1-2. Irhomu-ẹmro ego yi mai ghanren rẹn Iseri Jehova?

ỌWAN i dẹrughwaroghwẹ ẹmro eghoghanren inyenana, nọyẹ ọdo-usun i Jehova ọrhẹ erufon odẹ ye. Re rhiẹ Iseri Jehova na, oma ọ merhen ọwan ra na ta kpahen ẹmro eghoghanren enana. Ọrẹn, o fori ne fiẹ ovẹnẹ rhẹ ọdo-usun ọrhẹ erufon odẹ Osolobrugwẹ, jerẹ ẹmro eva ri vẹnẹren? Ẹjo.

² Ọwan ephian i mẹrẹnvwrurhe ne taghene o fori ne ruẹ odẹ Osolobrugwẹ fon vabọ upe. E ji yono ne taghene ọdo-usun i Jehova yanghene izede ro suẹn lele yọ mai rhomu. Omarana, ẹmro eva enana i ghanranren.

3. Me yẹ odẹ na Jehova o surhobọmwu?

³ Odẹ na Jehova o surhobọmwu i kemru kemru ro sekpahen Osolobrugwẹ ọrhẹ oborẹ o suẹn lele. Omarana, arha ta taghene erufon odẹ Osolobrugwẹ ọ ghanranren omamọ rẹn ọwan, nọyẹ a ji ta taghene oborẹ i Jehova o suẹn lele yọ mai rhomu. Odẹ i Jehova o surhobọmwu oborẹ o suẹn lele, fọkime ọye yẹ ọrọmaigbanhon na.—Se ekpeti na “ Ekwakwa Sansan ri Sekpahen Ẹmro Ọghoghanren Owu.”

4. Marhẹ Psalm 135:13 o dje odẹ Osolobrugwẹ lele, enọ ego ya na kpahenrhọ uvuẹn urhomu-ẹmro ọnana?

⁴ Odẹ na Jehova ọ ghanranren omamọ. (Se Psalm 135:13.) Mesoriẹ odẹ Osolobrugwẹ ọ ghanren omamọ? Marhẹ e ru kiki rhaphiẹ ye? Marhẹ Osolobrugwẹ o ru ruie fuan? Marhẹ ene ru ha userhumu phia chochọn odẹ na? Jenẹ a kpahenrhọ enọ erana.

5. Onọ ọgo ya na sabu nọ ọke re roro kpahen oborẹ ene ru ruẹ odẹ Osolobrugwẹ fon?

⁵ “Jene ru odẹ ọnọ fon.” (Matt. 6:9) Ọnana yẹ oborẹ i Jesu ọ tare taghene ọ mai ghanren ọke ra nẹrhomo. Ọrẹn,  me yẹ ẹmro i Jesu i mevirhọ? Ne ruẹ emru fon o mevirhọ ọrẹ ene ruie fiotọre vabọ upe. Ihworho ezẹko ina sabu nọ, ‘Odẹ i Jehova ọ ji fon, fiotọre yanghene vabọ upe bi?’ Na sabu kpahenrhọ onọ ọrana, jene roro kpahen oborẹ odẹ na o surhobọmwu.

6. Me yọ lẹrhẹ odẹ ghanran?

⁶ Odẹ ọ ghwẹ ikerẹmro ra ya rhẹ obẹ yanghene ẹmro ra ta phia. Djokarhọ oborẹ i Baibol na ọ tare: “O fori ne vwo omamọ odẹ ukperẹ ono rhiẹ efe ọduado.” (Prov. 22:1; Eccl. 7:1) Mesoriẹ odẹ ọ ghanren omaran? Fọkime o surhobọmwu oborẹ e rhe ohworho na rhọ, nọyẹ oborẹ awọrọ e roro kpahiẹn. Omarana, orhiẹ oborẹ odẹ ohworho ọ homaphia uvuẹn ọbe yanghene oborẹ e seyi lele yọ mai ghanre-en; oborẹ ọ mai ghanren yẹ oborẹ odẹ na ọ havwọ, ọrhẹ oborẹ o mevirhọ uvuẹn ọmudu ọrhẹ iroro awọrọ.

7. Marhẹ ihworho i ru kparehaso odẹ Osolobrugwẹ ne?

⁷ Ihworho i rha mọrenfian baren i Jehova, aye ne biomu aruẹ ohworho rọ havwọ. Aye i rhe biomu aruẹ ohworho rọ havwọ, aye ne ji biomu odẹ ye. Ẹkparehaso ọrukaro sekpahen odẹ Osolobrugwẹ ọ phiare uvuẹn ogba Eden. Jene roro kpahen oborẹ ana sabu yono nẹ ọnana rhe.

8. Me yẹ Adam ọrhẹ Eve i rheri, enọ ego yi homaphia?

⁸ Adam ọrhẹ Eve i rhe odẹ i Jehova, ọrhẹ irhomẹmro eghoghanren kpahen Ohworho ro vwo odẹ na. Aye i rheri taghene ọye yẹ Ọmemama na, rọ yẹrẹ aye arhọ, ogba i paradais, ọrhẹ ohworho ọgbagba rẹ aye i rọnmọren. (Gen. 1:26-28; 2:18) Ọrẹn, aye ina rha ha iroro aye rọ gbare roro kodo kpahen ọsoso oborẹ i Jehova o ru harẹn aye? Aye ina rha bọn ẹguọlọ ọrhẹ ọdaremẹro aye kpahen Ohworho ro vwo odẹ ọrana? Ẹkpahenrhọ aye o fiotọre ọke ọvwreghrẹn Osolobrugwẹ ọ damu aye ni.

9. Lele oborẹ ọ ha uvuẹn Genesis 2:16, 17 ọrhẹ Gen 3:1-5, me yi Jehova ọ ta rẹn esa ọrhẹ ane ọrukaro na, marhẹ Echu o wene urhomẹmro na lele?

⁹ Se Genesis 2:16, 17 ọrhẹ Gen 3:1-5. Echu nọ nyoma obodirin nọ Eve onọ owu: “Osolobrugwẹ ọ ghini ta taghene are i vwa re nẹ korhan korhan rọ ha uvuẹn ogba na-a?” Onọ ọrana o vwo ofian ro  tiomanu jerẹ ọdedju. Oborẹ Osolobrugwẹ ọ ghini ta yẹ, aye ina sabu re nẹ korhan korhan ri ha ogba na jokpanẹ owu ọvo. Emamọ buebun i havwiẹ rẹn Adam ọrhẹ Eve aye ina sabu re. (Gen. 2:9) Jehova ghini ohworho ghwologhwolo. Ọrẹn, Osolobrugwẹ ọ ta rẹn Adam ọrhẹ Eve taghene o vwo orhan owu aye ina ja sabu re. Omarana onọ Echu, no tiẹ urhomẹmro na nu. Echu no rurie nọ họhọ taghene Osolobrugwẹ rhẹ ohworho ghwologhwolo-o. Eve ọnọ sabu rhe roro, ‘Osolobrugwẹ o tiẹ emru ọghoghanren nu ha mẹ?’

10. Marhẹ Echu o ru rhaphiẹ odẹ Osolobrugwẹ, me yo nerhumie rhe?

¹⁰ Uvwre ọke ọrana, Eve o ji ni Jehova rhiẹ Ohworho ro suien. Nọ kpahenrhọ rẹn Echu nyoma rọ ta riẹn kpahen ọkpọvi Osolobrugwẹ. Nọ habaye taghene aye i vwa tobọ hobọte orhan na-a. Eve o rheri taghene arha huvwele Osolobrugwẹ-ẹ, ono lele fiẹ uhwu. Ọrẹn, Echu nọ tare: “Itiọrurhomẹmro, are i hwuẹ-ẹ.” (Gen. 3:2-4) Nọ ta oborẹ ọ ha ẹhẹn yen phia. Nọ vi rhaphiẹ odẹ Osolobrugwẹ, ji ta rẹn Eve taghene Jehova ọmọronfian. Echu no mo rhiẹ i Dẹbolo yanghene ọro rhaphiawan. A vi phiẹ Eve rhọ; no vwo imwẹro kpahen oborẹ Echu ọ tare. (1 Tim. 2:14) Nọ hẹrosuẹ Echu vrẹn i Jehova. Ọnana nọ lẹrheriẹ lọhọ rẹn Eve nọ djẹ odjẹ rọ sọre. No brorhiẹn rọ nọ tiẹn uvwele i Jehova. Omarana nọ riẹ omamọ ri Jehova ọ tare taghene aye i vwa re nu na-a. Ọke oru, nọ ji yẹ Adam.—Gen. 3:6.

11. Me yẹ Adam ọrhẹ Eve ina sabu ru bi, ọrẹn mẹ ye aye i vwe ru?

¹¹ Roro kpahen oborẹ Eve ọnọ sabu ta rẹn Echu bi. Gbe rorie taghene Eve nọ ta aruẹ ẹmro enana: “Mie rho-o, ọrẹn mi rhe Ọsẹ mẹ, Jehova, mi ji vwo ẹguọlọ kpahiẹn ji hẹrosuiẹ. Ọye ọ yẹre mẹ ọrhẹ Adam kemru kemru ame i guọlọre. Wu vwa damiẹ ta orharhere ẹmro kpahiẹ-ẹn. Nẹ aran!” Oma ọnọ merhen i Jehova omamọ ro no rhon aruẹ ẹmro enana ri dje atamwu Eve phia! (Prov. 27:11) Ọrẹn, Eve o vwo ẹguọlọ atamwu kpahen i Jehova-a; omaran ji te Adam. Fọkime Adam ọrhẹ Eve e vwo ẹguọlọ kpahen Ọsẹ aye-e, aye arha sabu chochọn odẹ ye-e.

12. Marhẹ Echu o ru fi ẹhẹn eveva rhẹ ọmudu i Eve, me yẹ Adam ọrhẹ Eve i vwa sabu ru?

¹² Jerẹ oborẹ a djokarhọ ne, Echu yọ lẹrhẹ Eve vwo ẹhẹn eveva. Nọ lẹrheriẹ vwo ẹhẹn eveva kpahen aruẹ Ohworho ri Jehova ọ havwọ. Ọke oru, Adam ọrhẹ Eve arha sabu chochọn odẹ i Jehova ọrhẹ oborẹ odẹ na o surhobọmwu-u. Ọnana nọ lẹrheriẹ lọhọ rẹ aye a kerhọ Echu ji kparehaso Ọsẹ aye. Echu ọ ji ha aruẹ ona ọrana ruiruo inyenana. Ọ kparahasuẹ odẹ i Jehova nyoma rọ rhaphiẹ ye. Ọ lọhọre ihworho ri vwo imwẹro kpahen efian Echu ina tiẹn usun ọsoso i Jehova.

13. Marhẹ Ezekiel 36:23 o ru hunute urhomu edje ọghoghanren rọ ha uvuẹn i Baibol na?

¹³ Jehova ono kwe na rhaphiẹ odẹ ye, ọrẹn ọ chochọn omaye-en? Ẹjo! Ọsoso iyẹnrẹn ri ha uvuẹn i Baibol na, i ta kpahen oborẹ i Jehova o ru ruẹ odẹ ye fon vabọ ephien re phien rien uvuẹn ogba Eden. (Gen. 3:15) Itiọrurhomẹmro, ana sabu hunute urhomu edje ọghoghanren rọ ha uvuẹn i Baibol na izede omana: Jehova o ruẹ odẹ ye fuan nyoma Uvie yi rẹ Ọmọyen o suẹn, ọnọ ji rharhumu ha irueruo ọvwata ọrhẹ ufuoma rhiẹ otọrakpọ na. Baibol na o vwo iyẹnrẹn ri na ha userhumu rẹn ọwan vwẹruọ oborẹ i Jehova ono ru ruẹ odẹ ye fon.—Se Ezekiel 36:23.

14. Marhẹ ẹkpahenrhọ i Jehova rẹn ẹkparehaso rọ homaphia uvuẹn Eden o ru ruẹ odẹ ye fon ne?

¹⁴ Echu ọ damoma rọ nọ jaghwẹrhọ orugba ọhọre i Jehova. Ọrẹn, ọ ji sabu fikparobọ-ọ. Iyẹnrẹn i Baibol na o dje oborẹ i Jehova ọ kpare idjaghwẹ lele ne, ro ji djephia taghene o vwo ohworho rọ họhọ i Jehova-a. Itiọrurhomẹmro, ẹkparehaso Echu ọrhẹ eri hobọtua ye ọ suẹ omiamiamo ọgbogbanhon rẹn Jehova. (Ps. 78:40) Ọrẹn, Jehova ọ ha ẹghwanren, erhionrin ọrhẹ orhienbro ọsoso kpọ erhirhiẹ ọnana vi ne. Ọye o ji dje omẹgbanhon ọnẹyen rode phia uvuẹn izede buebun ne. Ọrọ mai ghanren, a mẹrẹn ẹguọlọ ye uvuẹn ọsoso oborẹ o ruẹ ephian. (1 John 4:8) Jehova ọ wian ọke ephian neneyo ọ sabu ruẹ odẹ ye fon.

15. Marhẹ Echu o ru rhaphiẹ odẹ Osolobrugwẹ inyenana, me yo nerhumie rhe?

¹⁵ Echu ọ ji rhaphiẹ odẹ Osolobrugwẹ inyenana. Ọ phiẹ ihworho rhọ nẹ aye i roro taghene Osolobrugwẹ o vwo omẹgbanhon, ẹghwanren, orhienbro ọsoso ọrhẹ ẹguọlọ-ọ. Jerẹ udje, Echu ọ damoma rọ nọ lẹrhẹ ihworho vwo imwẹro taghene Jehova rhẹ Ọmemama na-a. Habaye, ihworho i rhe vwo imwẹro taghene Osolobrugwẹ o nyerẹn, Echu nọ damoma lẹrhẹ aye roro taghene irhi Jehova i gbanhon phan. Ọ tobọ yono ihworho taghene  Jehova ọvwọkon rọ torhẹ ihworho uvuẹn erhanren. Ihworho i rhe vwo imwẹro kpahen aruẹ efian enana, nọ lọhọ rẹ aye ina tiẹn usun ọsoso i Jehova. Bọmọke ana ki ghwọghọ Echu, ọnọ rhọ ji rhaphiẹ i Jehova, ọnọ ji damoma riẹriẹ owẹwẹ ne wu tiẹn usun i Jehova. Ono fikparobọ?

16. Me wu na sabu ru rẹ Adam ọrhẹ Eve i vwa sabu ru?

¹⁶ Jehova ọ ha uphẹn rẹn ituakpọ ri vwa gba nẹ aye i ruẹ odẹ ye fon. Nọyẹ, wu na sabu ruẹ oborẹ Adam ọrhẹ Eve i vwa sabu ru. Dedevwo a ha uvuẹn akpọ rọ vuọnren rhẹ ihworho ra rhaphiẹ i Jehova ji ta erharhere ẹmro kpahen odẹ ye, wu vwo uphẹn wu na chochọn odẹ i Jehova ji ta urhomẹmro na, nọyẹ Jehova ọfuanfon, ohworho ọsoso, omamọ ohworho ro ji vwo ẹguọlọ. (Isa. 29:23) Wu na sabu hobọtua usun i Jehova. Wu na sabu ha userhumu rẹn awọrọ rhe taghene usun i Jehova ọvo, yẹ usun ọsoso rọ nọ rhua ufuoma ọrhẹ omamerhomẹ vwe ihworho ephian.—Ps. 37:9, 37; 146:5, 6, 10.

17. Marhẹ i Jesu o ru lẹrhẹ ihworho rhe odẹ Ọsẹ ye?

¹⁷ Arha chochọn odẹ i Jehova, na hẹrokele udje i Jesu Kristi. (John 17:26) Jesu ọ ha odẹ Ọsẹ ye ruiruo ji yono ihworho kpahen aruẹ ohworho rọ ghini havwọ. Jerẹ udje, ọ kparehasuẹ otu i Pharisee ri nyoma izede buebun ta taghene Jehova ohworho gbalogbalo, ro vwo dje aruẹdọn phia, rọ kẹnoma rẹn ihworho, ro vwo dje arodọmẹ phia. Jesu ọ ha userhumu rẹn ihworho rhe taghene Ọsẹ ye o roro rẹn awan, o vwo erhionrin, o dje ẹguọlọ phia ji harhomẹ. Ọ ji ha userhumu rẹn aye rhe i Jehova, nyoma rọ dabu hẹrokele iruemru enẹyen gbagba uvuẹn akpenyerẹn yen.—John 14:9.

18. Me ye ne ruo na sabu djephia taghene Echu ọ mọrenfian banren i Jehova, jeghwai rhaphiẹ ye?

¹⁸ Jerẹ i Jesu, ana sabu ta rẹn awọrọ oborẹ e rhe kpahen i Jehova, ji yono aye taghene Osolobrugwẹ o dje ẹguọlọ ọrhẹ uruemru esiri phia. Ọnana nọ nọ lẹrhẹ aye wene ẹhẹn kpahen ofian ra mọren baren i Jehova ne. E ruẹ odẹ i Jehova fuan nyoma re dje yi fiotọre rẹn ihworho. Ana ji sabu hẹrokele i Jehova. Ana sabu ruẹ ọnana udabọ ijẹgba ọwan. (Eph. 5:1, 2)  Ẹmro ọwan ọrhẹ irueruo ọwan orho dje rẹn ihworho aruẹ ohworho i Jehova ọ ghini havwọ, ne ruẹ odẹ ye fuan. Ọwan e ruẹ odẹ na fuan nyoma ra ha userhumu rẹn ihworho rhe urhomẹmro na kpahen i Jehova. * Ọwan ne ji djephia taghene ituakpọ ri vwa gba ina sabu sẹrorẹ emevigbanhon aye.—Job 27:5.

19. Marhẹ Isaiah 63:7 o ru ha userhumu rẹn ọwan rhe urhomu-ẹmro rọ mai ghanren uvuẹn uyono ọwan?

¹⁹ Roro kpahen uyono ọghoghanren ọrọrọ ra na sabu ha ruiruo. Erhe yono awọrọ irhomẹmro i Baibol na, ọwan na kanrunumwuẹ ọdo-usun i Jehova, taghene ọye o fo ohworho ro no suẹn ọsoso ekwakwa ephian gbagba. Ọrẹn, dedevwo ọ ghanranren na tẹnrovi irhi Jehova, oborẹ ọ mai ghanren rẹn ọwan ọrẹ ana ha userhumu rẹn ihworho vwo ẹguọlọ kpahen i Jehova ro rhiẹ Ọsẹ ọwan, ji vwo atamwu kpahiẹn. Omarana, o fori na hunute obọdẹn iruemru i Jehova, ji kanrunumwu aruẹ Ohworho rọ havwọ. (Se Isaiah 63:7.) Erhe yono izede omaran, na ha userhumu rẹn awọrọ vwo ẹguọlọ kpahen i Jehova ji huvwele yi, fọkime aye i guọlọ vwo atamwu kpahiẹn.

20. Me ye ne yono kpahen uvuẹn urhomu-ẹmro rọ ha kpahen ọnana?

²⁰ Marhẹ ono ru mwu ọwan ẹro taghene uruemru ọrhẹ uyono ọwan, ọ ha userhumu rẹn awọrọ rhe ekwakwa irhorhomu kpahen i Jehova, ji tiẹ kẹriẹ? Urhomu-ẹmro rọ ha kpahen ọnana ọnọ kpahenrhọ onọ ọrana.