ARTÍCULO NEMA NATALIKGALHTAWAKGA 23
«Katamasantujlilh mintukuwani»
«Oh Jehová, mintukuwani nikxni katilakgsputli» (SAL. 135:13).
TAKILHTLIN 10 ¡Kamalankiw Jehová kiDioskan!
TUKU NATALICHUWINAN *
1, 2. ¿Tuku lu lakgatiyaw lichuwinanaw akinin xtatayananin Jehová?
PUTUM latamanin xlikatsitkan pi kajwatiya Jehová lakgchan namapakgsinan chu kgalhkgalhimaw pi namaskulunkikan xtukuwani. Akinin xtatayananin Jehová lu lakgatiyaw lichuwinanaw uma. Pero ¿tanu tuku kilhchanima namasantujlikan xtukuwani Jehová chu tanu tuku kilhchanima nalimasiyayaw pi kajwatiya Jehová lakgchan namapakgsinan? Ni, nichuna.
2 Putum akinin katsininitaw pi lu xlakaskinka namaskulunkikan xtukuwani Dios chu nalimasiyakan pi kajwatiya Jehová lakgchan namapakgsinan. Wa xlakata umakgolh pulaktiy lu xlakaskinka.
3. ¿Tuku na makgtanuma kxtukuwani Jehová?
3 Xtukuwani Jehová makgtanuma putum tuku anan chu asta makgtanuma chuna la mapakgsinan. Wa xlakata, komo wanaw pi talakaskin namaskulunkikan xtukuwani Dios, nachuna lichuwinamaw pi talakaskin nalimasiyayaw pi chuna la mapakgsinan Jehová wa tlakg xatlan. Xtukuwani tatalakxtumi chuna la mapakgsinan kxlikalanka kakilhtamaku (kaʼakxilhti recuadro « Tuku makgtanuma kʼuma taʼakglhuwit»).
4. 1) ¿Tuku wan Salmo 135:13 xlakata xtukuwani Dios? 2) ¿Tuku takgalhskinin nakgalhtiyaw kʼuma artículo?
4 Xtukuwani Jehová lu xlakaskinka chu ni anan tuku xtachuna (kalikgalhtawakga Salmo 135:13). ¿Tuku tlawa pi lu xlakaskinka nalitaxtu? ¿Tuku xapulana taʼakgsanin limawakaka? ¿Tuku tlawa Dios xlakata namasantujli xtukuwani? ¿Chu la namakgtayananaw xlakata nalimasiyakan pi uma nixlikana? Kʼuma artículo nakgalhtiyaw umakgolh takgalhskinin.
TUKUWANI LU XLAKASKINKA
5. Akxni lichuwinanaw xlakata la tamasantujli xtukuwani Dios, ¿tuku max nalakpuwanaw?
5 Jesús lichuwinalh pi pulaktum tuku kiliskinatkan kioracioneskan wa uma: «Katamasantujlilh mintukuwani» (Mat. 6:9). ¿Tuku kilhchanima umakgolh tachuwin? Masantujlikan kilhchanima pi wi tuku namaskulunkikan o xasanto natlawakan. Pero max wi tiku nalakpuwan: «¿Pero xtukuwani Dios nina xasanto o xaskulunku? ¿Tuku xlakata talakaskin namasantujliyaw?». Xlakata tlan nakatsiyaw uma, talakaskin pi pulana nalilakpuwanaw tuku kilhchanima kgalhikan akgtum tukuwani.
6. ¿Tuku xlakata lu xlakaskinka kgalhikan akgtum tukuwani?
6 Akgtum tukuwani ni kaj akgtum tachuwin nema tlan tsokgwilikan kmaktum kapsnat o tlan nawankan. Biblia lichuwinan: «Tlakg tlan komo tlan nalichuwinankana nixawa nakgalhiya tuku lhuwa xtapalh» (Prov. 22:1, nota; Ecl. 7:1). ¿Tuku xlakata lu xlakaskinka? Xlakata nachuna kilhchanima tuku lakpuwankgo amakgapitsin xpalakata lataman tiku kgalhi uma tukuwani, uma wamputun, chuna la akxilhkgo o la lichuwinankgo amakgapitsin. Wa xlakata, tuku tlakg xlakaskinka ni wa chuna la tatsokgtawila akgtum tukuwani o la wankan, wata wa tlakg xlakaskinka tuku lakpuwankgo latamanin akxni kgaxmatkgo o akxni likgalhtawakgakgo.
7. ¿Tuku limawakakan xtukuwani Jehová?
7 Akxni wi tiku wan taʼakgsanin xlakata Jehová, nitlan lichuwinama o maxkajwiputun xtukuwani. Anta kjardín xaʼEdén niku xapulana limawakaka taʼakgsanin xtukuwani Dios. Kaʼakxilhwi tuku tlan nakatsiniyaw xlakata tuku lacha uma kilhtamaku.
LIMAWAKAKAN TAʼAKGSANIN XTUKUWANI DIOS
8. 1) ¿Tuku xlakgapaskgo Adán chu Eva? 2) ¿Tuku atanu takgalhskinin tlan natlawayaw?
8 Adán chu Eva xlakgapaskgo xtukuwani Jehová, nachuna lhuwa tuku xkatsikgo xpalakata Jehová, la komo xla wa Malakatsukina chu wa tiku kamaxkilh latamat, akgtum lu xastlan paraíso niku xlatamakgolh chu lu tlan xtamakgaxtokgatkan (Gén. 1:26-28; 2:18). Pero, ¿chuntiya xlilakpuwankgo putum tuku Jehová xtlawanit xpalakatakan? ¿Chuntiya matliwakglhkgolh tapaxkit nema xkgalhinikgo Jehová? Takgalhtilh umakgolh takgalhskinin akxni xtalamakgasitsin Dios litsakgsalh xtakanajlakan.
9. Chuna la wan Génesis 2:16, 17 chu 3:1-5, ¿tuku kawanilh Jehová Adán chu Eva, chu tuku tlawalh Satanás xlakata nitlan nalichuwinankan Jehová?
9 (Kalikgalhtawakga Génesis 2:16, 17 chu 3:1-5). Satanás limaklakaskilh tantum luwa chu wanilh Eva: «¿Xlikana Dios kawanin pi ni nawayatit xtawakat putum kiwi nema wilakgolh kjardín?». Satanás tlawalh akgtum takgalhskinin niku xlitasiya pi xlimawakama Dios akgtum taʼakgsanin. Tuku xwanit Dios wa pi tlan xwakgolh xtawakat putum kiwi nema xwilakgolh pero kajwatiya xtawakat kgantum kiwi ni xliwatkan xwanit. Adán chu Eva xkgalhikgo tipalhuwa xtawakat kiwi nema tlan xwakgolh (Gén. 2:9). Xlikana pi Jehová kalimasiyanilh lanka xtalakgalhaman. Pero kawanilh pi xwi xtawakat kgantum kiwi nema nila xwakgolh. Wa xlakata, akxni tlawalh uma takgalhskinin, Satanás lakxtlawalh tuku xaxlikana xwanit Jehová chu maʼakgatekgsninalh pi Dios nitu xkalimasiyaninit xtalakgalhaman Adán chu Eva. Eva max xlakpuwan pi Dios wi tuku ni xkamaxkima talakaskin natlawakgo.
10. ¿Tuku taʼakgsanin limawakalh Satanás xtukuwani Dios, chu tuku kitaxtulh?
10 Uma kilhtamaku, Eva chuntiya xMapakgsina xliʼakxilha Jehová. Asta wanilh Satanás watiya tachuwin nema Jehová xkawaninit. Chu asta xla wa pi nipara xlixamatkan xwanit uma kiwi. Liwana xkatsi pi Dios xkawaninit pi, komo ni xkgalhakgaxmatnankgolh, xnikgolh. Wa xlakata, Satanás lakatitum wanilh Eva: «Ni katinitit» (Gén. 3:2-4). Uma akgtum taʼakgsanin nema xlimawakama xtukuwani Jehová, xlakata xkilhwama pi Jehová xkaʼakgskgawinit. Chuna Satanás akgskgawini litaxtulh, o tiku limawakanan tuku nixaxlikana. Satanás akgskgawilh Eva chu xla kanajlanilh (1 Tim. 2:14). Wa Satanás tiku tlakg lipawa chu ni wa Jehová, chu uma tlawalh pi lu nitlan tuku xlaksakli: kgalhakgaxmatmakgalh Dios chu walh xtawakat kiwi nema xwanikanit pi ni nawa. Chu alistalh, maxkilh Adán uma tawakat (Gén. 3:6).
11. ¿Tuku xtalakaskin pi xtitlawakgolh Adán chu Eva?
11 Kalilakpuwaw puntsu tuku xtalakaskin pi xtikgalhtilh Eva Satanás. Kalilakpuwaw komo chuna xtikgalhtilh: «Akit ni klakgapasan, pero kinTlat, Jehová, liwana klakgapasa. Kpaxki chu klipawan. Xla kinkamaxkinitan putum tuku kkgalhiyaw. ¿Tuku xlakata limawakapat taʼakgsanin? ¡Kapit!». Xlikana pi Jehová lu xtilipaxuwalh komo xtsumat chuna xtikgalhtinalh chu chuna xtilimasiyanilh xtapaxkit (Prov. 27:11). Pero Eva chu nipara Adán xpaxkikgo Jehová. Wa xlakata ni kgalhmakgtayakgolh xTlatkan.
12. ¿La tlawalh Satanás xlakata Eva xlakpuwa pi Jehová nixatlan Tlat xwanit, chu tuku ni tlawakgolh Adán chu Eva?
12 Chuna la akxilhnitaw, Satanás tsukulh limawaka taʼakgsanin xtukuwani Jehová akxni xtlawaputun pi Eva xlakpuwa pi Jehová nixatlan Tlat xwanit. Alistalh, Adán chu Eva ni kgalhmakgtayakgolh xtukuwani Jehová. Uma tlawalh pi xlakan xkanajlakgolh taʼakgsanin nema Satanás xkilhwama chu ni kgalhakgaxmatkgolh xTlatkan. La uku, Satanás chuntiya lhuwa tuku limaklakaskin xlakata nakinkaliʼakgskgawiyan. Limawaka taʼakgsanin xtukuwani Jehová chu tlawa pi tiku kanajlanikgo xtaʼakgsanin nalakgmakgankgo xlimapakgsin Jehová.
JEHOVÁ MASANTUJLI XTUKUWANI
13. Chuna la wan Ezequiel 36:23, ¿tuku tamakatsinin kinkamaxkiyan Biblia?
13 ¿Nitu tlawalh Jehová xlakata xlimawakamaka uma taʼakgsanin? Nichuna. Biblia kinkawaniyan tuku tlawanit Jehová xlakata nalimasiya pi tuku wa Satanás kjardín xaʼEdén kaj akgtum taʼakgsanin (Gén. 3:15). Chu tlan nawanaw pi tamakatsinin nema lichuwinan Biblia wa uma: Jehová namasantujli xtukuwani chu namaklakaskin xTamapakgsin nema lakgayawanit xKgawasa xlakata nalimin takaksni chu tuku xaʼakgstitum unu kKatiyatni. Biblia lhuwa tuku kinkalitachuwinanan nema kinkamakgtayayan naʼakgatekgsaw la masantujli Jehová xtukuwani (kalikgalhtawakga Ezequiel 36:23).
14. ¿La limasiya tuku tlawalh Jehová kjardín xaʼEdén pi masantujlinit xtukuwani?
14 Satanás lhuwa tuku tlawanit xlakata xtalakaskin Jehová ni xkgantaxtulh, pero ni makgantaxtinit. Biblia kinkawaniyan tuku tlawanit Jehová chu limasiya pi niti anan tiku xtachuna la Jehová. Xlikana pi Jehová lu lipuwa akxni Satanás lakatakilh chu xlakata wi tiku ni kgalhakgaxmatkgonit (Sal. 78:40). Pero Jehová lhuwa tuku tlawanit xlakata nalakkaxtlawa uma chu limasiyanit liskgalala, pi ni lakapala sitsi chu pi xla lu xaʼakgstitum. Nachuna, pulaklhuwa la limasiyanit xlitliwakga. Chu ankgalhin limasiya xtapaxkit akxni wi tuku tlawa (1 Juan 4:8). Jehová ankgalhin liskujnit xlakata namasantujli xtukuwani.
Satanás wanilh taʼakgsanin Eva xlakata Jehová, chu chuna la titaxtutilhanit kilhtamaku chuntiya limawakama taʼakgsanin xtukuwani Dios (Kaʼakxilhti párrafos 9, 10 chu 15). *
15. ¿Tuku chuntiya tlawama Satanás xlakata nalimawaka taʼakgsanin xtukuwani Dios, chu tuku kitaxtunit?
15 La uku kilhtamaku, Satanás chuntiya limawakama taʼakgsanin xtukuwani Jehová. Tlawaputun pi latamanin nalakpuwankgo pi ni kgalhi litliwakga, ni xaʼakgstitum, ni xaskgalala chu ni paxkinan. Akgtum liʼakxilhtit, tlawaputun pi latamanin kakanajlakgolh pi Jehová nixlikana lama. Chu, komo wi tiku kanajlani, tlawaputun kakanajlakgolh pi xtastakyaw lu laktuwa chu pi nila makgantaxtikan xlakata lhuwa tuku ni masta talakaskin natlawakan. Chu asta wan pi Jehová chatum Dios tiku nitlan likatsi chu kalhkuyu latamanin anta kpupatin. Max tiku kanajlakgo uma taʼakgsanin nachuna lakgmakgankgo xlimapakgsin Dios. Satanás chuntiya nalimawaka taʼakgsanin Jehová chu nachuna chuntiya natlawaputun pi wix namakgxtakga Jehová. ¿Namaxkiya talakaskin?
¿LA MAKGTANUMAW KʼUMA TAʼAKGLHUWIT?
16. ¿Tuku tlan natlawayaw akinin nema Adán chu Eva nila tlawakgolh?
16 Jehová masta talakaskin pi latamanin, maski kgalhikgo talakgalhin, namakgtayananaw xlakata natamasantujli xtukuwani. Wa xlakata, chatunu chatunu akinin tlan natlawayaw tuku nila tlawakgolh Adán chu Eva. Maski xlikana pi kʼuma kakilhtamaku anan latamanin tiku limawakakgo taʼakgsanin Jehová, akinin tlan nalimasiyayaw tuku xaxlikana: pi Jehová xasanto, xaʼakgstitum, tlan likatsi chu lu xapaxkina (Is. 29:23). Tlan nalimasiyayaw pi lakaskinaw wa kiMapakgsinakan kalitaxtulh chu kawaniputunaw latamanin pi xTamapakgsin kajwatiya xa’akgstitum, nalimin takaksni chu tapaxuwan unu kKatiyatni (Sal. 37:9, 37; 146:5, 6, 10).
17. ¿Tuku tlawalh Jesús xlakata namasiya xtukuwani xTlat?
17 Akxni kgalhmakgtayayaw xtukuwani Jehová, stalanimaw xliʼakxilhtit Jesucristo (Juan 17:26). Akxni Jesús masiyalh xtukuwani xTlat ni kajwatiya limaklakaskilh, wata nachuna masiyalh la likatsi. Akgtum li’akxilhtit, akxni fariseos lichuwinankgolh pi Jehová lu kinkaskiniyan tuku nila makgantaxtiyaw, pi ni kinka’akgatekgsniyan, nitlan likatsi chu pi kinkamakaminiyan tuku nitlan, Jesús kamakgtayalh latamanin xlakata na’akxilhkgo pi xTlat kinka’akgatekgsniyan, ni lakapala sitsi, xapaxkina chu xalakgalhamanina. Nachuna, chuna la kalikatsinilh latamanin kamakgtayalh nalakgapaskgo xtayat Jehová xlakata xla limasiyalh watiya tayat nema kgalhi Jehová (Juan 14:9).
18. ¿La tlan nalimasiyayaw pi nixlikana tuku limawakakan Jehová?
18 Xtachuna la Jesús, akinin na tlan nakamasiyaniyaw amakgapitsin tuku katsiniyaw xlakata Jehová chu tlan nakawaniyaw pi xla lu xapaxkina chu xalakgalhamana. Chuna nalimasiyayaw pi nixlikana tuku xtalamakgasitsin Jehová limawakamakgo. Masantujliyaw xtukuwani Jehová chu kamakgtayayaw latamanin xasanto nali’akxilhkgo Jehová. Chu maski akinin makglakgalhinanin, tlan nastalaniyaw xliʼakxilhtit Jehová (Efes. 5:1, 2). Akxni kintachuwinkan chu tuku tlawayaw limasiya la likatsi Jehová, makgtayanamaw natamasantujli xtukuwani. Makgtayanamaw natamaskulunki xtukuwani Jehová akxni kamakgtayayaw latamanin namakgxtakgkgo nixatlan talakapastakni nema kgalhikgo xpalakata Jehová. * Nachuna, masantujliyaw xtukuwani Jehová akxni ni makgxtakgaw maski makglakgalhinanin akinin (Job 27:5).
Kamakgtayaputunaw tiku kalimakgalhtawakgeyaw Biblia nakatsikgo pi Jehová tlan likatsi chu xapaxkina (Kaʼakxilhti párrafos 18 chu 19). *
19. Chuna la wan Isaías 63:7, ¿tuku xlakata limakgalhtawakgenanaw Biblia?
19 Wi atanu tuku tlan natlawayaw xlakata namasantujliyaw xtukuwani Jehová. Akxni limakgalhtawakgenanaw Biblia, ankgalhin lichuwinanaw pi kajwatiya Jehová lakgchan namapakgsinan. Chu xlikana pi kajwatiya Jehová lakgchan namapakgsinan kxlikalanka kakilhtamaku. Pero, maski xlikana lu xlakaskinka nalichuwinanaw xlimapakgsin Dios, tuku tlawaputunaw wa pi nakamakgtayayaw latamanin napaxkikgo Jehová chu ni namakgxtakgkgo kinTlatkan. Wa xlakata, talakaskin nalichuwinanaw lakwan tayat nema kgalhi Jehová chu la likatsi (kalikgalhtawakga Isaías 63:7). Komo chuna natlawayaw, latamanin napaxkikgo Jehová chu nakgalhakgaxmatkgo xlakata ni namakgxtakgputunkgo.
20. ¿Tuku takgalhskinin nakgalhtiyaw k’atanu artículo?
20 Chuna la akxilhwi xlakata tuku kilhchanima masantujlikan xtukuwani Jehová, ¿la tlan nakatsiyaw pi kintayatkan chu tuku masiyayaw namalankikgo xtukuwani Dios, chu nakamakgtaya latamanin natalakatsuwinikgo? Kʼatanu artículo nakgalhtiyaw uma takgalhskinin.
TAKILHTLIN 2 Mintukuwani Jehová
^ párr. 5 ¿Tuku taʼakglhuwit lakatsukulh nema makgtanumakgo latamanin chu ángeles? ¿Tuku xlakata lu xlakaskinka chu la namakgtayananaw xlakata nalimasiyakan pi nixlikana? Xatakgalhtin umakgolh takgalhskinin chu atanu namatliwakglha la talalinaw Jehová.
^ párr. 18 Lakgachunin, kilikgalhtawakgakan lichuwinankgonit pi ni talakaskin naskinaw k’oración pi katamaskulunkilh xtukuwani Jehová xlakata niti wanit pi xla ni lakgchan nakgalhi xtukuwani. Pero, anta ktamakxtumit xaʼakgatunu kata nema tlawaka kkata 2017 lichuwinanka xasasti tuku akgatekgska. Tiku xpulalima programa lichuwinalh: «Tlan skinaw kʼoración katamasantujlilh xtukuwani Jehová, xlakata talakaskin pi tlan nalichuwinamparakan» (ka’akxilhti programa xla enero kata 2018 anta kjw.org®, ksección LIKGALHTAWAKGA > JW BROADCASTING®).
^ párr. 62 TUKU TASIYA KDIBUJO: Akgskgawini nitlan tuku limawakalh Jehová akxni wanilh Eva pi Dios xa’akgsanina. Chuna la titaxtutilhanit kilhtamaku, Satanás malakgatuminit nixaxlikana tamasiy xpalakata Dios, la komo xla lu nitlan likatsi o pi ni wa kamalakatsukilh latamanin.
^ párr. 64 TUKU TASIYA KDIBUJO: Chatum tala lichuwinama la likatsi Jehová akxni limakgalhtawakgenama Biblia.
