LONGO DIA 23
‘Jina Diaye Dinemesewe’
‘O Yehowa, jina diaye mbadikhala ivo nu ivo’.—NGI. 135:13.
LUNGIMBO 10 Louons Jéhovah, notre Dieu!
NDAGA JIDI MU LONGO EDI *
1-2. Ndaga jitshi jiakhala nu ndando gudi Matemue a Yehowa?
NDAGA jia gubalega ndando mukunda nu athu agasue mangino jidi, uhinyinyi wa Nzambi nu guwevewa gua jina dienji. Tuana zumba guzuelela ndaga eji jia ndando handaga tudi Matemue a Yehowa. Uvi, tuajiyilego guzuela egi, uhinyinyi wa Nzambi nu gunemesewa gua jina dienji gudi ndaga mbadi jia gudisha.
2 Mukut’etu agasue tuana jiya egi jina dia Nzambi didi naye guwevewa. Tuana jiya luko egi, uhinyinyi wa Yehowa nu luholo luenji lua gutuameza ludi naye gujiyiwa egi luakhala luawaha. Ndaga eji jiagasue jiakhala nu ndando.
3. Jina dia Yehowa diana gumonesa itshi?
3 Jina dia Yehowa diana gumonesa ima yagasue yatadila Nzambi wetu, nu luholo luenji lua gutuameza. Hene, gula tuazuela egi guwevewa gua jina dia Yehowa gudi ndaga ya ndando, tudi nji muzuela egi luholo luenji lua gutuameza ludi naye gujiyiwa egi luakhala luawaha. Jina dia Yehowa diana wenda diago hamoshi nu luholo luana tuameza muene gifua Fumu ya ngolo jiagasue.—Tala galuanda “ Ndaga Jiatadila Muhu Wabalega Ndando.”
4. Luholo lutshi Ngimbo 135:13 idi muzuelela jina dia Nzambi, nu mihu itshi tuza muzuelela mu longo edi?
4 Jina dia Yehowa diakhala nu ndando yavula. (Tanga Ngimbo 135:13.) Mukunda natshi jina dia Nzambi diakhala nu ndando? Luholo lutshi jina diene diashingiwe giphungu gia thomo? Luholo lutshi Nzambi gadinemesele? Luholo lutshi tuajiya gukuatesa ha gunemesa jina diene? Tutadilenu mvutu jia mihu eyi.
FUNU YA JINA
5. Muhu utshi athu ako ajiya gudihula gu ndaga yatadila gunemesewa gua jina dia Yehowa?
5 ‘Jina diaye dinemesewe.’ (Mat. 6:9) Yesu wamonesele egi ndaga eyi idi mukatshi dia ndaga jia gubalega ndando tuajiya gutoga mu gisambu. Uvi itshi Yesu gatshiginyile guzuela? Gunemesa gima guakotelesa gugibuisa gia gijila nga giaphelegeta. Athu ako ajiya gudihula egi: ‘Jina dia Yehowa diakhalago dia gijila nu diaphelegeta ba?’ Ha guheta mvutu, tudi naye gujiya gula jina diene diana monesa itshi.
6. Itshi yana tshita egi jina dikhale nu ndando?
6 Jina dishigo phamba isona yana gusonegewa ha yiji dia mukanda nu yana gutangewa mu dijui diakola. Tala ndaga Biblia idi muzuela: “Gukhala nu jina diabonga gudi mubalega umonyi wakoma ndando.” (Ish. 22:1; Mulo. 7:1) Mukunda natshi jina diana khala nu ndando? Handaga diana monesa lukuma lua muthu, nu ndaga athu ana tangiza mukunda nu muthu udi nu jina diene. Hene, luholo jina diene diana sonegewa nga luholo ana guditamega luakhalago nu mulonga; mulonga wakhala gu ndaga yana jila athu mu matangi tangua ana guvua jina diene.
7. Luholo lutshi athu abolesele jina dia Nzambi?
7 Tangua athu ana zuela ndaga jiabola mukunda nu Yehowa, ana bolesa diago lukuma luenji. Tangua ana bolesa lukuma luenji, ana shingisa diago jina dienji. Giphungu gia thomo jina dia Nzambi diashingiwe, yakhalele mu dihia dia Edene. Tutadilenu malongo tuajiya gulonguga gu ndaga yene.
LUHOLO JINA DIA NZAMBI DIASHINGIWE THOMO
8. Ndaga itshi Adama na Eva akhalele mujiya, nu mihu itshi tuajiya gudihula?
8 Adama nu Eva akhalele mujiya egi jina dia Nzambi didi Yehowa, nu akhalele nji mujiya ndaga jiavula jiamutadila. Akhalele mujiya egi muene Mufugi wawo, muene waahanele monyo, fundo diabonga dia gujinga nu ulo wawaha. (Gis. 1:26-28; 2:18) Uvi alanduile gutangiza ndaga jiagasue jiaakalegele Yehowa ba? Alanduile gumonesa guzumba nu khadilo dia guhana mersi mukunda nu Yehowa ba? Mvutu jia mihu eyi jiamonegele haphelo (hakanga) tangua mbalagaji ya Nzambi yajile gualola.
9. Ha gutadila Gisendeselo 2:16, 17 nu 3:1-5, ndaga itshi Nzambi gawambelele yala nu mukhetu wa thomo, nu luholo lutshi Satana gaabumbile mambo?
9 Tanga Gisendeselo 2:16, 17 nu 3:1-5. Satana wakalegele nyoga ha guta maga nu Eva, nu wamuhudile egi: “Yadiago Nzambi wamiwambela egi mudigo mabundu a mitshi yagasue idi mu dihia edi ba?” Muhu owu wakhalele nu mambo akhalele gifua puazo. Nzambi waawambelele egi adi naye gudia mabundu a mitshi yagasue, uvi waatunyishile ha gudia phamba mabundu a mutshi umoshi. Adama nu Eva akhalele nu mitshi ya maluholo agudisha yakhalele nu mabundu avula a gudia. (Gis. 2:9) Yehowa wakhala diago Nzambi wahana. Uvi watunyishile Adama nu Eva ha gudia mabundu a mutshi umoshi. Muhu waahudile Satana wakhalele muhu wa mambo. Satana waatumine ha gutangiza egi Nzambi gakhalago wahana. Yajiya gukhala egi Eva wadihudile egi: ‘Gudi nu ndaga Nzambi gadi gungusuegela ba?’
10. Luholo lutshi Satana gashingile jina dia Nzambi, nu mbuto itshi yazolele?
10 Tangua Satana gahudile muhu owu, Eva wakhalele mutumagela Yehowa. Wawambelele Satana mbimbi jiagasue jiaawambelele Nzambi. Wamuwambelele luko egi ashigo naye gukuata mutshi wene. Wakhalele mujiya egi gushiya mukhuala wa Nzambi mbaguabatela gufua. Uvi Satana wavutudile egi: ‘Mambo mbamufuigo.’ (Gis. 3:2-4) Satana gamoneselego phamba egi Nzambi wakhala nu mambo, uvi washingile nji jina dia Nzambi luholo gawambelele Eva egi Nzambi udi muenya mambo. Hene, Satana wabuile diabulu, nga ndo muenya mambo. Eva wahuigiwe; nu wavuile mambo a Satana. (1 Tim. 2:14) Wahagele mutshima gu ndaga jiazuelele Satana uvi gudi Yehowa ndo. Ndaga eyi yatumine Eva ha guzula desizio diabola. Walumbugile mbimbi jia Yehowa. Wadile bundu diaatunyishile Yehowa ha gudia. Gungima wahanele nji Adama.—Gis. 3:6.
11. Ndaga itshi Adama nu Eva akhalele naye gukalagala, uvi itshi akalegelego?
11 Tangiza gale ndaga Eva gakhalele naye guwambela Satana. Gula nga wazuelele egi: “Ngushigo gugujiya, uvi ngajiya phamba Yehowa, muene Tata wami, ngamuzumba nu ngana gumushila mutshima. Muene watuhanele ima yagasue tudi nayo. Mukunda natshi udi muzuela ndaga jiabola mukunda nu muene? Katuga gu meso ami!” Tangiza gusuanguluga Yehowa gakhalele naye guvua ha gutegelela mbimbi jiabonga jidi muzoga gudi mun’enji wa guzumba! (Ish. 27:11) Uvi Eva gamoneselego guzumba gudi Yehowa; nu muene Adama nji luholo lumoshi. Adama nu Eva anemeselego jina dia Yehowa gutuama dia mbalagaji yenji, handaga akhalelego nu guzumba gudi Yehowa.
12. Luholo lutshi Satana gatumile Eva ha gukhala nu ba dute, nu ndaga itshi Adama nu Eva akalegele?
12 Gifua luholo tuayimonyi, Satana watumile Eva ha guhaga ba dute gu mukhuala wa Yehowa. Wahudile Eva muhu umoshi wamutumile ha gudihula gula Yehowa udi diago Tata wabonga. Hene, Adama nu Eva anemeselego jina dia Yehowa tangua Satana gaahuigile. Avuidile gawo Satana hene alumbugile Sh’awo. Mangino, Satana wana kalegela ba metode a luholo lumoshi ha guhuiga athu. Wana gushingana jina dia Yehowa ha gubolesa lukuma luenji. Athu anyi ana gulandula mambo a Satana, ana gutuna utuameji wa Yehowa.
YEHOWA WANEMESELE JINA DIENJI
13. Luholo lutshi Ezekiele 36:23 idi mumonesa lumene lua Biblia?
13 Tangua ashingile jina dienji, Yehowa wahenele genji tedie ba? Ndo sha! Biblia yana monesa luholo Yehowa gakalegele ndaga ha gunemesa jina dienji mukunda nu mambo ambiwe mu dihia dia Edene. (Gis. 3:15) Tuajiya gumonesa lumene lua Biblia mu mbimbi jiazonda: Yehowa wanemesele jina dienji mu njila ya Ufumu udi mutuamezewa gudi Mun’enji, nu mbawuvutula gubonga nu guhuima ha mavu. Mu Biblia mudi nu mene jidi gutukuatesa ha gujiya luholo Yehowa ganemesele jina dienji.—Tanga Ezekiele 36:23.
14. Luholo lutshi Yehowa gahanele mvutu ha gunemesa jina dienji tangua amulumbugile mu dihia dia Edene?
14 Satana wana kalagala yagasue ha gukanga Yehowa njila ha gutaganesa mafelela enji. Uvi ganago gubinga nga hazonda. Biblia idi mumonesa ndaga jiakalegele Yehowa, nu idi mumonesa luko egi phamba muene udi Tata wa guzumba nu mutuameji wawaha. Yadiago, Yehowa wana guvua gikenene giakola luholo Satana nu athu agasue adi gu khanda yenji amulumbugile. (Ngi. 78:40) Wawevele jina dienji nu gutema guagasue, nu guhuiminyina nu nduedi. Wamonesele luko ngolo jienji jiakoma mu maluholo avula. Uvi ndaga ya gubalega ndando idi egi wana gumonesa guzumba mu ndaga jiagasue jiana kalagala muene. (1 Yone 4:8) Yehowa khenji gabembele ndo gunemesa jina dienji.
Satana wambidile Eva mambo mukunda nu Yehowa, nu wana landula gushingana Nzambi uu nu mangino (Tala paragrafe 9-10, 15) *
15. Mangino luholo lutshi Satana gana gushingana Nzambi, nu mbuto itshi yazogele?
15 Muanyo, Satana wana gulandula (gulunduga) nu gushinga jina dia Nzambi. Wana tuma athu ha gutangiza egi Nzambi gashigo nu ngolo, gashigo wabonga, gashigo nu ndunge nu ganago guzumba athu. Ha gufezegesa, Satana wana gutuma athu ha gutshigina egi Yehowa gashigo Mufugi. Uvi gula athu atshigina egi Nzambi wakhala guene, Satana wana guatuma ha gutangiza egi mikhuala ya Nzambi yakhala yakola nu yakhalago yatagana. Wana gulongesa athu egi Yehowa udi Nzambi wa mutshima wabola, nu wana gumonesa athu lamba mu kianga gia tshuya. Gula athu atshigina mambo a luholo elu, ana gukhala hehi ha gutuna utuameji watagana wa Yehowa. Satana mbawushiyiwa, uvi gutuama egi ashiyiwe, muene mbawulandula gushingana jina dia Yehowa nu mbawugutuma nji ha gutuna Yehowa. Muene mbawubinga ba?
NDAGA UDI NAYE GUTSHITA MUKUNDA NU MUHU WABALEGA NDANDO
16. Luholo lutshi wajiya gukalagala ndaga Adama nu Eva akalegelego?
16 Yehowa wahanele njila egi athu anemese jina dienji ngatshima ashigo atagana. Ngenyi, wajiya gukalagala ndaga inyi Adama nu Eva akalegelego. Luholo tudi ha mavu awa a guzala pha nu athu ana gushingana nu gusegulula jina dia Yehowa, udi nu ginemo gia gunemesa jina dia Nzambi, nu gulongesa athu gamba Yehowa udi Nzambi wa gijila, wa ngolo jiagasue, wa guzumba nu wawaha sha. (Yesh. 29:23) Wajiya gumonesa egi wana suanguluga nu utuameji wenji. Wajiya gulongesa athu ha gukotelesa gamba phamba utuameji wa Yehowa udi watagana, wene wajiya guhaga guhuima nu gusuanguluga ha mavu.—Ngi. 37:9, 37; 146:5, 6, 10.
17. Luholo lutshi Yesu gajiyishile athu jina dia Sh’enji?
17 Tuana gulandula gifezegeselo gia Yesu tangua tuana gulongesa athu ha gunemesa jina dia Yehowa. (Yone 17:26) Yesu asugilego phamba ha gujiyisa athu ako jina dia Sh’enji, uvi waalongesele ha gujiya gula Yehowa udi nanyi. Ha gufezegesa, Yesu wabalele (wadingile) Afalese tangua akhalele mutuma athu ha gutangiza egi, Yehowa wakhala Nzambi wabola, wana toga athu ndaga jiakola, wakhala gualeha nu athu nu gakhalago nu khenda. Yesu wakuatesele athu ha gujiya egi Sh’enji wakhala wabonga, wahuiminyina, wana guzumba athu nu wana guatotesela. Wakuatesele nji athu ha gujiya Yehowa, luholo galanduile muabonga makalegelo a Sh’enji mu ndaga jiakhalele mukalagala muene lusugu nu lusugu.—Yone 14:9.
18. Luholo lutshi tuajiya gukatula mambo nu mashingo azuelewe mukunda nu jina dia Yehowa?
18 Tuajiya gulongesa athu ndaga tudi mujiya mukunda nu Yehowa nu gualongesa egi wakhala Nzambi wa guzumba, gifua muatshitshile Yesu. Gula tuatshita ngenyi, mbatukatula mambo nu mashingo azuelewe mukunda nu jina dia Yehowa. Tuana gunemesa jina dia Yehowa, tangua tuana gulongesa athu egi jina dienji diakhala dia gijila. Tuajiya nji gulandula gifezegeselo gia Yehowa. Tuajiya gukalagala ngenyi ngatshima tushigo athu atagana. (Ef. 5:1, 2) Tuana gunemesa jina dia Yehowa, tangua mbimbi jietu nu makalegelo etu ana gukuatesa athu ako ha gujiya jina dienji. Tuana guweva * jina diene tangua tuana gukuatesa athu ha gujiya giamatshidia giatadila jina dia Nzambi. Tuana gumonesa nji egi tuajiya gusala agujinginyina gudi Nzambi ikhale tushigo athu atagana.—Yobo 27:5.
Tuana suanguluga gukuatesa athu tuana gulongesa Biblia ha gukotelesa egi Yehowa udi Nzambi wabonga nu wa guzumba (Tala paragrafe 18-19) *
19. Luholo lutshi Yeshaya 63:7 idi gutukuatesa ha gujiya felela dietu dia thomo tangua tudi mulongesa?
19 Gudi nu ndaga iko tuajiya gukalagala ha gunemesa jina dia Nzambi. Tangua tuana gulongesa athu ako giamatshidia gia mu Biblia, tuana guzuelela muavula uhinyinyi wa Nzambi, ha gumonesa egi Yehowa muene udi watagana ha guhinyina mavu agasue. Uvi, tangua idi mutoga egi tualongese mikhuala ya Nzambi, felela dietu dia thomo diakhala dia guakuatesa ha guzumba Tata wetu Yehowa, nu gusala ya gujinginyina gudi muene. Tudi naye gumonesa makalegelo atagana a Yehowa, nu gumonesa haphelo gula muene udi nanyi. (Tanga Yeshaya 63:7.) Gula tualongesa ngenyi, mbatukuatesa athu ako ha guzumba Yehowa nu gumutumagela handaga ana gukamba gusala ya gujinginyina gudi muene.
20. Ndaga itshi mbatuzuelela mu longo dialandula?
20 Luholo lutshi tuajiya gumonesa mu makalegelelo etu nu mu ndaga tuana gulongesa egi tuana gunemesa jina dia Yehowa nu tuana gutuma athu ako ha gusuena hehi n’enji? Longo dialandula mbadihana kueteya gu muhu wene.
LUNGIMBO 2 Ton nom est Jéhovah
^ par. 5 Ndaga itshi yakhala ya gubalega ndando mukunda nu athu nu anjelo? Itshi yana buisa ndaga yene ya ndando, nu mukunda natshi idi gututadila nji esue? Gujiya mvutu gu mihu eyi mbagutukuatesa ha gukolesa ufuta wetu nu Yehowa.
^ par. 18 Mu ivo yabalega, mikanda yetu yakhalele muzuela egi jina dia Nzambi diajiyilego guwevewa, handaga gushigo nga muthu watunyine gale egi Nzambi gashigo naye gukhala nu jina dia Yehowa. Uvi, tuahetele ukoteleshi uhe-uhe gu Assemblée générale annuelle a mu 2017. Mutuameji wazuelele egi: “Mu guzuela guawaha, ishigo ndaga yabola ha gukombelela gamba jina dia Nzambi diwevewe, handaga lukuma lua jina dia Nzambi ludi naye guwevewa.”—Tala programe ya JW Télédiffusion® ya Janvier 2018 mu jw.org®. Bueta ha BIBLIOTHÈQUE > JW TÉLÉDIFFUSION®.
^ par. 62 UKOTELESHI WA IFUANESA: Diabulu washingile Nzambi, tangua gawambelele Eva egi Nzambi udi muenya mambo. Uu nu mangino, Satana wana gubumba mambo avula gifua: Nzambi wakhala muenya shidi nu ishigo munue wafugile athu.
^ par. 64 UKOTELESHI WA IFUANESA: Phangi mumoshi udi mumonesa makalegelo a Nzambi tangua adi mulongesa muthu Biblia.
