1-2. Jiihóvah Yá Dahalneʼé haʼátʼíí yaa yádaałtiʼgo ayóó yídaneedlı̨́?

DIYIN nahaʼáii nilı̨́įgi bízhiʼ diyingo óolzingi dííshjı̨́įdi tʼáá íiyisíí ílíinii átʼéego nihídadéétʼiʼ. Éí Jiihóvah Yá Halneʼé daniidlínígíí díí baa yádeiiltiʼgo ayóó bídaniidlı̨́. Ndi Diyin nahaʼáii nilı̨́įgi áádóó bízhiʼ diyingo óolzingi éísh naaki ałʼąą átʼéego átʼé? Ndagaʼ.

² Tʼáá áníiltso nihił béédahózingo Diyin bízhiʼ éí bitsʼą́ą́ʼ yíchxǫʼ yę́ęgi dílzingo áńdoolnííł. Áádóó ałdóʼ bídahwiilʼą́ąʼgo Jiihóvah nahaʼáii nilı̨́įgi ílíinii átʼé. Áko díí tʼáá áłah éí ílíinii átʼéego nihídadéétʼiʼ.

3. Yízhí Jiihóvah éí haʼátʼíí ałdóʼ bił nítʼiʼ?

³ Yízhí Jiihóvah éí nihiDiyin tʼáá ałtsojįʼ átʼéegi bił nítʼiʼ. Éí nahaʼáii nilı̨́įgi ałdóʼ bił nítʼiʼ. Áko Jiihóvah bízhiʼ yíchxǫʼígíí dílzin áńdoolníiłgo Jiihóvah nahaʼáagi éí tsʼídá yáʼátʼéehgi bee bééhodoozįįł. Jó, bízhiʼ éí Ayóó Átʼéii nahaʼáii nilı̨́įgi bił ahídéétʼiʼ.—“ Jiihóvah Nahaʼáagi Nihídadéétʼiʼ”níníłʼı̨́.

4. Psalm 135:13 éí Diyin bízhiʼ haitʼéego yaa yáłtiʼ? Haʼátʼíí baa nídadíitʼįįł?

⁴ Yízhí Jiihóvah éí tʼáá sahdii átʼéego ílíinii átʼé. (Psalm 135:13 yíníłtaʼ, NW.) * Haʼátʼíí biniyé Diyin bízhiʼ ayóó ílı̨́? Haitʼéego éí tʼóó átséedi tʼáá áhoodzaagóó bízhiʼ baa hóóneʼ? Diyin éí haitʼéego bízhiʼ diyingo áyósin? Áádóó haitʼéego éí bízhiʼ bichʼą́ą́h hadiidzih? Díí ndaʼídíkid baa nídadíitʼįįł.

5. Diyin bízhiʼ dólzingi baa hastiʼ haʼníigo, łaʼ haʼátʼíí nízin doo?

⁵ “Nízhiʼ diyingo óolzin.” (Matt. 6:9) Díí éí Jesus sodizin tsʼídá áłtsé kótʼéego niiníʼą́. Áko Jesus éí díí haʼátʼíí ááhyiłní? Jó, haʼátʼíí shı̨́ı̨́ dólzin dooleełgo éí dílyingo baa hastiʼgo óolyé. Áko łaʼda shı̨́ı̨́ kwíinízin łeh, ‘Jiihóvah yeeʼ tʼáásh íídą́ą́ʼ bízhiʼ dólzin áádóó baa hastiʼ?’ Díí nihił bééhodoozįįłgo éí bee hoʼdójíigi bee hwééhoʼdílzin łeh.

6. Haʼátʼíí bee yízhí ílíinii átʼéego bee nélʼı̨́į łeh?

⁶ Yízhí éí doo tʼóó naaltsoos bikááʼ bikʼeʼashchı̨́į da, doodaiiʼ doo tʼóó bee hoʼdójíi da. Kweʼé Diyin Bizaad ání: “Jitʼíinii ayóó ánéelą́ʼígíí biláahgo yízhí yáʼátʼéehii nideetʼaahjígo yáʼátʼééh.” (Prov. 22:1; Eccl. 7:1) Yízhí éí haʼátʼíí biniyé ayóó ílı̨́? Jó, éí bee hwééhoʼdílzin. Diné éí házhiʼ yee dahonéłʼı̨́į łeh. Áko yízhí naaltsoos tʼóó bikááʼ yisdzohgo éí doodaiiʼ wójíigo éí áájígo doo ayóó ílı̨́į da. Íiyisíí ílínígíí éí háí doodaiiʼ haʼátʼíí éí yízhí ákótʼéego bee hoʼdójí nízingo łahdę́ę́ʼ yee dahonéłʼı̨́.

7. Diné éí haitʼéego Diyin bízhiʼ dayííłchxǫʼ?

⁷ Diné éí Jiihóvah tʼáá ádzaagóó yaa dahalneʼgo éí Bí bee bééhoʼdílzingi yikʼijįʼ yádaałtiʼ. Doo yáʼátʼééhgóó baa nitsáhákees, áko kódajitʼı̨́įgo éí bízhiʼ tʼáá áhoodzaagóó baa haneʼ áádóó Diyin bikʼíhátʼááh. Dáʼákʼeh Íídengi éí tsʼídá áłtsé kótʼéego Diyin bízhiʼ yíchxǫʼ éí tʼóó baaʼihgo bá haʼoodzííʼ áádóó éí tʼáá ákótʼéego tsíhodookos biniyé ákóhóótʼįįd. Diyin kóbiʼdiilyaago haʼátʼíí bitsʼą́ą́dóó bóhooʼaah?

8. Ádam dóó Íiv haʼátʼíí tʼáá íídą́ą́ʼ hoł bééhózin, áádóó bitsʼą́ą́dóó haʼátʼíí baa nitsáhákees silı̨́ı̨́ʼ?

⁸ Ádam dóó Íiv éí Diyin bízhiʼ Jiihóvah wolyéego hoł bééhózin áádóó ląʼígóó átʼéiigi bééhojísin. Éí Íʼiilaii nilı̨́, iiná hainílá. Tsʼídá honóoshónígi iináa dooleełgo nihonínil, índa hachʼooní hadíłtʼéii haiíltı̨́. (Gen. 1:​26-28; 2:18) Hontsékees tsʼídá nizhónígo hadíłtʼéego haiílyá, ákoósh éí Jiihóvah há áátʼįįdgi tʼáá baa nitsíjíkees doo? Jiihóvah ayóóʼájóʼníigi áádóó baa ahééh jinízingi, éísh bidziilgo ájósin doo? Diyin biʼanaʼí nahóneeztą́ąʼgo bee hwééhoozin.

9. Genesis 2:​16, 17 dóó 3:​1-5 bikʼehgo Jiihóvah éí Ádam dóó Íiv haʼátʼíí yidííniid, ndi Séítan éí haitʼéego yoochʼííd ánáyiidlaa?

 ⁹ Genesis 2:​16, 17 dóó 3:​1-5 yíníłtaʼ. Séítan éí tłʼiish yiníkáá góneʼ yáłtiʼgo Íiv kwííłní: “Daʼ tʼáásh aaníí Diyin God kóní, Tsin tʼáá ałtso dáʼákʼehgi naazkaadígíí tʼáadoo bąąhdóó ohsání?” Séítan kótʼéego naʼídééłkidgo éí Diyin yąąh biyoochʼííd. Áko biniinaa Íiv éí Diyin doo yáʼátʼééhgóó yaa tsídeezkééz. Diyin áníigo éí tʼáá ałtso tsin bineestʼąʼ woosą́, ndi tʼááłáʼígo éí dooda, hałní. Ádam dóó Íiv tʼóó ahayóígóó ałʼąą ádaatʼéego chʼil naniseʼ bineestʼąʼ há hólǫ́. (Gen. 2:9) Jiihóvah éí tʼáá aaníí ayóó átʼéego bił hadleeʼ. Ndi Diyin éí Ádam dóó Íiv éí tʼááłáʼígo tsin bineestʼąʼígíí tʼááká bąąhdóó oosą́ą́ʼ hodííniid. Séítan yoochʼííd áyiilaa. Séítan éí Diyin doo bił hadleeʼ da nahalingo áyiilaa. Áko biniinaa Íiv shı̨́ı̨́ kótʼéego tsídeezkééz, ‘Haʼátʼíí lá shá yáʼátʼéehii Diyin shitsʼą́ąjįʼ kwííłʼı̨́?’

10. Séítan éí haitʼéego tʼáá áhoodzaagóó Diyin bízhiʼ yá haadzííʼ, éí bitsʼą́ą́dóó haa hóótʼįįd?

¹⁰ Séítan kótʼéego Íiv neídééłkid yę́ędą́ą́ʼ éí Íiv tʼahdii Jiihóvah bikʼehgóó ájítʼé. Éí tʼáá bééhózinígo Diyin áhodííniid yę́ę Séítan bee bił náhojoolneʼ áádóó tʼááká yíilaʼ bidinołchííd lágo nihiʼdooʼniid jidííniid. Tʼáá íídą́ą́ʼ Diyin yee hachʼįʼ haadzíiʼii hoł bééhózin. Áko éí doo akʼeh hojííłʼįįdgóó éí anoonééł góneʼ ahóótʼiʼgi hoł bééhózin. Ndi Séítan áháłní: “Doo tʼáá aaníí dínóohnéeł da.” (Gen. 3:​2-4) Séítan éí kweʼé Jiihóvah biyoochʼííd doo níi da. Éí Diyin bízhiʼ tʼáá áhoodzaagóó yá haadzííʼ. Íiv ííłníigo Jiihóvah biyoochʼíidii nilı̨́. Séítan éí ákweʼé Devil áʼdiilyaa doodaiiʼ biyoochʼíidii. Íiv bidínóołtłʼahgo Séítan yoosdląąd éí áájí íiyisíí Séítanjí baʼjóozlííʼ, Jiihóvah éí ndagaʼ. (1 Tim. 2:14) Díí biniinaa tsʼídá doo ákótʼéégóó bee ádá hozhdeestʼą́. Jiihóvah doo bikʼeh hojííłʼįįd da. Jiihóvah dooda hodííniid yę́ę tsin bineestʼąʼ jííyą́ą́ʼ. Áádóó Ádam łaʼ baazhníʼą́.—Gen. 3:6.

11. Ádam dóó Íiv haazhdoonííł ńtʼééʼ, ndi haʼátʼíí tʼáadoo ájiidzaa da?

¹¹ Baa nitsíníkees, Íiv éí Séítan kwíidííniidgoshąʼ: “Doo nééhasin da, Shizhéʼé Jiihóvah tʼéí bééhasin. Bí ayóóʼííníshʼní dóó baʼííníshłí. Éí shí dóó Ádam tʼáá ałtsoní nihainílá. Áko haʼátʼíí biniyé kótʼéego tʼóó baaʼihgo baa yáníłtiʼ. Níwohjįʼ anilyeed.” Dooládóʼ Jiihóvah éí hweʼawééʼ ayóóʼáhóʼníigo kótʼéego há haadzíiʼgo yaa bił hózhǫǫd doo ńtʼééʼ! (Prov. 27:11) Ndi Íiv éí Jiihóvah doo ayóóʼáyóʼníi da. Ádam ałdóʼ tʼáá ákójiidzaa. Hazhéʼé doo ayóóʼájóʼníi dago biniinaa Ádam dóó Íiv Hazhéʼé bízhiʼ tʼáá ádzaagóó bá haʼoodzíiʼgo tʼáadoo bichʼą́ą́h hadzoodzíiʼ da.

12. Séítan éí Íiv haʼátʼíí bił naaki nilı̨́įgo áyiilaa, áádóó Ádam dóó Íiv éí haʼátʼíí tʼáadoo ájiidzaa da?

 ¹² Baa ákodaniidzı̨́įʼgo Séítan éí Jiihóvah átʼéiigi yaatįįh yíyá. Éí Jiihóvah daatsʼí yáʼátʼéehii Azhéʼé nilı̨́įgi Íiv bił naaki nilı̨́įgo áyiilaa. Kótʼéego Jiihóvah bízhiʼ tʼáá áhoodzaagóó yaa halneʼgo áyiilaa, áko Ádam dóó Íiv éí Jiihóvah tʼáadoo yichʼą́ą́h haadzíiʼ da. Díí doo bá nantłʼagóó Séítan ádííniidígíí yiyíistsʼą́ąʼgo Bizhéʼé yikʼijįʼ silı̨́ı̨́ʼ. Dííshjı̨́įdi Séítan tʼáá ákótʼéego nihikʼijįʼ naalnish. Jiihóvah bízhiʼ tʼáá áhoodzaagóó yaa halneʼ. Áko diné kótʼéego Séítan biyoochʼííd dayoodlánígíí éí doo bá ndanitłʼagóó Jiihóvah hooʼáałgi doo deinízin da.

13. Ezekiel 36:23 éí Diyin Bizaad íiyisíí yaa halneʼgi haitʼéego chʼíiníʼą́?

¹³ Jiihóvah éí kótʼéego tʼáá hoodzaagóó kótʼé bidiʼníigi doo yeinítʼı̨́ı̨́góó biłísh yáʼátʼééh? Ndagaʼ, doo bił yáʼátʼéeh da. Dáʼákʼeh Íídengi Jiihóvah doo yáʼátʼééhgóó baa yátiʼgo háátʼiʼ yę́ę doo tʼáá aaníi dago Diyin Bizaad ííshjání ííłʼı̨́. (Gen. 3:15) Diyin Bizaad íiyisíí kótʼéego yaa halneʼ: Jiihóvah biYeʼ éí biNahatʼaʼ yiNaatʼáanii nilı̨́įgo éí Jiihóvah bízhiʼ dílzin áńdoolnííł áádóó yáʼátʼéehgo náhwiidooʼaał. Nahasdzáán bikááʼ kʼé nídahodoodleełgo íidoolííł. Áko Diyin Bizaad yíníiltaʼgo éí Jiihóvah bízhiʼ dílzingo ánéidoodlíiłgi baa íhwiidiilʼááł.—Ezekiel 36:23 yíníłtaʼ.

14. Jiihóvah éí bízhiʼ dólzin ándoolníiłgi haitʼéego ííshjání áyiilaa?

¹⁴ Jiihóvah íinízinii łaʼyidoolíiłgi Séítan chʼééh hatsʼą́ą́ʼ niʼ ííléehgo hoolzhish. Jiihóvah łaʼdayiilaii éí azhéʼé ayóóʼóʼóʼníinii áádóó tsʼídá yáʼátʼéehii nahaʼáii nilı̨́įgi Diyin Bizaad ííshjání ííłʼı̨́. Tʼáá aaníí éí Séítan dóó bikééʼ naazíinii Jiihóvah yichʼįʼ nidaalteehgo yíniʼ nídayiiłʼaahgo hoolzhish. (Ps. 78:40) Bízhiʼ doo ílı̨́ı̨́góó ádajiłʼı̨́į ndi, éí hódząʼ, haʼólní, áádóó aheełtʼéego aa nitsékees yee  hashtʼééyoodlííł. Tsʼídá tʼóó ahayóígóó bibee ayóó ábóodziil ííshjání áyiilaa. Tsʼídá aláahdiígíí éí ayóóʼóʼóʼní tʼáá ałtsojįʼ tʼáadoo leʼé yeʼełʼı̨́. (1 John 4:8) Jiihóvah éí bízhiʼ dólzingo ánéídléehgi doo yikʼi digháah da.

15. Séítan éí Diyin bízhiʼ haitʼéego tʼáá áhoodzaagóó yaa halneʼ, áko haitʼéego baa nitsáhákees?

¹⁵ Séítan éí tʼahdii Diyin bízhiʼ tʼáá hoodzaagóó yaa halneʼ. Diyin éí ayóó ábóodziilgi, aheełtʼéego aa nitsékeesgi, hóyą́ągi, áádóó ayóóʼóʼóʼníigi diné bił naaki danilı̨́įgo ííłʼı̨́. Jiihóvah éí doo Áʼiilaaii nilı̨́į da, níigo diné yee yił halneʼ. Diné éí Diyin hólǫ́ danízin ládą́ą́ʼ, Séítan díí deizhdoodląął nízin, éí Diyin bibee hazʼáanii tʼą́ą́ʼ kóʼósin áádóó doo aheełtʼéégóó aa nitsáhákeesgo ályaa. Jiihóvah éí doo joobaʼgóó hodookʼą́ą́ł góneʼ diné bá adahwiiztʼiʼ níigo diné yee neinitin. Díí yoochʼííd dayoodlą́ągo Jiihóvah tʼáá ákogi éʼétʼéii yee hooʼáałgi doo deinízin da. Séítan nahjįʼ kólyaajįʼ tʼáá ákóníigo Jiihóvah tʼáá áhoodzaagóó yaa halneʼ doo áádóó Jiihóvah bikʼijįʼ diidleeł nihóʼníi doo. Ákoósh Séítan tʼáá aaníí ákódoonííł?

16. Ni éí Ádam dóó Íiv tʼáadoo ádzaa yę́ęgi haitʼéego áʼdíílííł?

¹⁶ Bílaʼashdlaʼii niʼiisíihii éí Jiihóvah bízhiʼ deidósin dooleełgi bił yáʼátʼééh. Ni éí Ádam dóó Íiv tʼáadoo ádzaa yę́ęgi ádííníiłgo átʼé. Diné tʼóó ahayóí binííʼ kééhoniitʼı̨́ éí Jiihóvah bízhiʼ tʼáá áhoodzaagóó yaa dahalneʼ índa bízhiʼ dayódziih. Ákondi Jiihóvah éí tsʼídá diyin, tʼáá ákogi átʼé, yáʼátʼééh, índa ayóóʼóʼóʼní diníigo bichʼą́ą́h hadíídzih. (Isa. 29:23) Yee hooʼáałii bee akééʼ sínízı̨́į doo. Diné nanítingo díí yaa ákodanízin doo. Éí tsʼídá Jiihóvah hooʼáałgo tʼéiyá tʼáá ákogi éʼétʼé áádóó tʼáá ałtsoní ádaalyaii bił hodéesyéél índa bił dahózhǫ́ǫgo íidoolííł.—Ps. 37:​9, 37; 146:​5, 6, 10.

17. Jesus éí Bizhéʼé bízhiʼ haitʼéego bééhózinígo áyiilaa?

¹⁷ Nihí éí Jiihóvah bízhiʼ bichʼą́ą́h hahiidziihgo éí Jesus áátʼįįd yę́ęgi átʼéego beʼiilʼı̨́į doo. (John 17:26) Jesus éí Bizhéʼé bízhiʼ bééhózinígo áyiilaa, ndi doo bízhiʼ  tʼéiyá da. Bizhéʼé íiyisíí átʼéiigi diné yee neineeztą́ą́ʼ. Férisiiz éí Jiihóvah doo yitsʼíid da, ayóó ádíhólnííh, nihitsʼą́ądi hojílǫ́, áádóó doo jijoobaʼ da daaníigo yaa nídaatʼı̨́ı̨́ ńtʼééʼ. Jesus éí doo kótʼéego naʼneeztą́ąʼ da. Éí Bizhéʼé íistsʼą́ą́ʼ, haʼólní, ayóóʼóʼóʼní, dóó niʼiidzíihgo á yóóʼánéidiiyiiʼaahii nilı̨́ níigo diné yee neineeztą́ą́ʼ. Áádóó ałdóʼ tʼáá ákwíí jı̨́ nihinááł Bizhéʼé yee átʼéii nizhónígo yeʼiilaa.—John 14:9.

18. Jiihóvah tʼáá áhoodzaagóó baa haneʼgi haitʼéego ííshjání íilʼı̨́į doo?

¹⁸ Jesusgi átʼéego Jiihóvah bééhoniilzingi éí ayóóʼóʼóʼní índa joobaʼii nilı̨́įgi diné bee naniitin doo. Ákwíitʼı̨́įgo Jiihóvah tʼáá áhoodzaagóó baa haneʼ yę́ęgi nahjįʼ kwíilʼı̨́. Jiihóvah bízhiʼ díníilzingo diné éí Jiihóvah bízhiʼ deidósin dooleełgi bee bíká anéiilwoʼ. Nihí ałdóʼ Jiihóvah bedaʼiilʼı̨́į doo. Azhą́ niʼiisíihii niidlı̨́į ndi, éí bohónéedzą́ągo átʼé. (Eph. 5:​1, 2) Nihizaad dóó íiʼníiłgi éí Jiihóvah íiyisíí átʼéiigi bee diné bił ííshjání íilʼı̨́įgo bee Jiihóvah bízhiʼ díníilzin. Áádóó bílaʼashdlaʼii niʼiisíihii niidlı̨́į ndi, Jiihóvah doo bitsʼá diidáał da.—Job 27:5.

19. Íiyisíí biniyé naʼniitingi éí Isaiah 63:7 haitʼéego yee nihíká análwoʼ?

¹⁹ Náánáłahgo Jiihóvah bízhiʼ díníilzin dooleełgi éí Diyin Bizaad bee naʼniitingo éí Jiihóvah íiyisíí Bí nahaʼá bóhólníihgi ííshjání íilʼı̨́į łeh. Diyin bibee hazʼáanii bee naʼniitingi ílı̨́į ndi, íiyisíí biniyé naʼniitinígíí éí Nihizhéʼé Jiihóvah ayóóʼóʼóʼníi doo áádóó bikééʼ asdzı̨́į doo. Jiihóvah yee átʼéii ałdóʼ ííshjání íilʼı̨́įgo, jó éí binahjįʼ íiyisíí yee átʼéiigi éí bízhiʼ binahjįʼ bee bééhoʼdílzin. (Isaiah 63:7 yíníłtaʼ.) Kótʼéego naʼniitingo éí náánáłahdę́ę́ʼ Jiihóvah ayóóʼáyóʼní áádóó yikʼeh hółʼı̨́į doo. Háálá éí Jiihóvah bikééʼ sézı̨́į doo nízin.

20. Haʼátʼíí díí bikééʼdóó baa nínáádadíitʼįįł?

²⁰ Íitʼįįłgi índa naʼniitingi éí haitʼéego Jiihóvah bízhiʼ yaa haniih áádóó łaʼda ádíchʼįʼ kwíi doolííł? Díí éí bikééʼdóó baa nídadíitʼįįł.