1-2. Eaa te au tumu manako e reka ana te Au Kite o Iehova?

E AU māroanga puapinga ta tatou i teia rā—te tu ngateitei e te akatapu anga. Ei Au Kite no Iehova, e reka ana tatou i te uriuri i teia tumu manako. Inara, e nga māroanga takake ainei teia—te tu ngateitei o te Atua e te akatapu anga i tona ingoa? Kare!

² Te kite nei tatou e kia akatapuia te ingoa o te Atua. Kua apii katoa tatou e e mea meitaki te tu ngateitei o Iehova e tana tutara anga. Ka anoanoia tatou kia akangateitei i te reira.

3. Eaa te kapiti maira ki te ingoa, Iehova?

³ I roto i te ingoa, Iehova, te ō maira te au mea ravarai no runga i to tatou Atua, kapiti mai tana tutara. Me karanga tatou e e māroanga puapinga rava te akatapu i to Iehova ingoa, te karanga ra tatou e na Iehova te tutara meitaki roa atu. Piri atu to Iehova ingoa ki tana tutara anga ei Tutara mana katoatoa.—Akara i te pia “ Te au Tuanga o te Māroanga Puapinga.”

4. Eaa ta Salamo 135:13 e karanga ra no te ingoa o te Atua, e eaa te au uianga ka pauia i teia atikara?

⁴ E ingoa akaperepereia a Iehova. (E tatau ia Salamo 135:13.) Eaa i puapinga ai to te Atua ingoa? Akapeea te reira te akakinoia anga? Akapeea te Atua te akatapu anga i te reira? E akapeea tatou me paruru i tona ingoa? Ka pau tatou i teia au uianga?

5. Eaa ta tatou ka ui me akatapu i te ingoa o te Atua?

⁵ “Kia tapu toou ingoa.” (Mata. 6:9) Ta Iesu teia i tuatua e ko te mea puapinga maata. Eaa te aiteanga o ta Iesu tuatua? Kia akatapu, kia akariro i te reira ei mea tapu, mā, e te tiama. Penei ka manako tetai pae, ‘Kare ainei kua tapu, mā, e te tiama takere to Iehova ingoa?’ Ei pauanga, ka uriuri tatou eaa to roto i te ingoa.

6. Eaa i puapinga ai te ingoa?

⁶ Kare te ingoa i tetai kupu te ka tataia me kore ka tuatuaia. Karanga te Pipiria: “E ngari ake te rongo meitaki i te apinga maata ra.” (Mase. 22:1; Kohe. 7:1) Eaa i puapinga ai te ingoa? No te mea te ō maira tona tu, tei matauia e tetai pae no tona ingoa. Me tataia tetai ingoa—e me tuatuaia te reira—kare ïa i te mea puapinga; te mea puapinga, eaa ta te tangata e manako ra me kite e me rongo ratou i te reira ingoa.

7. Akapeea te tangata te akakino anga i te ingoa o te Atua?

⁷ Me pikikaa te tangata ia Iehova, te akakino ra ratou i tona tu. Me akakino ratou i tona tu, te akakino ra ratou i tona ingoa. Te akakino anga mua ki te ingoa o te Atua e tona tu, kua tupu te reira i te aua o Edene. Akamanako ana i ta tatou ka apii mei teia akakino anga.

8. Eaa ta Adamu e Eva i kite, e eaa te uianga ka uiia?

⁸ Kite meitaki a Adamu e Eva i to Iehova ingoa, e te au tuatua mou no runga Iaia. Kite raua e nana i Anga, e Nana i oronga mai i te ora, te kainga Parataito manea, e tetai tokorua meitaki. (Gene. 1:26-28; 2:18) Inara, ka taangaanga ainei raua i to raua manako apa kore no te akamanako i te au mea pouroa ta Iehova i rave? Ka akamatutu ainei raua i to raua aroa ma te āriki Iaia no tona ingoa? Kitea mai te pauanga te timata anga to te Atua enemi ia raua.

9. Ia Genese 2:16, 17 e te 3:1-5, eaa ta Iehova i akakite ki te nga tokorua mua, e akapeea a Satani te akapikikaa anga ia Iehova?

⁹ E tatau ia Genese 2:16, 17 e te 3:1-5.  Taangaanga anga i tetai ovi ei vaa tuatua nona, kua ui a Satani kia Eva: “Koia ïa, kua tuatua mai te Atua e, Auraka korua e kai i to te au rakau katoa o te kainga nei?” E pikikaa to roto i teia uianga tei aite ki te poitini uunaia. Tuatua te Atua e e kai raua i to te au rakau katoa o te kainga nei, inara eiaa okotai. E maata ua atu ta Adamu e Eva rakau e kai. (Gene. 2:9) Ae, e Atua oronga ua a Iehova. Inara, akakite te Atua kia Adamu e Eva eiaa e kai i te okotai rakau tana i akaue ra. Akapikikaa atura a Satani i te uianga. Akaaite a Satani ia Iehova mei tetai Atua karapii. Penei kua manako a Eva, ‘Te tapupu ra ainei te Atua i tetai apinga meitaki?’

10. Akapeea a Satani te akakino anga i te ingoa o te Atua, e eaa tei tupu?

¹⁰ I te reira taime, kua āriki a Eva ia Iehova ei Tutara nona. Akakite aia kia Satani ta te Atua i akaue ra. Akakite aia eiaa raua e amiri i te rakau. Kite meitaki aia i ta te Atua akamatakiteanga e ka taki atu te akarongo kore ki te mate. Inara pau a Satani: “Kare rava korua e mate.” (Gene. 3:2-4) Kare a Satani i tapaepae ana i tana tuatua. Akakino aia i te ingoa o te Atua, e kua akakite aia kia Eva e e pikikaa a Iehova. No reira a Satani i riro mai ei ko te Tiaporo, ko tei akakino ra. Akavareia a Eva; kua irinaki aia ia Satani. (1 Timo. 2:14) Irinaki atura iaia kare ia Iehova. No reira i māmā ei ia Eva i te tuku i te ikianga kino. Akarongo kore aia ia Iehova. Akamata aia i te kai i te ua rakau ta Iehova i akaue eiaa e kai. Muri mai, kua oronga katoa aia kia Adamu.—Gene. 3:6.

11. Eaa ta te nga metua mua ka tau kia rave, inara eaa tei tupu?

¹¹ Akamanako ana naringa a Eva i tuatua i te tika kia Satani. Akamanako ana e kua tuatua aia i teia: “Kare au i kite koai koe, kua kite ra au i toku Metua, ko Iehova, akaperepere au iaia ma te irinaki iaia. Nana i oronga mai i te au mea ravarai na maua ko Adamu. Eiaa koe e akakino iaia. Akaatea atu ia koe!” Mei teaa atura to Iehova rekareka te akarongo i teia au tuatua tiratiratu naringa tana tamaine i rave i teia! (Mase. 27:11) Kare o Eva aroa tiratiratu no Iehova; kare katoa o Adamu. No to raua tu aroa kore no to raua Metua, kare a Adamu e Eva i paruru ana i tona ingoa kia kore e akakinoia.

12. Akapeea a Satani te akatupu anga i te ekoko ki roto i te ngakau o Eva, e eaa ta Adamu e Eva i kore i rave?

¹² Mei ta tatou i kite mai, akamata a Satani i te akatupu i te ekoko ki roto i te manako o Eva. Kua akakeu aia ia Eva kia ekoko ia Iehova ei Metua meitaki nona. Kare a Adamu e Eva i paruru ana i te ingoa e te tu meitaki o Iehova. Kua aru patete ua raua ia Satani no te patoi i to raua Metua. Taangaanga katoa a Satani i teia ravenga i teia rā. Akakino pakari aia i to Iehova ingoa. Akakeu  vivikiia te tangata kia irinaki i ta Satani au pikikaa no te patoi i te tutara tika a Iehova.

13. Akapeea a Ezekiela 36:23 te akamārama anga i te karere puapinga a te Pipiria?

¹³ Te āriki ra ainei a Iehova i teia akakino anga ma te kore e paruru iaia uaorai? Kare! Akakite te Pipiria akapeea a Iehova te akakore anga i te kino tei akatupuia i te aua o Edene. (Gene. 3:15) Teia te karere puapinga o te Pipiria: Ka akatapu a Iehova i tona ingoa na roto i te Patireia tei tutaraia e tana Tamaiti e ka akaoki i te tuatua tika e te ‘au ki te enua. Ka tauturu te Pipiria ia tatou kia mārama akapeea a Iehova me akatapu i tona ingoa.—E tatau ia Ezekiela 36:23.

14. Akapeea a Iehova te ariu anga ki te patoi anga i Edene no te akatapu i tona ingoa?

¹⁴ Kua rave a Satani i te au mea ravarai no te arai ia Iehova kia kore e akatupu i Tona akakoroanga. Puapinga kore ta Satani tauta anga. Akakite mai te Pipiria akapeea a Iehova te rave anga i te reira, e te akapapu maira e kare atu e Atua mei ia Iehova. E tika, kua tupu te mamae maata kia Iehova, te patoi anga a Satani e tona pupu iaia. (Sala. 78:40) Kua akakoromaki a Iehova i teia akakino anga, ma te tu pakari, tamou marie, e te tika. Kua akaari putuputu katoa aia i tona mana ririnui. Puapinga rava atu, kua akaari aia i te aroa i tana i rave. (1 Ioa. 4:8) Angaanga pakari a Iehova i te akatapu i tona ingoa.

15. Akapeea a Satani te akakino anga i te ingoa o te Atua i teia rā, e eaa te ka tupu?

¹⁵ Te akakino nei rai a Satani i te ingoa o te Atua i teia rā. Te pikikaa nei aia i te tangata kia ekoko e e Atua ririnui, tika, pakari e te aroa a Iehova. Ei akaraanga, tauta a Satani i te akakeu i te tangata kia kore e irinaki e na Iehova i Anga i te au mea ravarai. Me irinaki te tangata e te ora ra te Atua, ka akakeu a Satani i te tangata kia irinaki e e tu arairai e te tau kore to te Atua e Tana au turanga. Apii katoa aia i te tangata e e Atua kino a Iehova i te tutungi i te tangata ki roto i te ai  vera. Me irinaki te tangata i te reira akakino anga, ka patoi ratou i te tutara tika a Iehova. Ka rave ua atu a Satani i te akakino ia Iehova e tae ua atu ki te taime me takoreia aia, e ka takete aia ia koe. Ka autu ainei aia?

16. Eaa taau ka rave tei kore i rauka ia Adamu e Eva?

¹⁶ Akatika a Iehova i te aronga apa kia piri ki roto i te akatapu anga i tona ingoa. Mei tera te tu, ka rauka ia koe i te rave tei kore i rauka ia Adamu e Eva. Noatu te akakino e te akavaavaa nei te tangata i to Iehova ingoa, ka rauka ia koe i te paruru e te tuatua i te tika—e e tapu, e tika, e meitaki e te aroa a Iehova. (Isa. 29:23) E akaari e te inangaro ra koe i te turu i tana tutara. Ka rauka ia koe i te akakite e nana anake te tutara tika tikai e nana e apai mai i te ‘au e te mataora ki te katoatoa.—Sala. 37:9, 37; 146:5, 6, 10.

17. Akapeea a Iesu te akakite aere anga i te ingoa o tona Metua?

¹⁷ Me paruru tatou i to Iehova ingoa, te aru ra tatou i te akaraanga o Iesu Karaiti. (Ioa. 17:26) Akakite aere a Iesu i te ingoa o tona Metua na te taangaanga anga i te reira ingoa e te paruru anga i to Iehova tu. Ei akaraanga, kua akaapa aia i te Pharisea, tei pikikaa e e tu kino, māro, aroa kore, e te tangi kore to Iehova. Tauturu a Iesu i te tangata kia kite e e Metua meitaki aia, akakoromaki, aroa, e te akakore i te ara. Tauturu katoa aia i te tangata kia mārama ia Iehova na te aru meitaki anga i te au tu o tona Metua i tona oraanga.—Ioa. 14:9.

18. Akapeea tatou me akakore i te au pikikaa e te akakino anga no Iehova?

¹⁸ Mei ia Iesu, ka rauka ia tatou i te akakite i ta tatou i kite no Iehova, te apii anga i te tangata e e Atua aroa Aia e te takinga meitaki. Me pera tatou, ka paruru tatou ia Iehova ma te patoi atu i te au pikikaa e te akakino anga. Ka akatapu tatou i to Iehova ingoa, na te akariro anga i te reira ei mea tapu i roto i te manako e te ngakau o te tangata. Ka aru katoa tatou i to Iehova tu. Noatu to tatou tu ara. (Ephe. 5:1, 2) Me riro ta tatou tuatua e te angaanga ei akaari i to Iehova tu ki te tangata, ka tauturu tatou i te akatapu i tona ingoa. Te akatika ra tatou i te  reira ingoa na te akarangatira anga i te tangata mei te au manako tarevake. * Akaari katoa tatou e ka rauka i te aronga apa i te noo tiratiratu.—Iobu 27:5.

19. Akapeea a Isaia 63:7 me tauturu ia tatou kia kite i te akakoroanga i ta tatou apiianga?

¹⁹ Akamanako ana i tetai apiianga puapinga. Me apii tatou i te tuatua mou Pipiria ki tetai ke, e tuatua putuputu ana tatou i te tu ngateitei o te Atua, e tika anga to te Atua kia tutara i te ao katoa e pini ua ake. Inara, koi puapinga ai te apii i te au ture a te Atua, to tatou akakoroanga kia tauturu i te tangata kia inangaro ia Iehova, to tatou Metua, e kia tiratiratu kiaia. Ka anoanoia tatou kia akakite i to Iehova au tu meitaki, pera katoa te aiteanga i Tona ingoa, Iehova. (E tatau ia Isaia 63:7.) Me apii tatou i teia, ka tauturu tatou i te tangata kia akaperepere ia Iehova e te akarongo kiaia no to ratou tu tiratiratu.

20. Eaa ta tatou ka uriuri i te atikara ka aru mai?

²⁰ Akapeea tatou me akapapu e te riro ra to tatou tu e ta tatou apiianga ei tauturu i tetai ke kia akamanako meitaki i to Iehova ingoa e kia piri vaitata kiaia? Na te atikara ka aru mai e pau i teia uianga.