1-2. Башо кола пучиба мангаја повише те џана амен сар е Јеховаскере сведокија?

АМЕН сием вклучиме ко важна спорна пучиба — е Јеховаскоро право те владинел хем те славинел пе лескоро свето анав. Сар е Јеховаскере сведокија, амен мангаја те џана повише башо акала пучиба.

² Јасно аменге кај е Девлескоро анав мора те овел чистимо тари лаџ сој леске анди хем те докажинел пе кај о Јехова владинела ко најшукар начин. О солдуј буќа тане бут важна. Ама, дали керела пе лафи башо дуј различна буќа? На. Е Јеховаскоро право те владинел хем те славинел пе лескоро свето анав тане бут паше поврзиме.

3. Сој тано вклучимо ко анав Јехова?

³ Ко анав Јехова тано вклучимо са сој поврзимо амаре Девлеа, машкар коте сој хем лескоро начин сар владинела. Адалеске, кеда вакераја кај најважно таро са тано е Девлескоро анав те овел чистимо тари секоја лаџ, амен јавере лафенцар вакераја кај мора те докажинел пе кај ов тано о најшукар Владетели. О анав Јехова хем о начин ко кова со ов владинела сар Семоќно хем Најбаро Девел тане бут паше поврзиме. (Дикх и рамка „ Сој тано вклучимо ко јекх бут важно спорно пучибе“.)

4. Со пишинела башо е Девлескоро анав ко Псалм 135:13, хем башо кола пучиба ка кера лафи ки акаја статија?

⁴ О анав Јехова тано посебно. (Читин Псалм 135:13.) Соске е Девлескоро анав тано добором важно? Сар сине каљардо? Сар о Девел славинела пло свето анав? Хем сар шај амен те бранина лескоро анав? Те дикха.

5. Со пучена пе несаве мануша баши е Исусескири молитва?

⁵ „Те славинел пе тло свето анав“ (Мат. 6:9). О Исус вакерѓа кај акаја тани јекх таро најважна буќа башо кола со ваљани те молина амен. Ама, со значинена е Исусескере лафија? Лескере лафија шај исто аѓаар те превединен пе сар „тло анав нека овел свето“. Ама, несаве шај те пучен пе: „Ако е Јеховаскоро анав више тано свето, тегани соске о Исус ки пли молитва спомнинѓа ’нека овел свето‘“? Те шај те одговорина ко акава пучибе, ваљани те размислина башо адава со, уствари, претставинела јекх анав.

6. Соске о анав тано добором важно?

⁶ О анав нане само лафи со шај те пишинел пе или те вакерел пе. И Библија вакерела: „Пошукар тано те бирине шукар анав него баро барвалипе“ (Изр. 22:1; Проп. 7:1). Соске о анав тано добором важно? Адалеске со ки лесте тано вклучимо о углед, јавере лафенцар со мислинена о јавера башо адава мануш. Значи, нане важно сар пишинела пе о анав или сар вакерела пе, него со мислинена хем со осетинена о јавера кеда ка шунен или ка дикхен адава анав.

7. Сар о мануша анена лаџ е Девлескере анавеске?

⁷ Кеда вакерена ховајба башо Јехова, о мануша пробинена те руминен лескоро углед, хем адалеа те анен лаџ лескере анавеске. Е Девлескоро анав хем лескоро углед прво пути сине нападимо ко почеток тари манушикани историја. Те дикха со шај те сикљова таро акава.

8. Со џанена сине о Адам хем и Ева, хем кола пучиба шај те пуча амен?

⁸ О Адам хем и Ева џанена сине кај о Девел викинела пе Јехова хем џанена сине несаве важна буќа баши лесте. Џанена сине кај ов тано о Створители, кова со денѓа лен живото, бут шужо тхан живибаске хем совршено брачно партнери (1. Мој. 1:26-28; 2:18). Ама, дали понадари да користинѓе пли совршено годи те шај те размислинен башо са адава со о Јехова керѓа ленге? Дали бајрарѓе пло мангипе хем пло ценење башо Јехова? О одговор ко акала пучиба уло јасно кеда јекх Девлескоро душмани чхивѓа лен ко испит.

9. Спрема 1. Мојсеева 2:16, 17 хем 3:1-5, со вакерѓа о Јехова е прво брачно пареске, хем сар о Сатана превртинѓа о чачипе?

 ⁹ Читин 1. Мојсеева 2:16, 17 хем 3:1-5. О Сатана користинѓа јекхе сапе те шај те керел лафи е Еваја хем пучља ла: „Чаче ли о Девел вакерѓа туменге кај на смејнена те хан таро секова каш ки градина?“ Ко акава пучибе сине јекх опасно ховајбе кова со сине сар јекх гаравдо отров. Со уствари, вакерѓа о Девел? Ов вакерѓа кај шај те хан таро секова каш, освен таро јекх. О Адам хем и Ева шај сине те уживинен џикоте хана о плодија таро најразлична врсте кашта (1. Мој. 2:9). О Јехова чаче тано дарежливо Девел. Сепак, ов вакерѓа ленге кај таро јекх каш на смејнена те хан. Спрема адава, пле пучибаја о Сатана превртинѓа о чачипе аѓаар со чхивѓа е Ева те мислинел песке кај о Девел нане дарежливо. Ој шај почминѓа те пучел пе: „Дали о Девел чхинавела амендар нешто шукар?“

10. Сар о Сатана директно вакерѓа ховајба башо Девел, хем саве сине о последице?

¹⁰ Ко адава моменти, и Ева панда дикхела сине ко Јехова сар пло Владетели. Ој одговоринѓа е Сатанаске аѓаар со повторинѓа о јасно упатство кова со денѓа о Девел, хем вакерѓа кај на смејнена ни те пипинен о каш. И Ева шукар џанела сине кола ка овен о последице ако на шунена ле — о Јехова предупрединѓа лен кај ка мерен. Ама, о Сатана вакерѓа лаке: „На, тумен нане те мерен“ (1. Мој. 3:2-4). Ов акава пути на сине више индиректно е Еваја, него ов директно почминѓа те вакерел ховајба башо Девел. Кеда вакерѓа е Еваке кај нане те мерен, ов, уствари вакерѓа лаке кај о Јехова тано ховавно. Аѓаар о Сатана уло клеветнико, или Бенг. И Ева сине ховавди (1. Тим. 2:14). Повише верујнѓа е Сатана него е Јехова. Тари адаја причина анѓа и најлошно одлука со постојнела. Ој одлучинѓа те на шунел е Јехова, хем хаља таро плоди со сине ленге забранимо. А пало адава денѓа е Адамеске да те хал таро плоди (1. Мој. 3:6).

11. Со пропуштинѓе те керен амаре прва родителија?

¹¹ Размислин само хари ко саво јавер начин шај сине те постапинел и Ева. Ој шај сине те вакерел е Сатанаске: „На џанава кој сиан ту, ама бут шукар џанава кој тано мло Дад, о Јехова. Ме бут мангава ле хем иси ман доверба ки лесте. Ов денѓа амен са со иси амен. Сар на лаџаја те кере лошно лафи баши лесте?! Циде тут акатар!“ Кобор ка овел сине бахтало о Јехова те шај сине те шунел сар лескири мангли чхај верно бранинела ле! (Изреки 27:11). Ама, е Ева на сине ла чачутно хем хор мангипе спрема о Јехова, а ни е Адаме. Адалеске со на сине лен асавко мангипе спрема пло Дад, ола на бранинѓе лескоро анав кеда о душмани вакерѓа ховајба баши лесте.

12. Сар о Сатана сејнѓа сумње ки годи е Евакири, хем со на керѓе о Адам хем и Ева?

¹² Сар со дикхлем, о Сатана сејнѓа сумње  ки годи е Евакири. Ов чхивѓа ла те почминел те пучел пе дали о Јехова чаче тано шукар Дад. О Адам хем и Ева на бранинѓе е Јеховаскоро анав хем лескоро углед. Ола мукхле о Сатана те влијајнел упри ленде хем бунинѓе пе против пло Дад. О Сатана авдиве да користинела слична тактике. Ов нападинела е Јехова аѓаар со каљарела лескоро анав. О мануша со верујнена ко лескере ховајба бут локхе отфрлинена е Јеховаскоро праведно владибе.

13. Сар тано истакнимо о главно хабери е Библијакоро ко Езекиел 36:23?

¹³ Дали о Јехова трпинела асавке ховајба бизо те бранинел пе? На! Ки цело Библија керела пе лафи башо адава со керѓа хем со керела те шај те чистинел пло анав тари лаџ со сине леске анди ки рајско градина (1. Мој. 3:15). Уствари, шај те вакерел пе кај о главно хабери е Библијакоро тано: о Јехова ка славинел пло свето анав хем ка анел правда хем мир ки Пхув преку о Царство колеа со владинела лескоро Чхаво. Е Девлескоро Лафи поможинела аменге те хаљова со керела о Јехова те шај те славинел пло свето анав. (Читин Езекиел 36:23.)

14. Сар о Јехова славинѓа пло свето анав адалеа сар иклило ко крајо е Сатанаскере побунаја?

¹⁴ Панда таро почеток, о Сатана керела сине са со шај те чхинавел е Јехова те исполнинел пли намера. Ама, никогаш на успејнела сине ко адава. И Библија откринела аменге сар постапинѓа о Јехова, хем докажинела кај ов тано Дад со грижинела пе хем о најшукар Владетели. Точно тано адава кај и побуна е Сатанаскири хем околенгири со уле тари лескири страна анѓа е Јеховаске бари дукх (Пс. 78:40). Ама, ов иклило ко крајо акале побунаја аѓаар со постапинѓа мудро, стрпливо хем праведно. Освен адава, сикавѓа кај тано Семоќно ко бут начинија. Хем, најважно таро са, никогаш на чхинавѓа те сикавел мангипе (1. Јов. 4:8). О Јехова понадари да керела са те шај те славинел пло свето анав.

15. Сар о Сатана каљарела е Девлескоро анав авдиве, хем саве тане о последице таро адава?

 ¹⁵ О Сатана понадари да каљарела е Девлескоро анав. Ов чхивела е манушен те сумнинен пе дали о Девел тано моќно, праведно хем мудро, хем дали мангела лен. На пример, о Сатана пробинела те убединел е манушен кај о Јехова нане о Створители. А ако несаве верујнена кај о Девел постојнела, о Сатана пробинела те чхивел лен те мислинен кај нане праведно хем кај чхивела аменге мерилија коленцар со ограничинела амен. Чак ширинела ховајба кај о Јехова нане милостиво хем кај тано сурово Девел кова со тхарела е манушен ко пекол. Кеда некој ка верујнел ко асавке страшна ховајба, бут полокхе ка отфрлинел е Јеховаскоро праведно владибе. Са џикоте на овела уништимо, о Сатана понадари да ка вакерел ховајба башо Јехова, хем ка пробинел те чхивел туте да те иране леске думо. Ка успејнел ли ко адава?

16. Сар шај те кере адава со пропуштинѓе те керен о Адам хем и Ева?

¹⁶ О Јехова дозволинела аменге да сар несовршена мануша те славина лескоро свето анав. Уствари, ту шај те кере адава со на успејнѓе те керен о Адам хем и Ева. Иако живинаја ко свето кова сој пхердо манушенцар со каљарена хем мељарена е Јеховаскоро анав, тут иси ту прилика храбро те бранине е Јеховаскоро анав хем те вакере е јаверенге кај тано свето, праведно, шукар хем пхердо мангипаја (Иса. 29:23). Шај те сикаве кај поддржинеа ле сар тло Владетели. Освен адава, шај те поможине е манушенге те хаљовен кај само е Јеховаскоро владибе тано праведно, хем кај само ов ка анел чачутно мир хем бахталипе са е буќенге со створинѓа (Пс. 37:9, 37; 146:5, 6, 10).

17. Сар о Исус објавинѓа е Јеховаскоро анав?

¹⁷ Кеда бранинаја е Јеховаскоро анав, амен џаја пало е Исусескоро пример (Јован 17:26). О Исус објавинѓа е јаверенге пле Дадескоро анав. Сар? Освен со користинѓа о анав Јехова, о Исус сикавѓа е манушен саво тано чаче о Јехова. На пример, ов сикавѓа кај тано ховајбе адава со вакерѓе о фарисеија, кола претставинена сине е Јехова сар сурово, шудро хем Девел бизи милост кова со бут родела е јаверендар. О Исус поможинѓа е манушенге те хаљовен кај лескоро Дад тано стрпливо, разумно, пхердо мангипаја  хем спремно те простинел. Освен адава, ов поможинѓа ленге те запознајнен е Јехова аѓаар со совршено сикавѓа лескере особине ко са со керела сине (Јован 14:9).

18. Сар шај те сикава кај о ифтире хем о ховајба со ширинена лен о душмања башо Јехова нане чаче?

¹⁸ Исто сар о Исус, амен да шај те вакера е јаверенге адава со џанаја башо Јехова, хем аѓаар те поможина ленге те овел лен хор поштовање спрема лескоро анав. Шај те вакера ленге кобор шукар Девел тано ов хем кобор бут мангела амен. Аѓаар ка сикава кај о ифтире кола со о душмања ширинена лен баши лесте тане ховајба. Освен адава, амен да шај те сикава е Јеховаскере особине. Шај те кера акава иако сием несовршена (Еф. 5:1, 2). Кеда амаре лафенцар хем постапкенцар сикаваја е јаверенге саво чаче тано о Јехова, амен поможинаја те славинел пе лескоро свето анав. Амен славинаја адава анав аѓаар со поможинаја е манушенге те отфрлинен о ховајба башо Девел. Исто аѓаар, сикаваја кај о несовршена мануша шај те ачховен верна е Јеховаске (Јов 27:5).

19. Сар о Исаија 63:7 поможинела аменге те хаљова со ваљани те овел амари главно цел кеда сикаваја е јаверен?

¹⁹ Шај те славина е Јеховаскоро свето анав панда ко јекх начин. Кеда сикаваја е јаверен башо библиска чачипа, бут пути истакнинаја кај е Јехова иси ле право те владинел упро са. Ама, иако тано важно те сикава лен башо е Девлескере законија, амари главно цел тани те поможина ленге те заманген амаре Даде, е Јехова, хем те овен леске верна. Адалеске, ваљани те истакнина лескере бут шуже особине, јавере лафенцар те поможина ленге те дикхен и личност која со бешела пало анав Јехова. (Читин Исаија 63:7.) Ако сикаваја е јаверен ко асавко начин, ка поможина ленге те заманген е Јехова хем те овен леске послушна адалеске со мангена те ачховен леске верна.

20. Со ка дикха ки следно статија?

²⁰ Со ваљани те кера те шај амаре сикајбаја хем понашибаја те поможина е јаверенге те овел лен шукар мислење башо Јехова хем те манген те овен леа паше? Акава пучибе ка дикха ки следно статија.