1, 2. ¿Imasmantataj mayta parlanchej?

TUKUY runas yachananku tiyan, Jehová Dioslla gobernananpaj derechoyoj kasqanta. Chantapis mayta suyakushanchej, Jehová Diospa sutin jatunchasqa kananta. Chayrayku chay imasmanta mayta parlanchej. Jinapis chay iskay imasqa, mana waj wajchu kanku.

² Bibliata estudiashaspaqa, Diospa sutin jatunchasqa kanan kasqanta yachakorqanchej. Yachakullarqanchejtaj Jehová Dioslla sumaj Kamachej kasqan, yachakunanpuni kasqanta. Chay yachachiykunataqa, mana pisipajchu qhawana tiyan.

3. ¿Imatataj Jehová suti yachachiwanchej?

³ Jehová suteqa, Diosninchejmanta tukuy imata yachachiwanchej, imaynatachus kamachisqantapis. Chayrayku “Diospa sutin jatunchasqa kanan tiyan” nispaqa, Jehová Dioslla sumaj Kamachej kasqanpis sutʼinchakunan kasqanta nishallanchejtaj. Jehová Diosninchejqa Tukuy Atiyniyoj Kamachej. Sutintaj imaynatachus kamachisqanwan khuskachasqa kashan (“ ¿Imastaj sutʼinchakonqa?” nisqa recuadrota leeriy).

4. 1) ¿Imatataj Salmo 135:13 Jehová Diospa sutinmanta niwanchej? 2) ¿Ima tapuykunamantaj kay yachaqanapi kutichisun?

⁴ Jehová Diospa sutenqa manchay sumajpuni (Salmo 135:13 leey). ¿Imapitaj Diospa sutin piensachiwanchej? ¿Maykʼajmantapachataj Diospa sutin chʼichichasqa karqa? ¿Imatataj Jehová Dios ruwan sutinta llimphuchananpaj? ¿Imaynatá noqanchej yanapakusunman Diospa sutin jatunchasqa kananpaj? Kay yachaqanapi chay tapuykunaman kutichisun.

5. Diospa sutinmanta, ¿imatataj wakin ichá ninchej?

⁵ Jesusqa Diosmanta mañakuyta yachachishaspa, ñaupajtaqa “sutiyki jatunchasqa kachun” nispa mañakunanchejta nerqa (Mat. 6:9). ¿Imatataj Jesús chaywan niyta munasharqa? Wakenqa ichá ninchej: “¿Manachu Jehová Diospa sutenqa tukuy  sutismanta aswan patapiña? ¿Imaraykutaj jatunchasqa kanan tiyanri?”, nispa. Chayta yachanapajqa, imapichus uj suti piensachiwasqanchejmanta parlarina.

6. ¿Imaraykutaj uj suti may valorniyoj?

⁶ Uj suteqa mana papelpi escribinallapajchu, nitaj uj runata chay sutimanta wajyanallapajchu. Bibliaqa nin: ‘Uj sumaj suteqa chayri allinpaj qhawasqa kayqa, aswan allinraj ashkha qorimanta, qolqemantawan nisqaqa’, nispa (Pro. 22:1; Ecl. 7:1). ¿Imaraykutaj uj suti chay jina valorniyoj? Imaraykuchus runasqa, sutinchejta uyarispa imayna runachus kasqanchejpi piensanku. Chayrayku mana anchata llakikunchejchu, imaynatachus runas sutinchejta ninankumanta chayri imaynatachus escribinankumanta. Astawanqa runas noqanchejmanta allinta piensanankuta munanchej.

7. ¿Imata ruwaspataj Diospa sutinta chʼichichanku?

⁷ Pillapis Jehová Diosmanta llullasta parlan chayqa, payta sajrapaj qhawachishan. Chayta ruwaspataj Diospa sutinta chʼichichashan. ¿Maykʼajmantapachataj Diospaj sajrata parlayta qallarerqanku? Runas Edén huertapi kausayta qallarisqankumantapacha. Qhepan parrafospi, chaymanta astawan parlarisunchej.

8. 1) ¿Imastataj Adanwan Evawan yacharqanku? 2) ¿Ima tapuykunaj kutichiynintataj yachasun?

⁸ Adanwan Evawanqa, yacharqanku Diospa sutin Jehová kasqanta, imayna Dioschus kasqantapis. Yachallarqankutaj Diosqa tukuy kaj chhikata ruwasqanta. Jehová Diosqa paykunaman kausayta qorqa, uj kʼachitu huertamantaj churaykorqa. Chantapis Adanmanqa uj sumaj warmita qorqa, Evamanpis uj sumaj qosata qorqa. Paykunataj tukuy chay imasta yacharqanku (Gén. 1:26-28; 2:18). Jinapis, ¿piensarqankuchu imastachus Jehová Dios paykunaman qosqanpi? ¿Kallpachakorqankuchu payta astawan munakunankupaj, agradecekunankupajtaj? Chayta yachanapajqa, Diospa enemigon paykunata pruebaman churajtin imatachus ruwasqankuta qhawarina.

9. 1) Génesis 2:16, 17; 3:1-5 nisqanman jina, ¿imatataj Jehová Dios Adanmanwan Evamanwan nerqa? 2) ¿Imaynatataj Satanás Jehová Diospa nisqanta qʼewerqa?

⁹ (Génesis 2:16, 17; 3:1-5 leey). Satanasqa Evata katarinejta taporqa: “Huertapi kaj tukuynin sachʼaspa poqoyninta ama mikhunkichejchu, nispachu Diosqa nisunkichej?”,  nispa. Satanasqa chayta nerqa, Jehová Diosta sajrapaj qhawachiyta munaspa. Jinapis Jehová Diosqa, mana chaytachu Adanman Evamanwan nerqa. Astawanpis nerqa, tukuynin sachʼasmanta mikhunankuta. Uj sachʼaj poqoynillanta mana mikhunankuchu karqa. Edén huertapeqa tukuy clase sachʼas karqa, may ashkhataj. Paykunataj mayqellanmantapis mikhuyta aterqanku (Gén. 2:9). Jehová Diosqa paykunawan manchay kʼachapuni karqa. Payqa uj sachʼaj poqoynillanta mana mikhunankuta munarqachu. Satanastajrí Jehová Diospa nisqanta waj jinamantaña nerqa. Chay nisqanwantaj Jehová Diosta sajrapaj qhawacherqa. Chayrayku Evaqa ichapis ajinata piensarqa: “¿Imaraykupunitaj Dios mana munanchu chay sachʼaj poqoyninta mikhunaytari?”, nispa.

10. 1) ¿Imatataj Satanás sutʼimanta nerqa? 2) Satanaspa nisqanta creespa, ¿imatataj Eva ruwarqa?

¹⁰ Satanás Evata tapuyta qallarishajtin, Evaqa Jehová Diosta Kamachejninta jinaraj qhawarqa. Imaraykuchus Satanasman nerqa, imatachus Jehová Dios paykunaman kamachisqanta. Eva nerqa: “Huerta chawpipi kaj sachʼallamanta Diosqa niwayku amapuni mikhunaykuta, ni llojchirinallaykutapis. Chaymantachus mikhunkichej chayqa, wañunkichej, niwayku”, nispa. Satanastajrí Evata nerqa: “Chayqa mana jinachu; mana wañunkichejchu”, nispa (Gén. 3:2-4). Satanasqa chayta nispa, Dios llulla kasqanta nisharqa. Payqa sutʼimanta Diospaj sajrata parlaporqa. Ajinamantataj Kuraj Supayman tukorqa. Chay sutitaj niyta munan, “llullakuspa tumpaj”. Evaqa Satanaswan engañachikorqa. Payqa Jehová Diosta creenanmanta, Satanasta creerqa (1 Tim. 2:14). Chayraykutaj Jehová Diosta mana kasorqachu, mana mikhunanchu karqa chay sachʼaj poqoynintataj mikhuykorqa. Chantá Adanmanpis jaywarqa (Gén. 3:6).

11. ¿Imatataj Adanwan Evawan ruwayta atinkuman karqa, chayta ruwarqankutajchu?

¹¹ Eva imatachus Satanasman kutichiyta atisqanpi piensarina. Payqa katariman ajinata niyta atinman karqa: “Qantaqa mana rejsillaykipischu. Tatay Jehovatarí allinta rejsini, maytataj munakuni. Payqa mana llullakuwanmanchu. Tatayqa tukuy imata qowayku. Ama ajina llullasta paymanta parlaychu. ¡Chinkay kaymanta!”, nispa. Eva ajinata Satanasman ninman karqa chayqa, Jehová Diosqa maytachá kusikunman karqa. Evaqa chayta nispa, Jehová Diosta tukuy sonqo munakusqanta rikuchinman karqa (Pro. 27:11). Jinapis Evaqa mana tukuy sonqochu Jehová Diosta munakorqa. Adanpis kikillantaj karqa. Chayrayku Satanás Jehovamanta llullasta parlajtin, paykunaqa mana Tatankuman kutikorqankuchu.

12. 1) ¿Imaynatá Satanás, Evata iskayrayacherqa? 2) ¿Imatataj Adanwan Evawan mana ruwarqankuchu?

¹² Rikunchej jina, Satanasqa Jehová Diosmanta sajrata parlarqa. Ajinamanta Evata iskaychacherqa Jehová Dios sumaj Tata kasqanmanta. Adanwan Evawantaj, mana Tatanku Jehovaman kutikorqankuchu. Chantá Satanasta  creespa, Jehová Diospa contranpi oqharikorqanku. Kay tiempopipis, Satanasqa runasta kikillantataj engañashan. Payqa Jehová Diosmanta llullasta parlaspa, sutinta chʼichichashan. Payta creej runastaj, manaña Jehová Diosta kasukuyta munankuchu.

13. Ezequiel 36:23 nisqanman jina, ¿imamantataj tukuynin Biblia parlan?

¹³ Jehová Dios, ¿saqellarqachu Edén huertapi paymanta llullasta parlanankuta? Mana. Tukuynin Biblia willawanchej, imatachus Jehová Dios sutinta jatunchananpaj ruwasqanta (Gén. 3:15). Chayrayku enteron Biblia uj imallamanta parlan. Chaytaj kay kashan: Jehová Diosqa Gobiernonnejta sutinta jatunchanqa, kay jallpʼamantaj allin kausayta, cheqan kausaytawan apamonqa. Chay Gobiernopitaj Wawan Jesusta Kamachejta jina churan. Bibliaqa willawanchej, imaynatachus Jehová Dios santo sutinta jatunchasqanta (Ezequiel 36:23 leey).

14. ¿Imaynatá Jehová Dios sutinta jatunchan?

¹⁴ Satanasqa Jehová Diospa munaynin mana juntʼakunanpaj, tukuy imata ruwan. Jinapis tukuy chay ruwasqan qhasilla. Bibliaqa Jehová Dios sutinta jatunchananpaj imatachus ruwasqanta willawanchej. Chaytaj rikuchiwanchej, pay jinaqa mana pipis kasqanta. Jehová Diospa sonqonqa mayta nanarqa, Satanás, wajkuna ima contranpi oqharikojtinku (Sal. 78:40). Jinapis Diosqa sutinta jatunchananpaj, yachayninta, paciencianta, cheqan kaynintawan rikucherqa. Chantapis may chhika kutispi jatun atiyninta rikucherqa. Tukuy ima ruwasqanpitaj munakuyninta rikunchej (1 Juan 4:8). Jehová Diosqa sutinta jatunchananpaj tukuy imata ruwashallanpuni.

15. ¿Imaynatá Satanás Diospa sutinta chʼichichashan, runastaj payta creeshankuchu?

¹⁵ Kay tiempopipis, Satanasqa Jehová Diospa sutinta chʼichichashallanpuni. Payqa runasta creechiyta munan, Jehová Dios mana atiyniyojchu, nitaj cheqan Dioschu kasqanta. Chantapis tukuy imata ruwan, runas Jehová Dios yachayniyoj kasqanmanta, munakuyniyoj kasqanmantawan iskayrayanankupaj. Satanasqa runasta creechiyta munallantaj, Jehová Dios mana kasqanta. Diospi creenku chay runastataj, creechiyta munan Diospa  kamachiykunasnenqa mana juntʼay atina, nitaj allinchu kasqanta. Chantapis Satanasqa, runasta creechin Diosqa runasta infiernopi qʼolachisqanta. Chaywantaj Jehová Diosta manchay sajrapaj qhawachin. Chaykunata creej runastaj, mana Jehová Diospa kamachiykunasninta kasukuyta atillankuchu. Satanasqa chinkachisqa kanankama Jehová Diosninchejmanta llullasta parlallanqapuni. Noqanchejtapis paymanta karunchayta munawasun. ¿Saqesunchu karunchanawanchejta?

16. ¿Imastataj ruwasunman?

¹⁶ Pantaj runas kajtinchejpis, Jehová Diosqa sutinta jatunchaypi yanapakunanchejta saqewanchej. Chayrayku imatachus Adanwan Evawan mana ruwayta aterqankuchu, chayta ruwasunman. Kay mundomanta runasqa, Jehová Diosmanta llullasta parlanku, chayri paypaj sajrata rimanku. Noqanchejtaj Tatanchej Jehovaman kutikusunman. Chaypajtaj runasman nisunman, payqa may llimphu, cheqan, kʼacha, munakuyniyoj Diostaj kasqanta (Isa. 29:23). Chantapis Jehová Dios Kamachejninchej kananta munasqanchejta rikuchisunman. Chaytataj ruwasunman, Jehová Diospa Gobiernollan cheqan kajta ruwananta, allin kausaytataj apamunanta willamuspa (Sal. 37:9, 37; 146:5, 6, 10).

17. ¿Imaynatá Jesús Tatanpa sutinta rejsicherqa?

¹⁷ Jehová Diosmanta allinta parlaspaqa, Jesús jina ruwashanchej (Juan 17:26). Jesusqa Tatanpa sutinta runasman rejsicherqa. Chaypajtaj mana Diospa sutillantachu oqharerqa, manaqa imayna Dioschus kasqanta wajkunaman yachacherqa. Fariseosqa Jehová Diosta sajra Diosta jina qhawacherqanku. Paykunaqa runasta yuyachej kanku, Jehovaqa rumi sonqo, mana khuyakuyniyoj, castigayllata yachaj Diostaj kasqanta. Jesustajrí runasman yachacherqa, Jehová Diosqa maychus kajllata noqanchejmanta suyasqanta, pacienciakuwasqanchejta, munakuwasqanchejta, khuyakuwasqanchejtataj. Chantapis Jesusqa Tatan jina may kʼacha karqa. Chayrayku imaynachus Jehová Dios kasqanta kausayninwan rikucherqa (Juan 14:9).

18. ¿Imaynatá rikuchisunman Diospa enemigosninpa nisqanku llulla kasqanta?

¹⁸ Noqanchejpis Jesús jinallataj, wajkunaman willarisunman imatachus Jehová Diosmanta yachasqanchejta. Paykunaman nisunman,  Diosqa manchay munakuyniyoj, kʼachataj kasqanta. Ajinamanta Diospa enemigosninpa nisqanku llulla kasqanta rikuchisun. Runasta Diospa santo sutinta jatunpaj qhawanankupaj yanapaspaqa, paypa sutinta llimphuchanchej. Pantaj runas kaspapis, Tatanchej Jehová Diosman rijchʼakusunman (Efe. 5:1, 2). Parlasqanchejwan kausayninchejwan, imaynachus Jehová Dios kasqanta rikuchina. Chayta ruwaspaqa, Diospa sutin jatunchasqa kananpaj yanapakusun. Runasman Diosmanta cheqa kajta yachachispaqa, Jehová suti paypaj jinapuni kasqanta rikuchinchej. * Chantapis sutʼita rikuchinchej, pantaj runaspis Jehová Diosta tukuy sonqo kasukuyta atisqankuta (Job 27:5).

19. Isaías 63:7 nisqanman jina, ¿imatataj runasman astawan yachachinanchej tiyan?

¹⁹ Jehová Diospa sutin jatunchasqa kananpaj, uj imatawan ruwayta atisunman. Runasman Bibliamanta yachachishaspaqa, Jehová Dios Kamachejninchej kasqanmanta parlanchejpuni. Chayta ruwaspaqa mana pantanchejchu. Imaraykuchus paylla gobernananpaj derechoyoj. Runasman Diospa kamachiykunasninta yachachispapis, payta munakunankupaj, tukuy sonqotaj kasukunankupaj yanapananchej tiyan. Chaypajtaj Diosninchej imayna kʼachachus kasqanmanta astawan yachachinanchej tiyan (Isaías 63:7 leey). Chayta ruwasun chayqa, runasqa Jehová Diosta munakonqanku, tukuy sonqotaj kasukonqanku.

20. ¿Imasmantataj qhepan yachaqanapi yachakusun?

²⁰ Noqanchejqa kausayninchejwantaj, yachachisqanchejwantaj, Jehová Diospa sutinta jatunchayta munanchej. Chantapis runasta payman qayllaykunankupaj yanapayta munanchej. Chayrayku qhepan yachaqanapi, chay imasmanta yachakusun.