1-2. Ni bintu ki bya mana saana ku Bakasininkizia Bakue Yehova?

KULI bintu bya mana saana bitukumiizie leenu​—buteeko bukata ni kulandilako ku bobo buteeko. Paantu tuli Bakasininkizia Bakue Yehova, tuli twatona saana kulondoluela azo maasi a mana. Inzi, buteeko bukata saana bwakue Leeza ni kuswesia liina lyakue​ eba, ni bintu bibili byapuseene? Bila.

² Kila muntu pakati keetu enikile nangue liina lyakue Leeza lipalile kuswesiiwa. Kabili twamanine kale nangue buteeko bukata bwakue Yehova, ao nzila yakue ya kutungulula ipalile kusininkiziiwa nangue iweeme saana. Bebio bintu byonse bibili tupalile kubitwama twafiniizie ni kubipoozako saana maano.

3. Liina Yehova libiikile mukati kiki?

³ Kakiine liina Yehova libiikile mukati kila kintu palwakue Leeza weetu, pamo ni nzila yakue ya kuteeka. Kansi kine twalanda nangue kuswesia liina lyakue Yehova i mpunda ya mana saana, manake twalanda nangue nzila yakue ya kuteeka ipalile kusininkiziiwa kuya yaweeme saana. Liina lyakue Yehova lipalameene saana ni nzila yakue ya kutungulula wali Kateeka Wamaka Onse.​—Mona kisanduku “ Bintu Bibiikile Mukati Kiipuzio Kikata kya Kwasukua.”

4. Lileembo lya Malumbo 135:13 lyalanda ki palua liina lyakue Leeza, kabili tuli kwasuka biipuzio ki mu leeli lyasi?

⁴ Liina Yehova liibeleele saana. (Soma Malumbo 135:13.) Juu ya ki leelio liina ni lya mana saana? Lyatendekele siani kufisiiwa? Leeza ali mukuliswesia siani? Ale fwefue, kunti twakwasia siani kuliswesia? Tuli kwasuka bebio biipuzio.

5. Kisia kunvua nangue liina lyakue Leeza lipalile kuswesiiwa, muntu kunti waiipuzia siani?

⁵ “Liina lyobe liswesiiwe.” (Mat. 6:9) Keekio i kyaalandile Yesu nangue kipalile kuya kyali kya mambo mu lipepo. Ezio milandu  yakue Yesu ili na mana ki? Kuswesia kintu kuli na mana ya kukyalula kitakatiifu ao kufumiako biko. Bantu bange kunti baiipuzia eevi: ‘Eba, ale liina Yehova vilili mbeela litakatiifu kabili lyaswetelesie?’ Eevi kwasuka, tupalilenke kumana kine liina lili lyasaangua lyabiikile mukati kiki.

6. Ni kiki kili kyalengia liina liye lyali lya mana?

⁶ Liina te mulandusie uli waleembua pa lipapie ao uli wazimbulua. Mona vilandile Bibilia: “Liina liweeme i lipalile kusaakulua kuliko bunoonsi buingi.” (Tus Maf. 22:1; Kas. 7:1) Juu ya ki liina ni lya mana saana? Paantu libiikile mukati lulumbi ao vili vyatontonkania bange palua muntu ali wakuutua mu leelio liina. Kansi, ndembelo ya liina lya muntu pa lipapie ao vilili lyazimbulua te kantu, inzi, vili vyatontonkania bantu kine bamona ao kunvua liina lyakue, i kintu kya mana saana.

7. Bantu bali bainoona siani liina lyakue Leeza?

⁷ Musita bantu lubali balanda bufi palwakue Yehova, bali bamuinoonena lulumbi. Kabili musita ubali bainoona lulumbi lwakue, bali bamutuka Leeza ni kufiisia liina lyakue. Liina lyakue Leeza pamo ni lulumbi lwakue byaainoonenue lya kuanza mu bukaba bwa Edeni. Mona liina lyakue Leeza vilyafisiiziwe.

8. Ba Adamu ni Eva baali bamanine ki, kabili kunti twaiipuzia biipuzio ki?

⁸ Ba Adamu ni Eva baali bamanine nangue Leeza ali wakuutua Yehova, kabili baali bamanine bintu bingi biweeme palwakue. Baali bamanine nangue weene i Kabumba wabo, waabapeele bukose ni Paradiso, nkeende iweeeme ya kwikalapo kabili i waali kibuza wabo apuililikile. (Kut. 1:26-28; 2:18) Inzi, eba baatwaliliile kubombia maano abo apuililikile eevi kutontonkania bintu byonse byaabakitiile Yehova? Eba, baatwaliliile kukuzia ntono ni nsantilo yabo kuli Yehova? Byasuko byaafikiile kumanika musita muluani wakue Leeza lwabeziizie.

9. Nga vilandile Kutendeka 2:16, 17 ni 3:1-5, Yehova waabalandile ki ba Adamu ni Eva, ale Sataana waafiikile siani kisinka?

⁹ Soma Kutendeka 2:16, 17 ni 3:1-5. Musita lwaabombiizie kizoka kuba i mukenzi wakue, Sataana wamwipuziizie eevi Eva: “Ati, kakiine Leeza waalandile nangue te mupalile kulia ku kila kimuti kili mu bukaba?” Mu keekio kiipuzio mwali bufi bwa bukengezi bubanga  bwali nga sumu ifiikilue. Kulanda kisinka, Leeza waabalandile nangue kunti balia ku kila kimuti, inzi waakaniiziesie kimuti kimo. Ba Adamu ni Eva baali bapalile kulia ku bimuti bingi bya misango ilekenkeene. (Kut. 2:9) Kulanda kisinka, Yehova ali wapaana saana. Inzi Leeza wasaakuile kimuti kimo ni kubakaania ba Adamu ni Eva kuliako mazabo. Kansi, Sataana waafiikile kisinka mu kiipuzio kyakue. Sataana wakitile imoneke nangue Yehova teezi kupaana. Paange Eva waiipuziizie eevi: ‘Eba, kuli ni bintu binataninue ao kufiikua kuli Leeza?’

10. Sataana waafisiizie siani liina lyakue Leeza bila kwizyunguluka, kabili ni kiki kyafuminemo?

¹⁰ Musita Sataana lwamwipuziizie evio, Eva waali wakinakiilesie kuli Yehova. Pa kumwasuka Sataana, Eva waapitulukilemo mu malaizio akue Leeza. Kabili waongeziiziepo walanda nangue te bapalile atasie kukumiako ku kimuti. Eva abanga wamanine nangue kwandua kunakila musoko wakue Leeza kwakaba kumutwala ku lufu. Inzi, Sataana wamwasukile: “Kakiine temukaba kufua.” (Kut. 3:2-4) Sataana waali wakebasie kulanda nangue Yehova wabeepele. Pa ozo musita, waafisiizie liina lyakue Leeza bila kwizyunguluka, ni kumulanda Eva nangue Yehova ni wabufi. Kupitila kukita evio, Sataana waalukile kibanda, ao kasongelezia. Eva waabeepelue kaakiine; waamutuiliziizie Sataana. (1 Tim. 2:14) Waamuswapiile saana Sataana kukila vyaali wamuswapiile Yehova. Keekio i kyalengiizie Eva aleenge akwate bupinguzi bukilile kubiipa. Waapinguile kukaana kumunakila Yehova. Waatendekele kulia mazabo abamulandile kuli Yehova nangue tapalile kuliako. Kisia paapo, waamupeeleko ni Adamu.​—Kut. 3:6.

11. Baviazi betu ba kuanza baali bapalile kukita ki, Inzi baandilue kukita ki?

¹¹ Tontonkania kaniini milandu yaali yapalile Eva amuane Sataana. Tontonkania alandenge milandu nga eezi: “Nsimanine kine uli ni, inzi mumanine Baba wane, Yehova, mutonene kabili muswapiile. Waatupeele, neene ni Adamu bintu byonse bitukwete. Juu ya ki, weewe, walanda nangue abiipile? Uli wabufi, fuma papa!” Yehova wasiile kunvua saana nsaansa kumona mwana wakue mwanakazi walanda milandu ya kisinka nga ezio! (Tus Maf. 27:11) Inzi, Eva tabanga wamutonene Yehova mu kisinka; pamosie ni Adamu. Paantu ba Adamu ni Eva te baali na ntono ya kisinka kuli baba waabo, baandilue kumulandilako kuli olia ali wamusokozia.

12. Sataana waalengele siani Eva atendeke kutwisika mu maano, ale ba Adamu ni Eva baakitile siani?

¹² Nga vitwamona, Sataana waatendekele kwingizia mbezu ya kutwisika mu maano akue Eva. Sataana waamulengiizie Eva atendeke kutwisika nangue Yehova te Baba aweeme. Kupuako, ba Adamu ni Eva baandilue kulandilako ku liina lyakue Yehova ni lulumbi lwakue. Kukita evio kwalengiizie bamutuilizie Sataana ni kusanguka kuli Baba wabo. Ni leenu, Sataana ali wabombia bobo bufundi. Ali wainoona liina lyakue Yehova kupitila kumubeepela. Baalia  bantu bali bazumina bufi bwakue Sataana, bali bakaana saana nsaambu yakue Yehova ya kuteeka.

13. Lileembo lya Ezekieli 36:23 lyalangilila siani mu kifupi kikata kya mpunda ili mu Bibilia?

¹³ Musita bantu lubali mukufiisia liina lyakue, eba, Yehova ataleelesie bila kukita ata kantu? Bila, ali mukukita! Bibilia yalingi ili yalanda vyaakitile Yehova eevi kuswesia liina lyakue lyaafisiiziwe mu bukaba bwa Edeni. (Kut. 3:15) Kansi, kunti twalanda mu kifupi mpunda yonse ili mu Bibilia mu milandu nga eezi: Yehova waswesia liina lyakue kupitila Bukolo buli mukuteekua na Muana wakue ni kubuezia nsaambu ni mutende pa kyalo. Mu Bibilia muli mpunda ili yatukwasia kumana buino Yehova vyali mukuswesia liina lyakue.​—Soma Ezekieli 36:23.

14. Kyasuko kyaleetele Yehova ku bukisanguka bwatendekele mu bukaba bwa Edeni kili mukuswesia siani liina lyakue?

¹⁴ Sataana ali mukita maka akue onse eevi kumwanzia Yehova kufikilizia mipaango yakue. Inzi ntangu lwaabambile, ali mukwanduasie. Mpunda ili mu Bibilia yalangilila Yehova vyali mukukita, kabili yasininkizia nangue te kuli muntu ali nga Yehova Leeza. Kakiine, kusanguka kwakue Sataana pamo ni bantu bakue, kuli kwamukisia saana Yehova. (Malum. 78:40) Anzia baakitile evio, waapinguile ni kukita bintu kwa mulangue, mukusipikizia ni nsaambu. Kabili waalangiliile maka akue asili na mpela mu nzila ingi. Kintu kikilile bukata ni keeki: ntono yakue ili yamoneka mu bintu byonse byali wakita. (1 Yoane 4:8) Yehova tanalekele ata kaniini kuswesia liina lyakue.

15. Leenu, Sataana ali mukufiisia siani liina lyakue Leeza, ni keekio kili kyalengia bantu bakite ki?

¹⁵ Ni leenu, Sataana atwaliliile kufiisia liina lyakue Leeza. Ali mukulengia bantu baye batwisika ni kulanda nangue Leeza tali na maka, tali na nsaambu, tali na mulangue kabili tali na ntono. Kyakumuenako, Sataana ali mukukita maka eevi kubasininkiziizia bantu nangue Yehova te Kabumba. Kabili kine bantu baitabizia nangue Leeza kwali, Sataana ali wabalengia bazumine nangue Leeza atukakile kabili  tali buino, ni mafunde Akue atukakile kabili teali buino. Kabili ali wabasambilizia bantu nangue Yehova ni Leeza asili na nkumbu kabili asasile, ali wabazizia bantu mu mulilo wa muyayaya. Musita ubali bazumina bobo bufi bubiipile saana, keekio kili kyalenga bakaane nsaambu yakue Yehova ya kuteeka. Sataana wakaba kuya watwaliliile kumubeepela Yehova mpakasie musita ubakaba kumuinoona kuli Yehova. Kabili wakaba kwezia kukulengia ni weewe umukaane Yehova. Eba, Sataana wakaba kuviinda?

16. Kunti wakita siani keelia kyaandilue kukita ba Adamu ni Eva?

¹⁶ Yehova abapeele bantu nsaambu ya kukwasia kuswesia liina lyakue. Kansi, weewe kunti wakita keelia kyaandilue kukita ba Adamu ni Eva. Anzia kine mu kyalo muli bantu bengi bali mukufiisia ni kutuka liina lyakue Yehova, weewe uli ni nkeende ya kwimana ni kubabuila bantu kisinka nangue​—Yehova ni mutakatiifu, wansaambu, aweeme kabili ali ni ntono. (Is. 29:23) Kunti wapooza kuboko ku buteeko bwakue. Kunti wabakwasia bantu bamane nangue buteeko bwakue Yehova sie bunke i buli bwateeka mu nsaambu ipuililikile kabili bwenesie i bwakaba kuleeta mutende ni nsaansa ku bibumbua byonse.​—Malum. 37:9, 37; 146:5, 6, 10.

17. Yesu waalengiizie siani liina lyakue Baba wakue limanike?

¹⁷ Musita utuli twalandilako ku liina lyakue Yehova, tuli twakoonka kyakumuenako kyakue Yesu Kristu. (Yoan. 17:26) Yesu taakitilesie liina lyakue Baba wakue limanike kupitila kubombia liina Yehova, inzi kabili kupitila kusambilizia bantu bamane vili Yehova kakiine. Kyakumuenako, Yesu waali wabapinga ba Mafarisayo musita lubaali balengia Yehova amoneke nangue ali ni mutima waumine, ali waloomba bingi kupita buviinde bwetu, ali kule kabili tali na nkumbu. Yesu waabakwasiizie bantu bamane nangue Baba wakue aweeme, ali wapembelelana ali ni ntono kabili ali waeleelana. Kabili kupitila kulangilila mibeele yakue Baba wakue kubalua busiku, Yesu waabakwasiizie bantu bamumane Yehova.​—Yoan. 14:9.

18. Kunti twakita ki eevi kufumia bufi ni bintu bibiipile bili byalanda bantu palwakue Yehova?

¹⁸ Nga vyaakitile Yesu, kunti twababuila bantu beelia bitumanine palwakue Yehova, kubasambilizia bantu nangue Weene ni Leeza ali ni  ntono kabili ali wawamiiziana. Kine twakita evio, twafumia bufi ni bintu bibiipile bibali balanda palwakue Yehova. Tuli twaswesia liina lyakue Yehova, kulikita liye lyali litakatiifu mu maano ni mitima ya bantu. Ni fwefue kunti twamupala Yehova. Kunti kyakitika anzia kine te tupuililikile. (Baef. 5:1, 2) Tuli twakwasia kuswesia liina lyakue, musita milandu yeetu ni bikitua byetu lubili byabakwasia bantu kwinika vili Yehova kakiine. Tuli twalandila palua leelio liina musita utuli twabakwasia bantu bamane kisinka palwakue Leeza. * Kabili tuli twalangilila nangue bantu basipuililikile kunti basyala sinta.​—Yob. 27:5.

19. Nga vilandile lileembo lya Isaya 63:7, ni kiki kitupalile kukonkomena saana musita utuli twasambilizia?

¹⁹ Mona kintu kinge kya mana kitupalile kukita eevi kuswesia liina lyakue Yehova. Musita utuli twasambilizia bantu kisinka kya Bibilia, lingi tuli twatonta palua buteeko bwakue Leeza, twalanda nangue Yehova ali ni nsaambu ya kuteeka muulu ni kyalo, kabili keekio ni kisinka kakiine. Inzi, kine kyapala kubasambilizia mizilo yakue Leeza, tuli twatona saana kubakwasia bange bamutone Yehova, Baba weetu ni kusiala bali ba kisinka kuli weene. Tupalile kulangilila paswetele mibeele iweeme yakue Yehova ili yalengia kumupalama, kutonta nangue leelio liina lyalangilila weene ni Muntu wa siani. (Soma Isaya 63:7.) Kine twasambilizia mu ezio nzila, twakaba kubakwasia bantu bamutone Yehova ni kumunakila paantu batonene kuya baali ba kisinka kuli weene.

20. Twakaba kwasuka kiipuzio ki mu lyasi likoonkelepo?

²⁰ Eba, ale kunti twasininkizia siani nangue lwendo lwetu ni masambilizio etu byalangilila buino vili liina lyakue Yehova, kabili byakwasia bantu bange bamupalame? Lyasi likoonkelepo, lyakaba kwasuka keekio kiipuzio.