1, 2. Testigocunaca ¿ima temacunamandata parlanata gushtapanchi?

TUCUI gentecunami Jehová Dioslla cai mundota mandana derechota charishcata yachana can. Ñucanchicunaca Jehovapa shuti santificado cachunmi munapanchi. Cai temacunamanda gentecunahuan parlanataca testigo de Jehovacunaca ninandami gushtapanchi. Jehovalla mandana derechota charishcamandami paipa shutipash santificado cachun munapanchi.

² Tucuilla Testigocunaca Jehová Diospa shuti santificado cana cashcata, pailla ali mandana derechota charishcatapash alimi yachapanchi. Caicunamanda yachajunaca minishtirishcapachami can.

3. Jehová shutica ¿imatata ricuchin?

³ Jehová shutica pai imashina cashcata, pailla cai mundota mandana derechota charishcatapashmi ricuchin. Jehová Diospa shutita santificana nishpaca, pailla ali mandana derechota charishcata ricuchina cashcatami ninajupanchi (“ ¿Imamandata Jehová shutica na santificado quidashca?” nishca recuadrota ricupangui).

4. a) Salmo 135:13​pica ¿imatata Jehová shutimandaca nin? b) Cai temapica ¿ima tapuicunamandata yachajupashun?

⁴ Jehová shutitaca nipipash na charinllu (Salmo 135:13, liingui) *. Jehová shutica ¿imamandata alipacha can? Chai shutitaca ¿pita primeropachaca yangapi quidachirca? Jehová Diosca paipa shutita santificangapaca ¿imatata rurashca? Jehovapa  shutita santificangapaca ¿imatata rurai ushapanchi? Cai temapimi cai tapuicunamandaca yachajupashun.

5. Jehová shutita santificanamandaca ¿imatata huaquingunaca tapurita ushanman?

⁵ Jesús cai alpapi cashpaca cashna mañana canguichi nishpami yachachirca. Paica nircami: “Cambaj jucha illaj shutiguca, alicachi [o santificado] tucushca cachun” nishpa (Mat. 6:9). Santificana nishpaca ¿imatata nisha nin? Santificana nishpaca ima pandapash illaj cachun nisha ninmi. Huaquingunaca cashnami tapuri ushanman: “¿Nachu Jehová Diosca ima pandapash ña illaj can? ¿Imamandata santificanaca minishtirin?” nishpa. Caita ali intindingapaca shuj shuti imacunatalla ricuchishcata yachajupashunchi.

6. Shuj shutita uyashpaca ¿imatata ñucanchi yuyaimanga shamun?

⁶ Ñucanchicuna pitapash shutipi parlashpalla o paipa shutita papelpi escribishpallaca paita rijsinipachami nitaca na ushapanchichu. Bibliapica ninmi: “Alicachi tucunaca, ninan charij canatapash ashtahuan yali alimari” can nishpa (Prov. 22:1; Ecl. 7:1). Shuj personapa shutita uyashpaca chai persona imashina cashcatami ñapash ñucanchi yuyaimanga shamun. Shinaca shuj personapa shutita aliguta pronunciana o escribinaca na importante canllu. Chaipa randica chai personamanda shuj gentecuna imata yuyashcata yachanami ashtahuan importante can.

7. Jehová Diospa shutihuanga ¿imata pasashca?

⁷ Pipash Jehovamanda llullacunata nishpaca Jehová shutitami nalicachishpa yangapi churajun. Jardín de Edenbimi Jehovapa shutitaca llullacunata nishpa yangapi quidachirca. Chaipi ima pasashcata yachajupashunchi.

8. a) Adán y Evaca ¿imatata ali yacharca? b) Paicunaca ¿imapita na pensarinajurca?

⁸ Adán y Evaca Jehovapa shutitaca alimi yacharca. Jehová paicunaman causaita carashcata, jardín de Edenbi causachun saquishcata, shuj jucha illaj cumbaguta carashcatapash paicunaca alimi yacharca (Gén. 1:26-28; 2:18). Shinapash ¿Jehová Dios paicunamanda imacunatalla rurashcapichu pensarinajurca?  ¿Jehová Diosta ashtahuan juyanapi, paita agradicinapichu paicunaca pensarinajurca? Na, paicunapa ruraicunahuanga na chaicunapi pensarinajushcatami paicunaca ricuchirca.

9. a) Génesis 2:16, 17; 3:1-5​pi nishca shinaca ¿imatata Jehová Diosca Adán y Evataca mandarca? b) Diabloca ¿imatata Jehová Diosmandaca nirca?

⁹ (Génesis 2:16, 17; 3:1-5, liingui). Shuj culebrata utilizashpami Diabloca Evataca cashna tapurca: “¿Taita Dioschu cangunataca: ‘Huertapi tucui yuracunamandaca, na micunachu canguichi’ nirca?” nishpa. Shina tapujpimi Evaca ishcai shungu tucurca. Jehová Diosca tucui yuracunamanda micunallami canguichi nishcarcami. Shinapash shuj yuramandallami na micuna canguichi nirca. Jardín de Edenbica ashtaca ashtaca yuracunami tiarca. Chaimi paicunaca ima munashcata micunalla carca (Gén. 2:9). Chaica ricuchinmi Jehová Diosca paicunahuan na mitsa cashcata. Shina carashpapash Jehová Diosca shuj yuramandaca na micunachu canguichi nishpami mandarca. Shinaca Diablo Evata shina tapushpaca, Jehová Dios llullaj, mitsa cashcatami ricuchijurca. Chaita uyashpami Evaca tapuririanga “¿ciertopachachu Jehová Diosca ali causachun munan?” nishpa.

10. a) Diabloca ¿imatata Jehovamandaca nirca? b) Shina rurashcamandaca ¿imata pasarca?

¹⁰ Evaca Jehovalla mandana derechota charishcataca alimi yacharca. Chaimi Jehová Dios mandashcata yarishpa Evaca chai yurata na tacarina cashcatapash Diablomanga nirca. Evaca Jehová Diosta na cazushpaca huañuitapash huañuna cashcataca alimi yacharca. Chaita uyashpami Diabloca cashna nirca: “Na huañunguichica” nishpa (Gén. 3:2-4). Shina nishpami Diabloca Jehovamanda llullacunata nishpa Jehová Diospa shutita yangapi quidachirca. Shinami Satanás Diablo tucurca. Evaca Diablo paita umachichunmi saquirca (1 Tim. 2:14). Evaca Jehová Diospi confianapa randica Diablotarami crirca. Shina rurashpaca paipa causaipi nalitapacha rurashcatami ricuchirca. Jehovata na cazurca, ama micunguichu nishca yuramandapash micurca. Pai micushca jipaca paipa cusa Adanmanbashmi curca (Gén. 3:6).

11. ¿Imatata Adanbash, Evapash rurana carca?

¹¹ Diablo shina nijujpi Eva imata ni ushashcapi pensaripashunchi. Evaca cashnami nita ushanman carca: “Candaca na rijsinica. Jehová Dios ñuca Taitataca alipachami rijsini. Paitaca ninandami juyani. Paipimi tucui shunguhuan confiani. Paimi ñucanchimanga tucui tucuita carashca. ¿Imashpata Jehová Diosmandaca cashnapacha llullacunata nijungui? Ama molestahuaichu” nishpa. Shina nishpaca Jehovata tucui shunguhuan juyashcatami ricuchinman carca. Chaita uyashpaca Jehová Diosca ninandami cushijunman carca (Prov. 27:11). Shinapash Adanbash, Evapash Jehová Diosta tucui shunguhuan juyashcataca na ricuchircachu. Chaimi Jehovamanda Diablo llullacunata nichun saquirca.

12. a) Diabloca ¿imata nishpata Evataca pandachirca? b) Adanbash, Evapash ¿imatata na rurarca?

¹² Imashinami ricupashcanchi, Diabloca Jehová Diosmanda llullacunatami nirca. Chai llullacunata crishpami Evaca ishcai shungu tucushpa Jehovataca paipa Taitatashnaca ñana ricurca.  Shinami Adán y Evaca Diablopa nishcacunata crishpa Jehovapa contracuna tucurca. Cunanbipashmi Diabloca imacunatapash nishpa Jehovapa shutita llullapi quidachijun. Chai llullacunata crishpami gentecunaca Jehovalla mandana derechota charishcata na apoyangapaj munan.

13. Ezequiel 36:23​pica ¿imatata nijun?

¹³ Jehová Diosca Diablo llullacunata nishpa catichunga na saquircachu. Chaimi Bibliapica jardín de Edenbi Diablo llullajushcata ricuchingapaj Jehová Dios imata rurashcata yachachin (Gén. 3:15). Jehová Dios paipa Reinota paipa Churipa maquipi saquishpa paipa shutita santificashcatami Bibliapica ricuchin. Shinami casilla ali causanatapash cutin cai alpaman apamunga. Bibliata liishpami Jehová Dios paipa shutita santificangapaj imata rurajushcata intindi ushapashun (Ezequiel 36:23, liingui).

14. Jehová Diosca paipa shutita santificangapaca ¿imatata rurashca?

¹⁴ Diabloca Jehovapa munai ama pactarichunmi imatapash rurashca. Shinapash Jehovapa munai pactarichunga na jarcaita ushashcachu. Bibliapica Jehová Dioshna nipi na tiashcatami yachachin. Diablopash, paita catijcunapash Jehovapa contra tucushcata ricushpaca Jehová Diosca llaquillapachami sintirin (Sal. 78:40). Pero Jehová Diosca ali yachaj, pacienciata charij, alita ruraj Dios caimandami paipa shutita santificangapaca ali ali pensarishpa imatapash rurashca. Shinallata Jehová Diosca ashtaca cosascunata rurashpami juyaj Dios cashcata ricuchishca (1 Juan 4:8). Shinaca Jehová Diosca paipa shutita santificanataca nunca na saquishcachu.

15. a) Cunanbipash Diabloca ¿imatata Jehovamandaca nijushca? b) Gentecuna chai llullacunata crimandaca ¿imata pasashca?

¹⁵ Cunangamanmi Diabloca, Jehovapa shutitaca llullacunata nishpa nalipi quidachijushca. Diabloca gentecunaman Jehová Dios gentecunata na juyashcata, poderta na charishcata, nalita ruraj cashcata, na ali yachaita charishcatami crichishca. Shinallata Taita Diosca na tianllu nishpapashmi Diabloca gentecunataca crichishca. Cutin gentecuna Taita Dios tiashcata crijpica, Taita Diospa mandashcacunaca na pactachi ushanalla cashcata, ñucanchi munaitapash na rurachun saquijlla cashcatapashmi Diabloca crichingapaj munan. Shinallata Taita Diosca  gentecunataca shuj infiernopimi rupachin nishpapashmi Diabloca gentecunata crichishca. Cai llullacunata crimandami gentecunaca Taita Dioslla mandana derechotapash na apoyashca. Diabloca cai alpapi causajushcacamanga Taita Diosta quiquinbash ama sirvichunmi llullacunahuan umachingapaj munanga. ¿Paipa nishcahuanllu llujshinga?

16. Adanbash, Evapash ¿imatata na rurarca?

¹⁶ Juchayu gentecuna cajpipash Jehová Diosca paipa shutita santificachunmi ñucanchimanga saquishca. Ñucanchicunaca Adanshna, Evashna cangapaca na munapanchichu. Paicunaca Taita Diospa shutitaca na difindircachu. Cai mundopi gentecunaca llullacunata nishpami Taita Diospa shutitaca nalipi quidachinajun. Shinapash ñucanchicunaca Taita Diospa shuti ima pandapash illaj, Taita Dios alita ruraj cashcata, juyaj Dios cashcatapash parlana oportunidadtami charipanchi (Is. 29:23). Ñucanchicunaca Jehová Dioslla mandana derechota charishcatami apoyaita ushapanchi. Chaipaca gentecunamanga Jehová Dioslla mandana derechota charishcata ricuchunmi villachishpa ayudaita ushapanchi. Shinallata casilla, ali causaiguta mundo enteropi gentecunaman apamuna cashcatapashmi villachita ushapanchi (Sal. 37:9, 37; 146:5, 6, 10).

17. Taita Diospa shutimanda yachachingapaca ¿imatata Jesusca rurarca?

¹⁷ Jehová Diospa shutita difindishpaca Jesuspa ejemplota catinajushcatami ricuchipanchi (Juan 17:26). Jesús cai Alpapi cashpaca siempremi paipa Taitapa shutimanda parlan carca. Jehová Dios imashina cashcatapashmi ricuchirca. Por ejemplo, fariseocunaca, Jehová Diosca gentecunataca mandaitalla mandaj cashcata, na intindij cashcata, millai cashcata, na juyaj Dios can nishpami yachachin carca. Shinapash Jesús chaicunata uyashpaca, Jehová Diosca na shinachu can nishpami gentecunamanga ali intindichirca. Jehová Diosca juyaj, pacienciata charij, gentecunata ali intindij, llaquij Dios cashcatami yachachirca. Shinallata paipa causaihuanmi Jehová Dios imashina cashcata ricuchirca (Juan 14:9).

18. ¿Imata rurashpata Diablo llullaj cashcata ricuchi ushapanchi?

¹⁸ Jesús cuendami ñucanchicunapash Jehová Dios juyaj, na mitsaj Dios cashcata gentecunamanga parlaita ushapanchi. Shina parlashpami  Diablo llullaj cashcata ricuchi ushapanchi. Shinallata villachishpami Jehová Diospa shutita santificaitapash ushapanchi. Ñucanchicuna juchayucuna cashpapash Jehovapa ejemplota catita ushapanchimi (Efes. 5:1, 2). Ñucanchi nishcacunahuan, ruraicunahuanmi Jehová Dios imashina cashcata ricuchi ushapanchi. Shinami paipa shutita santificaita ushapanchi. Shinallata villachishpami gentecuna Jehovamanda llullacunata ama crichunbash ayudaita ushapanchi. * Shinallata juchayucuna cashpapash Jehovatalla tucui shunguhuan sirvi ushashcatapashmi ricuchi ushapanchi (Job 27:5).

19. Isaías 63:7​pi nishca shinaca Bibliamanda yachachijushpaca ¿imatata ashtahuanbachaca rurana capanchi?

¹⁹ Jehovapa shutita santificangapaca Bibliamanda yachachijushpami Jehovalla mandana derechota charishcata yachachina capanchi. Jehovapa mandashcacunata yachachina minishtirishca cajpipash, Jehovata juyachun, paitalla tucui shunguhuan sirvina munaita charichunmi ayudana capanchi. Chaimi Jehová Dios imashinapacha cashcata, paipa shutipash imata ningapaj munashcatami parlana capanchi (Isaías 63:7, liingui). Shina yachachijpimi gentecunaca Jehovata juyashpa, cazushpa tucui shunguhuan paitalla sirvingapaj munanga.

20. Cati temapica ¿ima tapuicunamandata yachajupashun?

²⁰ ¿Imashinata ñucanchi causaihuan, ñucanchi yachachishcacunahuanbash Jehovapa shutita santificaita ushapanchi? Shinallata ¿imashinata shuj gentecunapash Jehovata rijsishpa paita sirvichun ayudaita ushapanchi? Cati temapimi cai tapuicunamandaca yachajupashun.