DJAMBA DJƐ WEKELO 23
‘Djina djɛko djale ekina!’
‘Ée Yehova, djina djɛko djengotshikalake lotshinda lotshinda.’—Yeembo 135:13.
YEEMBO 10 Tólumɛ Yehova Ndjambe kɛso! (lá Otetela)
LA YOPASƐ *
1-2. Wamba wakɔnge wasepa yambalo yɛ ankambi wɛ Yehova?
ISANKFUMƆ ndendamaka la woopó wolendana la wopo wɔ ndɔndjɛ wɔ Ndjambe edjinge n’kambo djɛ djina djɛnde djale ekina. Etengo oyɛso ankambi wɛ Yehova, iso nkɔpaka ntepela wamba wasepa yambalo edjinge wa djonyi efula wasɔ.
2 Tooka ente djina djɛ Ndjambe ladjɛ ndjala ekina kana ndjɛla piyɔɔ ma emamanyɛ enkfumɔ wɛ Satana. Teewa lonkina ente, wopo wɔ ndɔndjɛ wɔ Yehova la djɛ nseelama, anto ankfumɔ ladjɛ nyɛna ambɔ wopo wɔnde wɔ ndɔndjɛ ndeke loleka wɔlɔ. Iso ladjɛ ndɔsa akambo ape wasɔ la djonyi dj’efula edjinge nyɛnyɛ okitshakitshɛ wɔso l’eteyi. Oyɛwɔ mo, akambo ape wasɔ watshikitana? Lako.
3. Kɛkɔnge kesanghanyɛ djina ‘Yehova’?
3 Djina ‘Yehova’ nsanghanyɛka tshɛ kelendama la Ndjambe, ndjila edjinge wopo wɔnde wɔ ndɔndjɛ. Djɛko ndeke nkinyɛ djina djɛ Ndjambe ntepelaka lonkina nseela lowandji lɔnde. Djina djɛ Ndjambe,nsanghanyɛ edjinge wekeka wande, ndjingama la lɛdji lɔnde lɔ ndɔndjɛ etengo Nkfumi kɛ nkfulu inkfumɔ.—Lenda ipapango: “ Wepo w’akambo walendana la n’kambo djɛ djonyi.”
4. Yeembo 135:13 otepelande nge la n’kambo djɛ Ndjambe, edjinge weepó wɛkɔnge wokadjimolaso lɔ la djamba djɛnɛ?
4 Djina ‘Yehova’ ndeka wina ankfumɔ ekekete. (Wala Yeembo 135:13.) Kɛkɔnge kowila lumo lɔsɔ? Wina wɔkɔnge iyomamanyɛ akambo mbala kɛ ntondo? Wop’ɔkɔnge Ndjambe okinyɛnde djina djɛnde? La, oyɛso ladjɛ nangha nge djɛ nsuka ekina kɛ djina n’tshɔ? Tokokadjimola lá weepó wɛsɔ.
DJONYI DJƐ DJINA
5. Woopó wɔkɔnge wokoka anto amɔtshi ndawoopóla?
5 ‘Djina djɛko djale ekina.’ (Mateo 6:9) Le Yeso, ɔsɔ alekɔ n’kambo mɔtshi djɛ djonyi efula djoyɛso ladjɛ ndɔmbaka. Iya koko, wop’ɔkɔnge okokaso ndjoka otepela wɔsɔ? Nkinyɛ ekete kɛmɔtshi, nsakisolaka ndowila ekina kana piyɔɔ. Anto wamɔtshi nkoka ndaawopóla ambɔ: ‘Djina djɛ Ndjambe mboyalaká ekina la piyɔɔ, lamo oyɛwɔ ladjɛ ndjilama ekina lonkina?’ Djɛ nkadjimola la woopó wɔsɔ, iso ladjɛ ndjewa ntondo kɛnɛ kesakisola djina.
6. Kɛkɔnge kilaka djina ntshina?
6 Djina, m’palekɔ ngo alɛta wotepelawɔ la djoyi djɛ wolo kana koko wofunawɔ. Kolenda kɛnɛ kɛ Bible otepelande: ‘Djina djɛ wɔlɔ ndeke lokoka nsɔnama la ntondo kɛ okfudji w’efula.’ (Woongo 22:1; Losanghanyɛ 7:1) Ladjikɛnge djina oyɛwɔ la ntshina efula nghɔsɔ? Ladjikɛnde wambosanghanyɛ la lomo l’onto letama djina djɛkɔ, la kɛnɛ k’anto okanelawɔ lá n’kambo djɛ kanga djina djɛkɔ. Djɛko ndeke, kɛnɛ kelekɔ djonyi efula, apalekɔ wopo wofunama djina kana wopo wootepelawɔ, koko ikanyi yɛ anto lá n’kambo djɛ kanga djina djɛkɔ ndeke djonyi.
7. Wopo wɔkɔnge anto amɔtshi iyotshitaka djina djɛ Ndjambe?
7 Wina w’anto iyotepelaka ongolo la n’kambo djɛ Yehova, iwɔ ntshitaka lomo lɔnde edjinge, ndjilaka djina djɛnde mbindo. Mbala kɛ ntondo kiyamame djina djɛ Ndjambe, kana koko lomo lɔnde akambo, ayalaka ngo ma bango djɛ ɔkɔndɔ w’anto. Tokolenda olakanyelo wokokaso mba m’akambo wamboheta wasɔ.
MBALA KƐ NTONDO KIYAMAME DJINA DJƐ NDJAMBE AKAMBO
8. Adama nya Eva iyewaka nge, edjinge weepó wɛkɔnge woopólama?
8 Adama ny’Eva wewaki ambɔ djina djɛ Ndjambe nde Yehova. Wewaki lonkina akambo efula wa djonyi lá n’kambo djɛnde ambɔ: Nde alekɔ Ontongi, atongaka, edjinge apɛyɛka idjena yɛ wɔlɔ yɛ paradiso djɛ nyintatshɛ la wadji kana wome wɔ djɔ. (Ewangelo 1:26-28; 2:18) Okanelɛ mo, iwɔ wakambaka la timba tɔwɔ tɔ djɔ djɛ nkindjɛ ntɔnɔla lá kɛnɛ kɛ Ndjambe kewɔ ndananghela? Wakindjɛka nkembɛ ngandji kɛwɔ la djedjɛ djɛwɔ te onto wetamaki lá djina djɛ ‘Yehova’? Ekadjimwelo la weepó wɛsɔ wɛnamaká papoo wina wɔ ontonyi wɔ Ndjambe ndaahembe.
9. Lá nkilika Ewangelo 2:16, 17 ; 3:1-5, Yehova ndashimela antshukanyi wa ntondo ante mo, ko wopo wɔkɔnge Satana ndakadjimola nsɔsɔlɔ tá nyɛtshi?
9 Wala Ewangelo 2:16, 17 ; 3:1-5. Ma lotshimbo lɔ ndjɔ, Satana opolaka Eva ante: ‘Nsɔsɔlɔ Ndjambe anyoshimelaka ante nyotalɛke mbambo yima etamba enkfumɔ wela bedji?’ Woopó wɔsɔ wɛnamaki wɔlɔ ntshende woyalaka la ongolo l’eteyi, ayalaka ngete lɔlɛngɔ lisamaka l’eteyi. Kɛnɛ kɛ Ndjambe ndatepela nsɔsɔlɔ nde, iwɔ wakokaki ndɛ mbambo yima etamba enkfumɔ, nyimɛ ngo otamba ɔmɔ toko. Lonkina, wepo w’etamba wetshikitakinyi weyalaka lá bedji djɛ Ɛdɛna. (Ewa. 2:9) Nyɛnamaka ipá l’ehamo ente Yehova alekɔ Ndjambe kɛ lokapo. Nde apekalaka Adama nya Eva djipa iwɔ ndɛ mbambo yima otamba wotshikitanyi la enkina, koko woopó wɔ Satana wokadjimolaka nsɔsɔlɔ otá nyɛtshi. W’ɛnyɛka etengo Yehova apalekɔ kanga lokapo. Mbala imɔtshi Eva akokaka ndaawopola ante: ‘Nde Ndjambe hanɛ atisaka ekete kɛmɔtshi kɛ wɔlɔ?’
10. Wopo wɔkɔnge Satana ndamamanyɛ djina djɛ Ndjambe akambo lá lɛdji lɔ papoo, iya koko eposelo wɛkɔnge weyalisa lá n’kambo n’tshɔ?
10 Etena kɛsɔ, Eva ɔsaki Yehova ngete Owandji wɔnde. Nde akadjimolaka Satana laandohetola ɔlɛmbɛ wɔ papoo wɔ Yehova ndilelá Adama. Ko, ndombá akfɛka lonkina ante wapakoke kaanga nkota otamba wɔkɔ. Nde ewaki ante, ntsha wambopendola ɔlɛmbɛ wɔsɔ, wangovɔ ladjikɛnde Yehova apɛyɛka ndjewo. Koko, Satana okadjimolaka ante: ‘Nyopangovɔ mbɔɔ.’ (Ewa. 3:2-4) Ongolo wɔnde wotisama lonkina. Satana amamaka lá lɛdji lɔ papoo djina djɛ Ndjambe, laandatepela ante nde alekɔ kanga ongolo. Masɔ ndeke ndakome Djabolo, kana kanga omamanyɛ. Eva adjimbamaka, nde awolaka Satana. (1 Ti. 2:14) Nde awolaka Satana efula ndeka Yehova. N’kambo djɛsɔ djókomɛka djɛ nde ndɔsa n’kano djɛ nyɛtshi efula: Nde atsholaka Ndjambe. Ko ndombotateyɛ ndɛ lowambo l’otamba wɔ iyapekala. Edjinge lɔkɔngɔ, ayɛka ndɔpɛyɛ Adama.—Ewa. 3:6.
11. Kɛkɔnge kɛ Adama nya Eva iyakoke nangha?
11 Kɔtɔnɔla ndambo lá kɛnɛ kɛ Eva ndákoke nshimela Satana. Kokanela ndambo, otookadjimolande ante: “Lemi mpokewe kaanga ndambo, koko lemi ndjewaka Papa kɛmi Yehova. Lemi ndɔɔkɔpaka edjinge lemi ndjalaka la djawo tende. N’kete nkfumɔ djokotshɛso lemi la Adama, ngo nde ndeke lɔtɔpɛyisa. Okokɛ ntepela nyɛtshi lá n’kambo djɛnde nghɔsɔ ngete mo? Ombangɔ!” Ɔsɔngo Yehova otayalande la osasa djɛ ndjoka wɔnande wɔ womoto ɛnyɛ ngandji la n’kɔmano djɛnde tende nghɔsɔ! (Woongo 27:11) Koko Eva atayala la ngandji edjinge n’kɔmano djɛ nghɔsɔ tende, edjinge Adama ngo wopo wɔkɔ! Ngete iyotayala la ngandji edjinge n’kɔmano te Papa kɛwɔ, watáseela djina djɛnde ma emamanyɛ wɛ Satana.
12. Satana ndatshinde Eva djɛ ndjala la ehamo la n’kambo djɛkɔnge, iya koko Adama nya Eva iyakoke nangha nge?
12 Ngete isɛnaki, Satana atateyɛka nyɔnyɔla djina djɛ Ndjambe laanda tshinde Eva djɛ nde ndjala la ehamo la wopo w’onto wolekɔ Yehova. Djoyi djɛ nyɛtshi nde, Adama nya Eva wata suka djina djɛ nde kana ntepela ente lomo lɔnde. Iwɔ wawolaka etepela wɛ Satana, ko iyombo mpendola Papa kɛwɔ. Ngo toopo tɔkɔ tɔmɔ ndeke Satana okambande lɔɔko kɛnɛ. Nde nyɔnyɔlaka lomo lɔ Yehova lá wopo wɔ ndotepelaka ongolo la n’kambo djɛnde. Waawolá ongolo wɔsɔ nkoka mbala kɛkɔ kɛmɔ tona ɛlɔndjɛlɔ kɛ djɔɔ kɛ Yehova.
YEHOVA AKINYƐ DJINA DJƐNDE
13. Ezekiyɛlɛ 36:23 ɔkɔkɔmɛnde djɛ losango lɔ Bible ngete mo?
13 Wopo womamanyɛwɔ Yehova akambo ndokomɛka djipa nde nseela djina djɛnde? Ape nghɔsɔ! Bible k’otondo nyɛnyɛka kɛnɛ kɛ Yehova onanghande djɛ nseela djina djɛnde má emamanyɛ wiyomame lá Ɛdɛna. (Ewa. 3:15) Djɛko ndeke, losango lɔ Bible k’otondo nkoka ndjetama lá yopasɛ nghɔnɛ: Yehova akinyɛ djina djɛnde ma lotshimbo lɔ onkfumi wɔlɔndjɛ Wɔnande, edjinge ɛkɔpa kɛnde ndé djɛ ndjila sii la mvu la looko. Bible ntokotshɛka djɛ ndjewa wopo w’onanghande djɛ nkinyɛ djina djɛnde.—Wala Ezekiyɛlɛ 36:23.
14. Wopo wɔkɔnge, ndjelo kɛ Yehova lá mpendo keyalisa l’Ɛdɛna okinyɛwɔ djina djɛnde?
14 Satana nanghaka k’enkfumɔ koyɛnde ladjɛ nangha djɛ nshimba Yehova djɛnde nkotshɛ ikanyi yɛnde. Koko welo wɛnde enkfumɔ wɛsɔ wepalonge. Wamba wele lá Bible nyɛnyɛka wopo wɔ Yehova ɔlɔndjɛnde n’kambo n’tshɔ, la wopo welolande n’kambo djɛkɔ ɛnyɛ ente lako onto wolekɔ ngete nde. Nsɔsɔlɔ, mpendo kɛ Satana edjinge kɛ anto ankfumɔ wósuka ntshutshumadjɛka Yehova efula. (Yee. 78:40) Kaanga oyɛwɔ nghɔsɔ, nde angelolake akambo la balo, la bale ntshitshi edjinge la sii. Nde nkambaka la nkfulu kɛnde k’enkfumɔ lá toopo efula. Pekapeka, ngandji kɛnde kɛnama papoo l’akambo ankfumɔ wonanghande. (1 Dj. 4:8) Nsɔsɔlɔ, Yehova apangotshika nkinyɛ djina djɛnde lotshinda lotshinda.
Satana asimelaka Eva akambo wongolo la kɛnɛ kelendena la Yehova, ko meteyi, apatshikaka ndoomamanyɛ akambo (Lenda etenyi kɛ 9-10, 15) *
15. Wopo wɔkɔnge Satana ɔnyɔlande djina djɛ Ndjambe lɔɔko kɛnɛ, iyakoko lɔɔla lɔkɔnge lomboposa?
15 Lɔɔko kɛnɛ, Satana akindjɛ ngo nyɔnyɔla djina djɛ Ndjambe. Nde ndjimbolaka anto djiwɔ ndjala la ehamo ambɔ Ndjambe apalekɔ la nkfulu, sii, balo edjinge ngandji. Ndjɔmbɔmba, nde mponaka djɛ anto wawole ambɔ Yehova apalekɔ Ontongi. Ko le asekanela ambɔ Ndjambe alekɔ, nde mponaka djɛ wawole ambɔ ɛlɛmbɛ wɛ nde wepalekɔ sii edjinge nde ndapekalaka lotshungɔ lɔwɔ. Nde mpoposanyɛka edjinge ikanyi yɛnɛ: Yehova alekɔ Ndjambe kɛ oloko wolo, angotshumbake anto lá iyɛ ntsha ko l’ifɛrnɔ. Waawolá engolo wɛsɔ nkoka ntona ngo mbala kɛkɔ kɛmɔ ɛlɔndjɛlɔ kɛnde kɛ sii. Tii loshi lɔ ndongoyakema, Satana angokindjɛka nangha nkopo inkfumɔ djɛ mamanyɛ Ndjambe akambo edjinge mpona djɛ ntokadjimola tende. Wɛ ongopikama?
WOPO WOLENDANƐ LA N’KAMBO DJƐ DJONYI
16. Ɔsɔnwɔlɔ wɔkɔnge wotshikitanyi la wɔ Adama ny’Eva, wokokɛ nangha?
16 Yehova mpɛyɛka anto wa n’tshamba djɛ djɔ mbamba kɛ iwɔ ndjila lɔwɔ lá okinyelo wɔ djina djɛnde. Wɛ olekɔ la mbamba kɛ nangha kɛnɛ kɛ Adama ny’Eva iyotanangha. Ngete intatshɛso l’andja wele anto efula walekɔ mamanyɛ la ntola djina djɛ Ndjambe, olekɔ la mbamba kɛ nsɔna djɛ nsuka akambo wa nsɔsɔlɔ, lá nshimela anto wakodjingi ente Yehova alekɔ ekina, sii, oloko wɔlɔ, edjinge ambolola tɔɔ la ngandji. (Izaya 29:23) Edjinge wɛ nkoka nsuka ɛlɔndjɛlɔ kɛndɛ. Wɛ nkoka nsipisoyɛ anto ente ɛlɔndjɛlɔ kɛsɔ toko ndeke longotoyakala mvu la osasa lá looko.—Yee. 37:9, 37; 146:5, 6, 10.
17. Wopo wɔkɔnge Yeso ndewanyɛ djina djɛ Papa kɛnde le anto?
17 Wina wosukaso djina djɛ Yehova, iso ndjekolaka Yeso. (Djɔanɛ 17:26) Yeso ewanyɛka djina djɛ Papa kɛnde. Lá wopo wɔkɔnge? Apengo lá wopo wɔ ndakambe la djina djɛkɔ toko, koko edjinge lá wopo wɔ ndasuke lomo lɔnde. Ndjɔmbɔmba, Yeso atonaka tokanyi tɔ Afarisɛ wanɛ wɔsaki Yehova ngete Ndjambe kɛ oloko wolo, apokaka anto nkɛtshi, wayi wolo la kɛ imbango l’anto. Nde akotshɛka anto djɛ ndjoka ambɔ: Papa kɛnde alekɔ sii, bale ntshitshi, ambolola tɔɔ la ngandji edjinge etshupa djɛ nyimeyɛ evunga. Nde akotshɛka lonkina dj’iwo ‘nyɛna’ Yehova lá wopo wɔ ndeekola wɔlɔ wɔlɔ wékéka wande lá lowiko lɔnde lɔ loshi la loshi.—Dj. 14:9.
18. Wopo wɔkɔnge oyɛso ladjɛ ndjisola engolo la emamanyɛ wiya mame Yehova?
18 Ngo ngete Yeso, nyotshɔ tolakanyɛ anto ankina kɛnɛ kewaso lá n’kambo djɛ Yehova, lá ndaasipisoyɛ ente Yehova alekɔ wɔlɔ la ndola tɔɔ la ngandji. Má nangha nghɔsɔ tongisola ongolo la emamanyɛ wiyo mame, la tongokinyɛ djina djɛnde, ladjikɛnde tongokotshɛ anto djɛ ndɔsa djina djɛkɔ ngete ekina. Lonkina, nyotshɔ tokole Yehova. Kaanga oyɛso anto wa n’tshamba djɛ djɔ tokoka ndonga. (Ɛfɛ. 5:1, 2) Má etepela wɛso edjinge nanghedji djɛso, iso mpɛyɛka anto mbamba kɛ iwo ndembetela wopo wɔkɔnge w’onto Yehova oyɛnde nsɔsɔlɔ, laa onanghaso nghɔsɔ tongila lɔwɔ lá okinyelo wɔ djina djɛnde. Iso nseelaka djina djɛnde * lá nkotshɛ anto djɛ iwɔ ntshungɔ ma tokanyi tɔ nyɛtshi towawɔ la n’kambo djɛ nde. Lonkina iso nkoka nseela djina djɛnde lá ntshikala la n’kɔmano kaanga oyɛso anto wa ntshamba djɛ djɔ.—Djɔbɔ 27:5.
Iso nkɔpaka nkotshɛ ambeki waso wa Bible djɛ iwɔ ndjoka ambɔ Yehova alekɔ wɔlɔ edjinge ndola tɔɔ la ngandji (Lenda etenyi kɛ 18-19) *
19. Wopo wɔkɔnge Izaya 63:7 otokotshɛnde djɛ ndjewa okoma wɔso wɔ ntondo wina wolakanyɛso anto akina?
19 Iso nkoka nangha djoyi nkina lonkina djɛ nkinyɛ djina djɛ Ndjambe. Wina wolakanyɛso anto nsɔsɔlɔ kima Bible, iso mpetshɛka la ntondo ikanyi yɛ entengo Yehova oyɛnde Nkfumi kɛ andja w’otondo, nde alekɔ la lotshungɔ lɔ ndɔlɔndjɛ, oyɛwɔ nde nghɔsɔ. Koko, kaanga oyɛwɔ djonyi ndakanyɛ ɛlɛmbɛ wɛ Ndjambe, okoma wɔso wɔ ntondo nde, nkotshɛ anto djɛ iwɔ nkɔpa Papa kɛso Yehova la ndjala la n’kɔmano teende. Djɛ nkotshɛ okoma wɔsɔ ngo iso mpika ikfɔ lá nanghedji djɛnde djɛ wɔlɔ, kana ntepela ente wopo w’Onto woyɛnde entengo djina djɛnde ɛnyɛnde. (Wala Izaya 63:7.) Lá nangha nghɔsɔ, tongokotshɛ anto djɛ ndɔɔkɔpa la ndjala la mposɛ kɛ ntshikala la n’kɔmano tende.
20. Isɔngɛna nge la djamba djeyaye?
20 Lá ndjamba djeyaye, tɔngɛna nkopo inkina efula y’oyɛsɔ la djɛ nangha djɛ numɛ djina djɛ Ndjambe la nsepa anto teende má nanghedji djɛso edjinge má olakanyelo wɔso.
YEEMBO 2 Ndjina djɛko nde Yehova (lá Otetela)
^ par. 5 N’kambo djɛkɔnge djolendana l’anto ankfumɔ edjinge andjelo ankfumɔ? Ladjikɛnge oyɛwɔ djonyi efula, edjinge wopo ɔkɔnge wolendanaso la n’kambo n’tshɔ? Wekelo wɔ lotshimola lá n’kambo n’tshɔ wongotokotshɛ djɛ nkembɛ djokanelo djɛso la Yehova.
^ par. 18 N’tena mɔtshi, enkanda wɛso wemboshiyɛka ndakanyɛ ambɔ djina djɛ Ndjambe m’palekɔ la djonyi djɛ ‘ndooseela’, ladjikɛnde lako kanga onto lombila ehamo la lotshungɔ lɔnde lɔ ndjetama ma djina n’tshɔ. Koko eokelo kɛso la n’kambo n’tshɔ kɛmbɔlɔngɔswama lá Losanghanyɛ lelá ɔnɔnyi lɔnanghemisa l’ɔnɔnyi wɔ 2017. Ilɔndjɛ yɛ losanghanyɛ a sipisoyɛka ante: ‘Lako nyɛtshi ndɔmba djɛ djina djɛ Yehova, lomo lɔnde, lo seelame, la ndjala piyɔɔ má emamanyɛ womamawɔ.’—Lenda emisiɔ wɛ JW Télédiffusion wɛ Ngɔndɔ kɛ ntondo 2018, (lá Falase) tshɔka tá jw.org®, lá yombofuna ambɔ BIBLIOTHÈQUE masɔ JW TÉLÉDIFFUSION.
^ par. 62 NSAKISO Y’ASANGO N’KISHI: Djabolo amamanyɛka Ndjambe laandashimela Eva ante nde odjimbaka. Meteyi, nde akindjɛka mpoposanyɛ tokanyi tongolo lá n’kambo djɛ nde, lá wopo wotshindande anto djɛ ndjawola ambɔ Ndjambe alekɔ oloko wolo edjinge, lowiko lotatonghama koko, iyapose nde eposaposa.
^ par. 64 NSAKISO Y’ASANGO N’KISHI: Wɔna nyɛnghɛso alɔndjɛ wekelo wɔ Bible ambila la ntondo wekeka wa Yehova.
