1-2. Ni nshonga ki ezi Abajurizi ba Yehova barikutwara nka nkuru?

ENSHONGA ezi turikutwara nka nkuru n’enshonga y’obushoboorozi bw’okutegyeka n’okujuririra eiziina rya Ruhanga. Itwe Abajurizi ba Yehova, nitukunda kugamba aha nshonga nkuru ezo. Kwonka eki tikirikumanyisa ngu Ruhanga okuba ohikire kutegyeka n’okweza eiziina rye n’enshonga ibiri ezitaine kakwate.

² Twena twaherize kureeba ngu eiziina rya Ruhanga riine kwihwaho ebijumo byona. Kandi twaherize kwega ngu omuringo ogu Yehova arikutegyekamu nigwo gurikukirayo oburungi. Enshonga ezi zombi ni nkuru.

3. Eiziina Yehova niritwariramu ki?

³ Nangwa, eiziina Yehova niritwariramu buri kimwe ekirikukwata ahari Ruhanga waitu, otwariiremu n’omuringo ogu arikutegyekamu. N’ahabw’ekyo twagira ngu okwiha ekijumo kyona aha iziina rya Yehova n’enshonga nkuru, nikiba nikimanyisa ngu twine n’okworeka ngu omuringo ogu arikutegyekamu nigwo gurikukirayo oburungi. Eiziina rya Yehova riine akakwata k’amaani n’omuringo ogu arikutegyekamu nk’ow’obushoboorozi bwona.​—Reeba akabokusi “ Ebirikutwarirwa omu Nshonga Nkuru.”

4. Zaaburi 135:13 nihashoboorora hata eiziina rya Ruhanga, kandi nituza kugarukamu bibuuzo ki omu kicweka eki?

⁴ Eiziina Yehova n’ery’omutaano. (Shoma Zaaburi 135:13.) Niki ekirikureetera eiziina rya Ruhanga kuba rikuru munonga? Rikabanza kujumwa rita? Ruhanga naaryeza ata? Nitubaasa kuhwera tuta omu kujuririra eiziina rye? Ka tugarukyemu ebibuuzo ebyo.

5. Nitubaasa kwebuuza ki aha bikwatiraine n’okweza eiziina rya Ruhanga?

⁵ “Eiziina ryawe ryezibwe.” (Mat. 6:9) Yesu akagamba aha iziina rya Ruhanga nk’enshonga nkuru omu kushaba. Ebigambo bya Yesu nibimanyisa ki? Okweza ekintu nikimanyisa okukihindura ekirikwera, ekiyonjo nari ekishemeire. Kwonka abamwe nibabaasa kwebuuza ngu, ‘eiziina rya Yehova shi teririkwera, eriyonjo, kandi erishemeire?’ Kubaasa kugarukamu ekibuuzo ekyo, twine kuteekateeka aha kirikutwarirwa omu iziina eryo.

6. Niki ekirikureetera eiziina kuba ery’omuhendo?

⁶ Eiziina nirikira aha nyuguta ezihandiikire aha rupapura nari kuryatura omu kurigamba. Yetegyereze eki Baibuli erikugamba: “Eiziina rirungi n’ery’okwetengwa okukira eitungo ringi.” (Enf. 22:1; Mub. 7:1) Ahabw’enki eiziina riri rikuru munonga? N’ahabw’okugira ngu niritwarirwamu eki abandi barikumanya ahari mukama waaryo. N’ahabw’ekyo oku eiziina ririkuhandiikwa nari oku ririkwaturwa, tikyo kikuru. Ekikuru buzima ni mukama waaryo n’eki abandi barikumumanyaho.

7. Abantu batwire nibajuma bata eiziina rya Ruhanga?

⁷ Abantu baagamba ebishuba ahari Yehova, nibaba nibashiisha eki ari, nari amazima agarikumukwataho. Kandi baamugambaho kubi, nibaba nibashiisha eiziina rye. Eiziina rya Ruhanga rikabanza kujumwa ira munonga aha kutandika kw’ebyafaayo by’abantu. Yetegyereze eki turikwegyera aha ku abantu baajumire eiziina rye.

8. Adamu na Haawa bakaba nibamanya ki, kandi eki nikireetaho bibuuzo ki?

⁸ Adamu na Haawa bakaba nibamanya eiziina rya Yehova, na mazima agarikumukwataho. Bakaba nibamumanya nk’Omuhangi waabo, Ogwo owaabahaire amagara, Paradiso nungi eyaabaire eri eka yaabo, kandi nabo bombi bakaba bahikiriire. (Kut. 1:26-28; 2:18) Kwonka shi bakaba nibaija kugumizamu nibakoresa ebiteekateeko byabo ebihikiriire kuteekateeka ahari byona ebi Yehova yaabaire abakoreire? Mbwenu shi bakaba nibaija kugumizamu nibakunda Ogwo owaabaire naajwekyera eiziina eryo, kandi barikumusiima? Eby’okugarukamu bikamanywa butunu obu omuzigu wa Ruhanga yaabagyeza.

9. Kurugiirira aha Okutandika 2:16, 17 na 3:1-5, Yehova akagambira ki omushaija n’omukazi ab’okubanza, kandi Sitaane akahindura ata amazima?

 ⁹ Shoma Okutandika 2:16, 17 na 3:1-5. Sitaane arikukoresa enjoka, akabuuza Haawa ati: “N’eky’amazima, Ruhanga akagira ngu mutarirya aha muti gwona ogw’omuri eki kibanja?” Ekibuuzo ekyo kikaba kirimu ekishuba ekitarikureebwa butunu ekiri nk’obutwa obusherekire. Eki Ruhanga yaabaire agambire omu mazima kikaba kikiri ngu nibabaasa kurya ahari buri muti gwona, kureka gumwe gwonka. Adamu na Haawa bashemereire kuba baabaire baine eby’eby’okurya bingi. (Kut. 2:9) Eego buzima Yehova n’efura. Kwonka, akazibira Adamu na Haawa kurya ebijuma by’omuti gumwe gwonka. N’ahabw’ekyo ekibuuzo kya Sitaane kikahindura amazima. Sitaane akareetera Ruhanga kureebeka nk’otari fura. Haawa naabaasa kuba yaayebuurize ati: ‘Hariho ekintu kirungi eki Ruhanga arikunyima?’

10. Sitaane akashiisha ata eiziina rya Ruhanga butunu, kandi hakarugamu ki?

¹⁰ Omu bwire obwo, Haawa akaba naakireeba Yehova nk’Omutegyeki we. Akagarukamu Sitaane arikugamba obuhabuzi obu Ruhanga yaabaire abahaire oburikwetegyerezibwa gye. Nangwa akoongyeraho ngu tibaine n’okugukwataho. Akaba naamanya okurabura kwa Ruhanga ngu obugomi nibwija kurugamu okufa. Kwonka Sitaane akagarukamu ati: “Okufa kwo, buzima timurifa.” (Kut. 3:2-4) Hati Sitaane akaba atakyekikuura. Akaba ariyo naashiisha eiziina rya Ruhanga butunu, akaba ari nk’orikugambira Haawa ngu Yehova naabeiha. N’ahabw’ekyo Sitaane akaba Omuregi nari omubeihi. Haawa akaikiriza ekishuba kya Sitaane yaabeihirwa kimwe. (1 Tim. 2:14) Akeesiga Sitaane omu mwanya gw’okwesiga Yehova. Eki kikamworobera kucwamu omu muringo ogurikukirayo obubi. Akacwamu kugomera Yehova. Akatandika kurya aha kijuma eki Yehova yaabaire amuzibiire kurya. Bwanyima, Haawa akahaho Adamu nawe yaarya.​—Kut. 3:6.

11. Abazaire baitu ab’okubanza bakaba baine kutwaza bata, kwonka bakaremwa kukora ki?

¹¹ Teekateeka aha ki Haawa yaabaire ashemeire kugambira Sitaane. Teera akashushani ku ogire ngu Haawa akagamba ebigambo nk’ebi: “Tindikukumanya, kwonka nimmanya Tataitwe, Yehova, nimukunda kandi niimwesiga. Niwe yaatuhaire buri kimwe eki twine nyowe na Adamu. Noobaasa kumugambaho ota ebintu bibi nk’ebyo? Ruga aha ogyende!” Ekyo ka kyabaire nikiija kushemeza Yehova kuhurira ebigambo bw’obwesigwa kuruga aha muhara orikumukunda! (Enf. 27:11) Kwonka Haawa akaba atainiire Yehova rukundo nk’egyo, kandi n’Adamu akaba ataine omutwarize ogwo. Adamu na Haawa okutagirira Ishebo rukundo kikabaremesa kujuririra eiziina rye ku ryajumirwe.

12. Sitaane akata ata okubangaanisa omu biteekateeko bya Haawa, kandi Adamu na Haawa bakaremwa kukora ki?

¹² Nk’oku twareeba, Sitaane akatandika arikuta okubangaanisa omu biteekateeko bya Haawa. Akamureetera kubangaanisa ahari  Ogwo owaabaire naajwekyera eiziina Yehova. Kandi Adamu na Haawa bakaremwa kujuririra eiziina rya Yehova n’amazima agarikumukwataho. Eki kikabareetera kwikiriza ebiteekateeko bya Sitaane baagomera Ishebo. Sitaane naakoresa obukoryo nibwo bumwe obunaku obu. Sitaane naataahirira eiziina rya Yehova arikugamba ebishuba. Abantu abarikwikiriza ebishuba bya Sitaane, nikiboorobera kuhabisibwa n’okugomera obutegyeki bwa Yehova obuhikiriire.

13. Ezekieli 36:23 nihooreka hata obutumwa bukuru bwa Baibuli?

¹³ Mbwenu shi Yehova naikiriza okujumwa nk’okwo abura kujuririra eiziina rye? Ngaaha, tarikubaasa kuhunama! Baibuli yoona neegamba munonga aha ku Yehova atwire naajuririra eiziina rye kuruga obu ryashiishwa omu kibanja Edeni. (Kut. 3:15) Nangwa nitubaasa kugamba aha butumwa bukuru bwa Baibuli tuti: Yehova naayeza eiziina rye kurabira omu Bukama bwe oburikutegyekwa Omwana we, kandi naija kugaruraho okuhikiirira n’obusingye omu nsi. Baibuli erimu ebirikutuhwera kwetegyereza oku Yehova arikweza eiziina rye.​—Shoma Ezekieli 36:23.

14. Oku Yehova yaatwarize ahabw’obugomi obwabaire omuri Edeni kwerize kuta eiziina rye?

¹⁴ Sitaane atwire naakora kyona ekirikubaasika kuremesa Yehova kuhikiiriza ekigyendererwa kye. Kwonka Sitaane atwire naaremwa emirundi n’emirundi. Baibuli neeyoreka oku Yehova atwire naatwaza, kandi neehamya ngu tihariho ondiijo ori nka Yehova Ruhanga. N’amazima, obugomi bwa Sitaane n’abarikumushagika bireeteire Yehova obusaasi bw’amaani. (Zab. 78:40) Kwonka enshonga egi abaasize kugikwata omu muringo gw’obwengye, okugumisiriza, n’oburingaaniza. Kandi ayorekire ngu aine amaani agarikukirayo omu miringo obutabarwa. Okukira byona, rukundo ye neereebekyera omuri byona ebi arikukora. (1 Yoh. 4:8) Yehova atwire naakora obutaruha kweza eiziina rye.

15. Sitaane naashiisha ata eiziina rya Ruhanga ebiro ebi, kandi niharugamu ki?

¹⁵ Na hati Sitaane naakishiisha eiziina rya Ruhanga. Naareetera abantu kubangaanisa  aha maani ga Ruhanga, oburingaaniza bwe, obwengye bwe, na rukundo ye. Nk’eky’okureeberaho Sitaane naateeraho kubeihabeiha abantu ngu Yehova ti Muhangi. Kandi abantu baaba batarikwikiriza ngu Ruhanga ariho, Sitaane naabareetera kwikiriza ngu emitindo ye n’amaremesa kandi ngu teri y’oburingaaniza. Kandi naayegyesa abantu ngu Yehova taine saasi, beitu ngu n’enshaarizi orikwotsya abantu omu muriro ogutarikuraara. Baikiriza ebishuba nk’ebyo, nikiboorobera kwanga obutegyeki bwa Yehova obuhikiriire. Okuhitsya obu Sitaane araasingurwe, naija kugumizamu n’ehururu ye ey’okubeiherera Yehova, kandi naiwe naayenda kukwiha ahari Yehova. Mbwenu shi naija kusingura?

16. Noobaasa kukora ki eki Adamu na Haawa baaremirwe kukora?

¹⁶ Yehova naikiriza abantu abatahikiriire kwejumba omu kweza eiziina rye. Omu muringo ogwo, noobaasa kukora eki Adamu na Haawa baaremirwe kukora. N’obu turaabe turi omu nsi eijwiremu abantu abarikushiisha eiziina rya Yehova kandi abarikurirogotaho, oine omugisha gw’okurwanirira amazima, ngu Yehova n’orikwera, ahikiriire, ni murungi, kandi aine rukundo. (Isa. 29:23) Noobaasa kushagika obutegyeki bwe. Noobaasa kubushagika orikworeka ngu nibwo bwonka obuhikiriire oburaareetere ebyahangirwe byona obusingye n’okushemererwa.​—Zab. 37:9, 37; 146:5, 6, 10.

17. Yesu akamanyisa ata abantu eiziina rya Ishe?

¹⁷ Twarwanirira eiziina rya Yehova, nituba nitukuratira eky’okureeberaho kya Yesu Kristo. (Yoh. 17:26) Yesu akamanyisa abantu eiziina rya Ishe atarikurikoresa kwonka, beitu arikuteeraho n’okurijuririra. Nk’eky’okureeberaho, akahakanisa Abafarisaayo, omu miringo mingi abaabaire nibagira ngu Yehova n’enshaarizi, naataho amaremesa, ari hare, kandi ngu taine saasi. Akahwera abantu kureeba Ishe ngu n’omuringaaniza, n’omugumisiriza, naakunda abantu, kandi naasaasira. Akahwera n’abantu kumanya Yehova arikworeka emitwarize nk’eye yenyini omu bi yaabaire naakora buri izooba.​—Yoh. 14:9.

18. Nitubaasa kuhindura tuta ebishuba ebi barikugamba ahari Yehova?

¹⁸ Nka Yesu, nitubaasa kugambira abandi ebirikukwata ahari Yehova, turikubeegyesa kumanya ngu Ruhanga aine rukundo n’embabazi. Twakora tutyo, nituhindura ebishuba ebirikugambwa  ahari Yehova. Nitweza eiziina rya Yehova turikuhwera abantu kurireeba nk’eririkwera omu biteekateeko byabo n’omu mitima yaabo. Nitubaasa n’okutooreza Yehova. Ekyo nikibaasika n’obu turaabe tutahikiriire. (Efe. 5:1, 2) Omu bikorwa n’ebigambo byaitu twayoreka eki Yehova buzima ari, nituhwera omu kweza eiziina rye. Nitujuririra eiziina eryo turikuhwera abantu kweihamu ebitahikire ebi barikumanya aha iziina eryo. * Kandi nitworeka ngu abantu abatahikiriire nibabaasa kuhamira ahari Yehova.​—Yob. 27:5.

19. Ebiri omuri Isaaya 63:7 nibituhwera bita kureeba ekiine kuba ekigyendererwa kyaitu ekikuru omu kwegyesa?

¹⁹ Yetegyereze eishomo erindi eri turikubaasa kwega. Twaba nitwegyesa abandi amazima, nitukira kuta omutima aha bushoboorozi bwa Ruhanga bw’okuba ohikire kutegyeka ensi n’eiguru, kandi buzima eki kihikiire kimwe. Kwonka, n’obu kiraabe kiri kikuru kuta omutima aha nshonga egyo, ekigyendererwa kyaitu ekikuru n’eky’okuhwera abandi kukunda Yehova Tataitwe, kandi bakamuhamiraho. N’ahabw’ekyo twine kugamba aha mitwarize ye mirungi, kworeka eki mukama w’eiziina Yehova ari. (Shoma Isaaya 63:7.) Twayegyesa omu muringo ogwo, nitwija kuhwera abandi kukunda Yehova n’okumworobera ahabw’okugira ngu nibenda kumuhamiraho.

20. Nituza kushwijuma ki omu kicweka ekirikukurataho?

²⁰ Mbwenu shi nitubaasa kuhamya tuta ngu emitwarize yaitu n’okwegyesa kwaitu nibihimbisisa eiziina rya Yehova, kandi nibireetera abandi kumwirira haihi? Ekicweka ekirikukurataho nikiija kugarukamu ekibuuzo ekyo.