1-2. Aamba nkani ziyandikana loko kulindiswe tuBakamboni baJehova.

KULI nkani ziyandikana loko kuli ndiswe mazubaano, nkani yabweendelezi bwaLeza akusalazigwa kwazina lyakwe. Mbuli Bakamboni baJehova tuyandisya kwaambuula atala ankani eezi ziyandikana loko. Nikuba boobo nkani yakusalazigwa kwazina lyaLeza ayakuti nguwe ulaacheelelo chakweendelezya zileendelana.

² Toonse twakabona kuti zina lyaLeza lyeelede kusalazigwa. Alubo twakayiya kuti bweendelezi bwaJehova mbubo bweelede kubonwa kuti bweendelezya kabotu. Nkani eezi zyoonse zilayandikana kuli ndiswe.

3. Zina lyaJehova liswaanizyaanzi?

³ Zina lyakuti Jehova liswaanizya zyoonse zili atala aLeza, lilaswaanizya anzila njayendelezya aayo. Nkinkaako kwaamba kuti kusalazigwa kwazina lyaJehova ninkani iiyandikana loko kulikozyenie akwaamba kuti bweendelezi bwaJehova mbubo bweelede kubonwa kuti bweendelezya kabotu. Zina lyaJehova lilaswaanizya anzila njayendelezya aayo mbuli Singuzuzyoonse.​—Langa kabbokesi kati “ Niinzi Ziswaanizidwe Munkani Iiyandikana Loko?”

4. Lugwalo lwa Intembauzyo 135:13 lutyeni atala azina lyaLeza alubo njiili mibuzyo njitutasandule muchiiyo eechi?

⁴ Zina lyakuti Jehova lilayandikana. (Bala Intembauzyo 135:13.) Niinzi chipa kuti zina lyaLeza liyandikane loko? Lyakasizigwa biyeni kumatalikilo? Leza ulookulisalazya biyeni? Alubo nga tulagwasilizya biyeni kulisalazya? Atulange-lange mibuzyo eeyi.

5. Niinzi nzitukonzya kulibuzya nitumvwa kuti zina lyaLeza lyeelede kusalazigwa?

⁵ “Alisalazyigwe zina lyako.” (Mt. 6:9) Majwi aaya Jesu wakaamba kumasaangunino aankombyo yakwe zitondeezya kuti ayandikana loko. Pesi aambaanzi majwi aaya? Kusalazya chintu nkuchigwisya doti. Bamwi balakonzya kulibuzya kuti ‘Zina lyaJehova talisalali kale na?’ Kuti tukonzye kusandula mubuzyo ooyu tweelede kuziba kuti zina liswaanizyaanzi.

6. Nkamboonzi zina niliyandikana loko?

⁶ Zina liswaanizya zyiingi kutali mbulilembwa naakuti mbulyaambwa luzutu. Bbayibbele lyaamba kuti: “Izina libotu lyeelede kusalwa kwiinda lubono lunji.” (Tus. 22:1; Muk. 7:1) Nkamboonzi zina niliyandikana loko? Nkaambo liswaanizya mbazibidwe chaamba nzibayeeya bantu atala amuntu ulaazina eelyo. Nkinkaako chiyandikana nkuti bantu bayeeyaanzi chiindi nibabona naakuti nibamvwa atala azina eelyo kutali mbulilembwa naakuti mbulyaambwa.

7. Bantu balisizya biyeni zina lyaLeza?

⁷ Chiindi bantu nibaambuula zyakubeja atala aJehova nga balookupa kuti bantu bayeeye zibi atala anguwe. Alubo nibapa Leza mulandu, nga balookusizya zina lyakwe. Zina lyaLeza ampuwo yakwe zyakasaanguna kusizigwa mumuunda wamuEdeni. Atubone kuti twiiyaanzi kukusizigwa kwazina lyaLeza.

8. Niinzi Adamu aEva nzibakazi alubo njiili mibuzyo iiba?

⁸ Adamu aEva bakalizi kuti zina lyaLeza nguJehova alubo kuli tumwi twaambo twiingi tuyandikana ntubakazi atala anguwe. Bakalizi kuti Jehova nguwe wakabalenga, nguwe wakabapa buumi, nguwe wakabapa Paradayizi muunzi mubotu alukwatano lumaninide. (Matl. 1:26-28; 2:18) Pesi bakali kuyoobubelesya na boongo bwabo bumaninide kuti bayeeyesesye atala anzibakachitilwa aJehova? Bakali kuyoozumanana na kumuyanda akumulumba Jehova? Nsandulo zyakazwa antanganana chiindi Saatani naakabasunka.

9. Lugwalo lwa Matalikilo 2:16, 17 a 3:1-5 lutondeezya kuti Jehova wakababuzyaanzi bazyali besu bakusaanguna, alubo Saatani wakabeja kutyeni?

 ⁹ Bala Matalikilo 2:16, 17 a 3:1-5. Saatani wakabelesya nzoka kwaambuula aEva. Wakamubuzya kuti: “Sena ncobeni Leza wakaamba kuti tamweelede kulya kuzisamu zyoonse zyamumuunda?” Saatani wakaamba zyakubeja alubo eezi zyakapa kuti Eva ayeeye zibi atala aLeza. Pesi Jehova wakali wamba kuti balye michelo yoonse kunze kwawumwi luzutu. Alubo Jehova wakapa Adamu aEva michelo iisiyene-siyene. (Matl. 2:9) Eezi zitondeezya kuti Jehova ulapa. Nikuba boobo Jehova wakakasya Adamu aEva kulya muchelo umwi biyo. Nkinkaako mubuzyo waSaatani wakali wakubeja. Eezi zyakapa kuti babonaanga Jehova kuli nzyaakali kubayima. Amwi Eva wakayeeya kuti ‘Leza kuli zibotu na nzyalikutwiima?’

10. Saatani wakalisizya biyeni zina lyaLeza alubo eezi zyakeeta mpinduunzi?

¹⁰ Achiindi eechi Eva wakachili kubona Jehova mbuli Mweendelezi wakwe. Wakasandula Saatani kabelesya malayilile akaambwa aJehova. Alubo wakayungizya kuti teebakeelede kuuguma pe munsamu ooyu. Wakalizi kuti kutaswiilila Leza kuyoopa kuti afwe. Pesi Saatani wakamusandula kuti: “Tamukonzyi kufwa pe.” (Matl. 3:2-4) Awa Saatani wakazwa antanganana kuti wakali kubeja. Wakasizya zina lyaLeza kwiinda mukubuzya Eva kuti Jehova ulabeja. Eezi zyakapa kuti Saatani abe dyabbulosi naakuti sikubejelezya. Eva wakeenwa mpawo wakasyoma Saatani. (1 Tim. 2:14) Eva wakasyoma Saatani kwiinda Jehova. Eezi zyakapa kuti kumuubile kusala chabufuba-fuba. Wakasala kutaswiilila Jehova. Wakalya muchelo ngwakakasidwe mpawo wakapa Adamu.​—Matl. 3:6.

11. Bazyali besu bakusaanguna bakeelede kumusandula biyeni Saatani, alubo bakakachilwa kuchitaanzi?

¹¹ Yeeya kuti Eva wakeelede kumusandula biyeni Saatani. Kaansinga wakasandula kuti: “Tandikwizi pe kuti nduweni, pesi ndizi Ndeende Jehova ngundiyanda alubo ngundisyoma. Nguwe wakatupa zintu zyoonse nzitulaazyo. Nkamboonzi nulikwaamba zintu zibi atala anguwe? Zwaawa!” Jehova wakali kunoobotelwa loko kumvwa majwi atondeezya kuti mwanaakwe uumuyanda loko ulasyomeka. (Tus. 27:11) Pesi Adamu aEva teebakali kumuyanda pe Jehova amoyo woonse. Akaambo kakuti teebakali kumuyanda pe Leza amoyo woonse, Adamu aEva bakakachilwa kwiiminina zina lyakwe.

12. Saatani wakachita biyeni kuti Eva atabi achoonzyo atala anzyaakabuzigwa alubo Adamu aEva bakakachilwa kuchitaanzi?

¹² Mbuli mbutwabona, Saatani wakasaanguna kupa kuti Eva atabi achoonzyo atala anzyaakabuzigwa. Wakapa kuti atalike kuyeeya zintu zibi atala Jehova. Mpawo Adamu aEva bakakachilwa kwiiminina zina lyaLeza. Eezi zyakapa kuti kubawubile kuswiilila Saatani akuti bapapile Leza. Saatani ubelesya nzila eezi mazubaano.  Usizya zina lyaLeza kwiinda mukumubejelezya. Bantu basyoma kubeja kwaSaatani nkuuba kuti bakake kweendelezegwa aJehova.

13. Kweendelana a Ezekieli 36:23, nguuli mulumbe uyandikana loko uuli muBbayibbele?

¹³ Jehova ulookuleka zina lyakwe kalili kusizigwa na? Peepe, talookuleka pe. Bbayibbele lyaambuula atala azilookuchitwa aJehova kuti asalazye zina lyakwe kuzwa kukusizigwa nkulyakachitwa mumuunda wamuEdeni. (Matl. 3:15) Mubufwiifwi mulumbe uyandikana loko uuli muBbayibbele waamba kuti: Jehova ulookusalazya zina lyakwe kabelesya Bwaami bwakwe buli kweendelezegwa aMwanaakwe alubo buyoopa kuti kube bululami aluumuno aanyika. Bbayibbele lili amakani atugwasya kubona kuti Jehova uyoolisalazya biyeni zina lyakwe.​—Bala Ezekieli 36:23.

14. Zyakachitwa aJehova akaambo kakupapila kwakachitika mumuunda wamuEdeni zilisalazya biyeni zina lyakwe?

¹⁴ Saatani ulikweezya amanguzu aakwe woonse kuti akachizye Jehova kuzuzikizya makanze aakwe. Pesi Saatani ulookukachilwa. Bbayibbele lili amakani atondeezya zyakachitwa aJehova alubo eezi zitondeezya kuti nguwe alikke ulaacheelelo chakweendelezya. Nisimpe, kupapila kwaSaatani ababo bali kubbazu lyakwe kulamuchisa Jehova. (Int. 78:40) Nikuba kuti kulamuchisa, Jehova ulikusalazya zina lyakwe chabusongo, chabululami alubo kali amoyo mulamfu. Alubo wakatondeezya kuti ngusinguzuzyoonse munzila zyiingi. Kwiinda zyoonse, utondeezya luyando muzintu zyoonse nzyachita. (1 Joh. 4:8) Jehova ulikuzumanana kusalazya zina lyakwe.

15. Saatani ulikulisizya biyeni zina lyaLeza alubo zilikupa kuti bantu bachiteenzi?

¹⁵ Saatani ulikuzumanana kusizya zina lyaLeza mazubaano. Ulikupa kuti bantu batabi achoonzyo chakuti Leza ulaamanguzu, mululami, musongo, akuti ulaaluyando. Muchikozyano, Saatani ulikweezya kweena bantu kuti basyome kuti Leza teeMulengi pe. Kuti basyoma kuti mpali, nga weezya kubeena kuti milawu yaLeza ilatudyaaminina akuti miyumu.  Uyiisya bantu kuti Jehova ulaamoyo mubi akuti ulaalunya nkaambo waamba kuti utenta bantu mumulilo wahelo. Kuti basyoma kubeja ooku, zipa kuti kubawubile kukaka bweendelezi bwaJehova bululeme. Saatani unoozumanana kubejelezya Jehova kusika akanyonyoonwe alubo uyanda kuti upapile Jehova. Saatani uyoozwidilila na?

16. Niinzi nchukonzya kuchita chakakachila Adamu aEva?

¹⁶ Jehova wakazumizya bantu balaachibi kuti bagwasilizye mukusalazya zina lyakwe. Nkinkaako ulakonzya kuchita zyakakachila Adamu aEva. Nikuba kuti tulikupona munyika iizwide bantu basizya akusampawula zina lyaJehova, tuli amweenya wakubuzya bantu kasimpe kakuti Jehova ulasalala, uliluleme, mubotu akuti ulaaluyando. (Is. 29:23) Ulakonzya kutondeezya kuti uyanda kweendelezegwa anguwe. Ulakonzya kubuzya bamwi kuti bweendelezi bwaJehova mbubo abulikke buyooyendelezya chabululami akupa kuti kube luumuno akubotelwa kuzilenge zyoonse.​—Int. 37:9, 37; 146:5, 6, 10.

17. Jesu wakachita biyeni kuti zina lyaWisi lizibinkane?

¹⁷ Tutobelezya chikozyano chaJesu chiindi nitutola lubazu mukusalazya zina lyaJehova. (Joh. 17:26) Jesu wakachita kuti zina lyaLeza lizibinkane kubantu kutali kwiinda mukulibelesya luzutu pe pesi kwiinda mukubayiisya mbabede Jehova. Muchikozyano, Jesu wakalisiyene abaFarisi bakali kupa kuti bantu babonaanga Jehova ulaalunya, uyanda kuti tuchite zyiingi, uli kule andiswe akuti takwe luzyalo. Jesu wakagwasya bantu kuti babone kuti Wisi talangilili kuti tuchite nzitutakonzyi, ulaamoyo mulamfu, ulaaluyando akuti ulalekelela. Alubo wakagwasya bantu kuti bazibe Jehova kwiinda mukutobelezya buntu bwaWisi buzuba abuzuba.​—Joh. 14:9.

18. Nga tulatondeezya biyeni kuti zintu zyaambwa atala aJehova nzyakubeja?

¹⁸ Mbuli Jesu andiswe tulakonzya kubuzya bantu nzituzi atala aJehova, kuti ulaaluyando akuti ulaaluzyalo. Kuti twachita oobo, nga tulikutondeezya kuti zintu zyaambwa atala aJehova nzyakubeja. Tusalazya zina lyaJehova kwiinda mukupa kuti bantu balibone kalisalala. Andiswe tulakonzya kutobelezya Jehova. Eezi zilakonzeka nikuba kuti tatumaninide  pe. (Ef. 5:1, 2) Tusalazya zina lyaJehova kuti nzitwaambuula anzituchita kazigwasya bamwi kuti bazibe mbabede. Tusalazya zina lyaLeza kwiinda mukugwasya bantu kuti bazibe kasimpe kali atala aLeza. Alubo nga tulikutondeezya kuti bantu batamaninide balakonzya kukkala kabasyomeka.​—Job. 27:5.

19. Kweendelana alugwalo lwa Isaya 63:7, niinzi chiyandikana nchitweelede kuyiisya bantu?

¹⁹ Atubone chimwi chintu nchitweelede kuchita kuti tusalazye zina lyaJehova. Chiindi nituyiisya bamwi kasimpe kali muBbayibbele, nga twabayiisya atala abweendelezi bwaLeza chaamba kuti Jehova nguwe alikke ulaacheelelo chakweendelezya alubo eeli ndisimpe. Nikuba kuti kulayandikana kuyiisya bantu milawu yaLeza pesi kaambo kapati nkakuti tweelede kubagwasya kuti bayande Jehova akuti basyomeke kuli nguwe. Nkinkaako tweelede kubayiisya buntu bwaJehova azyeelede kuza mumizeezo yabo chiindi nibamvwa zina lyakuti Jehova. (Bala Isaya 63:7.) Kuti twabayiisya munzila ili boobo, tulabagwasya kuti bamuyande Jehova, bamuswiilile akuti basyomeke kuli nguwe.

20. Tuyoosandula mubuzyo wakutyeni muchiiyo chitobela?

²⁰ Nga tulachita biyeni kuti nzituchita anzituyiisya zigwasye bamwi kuti bayeeye zintu zibotu chiindi nibamvwa zina lyakuti Jehova? Mubuzyo ooyu uzoosandulwa muchiiyo chitobela.