CIBALO CAKWIIYA 23
“Alisalazyigwe Zina Lyako”
“O Jehova, izina lyako linooliko lyoonse mane kukabe kutamani.”—INT. 135:13.
LWIIMBO 10 Atutembaule Jehova Leza Wesu!
IZILI MUCIBALO *
1-2. Makani nzi aabakkomanisya Bakamboni ba Jehova?
MAKANI aayandika kapati alatujatikizya mazuba aano, nkokuti bweendelezi bwa Jehova alimwi akusalazyigwa kwazina lyakwe. Mbotuli Bakamboni ba Jehova, tulakkomana kubandika makani aaya aayandika kapati. Pele sena bweendelezi bwa Leza alimwi akusalazyigwa kwazina lyakwe nzintu zyobilo ziindene? Peepe.
2 Toonse twabona kuti izina lya Leza lyeelede kusalazyigwa. Alimwi twakaiya kuti bweendelezi bwa Jehova naa kweelela kwabweendelezi bwakwe, kweelede kubonwa kuti nkokwiinda kubota. Makani aaya oonse alayandika kapati kulindiswe.
3. Ino zina lya Jehova libikkilizya nzi?
3 Zina lya Jehova libikkilizya zintu zyoonse izijatikizya nguwe, kubikkilizya anzila yakwe yakweendelezya. Aboobo ikuti naa twaamba kuti kusalazyigwa kwazina lya Jehova kumasampu woonse ngemakani aayandika kapati, nkokuti twaamba kuti ayalo nzila yakwe yakweendelezya yeelede kubonwa kuti njeyiinda kubota. Zina lya Jehova liliswaangene kapati anzila mbwayendelezya kali Mwami Singuzuzyoonse.—Amubone kabbokesi kakuti, “ Twaambo Itujatikizya Makani Aayandika Kapati.”
4. Mbuti lugwalo lwa Intembauzyo 135:13 mbolulipandulula zina lya Leza, alimwi ino tulaingula mibuzyo nzi mucibalo eeci?
4 Izina lya Jehova lilibedelede. (Amubale Intembauzyo 135:13.) Nkaambo nzi zina lya Leza ncoliyandika kapati? Ino lyakasampaulwa buti ciindi cakusaanguna? Mbuti Leza mbwalisalazya? Alimwi mbuti mbotukonzya kutola lubazu mukuliiminina zina lyakwe? Atwiilange-lange mibuzyo eeyi.
IZINA LYA LEZA NCOLIYANDIKA KAPATI
5. Ncinzi bamwi ncobakonzya kubuzya ciindi nobamvwa kuti zina lya Leza lyeelede kusalazyigwa?
5 “Alisalazyigwe zina lyako.” (Mt. 6:9) Jesu wakaamba kuti eeci ncimwi cazintu iziyandika kapati nzyotweelede kubikkilizya mumupailo. Pele ino majwi aa Jesu aaya aamba nzi? Aamba kusalazya cintu cimwi. Pele bamwi balakonzya kubuzya kuti, ‘Tee zina lya Jehova lilasalala kale?’ Kutegwa twiingule mubuzyo ooyu, tweelede kuyeeya zintu zibikkilizyidwe kuzina eeli.
6. Ncinzi cipa kuti zina kaliyandika kapati?
6 Izina talili buyo bbala ilikonzya kulembwa apepa naa kwiile kwaambwa buyo. Amubone ncolyaamba Bbaibbele: “Izina libotu lyeelede kusalwa kwiinda lubono lunji.” (Tus. 22:1; Muk. 7:1) Nkaambo nzi zina ncoliyandika kapati? Nkaambo libikkilizya mpuwo, nkokuti mbobayeeya bamwi kujatikizya muntu uulaazina eelyo. Aboobo mbolilembwa zina naa mbolyaambwa taali ngamakani mapati; iciyandika kapati nceeco bantu ncobayeeya ciindi nobalibona naa kulimvwa zina eelyo.
7. Mbuti bantu mbobalisampaula zina lya Leza?
7 Ciindi bantu nobaamba zyakubeja kujatikizya Jehova, basola kunyonganya mpuwo yakwe. Ciindi nobanyonganya mpuwo yakwe, basola kusampaula zina lyakwe. Kusampaulwa kwazina alimwi ampuwo yakwe kwakusaanguna kwakacitikila mumuunda wa Edeni. Atubone ncotukonzya kwiiya kuli ceeci icakacitika.
MBOLYAKASAMPAULWA ZINA LYA LEZA CIINDI CAKUSAANGUNA
8. Ino ncinzi ncobakazyi ba Adamu a Eva, alimwi mibuzyo nzi njotukonzya kubuzya?
8 Ba Adamu a Eva bakalilizyi kabotu zina lya Jehova alimwi akasimpe kayandika kapati kujatikizya nguwe. Mucikozyanyo, bakalizyi kuti wakali Mulengi wabo, iwakabapede buumi, munzi wa Paradaiso mubotu alimwi amweenzinyina wamulukwatano uulondokede. (Matl. 1:26-28; 2:18) Pele sena nobakacikonzya kuzumanana kubelesya mizeezo yabo iilondokede kuzinzibala kuyeeya zintu zyoonse nzyaakabacitila Jehova? Sena nobakacikonzya kuzumanana kuyumya luyando lwabo kuli Jehova alimwi akumulumba? Bwiinguzi bwakalibonya caantangalala ciindi sinkondonyina a Leza naakabasunka.
9. Kweelana alugwalo lwa Matalikilo 2:16, 17 alimwi a 3:1-5, ncinzi Leza ncaakaambila banabukwetene, alimwi mbuti Saatani mbwaakabapa kumubona munzila iitaluzi Jehova?
9 Amubale Matalikilo 2:16, 17 alimwi a 3:1-5. Kabelesya nzoka kuba caambawido cakwe, Saatani wakabuzya Eva kuti: “Sena ncobeni Leza wakaamba kuti tamweelede kulya kuzisamu zyoonse zyamumuunda?” Saatani wakabuzya mubuzyo iwakali kwaamba zyakubeja kujatikizya Leza, calo icakapa kuti Eva atalike kuyeeya zintu izitali kabotu kujatikizya Leza. Leza wakabaambilide kuti bakali kukonzya kulya kuzisamu zyoonse zyamumuunda, kunze buyo lyacisamu comwe. Ba Adamu a Eva bakali kukonzya kulya kuzisamu zinji iziindene-indene. (Matl. 2:9) Masimpe, Jehova mwaabi. Pele wakaamba kuti kuli cisamu ba Adamu a Eva ncobatakazumizyidwe kulya kulincico. Aboobo mubuzyo wa Saatani wakapa kuti babone mbuli kuti Leza muunyu. Eva wakeelede kulibuzya kuti, ‘Sena Leza undikasya cintu cimwi cibotu?’
10. Mbuti Saatani mbwaakalisampaula zina lya Leza cacigaminina, alimwi ino ncinzi cakacitika?
10 Aciindi eeci, Eva wakacili kumumvwida Jehova. Wakamwaambila Saatani zintu zyoonse nzyaakaambide Leza. Mane buya wakayungizya kuti, Leza wakaamba kuti tatweelede nokuba kuciguma cisamu. Wakalikuzyi kucenjezya kwa Leza kwakuti kutamvwida kwakali kuyoosololela kulufwu. Pele Saatani wakaingula kuti: “Tamukonzyi kufwa pe.” (Matl. 3:2-4) Saatani tanaakacili kwiinda mumbali. Wakalisampaula zina lya Leza cacigaminina kwiinda mukwaambila Eva kuti Jehova mubeji. Akaambo kaceeci, Saatani wakaba diabolosi naa sikubejekezya. Eva wakeenwa cakumaninina; wakamusyoma Saatani. (1Tim. 2:14) Wakamusyoma kapati Saatani kwiinda mbwaakali kusyoma Jehova. Eeci cakapa kuti Eva asale cabufwuba-fwuba. Wakasala kumuzangila Jehova. Wakaulya mucelo ngwaakamukasyide Jehova. Kumane, wakamupa awalo Adamu.—Matl. 3:6.
11. Ncinzi ncobakeelede kucita bazyali besu bakusaanguna?
11 Amuyeeye kujatikizya Eva ncaakeelede kumwaambila Saatani. Mbuti kuti Eva naakaambila Saatani kuti: “Yebo tandikuzyi pe, pele Taata, Jehova ndilimuzyi alimwi ndilamuyanda akumusyoma. Ngowakatupa zintu zyoonse nzyotujisi. Nkaambo nzi ncoamba zintu zibyaabi kujatikizya nguwe? Kozwa awa!” Eelo kaka Jehova naakakkomana kumvwa majwi aaya aalusyomo kuzwa kumwanaakwe uuyandwa! (Tus. 27:11) Pele ba Adamu a Eva kunyina nobakajisi luyando lutamani kuli Jehova. Akaambo kaceeci, bakaalilwa kulikwabilila zina lyakwe kukusampaulwa.
12. Mbuti Saatani mbwaakapa kuti Eva atalike kudooneka, alimwi ino ncinzi ba Adamu a Eva ncobakaalilwa kucita?
12 Mbubwenya mbotwabona, Saatani wakapa kuti Eva atalike kudooneka. Saatani wakatalika kusampaula Jehova kwiinda mukupa Eva kutalika kudooneka Jehova kuti naa ngu Usyi mubotu. Mpoonya ba Adamu a Eva bakaalilwa kukwabilila zina lya Jehova ampuwo yakwe. Eeci cakapa kuti cibaubile kumuswiilila Saatani alimwi akuzangila Usyi. Saatani mbwacita oobo amazuba aano. Ulalisampaula zina lya Jehova kwiinda mukumubejekezya. Bantu ibasyoma bubeji bwa Saatani balafwambaana kubukaka bweendelezi bwa Jehova bululeme.
JEHOVA ULALISALAZYA ZINA LYAKWE
13. Mbuti lugwalo lwa Ezekieli 36:23 mboluutondezya mulumbe mupati wamu Bbaibbele?
13 Sena Jehova ukulanga buyo kusampaulwa ooko kakunyina kulikwabilila? Peepe! Bbaibbele lyoonse mbolizulwa lilaamba kujatikizya ncaacita Jehova kutondezya kuti zintu zyoonse zibyaabi izyakaambwa kujatikizya nguwe mumuunda wa Edeni nzyakubeja. (Matl. 3:15) Mubufwaafwi, inga twaamba kuti mulumbe mupati uuli mu Bbaibbele ngwakuti: Jehova ulalisalazya zina lyakwe alimwi akuleta luumuno abululami munyika kwiinda mu Bwami bweendelezyegwa a Mwanaakwe. Bbaibbele lilijisi makani aatugwasya kumvwisya Jehova mbwacita kutegwa asalazye zina lyakwe.—Amubale Ezekieli 36:23.
14. Mbuti ncaakacita Jehova kubuzangi bwamu Edeni mbocakalisalazya zina lyakwe?
14 Saatani wacita zyoonse nzyakonzya kutegwa alesye Jehova kuzuzikizya makanze aakwe, pele waalilwa cakumaninina. Bbaibbele lilatondezya ncaacita Jehova alimwi lilasinizya kuti kunyina uumbi uuli mbuli nguwe. Masimpe Saatani imuzangi alimwi abaabo boonse bali kulubazu lwakwe bamucisizya moyo kapati Jehova. (Int. 78:40) Nokuba boobo, Jehova makani aaya waayendelezya cabusongo, cakukkazika moyo alimwi acabululami. Alimwi watondezya nguzu zyakwe munzila zinji kapati. Kwiinda zyoonse, luyando lwakwe lulalibonya muzintu zyoonse nzyacita. (1Joh. 4:8) Jehova ulimukubeleka canguzu kusalazya zina lyakwe.
Saatani wakaambila Eva makani aakubeja kujatikizya Jehova, alimwi kwamyaka minji Diabolosi wazumanana kusampaula Leza (Amubone muncali 9-10, 15) *
15. Ino Saatani ulisampaula buti zina lya Leza mazuba aano, alimwi ino ncinzi icacitika?
15 Saatani ucilisampaula zina lya Leza amazuba aano. Usola kupa bantu kudooneka kuti Leza ngusinguzu, mululami, musongo alimwi ngusiluyando. Mucikozyanyo, Saatani usola kupa bantu kuyeeya kuti Jehova tali Mulengi. Alimwi kuti bantu bazumina kuti Leza nkwali, Saatani ubapa kusyoma kuti zyeelelo zya Leza tazipi lwaanguluko alimwi tazili kabotu. Mane buya uyiisya bantu kuti Jehova ngusilunya alimwi ulabaumpa bantu mumulilo wahelo. Ciindi bantu nobabusyoma bubeji oobu bubyaabi kapati, cilabaubila kubukaka bweendelezi bwa Jehova ibululeme. Kusikila mane akanyonyoonwe cakumaninina, Saatani ulazumamana kumusampaula Jehova, alimwi ulazumanana kupa kuti andinywe mumukake Jehova. Pele sena uyoozwidilila?
LUBAZU NDOMUJISI MUMAKANI AAYANDIKA KAPATI
16. Ncinzi ncomukonzya kucita calo ncobakaalilwa kucita ba Adamu a Eva?
16 Jehova ulabazumizya bantu batalondokede kutola lubazu mukusalazya zina lyakwe. Aboobo, mulakonzya kucita cintu ba Adamu a Eva ncobakaalilwa kucita. Nokuba kuti muli munyika iizwide bantu babejekezya Jehova alimwi akusampaula zina lyakwe, mulijisi coolwe cakwiiminina kasimpe kwiinda mukwaambila bantu kuti Jehova ulasalala, mululami, mubotu alimwi ngusiluyando. (Is. 29:23) Mulakonzya kugwasyilizya bweendelezi bwakwe. Mulakonzya kubagwasya bantu kumvwisya kuti bulikke bweendelezi bwa Jehova mbobululeme alimwi akuti bulikke mbobuyooleta luumumo alukkomano kuzilenge zyoonse.—Int. 37:9, 37; 146:5, 6, 10.
17. Mbuti Jesu mbwaakalizyibya zina lya Bausyi?
17 Ciindi notukwabilila zina lya Jehova, tutobela cikozyanyo ca Jesu Kristo. (Joh. 17:26) Jesu wakalizyibya zina lya Bausyi kwiinda mukulibelesya alimwi akukwabilila mpuwo yabo. Mucikozyanyo, Jesu wakabakazya ba Farisi, balo munzila zinji ibakali kupa kuti Jehova alibonye mbuli kuti ngusilunya, ulangila zinji kubantu, ulikule abantu alimwi takwe luse. Jesu wakabagwasya bantu kubona Bausyi kuti balanyoneka, balakkazika moyo, balaaluyando alimwi balalekelela. Kuyungizya waawo, Jesu wakabagwasya bantu kumuzyiba Jehova kwiinda mukwiiya bube bwa Bausyi mubukkale bwakwe bwabuzuba abuzuba.—Joh. 14:9.
18. Mbuti mbotukonzya kukwabilila zina lya Jehova kukubejekezyegwa alimwi akusampaulwa?
18 Mbubwenya mbuli Jesu, tulakonzya kubaambila bantu zintu nzyotuzyi kujatikizya Jehova, kubayiisya kuti Leza ngusiluyando alimwi ulaaluzyalo. Ciindi notucita boobo, tukwabilila Jehova kukubejekezyegwa alimwi akusampaulwa. Tulalisalazya zina lya Jehova kubantu. Andiswe tulakonzya kumwiiya Jehova. Eeci cilakonzyeka nokuba kuti tatulondokede. (Ef. 5:1, 2) Ciindi zintu nzyotwaamba alimwi akucita nozitondezya bantu bwini mbwabede Jehova, tulagwasyilizya mukusalazya zina lyakwe. Tulalisumpula zina eeli kwiinda mukugwasya bantu kuzyiba kasimpe kajatikizya Jehova. * Alimwi tutondezya kuti bantu batalondokede balakonzya kuzumanana kusyomeka.—Job. 27:5.
Tuyanda kugwasya bantu mbotwiiya limwi Bbaibbele kumvwisya bube bwa Jehova bwaluyando alimwi aluzyalo (Amubone muncali 18-19) *
19. Kweelana alugwalo lwa Isaya 63:7, makanze nzi ngotweelede kuba aangawo ciindi notuyiisya bantu?
19 Kuli acimbi ncotweelede kucita kutegwa zina lya Jehova lisalazyigwe. Ciindi notuyiisya bantu kasimpe kamu Bbaibbele, kanji-kanji tukankaizya bweendelezi bwa Leza, kuti Jehova ngoweelela kweendelezya bubumbo, alimwi aaya masimpe. Nokuba kuti cilayandika kapati kuyiisya bantu milawo ya Leza, makanze eesu ngakubagwasya kuyanda Jehova, Taateesu alimwi akusyomeka kulinguwe. Aboobo tweelede kwaamba kujatikizya bube bwa Jehova bubotu, ikukankaizya bwini mbwabede Jehova. (Amubale Isaya 63:7.) Ciindi notuyiisya munzila iili boobu, tuyoobagwasya bantu kumuyanda Jehova alimwi akumumvwida akaambo kakuti bayanda kusyomeka kulinguwe.
20. Ncinzi ncotuyoolanga-langa mucibalo citobela?
20 Pele ino mbuti mbotukonzya kuba masimpe kuti bukkale bwesu alimwi akuyiisya kwesu zileta bulemu kuzina lya Jehova alimwi akupa bantu kuswena kulinguwe? Cibalo citobela ciyakuwiingula mubuzyo ooyu.
LWIIMBO 2 Jehova Ndezina Lyako
^ munc. 5 Ino makani nzi aayandika kapati kubantu alimwi akubangelo? Ino ncinzi cipa kuti makani aaya kaayandika kapati, alimwi ino swebo tujatikizyidwe buti? Kuzyiba bwiinguzi bwamibuzyo eeyi alimwi amibuzyo iimbi iijatikizya makani aaya kulatugwasya kuyumya cilongwe cesu a Jehova.
^ munc. 18 Zimwi ziindi mabbuku eesu akalikwaamba kuti tatweelede kwaamba kuti “zina lya Jehova lyeelede kusumpulwa.” Ino nkaambo nzi? Nkaambo kakuti kunyina muntu iwakaambide kale kuti Leza tayelede kuba azina lyakuti Jehova. Aboobo amuswaangano waamwaka wamu 2017, kumvwisya kwesu kujatikizya kaambo aaka kwakapandululwa. Sicuuno wakaamba kuti: “Mubufwaafwi, tacilubide pe ikwaamba kuti tupailila kuti zina lya Jehova lisumpulwe akaambo kakuti mpuwo yakwe yeelede kusumpulwa.”—Amubone pulogilamu ya JW BROADCASTING yamu January 2018 a jw.org®. Amuunke aalembedwe kuti LIBRARY > JW BROADCASTING®.
^ munc. 62 BUPANDULUZI BWACIFWANIKISO: Diabolosi wakasampaula Leza kwiinda mukwaambila Eva kuti Leza mubeji. Kwamyaka minji, Saatani wakulwaizya mizeezo iitaluzi, mbuli njiisyo yakuti Leza ngusilunya alimwi akuti tali Mulengi.
^ munc. 64 BUPANDULUZI BWACIFWANIKISO: Ciindi nasololela ciiyo ca Bbaibbele, mukwesu ukankaizya bube bwa Leza.
