INKHANI IYAKUMANYILA 23
“Ingamu Yako Yikemesiweghe”
‘Ingamu yako, we Yehova, yo yikuyako bwila.’—SAL. 135:13.
ULWIMBO 10 Lumbani Yehova, Chiuta Withu!
ISI TUKUYA PAKUMANYILA *
1-2. Ngimba nkhani siliku isi syakulondiwa fiyo ku Baketi ba Yehova?
INKHANI isyakufwana nubulaghili nukuyikemesya ingamu ya Kyala, sikutupalamasya twesa amasiku agha. Pakuya Baketi ba Yehova, tukuhoboka fiyo ukuyobesania nabandu inkhani isyakulondiwa isi. Loli ngimba inkhani yabulaghili bwa Kyala nukuyikemesya ingamu yake sikindene? Hayi.
2 Twesa tusimenye ukuti ingamu ya Kyala yikulondiwa ukukemesiwa. Tumanyile kangi ukuti ubulaghili bwa Yehova namuno ikulaghilila kwakulondiwa fiyo. Yonongwa yake inkhani syosa isi syakulondiwa fiyo.
3. Ngimba ingamu yakuti Yehova yikongelelapo isyafiki?
3 Ingamu yakuti Yehova yikongelelapo nyingi isyakufwana numwene namuno ikulaghilila. Yonongwa yake linga tukuyoba ukuti ingamu ya Yehova yikemesiweghe, ko kuti tukuketa ubulaghili bwake ukuya bwakulondiwa fiyo pabumi bwitu. Ingamu ya Yehova yikukolelana fiyo nubulaghili bwake pakuya ndaghili wamaka pa kisu kyosa.—Keta ibokosi ilyakuti “ Ifindu Fyakulondiwa Fiyo Ifi Fili mu Nkhani Iyi.”
4. Ngimba pa Masalimo 135:13 pikuyoba isyafiki isyakufwana ningamu ya Kyala, kangi tukuya pakuyobesania malalusyo ghaliku?
4 Ingamu yakuti Yehova yakulondiwa fiyo. (Belenga Masalimo 135:13) Nongwa yafiki ingamu ya Kyala yakulondiwa fiyo? Ngimba pabwandilo bayinyozile bulebule? Ngimba Kyala ikuyikemesya bulebule ingamu yake? Kangi ngimba tubaghile ukutulapo bulebule ukuti tuyifighilile ingamu yake? Lino isagha tuyobesanie amalalusyo agha.
UKULONDIWA KWA NGAMU YA KYALA
5. Ngimba bamo babaghile ukulalusya isyafiki linga bapilike isyakuyikemesya ingamu ya Kyala?
5 ‘Ingamu yako yikemesiweghe.’ (Mat. 6:9) Yesu atile iki kyo kindu kyakulondiwa fiyo iki tukulondiwa ukusuma linga tukwiputa. Loli ngimba Yesu asanusyagha isyafiki? Linga tukukemesya ikindu kimo ko kuti tukulonda ukuti kiye kikemo. Loli abandu bamo babaghile ukulalusya ukuti, ‘Ngimba ingamu ya Yehova yikaya nyikemo?’ Ukuti twamule, tukulondiwa ukwinong’onela isi ingamu iyi sikongelelapo.
6. Ngimba findu fiki fikupangisya ingamu ukuya yakulondiwa fiyo?
6 Ingamu yikaya lisyu itolo ili babaghile ukulemba pamo ukuyoba. Keta isi Ibaibolo likuyoba, likuti: ‘Ingamu inunu yakulondiwa fiyo ukukinda ikyuma kikingi.’ (Mbu. 22:1 NWT; Ndumbi. 7:1) Nongwa yafiki ingamu yakulondiwa fiyo? Panongwa yakuti yikongelelapo akayilo, muno abangi bikwinong’onela isya mundu uyu ali ningamu iyi. Yonongwa yake sikaya nimbombo muno ingamu bikulembela pamo bikukolela loli ikindu kyakulondiwa fiyo kyo kyakuti muno abandu bikwinong’onela isya ngamu iyi linga bikuketa pamo bikupilika muno yikukoleliwa.
7. Ngimba abandu bikuyinyoza bulebule ingamu ya Kyala?
7 Linga abandu bikuyoba isyabutungulu isyakufwana na Yehova, abene bikonanga akayilo kake. Linga bonangile akayilo kake, bikupangisya ukuti ingamu yake yinyoziweghe. Ukunyoziwa kwa ngamu ya Kyala kwabombiwe akakwanda mungunda wa Edeni. Inong’onela isi tukumanyilako ukufwana na isi syabombiwe.
MUNO BAYINYOZILE INGAMU YA KYALA PABWANDILO
8. Ngimba Adamu na Eva basimenye isyafiki, kangi malalusyo ghaliku aghangi agha tubaghile ukwilalusya?
8 Adamu na Eva basimenye ukuti ingamu ya Kyala yo Yehova, kangi bafimenye ifindu fingi ifyakulondiwa ifyakufuma kumyake. Abene balimmenye ukuya Mpeli uyu abapele ubumi, akaya kabo akanunu aka Paladaiso ni mbumba inunu. (Bwa. 1:26-28; 2:18) Loli ngimba abene bayagha pakukindilila ukwinong’onela syosa isi Yehova ababombile? Ngimba bayagha pakukusya ubumanyani bwabo nukukindilila ukunndaghisya Yehova? Amaansala gha malalusyo agha ghalyamuliwe bo undughu wa Kyala abaghelile mungunda wa Edeni.
9. Ukufwana na Ubwandilo 2:16, 17 kangi 3:1-5, ngimba Yehova ayibulile isyafiki imbumba yakwanda, kangi Setano ayobile isyafiki?
9 Belenga Ubwandilo 2:16, 17 kangi 3:1-5. Ukwendela munjoka, Setano alindalusisye Eva ukuti: ‘Ngimba Kyala atile mungalyagha iseke sya mipiki yosa iya mungunda?’ Setano alalusisye ilalusyo ili mwakuntungulupila Kyala kangi isi syapangisye ukuti Eva aye naminong’ono amabibi. Kyala atile balyeghe iseke sya mipiki yosa, ukusosyapo umpiki ghumowene itolo. Adamu na Eva balondiwagha ukulya iseke sya mipiki yakukindanakindana. (Bwa. 2:9) Ukuyoba ubwanaloli, Yehova ikupa. Loli Kyala abakanisye ukuti bangalyagha iseke sya mumpiki ghumowene. Yonongwa yake isi Setano alalusisye syali syabutungulu. Umwene abapangisye ukuti binong’oneghe ukuti Kyala atikupa. Eva abaghile ukuti ilalusyagha ukuti ‘ngimba Kyala ikutwima ifindu ifinunu?’
10. Ngimba Setano ayinyozile bulebule ingamu ya Kyala, kangi findu fiki ifi fyakongilepo?
10 Pakabalilo kala, Eva anketagha Yehova ukuya ndaghili wake. Umwene alimbulile Setano syosa isi Kyala ayobile. Kangi alyongelile ukuti, bakalondiwagha ukughupalamasya umpiki ughu Kyala abakanisye. Eva asimenye ukuti linga akayagha pakupilikila isi Kyala ayobile ayagha pakufwa. Loli Setano atile: ‘Nakamo mutisakufwa.’ (Bwa. 3:2-4) Setano akasakisyagha itolo ukuti Kyala ntungulu. Loli umwene ayinyozile ingamu ya Kyala, mwakumbula Eva ukuti Yehova ntungulu. Yonongwa yake lino ikukoleliwa ukuya yo mohesi, pamo ukuti waluheho. Eva asyobiwe; umwene alimpilikile Setano. (1 Tim. 2:14) Alinsubile fiyo Setano ukukinda Yehova. Isi syalimpangisye ukuti asale ububibi ifyakubomba. Umwene asalile ukuleka ukumpilikila Yehova. Alile iseke sya mumpiki ughu Yehova atile angalyagha. Ukufuma apo alimpele Adamu ukuti yope alye.—Bwa. 3:6.
11. Ngimba Abapapi bitu abakwanda balondiwagha ukubomba isyafiki, loli batoliwe ukubomba isyafiki?
11 Inong’onela isi Eva alondiwagha ukuyoba kwa Setano. Bule linga ayagha pakuyoba ukuti: “Ngakumanya uwe, loli nummenye Tata wangu, Yehova, nunganile kangi nunsubile fiyo. Umwene atupele ifindu fyosa ifi tuli nafyo. Nongwa yafiki kuyoba ifindu ifibibi ifyakufwana numwene? Sokapo!” Isi syayagha pakumpangisya Yehova ukuti ahoboke fiyo ukupilika amasyu bo agha! (Mbu. 27:11.) Loli Eva akali nsubiliwa kangi akalinganile Yehova; Adamu yope akanangisye ubusubiliwa. Panongwa yakuti Adamu na Eva bakali nulughano kwa Tata wabo, abene batoliwe ukuyifighilila ingamu yake iyi yanyoziwe na Setano.
12. Ngimba Setano alimpangisye bulebule Eva ukuti ande ukunkayikila Yehova, kangi batoliwe ukubomba isyafiki?
12 Bo muno tuketile, Setano alyandile ukunnyoza Yehova mwakumpangisya Eva ukuti akayikile linga Yehova ali yo Tata nnunu. Ukufuma apo Adamu na Eva batoliwe ukuyifighilila ingamu ya Yehova kubutungulu bwa Setano. Abene basalile ukumpilikila Setano nukunsambukila Tata wabo. Setano ikubombela injila isyakufwana itolo amasiku agha. Umwene ikuyinyoza ingamu ya Yehova. Abandu aba bikusubila ubutungulu bwa Setano bikukana ifundo sya Yehova isyabugholofu.
YEHOVA IKUYIKEMESYA INGAMU YAKE
13. Ngimba fundo yiliku iyi yikwaghiwa pa Ezekieli 36:23?
13 Ngimba Yehova ikwitikisya ukuti ingamu yake yinyoziweghe kisita kubombapo nasimo? Hayi! Ibaibolo likuyoba isi Yehova abombile ukunangisya ukuti ifindu ifibibi ifi fyayobiwe ifyakufwana numwene mungunda wa Edeni fyali fyabutungulu. (Bwa. 3:15) Ibaibolo likuyoba ukuti: Yehova ikuyikemesya ingamu yake ukwendela mbulaghili bwa mwanake nukutwala ubugholofu nulutengano pa kisu. Kangi lili nifundo isi sikututula ukumanya muno Yehova ikubombela ukuti ayikemesye ingamu yake.—Belenga Ezekieli 36:23.
14. Ngimba Yehova ikubomba isyafiki ukuti ayikemesye ingamu yake?
14 Setano ikughelaghela ukukanisya ubwighane bwa Yehova ukuti bungafwanisiwagha. Loli umwene ikutoliwa. Ibaibolo likuyoba isi Yehova abombile kangi isi sikunangisya ukuti yo tata walughano kangi ndaghili nnunu. Ukuyoba ubwanaloli isi Setano nabandu bake bikubomba, sikumbaba fiyo Yehova mundumbula. (Sal. 78:40) Umwene ikubombapo simo mwamahala, mbololo na mbwanaloli. Kangi umwene anangisye amaka ghake munjila nyingi. Ukukinda fyosa, ikunangisya ulughano muli fyosa ifi ikubomba. (1 Yoh. 4:8) Yehova ikukindilila ukuyikemesya ingamu yake.
Setano alinsyobile Eva isyakufwana na Yehovakangi kwa fyinja fingi umwene ikunnyoza Kyala (Keta amapalagilafu 9-10, 15) *
15. Ngimba Setano ikuyinyoza bulebule ingamu ya Kyala amasiku agha kangi ifyakukongapo fyake fyo filiku?
15 Setano ikukindilila ikuyinyoza ingamu ya Kyala amasiku agha. Umwene ikubapangisya abandu ukuti bakayikileghe ukuti Kyala ali namaka, wabwanaloli, wamahala kangi walughano. Mwakifwanikisyo, Setano ikughelaghela ukubasyoba abandu ukuti bangasubilagha ukuti Yehova yo Mpeli. Kangi linga abandu bitikisye ukuti Kyala aliko Setano ikubapangisya ukwinong’ona ukuti ifundo sya Kyala ngafu ukusikonga. Setano ikubasyoba abandu ukuti Yehova atikubinong’onela, wankhaza kangi ikokya abandu m’moto. Linga abandu aba basubile ubutungulu ubu, kukuya kupepe kumyabo ukuleka ukukonga ifundo sya Yehova isyabugholofu. Setano ikuya pakukindilila ukuyinyoza ingamu ya Kyala nukutupangisya ukuti tungansubilagha Kyala ukufika apa isakonangiwagha. Ngimba ikuya pakutola?
UBUDINDO UBUNYWAMU UBU TULI NABO
16. Ngimba tubaghile ukubomba isyafiki isi Adamu na Eva batoliwe ukubomba?
16 Yehova ikubitikisya abandu abasitabugholofu ukuti bayikemesyeghe ingamu yake. Yonongwa yake tubaghile ukubomba isi Adamu na Eva batoliwe ukubomba. Nalinga tuli nkisu iki abandu bikuyinyoza ingamu ya Kyala, tuli nulusako ulwakufumusya amasyu amanunu aghakuti Yehova mwikemo, ngolofu, nnunu kangi walughano. (Yes. 29:23) Tubaghile ukunangisya ukuti tukulonda ukuti umwene yo aye ndaghili witu. Tubaghile ukubatula abandu ukumanya ukuti ubulaghili bwa Yehova bo bwisa kutwala ulutengano nulusekelo pa kisu kyosa.—Sal. 37:9, 37; 146:5, 6, 10.
17. Ngimba Yesu abatulile bulebule abandu ukuti bayimanye ingamu ya Tata wake?
17 Linga tukuyifighilila ingamu ya Yehova, tukukonga ikifwanikisyo kya Yesu. (Yoh. 17:26) Yesu apangisye ingamu ya Tata wake ukuti yimanyiwe mwakubamanyisya abandu isi Kyala asighanile. Mwakifwanikisyo, umwene abasusisye Abafarisai aba banjobagha Yehova ukuti wankhaza, atikulaghila kanunu, atikubinong’onela abandu kangi akaya nikisa. Yesu abatulile abandu ukumanya ukuti Tata wake wakisa, mololo, walughano kangi ikuhobokela. Abatulile kangi abandu ukuti banketeghe Yehova bo muno umwene anketelagha nukunangisya utuyilo utununu twa Tata wake pabumi bwake.—Yoh. 14:9.
18. Ngimba tubaghile ukususya bulebule ubutungulu nukunyoziwa kwa ngamu ya Yehova?
18 Mwakufwana itolo na Yesu, nanuswe tubaghile ukubafumukisya abandu isi tusimenye isyakufwana na Yehova, mwakubamanyisya ukuti Kyala walughano kangi wakisa. Linga tukubomba bo isi, tukususya ubutungulu nukunyoziwa kwa ngamu ya Yehova uku Setano ikupangisya. Tukuyikemesya ingamu ya Yehova, isi sikubatula abandu ukuti bayiketeghe ukuya nyikemo. Nanuswe tubaghile ukunkonga Yehova. Tubaghile ukubomba isi nalinga ukuti tuli basitabugholofu. (Ef. 5:1, 2) Linga amasyu nifyakubomba fyitu fikubahobosya abandu kangi fikukolelana nifindu ifi Yehova afighanile, tukutula fiyo ukuti ingamu yake yikemesiweghe. Tukuyifighilila ingamu ya Yehova mwakubatula abandu ukuti bamanye ubwanaloli ubwakuyoba isya Kyala. * Tukunangisya kangi ukuti abandu abasitabugholofu babaghile ukukindilila ukuya basubiliwa kwa Kyala.—Jobu 27:5.
Tukulondiwa ukubatula aba tukumanyila nabo Ibaibolo ukumanya ikisa kya Yehova nutuyilo twake utununu (Keta amapalagilafu 18-19) *
19. Ngimba pa Yesaya 63:7 pikututula bulebule ukumanya ubwighane bwitu linga tukubamanyisya abandu?
19 Filipo ifindu fingi ifi tubaghile ukubomba ukuti tuyikemesye ingamu ya Yehova. Linga tukumanyisya ubwanaloli ubwa mu Baibolo, utubalilo twingi tukuyoba mwakusimikisya isya bulaghili bwa Kyala, ukuti Yehova ali nubwabuke ubwakulaghila ikisu kyosa kyapasi kangi isi syabwanaloli. Loli, nalinga ukuti kwakulondiwa ukukindilila ukwinong’onela isya ndaghilo sya Kyala, ubwighane bwitu bo bwakubatula abandu ukuti bammanye Yehova, Tata witu nukuya basubiliwa kumyake. Yonongwa yake tukulondiwa ukukonga utuyilo utununu utwa Yehova, mwakubomba isi sikukolelana ningamu yake. (Belenga Yesaya 63:7.) Linga tukumanyisya munjila bo iyi, tukuya pakubatula abangi ukuti banganeghe nukumpilikila Yehova panongwa yakuti bikulonda ukuya basubiliwa kumyake.
20. Ngimba tukwisa pakuyobesania isyafiki mu nkhani iyakukongapo?
20 Ngimba tubaghile ukunangisya bulebule ukuti muno tukubombela ifindu namuno tukumanyisyila sikubatula abandu ukuti basegheleleghe kwa Yehova? Inkhani iyakukongapo yikwisa pakwamula ilalusyo ili.
ULWIMBO 2 Zina Linu Ndimwe Yehova
^ ipal.5 Ngimba nkhani yiliku iyi yakulondiwa fiyo kubandu na bandumi? Nongwa yafiki inkhani iyi yakulondiwa fiyo kangi yikutupalamasya bulebule? Ukumanya amaansala gha malalusyo agha, kukuya pakututula ukuti tukusye ubumanyani bwitu na Yehova.
^ ipal.18 Utubalilo tumo, amabuku ghitu ghikulingania ukuti tungayobagha ukuti “ingamu ya Yehova yikulondiwa ukufighililiwa” Nongwa yafiki? Panongwa yakuti nayumo akayobapo ukuti Kyala akaya nubwabuke ubwakuya ningamu iyakuti Yehova. Loli palukomano ulu lwabombiwe mu 2017, balingenie kanunu fiyo isyakufwana ninkhani iyi. Cheyamani atile: Kukaya kubibi ukuyoba ndwiputo ukuti ingamu ya Kyala yifighililiwe panongwa yakuti akayilo kake kope kikulondiwa ukufighililiwa.”—Keta ipulogilamu iya JW BROADCASTING iya Januwale 2018 pa jw.org®. Lutani pa LIBRARY > JW BROADCASTING®.
^ ipal.62 ISI IKITHUZI KIKULINGANIA: Umohesi alinnyozile Kyala, mwakumbula Eva ukuti Kyala ntungulu. Kwa fyinja fingi Setano ikubasyoba abandu ukwendela nkimanyisyo kyabutungulu bo ikyakuti Kyala wankhaza kangi akabapelile abandu.
^ ipal.64 ISI IKITHUZI KIKULINGANIA: Bo ikumanyila Ibaibolo numundu, unkamu ikulingania isya tuyilo utununu utwa Kyala.
