1-2. Testemuña ba Jeová gosta koʼalia kona-ba tópiku saida?

OHIN loron, ita presiza halo desizaun kona-ba apoia Maromak nia direitu atu ukun no halo santu ninia naran. Nuʼudar Testemuña ba Jeová, ita gosta koʼalia kona-ba tópiku sira-neʼe. Maromak nia direitu atu ukun no halo santu ninia naran mak liga malu.

² Ita hotu rekoñese katak presiza halo santu Maromak nia naran. Ita mós aprende katak kriatura hotu presiza hatene katak Maromak iha direitu nuʼudar Ukun-Naʼin no ninia dalan atu ukun mak diʼak liu hotu. Buat rua neʼe mak importante.

3. Maromak nia naran iha ligasaun ho saida?

³ Buat hotu kona-ba ita-nia Maromak, inklui ninia dalan atu ukun, iha ligasaun ho ninia naran Jeová. Entaun halo santu Jeová nia naran inklui mós ideia kona-ba kriatura hotu presiza hatene katak ninia dalan atu ukun mak diʼak liu. Ninia naran liga metin ho ninia dalan atu ukun nuʼudar Naʼi Ukun-Naʼin Boot Liu.—Haree kaixa “ Halo santu Maromak nia naran, iha ligasaun ho buat barak”.

4. Salmo 135:13 hatete saida kona-ba Maromak nia naran? Iha lisaun neʼe, ita sei hetan resposta ba pergunta saida deʼit?

⁴ Jeová nia naran mak espesiál tebes. (Lee Salmo 135:13.) Tanbasá Maromak nia naran importante tebes? Oinsá Satanás hafoʼer Maromak nia naran? Oinsá mak Maromak sei halo santu ninia naran? No oinsá ita bele defende ninia naran? Mai ita buka resposta ba pergunta sira-neʼe.

5. Karik ema balu hanoin saida kona-ba halo santu Maromak nia naran?

⁵ “Halo Ita-nia naran sai santu.” (Mt 6:9) Jesus hatete katak neʼe mak buat neʼebé importante liu atu temi iha  orasaun. Maibé Jesus nia liafuan sira-neʼe katak sá? Halo santu signifika halo moos. Maibé karik ema balu hanoin: ‘Se Jeová nia naran santu no moos ona, entaun tanbasá presiza halo santu tan?’ Atu hatán ba pergunta neʼe, ita presiza komprende naran ida envolve saida deʼit.

6. Tanbasá ema nia naran mak folin-boot?

⁶ Ema nia naran mak folin-boot, neʼe laʼós deʼit liafuan neʼebé ita bele hakerek ka temi. Bíblia hatete: “Diʼak liu atu iha naran diʼak duké iha rikusoin barak.” (Prov 22:1; Ecle 7:1) Tanbasá ema nia naran mak folin-boot? Tanba neʼe envolve ema nia reputasaun, katak ema seluk nia hanoin kona-ba nia. Entaun laʼós dalan neʼebé ema hakerek naran ida ka temi ida-neʼe mak importante, maibé ema nia hanoin kuandu sira haree ka rona naran neʼe.

7. Oinsá mak ema estraga Maromak nia naran?

⁷ Bainhira ema koʼalia bosok kona-ba Jeová, sira koko atu estraga ninia reputasaun. Hodi halo nuneʼe, sira duun Maromak Jeová no hafoʼer ninia naran. Neʼe akontese dala primeiru iha jardín Eden. Mai ita haree saida mak ita bele aprende husi akontesimentu neʼe.

8. Saida deʼit mak Adão no Eva hatene? Neʼe hamosu pergunta saida deʼit?

⁸ Adão no Eva hatene Maromak nia naran mak Jeová, no mós hatene lia-loos importante barak kona-ba nia. Sira hatene nia mak Kriadór neʼebé fó sira moris, hela-fatin neʼebé furak, no pár neʼebé perfeitu. (Gén 1:26-28; 2:18) Maibé, sira kontinua medita ka lae kona-ba buat neʼebé Jeová halo ba sira? Sira kontinua hametin sira-nia domin no hatudu agradese ba Jeová ka lae? Resposta sai klaru bainhira Maromak nia inimigu koko sira.

9. Tuir Génesis 2:16, 17 no 3:1-5, Jeová hatete saida ba Adão ho Eva? Oinsá Satanás bobar lia-loos?

⁹ Lee Génesis 2:16, 17 no 3:1-5. Satanás uza samea ida hodi husu pergunta ida ba Eva: “Maromak dehan duni katak imi labele han ai-fuan husi ai-hun hotu  iha jardín neʼe ka?” Satanás nia pergunta neʼe mós inklui lia-bosok ida, no neʼe halo Eva komesa hanoin sala kona-ba Maromak. Tuir loloos, Maromak fó lisensa ba sira atu han ai-fuan husi ai-hun hotu, só ai-fuan husi ai-hun ida deʼit mak sira labele han. Jeová kria ai-hun oioin ba Adão no Eva. (Gén 2:9) Jeová laran-luak tebes ba sira. Maski nuneʼe, Jeová bandu ai-hun ida deʼit. Entaun Satanás bobar lia-loos hodi husu pergunta neʼebé fó ideia katak Maromak la laran-luak. Karik Eva hanoin: ‘Maromak hanetik duni buat diʼak husi haʼu ka lae?’

10. Oinsá mak Satanás hafoʼer Maromak nia naran, no neʼe lori rezultadu saida?

¹⁰ Bainhira Satanás husu pergunta neʼe, Eva nafatin rekoñese Jeová nuʼudar ninia Ukun-Naʼin. Eva hatán ba Satanás hodi temi fali Maromak nia mandamentu neʼebé klaru. Nia hatutan katak sira mós labele kaer ai-hun neʼe. Nia hatene katak se sira la halo tuir sira sei mate. Maibé Satanás hatán: “Imi sei la mate.” (Gén 3:2-4) Satanás komesa fó sai ninia ideia ho klaru. Ninia liafuan hafoʼer kedas Maromak nia naran, no nia hatete ba Eva katak Jeová bosok-teen. Ho ida-neʼe Satanás simu naran seluk, neʼe mak diabu, katak bosok-teen. Eva tau fiar ba Satanás nia lia-bosok. (1 Tim 2:14) Eva fiar liu Satanás duké Jeová. Tan neʼe fasil ba Eva atu foti desizaun sala. Nia deside atu kontra Jeová. Nia komesa han ai-fuan neʼebé Jeová bandu. Tuirmai nia mós fó ba Adão.—Gén 3:6.

11. Tuir loloos, Adão no Eva bele hatete saida? Saida mak sira la konsege halo?

¹¹ Hanoin toʼok se Eva koʼalia hanesan tuirmai neʼe ba Satanás: “Haʼu la koñese ó, maibé haʼu koñese haʼu-nia Aman Jeová, haʼu hadomi no tau fiar ba nia. Nia fó ona buat barak ba ami. Tanbasá ó brani koʼalia aat kona-ba nia? Sees tiha!” Neʼe sei halo Jeová kontente tebes tanba Eva hatudu laran-metin no domin ba nia. (Prov 27:11) Maibé Eva la hatudu domin neʼebé laran-metin ba Jeová no Adão mós la hatudu domin neʼe. Tan neʼe, Adão no Eva la defende Maromak nia naran.

12. Oinsá mak Satanás hamosu dúvida iha Eva nia neon? Adão no Eva la halo saida?

¹² Hanesan ita aprende ona, Satanás komesa estraga Jeová nia reputasaun hodi halo Eva dúvida se Jeová mak Aman neʼebé diʼak duni ka lae. Adão no Eva la defende Jeová nia naran. Sira husik Satanás kontrola sira-nia hanoin no book sira atu kontra Jeová. Satanás mós uza lasu neʼebé hanesan ohin loron. Nia estraga Jeová nia naran hodi koʼalia aat Jeová. Ema neʼebé fiar Satanás nia lia-bosok, husik Satanás kontrola sira, no fila kotuk ba Maromak nia ukun.

13. Oinsá mak Ezequiel 36:23 fó sai mensajen importante husi Bíblia?

¹³ Jeová halo buat ruma atu defende ninia naran ka lae? Sin. Bíblia tomak fó sai kona-ba buat oioin neʼebé Jeová halo ona atu hatudu katak Satanás nia liafuan iha jardín Eden mak la loos. (Gén 3:15) Tuir loloos, ita bele dehan katak Bíblia nia mensajen importante mak: Jeová sei halo santu ninia naran liuhusi ninia Ukun. Ninia Oan-Mane mak liurai ba Ukun neʼe. No Ukun neʼe sei lori fali hahalok loos no dame iha mundu. Bíblia fó sai informasaun neʼebé ajuda ita komprende oinsá Jeová sei halo santu ninia naran.—Lee Ezequiel 36:23.

14. Depois akontesimentu iha jardín Eden, Jeová halo saida? Oinsá neʼe halo santu ninia naran?

¹⁴ Satanás halo buat oioin hodi koko hanetik Jeová atu kumpre Jeová nia hakarak. Maibé Satanás la susesu. Bíblia hatudu buat neʼebé Jeová halo ona no ida-neʼe fó prova katak Jeová mak Aman neʼebé domin no Ukun-Naʼin neʼebé diʼak liu. Bainhira Satanás no sira hotu neʼebé apoia Satanás kontra Jeová, neʼe hakanek Jeová nia laran. (Sal 78:40) Maski nuneʼe, Jeová hatudu matenek, pasiénsia no justisa iha situasaun neʼe. Nia mós hatudu sai ninia kbiit boot iha dalan oioin. Importante liu, nia hatudu domin iha situasaun hotu. (1 João 4:8) Jeová kontinua halo santu ninia naran.

15. Ohin loron, oinsá mak Satanás hafoʼer Maromak nia naran? No rezultadu mak saida?

¹⁵ Ohin loron, Satanás nafatin hafoʼer Maromak nia naran. Nia lohi ema hodi halo sira dúvida kona-ba Maromak nia forsa, hahalok justisa, matenek no domin. Porezemplu, Satanás book ema atu fiar katak Jeová laʼós Kriadór. No se ema fiar katak Maromak iha, Satanás koko atu halo sira fiar katak Maromak no ninia matadalan sira mak la justu no halakon ema nia liberdade. Satanás mós fó sai ideia katak Jeová mak laran-aat no fó kastigu ba ema iha infernu. Bainhira sira fiar lia-bosok sira-neʼe, fasil liu ba sira  atu la simu Maromak nia ukun. Satanás sei kontinua hafoʼer Jeová nia naran toʼo tempu neʼebé Jeová halakon nia. No Satanás sei koko halo ita hadook an husi Jeová. Nia sei susesu ka lae?

16. Saida mak Ita bele halo neʼebé Adão no Eva la halo?

¹⁶ Jeová fó oportunidade ba ema atu ajuda halo santu ninia naran. Neʼe katak Ita bele halo buat neʼebé Adão no Eva la halo. Maski mundu nakonu ho ema neʼebé hafoʼer Jeová nia naran, maibé Ita iha oportunidade atu defende Jeová nia naran no fó sai ba ema seluk katak Jeová mak santu, hatudu hahalok justisa, diʼak no domin. (Isa 29:23) Ita bele apoia ninia ukun. Ita bele ajuda ema komprende katak só Jeová nia dalan atu ukun mak loos no sei lori dame no kontente ba kriasaun hotu.—Sal 37:9, 37; 146:5, 6, 10.

17. Oinsá Jesus fó sai Jeová nia naran?

¹⁷ Bainhira ita defende Jeová nia naran, ita halo tuir Jesus Kristu nia ezemplu. (João 17:26) Jesus fó sai ninia Aman nia naran liuhusi uza naran neʼe, no mós defende Jeová nia reputasaun. Porezemplu, nia koʼalia kontra ema Farizeu sira neʼebé halo ema fiar katak Jeová mak laran-aat, ezije buat barak, dook husi ema, no la iha laran-sadiʼa. Jesus ajuda ema atu hatene katak ninia Aman mak pasiénsia, domin, fó perdua no la ulun-toos. Nia mós ajuda ema atu koñese Jeová liuhusi dalan neʼebé nia banati-tuir ninia Aman nia hahalok sira iha ninia moris loroloron nian.—João 14:9.

18. Oinsá ita bele defende Jeová nia naran husi lia-bosok sira?

¹⁸ Hanesan Jesus, ita bele fó-hatene ema seluk kona-ba Jeová no hanorin sira katak Jeová mak Maromak neʼebé domin no laran-diʼak. Hodi halo nuneʼe ita hatudu katak buat neʼebé Satanás fó sai kona-ba Jeová mak bosok. Ita halo santu Jeová nia naran kuandu ajuda ema seluk hanoin no fiar katak naran neʼe mak buat neʼebé santu. Ita mós bele banati-tuir Jeová. Ita bele halo nuneʼe maski ita la perfeitu. (Éf 5:1, 2) Ita ajuda halo santu Jeová nia naran liuhusi  ita-nia liafuan no hahalok neʼebé haleno Jeová nia hahalok. Ita halo santu naran neʼe hodi ajuda ema hatene lia-loos kona-ba Maromak. Ita mós prova katak ema neʼebé la perfeitu bele mantein integridade.—Job 27:5.

19. Oinsá mak Isaias 63:7 ajuda ita hatene ita-nia objetivu prinsipál bainhira hanorin ema?

¹⁹ Iha buat seluk tan neʼebé ita bele halo atu halo santu Jeová nia naran. Bainhira ita hanorin lia-loos husi Bíblia ba ema seluk, baibain ita tau fokus ba Jeová nia direitu atu ukun universu. No maski importante atu hanorin ema kona-ba Maromak nia ukun-fuan sira, maibé ita-nia objetivu prinsipál mak atu ajuda ema seluk hadomi Aman Jeová no hatudu laran-metin ba nia. Tan neʼe ita presiza tau fokus ba ninia hahalok furak sira no hatudu katak nia mak Aman neʼebé diʼak. (Lee Isaias 63:7.) Bainhira ita hanorin iha dalan hanesan neʼe, ita ajuda ema atu hadomi Jeová no halo tuir nia tanba sira hakarak laran-metin ba nia.

20. Iha lisaun tuirmai, ita sei aprende kona-ba saida?

²⁰ Ita hakarak ema seluk hanoin buat diʼak kona-ba Jeová nia naran no dada sira ba nia, entaun oinsá mak ita bele halo nuneʼe liuhusi ita-nia hahalok no dalan neʼebé ita hanorin? Iha lisaun tuirmai, ita sei aprende kona-ba neʼe.