1, 2. ¿Imakunamanta rimaymi Jehová Diospa testigonkunata kusichiwanchis?

ALLINTAN yachananchis Jehová Diosllachus kamachikunanpaq derechoyoq icha manachus chayta. Yachanallanchistaqmi sutinpas ch’uyanchasqachus kanan icha manachus chaytapas. Chaykunamanta yachayqa ancha allinpunin Jehová Diospa testigonkunapaqqa.

² Yachasqanchis jina noqanchisqa ch’uyanchananchismi Diospa sutinta, jinaspapas payllatan autoridadninchista jina kasukunanchis. Chay iskay ruwaytan noqanchisqa ancha allinpaq qhawarinanchis.

3. ¿Imatan yachachiwanchis Diospa sutin?

³ Jehová Diospa sutinta ch’uyanchanamanta rimaspaqa, imayna autoridadchus kasqanmantan rimashallanchistaq. Chhaynaqa, “Diospa sutintan ch’uyanchana” nispaqa, “payllan kamachikunanpaq atiyniyoq” nispan nishallanchistaq. Chaymantapas payqa imaninanchus sutin chayman jinan kamachikun (Qhaway “ Diospa sutin ch’uyanchasqa kananmanta astawan yachanapaq” nisqata).

4. a) ¿Imanishanmi Salmos 135:13 Diospa sutinmanta? b) ¿Imakunamantan kaypi yachasunchis?

⁴ Manan pipas Jehová Dios jina sutiyoqqa kanchu (leey Salmos 135:13). ¿Imaraykun Diospa sutin ancha importante? ¿Imaynapin Diospa sutin qhellichasqa karan? ¿Imatan Dios ruwashan sutinta ch’uyanchananpaq? ¿Imatan noqanchispas ruwasunman Diospa sutinta ch’uyanchananchispaq? Chay tapuykunamantan kaypi yachasunchis.

5. ¿Imatan yaqapas Diospa sutinmanta tapukusunman?

⁵ Imayna mañakunanchismanta Jesús yachachishaspan niran: “Sutiyki ch’uyapaq jap’isqa kachun”, nispa (Mat. 6:9). ¿Imaninantan nisharan? Chaypiqa Jehová Diospa sutin ch’uyapaq mana ima qhelliyoq jap’isqa kananmantan rimasharan. Chhaynaqa yaqapaschá tapukushanki: ¿Imaynapitaq Diospa sutinri qhellichasqa kashanman?, nispa. Chaykunata yachananchispaqmi astawan yachananchis Diospa sutinmanta.

6. ¿Imaraykun aswan allin imayna runa kasqanchis?

⁶ Imayna sutiyoq kasqanchisqa allinmi, ichaqa aswan allinqa imayna runa kasqanchismi. Chaymantan Biblia nin: ‘Allinpaq qhawarisqa kayqa, aswan allinraqmi askha qorimantapas, qolqemantapas’, nispa (Prov. 22:1; Ecl. 7:1). Runakunaqa imayna runa kasqanchismantan allinta mana allintapas rimanku. Arí, imamantapas aswan allinqa imayna qhawarisqa kasqanchismi.

7. ¿Imaynatan Diospa sutinta runakuna qhellichashanku?

⁷ Runakunaqa llullakuspan mana allinta Jehová Diosmanta rimanku, chayta ruwaspan Jehová Dios contra jatarishanku, jinaspapas sutintan qhellichashanku. Chaytan Satanaspas ñaupaqta ruwaran Edén huertapi llullakuspa, chhaynapin Diospa sutinqa qhellichasqa karan. Chaymantan astawan yachasunchis.

8. a) ¿Imatan yacharanku Adanwan Evawan? b) ¿Ima tapukuykunatan yaqapas ruwakusunman?

⁸ Adanwan Evawanqa allintan reqsiranku Jehová Diosta sutintapas. Jehová Diosmi paykunataqa kamaran, jinaspapas juj sumaq huertatan qoran chaypi kusisqa tiyanankupaq, paykunaqa yacharankun imaymanata Jehová Dios qosqanta (Gén. 1:26-28; 2:18). Ichaqa, ¿yuyaymanarankuchu tukuy imaymana chaskisqankupi? ¿Kallpachakurankuchu Jehová Diosta munakushanallankupaq? Manan.

9. Génesis 2:16, 17 chaymantapas 3:1-5 nisqanman jina, ¿ima niranmi Jehová Dios Adanman Evamanwan, ichaqa ima niranmi Satanás?

⁹ (Leey Génesis 2:16, 17; 3:1-5). Satanasqa juj mach’aqwayta rimachispan Evata niran: “¿Dioschu nirasunkichis: Aman  mijunkichischu huertapi llapa sach’a ruruta, nispa?” Chhaynata tapusqanwanmi Satanasqa llullakusharan Evata urmachiyta munaspa. Edén huertapiqa imaymana frutakunachá karan mijunankupaqqa. Jehová Diosqa niranmi Adanta Evatapas llapa sach’aq rurunta mijuy atisqankuta, ichaqa juj sach’aq rurullatan mana mijunankuchu karan (Gén. 2:9). Satanaspa imayna tapusqanwanmi mana allinpaq Jehová Diosta qhawarichisharan, chaychá Evaqa iskayayta qallariran. Ichaqa Jehová Diosqa Adanta Evatawan munakuspan imaymanata paykunaman qoran.

10. ¿Ima nispan Satanás Jehová Diosta llullamanta tumpasharan? ¿Imatan ruwaranku Adanpas Evapas?

¹⁰ Evaqa allintan yacharan Jehová Diospa kamachikuyninkunataqa. Chaymi Satanasta niran: “Huertapi sach’akunaq ruruntaqa atiykun mijuyta, huerta chaupipi kaq sach’a rurullatan manaqa, Diosmi niwaranku: Aman chaytaqa mijunkichischu, amallataq llamiykunkichispaschu, mana chayqa wañunkichismi”, nispa. Chhaynata Eva kutichiqtinmi Satanasqa niran: “Manapunin wañunkichischu”, nispa (Gén. 3:2-4). Chay nisqanwanmi Satanasqa Jehová Diosta llullamanta tumpasharan. Jinaspapas Evatan engañaran (1 Tim. 2:14). Adanwan Evawanqa Satanasta creespan ‘allin kaqta mana allin kaqta reqsichiq sach’aq rurunta mijuranku’, chhaynapin Jehová Dios contra juchallikuranku (Gén. 3:6).

11. ¿Ima nispan Eva yaqapas Satanasman kutichiyta atinman karan?

¹¹ Satanasta Eva kasukunanmantaqa ninmanmi karan: “Qantaqa manan reqsiykichu, taytay Jehová Diostan ichaqa allinta reqsini. Paymi imaymanata noqamanpas qosaymanpas qowanku. Chaymi paytaqa anchatapuni munakuni. ¿Imanaqtinmi mana allinta taytaymanta rimanki? ¡Manan qanwanqa rimaymanchu!”, nispa. Chhaynata Eva kutichiqtinqa anchatachá Jehová Diosqa kusikunman karan (Proverbios 27:11). Ichaqa Adanwan Evawanqa manan Jehová Diostaqa munakurankuchu, chaymi Jehová Dios contra jatariranku.

12. ¿Imaynatan Satanás Evata iskayachiran? ¿Imatan mana Adanpas Evapas ruwarankuchu?

¹² Yachamusqanchis jina, Satanasqa mana allintan Jehová Diosmanta rimaran. Chaymi Adanpas Evapas Jehová Diosmanta iskayaranku. Jinaspa Satanasta kasukuspa Jehová Dios contra jatariranku. Kay tiempokunapipas Satanasqa Jehová Dios contra jatarinanchistan munan. Chaymi mana allin yachachikuykunawan engañayta munawashanchis, chhaynapi Jehová Diosta ama kasukunanchispaq.

13. Ezequiel 36:23 nisqan jina, ¿imamantan Biblia rimashan?

¹³ ¿Imatan Jehová Dios ruwaran Satanás yanqamanta tumpaqtin? Bibliapin qelqachiran Satanás llulla kasqanta (Gén. 3:15). Chaymantapas Biblian willashan Diospa gobiernonpi sutin ch’uyanchasqa kananta, kay pachaman thaj kay apamunantapas. Jinaspapas Bibliaqa astawanmi willawanchis imaynatas Jehová Dios sutinta ch’uyanchanqa chayta (leey Ezequiel 36:23).

14. ¿Imaynatan Jehová Dios sutinta ch’uyancharan?

¹⁴ Imaymanataña Satanás ruwaran chaypas manan jark’ayta atiranchu Jehová Diospa munaynin junt’akunantaqa. Bibliaq nisqan jina, Jehová Diospa llapa ruwasqanpas allinpunin. Maytachá Jehová Diospa sonqonqa nanaran Satanaspas runakunapas contranpi jatarishaqtinkuqa (Sal. 78:40). Chaywanpas Jehová Diosqa allin yachaywan, pacienciawanmi, chaninta tukuy imatapas ruwaran. Chhaynapin sutinta ch’uyancharan. Jinaspapas imaymanapin atiyniyoq kasqanta, munakuq kasqanta ima rikuchiran (1 Juan 4:8). Kunanpas Jehová Diosqa llank’ashallanmi sutin ch’uyanchasqa kananpaq.

15. ¿Imaynatan Satanás kay tiempokunapipas Jehová Diospa sutinta qhellichashan?

¹⁵ Kay tiempokunapipas Satanasqa mana allin yachachikuykunawanmi Jehová Diosta tumpashan. Runakunatan iskayachiyta munashan Jehová Dios atiyniyoq, chanin, munakuyniyoq ima kasqanmanta. Satanasqa manan munanchu runakuna Diosmanta yachanankuta. Diosmanta yachankuña chaypas pantasqata yachanankutan munan. Satanasqa “Diosqa raurashaq ninapin runakunata castigan” nisqa yachachikuypi creenanchistan munan. Satanasqa imaymanatan ruwashan Jehová Diosmanta t’aqawananchispaq, sutintapas qhellichananpaq. Chhaynaqa, ¿imatan ruwananchis?

16. ¿Imatan Adanpas Evapas mana ruwarankuchu? ¿Imatan noqanchis ruwasunman?

¹⁶ Runakunaqa atisunmanmi Jehová Diospa sutin ch’uyanchasqa kananpaq yanapakuyta. Yachamusqanchis jina Adanpas Evapas manan Jehová Diostaqa defienderankuchu. Noqanchismi ichaqa Jehová Dios ch’uya, munakuq, chanin Dios kasqanta yachachinanchispaq kallpachakunanchis (Is. 29:23). ¿Imaynatan chayta ruwasunman? Jehová Diosta kamachikuqninchista jina kasukuspa, runakunamanpas gobiernonmanta willaspa. Arí, willananchismi Diospa gobiernollan kay pachaman thaj kausayta, wiñay kausayta ima apamunanta (Sal. 37:9, 37; 146:5, 6, 10).

17. ¿Imaynatan Jesús Jehová Diosta defienderan?

¹⁷ Jesusqa Jehová Diostan defienderan, chaytan noqanchispas ruwananchis (Juan 17:26). ¿Imaynatan Jesús Jehová Diosta defienderan? Diospa sutinta runakunaman willaspa, imayna Dios kasqanta yachachispa ima. Fariseokunaqa Jehová Diostan qhawarichiranku mana munakuqta, mana khuyapayakuqta jina. Jesusmi ichaqa yachachiran Jehová Diosqa ancha munakuq, khuyapayakuq, mana usqhaylla phiñakuq kasqanta. Chaymantapas Jesusqa imayna kausasqanwanmi rikuchiran Jehová Dios munakuq kasqanta (Juan 14:9).

18. ¿Imaynatan rikuchisunman Jehová Dios ch’uya Dios kasqanta?

¹⁸ Noqanchispas kallpachakunanchismi Jehová Diosmanta, munakuq kasqanmantawan runakunaman willamunanchispaq. Chhaynapin llulla yachachikuykunata sut’iman orqosun, Jehová Diospa sutintataq ch’uyanchasun. Chayta ruwasun chayqa runakunapas ch’uya Diosta jinan qhawarinqaku. Juchasapaña kanchis chaypas kallpachakunanchismi imayna kausasqanchiswan Jehová Diosta jatunchananchispaq (Efes. 5:1, 2). Runakunaqa imayna kausasqanchista imayna rimasqanchistawanmi astawanqa qhawanku. Chaymi kallpachakunanchis Jehová Diospa munayninman jina kausananchispaq, chayta ruwasun chayqa paykunapas Jehová Diostan  jatunchanqaku. Noqanchispas junt’aq sonqo kasun chayqa Jehová Diospa sutintan jatunchasunchis (Job 27:5). *

19. Isaías 63:7 nisqan jina, ¿imatan astawan runakunaman Jehová Diosninchismanta yachachinanchis?

¹⁹ ¿Imatawanmi ruwananchis Jehová Diospa sutinta ch’uyanchananchispaq? Yachachisqanchis runakunatan yanapananchis Jehová Diosta astawan munakunankupaq. Chaymi Bibliamanta yachachispaqa reparachinanchis Jehová Diosqa munakuq, khuyapayakuq, chanin Dios kasqanta (leey Isaías 63:7). Jehová Dios imayna kasqanta runakunaman yachachisun chayqa, paytan munakunqaku. Jinaspapas Jehová Diospaqmi junt’aq sonqo kanqaku.

20. ¿Ima tapuykunatan qatimuq yachachikuypi kutichisunchis?

²⁰ ¿Imaynatan kausayninchiswan yachachisqanchiswanpas Jehová Diosta astawanraq jatunchasunman? ¿Imaynatan kausayninchiswan yachachisqanchiswanpas runakunata yanapasunman Jehová Diosman qayllaykunankupaq? Chay tapuykunamanmi qatimuq yachachikuypi kutichisunchis.