Eva ke tala age ki a Satani. Liga talahau e ia e taha mena pehē: “Nakai iloa e au ko hai a koe, ka e iloa e au e haaku Matua ko Iehova, ti fakaalofa mo e falanaki au ki a ia. Foaki mai e ia ki a Atamu mo au e tau mena oti kana. Ko e fia lahi ha ia haau ke talahau ha mena kelea hagaao ki a Iehova. Fano kehe!” To fiafia lahi a Iehova he logona e tau kupu fakamooli pihia mai he tama fifine loto fakaalofa! (Fakatai 27:11) Ka e nakai fakaalofa fakamooli a Eva ki a Iehova; ti nakai aga pihia foki a Atamu. Ha kua nakai fakaalofa pihia ke he Matua ha laua, kaumahala a Atamu mo Eva ke lalago e higoa ha Iehova mai he ekefakakelea.

12. Fakatupu fēfē e Satani e fakauaua he manamanatuaga ha Eva, ti ko e heigoa ne kaumahala a Atamu mo Eva ke taute?

¹² Tuga ne mailoga e tautolu, kamata e Satani he fakatupu e fakauaua he manamanatuaga ha Eva. Ti omoomoi e ia a Eva ke hūhū toko ke he Atua ne higoa ko Iehova. Ne kaumahala  a Atamu mo Eva ke lalago e higoa mitaki ha Iehova. Fakamukamuka he mena nei a laua ke fanogonogo ki a Satani ka e totoko ke he Matua ha laua. Fakaaoga e Satani e tau lagatau pihia mogonei. Totoko e ia e higoa ha Iehova he ekefakakelea ai. Ko e tau tagata ne talitonu ke he tau pikopiko ha Satani kua mukamuka lahi ke fakahehē ke tiaki e pule tututonu ha Iehova.

13. Fakamaama fēfē he Esekielu 36:23 e matapatu fekau he Tohi Tapu?

¹³ Talia kia e Iehova e tau ekefakakelea ia ti nakai taute ha mena hagaao ki ai? Nakai! Ko e Tohi Tapu katoa kua hagaaki ke he puhala ne taute e Iehova ke utakehe e tau mena kelea ne talahau ke he higoa haana i Etena. (Kene. 3:15) Maeke a tautolu ke fakamaama fakakū e matapatu fekau he Tohi Tapu he puhala nei: Kua fakatapu e Iehova e higoa haana puhala he Kautu ne pule e Tama haana mo e liuaki mai e tututonu mo e mafola ke he lalolagi. Ha ha he Tohi Tapu e tau vala tala kua lagomatai a tautolu ke maama e puhala ha Iehova ka fakakatoatoa e fakatapuaga he higoa haana.​—Totou Esekielu 36:23.

14. Fakakite fēfē e Iehova he tali ke he totokoaga i Etena kua fakatapu e higoa haana?

¹⁴ Kua eketaha a Satani ke taofi a Iehova he fakahoko Haana finagalo. Ka e kaumahala tumau a Satani. Fakakite he Tohi Tapu e tau gahua ha Iehova, ti fakamooli ai kua nakai fai foki ke tatai mo Iehova ko e Atua. Mooli, ko e totokoaga ha Satani mo lautolu oti ne kau mo ia kua fakamamahi lahi ki a Iehova. (Sala. 78:40) Ka kua fehagai a ia ke he totokoaga nei ke he puhala pulotu, fakauka, mo e fakafili tonu. Kua fakakite foki e ia e malolō ue atu haana ke he tau puhala loga. Mua atu ai, kua kitia e fakaalofa haana he tau mena oti ne taute e ia. (1 Ioa. 4:8) Nakai okioki a Iehova he gahua ke fakatapu haana higoa.

15. Ekefakakelea fēfē e Satani e higoa he Atua mogonei, ti ko e heigoa e fua?

¹⁵ Ekefakakelea agaia e Satani e higoa he Atua. Fakahehē e ia e tau tagata ke fakauaua na malolō, fakafili tonu, pulotu, mo e fakaalofa nakai e Atua. Ma e fakatai, lali a Satani ke fakaohooho e tau tagata ke talitonu ne  nakai ko e Tufuga a Iehova. Ti ka talia he tau tagata na fai Atua, lali a Satani ke fakaohooho a lautolu ke talitonu ko e Atua mo e Haana tau tuaga kua pāpā maō mo e nakai tonu. Fakaako foki e ia ke he tau tagata ko Iehova ko e Atua kua nakai fakaalofa mo e vale he tugi e tau tagata he afi tote. Mogo ka talitonu a lautolu ke he tau pikopiko kelea nei, ti mukamuka a lautolu ke tiaki e pule tututonu ha Iehova. Ato utakehe katoatoa a Satani, to matutaki a ia ke pikopiko hagaao ki a Iehova, to lali foki a ia ke fuluhi kehe a koe mai ia Iehova. To kautū nakai a ia?

16. Maeke fēfē a koe ke taute e mena ne kaumahala a Atamu mo Eva ke taute?

¹⁶ Fakaatā e Iehova e tau tagata nakai mitaki katoatoa ke lagomatai ke fakatapu e higoa haana. Ti kua maeke a koe ke taute e mena ne kaumahala a Atamu mo Eva ke taute. Pete ne puke e lalolagi he tau tagata ne ekefakakelea mo e amuamu ke he higoa ha Iehova, maeke a koe ke lalago a Ia he tala age ke he tau tagata kua tapu, tututonu, mitaki, mo e fakaalofa a Iehova. (Isaia 29:23) Maeke a koe ke lalago e pule haana. Ti maeke ia koe ke lagomatai e tau tagata ke maama ko e pule ni ha Iehova kua tututonu mooli mo e to tamai e mafola mo e fiafia ke he tau tufugatia oti kana.​—Sala. 37:9, 37; 146:5, 6, 10.

17. Ko e heigoa ne taute e Iesu ke fakailoa e higoa he Matua haana?

¹⁷ Ka lalago e tautolu e higoa ha Iehova, kua muitua e tautolu e fakafifitakiaga ha Iesu Keriso. (Ioane 17:26) Fakailoa e Iesu e higoa he haana Matua he fakaaoga e higoa ia mo e fakaako foki ke he tau tagata hagaao ki a Iehova. Ma e fakatai, fakatikai e ia e tau Farasaio ne fakakite he tau puhala kehekehe kua vale, pule lahi, mamao, mo e nakai fakaalofa noa a Iehova. Lagomatai e Iesu e tau tagata ke kitia e Matua haana kua mahani fakalatalata, fakauka, fakaalofa, mo e fakamagalo. Lagomatai foki e ia e tau tagata ke kitia a Iehova he puhala ne fifitaki katoatoa e ia e tau aga he Matua he moui haana he tau aho takitaha.​—Ioane 14:9.

18. Utakehe fēfē e tautolu e tau pikopiko mo e ekefakakelea hagaao ki a Iehova?

¹⁸ Tuga a Iesu, maeke a tautolu ke tala age ke he tau tagata e tau mena ne iloa e tautolu hagaao ki a Iehova ti fakaako ki ai kua fakaalofa mo e totonu a Ia ko e Atua. He taute  pihia, kua utakehe e tautolu e tau pikopiko mo e ekefakakelea hagaao ki a Iehova. Fakatapu e tautolu e higoa ha Iehova he taute ai ke tapu ke he tau manatu mo e tau loto he tau tagata. Maeke foki a tautolu ke fifitaki a Iehova. Maeke ke taute pihia pete kua nakai mitaki katoatoa a tautolu. (Efeso 5:1, 2) Ka fakakite he tau kupu mo e tau gahua ha tautolu ke he tau tagata e tuaga ha Iehova, kua lagomatai a tautolu ke fakatapu e higoa haana. Fakatokoluga e tautolu e higoa ia he lagomatai e tau tagata ke iloa e tala mooli hagaao ke he Atua. * Fakakite foki e tautolu kua maeke e tau tagata nakai mitaki katoatoa ke fakatumau e mahani fakamooli.​—Iopu 27:5.

19. Lagomatai fēfē he Isaia 63:7 a tautolu ke iloa ko e heigoa e matapatu kakano he fakaako atu ha tautolu?

¹⁹ Manamanatu foki ke he taha fakaakoaga aoga ka fakagahua e tautolu. He fakaako atu e kupu mooli he Tohi Tapu ke he falu, fa fakamaama e tautolu e pule katoatoa he Atua, kakano ko Iehova kua tonuhia ke pule ke he lagi mo e lalolagi katoatoa, ti hako e talahauaga nei. Ka e pete he aoga ke hagaaki ke he tau matafakatufono he Atua, ko e matapatu foliaga ke lagomatai e falu ke fakaalofa ki a Iehova ha tautolu a Matua mo e ke fakamooli ki a ia. Lata foki a tautolu ke fakamaama e tau aga mitaki ha Iehova mo e fakakite e Atua ne higoa ko Iehova. (Totou Isaia 63:7.) He fakaako atu pihia a tautolu, to lagomatai e tautolu e falu ke fakaalofa ki a Iehova mo e omaoma ki a ia ha ko e manako ha lautolu ke mahani fakamooli ki a ia.

20. Ko e heigoa ka fakatutala a tautolu ki ai he vala tala ka mui mai?

²⁰ Ti maeke fēfē a tautolu ke fakakite he tau mahani mo e puhala fakaako ha tautolu kua mitaki e higoa ha Iehova ti futia mai e falu ki a ia? To tali he vala tala ka mui mai e hūhū ia.