1, 2. Йегови Ӕвдесӕнтӕ арӕх цӕбӕл фӕдздзорунцӕ?

АБОНИ алке рази дӕр хъӕбӕр ӕхсидзгӕ фарстатӕ лӕууй. Еци фарстатӕ баст ӕнцӕ Хуцауи хецаудзийнади ӕма ӕ номи хӕццӕ. Йегови Ӕвдесӕнтӕ ке ан, уомӕ гӕсгӕ еци гъуддӕгтӕбӕл арӕх фӕдздзорӕн. Аци дууӕ фарстай кӕрӕдзей хӕццӕ баст ӕнцӕ.

² Мах ӕй зонӕн, Хуцауи ном ке гъӕуама исрохс уа. Удта ма ’й зонӕн, уой хецаудзийнадӕй хуӕздӕр ке нӕййес, е ке гъӕуама исбӕлвурд уа. Аци дууӕ фарстай хъӕбӕр ӕхсидзгӕ ’нцӕ.

3. Йегови ном исрохс кӕнунмӕ ци хауй?

³ Йегови хӕццӕ цидӕриддӕр баст ӕй, е баст ӕй ӕ номи хӕццӕ дӕр. Уомӕ хауй ӕ хецаудзийнадӕ дӕр. Мадта Йегови ном искӕдзос кӕнунмӕ хауй, ӕ хецаудзийнадӕ тӕккӕ хуӕздӕр ке ӕй, уой исбӕлвурд кӕнун дӕр. (Кӕсӕ рамкӕ « Дзурддаг фарстамӕ ци хауй?».)

4. Псаломи 135:13 Хуцауи номи туххӕй ци финст ес? Аци статьяй цӕхуӕн фарстатӕмӕ ӕркӕсдзиан?

⁴ Хуцауи ном, Йеговӕ, еунӕг номи хӕццӕ дӕр рабарӕн нӕййес. (Бакӕсӕ Псалом 135:13.) Цума еци ном уотӕ ӕхсидзгӕ цӕмӕн ӕй? Фиццаг хатт ин ӕ ном кӕд фегадӕ кодтонцӕ? Хуцау ци кӕнуй, цӕмӕй ӕ ном исрохс кӕна? Удта мах бон дӕр ци ӕй кӕнун, цӕмӕй ин ӕ ном рохс кӕнӕн? Гъӕйдӕ ӕркӕсӕн аци фарстатӕмӕ.

5. Хуцауи ном искӕдзос кӕнун ке гъӕуй, уой фӕдбӕл кӕмӕдӕрти цӕхуӕн фарста фӕззиннуй?

⁵ Йесо дӕнцӕгӕн ке ниууагъта, еци кувдӕй хуарз зиннуй,  фиццагидӕр цӕй туххӕй гъӕуама ковӕн, е. Йесо загъта: «Ковгӕ ба кӕнтӕ атӕ: „Нӕ уӕларвон Фидӕ, исрохс уӕд дӕ ном“» (Матф. 6:9). Цума аци дзурдтӕ куд лӕдӕргӕ ’нцӕ? «Исрохс» кӕнун нисан кӕнуй искӕдзос кӕнун. Фал кадӕр расагъӕс кӕндзӕй: «Йегови ном ӕной дӕр кӕдзос ӕй ӕма ма ’й рохс кӕнун цӕмӕн гъӕуй?» Цӕмӕй ӕй балӕдӕрӕн, уой туххӕй гъӕуй базонун, Хуцауи ном ци нисан кӕнуй, уой.

6. Ном ӕхсидзгӕ цӕмӕн ӕй?

⁶ Ном, кӕрӕдзебӕл баст дамугъатӕй фулдӕр цидӕр ӕй. Библий финст ӕй: «Хуарз ном хуӕздӕр ӕй устур гъӕздугдзийнӕдтӕй» (Ӕмб. 22:1; Еккл. 7:1). Цӕмӕн ес уотӕ зӕгъӕн? Уомӕн ӕма дӕ ном куд дзоргӕ ’й кенӕ куд финсгӕ ’й, е нӕй сӕйраг, фал дин ӕй адӕн ку фегъосунцӕ, уӕд цӕбӕл расагъӕс кӕнунцӕ, е.

7. Адӕн Хуцауи ном кутемӕй ӕгадӕ кӕнунцӕ?

⁷ Адӕн Йегови туххӕй мӕнгӕттӕ ку фӕдздзорунцӕ, уӕд ин ӕ хуарз ном фегадӕ кӕнунцӕ. Фиццаг хатт уӕхӕн хабар ӕрцудӕй, адӕн ку фӕззиндтӕнцӕ, уӕд. Ӕркӕсӕн, еци хабарӕй цӕбӕл ахур кӕнӕн, уомӕ.

8. Адам ӕма Евӕ ци зудтонцӕ? Уомӕ гӕсгӕ цӕхуӕн фарстатӕ фӕззиннуй?

⁸ Адам ӕма Евӕ зудтонцӕ, Хуцау ка ӕй ӕма ӕ ном Йеговӕ ке ӕй, уой. Удта ’й сӕ дууӕ дӕр зудтонцӕ, Йеговӕ се Сфӕлдесӕг ке ӕй, рӕсугъд цӕрӕнбунат ӕма ӕнхӕст цардӕмбал син ка равардта, е (Райд. 1:26–28; 2:18). Фал цума еци хуарздзийнӕдтӕн исаргъ кодтонцӕ? Цума Хуцауи уарзтонцӕ ӕма си боз адтӕнцӕ? Е ба рабӕрӕг ӕй, Хуцауи знаг сӕ хӕццӕ ку исдзурдта, уӕд.

9. Райдайӕни 2:16, 17 ӕма 3:1–5 куд финст ӕй, уомӕ гӕсгӕ Йеговӕ Адам ӕма Евӕн ци загъта ӕма ин Сайтан ӕ дзурдтӕ куд исусхъуммӕ кодта?

⁹ Бакӕсӕ Райдайӕн 2:16, 17 ӕма 3:1–5. Сайтан хелаги цъухӕй Еви бафарста: «Хуцау уин ӕцӕгӕйдӕр загъта, дзӕхӕрадони алли бӕласӕй ма хуӕретӕ, зӕгъгӕ?» Сайтан уӕхӕн фарста барӕй равардта, цӕмӕй Евӕ Хуцаубӕл фӕггурусхӕ адтайдӕ. Хуцау  син ӕрмӕстдӕр еунӕг бӕласи кой кодта. Дзенети ба хъӕбӕр берӕ аллихузи бӕлӕстӕ адтӕй, ӕма си сӕ бон адтӕй хуӕрун (Райд. 2:9). Йеговӕ син алцидӕр фӕндон равардта. Мадта Сайтан ӕ фарстайӕй Йегови дзурдтӕ исусхъуммӕ кодта, ӕма уотӕ рауадӕй, цума Йеговӕ Адам ӕма Евӕй хуарзӕй цидӕр римӕхсуй. Евӕ, ӕвӕдзи, расагъӕс кодта: «Майдима, ӕцӕгӕйдӕр уотӕ ’й?»

10. Сайтан Хуцауи туххӕй ӕргом мӕнгӕттӕ дзорун куд райдӕдта ӕма е цӕмӕ ӕркодта?

¹⁰ Сайтан Еви хӕццӕ ку исдзурдта, уӕд ма Евӕ Йеговӕн коммӕгӕс адтӕй ӕма Сайтанӕн радзурдта, Хуцау син ци загъта, уой. Удта ма ӕ дзурдтӕбӕл бафтудта, Хуцау, дан, нин уотӕ загъта, ма си бахуӕретӕ, ӕвналгӕ дӕр, дан, имӕ ма бакӕнтӕ. Евӕ ’й зудта, Хуцауи фӕдзӕхстмӕ ку нӕ байгъосонцӕ, уӕд сӕ е мӕлӕтмӕ ке ӕркӕндзӕй. Фал ин Сайтан ба загъта: «Нӕ, нӕ рамӕлдзиайтӕ» (Райд. 3:2–4). Ами ба Сайтан ӕргом райдӕдта сайун. Е Хуцауи ном фегадӕ кодта, уомӕн ӕма ӕ дзурдтӕй уотӕ уадӕй, цума Йеговӕ сайгӕ кӕнуй. Гъе уотемӕй Сайтан иссӕй Ибилис кенӕ фудкойгӕнӕг. Евӕ Йеговӕбӕл нӕ, фал Сайтанбӕл баууӕндтӕй, ӕма ибӕл хъӕбӕр устур сайд рауадӕй (1 Тим. 2:14). Амӕй фуддӕр нӕййес, уӕхӕн унаффӕ рахаста – Йегови дзурди сӕрти рахизтӕй. Евӕ, хуӕрун кӕмӕй не ’нгъизтӕй, еци бӕласи рӕзӕй бахуардта, уой фӕсте ба си Адамӕн дӕр равардта (Райд. 3:6).

11. Адам ӕма Еви бон ци адтӕй бакӕнун?

¹¹ Гъӕйдӕ расагъӕс кӕнӕн, Евӕ куд гъӕуама бакодтайдӕ, уобӕл. Ӕ бон адтӕй зӕгъун: «Ӕз дӕу нӕ зонун, фал мӕ Фиди ба хуарз зонун. Ӕз Йегови уарзун, ӕма ибӕл ӕууӕндун. Адами хӕццӕ нӕмӕ цидӕриддӕр ес, уой нин е равардта. Ӕма ду ка дӕ, цӕмӕй си уотитӕ дзорай? Фесӕфӕ мӕ разӕй!» Расагъӕс кӕнӕ, Йеговӕн куд ӕхцӕуӕн адтайдӕ, ӕ кизгӕй уӕхӕн дзурдтӕ фегъосун! (Ӕмб. 27:11). Фал Евӕ Йеговӕбӕл нӕдӕр еузӕрдон адтӕй, нӕдӕр ӕй уарзгӕ кодта. Адам дӕр гъе уотӕ. Сӕ Фиди хуарз ном син ка ӕгадӕ кодта, уой нихмӕ еунӕг хъип дӕр не ’скодтонцӕ.

12. Сайтан ци бакодта, цӕмӕй Евӕ фӕггурусхӕ адтайдӕ? Адам ӕма Евӕ ци нӕ бакодтонцӕ?

¹² Мадта Сайтан цӕмӕй райдӕдта? Фиццаг бал байархайдта, цӕмӕй Евӕ фӕггурусхӕ адтайдӕ, Йеговӕ хуарз Фидӕ ке ӕй, уобӕл. Уой фӕсте ба си мӕнгӕттӕ дзорун райдӕдта. Адам ӕма Евӕ неци исдзурдтонцӕ, сӕ Фиди фудкой син ку кодта, уӕд. Етӕ Сайтанмӕ байгъустонцӕ ӕма хъӕбӕр ӕнцонтӕй Хуцауи нихмӕ рацудӕнцӕ. Сайтан абони дӕр уотӕ архайуй. Хуцаубӕл мӕнгӕттӕ имисуй, ӕма еци мӕнгӕттӕбӕл ка ӕууӕндуй, етӕ хъӕбӕр ӕнцонтӕй Хуцауи раст уагӕвӕрдтӕбӕл сӕ къох ракъуӕрунцӕ ӕма ’й сӕ Хецаубӕл нӕ нимайунцӕ.

13. Йезекили 36:23 куд финст ӕй, уомӕ гӕсгӕ Библий сӕйраг гъуди цӕхуӕн ӕй?

¹³ Цума Йеговӕ Сайтани фауӕн дзубандитӕмӕ цийфӕнди цӕстӕй кӕсуй? Нӕъ. Цӕмӕн ес уотӕ зӕгъӕн? Уомӕн ӕма ӕнӕгъӕнӕ Библий дӕр дзурд цӕуй, Йеговӕ ӕ ном искӕдзос кӕнуни туххӕй ци бакӕндзӕй, уобӕл (Райд. 3:15). Библий сӕйраг гъуди цубуртӕй ӕнгъезуй уотӕ зӕгъун: Йеговӕ, ӕ Фурти ке сӕргъи исӕвардта, еци Паддзахади фӕрци ӕ ном исрохс кӕндзӕй ӕма ӕгас зӕнхӕбӕл дӕр искӕндзӕй рӕстдзийнадӕ ӕма фарнӕ. Библийӕй базонӕн ес, аци гъуддаг искӕнуни туххӕй Йеговӕ куд архайуй, уой. (Бакӕсӕ Йезекили 36:23.)

14. Йеговӕ Едеми хабари фӕсте куд архайуй, е ин ӕ ном куд рохс кӕнуй?

¹⁴ Сайтан, ӕ бон цидӕриддӕр ӕй, уой кӕнуй, цӕмӕй Йегови фӕндон ма исӕнхӕст уа, фал ин си неци уайуй. Библий финст ӕй, Йеговӕ куд архайуй, е, ӕма уомӕй бӕрӕг ӕй, ӕмбал ин ке нӕййес. Сайтан ӕма, ӕ фӕдбӕл ка рацудӕй, етӕ Йеговӕн хъӕбӕр устур маст ӕрхастонцӕ (Пс. 78:40). Фал Йеговӕ ӕ ном исрохс кӕнуни туххӕй куд архайуй, уомӕй бӕрӕг ӕй е ’нӕкӕрон зунд, фӕразондзийнадӕ ӕма рӕстдзийнадӕ. Ӕ хъаурӕ цал хатти бавдиста, уомӕн банимайӕн дӕр нӕййес. Фал уӕддӕр е ’гас гъуддӕгти фиццагидӕр ӕ уарзондзийнадӕ фӕууй бӕрӕг (1 Иоан. 4:8). Йеговӕ абони уӕнгӕ дӕр архайуй, цӕмӕй ӕ ном исрохс кӕна.

15. Сайтан абони Хуцауи ном куд цъумур кӕнуй ӕма ин ци ’нтӕсуй?

¹⁵ Сайтан абони уӕнгӕ дӕр Хуцауи номбӕл цъифкалӕнтӕ кӕнуй. Адӕни сайуй, цӕмӕй ин ӕ хъаурӕбӕл, ӕ рӕстдзийнадӕбӕл, ӕ зундбӕл ӕма ӕ уарзондзийнадӕбӕл гурусхӕ кӕнонцӕ. Зӕгъӕн, архайуй, цӕмӕй адӕн ма ’ууӕндонцӕ, Йеговӕ Сфӕлдесӕг ке ӕй, уобӕл. Хуцаубӕл ка ӕууӕндуй, уони ба уӕхӕн гъудибӕл аразуй, цума Хуцауи уагӕвӕрдтӕ раст нӕ ’нцӕ ӕма ӕгӕр карз ӕнцӕ, удта цума Хуцау дорзӕрдӕ ӕй ӕма адӕни зиндони гъезӕмарӕй маруй. Уӕхӕн мӕнгӕттӕбӕл ка баууӕндуй,  етӕ ба Хуцауӕй сӕхе хъӕбӕр ӕнцонтӕй рахатунцӕ. Сайтан цалинмӕ исӕфт не ’рцӕуа, уӕдмӕти архайдзӕй, цӕмӕй фулдӕр адӕни Хуцауӕй райеуварс кӕна, ӕма си ду дӕр иронх нӕ дӕ. Цума ин е бантӕсдзӕй?

16. Адам ӕма Евӕй уӕлдай дӕу бон ци ӕй бакӕнун?

¹⁶ Йеговӕ ӕнӕнхӕст адӕнӕн дӕр барӕ равардта, цӕмӕй ин ӕ ном рохс кӕнонцӕ. Адам ӕма Евӕ ци нӕ бакодтонцӕ, уой дӕу бон ӕй бакӕнун. Абони фулдӕр адӕн Хуцауи ном ӕгадӕ кӕнунцӕ, фал дӕу бон ба ӕй Хуцауи фарс ислӕуун ӕма адӕнӕн дзорун, Йеговӕ кӕдзос, раст, хӕларзӕрдӕ ӕма уарзӕгой Хуцау ке ӕй (Ис. 29:23). Дӕ бон ӕй бавдесун, дӕ Хецаубӕл ӕй ке нимайис. Удта дӕ бон ӕй адӕнӕн лӕдӕрун кӕнун, ӕрмӕстдӕр уой хецаудзийнадӕ ке ӕй тӕккӕ хуӕздӕр ӕма ӕрмӕстдӕр е ке ӕрхӕсдзӕй ӕгас адӕнӕн дӕр фарнӕ ӕма ӕцӕг амонд (Пс. 37:9, 37; 146:5, 6, 10).

17. Йесо адӕнӕн Хуцауи ном куд ӕргом кодта?

¹⁷ Хуцауи номи сӕрбӕл ку фӕдздзорӕн, уӕд уомӕй Киристей фӕффӕнзӕн (Иоан. 17:26). Киристе адӕнӕн Хуцауи ном ке раргом кодта, уомӕй уӕлдай ма син лӕдӕрун дӕр кодта, цӕхуӕн Хуцау ӕй, уой. Зӕгъӕн, фарисейти туххӕй адӕнмӕ уотӕ кастӕй, цума Йеговӕ карз, дорзӕрдӕ ӕма ка неци хатир кӕнуй, уӕхӕн Хуцау ӕй. Фал син Киристе ба лӕдӕрун кодта, Хуцау лӕдӕргӕ, фӕразон, фӕлмӕнзӕрдӕ ӕма хатиргӕнагӕ ке ӕй. Уомӕй уӕлдай ма Йесо царди медӕг ӕнхӕстӕй ӕвдиста, ӕ уӕларвон Фидӕмӕ ци менеугутӕ ес, уони, ӕма уой фӕрци адӕн уидтонцӕ, Йеговӕ цӕхуӕн Хуцау ӕй, уой (Иоан. 14:9).

18. Нӕ бон куд ӕй Йегови ном кӕдзос кӕнун?

¹⁸ Киристей хузӕн мах бон дӕр ӕй Йегови ном кӕдзос кӕнун ӕма адӕнӕн дзорун, ка ӕй, удта цӕхуӕн уарзӕгой ӕма хӕларзӕрдӕ Хуцау ӕй, уой. Уомӕй уӕлдай ма нӕ бон ӕй иннетӕн ӕнхус кӕнун, цӕмӕй Хуцауи ном табуйагбӕл нимайонцӕ. Удта мах бон дӕр ӕй Йегови менеугутӕ ӕвдесун, кӕд ӕнӕнхӕст ан, уӕддӕр (Еф. 5:1, 2). Уотемӕй дӕр Йегови ном рохс кӕндзиан, уомӕн ӕма нин адӕн нӕ дзурдтӕ ӕма нӕ гъуддӕгти фӕрци уиндзӕнцӕ, Йеговӕ ӕцӕгӕй цӕхуӕн Хуцау ӕй, уой. Удта ма адӕнӕн мӕнгӕ  ахурӕдтӕй исуӕгъдӕ унмӕ ку ӕнхус кӕнӕн, уӕд уомӕй ба Хуцауи номи сӕрбӕл дзордзиан *. Мах ӕй нӕхе цардӕй ӕвдесӕн, ӕнӕнхӕст адӕймаги бон дӕр ке ӕй Хуцаубӕл еузӕрдонӕй байзайун (Иов 27:5).

19. Исаййи 63:7 куд финст ӕй, уомӕ гӕсгӕ адӕнӕн Библий рӕстдзийнадӕ амонгӕй нӕ нисан ци гъӕуама уа?

¹⁹ Кутемӕй ма ӕй нӕ бон Хуцауи ном рохс кӕнун? Иннетӕн Библий рӕстдзийнадӕ ку фӕййамонӕн, уӕд син арӕх фӕдздзорӕн, ӕрмӕстдӕр Хуцауӕн ке ес барӕ, цӕмӕй Дун-дуйней Хецау уа, ӕма е раст ке ӕй. Кӕд адӕни гъӕуй Хуцауи закъӕнттӕ базонун, уӕддӕр нӕ сӕйраг нисан ӕй адӕнӕн банхус кӕнун, цӕмӕй Йегови бауарзонцӕ ӕма ибӕл еузӕрдон уонцӕ. Уой туххӕй ба син гъӕуй дзорун, Йеговӕ ном ка хӕссуй, еци Хуцауи дессаги менеугути туххӕй. (Бакӕсӕ Исаййи 63:7.) Уотемӕй Йегови бауарздзӕнцӕ ӕма сӕ бафӕнддзӕй уомӕ игъосун.

20. Иннӕ статьяй дзурд цӕбӕл цӕудзӕй?

²⁰ Цума нӕхе куд дарӕн ӕма адӕни куд ахур кӕнӕн, уомӕй Йегови ном кадгин кӕнӕн ӕви нӕ, уой куд ес базонӕн? Уобӕл ба дзурд цӕудзӕй иннӕ статьяй.