1-2. Anto ran isyu so importante ed Saray Tasi nen Jehova?

NALALANOR tayo ed sarayan importantin isyu—say inkasoberano nen Jehova tan say pamasanto ed ngaran to. Lapud Tasi itayo nen Jehova, labalabay tayon natalosan iratan. Kasin say inkasoberano na Dios tan say pamasanto ed ngaran to et mandumaan ya isyu? Andi.

² Amta tayo ya say ngaran na Dios et kaukolan a napasanto. Amta tayo met ya nepeg a napaneknekan ya si Jehova labat so Soberano ed uniberso. Diad arum a salita, nepeg ya naamtaan na amin ya say paraan na pananguley to so sankaabigan. Importante sirin ya natalosan tayon maong irayan isyu.

3. Antoy konektado ed ngaran nen Jehova?

³ Say ngaran nen Jehova et konektado ed amin ya bengatla nipaakar ed Dios tayo, kaiba la so paraan na pananguley to. Kanian pian napasanto so ngaran nen Jehova, kaukolan ya napaneknekan ya say paraan na pananguley to so sankaabigan. Konektado ed ngaran nen Jehova so paraan na pananguley to bilang makapanyarin-amin ya Soberano.​—Nengnengen so kahon ya “ No Anto Ray Nalalanor ed Sankaimportantian ya Isyu.”

4. Antoy ibabaga na Salmo 135:13 nipaakar ed ngaran na Dios, tan anto ran tepet so pantongtongan tayo ed sayan artikulo?

⁴ Say ngaran nen Jehova et espisyal. (Basaen so Salmo 135:13.) Akin et importantin maong so ngaran na Dios? Panon itan ya dineralan? Antoy ginawa na Dios pian napasanto  so ngaran to? Tan antoy nagawaan tayo pian nidepensa so ngaran to? Pantongtongan tayo iratan ya tepet.

5. Antoy nayarin isipen na arum nipaakar ed pamasanto ed ngaran na Dios?

⁵ “Napasanto komon so ngaran mo.” (Mat. 6:9) Imbaga nen Jesus ya satan so manunan ipikasi tayo. Balet antoy labay ya ibaga nen Jesus? Pian magmaliw ya masanto so sakey a bengatla, kaukolan ya magmaliw itan ya malinis. Balet nayarin isipen na arum, ‘Di ba malinis o masanto la so ngaran nen Jehova, kanian akin et kaukolan nin napasanto itan?’ Pian naebatan itan, kaukolan tayon amtaen no anto ray konektado ed sakey a ngaran.

6. Akin et ontan la kaimportante so ngaran?

⁶ Say ngaran mo et aglabat ontutukoy ed samay isusulat mod papel odino pananawag na arum ed sika. Imanoen iyan ibabaga na Biblia: “Say maabig a ngaran et nepeg a pilien nen say dakel a kayamanan.” (Pro. 22:1; Ecl. 7:1) Akin et ontan la kamabli o kaimportante so sakey a ngaran? On ta nalalanor ed satan so reputasyon na samay akan-ngaran, no antoy iisipen na arum ed sikato. Kanian aliwan tanton importante so espeling o pangibabalikas ed sakey a ngaran. Say talagan importante et no antoy reputasyon na samay akan-ngaran, tan no antoy iisipen o pakanengneng na arum ed sikato.

7. Panon ya dineralan na totoo so ngaran na Dios?

⁷ No mangikakayat na katilaan iray totoo nipaakar ed si Jehova, dederalen day reputasyon to. No dederalen day reputasyon to, labay dan naderal so ngaran to. Diad panaon da ni labat di Adan tan Eva et wala lay nanderal ed ngaran tan reputasyon na Dios. Pantongtongan tayo no antoy naaralan tayo ed satan ya agawa.

8. Anto ray amta nen Adan tan Eva, tan anto ray onlesan tepet?

⁸ Amta nen Adan tan Eva ya say ngaran na Dios et Jehova, tan amta da ray importantin katuaan nipaakar ed sikato. Amta ra ya sikato so Amalsa, say angiter ed bilay da, say nanggawa ed balibalin Paraison panayaman da, tan labay to ya magmaliw iran maliket bilang  sanasawa. (Gen. 1:26-28; 2:18) Balet kasin pablien day amin ya ginawa nen Jehova parad sikara? Kasin manggawa ray paraan pian mas onelet so panangaro da ed sikato tan nipanengneng da ya talagan misalsalamat ira? Malinew so ebat sanen walay kabusol na Dios ya nantukso ed sikara.

9. Base ed Genesis 2:16, 17 tan 3:1-5, antoy ingganggan nen Jehova ed si Adan tan Eva, tan panon itan ya nilaokan na katilaan nen Satanas?

⁹ Basaen so Genesis 2:16, 17 tan 3:1-5. Kunkunwarin pinansalita nen Satanas so sakey ya uleg nen tinepetan toy Eva: “Talaga ta’n imbaga na Dios ya agkayo nepeg a mangay bunga na amin a kiew ed hardin?” Ginagala nen Satanas ya laokan na katilaan itan ya tepet to pian nasamalan so nonot nen Eva, ta say imbaga na Dios et sarag day mangan na bunga na amin ya kiew. Saksakey labat so imbawal to. Amayamay so prutas ya napampilian nen Adan tan Eva ta maiter si Jehova. (Gen. 2:9) Balet imbaga na Dios ed si Adan tan Eva ya walay sakey ya kiew ya agda nayarin kanen so bunga to. Nantila sirin si Satanas ed samay tepet to. Labay ton papawayen ya masiblet so Dios. Kanian ompan naisip nen Eva, ‘Wala siri isisiblet na Dios ed sikami?’

10. Panon ya direktan pinauges nen Satanas so ngaran na Dios, tan antoy resulta na satan?

¹⁰ Nen intepet nen Satanas itan, bibirbiren ni nen Eva ya kaukolan ton unoren si Jehova. Imbaga ni ingen nen Eva imay eksakton ganggan na Dios ed sikara. Tan imbaga to ya agda nepeg ya diwiten iman a kiew. Amta to ya ompatey ira no agda unoren so Dios. Balet inmebat si Satanas: “Seguradon agkayo ompatey.” (Gen. 3:2-4) Dia et diretsaan lay impantila nen Satanas. Direkta ton pinauges so ngaran na Dios, ya singa to ibabaga ed si Eva ya matila si Jehova. Kanian si Satanas et nagmaliw ya sakey a diablo odino managpauges. Aloko si Eva tan anisia ed si Satanas. (1 Tim. 2:14) Mas nanmatalek lad si Satanas nen say diad si Jehova kanian aliwa so desisyon to. Mas pinili ton unoren si Satanas, kanian angan ed bunga na kiew ya ibabawal nen Jehova tan inikdan toy Adan.​—Gen. 3:6.

11. Anto komon so ginawa nen Adan tan Eva?

¹¹ Isip mo pa no anto komon so imbaga nen Eva ed si Satanas. Anto kasi resulta no say imbaga to et, “Matila ka! Akin et manisia ak ed sika anta agta ka kabat! Inar-arok tan pantitiwalaan koy Amak. Segurado ak ya anggapoy isiblet tod sikami. Iiter toy amin ya pankaukolan mi nen Adan tan aasikasoen to kami. Makapal so lupam, ekal ka dia!” Seguradon malikeliket si Aman Jehova no ontan komon so nadngel ton inyebat na inad-aro ton anak. (Pro. 27:11) Balet, ag-inaro nen Eva si Jehova. Anggan si Adan, agto met inaro si Jehova. Lapud aliwan interon puso so panangaro dad Ama ra, agda nidepensa so ngaran to.

12. Antoy ginawa nen Satanas pian nasamalan so nonot nen Eva, tan antoy ag-agawaan nen Adan tan Eva?

¹² Singa naimano tayo, dineralan nen Satanas si Jehova pian nasamalan so nonot nen  Eva kanian nanduaruwa si Eva no talaga kasin maaro ya Ama si Jehova. Balet imbes ya idepensa nen Adan tan Eva so ngaran tan reputasyon nen Jehova, nampaloko ra ed si Satanas tan nanrebelde ra ed Ama ra. Ontan nin siansia so gagawaen nen Satanas anggad natan. Dederalan toy ngaran nen Jehova pian nasamalan so nonot na totoo. Lapud satan, saray totoon manisia ed katilaan nen Satanas et agda labay so manpasakop ed uley nen Jehova.

13. Panon ya ipapalinew na Ezequiel 36:23 so manunan mensahe na Biblia?

¹³ Kasin palampasen labat nen Jehova itan ya panagderal ed ngaran to tan agto idepensay sarili to? Andi! Nabasa ed interon Biblia no anto ray ginawa nen Jehova pian napaneknekan ya aliwan tua iramay panagderal ya ginawa nen Satanas ed sikato diad hardin na Eden. (Gen. 3:15) Diad tua, onia so manunan mensahe na Biblia: Pasantosen nen Jehova so ngaran to tan ipawil toy matunong tan mareen ya mundo diad panamegley na Panarian ya uleyan na Anak to. Kanian no aralen tayoy Biblia, natalosan tayo no panon ya pasantosen nen Jehova so ngaran to.​—Basaen so Ezequiel 36:23.

14. Akin ya apasanto so ngaran nen Jehova ed saray ginawa to kayari na impanrebelde nen Satanas?

¹⁴ Talagan mamapasyay Satanas pian agnagawa so gagala nen Jehova. Balet anggan antoy gawaen nen Satanas, agto napatunday Jehova. Nabasa tayod Biblia no anto ray ginawa nen Jehova kayari na impanrebelde nen Satanas, tan apaneknekan ya talagan maaro ya Ama si Jehova tan sankaabigan ya manuley. Siempre ansakisakit ed si Jehova ya dakdakel so kinmampi ed si Satanas diad impanrebelde to. (Sal. 78:40) Balet anggano ontan so agawa, sankapatnagan nin siansia so karunongan, anos, tan hustisya nen Jehova ed amin ya gagawaen to. Aminpiga to met ya pinaneknekan ya sikato so sankamakapanyarian. Tan manuna ed amin, sankapatnagan ed gagawaen to ya sikatoy maar-aro. (1 Juan 4:8) On, talagan pinaneknekan nen Jehova ya aliwan tua imay panagderal nen Satanas.

15. Panon ya dederalan nen Satanas so ngaran nen Jehova natan, tan antoy resulta?

 ¹⁵ Anggad natan et agtutundaan nen Satanas ya deralan so ngaran nen Jehova. Lolokoen to iray totoo pian isipen da ya say Dios et anggapoy pakapanyari to, anggapoy hustisya to, aliwan marunong, tan aliwan maaro. Singa bilang, labay ton panisiaen iray totoo ya aliwan si Jehova so Amalsa. Tan no bilang ta manisia iray totoo ya walay Dios, labay nen Satanas ya isipen dan masyadon istrikto so Dios tan aliwan patas. Ibabangat to ni ingen ya si Jehova et anggapoy panangasi to tan papairapen to ray totoo ed impierno. Siempre no napanisia to iray totoo, agda la labay so manpasakop ed uley nen Jehova. Anggad agni aderal si Satanas, agto tundaan ya deralan si Jehova tan seguradon labay to ya naloko ka met. Kasin labay mo ya nabiktima to ka?

16. Antoy ag-agawaan nen Adan tan Eva ya sarag mon gawaen?

¹⁶ Anggano aliwa tayon perpekto, walay nagawaan tayo pian napasanto so ngaran na Dios. Sarag mon gawaen imay ag-agawaan nen Adan tan Eva. Anggano apaliberan ka na totoon mamabalaw tan mamapauges ed ngaran nen Jehova, pribilehyom ya idepensa so ngaran to tan ipaamtam ya sikatoy masanto, matunong, maomaong, tan maar-aro. (Isa. 29:23) Ipanengneng mod kabibilay mo ya manpapasakop kad uley to. Tulongan mo ray totoo pian natalosan da ya sikato so sankaabigan ya manuley tan sikato labat so makapangiter na tuan kareenan tan tuan liket.​—Sal. 37:9, 37; 146:5, 6, 10.

17. Antoy ginawa nen Jesus pian nipakabat toy ngaran nen Ama to?

¹⁷ No idedepensa tayoy ngaran nen Jehova, aaligen tayoy Jesu-Kristo. (Juan 17:26) Pian nipakabat nen Jesus so ngaran nen Ama to, inusar to itan ya ngaran tan indepensa toy reputasyon nen Jehova. Singa bilang, pinaneknekan to ya aliwa so ibabaga na saray Fariseo ya si Jehova kuno et maruksa, estrikto, anggapoy pibabali to, tan anggapoy panangasi to. Imbangat to ray totoo pian natalosan da ya si Ama to et makonsidera, maanos, maar-aro, tan manamerdona. Tan pian mas nakabat na totoo si Jehova, inalig nen Jesus iray ugali nen Ama to.​—Juan 14:9.

18. Antoy gawaen tayo pian napaneknekan tayo ya aliwan tua iray katilaan tan panagpauges ed si Jehova?

 ¹⁸ Singa si Jesus, ipakabat tayoy ngaran nen Jehova ed saray totoo. Ibaga tayod sikara ya sikatoy maar-aro tan maomaong ya Dios. No ontan so gawaen tayo, papaneknekan tayo ya aliwan tua iray katilaan tan panagpauges ed si Jehova. Napasanto tayo so ngaran nen Jehova no tulongan tayo ray totoo a natalosan ya masanto so ngaran to. Sarag tayo met ya aligen si Jehova. Sarag tayon gawaen itan anggano aliwa tayon perpekto. (Efe. 5:1, 2) No diad saray ibabaga tan gagawaen tayo et nanengneng na totoo ya aaligen tayoy Jehova, napapasanto tayo so ngaran to. Tulongan tayo met iray totoo ya natalosan no anton talagay tua nipaakar ed Dios. Napapasanto tayo met so ngaran nen Jehova no manmamatoor tayo anggano aliwa tayon perpekto.​—Job 27:5.

19. Base ed Isaias 63:7, antoy nepeg ya manunan gagala tayo no manbabangat itayo?

¹⁹ Wala ni nagawaan tayo pian napasanto so ngaran nen Jehova. No mangiyaaral tayoy Biblia, mabetbet ya ibabangat tayo iray totoo ya kaukolan dan unoren iray ganggan nen Jehova ta sikato so Soberano ed uniberso. Duga met itan. Balet say manunan gagala tayo et tulongan iran naaro si Aman Jehova tan manmatoor irad sikato. Kanian ipalinew tayo ed saray iyaaralan tayo iray balibalin kualidad nen Jehova. Ipakabat tayo no siopan talaga si Jehova. (Basaen so Isaias 63:7.) No ontan so paraan na panagbangat tayo, tutulongan tayo ray totoo ya aroen si Jehova tan unoren da lapud labay day manmatoor ed sikato.

20. Antoy pantongtongan tayo ed onsublay ya artikulo?

²⁰ Anto sirin so gawaen tayo pian diad ugali tan panagbangat tayo et napasanto tayo so ngaran nen Jehova, tan lapud satan et onapit iray totoo ed sikato? Atan so pantongtongan tayo diad onsublay ya artikulo.