1, 2. ¿Testigo de Jehovacunaca imacunamantataj parlanata munanchij?

JEHOVÁ DIOSLLA mandana derechota charishcatami yachana canchij. Jehová Diospaj shuti jatunyachishca cachunmi shuyanchij. Testigo de Jehovacunaca cai yachaicunamanta parlanatami munanchij. ¿Jehová Dios mandana derechota charishcahuan, paita jatunyachinahuanca chꞌicanchu can? Mana.

² Tucuicunami Jehová Diospaj shutita jatunyachina cashcata, pailla alli mandaj cashcata ricuchinata yachashcanchij. Cai ishqui yuyaicunaca valishcami can.

3. ¿Diospaj shutica imallatataj ricuchin?

³ Jehová shutica pai ima shina cashcata pai ima shina mandashcatami ricuchin. Paipaj shutita jatunyachishca cachun nishpaca pailla alli mandaj cashcatami ninchij (“ Jehová Diospaj shutita jatunyachina cashcata ricuchishunchij” nishca recuadrota ricui).

4. a) Salmo 135:13-pica ¿Jehovapaj shutimantaca imatataj nin? b) ¿Cai yachaipica ima tapuicunamantataj yachashun?

⁴ Jehová Diospaj shutica tucuimanta yalli valishcami can (Salmo 135:13-ta liyipai). ¿Imamantataj valishca can? ¿Jehová Diospaj shutitaca pitaj puntapica yanganchirca? ¿Jehová Diosca paipaj shutita jatunyachingapajca imatataj ruran? ¿Paipaj shutita jatunyachingapajca ñucanchijpish imatataj rurana canchij? Cai yachaipimi cai tapuicunamantaca yachashun.

5. ¿Diospaj shutita jatunyachina cashcata uyashpaca maijancunaca imatataj tapurishcacuna?

⁵ Jesusca tucuimanta yallica Jehová Diosta mañacushpaca ‘cambaj jucha illaj shutica, alli nishca cachun nishpa mañanguichij’ nircami (Mateo 6:9). ¿Cai shimicunaca imatataj nisha nin? “Alli nishca cachun” nishpaca limpio cana cashcatami nicun. Pero maijancunaca, “Diospaj shutica ñami limpio, ¿imamantataj cambaj jucha illaj shutitaca alli nishca cachun nina canchij?” nishpachari tapurincuna. Cai tapuita cutichingapajca shuj shuti imallata nisha nishcatami yachana canchij.

6. ¿Shuj shutica imamantataj valishca can?

⁶ Shuj shutica mana maijanta cayangapajllachu o escribingapajllachu can. Bibliapica: “Alli nishca canaca jatun charij canatapish yallimari” ninmi (Proverbios 22:1; Eclesiastés 7:1). Bibliata quillcashca punta shimipica “alli nishca canaca” alli shutita charina nisha ninmi. Alli shutita charinaca ¿imamantataj valishca can? Pipaj shutita uyashpa, liyishpaca chai shutita charij ima shina cashcatami yuyarinchij. Chaimantami shuj alli shutita charinaca valishca can.

7. ¿⁠Jehová Diospaj shutitaca ima shinataj yangapi churashcacuna?

⁷ Gentecuna Jehová Diosmanta llullacunata nishpaca shujtajcunapish Diosmanta mana alli yuyaicunata yuyachunmi pandachincuna. Chaimantami gentecunaca Diosta culpancuna. Jehová Diosmanta gentecuna mana alli yuyaicunata yuyachunca jardín de Edenpimi Jehová Diospaj shutitaca punta cutin yanganchirca. Jardín de Edenpi ima tucushcamantaca ¿imatataj yachanchij?

8. a) ¿Adán y Evaca imallatataj yacharcacuna? b) ¿Paicunamantaca imallatataj tapurinchij?

⁸ Adán y Evaca Diospaj shuti Jehová cashcatami rijsircacuna. Shinallataj paicunaca Jehová Dios tucuita rurashcata, paicunaman causaita cushcata, sumaj paraisota cushcata, alli cusata, alli huarmita cushcatapishmi yacharcacuna (Génesis 1:26-28; 2:18). ¿Adán y Evaca Jehová Dios paicunapaj  imallata rurashcacunapi yuyashpa catircacunachu? ¿Jehová Diosta cꞌuyashpa, paita agradicishpachu catircacuna? Diablo paicunata pandachijpica caicunata mana pajtachishcatami yachanchij.

9. a) Génesis 2:16 y 17 y 3:1 al 5-pi nishca shinaca ¿Adán Evataca Jehová Diosca imatataj nirca? b) ¿Diabloca Adán y Eva Jehová Diosmanta mana allita yuyachunca imatataj nirca?

⁹ (Génesis 2:16, 17; 3:1-5-ta liyipai). Diabloca shuj culebrata parlachishpami Evataca: “¿Cancunataca Taita Diostajchu, cai huertapi tiyaj yuracunamantaca ama micunguichij nirca?” nishpa tapurca. Chai tapuita rurashpaca Diabloca Diosmantami llullarca. Chaimi Evaca Diosmanta mana alli yuyai callarirca. Diosca, tucui yuracunamantami micui tucunguichij. Pero shuj yurallamantami mana micuna canguichij nircami. Adán y Evaca chꞌican chꞌican yuracunamantami micui tucurcacuna (Génesis 2:9). Jehová Diosca paicunamanca mana mitsashpami tucuita curca. Shinapish shuj yurallamantami ama micunguichij nirca. Diablo chashna tapushpaca Dios mitsa cashcata yuyachunmi munarca. Evaca: “¿Diosca imatashi ñucamanca mana cusha nin?” nishpami tapurishcanga.

10. a) ¿Diabloca imata nishpataj Diospaj shutitaca yangapi churarca? b) ¿Diablo llullashcamantaca Adanpish Evapish imatataj rurarcacuna?

¹⁰ Diablo chai tapuita rurai horasca Evaca Diostami cazucurca. Chaimantami Evaca Dios paicunaman imata mandashcata Diabloman cutichirca. Ashtahuanpish “chai yurataca mana tuparinallapishchu canchij” nircami. Paica Dios nishcata mana cazushpaca huañuna cashcatami yacharca. Chaimi Satanasca: “Cancunaca mana huañunguichijchu” nircami (Génesis 3:2-4). Chaita nishpami Dios llullaj cashcata yuyachun Evataca pandachirca. Chashnami Diospaj shutitaca yanganchirca. Shinami Satanasca Diablo, llullaj tucurca. Evaca Diablotami crirca (1 Timoteo 2:14). Evaca Jehová Diospi confianapaj randica Diablopimi confiarca. Chashnami Yaya Diosta mana cazushpa Jehová Dios ama micungui nishca frutata micurca. Qꞌuipaca Adanmanpishmi chai frutata curca (Génesis 3:6).

11. ¿Adán y Evaca imatataj rurana carcacuna?

¹¹ Diabloman Eva ima shina cutichina cashcapi yuyashun. Paica: “Cantaca mana rijsinichu. Ñuca Jehová Diosta sí, alli rijsini. Paitaca achcatami cꞌuyani. Paipimi confiani. Paimi ñucanchijmanca tucuita cushca. ¿Maitataj chaitaca ninguiyari? ¡Ñucamanta anchui! ¡Ama ñucata molestai!” ninami carca. Jehová Diosca paipaj ushushi paita cꞌuyashca cajpi, paita tucuipi sirvishca cajpica cushillami sintirinman carca (Proverbios 27:11). Pero Evapish Adanpish Jehová Diosta cꞌuyashcataca mana ricuchircacunachu. Chaimantami Jehová Diospaj shutitaca mana difindircacuna.

12. a) ¿Diabloca ima shinataj Evataca pandachirca? b) ¿Adanpish Evapish imatataj mana rurarcacuna?

 ¹² Satanasca Jehová Dios mana alli Yaya cashcata crichun nishpami Evamanca llullarca. Shinami Diospaj shutitaca yanganchirca. Adanpish Evapish Diospaj shutita mana difindishpami Satanaspaj llullata crircacuna. Chashnami Jehová Diostaca mana cazurcacuna. Cunan punllacunapipish Diabloca shinallatajmi gentecunata umashpa Diospaj shutitaca yangapi churacun. Diablopaj umashcacunata crishcamantami gentecunaca Diospaj mandashcacunataca mana cazuncuna.

13. Ezequiel 36:23-pi nishca shinaca ¿Bibliapica ima importante yuyaimantataj parlan?

¹³ ¿⁠Jehová Diosca paimanta mana allicunata nijpica imata mana rurashpachu saquirirca? Mana. Bibliapica jardín de Edenpi Diablopaj nishcacuna llulla cashcata ricuchingapaj Jehová Dios imallata rurashcatami huillan (Génesis 3:15). Bibliapica cai yuyaicunamantami parlan: Jehová Diosca paipaj gobiernopimi Jesús mandachun churashca. Pai mandajpimi Diosca paipaj shutita jatunyachi tucun. Shinallataj cai Allpapi cutin tranquilo, sumaj causaitami cui tucun. Bibliapica Yayitu Dios ima shina paipaj shutita jatunyachishcatami intindichin (Ezequiel 36:23-ta liyipai).

14. ¿⁠Jehová Diosca paipaj shutita yangapi churajpica ima shinataj jatunyachishca?

¹⁴ Jehová Dios paipaj munaita ama pajtachichunmi Diabloca huaquin jarcaicunata churashca. Pero Diabloca imata mana rurai tucushcachu. Bibliapica Diablo jarcasha nijpipish Jehová Dios imallata rurashcatami ricuchin. Shinallataj Dios cꞌuyaj, alli mandaj cashcatami ricuchin. Diablopish paita apoyajcunapish Jehová Diospaj shutita yanganchijpimi Diosca dimastij llaquilla sintirin (Salmo 78:40, QC, 1989). Diablo paipaj contra tucujpipish Diosca alli yachaihuan, cashcata ruranahuan, pacienciahuanmi tucuita alli ruraj cashcata ricuchirca. Pai achca poderta charishcataca chꞌican chꞌican ruraicunahuanmi ricuchishca. Ashtahuancarin paica imata  rurashpapish tucuipimi cꞌuyaita ricuchishca (1 Juan 4:8). Jehová Diosca paipaj shutita jatunyachinataca manataj saquishcachu.

15. a) ¿Cunan punllacunapica Diabloca ima shinataj Diospaj shutitaca yangapi churashca? b) ¿Gentecunaca Diablopaj llullacunata crishpaca imatataj rurancuna?

¹⁵ Cunan punllacunapish Diabloca Diospaj shutimantami huaquin llullacunata nin. Paica gentecuna Jehová Dios tucuita ruraj, cashcata ruraj, yachaj, cꞌuyaj cashcata ama crichunmi llullacunata nin. Por ejemplo, Diabloca Dios mana tiyashcata crichunmi gentecunata pandachin. Cutin gentecuna Diospi crijpica Dios mandashcacuna mana alli cashcata, chaicunata pajtachishpaca mana cushilla causana cashcatapish yuyachunmi munan. Shinallataj Jehová Diosca millai gentecunatapish infiernopimi rupachin nishpa yuyachunmi Diabloca pandachin. Gentecunaca cai llullata crishpami Diospaj mandashcacunataca mana cazuncuna. Diablota Jehová Dios tucuchingacamami paica Diosmanta llullacunata nishpa catinga. Ñucanchijpish Yayitu Diosmanta caruyachunmi munanga. ¿Diabloca paipaj munashcata pajtachingachu?

16. ¿Adán, Eva mana pajtachi tucushcataca ima shinataj pajtachi tucunchij?

¹⁶ Adán y Eva mana pajtachi tucushcacunataca cada unomi pajtachi tucunchij. Jehová Diosca juchayuj runacunatami paipaj shutita jatunyachichun saquishca. Ñucanchijca Diosta yangapi churajcunahuanmi causanchij. Chaimantami Jehová Diosca jucha illaj, cashcata ruraj, alli, cꞌuyaj cashcata yachachina canchij (Isaías 29:23). Jehová Dioslla ñucanchijta mandachun munashcatami ricuchina canchij. Tranquilo causaita, sumaj causaitami cunga nishpami gentecunamanca huillanapish canchij (Salmo 37:9, 37; 146:5, 6, 10).

17. ¿⁠Jesusca Jehová Diospaj shutita rijsichingapajca imatataj rurarca?

¹⁷ Diospaj shutita difindishpaca Jesuspaj ejemplotami caticunchij (Juan 17:26). Jesusca Diospaj shutita yachachishpallaca mana saquirircachu. Ashtahuanpish Jehová Dios ima shina cashcatami yachachirca. Por ejemplo, fariseocunaca Jehová Dios ñucanchij mana rurai tucushcata mandaj, ñucanchijta mana  intindij, millai cashcatami yuyachisha nircacuna. Paicuna chashna yuyajpipish Jesusca Jehová Dios ñucanchijta intindij, pacienciata charij, cꞌuyaj, llaquij cashcatami yachachirca. Shinallataj Jesusca punllantami paipaj ruraicunahuan paipaj Yaya ima shina cashcata ricuchirca (Juan 14:9).

18. ¿Diablo, paita apoyajcunapish llullajcuna cashcataca ima shinataj ricuchina canchij?

¹⁸ Ñucanchijpish Jesús shinallatajmi Jehová Dios llaquij, cꞌuyaj cashcata gentecunaman huillana canchij. Chashnami Diablopish paita apoyajcunapish llullaj cashcata ricuchishun. Diospaj shutita jatunyachijpimi Diospaj shuti jucha illaj cashcata yachangacuna. Juchayujcuna cashpapish Jehová Diospaj ejemplotami catina canchij (Efesios 5:1, 2). Ñucanchij rimaicunahuan, ruraicunahuan Jehová ima shina cashcata ricuchishpaca paipaj shutitami jatunyachinchij. Gentecuna Jehová Diosmanta ama panda yuyaicunata charichun ayudashpami Diospaj shutitaca jatunyachinchij. * Ashtahuancarin juchayujcuna cashpapish tucuipi Jehová Diosta cazushpami paita jatunyachinchij (Job 27:5).

19. Isaías 63:7-pi nishca shinaca ¿Bibliamanta estudiota cucushpaca imatataj yachachina canchij?

¹⁹ Jehová Diosta jatunyachingapajca caicunatami rurana canchij: Bibliamanta estudiota cucushpaca Jehová Dioslla mandana derechota charishcatami yachachinchij. Chaica ciertomi can. Dios mandashcacunamanta parlashpapish gentecuna Jehová Diosta cꞌuyachun paita cazuchunmi yachachina canchij. Chaimantami Jehová Dios ima shina cashcata ricuchina canchij (Isaías 63:7-ta liyipai). Caicunata rurajpica gentecunaca Jehová Diostami cꞌuyangacuna y paipaj mandashcacunatapishmi cazusha ningacuna.

20. ¿Catij yachaipica ima tapuicunamantataj yachashun?

²⁰ Gentecuna Jehová Diosmanta alli yuyachun, paipajman cꞌuchuyachunca ¿ima shinataj comportarina canchij? ¿Paicunamanca ima shinataj yachachina canchij? Cai tapuicunamantaca catij yachaipimi yachashun.