1-2. Ki kuestion ta masha importante pa Testigunan di Yehova?

TIN dos kuestion masha importante ku nos ta enfrentá awe: Dios su manera di goberná i santifikashon di su nòmber. Komo Testigunan di Yehova, nos gusta papia tokante e dos tópikonan ei.

² For di nos estudio di Beibel nos a komprondé ku e nòmber di Dios mester ser santifiká. Nos a komprondé tambe ku tur hende mester rekonosé ku Yehova su manera di goberná ta mihó. Pues, tur e dos kuestionnan ei ta importante. Pero akaso nan ta dos kuestion separá ku no ta konektá ku otro? Nò.

3. Kiko e nòmber di Yehova ta abarká?

³ En realidat, e nòmber di Yehova ta abarká tur kos tokante nos Dios, inkluso su manera di goberná. Pues, si nos ta bisa ku santifikashon di Yehova su nòmber ta e kuestion di mas importante, nos ke men tambe ku tur hende mester komprondé ku Yehova su manera di goberná ta mihó. Yehova su nòmber ta estrechamente ligá ku e manera ku e ta goberná komo Soberano todopoderoso.—Wak e kuadro “ Loke Ta Inkluí den e Kuestion Importante.”

4. (a) Kiko Salmo 135:13 ta bisa tokante e nòmber di Dios? (b) Ki pregunta nos lo kontestá den e artíkulo akí?

⁴ Yehova su nòmber ta úniko. (Lesa Salmo 135:13. *) Dikon e nòmber di Dios ta asina importante? Na ki momento e nòmber ei a ser kalumniá pa promé biaha? Kon Dios ta santifiká su nòmber? I kiko nos por hasi pa yuda defendé su nòmber? Nos lo kontestá e preguntanan ei den e artíkulo akí.

5. Ki pregunta algun hende por hasi nan mes?

⁵ Hesus a bisa bon kla kiko mester ta un di e petishonnan  di mas importante den nos orashonnan. El a bisa: “Bo nòmber sea santifiká.” (Mat. 6:9) Kiko e palabranan ei ta nifiká? Santifiká algu ta nifiká hasié santu, limpi òf puru. Algun hende por pensa: ‘Si e nòmber di Yehova ya kaba ta santu, limpi i puru, dikon mester santifik’é?’ Pa kontestá e pregunta ei, nos mester pensa riba tur loke un nòmber ta enserá.

6. Kiko ta hasi un nòmber balioso?

⁶ Nòmber ta mas ku djis algun lèter huntu riba un página òf un palabra ku un hende ta bisa na bos haltu. Wak loke Beibel ta bisa: “Un bon nòmber ta mas di deseá ku gran rikesa.” (Pro. 22:1; Ekl. 7:1) Kiko ta hasi un nòmber asina balioso? Nòmber di un persona ta enserá su reputashon, esta, loke otro hende ta pensa di esun ku tin e nòmber ei. P’esei, e manera ku ta skirbi un nòmber—òf te asta e manera ku ta pronunsi’é—no ta e kos di mas importante. Loke realmente ta importante ta loke ta bini na hende su mente ora nan mira òf tende e nòmber ei.

7. Kon hende a ataká e nòmber di Dios?

⁷ Ora hende ta papia mentira tokante Yehova, nan ta atakando su reputashon. I ora nan ta ataká Dios su reputashon, nan ta purbando di daña su nòmber. E promé atake kontra e nòmber di Dios i su reputashon tabata den Hòfi di Eden. Laga nos wak kiko nos por siña for di loke a pasa.

8. (a) Kiko Adam i Eva tabata sa? (b) Ki pregunta ta lanta?

⁸ Adam i Eva no solamente tabata konosé e nòmber di Yehova, pero tambe hopi bèrdat importante tokante Esun ku tabatin e nòmber ei. Por ehèmpel, nan tabata sa ku Yehova tabata Kreador i ku tur loke nan tabatin—bida, e bunita Paradeis i un kasá perfekto—a bini di Yehova. (Gén. 1:26-28; 2:18) Pero, akaso nan lo a sigui usa nan mente perfekto pa meditá riba tur loke Yehova a hasi pa nan? Akaso nan lo a sigui demostrá amor i gratitut na Yehova? E kontesta a bira bisto ora Dios su enemigu a pone nan na prueba.

9. Segun Génesis 2:16 i 17 i 3:1-5, kiko Yehova a bisa Adam ku Eva, i kon Satanas a duna nan un mal impreshon di Yehova?

 ⁹ Lesa Génesis 2:16, 17; 3:1-5. Satanas a usa un kolebra pa puntra Eva: “Di bèrdat Dios a bisa: ‘Bo no mag kome di ningun palu di e hòfi’?” E pregunta ku Satanas a hasi a kontené un mentira tokante Dios, i Eva a kuminsá pensa malu tokante Dios. Loke Dios realmente a bisa tabata ku nan por a kome fruta di tur palu, ku eksepshon di un palu. E variedat di fruta ku nan por a kome tabata grandi. (Gén. 2:9) Sí, Yehova tabata masha generoso. Sinembargo, Dios a prohibí Adam ku Eva pa kome fruta di un palu. Pues, e pregunta ku Satanas a hasi a trose e bèrdat. E tabata kier a duna nan e impreshon ku Dios no tabata generoso. Kisas Eva a pensa: ‘Di bèrdat, Yehova ta skondiendo algu bon for di mi?’

10. Kon Satanas a kalumniá e nòmber di Dios, i kiko tabata e resultado?

¹⁰ Ora Satanas a hasi e pregunta ei, ainda Eva tabata obedesidu na Yehova. De echo, el a bisa Satanas bon kla loke Dios a bisa: “Boso no mester kome di dje ni mishi kuné.” E tabata sa ku Dios a spièrta nan ku si nan desobedesé, nan lo muri. Pero Satanas a bis’é: “Siguramente boso lo no muri!” (Gén. 3:2-4) E mentira di Satanas no tabata skondí mas. Abiertamente el a kalumniá e nòmber di Dios; tabata komo si fuera el a bisa Eva ku Yehova ta un mentiroso. Di e manera ei, Satanas a bira Diabel, òf kalumniadó. Eva a ser kompletamente gañá; el a kere Satanas. (1 Tim. 2:14) El a pone mas konfiansa den Satanas ku den Yehova, i esei a pone ku fásilmente el a tuma e pió desishon posibel: desobedesé Dios i kome e fruta prohibí. Despues, el a duna Adam tambe.—Gén. 3:6.

11. Kiko Adam ku Eva mester a hasi?

¹¹ Pensa un ratu riba loke Eva mester a bisa Satanas. Imaginá ku el a bisa algu asin’akí: “Tende mi un kos aki kolebra, mi no konosé bo, pero mi konosé mi Tata, Yehova sí. Anto mi ta stim’é i ta konfi’é. Ta é a duna ami ku Adam tur loke nos tin. Ken bo ta kere bo ta pa papia malu di dje? Bai for di aki!” Yehova lo a keda masha kontentu pa skucha e palabranan leal ei di su yu stimá! (Pro. 27:11) Pero, ni Eva ni Adam no tabatin amor leal pa Yehova. P’esei, nan no a defendé e nòmber di nan Tata kontra kalumnia.

12. Kon Satanas a sembra duda den mente di Eva, i kiko Adam ku Eva no a hasi?

¹² Manera nos a mira, e promé kos ku Satanas a hasi ta di sembra duda den mente di Eva. El a pone Eva kuminsá kuestioná e klase di Persona ku ta karga e nòmber Yehova. Despues, Adam ku Eva no a defendé e nòmber i reputashon di  Yehova kontra e mentiranan di Diabel. Nan a laga nan ser influensiá pa Satanas i a uni kuné den e rebelion kontra nan Tata. Awe, Satanas ta usa e mesun táktikanan. E ta plama hopi siñansa falsu tokante Dios i ta kalumniá su nòmber. Hende ku kere e mentiranan ei fásilmente ta rechasá Yehova su derecho di goberná.

13. Kon Ezekiel 36:23 ta resaltá e mensahe prinsipal di Beibel?

¹³ Akaso Yehova ta djis skucha e kalumnianan ei sin hasi nada? Niun ora so! Henter Beibel ta splika loke Yehova a hasi pa demostrá ku loke Satanas a bisa na Eden tabata mentira. (Gén. 3:15) De echo, nos por resumí e mensahe prinsipal di Beibel asin’akí: Yehova ta santifiká su nòmber i ta restorá hustisia i pas riba tera mediante su Reino goberná pa su Yu. Pues si nos lesa Beibel, nos lo komprondé kon Yehova ta santifiká su nòmber.—Lesa Ezekiel 36:23.

14. Apesar di e rebelion na Eden, kon Yehova ta demostrá ku e ta santifiká su nòmber?

¹⁴ Satanas ta hasi tur loke ta den su poder pa stroba Yehova di kumpli ku Su propósito. Pero tur Satanas su táktikanan ta frakasá. Beibel ta indiká kiko Yehova ta hasi i ta demostrá ku no tin niun persona manera Yehova Dios. Ta bèrdat ku e rebelion di Satanas i tur esnan ku ta apoyá Satanas ta kousa Yehova masha doló. (Sal. 78:40) Pero, Yehova ta trata ku e situashon ei ku sabiduria, pasenshi i hustisia. Ademas, e ta demostrá su gran poder na masha hopi manera mes. I riba tur kos, su amor ta bisto den tur loke e ta hasi. (1 Huan 4:8) Sin duda, Yehova nunka a stòp di santifiká su nòmber.

15. Kon te ainda Satanas ta sigui kalumniá e nòmber di Dios, i ku ki resultado?

¹⁵ Te ainda Satanas ta sigui kalumniá e nòmber di Dios. E ta purba di pone hende duda den Dios su poder, hustisia, sabiduria i amor. Por ehèmpel, e ta purba  di konvensé hende ku Yehova no ta Kreador. I si hende ta kere ku Dios ta eksistí, e ta purba di laga nan kere ku tantu Dios komo Su normanan ta inhustu i restriktivo. Te asta e ta siña hende ku Yehova ta un Dios kruel ku ta kima hende den fièrnu. Ora nan kere e kalumnianan ei, ta fásil pa nan rechasá Yehova. Miéntras Satanas ta na bida ainda, lo e sigui kalumniá Yehova. Ademas, lo e purba tur manera pa pone bo bira lomba pa Yehova. Pero lo e logra?

16. Kiko abo por hasi ku Adam ku Eva no a hasi?

¹⁶ Yehova ta permití hende imperfekto yuda santifiká su nòmber. De echo, kada un di nos por hasi loke Adam ku Eva no a hasi. Aunke bo ta biba den un mundu yen di hende ku ta blasfemá i kalumniá Yehova su nòmber, bo tin e oportunidat di defendé Yehova su nòmber i bisa hende ku Yehova ta santu, hustu, bon i ku e ta stima nos. (Isa. 29:23) Bo por demostrá ku bo ta apoyá su gobièrnu. Yuda otro hende komprondé ku ta solamente Yehova su manera di goberná ta bon i ku e gobièrnu ei lo trese pas i felisidat pa nos tur.—Sal. 37:9, 37; 146:5, 6, 10.

17. Kon Hesus a hasi su Tata su nòmber konosí?

¹⁷ Ora nos ta defendé e nòmber di Yehova, nos ta imitá e ehèmpel di Hesukristu. (Huan 17:26) Hesus a hasi e nòmber di su Tata konosí. E no a usa e nòmber di Dios so, pero tambe el a defendé Yehova su reputashon. Por ehèmpel, e fariseonan a pinta Yehova komo un Dios kruel, eksigente, alehá i sin kompashon. Pero Hesus a hasi diferente. El a yuda hende mira ku su Tata ta rasonabel, tin pasenshi, ta stima hende i ta pordoná. I tambe Hesus a imitá e kualidatnan di su Tata perfektamente. Di e manera ei, hende por a komprondé ken Yehova ta realmente.—Huan 14:9.

18. Kon nos por saka e mentira- i kalumnianan tokante Yehova na kla?

¹⁸ Nos por saka e mentira- i kalumnianan tokante Yehova na kla. Kon? Imitando loke Hesus a hasi. Meskos kuné, nos por konta hende loke nos sa tokante Yehova, i laga nan mira ku e ta un Dios amabel ku ta stima nan. Nos tambe por  imitá Yehova. Nos por hasi esei apesar ku nos ta imperfekto. (Efe. 5:1, 2) Tur dia, loke nos ta bisa i hasi mester reflehá e tipo di Dios ku Yehova ta. Ora nos hasi esei, nos ta yuda santifiká su nòmber—nos ta yuda hende mira e nòmber di Dios komo santu. Nos ta vindiká e nòmber di Dios—nos ta yuda hende eliminá idea robes ku nan tin tokante su nòmber. * Ademas, nos ta demostrá ku hende imperfekto por mantené nan integridat.—Yòb 27:5.

19. Di akuerdo ku Isaías 63:7, kiko mester ta nos meta prinsipal ora nos ta dirigí estudio di Beibel?

¹⁹ Wak un otro lès importante. Ora nos ta dirigí estudio di Beibel, generalmente nos ta enfatisá ku Yehova tin derecho di goberná universo. I esei ta totalmente bèrdat. Pero, aunke ta importante pa siña hende e leinan di Dios, nos meta prinsipal mester ta pa yuda nan stima Yehova, nos Tata, i pa nan ta leal na dje. P’esei, semper nos mester resaltá e bunita kualidatnan di Yehova. Mustra nan ki klase di Persona e nòmber di Yehova ta representá. (Lesa Isaías 63:7. *) Ora nos dirigí estudio di Beibel di e manera ei, nos ta yuda nos studiantenan stima Yehova. Asina ei, nan lo ke ta leal na Yehova i obedes’é.

 20. Ki pregunta nos lo kontestá den e siguiente artíkulo?

²⁰ Den e siguiente artíkulo nos lo kontestá e siguiente pregunta: Kon nos por hasi sigur ku nos kondukta i e manera ku nos ta siña hende lo onra e nòmber di Yehova i yuda nan hala serka dje?