SIHLOKO LESIFUNDVWAKO 23
“Alingcweliswe Libito Lakho”
“[Jehova], libito lakho lime kuze kube phakadze.”—HLA. 135:13.
INGOMA 10 Dvumisani Jehova Nkulunkulu Wetfu!
LOKUTAWUCOCWA NGAKO KULESIHLOKO *
1-2. Nguyiphi indzaba lebalukekile kuBoFakazi BaJehova?
LAMUHLA, tindzaba letibalulekile lesibhekene nato, kusekela bukhosi baJehova. Njengobe siBoFakazi BaJehova, siyatsandza kucoca ngalendzaba lejabulisako. Nobe kunjalo, bukhosi baNkulunkulu kanye nekungcweliswa kwelibito lakhe kutintfo letimbili letingafani yini? Cha!
2 Sonkhe kufanele siciniseke kutsi libito laNkulunkulu liyangcweliswa. Sifundzile kutsi kubusa kwaJehova kanye nebukhosi bakhe ngiko lokukahle kakhulu. Ngako-ke, lendzaba ibalulekile.
3. Lifaka ekhatsi ini libito laJehova?
3 Libito laJehova lihlanganisa tonkhe tintfo lesitatiko ngaNkulunkulu wetfu, lokufaka ekhatsi indlela yakhe yekubusa. Nangabe sitsi kungcweliswa kwelibito laJehova ngiko lokubaluleke kakhulu, sisuke sifakazela nekutsi indlela yakhe yekubusa ngiyo lekahle kakhulu. Libito laJehova liyahlobana nendlela labusa ngayo njengobe anguSomandla futsi anguMbusi.—Buka libhokisi lelitsi “ Emaciniso Endzaba Lebalulekile.”
4. Umbhalo weTihlabelelo 135:13 ulichaza njani libito laNkulunkulu, futsi ngumiphi imibuto lesitayiphendvula kulesihloko?
4 Libito lelitsi Jehova libaluleke kakhulu. (Fundza Tihlabelelo 135:13.) Kungani libito laNkulunkulu libalulekile? Lahlanjalatwa njani ekucaleni? Nkulunkulu ulingcwelisa njani? Yini lesingayenta kuze sivikele libito lakhe? Nyalo, sitayiphendvula lemibuto.
LIBALULEKE NGANI LIBITO?
5. Yini lengase ibutwe ngulabanye nabeva kutsi libito laNkulunkulu kufanele lingcweliswe?
5 “Alingcweliswe libito lakho.” (Mat. 6:9) Jesu watsi leyo yintfo lebaluleke kakhulu lokufanele siyisho nasithantaza. Asho kutsini lamavi lashiwo nguJesu? Kungcwelisa intfo letsite kusho kuyenta ibe ngcwele, futsi ihlanteke. Labanye bangase batibute kutsi, ‘Libito laJehova alisiko ngcwele futsi alikahlanteki yini?’ Kuze siphendvule lombuto, kufanele sicabange ngekutsi libito lifaka ekhatsi ini.
6. Yini leyenta libito libaluleke?
6 Libito akusilo nje ligama lesingalibhala ephepheni nobe silisho ngemlomo. Naka naku lokushiwo liBhayibheli, litsi: “Libito lelihle lincono kunemcebo lomnyenti.” (Taga 22:1; Shu. 7:1) Kungani libito libaluleke kakhulu? Kungobe lifaka ekhatsi lidvumela lemuntfu, naloko bantfu labakucabangako ngemnikati walelo bito. Ngako indlela libito lelibhalwe ngayo nobe lelibitwa ngayo akusiyo lebalulekile, kodvwa lokubaluleke kakhulu nguloko bantfu labakucabangako nababona nobe nabeva lelo bito.
7. Bantfu balihlasele njani libito laNkulunkulu?
7 Nangabe bantfu bakhuluma emanga ngaJehova, basuke benta labanye kutsi bacabange tintfo letimbi ngaye. Nangabe bantfu babona tintfo letimbi tenteka, basola Nkulunkulu futsi bahlambalate libito lakhe. Kuhlaselwa kwelibito laNkulunkulu kanye nelidvumela lakhe kwacala ensimini yase-Edeni. Cabanga ngaloko lesikufundzako kulokuhlasela.
INDLELA LIBITO LANKULUNKULU LELAHLANJALATWA NGAYO EKUCALENI
8. Yini lebeyatiwa bo-Adamu na-Eva, futsi ngumiphi imibuto lesingatibuta yona?
8 Bo-Adamu na-Eva bebalati libito laJehova, futsi bebati netintfo letinyenti letibalulekile ngaye. Bebati kutsi unguMdali wabo, ubanikete kuphila, ubanikete nendzawo lenhle yekuhlala, futsi bobabili bebete sono. (Gen. 1:26-28; 2:18) Nobe kunjalo, bebatawuchubeka yini bacabanga ngato tonkhe tintfo Jehova lebekabentele tona? Bebatawuchubeka yini bamtsandza Jehova futsi babonga ngelibito lakhe? Timphendvulo tavele taba sebaleni nje ngesikhatsi Sathane abalinga.
9. Ngekusho kwaGenesisi 2:16, 17; 3:1-5, yini Jehova layitjela umndeni wekucala, futsi Sathane wabenta njani bacabanga lokungasiko ngaJehova?
9 Fundza Genesisi 2:16, 17; 3:1-5. Asebentisa inyoka, Sathane wabuta Eva watsi: “Kodvwa ngempela Nkulunkulu ushito yini kutsi: ningadli nome ngusinye nje sitselo setihlahla letisensimini?” Sathane wabuta umbuto lobewungemanga ngaNkulunkulu, futsi Eva wacala kucabanga tintfo letimbi ngaNkulunkulu. Nkulunkulu bekatsite bebangadla kunobe ngabe ngusiphi sihlahla, ngaphandle kwasinye. Bo-Adamu na-Eva bebangadla titselo tetihlahla letinyenti. (Gen. 2:9) Kuyacaca kutsi Jehova unemusa. Nobe kunjalo, Nkulunkulu bekatjele bo-Adamu na-Eva kutsi kunesihlahla sinye lobekumelwe bangasidli. Ngako-ke emanga aSathane alishintja liciniso lebelishiwo nguNkulunkulu. Sathane wenta shengatsi Nkulunkulu ute umusa. Kungenteka Eva bekatibuta kutsi, ‘Kukhona yini lokuhle Nkulunkulu lasifihlela kona?’
10. Sathane walihlambalata njani libito laNkulunkulu, futsi loko kwaba namiphi imiphumela?
10 Ngesikhatsi Sathane abuta lombuto, Eva bekasolo amlalela Jehova. Watjela Sathane loko Jehova bekakushito. Eva waphindze washo kutsi bekungakafaneli basitsintse lesihlahla. Bekawati umyalo waNkulunkulu lobewutsi kungalaleli bekutawubangela kufa. Sathane wamphendvula watsi: “Ningeke nife.” (Gen. 3:2-4) Sathane bekangasho kutsi Jehova ucale emanga, kodvwa bekalihlambalata ngalokucondzile libito laNkulunkulu, futsi bekatjela Eva kutsi Jehova ungumcambimanga. Ngaleyo ndlela, Sathane waba nguDeveli nobe umkhohlisi. Eva wayengwa mbamba futsi wamkholwa Sathane. (1 Thim. 2:14) Wetsemba Sathane kakhulu kunaJehova. Loko kwenta kwaba melula nga-Eva kutsi ente sincumo lesibi. Wakhetsa kungamlaleli Jehova. Wadla sitselo Jehova labekatsite angasidli. Ngemuva kwaloko, wanika na-Adamu.—Gen. 3:6.
11. Yini Batali betfu bekucala lebebangayenta, futsi yini labehluleka kuyenta?
11 Asewucabange ngaloko Eva lobekufanele akusho kuSathane. Cabanga nje kube watsi: “Angikwati kutsi wena ungubani, ngati Babe wami Jehova, ngiyamtsandza futsi ngiyametsemba. Mine na-Adamu usinikete konkhe lesinako. Ungatisho njani nje letintfo letimbi kanjena ngaye? Suka la!” Jehova bekatawujabula kuva emavi lamnandzi kanjena aphuma kumtfwana wakhe lamtsandzako! (Taga 27:11.) Bo-Adamu na-Eva abazange betsembeke kuJehova. Ngenca yekutsi bebangaketsembeki kubabe wabo, bo-Adamu na-Eva behluleka kulilwela libito lakhe ngesikhatsi Sathane alihlambalata.
12. Sathane wakufaka njani kungabata engcondvweni ya-Eva, futsi yini Adamu na-Eva labehluleka kuyenta?
12 Njengobe sibonile, Sathane wacala kufaka kungabata engcondvweni ya-Eva ngekutsi amente angabate kutsi Jehova unguBabe lokahle yini. Bo-Adamu na-Eva abazange balilwele libito laJehova kulamanga aSathane. Loko kwenta kwaba melula ngabo kutsi balalele Sathane futsi bavukele Babe wabo. Sathane usebentisa emachinga lafanako nalamuhla. Uhlasela libito laJehova ngekutsi alihlambalate. Kuba melula ngebantfu labakholwa emanga aSathane kutsi bangafuni kubuswa nguJehova.
JEHOVA UNGCWELISA LIBITO LAKHE
13. UmBhalo waHezekeli 36:23 uwuveta njani umlayeto weliBhayibheli loyinhloko?
13 Jehova uyakubeketelela yini kuhlanjalatwa ngalendlela futsi angenti lutfo ngako? Cha akakubeketeleli! LiBhayibheli lisitjela tintfo Jehova latenta kuze afakazele kutsi tintfo letashiwo ngaye ensimini yase-Edeni atisilo liciniso. (Gen. 3:15) Kafishane, umlayeto weliBhayibheli loyinhloko singatsi utsi: Jehova ungcwelisa libito lakhe asebentisa uMbuso lobuswa yiNdvodzana yakhe futsi utawubuyisela kulunga nekuthula emhlabeni. LiBhayibheli linemininingwane lesisita sicondze kutsi Jehova ulingcwelisa njani libito lakhe.—Fundza Hezekeli 36:23.
14. Indlela Jehova lenta ngayo kulokuhlaselwa kwase Edeni kulingcwelise njani libito lakhe?
14 Sathane wente konkhe lokusemandleni akhe kuze avimbe kufezeka kwenjongo yaJehova. Kodvwa Sathane wehlulekile tikhatsi letinyenti. LiBhayibheli liyakukhombisa loko Jehova lakwentile, futsi liyakufakazela kutsi kute lofana naNkulunkulu longuJehova. Kuliciniso kutsi kuhlasela lokubangelwe nguSathane kanye nalabo labamsekelako kumvise buhlungu kakhulu Jehova. (Hla. 78:40) Indlela Jehova lenta ngayo kulokuhlaselwa ikhombisa kutsi uhlakaniphile, uyabeketela, futsi unemusa. Uphindze wakhombisa emandla akhe lamangalisako ngetindlela letinyenti. Lokubaluleke kakhulu kutsi lutsandvo lwakhe ulukhombisa kuko konkhe lakwentako. (1 Joh. 4:8) Jehova akayekeli kungcwelisa libito lakhe.
Sathane wacamba emanga ngaJehova ku-Eva, futsi kuyo yonkhe leminyaka uchubekile ahlambalata Nkulunkulu (Buka tigaba 9-10,15) *
15. Sathane ulihlambalate njani libito laNkulunkulu lamuhla, futsi loko kube namiphi imiphumela?
15 Nalamuhla, Sathane solo uyachubeka nekuhlambalata libito laNkulunkulu. Wenta bantfu bangabate kutsi Nkulunkulu unemandla, ulungile, uhlakaniphile futsi ulutsandvo. Sibonelo saloko kutsi, Sathane wetama kuyenga bantfu kutsi Jehova akasiye uMdali. Nangabe bantfu bemukela kutsi Nkulunkulu ukhona, wetama kubenta bakholelwe kutsi timiso taNkulunkulu tiyacindzetela futsi tilukhuni. Uphindze afundzise bantfu kutsi Jehova unguNkulunkulu lonenhlitiyo lembi loshisa bantfu esihogweni lesivutsa umlilo. Nabawakholelwa emanga lanjalo, kuba melula ngabo kutsi bangakwemukeli kubusa kwaJehova lokulungile. Sathane utawuchubeka ahlambalata Jehova, futsi utakwenta ukhweshe kuye kuze kube ngulapho Jehova ambhubhisa. Utawuphumelela yini Sathane?
IYINI INDZIMA YAKHO KULEMPHIKISWANO LENKHULU?
16. Yini longayenta lengazange yentiwa boAdamu naEva?
16 Jehova uvumele bantfu labanesono kutsi bamsite ekungcweliseni libito lakhe. Ngako ungakwenta loko bo-Adamu na-Eva labehluleka kukwenta. Ngisho nobe uhlala eveni leligcwele bantfu labahlambalata libito laJehova, ungakhona kulimelela libito laJehova ngekutsi utjele bantfu kutsi Jehova ulungile, ungcwele futsi ulutsandvo. (Isa. 29:23) Ungakhombisa kutsi ufuna kubuswa nguye. Ungabasita bantfu bacondze kutsi kubusa kwaJehova kuphela lokulungile futsi lokutawuletsa kuthula nenjabulo kuyo yonkhe indalo.—Hla. 37:9, 37; 146:5, 6, 10.
17. Jesu walenta njani libito laBabe wakhe latiwa?
17 Sisuke silingisa sibonelo saJesu Khristu nasivikela libito laJehova. (Joh. 17:26) Jesu wenta libito laNkulunkulu latiwa, hhayi ngekulisebentisa kuphela kodvwa nangekufundzisa bantfu kutsi Jehova unjani. Sibonelo saloko kutsi, Jesu akazange avumelane nebaFarisi lebebatsi Jehova unelunya, ute bungani nemusa. Jesu wenta bantfu babona kutsi Jehova unguBabe locabangelako, lobeketelako, lobatsandzako bantfu futsi lotsetselelako. Indlela lalingisa ngayo buntfu baBabe wakhe ngesikhatsi alapha emhlabeni yasita bantfu kutsi bamati Jehova.—Joh. 14:9.
18. Singakhombisa njani kutsi tintfo letimbi letishiwo baphikisi ngaJehova tingemanga?
18 NjengaJesu, singabatjela bantfu loko lesikwatiko ngaJehova, sibafundzise kutsi uNguNkulunkulu lolutsandvo nalonemusa. Nasenta njalo sitawube sikhombisa kutsi tintfo letimbi letishiwo baphikisi ngaJehova tingemanga. Singcwelisa libito laJehova futsi silente libengcwele etingcondvweni nasetinhlitiyweni tebantfu. Natsi singamlingisa Jehova. Loko singakwenta ngisho nobe sinesono. (Ef. 5:1, 2) Nangabe loko lesikushoko, nendlela lesenta ngayo tintfo ikhombisa kutsi Jehova unjani, sisuke singcwelisa libito lakhe. Singcwelisa libito lakhe ngekutsi sitjele bantfu liciniso ngaNkulunkulu. * Siphindze sikhombise kutsi bantfu labanesono bangahlala batsembekile kuNkulunkulu.—Jobe 27:5
Sifuna kusita lesifundza nabo liBhayibheli bati kutsi Jehova unemusa futsi ulutsandvo (Buka tigaba 18-19) *
19. UmBhalo wa-Isaya 63:7 usisita njani kutsi sibone umgomo wetfu loyinhloko wekushumayela?
19 Kukhona lokunye lesingakwenta kuze singcwelise libito laJehova. Nasifundzisa bantfu emaciniso laseBhayibhelini, sivame kugcizelela emandla aNkulunkulu, lokusho kutsi Jehova unelilungelo lekubusa umhlaba, futsi loku kuliciniso. Nobe kunjalo, ngisho nobe kubalulekile kufundzisa bantfu ngemitsetfo yaNkulunkulu, umgomo wetfu loyinhloko kubasita kutsi batsandze Jehova longuBabe wetfu futsi betsembeke kuye. Kufanele sibakhombise nebuntfu baJehova lobuhle, sigcizelele naloko lokumelelwa libito lakhe lelitsi Jehova. (Fundza Isaya 63:7.) Nasifundzisa ngalendlela, sitawusita bantfu kutsi batsandze Jehova futsi bamlalele ngoba bafuna kwetsembeka kuye.
20. Yini lesitawucoca ngayo esihlokweni lesilandzelako?
20 Singaciniseka njani kutsi indlela lesenta ngayo tintfo nendlela lesifundzisa ngayo ingabasita labanye kutsi bacabange tintfo letinhle ngaJehova nabeva libito lakhe futsi nabo basondzele kuye? Sihloko lesilandzelako sitawuphendvula lombuto.
INGOMA 2 Libito Lakho NguJehova
^ sig. 5 Nguyiphi inkinga lebalulekile bantfu netingilosi lababhekene nayo? Kungani lenkinga ibalulekile futsi isitsintsa njani? Kwati timphendvulo talemibuto kanye naleminye lefana nayo kutasisita kutsi sicinise buhlobo betfu naJehova.
^ sig. 18 Ngaletinye tikhatsi, tincwadzi tetfu betitsi akukafaneli sitsi libito laJehova lidzinga kugcweliswa, leni? Ngobe kute umuntfu lowake watsi Nkulunkulu unelilungelo lekubitwa ngelibito lelitsi Jehova. Emhlanganweni wemnyaka wanga-2017, indlela lebesikucondza ngako loko yacaciswa. Sihlalo watsi: “Akusiko kabi kutsi sithantazele kungcweliswa kwelibito laJehova ngobe vele libito laJehova kufanele lingcweliswe.” Buka luhlelo lwaJanuary 2018 ku-website letsi jw.org®. Buka ngephansi kwencenye letsi LIBRARY > JW BROADCASTING®.
^ sig. 62 KUCHAZWA KWETITFOMBE: Develi wahlambalata Nkulunkulu, watjela Eva kutsi Nkulunkulu ungumcambimanga. Kuyo yonkhe leminyaka, Sathane uchubekile afundzisa emanga, lokufaka ekhatsi imfundziso yekutsi Nkulunkulu unelunya nekutsi akazange abadale bantfu.
^ sig. 64 KUCHAZWA KWETITFOMBE: Njengobe lomzalwane achuba sifundvo seliBhayibheli, ugcizelela buntfu baNkulunkulu.
