1-2. Sortu tori prenspari srefisrefi gi Yehovah Kotoigi?

ALA sma musu sabi taki Yehovah Gado abi a reti fu tiri èn taki a nen fu en musu kon krin. Leki Yehovah Kotoigi wi lobi taki fu den prenspari tori disi. Ma a de so taki a reti di Gado abi fu tiri èn a nen fu en di musu kon santa no abi noti fu du nanga makandra? Nôno.

² Wi alamala e frustan taki a nen fu Gado musu kon santa. Wi leri tu taki ala sma musu kon sabi taki Yehovah na a moro bun Tiriman. Den tu sani disi prenspari gi wi leki Yehovah Kotoigi.

3. Nanga san a nen Yehovah abi fu du?

³ A nen Yehovah abi fu du nanga ala sani fu Gado, sosrefi nanga a fasi fa a e tiri. Sobun, efu a nen fu Yehovah musu kon krin noso santa, dan dati wani taki tu dati ala sma musu kon sabi taki en na a moro bun Tiriman. Efu Yehovah na wan Gado di santa èn di e du san reti ala ten, dan a musu de so taki en na wan bun Tiriman.​—Luku a faki „ Difrenti sani di abi fu du nanga a nen fu Gado di musu kon santa”.

4. San Psalm 135:13 e taki fu a nen fu Gado èn sortu aksi wi o luku na ini na artikel disi?

⁴ A nen Yehovah na wan aparti nen. (Leisi Psalm  135:13.) Fu san ede Gado nen prenspari so? O ten sma bigin pori en nen? Fa Gado e meki en nen kon santa? Fa wi kan yepi krin a nen fu en? Meki wi go luku a piki tapu den aksi disi.

5. San son sma e aksi densrefi te den yere taki a nen fu Gado musu kon santa?

⁵ „Meki yu nen de santa” (Mat. 6:9). Yesus taki dati disi na wan fu den moro prenspari sani gi san wi musu begi. Ma san den wortu disi wani taki? Fu meki wan sani kon santa wani taki fu krin en. Kande son sma e aksi densrefi: ’A nen fu Yehovah no santa kaba?’ Fu piki na aksi disi wi musu prakseri san wan nen e taki fu wan sma.

6. Fu san ede Bijbel e taki dati „a moro betre fu abi wan bun nen”?

⁶ Wan nen a no wan wortu nomo di yu e skrifi tapu wan papira noso di yu e taki. Bijbel e taki: „A moro betre fu abi wan bun nen, leki fu abi furu gudu” (Odo 22:1; Preik. 7:1). Fu san ede Bijbel e taki dati? Fu di a nen fu wi abi fu du nanga a fasi fa sma sabi wi. Sobun, a fasi fa wi e skrifi wan nen noso a fasi fa wi e taki en a no a moro prenspari sani. San moro prenspari, na fa tra sma e denki fu a sma di e tyari a nen dati.

7. Fa sma gi Gado porinen?

⁷ Te sma e taki lei fu Yehovah den e meki trawan denki takru fu en. Na so den e gi en porinen. A fosi leisi di sma lei gi Gado na syatu baka di a ben meki libisma. Meki wi go luku san wi kan leri fu a sani disi.

8. San Adam nanga Eva ben sabi èn sortu aksi wi o luku?

⁸ Adam nanga Eva ben sabi Yehovah nen èn den ben sabi furu prenspari sani fu en. Den ben sabi taki en na a Mekiman, a sma di gi den libi, a sma di gi den wan moi presi fu tan èn di gi den wan patna di no ben abi sondu (Gen. 1:26-28; 2:18). Ma den ben o tan prakseri  ala den bun sani di Yehovah ben du gi den? Den ben o kon abi moro lobi nanga warderi gi Yehovah? Wi o kisi a piki tapu den aksi disi te wi o luku san den du di wan feanti fu Gado tesi den.

9. San Yehovah ben taigi Adam nanga Eva na ini Genesis 2:16, 17 nanga 3:1-5? Ma fa Satan ben wani meki den denki takru fu Yehovah?

⁹ Leisi Genesis 2:16, 17 nanga 3:1-5. Satan ben gebroiki wan sneki fu taki nanga Eva. A aksi Eva: „A de so trutru taki Gado taki dati un no musu nyan fu ala den bon na ini a dyari?” Na aksi di Satan poti ben abi wan lei na ini èn a ben wani taki Eva denki takru fu Gado. Gado ben taki dati den ben mag nyan fu ala den bon, boiti wán. Adam nanga Eva ben kan nyan den froktu fu omeni tra bon (Gen. 2:9). Iya, Yehovah ben gi den furu sani. Ma Gado ben taigi den taki den no ben mag nyan a froktu fu wán bon nomo. Sobun, na aksi di Satan ben poti ben meki a gersi leki Gado gridi. Kande Eva ben aksi ensrefi: ’Wan sani de di Gado no wani gi mi?’

10. Sortu lei Satan taki fu Gado èn san ben de a bakapisi?

¹⁰ Di Satan poti na aksi gi Eva, dan Eva ben gi yesi ete na Yehovah. A taigi Satan precies san Gado ben taigi en. A taki tu dati den no ben mag fasi a bon srefi. A ben sabi taki efu den ben trangayesi Gado den ben o dede. Ma Satan piki en: „Unu no o dede kwetikweti” (Gen. 3:2-4). Satan no ben kon nanga draidrai moro. A sori krin taki a ben wani pori a nen fu Gado èn a taigi Eva taki Yehovah e lei. Na so Satan tron wan didibri noso wan „ogri-ati leiman”. Eva bribi a lei fu Satan (1 Tim. 2:14). A ben frutrow Satan moro Yehovah. Dati meki a teki a moro don bosroiti. A trangayesi Yehovah. A nyan fu a froktu di Yehovah ben taigi en fu no nyan. Bakaten a gi Adam a froktu fu nyan.​—Gen. 3:6.

11. San Adam nanga Eva ben kan du di Satan lei gi Yehovah, ma fu san ede den no du dati?

¹¹ San Eva ben kan taigi Satan? Kon meki wi taki dati a ben taki a sani disi: „Mi no sabi yu, ma mi sabi mi Papa Yehovah. Mi lobi en èn mi e frutrow en. A gi mi nanga Adam ala san wi abi. Fa yu kan taki so wan ogri sani fu en? Gowe fu dya!” Wi kan de seiker taki Yehovah ben o breiti efu na dati en umapikin Eva ben taki (Odo 27:11). Ma Eva no ben lobi Yehovah. Adam srefi no ben lobi Yehovah. Dati meki den no ben opo taki gi en.

12. San Satan du nanga Eva èn san Adam nanga Eva no du?

¹² Soleki fa wi si, dan Satan ben taki sani di ben meki Eva tweifri efu Yehovah ben de wan bun Papa. Adam nanga Eva  no opo taki gi Yehovah. Na presi fu dati den arki Satan èn den trangayesi den Papa. Na ini a ten disi Satan e du a srefi sani. A e taki lei fu Gado èn a e gi en porinen. Te sma e bribi den lei fu Satan, dan a moro makelek gi den fu trangayesi Yehovah.

13. Fa Esekièl 36:23 e sori san na a moro prenspari boskopu fu Bijbel?

¹³ Yu denki taki Yehovah o meki sma tan pori en nen? Nôno! Na ini a heri Bijbel wi kan leisi san Yehovah du fu krin a nen fu en fu den lei di Satan fruteri na ini a dyari fu Eden (Gen. 3:15). Fu taki en leti, a moro prenspari boskopu fu Bijbel na disi: Yehovah o krin a nen fu en nanga yepi fu a Kownukondre di abi en Manpikin leki kownu. A o meki taki retidu nanga freide de na grontapu. Sobun, te wi e leisi Bijbel wi o frustan fa Yehovah o santa en nen.​—Leisi Esekièl 36:23.

14. San Yehovah du fu krin en nen?

¹⁴ Satan du ala san a man fu tapu Yehovah fu du san a abi na prakseri. Ma noiti a ben abi bun bakapisi. Bijbel e sori san Yehovah du èn a de krin taki Yehovah na wan lobi-ati Papa èn a moro bun Tiriman. A tru taki a e hati Yehovah taki Satan nanga ala sma di teki en sei opo densrefi teige en (Ps. 78:40). Ma ala ten Yehovah sori taki a abi koni, pasensi èn taki a e du san reti. A sori tu taki a abi furu makti. Ma san moro prenspari na taki a lobi fu en de fu si na ini ala san a e du (1 Yoh. 4:8). Yehovah e tan du sani fu krin en nen.

15. Fa Satan e pori a nen fu Gado na ini a ten disi èn san na a bakapisi?

¹⁵ Te nanga now Satan e pori Yehovah nen. A e kori sma fu denki taki Gado no abi makti, taki a no e du san reti, taki a no koni èn taki a no lobi sma. Fu eksempre, Satan e pruberi fu kisi sma fu bribi taki Yehovah a no a Mekiman. Èn efu sma e bribi taki wan Gado de, dan Satan  e meki den denki taki den wet fu Gado hebi tumusi. A e leri sma srefi taki Yehovah na wan ogri-ati Gado di e bron sma na ini hel. Te sma e bribi den lei disi, dan a moro makelek gi den fu no gi yesi na Yehovah. Solanga Satan de ete, a o tan panya lei fu Yehovah èn a o pruberi fu kori yu tu. Yu o meki a kisi yu?

16. Sortu sani di Adam nanga Eva no du, yu man du?

¹⁶ Yehovah e gi libisma a grani fu yepi krin a nen fu en. Sobun, yu kan du san Adam nanga Eva no du. Aladi yu e libi na ini wan grontapu di furu nanga sma di e pori Yehovah nen, toku yu abi na okasi fu opo taki gi Yehovah. Yu kan fruteri sma taki Yehovah santa, taki a e du san reti, taki a bun èn taki a lobi wi (Yes. 29:23). Yu kan sori taki yu e horibaka gi en leki tiriman. Yu kan yepi sma fu kon frustan taki Yehovah wawan man tiri na wan reti fasi èn na en wawan o tyari freide nanga koloku kon na grontapu.​—Ps. 37:9, 37; 146:5, 6, 10.

17. Fa Yesus meki sma kon sabi a nen fu en Papa?

¹⁷ Te wi e opo taki gi Yehovah wi e waka baka Yesus Krestes (Yoh. 17:26). Yesus ben meki sma kon sabi en Papa nen. A no ben gebroiki a nen nomo, ma a ben leri sma tu fa Yehovah de trutru. Fu eksempre, den Fariseiman ben gi sma a denki taki Yehovah na wan ogri-ati Gado, taki a no abi sari-ati, taki a e aksi furu fu wi èn taki a no e span nanga wi. Ma Yesus ben sori taki disi no tru. A ben yepi sma fu si taki en Papa e frustan fa sma e firi, taki a abi pasensi, a lobi sma èn a e gi pardon. A ben yepi sma fu kon sabi Yehovah tu fu di ala ten a ben sori den srefi fasi fu en Papa.​—Yoh. 14:9.

18. Fa wi kan yepi sma fu no bribi den lei di Satan e taki fu Yehovah?

¹⁸ Neleki Yesus, wi kan fruteri sma san wi sabi fu Yehovah. Na so den o kon sabi en santa nen èn den o lespeki a nen dati. Wi kan fruteri sma tu taki Yehovah na wan Gado di lobi wi èn di abi switifasi. Te wi e du dati, dan wi e yepi sma fu no bribi den lei di Satan e taki fu Yehovah.  Wi kan teki na eksempre fu Yehovah tu. Wi kan du dati aladi wi na sondusma (Ef. 5:1, 2). Den sani di wi e taki èn a fasi fa wi e tyari wisrefi kan sori sma fa Yehovah de trutru. Na so wi e yepi fu krin Yehovah nen. Wi e sori tu taki sondu libisma man tan gi yesi na Yehovah.​—Yob 27:5.

19. Fa Yesaya 63:7 e sori san na a moro prenspari sani di wi musu leri sma?

¹⁹ Wan tra sani de di wi kan du fu krin a nen fu Yehovah. Te wi e studeri Bijbel nanga sma, dan nofo tron wi e sori den taki Yehovah abi a reti fu tiri hemel nanga grontapu. Aladi wi e yepi sma fu kon sabi den wet fu Yehovah, toku a moro prenspari fu yepi den fu lobi wi Papa Yehovah èn fu tan gi yesi na en. Dati meki wi musu sori den san na den moi fasi fu Yehovah, so taki den kan sabi fa Yehovah de trutru. (Leisi Yesaya 63:7.) Te wi e gi leri na a fasi disi, wi o yepi sma fu lobi Yehovah èn fu gi yesi na en.

20. San wi o luku na ini a tra artikel?

²⁰ Fa wi kan sorgu taki a fasi fa wi e tyari wisrefi èn a fasi fa wi e gi leri e yepi sma fu denki bun fu Yehovah èn fu kon dini en? A tra artikel o piki na aksi disi.