1-2. Un soni dë gaan fanöudu soni da dee Jehovah Kotoigi?

HII sëmbë tuu musu sabi taa Jehovah Gadu wanwan tö abi di leti u tii, nöö u ta wakiti u di në u Jehovah ko limbo. U dee Jehovah Kotoigi lo’ u taki u dee fanöudu soni aki. Ma di sabi di sëmbë musu ko sabi taa Jehovah hën abi di leti u tii, ku di ko di di në u Gadu musu ko limbo, da tu tooka soni ö? Wë nönö.

² Hii u tuu ko fusutan taa di në u Gadu musu ko limbo. Boiti di dë, u ko fusutan taa hii sëmbë tuu musu ko sabi taa di fasi fa Jehovah ta tii, hën da di möön bunuwan. Dee tu soni aki dë fanöudu.

3. Ku andi di në u Gadu nama?

³ Di në Jehovah ta konda hii soni u Gadu kaa, te kisi di fasi fa a ta tii tu. Fëën mbei ee u ta taki taa di limbo di di në u Jehovah musu ko limbo da di möön fanöudu soni, nöö hën da u ta taki tu taa sëmbë musu ko sabi taa di fasi fa Jehovah ta tii, da di möön bunuwan. Jehovah da di Gadu di abi hii makiti a mundu, nöö di në fëën ta nama gaanfa ku di fasi fa a ta tii.​—Luku di pisi „ Dee soni dee nama ku wan gaan soni di musu seeka”.

4. Andi Psalöm 135:13 ta taki u di në u Gadu, nöö andi woo taki a di woto aki?

⁴ Di në Jehovah da wan apaiti në. (Lesi Psalöm 135:13.) Faandi mbei di në u Gadu dë fanöudu sö? Na un ten sëmbë poi ën u di fosu pasi? Unfa Gadu ta mbei di në fëën ko limbo? Söseei unfa useei sa mbei di në fëën ko limbo? Boo taki u dee soni aki.

5. Andi so sëmbë sa hakisi te de jei taa di në u Gadu musu ko santa?

⁵ „Be di në fii ko santa e” (Mat. 6:9, NW). Jesosi bi taki taa di soni aki musu dë wan u dee möön fanöudu soni di u musu ta begi taa musu pasa. Ma andi Jesosi bi kë taki ku di soni aki? Te i ta mbei wan soni ko santa, hën da i ta mbei a ko limbo. Ma so sëmbë sa hakisi deseei taa: ’Jehovah në an dë limbolimbo kaa nö?’ Fuu sa ko fusutan di soni aki, nöö u musu ko fusutan andi da wan në.

6. Andi ta mbei wan në ko dë apaiti?

⁶ Di në u wan sëmbë an dë wan soni di i sa sikifi a pampia nöö, nasö di i sa kai nöö a kaba. Luku andi di Bëibel ta taki. A ta taki taa: „A möön bunu fii abi wan bunu në, ka fii abi hia gudu” (Nöng. 22:1; Peleik. 7:1). Faandi mbei në da wan gaan soni sö? Biga a ta nama ku di fasi fa wotowan sabi wan sëmbë, nasö ku di fasi fa wotowan ta si di sëmbë di abi di në. Fëën mbei na di fasi fa wan në ta sikifi nasö di fasi fa sëmbë ta kai ën da di möön fanöudu soni. Di möön fanöudu soni, hën da di soni di sëmbë ta pakisei te de jei di në nasö te de si di në sikifisikifi.

7. Unfa sëmbë bi suku u poi Gadu në?

⁷ Te sëmbë ta mindi soni da Jehovah, nöö de ta mbei sëmbë pakisei hogi fëën. Nöö di soni dë ta mbei sëmbë ta kaagi Gadu, ta poi hën në. A di djai u Eden sëmbë bi taki hogi u Gadu u di fosu pasi, söseei naandë sëmbë bi suku u mbei wotowan pakisei hogi fëën u di fosu pasi. Boo luku andi u sa lei u di soni dë.

8. Andi Adam ku Eva bi sabi, nöö un soni u sa hakisi useei?

⁸ Adam ku Eva bi sabi taa Gadu në da Jehovah, söseei de bi sabi sömëni fanöudu soni fëën. De bi sabi taa hën bi mbei de, de bi sabi taa hën bi da de di waiti kamian ka de bi ta dë, söseei de bi sabi taa a bi mbei de söndö föutu u de libi ku deseei (Ken. 1:26-28; 2:18). Ma Adam ku Eva bi o ta buta mëni go dou a hii dee soni dee Jehovah bi du da de u? De bi o ta mbei möiti go dou u de ko möön lobi Jehovah u, söseei u de ko ta möön tei dee soni dee a bi du da de u bigi ö? Di di felantima u Gadu bi ko pooba de, nöö a bi ko dë gbelingbelin u si ee de bi ta du dee soni aki.

9. Andi Jehovah bi piki di fosu womi ku di fosu mujëë, te u luku Kenesesi 2:16, 17 ku 3:1-5, nöö unfa Saatan bi kë mbei de si kuma Gadu dë?

 ⁹ Lesi Kenesesi 2:16, 17 ku 3:1-5. Saatan bi tei wan sindeki, hën a du kuma di sindeki hën bi ta fan. Nöö hën a hakisi Eva taa: „A dë sö tuutuu taa Gadu taa wan musu njan dee fuuta u hii dee pau u di djai ö?” Saatan bi hakisi Eva di soni aki a wan ganjanganjan fasi faa bi sa poi Gadu në. Di soni aki mbei Eva bigi pakisei hogi u Gadu. Di soni di Gadu bi taki, hën da de bi sa njan dee fuuta u hii dee pau, boiti wan u de. Adam ku Eva bi sa njan sömëni peipei fuuta (Ken. 2:9). Jehovah da wan Sëmbë di lo’ u da sëmbë soni. Piki nöö a bi piki Adam ku Eva taa de an bi musu njan di fuuta u wan u dee pau. Ma Saatan bi ko bia di soni buta ko nëën fasi. Saatan bi mbei de si kuma Gadu giii. A kan taa Eva bi hakisi hënseei taa: ’A sa dë sö taa Gadu kë tapa mi u ma feni wan bunu ö?’

10. Unfa Saatan bi suku u poi Gadu në, nöö andi bi ko pasa?

¹⁰ Di Saatan bi hakisi Eva di soni, nöö di ten dë Eva bi ta piki Gadu buka jeti. A bi piki Saatan gbelingbelin andi Gadu bi piki de. A bi taki tu taa de an bi musu panjan di pau seei. Eva bi sabi taa ee de bi pasa Gadu buka, de bi o dëdë. Ma Saatan bi toona piki ën taa: „Wan o dëdë seei” (Ken. 3:2-4). Di pasi aki, na mbei nöö Saatan bi mbei Eva si kuma Gadu ta ganjan de. Ma a bi suku u poi Gadu në. Fuu taki ën, nöö a bi piki Eva taa Jehovah da wan mindisonima. Sö wë Saatan ko toon „Didibi”, nasö wan „hogihati mindisonima”. A ganjan Eva kisi ku telu. Eva bi biibi Saatan (1 Tim. 2:14). A buta möön futoou a Saatan möön a Jehovah. Fëën mbei Eva mbei wan gaan föutu. A pasa Jehovah buka, hën a njan di fuuta di Jehovah bi bai ën taa an musu njan. Bakaten, hën a da Adam faa njan tu.​—Ken. 3:6.

11. Andi Adam ku Eva bi sa du, ma andi de an bi du?

¹¹ Pakisei luku andi Eva bi musu piki Saatan. Boo taa a bi piki Saatan taa: „Ma sabi i, ma mi sabi mi Tata Jehovah, nöö mi lobi ën, söseei mi ta futoou ën. Hën da mi ku Adam hii soni di u abi. Unfa i sa peevu taki hogi fëën? Go kumutu a mi aki!” Na piki wai Jehovah bi o wai ee a bi jei di mujëë mii fëën taki sö wan soni! (Nöng. 27:11) Ma Eva an bi lei taa a lobi Jehovah a di lö fasi dë, nöö Adam seei an bi du ën tu. U di Adam ku Eva an bi lobi di Tata u de a di lö fasi dë, mbei de an bi tei ën së di di felantima fëën bi mindi soni dëën u poi hën në.

12. Unfa Saatan bi du soni u mbei Eva bigi ko ta si Jehovah wan fasi, nöö andi Adam ku Eva an bi du?

¹² Wë kumafa u si, nöö a di bigi, Saatan bi du soni u mbei Eva bigi ko ta si Jehovah wan fasi. A bi kë u Eva bia ko ta hakisi hënseei ee Jehovah, di Tata u de, bi dë wan bumbuu sëmbë. Adam ku Eva an bi hopo taki da Jehovah di Saatan bi mindi soni da Jehovah u poi hën në. De disa Saatan be a piki de soni, di mbei taa te u kaba fëën de pasa de Tata buka. Sö nöö Saatan ta du soni a di ten aki tu. A ta mindi soni  da Jehovah u poi hën në. Dee sëmbë dee ta biibi dee mindimindi soni u Saatan an ta kë ta saka deseei a Jehovah basu.

13. Unfa Ezekiëli 36:23 ta lei andi da di möön fanöudu bosikopu u Bëibel?

¹³ Jehovah ta disa sëmbë ta mindi dee soni aki dëën söndö faa du wan soni ö? Wë nönö! Hii dee soni dee sikifi a di Bëibel ta piki u andi Jehovah du u lei taa dee soni di Saatan bi taki fëën a di djai u Eden, an dë sö tuutuu (Ken. 3:15). Fuu taki ën, nöö di möön fanöudu bosikopu u Bëibel da disi: Jehovah ta tei di Könuköndë di di Womi Mii fëën ta tii, u mbei di në fëën ko santa, söseei u mbei leti libi ku bööböö libi ko dë a goonliba. Di Bëibel ta taki soni di ta heepi u fuu fusutan unfa Jehovah ta mbei di në fëën ko santa.​—Lesi Ezekiëli 36:23.

14. Unfa di fasi fa Jehovah du soni di sëmbë bi hopo fia ku ën a di djai u Eden, bi mbei di në fëën ko santa?

¹⁴ Saatan mbei hii möiti di a sa, u tapa Jehovah fu an sa du di soni di a abi a pakisei u du. Ma Saatan an sa tapa Jehovah. Dee soni dee sikifi a di Bëibel ta lei u unfa Jehovah du soni, nöö sö u ta si taa na wan woto sëmbë dë kuma Jehovah Gadu. Na piki pen Jehovah tja u di Saatan ku dee sëmbë dee dë ku ën a wan së, hopo fia ku ën (Ps. 78:40). Ma tökuseei a du soni ku köni, ku pasensi, söseei a wan leti fasi. Boiti di dë, Jehovah lei a hii pei fasi taa a abi hii makiti. Ma di möön gaan soni, hën da hii soni di a ta du kaa, a ta du ku lobi (1 Joh. 4:8). Jehovah ta wooko go dou u mbei di në fëën ko santa.

15. Unfa Saatan ta mindi soni da Gadu u poi hën në a di ten aki, nöö andi ta pasa te u kaba fëën?

¹⁵ Saatan ta mindi soni da Gadu u poi hën në jeti. A ta pooba u mbei sëmbë ko ta hakisi deseei ee Gadu abi makiti tuutuu, ee a ta libi leti tuutuu, ee a köni tuutuu, söseei ee a lobi sëmbë tuutuu. Saatan ta pooba u mbei sëmbë ko ta biibi taa na Jehovah hën mbei soni. Ma ee a ko dë taa so sëmbë ta biibi taa wan Gadu dë seei, nöö Saatan ta suku u mbei de ko ta si kuma Gadu ta buta te a hia wëti da sëmbë u tapa de u de an libi kumafa de kë. A ta suku u mbei sëmbë biibi tu taa Jehovah da wan Gadu  di abi hogihati, söseei taa a dë wan Gadu di ta tjuma sëmbë a faja. Te sëmbë biibi dee mindimindi soni dë, nöö te u kaba fëën, de an ta kë saka deseei a di tii u Jehovah basu möön. Solanga Jehovah an puu Saatan a pasi, a o ta mbei möiti go dou faa poi Jehovah në. Söseei a o suku faa mbei iseei disa Jehovah tu. Saatan o sa du di soni di a kë du ö?

16. Un soni di Adam ku Eva an bi du, ii sa du?

¹⁶ Jehovah ta da zöndu libisëmbë pasi u de sa wooko makandi ku ën u mbei di në fëën ko santa. Fuu taki ën, nöö pasi jabi da i fii du di soni di Adam ku Eva an bi du. Hii fa i ta libi a wan goonliba di fuu ku sëmbë di ta mindi soni da Gadu ta poi Gadu në, tökuseei i sa lei taa ii tei Jehovah së. I sa mbei sëmbë ko si taa Jehovah da wan Gadu di santa, di ta du soni a wan leti fasi, di abi bunuhati, söseei di abi lobi (Jes. 29:23). I sa lei taa Jehovah ii kë taa musu tii i. I sa heepi sëmbë u de ko fusutan taa Jehovah wanwan nöö ta tii a wan leti fasi tuutuu, söseei taa di tii fëën wanwan nöö sa mbei soni ko ta waka bunu a goonliba.​—Ps. 37:9, 37; 146:5, 6, 10.

17. Andi Jesosi bi du u mbei sëmbë ko sabi hën Tata në?

¹⁷ Te u ta mbei möiti u di në u Jehovah sa ko santa, nöö a o dë taa u ta waka a Jesosi baka (Joh. 17:26). Jesosi bi mbei sëmbë ko sabi di në fëën Tata, u di a bi ta kai hën Tata në te a bi ta fan, söseei u di a bi ta lei sëmbë unfa Jehovah dë tuutuu. Jesosi bi lei dee Faliseima unfa Jehovah dë tuutuu. Biga de bi ta mbei sëmbë ta si Jehovah kuma wan Gadu di abi hogihati, di ta suku fini a sëmbë, di sëmbë an sa ko zuntu fëën, söseei kuma wan Gadu di an abi tjalihati u sëmbë. Jesosi bi heepi sëmbë u de ko fusutan taa hën Tata da wan sëmbë di ta fusutan sëmbë, di abi pasensi, di lo’ sëmbë, söseei di ta da sëmbë paadon. Boiti di dë, Jesosi bi da sëmbë taanga u de luku di fasi fa a bi ta libi, u de bi sa ko sabi unfa Gadu dë tuutuu.​—Joh. 14:9.

18. Andi u sa du u mbei sëmbë ko sabi taa dee hogi soni di dee felantima u Jehovah bi taki fëën, an dë sö tuutuu?

¹⁸ Useei sa du di soni di Jesosi bi du. U sa konda dee soni dee u sabi u Jehovah da sëmbë, söseei u sa heepi de u de ko si unfa a abi bunu fasi tjika, ku unfa a lobi sëmbë tjika. Te u ta du sö, nöö u ta heepi sëmbë u de ko si taa dee hogi soni di dee felantima u Jehovah bi  taki fëën, an dë sö tuutuu. U ta mbei sëmbë ko si taa Jehovah në santa, te u ta heepi de u de pakisei bunu fëën. U sa djeesi Jehovah tu. U sa du di soni aki aluwasi u da zöndu libisëmbë (Ef. 5:1, 2). Te dee soni dee u ta taki ku dee soni dee u ta du ta heepi sëmbë u de ko si unfa Jehovah dë tuutuu, nöö hën da u ta wooko makandi ku Jehovah u mbei di në fëën ko santa. U ta mbei sëmbë ko sabi taa Jehovah da wan bumbuu Gadu, te u ta heepi de u de ko sabi unfa a dë tuutuu. U ta mbei sëmbë ko sabi tu taa Jehovah në santa, te u ta hoi useei nëën, hii fa u da zöndu libisëmbë.​—Jöpu 27:5.

19. Unfa Jesaaja 63:7 ta heepi u fuu si andi musu dë di möön fanöudu soni te u ta lei sëmbë soni?

¹⁹ Wan woto soni dë di u sa du u mbei sëmbë ko si taa Jehovah në santa. Te u ta lei sëmbë soni u Bëibel, nöö u lo’ u heepi de u de fusutan taa Jehovah hën abi leti u tii hii di mundu. Ma hii fa a dë fanöudu u heepi de u de ko sabi dee wëti u Gadu, di möön fanöudu soni di u musu du, hën da u musu heepi de u de ko lobi Jehovah di Tata fuu, söseei u de hoi deseei nëën. Fëën mbei u musu ta heepi de u de ko sabi dee bunu fasi dee Jehovah abi, söseei u musu ta heepi de u de ko sabi un pei sëmbë Jehovah dë. (Lesi Jesaaja 63:7.) Te u ta lei sëmbë soni a di lö fasi aki, nöö woo heepi de u de ko lobi Jehovah, söseei u de ta piki hën buka a soni, u di de lobi ën.

20. Fuun soni woo taki a di woto di ta ko?

²⁰ Ma unfa u sa du soni, faa dë taa di fasi fa u ta libi ku di fasi fa u ta lei sëmbë soni, sa heepi de u de pakisei bunu u Jehovah te de jei di në fëën? Söseei unfa u sa du hai sëmbë tja ko nëën? Woo taki u dee soni aki a di woto di ta ko.