1-2. Yihowa Farciˈraasinera lowo geeshsha hasiissanno hajo hiitteeti?

XAA yannara roore hasiissanno hajo, Yihowa aliidimmanna suˈmisi qullaambe xabbe leellate. Yihowa Farciˈraasine ikkinoommo daafira, tenne hajore hasaawa hagiirsiissannonke. Ikkina, Maganu aliidimmanna suˈmisi qullaambe xaadooshshe diafiˈrinoreeti yaateni? Deeˈni.

² Ninke baalunku Maganu suˈmi qullaawa hasiissannosita huwantoommo. Qoleno Yihowa aliidimma woy isi gashshanno gari baalunkunni roore ikkinoti xabbe leella hasiissannoseta anfoommo. Konnira lamenti lowo geeshsha hasiissanno hajooti.

3. Yihowa yinanni suˈmi maa xaphi asse amadino?

³ Yihowa yinannihu Maganu suˈmi gashshanno garano ikko isi daafira wole baalanka coye xaphi asse amadinoho. Konnira, Maganu suˈmi qullaawasi lowo geeshsha hasiissannote yineemmo woyite, isi gashshanno gari baalunkunni roore ikkinoti xabbe leella hasiissanno yinanni heeˈnoommo. Yihowa suˈmi, isi kalqe alame gashshanno gari woy Aliidimmasi ledo fiixooma afiˈrinoho.—“ Maganu Suˈmi Qullaambe Ledo Xaadooshshe Afiˈrinore” yitanno saaxine lai.

4. Faarso 135:13 Yihowa suˈmi daafira mayitanno? Konni birxichira hiikkuri xaˈmuwara dawaro afiˈneemmo?

⁴ Yihowa yinanni suˈmi lowo geeshsha baxxinoho. (Faarso 135:13, NW nabbawi. *) Maganu suˈma baxxinoha assannori maati? Umo konne suˈma hunnoonnihu hiittoonniiti? Maganu suˈmisi qullaawanno gede assannohu ma garinniiti? Ninke suˈmisira halama dandiineemmohu hiittoonniiti? Konni birxichira kuri xaˈmuwara dawaro afiˈneemmo.

5. Mitootu Maganu suˈmi qullaawa hasiissannosi yinanni woyite mayite heddara dandiitanno?

⁵ “Suˈmikki qullaawa ikko.” (Mat. 6:9) Yesuusi huuccatto assiˈneemmo woyite tenne hajo balaxisiisa hasiissannonketa coyiˈrino. Ikkina hatto yaa mayyaate? Mitto coye qullaawa assate yaa, keereensate, xalashshate, woy xuru nookkiha assate. Ikkollana mitu manni ‘Wonanni Maganu suˈmi keeraancho, xalala woy xuru nookkiha diˈˈikkino?’ yee hedara dandaanno. Tenne xaˈmora dawaro afiˈrate suˈmu afiˈrino tiro huwata hasiissannonke.

6. Suˈmu lowore afiˈrino yineemmohu mayiraati?

⁶ Suˈmu woraqataho borreessinanni woy woshshinanni qaale calla diˈˈikkino. Qullaawu Maxaafi “Lowo jironni danchu suˈmi woyyanno” yaannota qaango. (Law. 22:1; Ros. 7:1) Suˈmu lowore afiˈrino yineemmohu mayiraati? Korkaatuno suˈmu, mannu hakko manchi daafira mayyee hedannorono xawisanno. Konnira mittu manchi suˈma borreessinanni woy hakko suˈma woshshinanni gari hakkeeshsha didhiwanno; roore hasiissannoti wolootu hakko manchi suˈma macciishshitanno woyite heddannoreeti.

7. Mannu Maganu suˈma hunanni noohu hiittoonniiti?

⁷ Mannu Yihowa daafira kapho coyiˈranno woyite, iso bushiishanni no. Tini qolte suˈmasi hunate. Umo Magano bushiinshe suˈmasi hunnoonnihu Edeni Gannateteeti. Hanni tennenni maa ronseemmoro laˈno.

8. Addaaminna Heewani maa afino? Mayine hendeemmoha ikkara dandaanno?

⁸ Addaaminna Heewani Maganu suˈmi Yihowa ikkinotanna isi ayimma daafira lowore afino. Qoleno Isi Kalaqaancho ikkinota, hattono heeshsho, Gannate ikkitino uullanna guuta galte uyinonsahu iso ikkinota afino. (Kal. 1:26-28; 2:18) Ikkina insa guuta surrensa, Yihowa assinonsare baala hiincitanni heeˈrate horoonsidhinoni? Woy insa Yihowara noonsa baxillinna galati baikkinni heeˈranno gede assiˈrate sharrantinoni? Maganu diini fonqolinsa yannara tini xabbe leeltino.

9. Kalaqama 2:16, 17 nna 3:1-5 kultanno garinni Yihowa Addaaminna Heewani mayino? Sheexaanu halaaleho bushsha ganinohu hiittoonniiti?

 ⁹ Kalaqama 2:16, 17; 3:1-5 nabbawi. Sheexaanu hamashsho horoonsiˈre Heewani togo yee xaˈmino: “Halaalintanni Maganu Edeni Gennetete noo haqqe baalante laalo ittinannikki gede hoolinoˈneni?” Tini giddo kaphonna xagarro afidhino xaˈmo, maanxe worroonni marze gedeete. Maganu mitte haqqicho laalo agurranna baalante haqqe laalo ita dandiitannota kulinonsa. Addaaminna Heewanira uyinoonninsa laalo kiirre digundannite. (Kal. 2:9) Yihowa shaqqado Maganooti! Ikkollana Maganu Addaaminna Heewani ittinoonte yiinoti mitte haqqicho no. Konnira Sheexaanu xaˈmo halaaleho bushsha gantannote. Sheexaanu coyiˈrinori, Maganu gaggaadaamoho yine hendanni gede assannoreeti. Heewani ‘Maganu hoˈlinonkehu danchu coyi noo ikka?’ yite heddinoha ikkara dandaanno.

10. Sheexaanu Maganu suˈma huninohu hiittoonniiti? Tini maa abbitino?

¹⁰ Hatte yannara Heewani Yihowara hajajama diagurtino. Ise Sheexaaneho Maganu yiinota kultino. Heewani ‘Ita agurina kisa nafa kissinoonte’ yiinonke yitino. Ise Maganoho hajajama gibburo reyitannota affino. Sheexaanu kayinni “Reyo nafa direyitinanni” yee qolino. (Kal. 3:2-4) Xa Sheexaanu balbaˈla agure xawise coyiˈrino. Isi Heewanira, ‘Yihowa kaphaanchoho’ yiinohu gedeeti; konni garinni Sheexaanu Maganu suˈma hunino. Sheexaanu hatto assasinni, Daawuloosi woy suˈma hunannoha ikkino. Heewani dogante Sheexaanu yiinore ammantino. (1 Xim. 2:14) Ise Yihowanni roore Sheexaane ammantino. Konnira Heewani geedo gedenso hunannore assitino. Ise Yihowara hajajama gibbino. Heewani Yihowa hoolino haqqicho laalo ittu. Hakkiinni Addaamirano uyitu.—Kal. 3:6.

11. Umi anninkenna amanke maa assa dandiitannohu baino? Insa kayinni maa assitino?

¹¹ Hanni Heewani Sheexaaneho mayitannohu bainoro hendo. Ise togo yite qoltoommero mayi bai: “Ate mama afoommahe? Annaˈya Yihowa kayi afoomma; iso baxeemma, hattono addaxxeemma. Addaamiranna anera baalanka coye uyinonkehu isooti. Iso bushiisha saaliweelu kuni! Kai kawii!” Yihowa beettosi hatto yitanna macciishshoommero lowo geeshsha hagiidhannoti baˈino! (Law. 27:11) Ikkollana, Heewani Yihowara bagamannokki baxille dileellishshino; Addaamino ise gedeenkolla! Addaaminna Heewani Anninsara bagamannokki baxilli noonsakki daafira, suˈmisi baˈˈanna sammi yite laˈino.

12. Sheexaanu Heewani wodanira huluullo wixinohu hiittoonniiti? Addaaminna Heewani maa diassitino?

¹² Aleenni laˈnummonte gede, Sheexaanu Heewani wodanira huluullo wixino. Ise Maganu shaqqado Anna ikkinota huluullantanno gede asse Yihowa suˈma hunino. Addaaminna Heewani Sheexaanu Maganu daafira kapho kulinsata Yihowa suˈmira dihalantino. Insa Sheexaanu  amaale macciishshite Anninsara finqiltino. Yannankerano Sheexaanu hakko garinni xagaranno. Isi Yihowa daafira kapho coyiˈre suˈmasi hunanno. Sheexaanu kapho ammananno manni Yihowa gashshootira dihajajamanno.

13. Hiziqeeli 36:23 Qullaawu Maxaafita qara sokka luphi assite xawissannohu hiittoonniiti?

¹³ Yihowa suˈmasi hunnanna sammi yee laˈˈannoni? Dilaˈˈanno! Qullaawu Maxaafi Yihowa Edeni Gannatete baino woy mishamino suˈmisi qullaawanno gede maa assinoro kulanno. (Kal. 3:15) Isinni Qullaawu Maxaafiti qara sokka, Yihowa Beettisi gashshanno Mangiste widoonni suˈmasi qullaawa assannotanna uullate keeraanchimmanna salaame qolannota kultannote yaa dandiinanni. Qullaawu Maxaafi kulannori, Yihowa suˈmasi qullaawa assannohu hiittoonniitiro afate kaaˈlannonke.—Hiziqeeli 36:23 nabbawi.

14. Yihowa Edeni Gannatete kaˈino finqillenni baino suˈmasi qullaawa assate maa assino?

¹⁴ Sheexaanu Yihowa hedinore wonshannota hoolate ganinokki gano dino. Isi hatto assate duucha hige woˈnaalinoha ikkirono diqiniinosi. Qullaawu Maxaafi Yihowa hedinore wonshate maa assinoronna isi ledo taalamannohu nookkita buuxisannonke. Sheexaanunna garosi finqilansa, Yihowa lowo geeshsha xissiissino. (Far. 78:40) Ikkollana Yihowa kalaqamino qarra hayyotenni, cincatenninna halaalunni tiranni no. Qoleno bayira wolqasi kiirre gundannikki doogganni leellishino. Isi baalanka coye assannohu baxillunniiti. (1 Yoh. 4:8) Yihowa suˈmasi keereensannore assa agurino woyiti dino.

15. Sheexaanu xaa yannara Maganu suˈma hunanni noohu hiittoonniiti? Tini maa abbitino?

¹⁵ Yannankerano Sheexaanu Maganu suˈma hunannilla no. Isi mannu Maganu wolqaataamo, taashshannoha, hayyichanna baxillaancho ikkinota huluullamanno gede asse doganno. Sheexaanu Yihowa Kalaqaancho diˈˈikkino yee manna ammansiisate woˈnaalanno. Maganu no yee ammananno manna kayinni, Yihowanna seerisi furro fuuqqo hoˈlannohonna gara diˈˈikkinoho yee hedanno gede assate  woˈnaalanno. Wole agurina isi Yihowa mararro noosikkihonna manna sioolete giirannoho yee rosiisanno. Mannu konne kapho ammaniro, Yihowahu keeraanchu seerira hajajama giwara dandaanno. Sheexaanu woˈmunni woˈma baˈˈa geeshsha, Maganu suˈma huna diaguranno; manna isi wido qoˈlate giidhe galanno. Ate isi wido assiˈre afa ikka?

16. Addaaminna Heewani assa gibbinore ati maa assa dandaatto?

¹⁶ Yihowa mannu ooso guuntete xeˈne noonsare ikkiturono, suˈmisi qullaawa ikkanno gede assitara fajjinonsa. Addaaminna Heewani assa gibbinore ati assa dandaatto. Heeˈnoommohu Yihowa suˈma hunannonna mishanno manni batiˈrino alamera ikkirono, Yihowa suˈmira halamanna isi qullaawa, keeraancho, shaqqadonna baxillaancho Magano ikkinota kula dandiineemmo. (Isa. 29:23) Yihowa gashshaanchokki ikkara hasiˈrattota leellisha dandaatto. Qoleno woˈmunni woˈma keeraanchunna baalunku kalaqamira salaamenna hagiirre abbannohu Maganu gashshoote calla ikkinota wolootaho kula dandaatto.—Far. 37:9, 37; 146:5, 6, 10.

17. Yesuusi mannu Annisi suˈma afanno gede assinohu hiisseeti?

¹⁷ Yihowa suˈmira halammeemmoha ikkiro, Yesuusi Kiristoosi lawishsha harunsinanni heeˈnoommo. (Yoh. 17:26) Yesuusi mannu annisi suˈma afanno gede assinohu, konne suˈma gane calla ikkikkinni Yihowa ayimmare mannaho rosiiseeti. Coyi gedera, Farisootu mannu Yihowa kaajjadoho, wolqankera aleenni ikkinore asse yaannoho, ninkewiinni xeertiˈrinohonna kakkachaho yee hedanno gede assituta, Yesuusi kayinni insa yitannori gara ikkinokkita coyiˈrino. Yesuusi mannu Yihowa shaqqado, cinca, baxillaanchonna gatona yaannoha ikkinota huwatanno gede kaaˈlino. Qoleno isi woˈmunni woˈma Annisi faale haˈre, mannu Yihowa afanno gede assino.—Yoh. 14:9.

18. Beebbate bainoha Maganu suˈma keereensineemmohu maa assinummorooti?

¹⁸ Ninkeno Yesuusi gede, Yihowa baxillaanchonna shaqqado Magano ikkinota mannaho rosiisa dandiineemmo. Hatto assinummoro, beebbate bainoha Yihowa suˈma keereensa  dandiineemmo. Yihowa suˈmi qullaawanno gedeno assineemmo, yaano mannu suˈmisi qullaawa ikkinota huwatanno gede kaaˈlineemmo. Qoleno guuntete xeˈne noonkere ikkinummorono, Yihowa faale haˈra dandiineemmo. (Efe. 5:1, 2) Assineemmorinna coyiˈneemmori mannu Yihowa afanno gede kaaˈlannoha ikkiro, suˈmisi qullaawanno gede assinanni heeˈnoommo. Mannu Maganu daafira garimale huwatinore garunni huwatanno gede kaaˈlineemmoha ikkiro, suˈmisi qullaawanno gede assinanni heeˈnoommo. Qoleno shama maala uddiˈrino manni Maganoho ammaname heeˈra dandaannota leellinsheemmo.—Iyo. 27:5.

19. Isayaasi 63:7 kultanno garinni, manna rosiinseemmo woyite qara mixonke maati?

¹⁹ Yihowa suˈmi qullaawanno gede assa dandiineemmori wolurino no. Mannaho Qullaawu Maxaafi halaale rosiinseemmo yannara, duucha woyite Yihowa aliidimmare yaano isira kalqete alame gashshate qoosso noosita luphi assine kulleemmo; hatto assanke garankolla. Maganu seera rosiisa hasiissannota ikkiturono, qara mixonke mannu Annanke Yihowa baxannonna isira ammanamanno gede kaaˈlate. Konnira Yihowata baxissanno akattanna suˈmisi afiˈrino tiro seekkine rosiisa hasiissannonke. (Isayaasi 63:7 nabbawi.) Hatto assineemmoha ikkiro, mannu Yihowa baxanno gede kaaˈlineemmo, hattono baxillunni hajajamannosi gede assineemmo.

20. Aananno birxichira maa ronseemmo?

²⁰ Ikkina amanyootinkenninna rosiinseemmo rosinni, mannu Yihowa suˈma ayirrisannonna isiwa shiqanno gede kaaˈla dandiineemmohu hiittoonniiti? Aane noo birxichira tenne xaˈmora dawaro afiˈneemmo.