1-2. Mahungu muni ma gu na ni lisima ngudzu ga Dzifakazi dza Jehovha?

MUHUNO hi ngu emisana ni mahungu nya lisima ngudzu nya gu emeye Wufumu wa Jehovha ni gu agisa lina Laye. Kha nga Dzifakazi dza Jehovha, hi ngu gola ngudzu gu ganeya khu mahungu yoyo nya lisima ngudzu. Ganiolu, ina gu emeya wufumu wa Nungungulu ni gu agisa lina laye silo sivili nyo hambane? Ne.

² Hatshavbo hi ngu si wona gu khethu lina la Nungungulu gu vbwetega li agiswa. Hi ngu wona gambe gu khethu wufumu wa Jehovha mwendro mafumelo yaye khiso si gu sadi ga satshavbo. Khu kharato, gu emeya wufumu wa Nungungulu ni gu agisa lina laye satshavbo si na ni lisima gwathu.

3. Lina, Jehovha, lo pata ginani?

³ Khu lisine, lina la Jehovha la gu pata satshavbo si yelanago ni Nungungulu wathu, gupata ni mafumelo yaye. Khu kharato, ha gu ganeya gu khethu gu agisa lina la Jehovha ga satshavbo li singedzwago si na ni lisima ngudzu so thula gu khiso mafumelo ya Jehovha khayo nya yadi ga yatshavbo. Lina la Jehovha li ngu gimbidzisana ni mafumelo yaye kha nga Pfhumu nya tshivba yatshavbo Mafuni ni Ndzadzini. — Wona kwadru “ Esi si pategago avba nyo agise lina la Jehovha.”

4. Ginani egi Ndzimo 135:13 yi gi ganeyago maningano ni lina la Nungungulu nigu siwudziso muni hi na ganeyago khiso avba nya ndrima yeyi?

⁴ Lina, Jehovha, li hathegide ngudzu. (Leri Ndzimo 135:13, khavba nya tshamuselo wa vbavbatshi *.) Khu ginani lina la Nungungulu li gu ni lisima ngudzu? Lini li nyenyezisidwego khu tepo nyo pheye? Nungungulu a gu li agisa kharini? Hi nga phasedzeya kharini gu emeya lina laye? Hongoleni hi bhula khu siwudziso sesi.

5. Ginani egi vambe va nga dzi wudzisago tepo va pwago gu pwani lina la Nungungulu gu vbwetega li agiswa?

⁵ “Lina lago li na rungudzwe mwendro li na agiswe.” (Mat. 6:9) Jesu a di khuye gu agisa lina la Jehovha si ni lisima ngudzu nigu hi yede gu si thangisa avba nya milombelo yathu. Ganiolu ma gu thula ginani malito ya Jesu? Gu agisa gilo nyo khaguri so thula gu gi handza. Ganiolu, si nga gira vambe va wudzisa esi, ‘Ina lina la Jehovha kha la aga gukhugeya gale?’ Gasi gu hlamula giwudziso gegi gu vbwetega hi pimisa khesi si pategago avba nya lina nyo khaguri.

6. Ginani gi girago lina li manega ni lisima?

⁶ Lina khandri lito basi nyo khaguri li lowago avba nya lidangaliya mwendro li ganedwago. Nga wona esi Bhibhiliya yi si ganeyago: “Gu manega nuri ni lina nya ladi, guvbindra thomba nya gutale.” (Mav. 22:1; Muh. 7:1) Khu ginani lina li gu na ni lisima ngudzu? Kholu la gu pata ni esi vathu va si tigo khu mune nya lina lolo. Khu kharato, gilo nya lisima khandri edzi lina lolo li lowago khidzo mwendro edzi li ranwago khidzo ganiolu khesi vathu va si pimisago tepo va pwago lina lolo.

7. Vathu va gu nyenyezisa kharini lina la Nungungulu?

⁷ Tepo vathu va ganeyago malipha khu Jehovha va gu zama gu gira vambe va pimisa silo nyo vivbe khuye. Khu kharato, tepo va wonago silo soso nyo vivbe va gu rwega nandru wakona Nungungulu khavbovbo va nyenyezisa lina laye. Tepo nyo pheye eyi muthu nyo khaguri a ganedego silo nyo vivbe khu lina la Nungungulu a bwe a zama gu gira vathu va pimisa silo nyo vivbe khuye, thembweni ga Edheni. Hongoleni hi ganeya khesi hi si hevbulago avba nya esi si giregidego.

8. Ginani egi Adhamu ni Evha va nga ba va giti nigu siwudziso muni hi nga dzi girago?

⁸ Adhamu ni Evha va di gu dziti gu khavo lina la Nungungulu khu Jehovha nigu va di guti silo nya singi nya lisima Khuye. Avo va di gu dziti gu khavo khuye Muvangi, Khuye a va ningidego womi, Paradhesi ni pari nya yadi nya wugadzi. (Gen. 1:26-28; 2:18) Ambari ulolo, ina avo va simamide gu dundrugeya khu satshavbo esi Jehovha a nga ba a va girede? Ina va simamide gu haguleya lihaladzo lawe ni gubonga khu Mune nya lina lolo? Lisine li tivegide tepo nala wa Nungungulu a va lingidego.

9. Guya khu Genesi 2:16, 17; 3:1-5, ginani egi Jehovha a embedego patwa nyo pheye nigu Sathane tshomboroside kharini lisine?

 ⁹ Leri Genesi 2:16, 17; 3:1-5. Khu gu thumisa nyoga, Sathane a di wudzisa esi Evha: “Ina lisine nya gupwani Nungungulu a mi layide gukhuye, mu nga hodzini mihandro nya misimbo yatshavbo ya thembweni, gani?” Giwudziso gyogyo gi diri ni malipha ma fanago ni vhenene ma nga ba ma sihade. Khu lisine, Nungungulu a di gu va embede gu khuye va nga hodza mihandro nya yatshavbo misimbo ganiolu a va laya gu mba hodza mihandro nya simbo moyo basi. Adhamu ni Evha va di ningidwe mihandro nya yingi nyo hambanehambane gasi gu dzi buza khiyo. (Gen. 2:9) Kha si kanakanisi gu khiso Jehovha Nungungulu nya wuhindzi. Ganiolu Uye a di himbedzede Adhamu ni Evha gu hodza mihandro nya simbo moyo basi. Khu kharato, giwudziso gi giridwego khu Sathane gi di gu tshomborosa lisine. Gi di gu gira khatshi Nungungulu a diri mwalo wuhindzi. Si nga gira Evha na dzi wudziside gu khuye: ‘Ina Jehovha khandri a gu nyima gilo nyo khaguri nya gyadi?’

10. Sathane nyenyeziside kharini lina la Nungungulu nigu ginani gi nga girega?

¹⁰ Tepo Sathane a giridego giwudziso gegi, Evha a di ngo engisa Jehovha kha nga Pfhumu yaye. Uye hlamude Sathane khu gu thumisa nayo owu Nungungulu a nga ba a va ningide. Uye a di bwe a engedzeya khuye ni gu wu khuha kha hi yeli gu wu khuha. A di gu dziti gu khuye gu kanyisa gigengedzo gya Nungungulu si di hadzi mu yisa gufani. Ganiolu, Sathane a di mu hakha khuye: “Khu lisine kha mu na ngafa gilo!” (Gen. 3:2-4) Sathane kha nga ba a zama gambe gu siha makungo yaye. A di dzegeya gu nyenyezisa lina la Nungungulu khu gu embeya Evha gu khuye Jehovha a di gu lipha. Khavbovbo, Sathane a di khala Dhiyabhulosi mwendro mulembi. Evha a di sengwa, a khodwa malipha ya Sathane. (1 Thim. 2:14) Uye a di tumba ngudzu Sathane guvbindra Jehovha. Khu kotani nya isoso, Evha a di diga gu engisa Jehovha gu gu gilo nyo vivbe ngudzu. A hodza handro wule Jehovha a nga ba a va himbedzede. Khu hwane, a ninga Adhamu anuye a hodza. — Gen. 3:6.

11. Ginani egi vavelegi vathu nyo pheye va nga ba va yede gu gira ganiolu ginani va nga mba gira?

¹¹ Nga dundrugeya vbadugwana khesi Evha a nga ba a yede gu embeya Sathane. Nga dundrugeya nari khatshi a di embede Sathane silo nya nga esi: “Uwe ne kha nyi guti ganiolu Papayi wangu Jehovha nyi ngu muti nigu nyi ngu mu haladza ni gu mu tumba. Khuye a ningidego Adhamu ni eni satshavbo hi gu naso. Wa gu si kodza kharini gu ganeya silo nyo vivbe kharato khuye? Khuga khavba!” Nga dundrugeya khedzi Jehovha a nga hadzi tsaka khidzo khu gupwa gyanana gyaye a gi haladzago na gi gu ganeya malito yoyo nyo yeyedze gu mu tumba! (Mav. 27:11) Ganiolu Adhamu ni Evha va di si haladzi Jehovha khu monyo wawe watshavbo. Khu gu ba vari mwalo lihaladzo lolo khu Papayi wawe avo kha va si kodza gu emeya lina laye gasi li si nyenyeziswi.

12. Sathane yadi kharini gukanakana mapimoni ga Evha nigu ginani egi Adhamu ni Evha va tandregidego gu gira?

 ¹² Kha nga hi si wonidego Sathane a di pheya khu gu yala gukanakana mapimoni ga Evha. A di gira gu Evha a pheya gu dzi wudzisa gu khuye gasi Jehovha muthu nyo khale kharini. Adhamu ni Evha kha va si kodza gu emeya lina la Jehovha ga malipha ya Sathane. Si va vbevbugede gu engisa malipha ya Sathane khavbovbo va wugeya Papayi wawe. Sathane a nga gu thumisa milaphwi nya nga yoyo ni muhuno. Uye a gu wugeya lina la Jehovha khu gu li nyenyezisa. Vathu va khodwago malipha ya Sathane si ngu vbevbuga gu va si engisi milayo nyo lulame ya Jehovha.

13. Ezekiyeli 36:23, a gu tshamuseya kharini khu gupiya litshina nya mahungu yatshavbo ya omu nya Bhibhiliya?

¹³ Ina Jehovha a gu khala khu mawogo a diga lina laye li nyenyeziswa? Ne vbadugwana! Matimo yatshavbo ma gomogo omu nya Bhibhiliya ma gu ganeya khesi Jehovha a girago gasi gu yeyedza gu khuye silo nyo vivbe a singedzidwego thembweni ga Edheni malipha. Khu lisine hi nga ganeya khu gupiya gu khethu litshina nya mahungu yatshavbo ya omu nya Bhibhiliya khu gu agiswa nya lina la Jehovha khu gu thumisa Mufumo wu fumedwago khu Gyanana gyaye wu na wusedzago gululama ni gurula mafuni. Bhibhiliya yi na ni mahungu ma nga hi phasago gu pwisisa edzi Jehovha a agisago khidzo lina laye. — Leri Ezekiyeli 36:23.

14. Esi Jehovha a giridego hwane nyo wugedwe thembweni ga Edheni sa gu agisa kharini lina laye?

¹⁴ Sathane a gu gira satshavbo a si kodzago gasi gu tandregisa Jehovha gu tadzisa makungo Yaye. Ganiolu gima kha si kodzi. Matimo nya Bhibhiliya mo yeyedza esi Jehovha a girago ma bwe ma yeyedza gambe gu khayo Jehovha Papayi nya lihaladzo nigu khuye Pfhumu nya yadi ga dzatshavbo. Khu lisine, Jehovha a ngu vbisega khu wuwugeyi wa Sathane ni vatshavbo vale va emago naye. (Ndzi. 78:40) Ambari ulolo, uye a ngu emisana ni gigaradzo gegi khu gulaphisa-monyo, guti ni gululama. Uye gambe a ngu yeyedza tshivba yaye nya yikhongolo dzitepo nya dzingi. Nya lisima ngudzu ga satshavbo khu gu lihaladzo laye li ngu wonega ga satshavbo esi a girago. (1 Joh. 4:8) Jehovha a gu thuma wutshigu mihani gasi gu agisa lina laye.

15. Sathane a gu nyenyezisa kharini lina la Nungungulu muhuno nigu ginani gi giregago khu kotani nya isoso?

 ¹⁵ Sathane a nga gu nyenyezisa lina la Nungungulu. Uye a gu zama gu gira vathu va kanakana gu khavo Nungungulu na ni tshivba, lulamide, na ni guti ni lihaladzo. Khu giyeyedzo, Sathane a gu zama gu gira vathu va khodwa gu khavo Jehovha khandruye Muvangi. Nigu ga vathu vale va khodwago gu khavo Nungungulu womo, Sathane a gu zama gu va gira va khodwa gu khavo Nungungulu kha lulama ambari milayo yaye kha ya lulama nigu ya gu hi hungeleya. Sathane a gu bwe a hevbudza gu khuye Nungungulu na ni litsoro nigu a ngu vbisa vathu ndzadzini. Tepo va khodwago malipha yoyo va gu hegisa khu gu nyenya milayo nyo lulame ya Jehovha. Na si gu fuviswi khu guvbeleya, Sathane, a na simama ni lidima laye kha nga muliphi nigu a na zama gu gira gu anuwe u wugeya Jehovha. Ina a na si kodza?

16. Ginani egi u nga girago gi tandregidwego khu Adhamu ni Evha?

¹⁶ Jehovha a ngu dzumeleya gu khuye vathu nya mba vbeleya va phasedzeya gu agisa lina laye. Khu kharato, u nga gira esi Adhamu ni Evha va si tandregidego gu gira. Ambari olu u vbanyago mafuni gu tadego khu vathu va valago ni gu nyenyezisa lina la Jehovha, u na ni lithomo nyo emeye Jehovha khu gu ganeya lisine leli: Jehovha agide, lulamide, khwadi nigu na ni lihaladzo. (Isa. 29:23) U nga yeyedza gu khuwe wa gu vbweta gu fumedwa khuye. U nga phasa vathu gu pwisisa gu khavo Mufumo wa Jehovha khuwo basi wu lulamidego khu gu vbeleya nigu khuwo basi wu na kodzago gu reseya gurula ni gutsaka sivangwa satshavbo. — Ndzi. 37:9, 37; 146:5, 6, 10.

17. Jesu tivegiside kharini lina la Papayi waye?

¹⁷ Tepo hi emeyago lina la Jehovha ha gu landreya giyeyedzo gya Jesu Kristo. (Joh. 17:26) Jesu tivegiside lina la Papayi waye nasiri basi khu gu li thumisa ganiolu khu gu li emeya gambe. Khu giyeyedzo, uye ganedzide vaFarisi ava dzitepo nya dzingi va nga zama gu yeyedza gu khavo Jehovha vivbedwe khu monyo, a ngu garadza, mwalo vbafuvbi ni ethu nigu mwalo pweya-wusiwana. Jesu phaside vathu gu wona gu khavo Papayi waye na ni wuwadi, a ngu laphisa monyo, na ni lihaladzo nigu a ngu divaleya. Uye phaside gambe vathu guti Jehovha khu gu pimedzeya makhalelo ya Papayi waye tshigu ni tshigu. — Joh. 14:9.

18. Hi nga ganedza kharini malipha ma ganedwago maningano ni Jehovha?

 ¹⁸ Gufana ni Jesu anethu hi nga embeya vathu esi hi si tigo khu Jehovha khu gu hi va hevbudza gu khethu Nungungulu na ni wuwadi ni lihaladzo. Tepo hi girago isoso, ha gu ganedza malipha ma ganedwago maningano ni Jehovha. Hi ngu agisa lina la Jehovha khu gu li gira li handzega myonyoni ni mapimoni nya vathu. Anethu hi nga si kodza gu pimedzeya Jehovha. Isoso si ngu kodzega ambari olu hi gu vathu nya mba vbeleya. (Efes. 5:1, 2) Ha gu pimedzeya makhalelo ya Jehovha khu sigiro sathu ni esi hi ganeyago ha gu phasedzeya gu agisa lina laye. Hi ngu li agisa gambe khu gu phasa vathu guti lisine maningano ni Nungungulu. * Isoso so yeyedza gambe gu khiso ambari vathu nya mba vbeleya va nga si kodza gu tumbega ga Nungungulu. — Joba 27:5.

19. Isaya 63:7, a gu hi phasa kharini gu wona esi si yedego gu khala makungo yathu nya litshina tepo hi hevbudzago vambe?

¹⁹ Gu na ni gimbe gilo gambe hi nga girago gasi gu agisa lina la Jehovha. Tepo hi hevbudzago lisine nya Bhibhiliya vambe vathu, hi ngu tala gu tshingisa Mufumo wa Nungungulu, khu gu ganeya gu khethu Jehovha khuye a yedego gu fuma mafuni ni ndzadzini nigu isoso lisine. Ambari olu si gu na ni lisima gu va hevbudza milayo ya Nungungulu, makungo yathu nya litshina gu va phasa gu haladza Papayi wathu Jehovha ni gu tumbega gwaye. Khu kharato, gu vbwetega hi tshingisa makhalelo ya Jehovha nya yadi khu gu va phasa gu pwisisa gu khavo lina, Jehovha, lo tshamuseya Muthu nya makhalelo muni. (Leri Isaya 63:7.) Ha gu hevbudza khu ndziya yeyi hi na phasa vambe gu haladza Jehovha ni gu mu engisa khu gu vo vbweta gu tumbega gwaye.

20. Ginani hi na ganeyago khigyo avba nya ndrima yi landreyago?

²⁰ Ganiolu hi nga tiyisega kharini gu khethu mavbanyelo yathu ni ndziya hi hevbudzago khiyo si na phasa vambe gu pimisa silo nya sadi khu Jehovha tepo hi va hevbudzago? Ndrima yi landreyago yi na hlamula giwudziso gegi.