SEMANA 23
“Eska mítinhaaka chíti nombri eska pímbinhasïtiska”
“Oh, Jeoba, chíti nombri para méntkisï jauati” (SAL. 135:13).
PIREKUA 10 ¡Ju je Jeobani kʼéri ambe arhini!
AMBE ENGACHI EXEAKA *
1, 2. ¿Amberi ambechi kánikua tsitisïni uandontskuarheni Jeobaeri testiguecha?
PARA jucha kánikua jukaparhakuesti xarhatani eska Jeobajkusï újka sési juramuni ka ístu kuájpini imeri nombrini. Jeobaeri testiguechachi kánikua tsitisïnga íri ambe uandontskuarheni. ¿Peru arhikuekasïni i ambe eskachi jatsiska para táchanisï kuájpini ini tsimani ambe? Nómbe.
2 Iáminduchi jorhenguarhiskia eskachi jatsiska para pímbinhajkuntani Tata Diosïri nombrini ka xarhatani eska Jeobajkusï újka sési juramuni. I tsimani ambe kánikua jukaparhakuesti para jucha.
3. ¿Ambe xáni arhikuekasïni Jeobaeri nombri?
3 Jeobaeri nombri, iámu ambe arhikuekasïndi na enga jásïka juchari Tata Diosï ka ambe enga újka, asta na enga juramujka. Ísï jimbo, engachi uandajka eska ambe enga sánderu jukaparhakueka, jindeska Tata Diosïri nombrini pímbinhajkuntani, ístuchi uandani jarhasïnga eskachi jatsiska para xarhatani eska Jeobajkusï újka sési juramuni. Komu Juramuti iámu amberi, imeri nombri sési terukuntasïndi na enga úrajka imeri juramukuani (exe je rekuadruni “ Uánikua ambe jarhasti kurhamarhikua ma jimbo”).
4. a) ¿Ambe uandasïni Salmo 135:13, Tata Diosïri nombriri ambe? b) ¿Náki kurhamarhikuechanchi mókuantaua ini jorhenguarhikua jimbo?
4 Jeobaeri nombri kánikua jukaparhakuesti (arhinta je Salmo 135:13). ¿Andisï xáni jukaparhakue? ¿Ambe uénaspi no sési pakatani Tata Diosïri nombrini? ¿Ambe úxaki Tata Diosï para pímbinhajkuntani? ¿Ka juchachi néna uá kuájpini? Ini jorhenguarhikua jimbo, mókuantauakachi ini kurhamarhikuechani.
NA ENGA XÁNI JUKAPARHAKUEKA NOMBRI MA
5. ¿Ambe úpirini nema kurhamarhikuarhini enga kurhaajka eska uétarhisïnga pímbinhajkuntani Tata Diosïri nombrini?
5 Jesusi uandaspti eska sánderu jukaparhakua ambe engachi jatsika para kurhajkuarhini kómarhikua jimbo, jindeska: “Eska mítenhaaka chíti nombri eska pímbinhasïtiska” (Mat. 6:9). ¿Ambe arhikuekasïni i ambe? Pímbinhajkuntani ambe ma, jindesti úni eska ambe ma pímbinhasï jauaka o sési jájkuntani. Peru jamberi nema úpirindi kurhamarhikuarhini: “¿Andi, Tata Diosïri nombri no pímbinhasïskia? ¿Andisï uétarhijki pímbinhajkuntani?”. Parachi ini ambe mókuntani, jatsiskachi para eratseni ambe xáni arhikuekasïni nombri ma.
6. ¿Andisï xáni jukaparhakue nombri ma?
6 Nombri ma no solu uandakua máesti enga karanhajka o uandanhani. Biblia uandasïndi: “Sánderu sésisti ambakiti ambe jimbo mítekateni ka eska uánikua jatsikuarhekua ambe jatsini” (Prov. 22:1, nota; Ecl. 7:1). ¿Andisï xáni jukaparhakue nombri ma? Jimboka ístu i nombri arhikuekasïnga ambe engaksï máteruecha eratsejka kʼuiripueri ma enga ísï arhinhajka, o na enga mítekateka kʼuiripu ma. Ísï jimbo, ambe enga sánderu jukaparhakueka, no jindesti na enga karakuarhijka nombri ma o na enga kurhaakuarhijka, sino ambe engaksï eratsejka máteruecha engaksï exejka o kurhaajka nombri ma.
7. ¿Néna jimbo no sési pakatasïni nema, Tata Diosïri nombrini?
7 Enga nema chkuanderakua ambe uandajka Jeobaeri ambe, no sési pakatani jarhasïndi imeri nombrini. Ka jardini de Edenirhuksï uénaspti chkuanderakua ambe uandani Tata Diosïri ambe paraksï no sési pakatani. Ju je exeni ambechi uá jorhenguarhini ima amberi enga jiáni úkuarhipka.
UÉNASÏNDIKSÏ NO SÉSI PAKATANI TATA DIOSÏRI NOMBRINI
8. a) ¿Ambeksï mítespi Adani ka Eba? b) ¿Ka ambechi uá kurhamarhikuarhini?
8 Adani ka Eba, mítesptiksï Jeobaeri nombrini ka uánikua máteru jukaparhakua ambe, por ejemplu, eska ima jindeska Kuerajpiri ka enga tsípikua íntsaapka, sési jásï Paraisu ma para irekani ka ambakiti temungurhirikua ma (Gén. 1:26-28; 2:18). ¿Peruksï jánguarhintani japirini eratsentani iámu ambe enga Jeoba íntsaapka? ¿Jánguarhintanksï japirini sánderu xénchani Jeobani ka jukaparharani ambe enga ima úpka imecha jimbo? Ambe engaksï úpka jiáni enga Noambakiti tsʼéjkuapka mókuantaasptiksï ini kurhamarhikuechani.
9. Eska na uandajka Génesis 2:16, 17 ka 3:1-5, ¿ambe arhiaspi Jeoba, Adani ka Ebani ka néna chkuanderakuaspi Noambakiti?
9 (Arhinta je Génesis 2:16, 17; 3:1-5). Akuitsini ma úraparini, Noambakiti kurhamarhispti Ebani: “¿Meru ísïski eskaksïni Tata Diosï arhiska eskajtsï no jatsiska para arhani iámindu anhatapuecheri engaksï jardinirhu jaka?”. Ini ambe jingoni, Noambakiti chkuanderakua ambe uandaspti Tata Diosïri ambe ka Eba uénaspti no sési ambe eratseni. Ambe enga Tata Diosï uandapka, jindespti eskaksï úpiringa akuni iámindu anhatapuecheri frutani, peru máechakueri nómbe. Adani ka Eba, úpirindiksï mámaru jásï anhatapuecheri fruta arhani (Gén. 2:9). I ambe xarhatasïndi eska Jeoba uánikua ambe íntsaaspka imechani. Peru ístu arhiaspti eska jarhaspka anhatapu ma engaksï no jatsipka para akuni. Ísï jimbo, imani ambe jingoni enga Noambakiti kurhamarhipka Ebani, uénaspti chkuanderani ka ísï, uandaspti eska Tata Diosï no intsïmpitispka. Jamberi Eba eratsepti eska Tata Diosï no íntskuxapka ambakiti ambe.
10. ¿Náki chkuanderakua uandaspi Noambakiti para no sési pakatani Tata Diosïri nombrini ka ambe úkuarhispi inde ambe jimbo?
10 Jiánisï, Eba útasï ísï exesïrendi Jeobani eska imeri Juramuti. Arhispti Noambakitini ambe enga Tata Diosï juramukuapka. Asta jamberi uandaspti eskaksï no jatsispka para pʼarhini anhatapuni. Mítespti eska Tata Diosï arhiaspka eskaksï uarhipiringa engaksï no kurhajchapiringa. Jiájkani Noambakiti arhispti: “Nójtsï niáraaka uarhini” (Gén. 3:2-4). Indeni ambe uandaparini, Noambakiti no sési pakataspti Tata Diosïri nombrini jimboka uandaxapka eska Jeoba chkuanderakuaspka. Ka ísï, Noambakiti niáraspti jindeni nema enga chkuanderakua ambe jauatatspijka. Eba jakajkuspti Noambakitiri chkuanderakuani (1 Tim. 2:14). Sánderu mintsikaspti Noambakitini ka eska Jeobani, ka inde ambe úspti eska Eba sánderu no sési jásï ambe erakupiringa úni: no kurhajchani Tata Diosïni ka arhani imani frutani enga Jeoba arhipka eska no akupiringa. Tátsekua, íntskuspti Adanini imani frutani (Gén. 3:6).
11. ¿Ambeksï jatsispi para úni Adani ka Eba?
11 Ju je eratsentani ambe enga Eba úpiringa mókukuntani Noambakitini. Ju je eranhaskani eska ini ambe mókukupiringa: “Nókini míteska tʼunguini, peru juchiti Táti Jeobani kʼóruni míteska. Xénchasïnga ka mintsikasïnga imani. Imajtsïni íntskusti iámindu ambe engachi jatsika. ¿Nénari tekaasïni no sési ambe uandani Jeobaeri ambe? ¡Kéndikucherini!”. Jeoba kánikua sési pʼikuarherapirindi enga Eba ísï mókukupiringa Noambakitini ka imeri uandakuecha jingoni xarhatani na enga xáni xénchenga Táti jembani ka eska no méni jurajkupiringa (Prov. 27:11). Peru ni Eba ni Adani pʼikuarhereni ambakiti uékperakua ma Jeobani jimbo. Jimboksïsï no kuájpipti Táti jemberi nombrini.
12. ¿Ambe úspi Noambakiti, Eba jingoni ka ambeksï no úspi Adani ka Eba?
12 Eskachi na exekia, Noambakiti uénaspti no sési pakatani Jeobaeri nombrini jiáni enga úpka eska Eba nóteru segura japiringuia eska Jeoba ambakiti Táti máeska. Tátsekua, Adani ka Eba nóksï kuájpispti Jeobaeri nombrini. Inde ambe úspti eskaksï jiókuarhipiringa ambe enga Noambakiti arhiani jápka ka eskaksï nóteru kurhajchapiringuia imecheri Tátini. Ini jurhiatikuecha jimbo, Noambakiti májkueni ambe úrasïndi, no sési pakatasïndi Tata Diosïri nombrini chkuanderakua ambe jingoni ka úsïndi eska imecha engaksï jakajkukujka, no jiókuarhiaka Jeobaeri ambakiti juramukuani.
JEOBA PÍMBINHAJKUNTASÏNDI IMERI NOMBRINI
13. Eska na uandajka Ezequiel 36:23, ¿amberi sánderu uandasïndi Biblia?
13 Peru Jeoba no ísku pakaraspti engaksï chkuanderakua ambe jauatakupka. Iámu Bibliarhu, uandasïndi ambe enga Jeoba úkia para xarhatani eska chkuanderakua ambespka ambe enga Noambakiti uandapka jardini de Edenirhu (Gén. 3:15). Uákachi uandani eska ambe enga Biblia sánderu uandajka jindeska eska Jeoba pímbinhajkuntaaka imeri nombrini imani Reinuni úraparini enga Jesusi juramutiuaka ka uáti eska pínandikua jauaka Echerirhu ka eska iámindu ambe jurhimbitku úkuarhiaka. Biblia uánikua ambe uandasïndi engajtsïni jarhuatajka kurhanguni na enga Jeoba pímbinhajkuntaaka imeri nombrini (arhinta je Ezequiel 36:23).
14. ¿Ambe úxaki Jeoba para pímbinhajkuntani imeri nombrini jiáni uératini enga chkuanderakua ambe uandanhapka jardini de Edenirhu?
14 Nájkiruka Noambakiti uánikua ambe úkia, no úxati ójkutani Jeobani paraka úkuarhiaka imeri eratsekua. Biblia uandasïndi na enga újka ambe ma Jeoba ka ístu xarhatasïndi eska no nema ísïska eska ima. Ísïsti, Tata Diosï kánikua no sési pʼikuarherasti imani ambe jimbo enga Noambakiti úka ka iámindu imecha engaksï májkueni jámajka eska ima (Sal. 78:40). Peru Jeoba sési peentaxati iámu ambe jánhaskakua jingoni, tekaantskua ka jurhimbikua jingoni. Ístu, mámaru ambe jimbo xarhatastia na enga xáni uinhapitiika. Ka imeri uékperakua sánderu xarharasïndi iámindu ambe jimbo enga újka (1 Juanu 4:8). Jeoba méntkisï ánchikuarhixati para pímbinhajkuntani imeri nombrini.
Noambakiti chkuanderakua ambe arhispti Ebani, Jeobaeri ambe, ka asta iásï jamberi chkuanderakua ambe uandaxati Tata Diosïri ambe. (Exe je párrafu 9, 10 ka 15). *
15. ¿Ambe úxaki Noambakiti para no sési pakatani Tata Diosïri nombrini ini jurhiatikuecha jimbo ka ambe úkuarhixaki indeni ambe jimbo?
15 Ini jurhiatikuechani jimbo, Noambakiti útasï chkuanderakua ambe jauatakusïndi Jeobani para no sési pakatani imeri nombrini. Jánguarhintasïndi parakaksï kʼuiripuecha no jakajkuaka eska Tata Diosï uinhapitiska, jurhimbitiska, jánhastiska ka uékpitini. Por ejemplu, uékasïndi eskaksï kʼuiripuecha no jakajkuaka eska Jeoba jarhaska. Ka enga nema jakajkujka Tata Diosïni, Noambakiti jánguarhintasïndi eska ísï exeaka eska no sési jarhaska ambe engajtsïni juramuchijka ka eska jukari úkua jukaska úni ambe enga ima uéjka. Ístu jorhentpesïndi eska Jeoba no sáni pʼamojpisïnga, jimboka infiernurhu kurhiraasïnga kʼuiripuechani. Engaksï kʼuiripuecha niárajka jakajkuni ini chkuanderakuani, jamberiksï sánderu no uékaati eska Tata Diosï juramukuauaka. Noambakiti seguiriuati chkuanderani astaka kʼamajkunhaaka ka ístu jánguarhintaati parajtsï jurajkuni Jeobani. ¿Uá ísï úni?
AMBE ENGACHI UÁKA ÚNI PARA PÍMBINHAJKUNTANI JEOBAERI NOMBRINI
16. ¿Ambechi uá úni jucha engaksï Adani ka Eba no úka?
16 Jeoba jurajkusïndi eskachi jarhuajpiaka pímbinhajkuntani imeri nombrini. Ísï jimbo, mándani juchachi uáka úni ambe engaksï Adani ka Eba no úka. Nájkirukachi ini parhakpinirhu jaka nani engaksï kʼuiripuecha no sési jásï ambe uandajka Jeobaeri nombriri ambe, juchachi uáka kuájpini ambe enga jurhimbitkueka: eska Jeoba pímbinhasïtiska, jurhimbitini, ambakitini ka uékpitini (Is. 29:23). Uákachi xarhatani eskachi uékasïnga eskajtsïni ima Juramuchiaka ka aianguani kʼuiripuechani eska imajkusï jurhimbikua jingoni juramujka ka eska imajkusï uáka eskachi tsípikua ka pínandikua jingoni irekaaka (Sal. 37:9, 37; 146:5, 6, 10).
17. ¿Ambe úspi Jesusi para mítetarpini Táti jemberi nombrini?
17 Engachi kuájpijka Jeobaeri nombrini, májkuenchi úni jarhasïnga eska Jesukristu (Juanu 17:26, TNM). Jesusi no solu aianhpispti na enga arhinhajka Táti jemba, ístu jorhentpispti na enga jásïka Jeoba. Por ejemplu, engaksï fariseuecha úpka eska Jeoba ísï exenhapiringa komu Tata Diosïni ma enga uinhamarhitspijka, no kurhangutspijka, no sési kámpijka ka no pʼamojpini, Jesusi jarhuataaspti kʼuiripuechani paraksï exeni eska imeri Táti kurhangutspisïnga, tekaantstiska, uékpitiska ka pʼamojpitini. Ístu, imeri jángua jingoni enga pauani pauani xarhatapka, jarhuataaspti kʼuiripuechani paraksï míteni na enga jásïka Jeoba, imeri Táti (Juanu 14:9).
18. ¿Nénachi uá xarhatani eska no ísïska ambe engaksï uandajka Jeobaeri ikiatspiticha?
18 Májkueni eska Jesusi, uákachi aianhpini ambe engachi míteka Jeobaeri ambe, eska uékpitiska ka eska sési kámpisïnga. Ísïchi xarhataaka eska no ísïska ambe engaksï uandajka Jeobaeri ikiatspiticha. Pímbinhajkuntasïngachi Jeobaeri nombrini ka jarhuataasïngachi kʼuiripuechani paraksï exeni eska imeri nombri pímbinhasïska. Ka nájkirukachi jucha kʼamanharhintstika, uákachi ísïni eska Jeoba (Efes. 5:1, 2). Engachi juchari uandakuecha ka úkuecha jingoni xarhatajka na enga jásïka Jeoba, jarhuajpisïngachi pímbinhajkuntani imeri nombrini. Kuájpisïngachi imeri nombrini engachi jarhuataajka kʼuiripuechani jurhimbikua ambe míteni Tata Diosïri ambe. * Ístu, pímbinhajkuntasïngachi imeri nombrini engachi no méni jurajkujka Jeobani nájkirukachi kʼamanharhintstika (Job 27:5).
Uékasïngachi jarhuataani imechani engaksï Bibliaeri ambe jorhenguarhini jaka paraksï míteni eska Jeoba sési kámpisïnga ka xénchpeni. (Exe je párrafu 18 ka 19). *
19. Eska na uandajka Isaías 63:7, ¿ambechi sánderu uékasïni úni engachi jorhentpijka Bibliaeri ambe?
19 Jarhasti máteru ambe engachi uáka úni para pímbinhajkuntani Jeobaeri nombrini. Engachi jorhentpijka Bibliaeri ambe, méntkisïchi uandasïnga eska Jeobajkusï újka sési juramuni. Ka ísïsti, Jeobajkusï jatsiti para juramukuni iámindu ambe enga xáni kueraakata jaka. Ka nájkiruka jukaparhakueka eskachi jorhentpiaka ambe enga Tata Diosï juramujka, ambe engachi sánderu uéjka jindesti jarhuataani kʼuiripuechani paraksï xénchani ka no jurajkuni juchari Tátini. Jimbochisï jatsika para xarhatani na enga jásïka Jeoba ka ambe enga xáni arhikuekajka imeri nombri (arhinta je Isaías 63:7). Engachi ísï úska, kʼuiripuechaksï xénchaati Jeobani ka kurhajchaatiksï jimbokaksï no méni uékaaka jurajkuni.
20. ¿Náki kurhamarhikuanchi mókuntaa máteru jorhenguarhikua jimbo?
20 Exeparini eska uánikua ambe arhikuekasïnga pímbinhajkuntani Jeobaeri nombrini, ¿nénachi uá seguru jarhani eska juchari jángua ka ambe engachi jorhentpijka, kʼéri ambe arhiaka Jeobaeri nombrini ka jarhuataani kʼuiripuechani paraksï andarhierani? Máteru jorhenguarhikua jimbochi mókuntaaka ini kurhamarhikuani.
PIREKUA 2 Chíti nombri jindesti Jeoba
^ párr. 5 Kʼuiripuecha ka ánjelichaksï jatsisïndi para pauani pauani kuájpini ambe ma enga kánikua jukaparhakueka. ¿Andisï xáni jukaparhakue eskachi kuájpiaka indeni ambe ka nénachi uá ísï úni? Ambe engachi mókuntaaka i kurhamarhikueri ka máteruecheri, uáti eskachi sánderu ambakiti pájperakua ma jatsiaka Jeoba jingoni.
^ párr. 18 Ménisïksï juchari publikasionicharhu arhisïrendi eska no uétarhisïnga kuájpini Jeobaeri nombrini jimboka no nema uandasïnga eska ima no jatsiska para ísï arhinhani. Peru 2017 jimbo, tánguarhikuarhu enga mándani uéxurhini úkuarhijka, erachi enga orhejtsïkupka tánguarhikuani, jimbanhi ambe aianhpispti, uandaspti: “No no sési jarhasti kómarhini eska uétarhisïnga kuájpini Jeobaeri nombrini, jimboka jatsiska para mítekuarhini sési jimbo na enga jásïka ima” (exe je programani enerueri 2018 anapu, ixú jw.org®, jima enga arhijka BIBLIOTECA > JW BROADCASTING®).
^ párr. 62 AMBE ENGA XARHATAJKA IMAJENI: Noambakiti no sési pakataspti Tata Diosïni enga arhipka Ebani eska ima chkuandera máespka. Desde iónisïa, Noambakiti chkuanderakua ambe uandasïndi, por ejemplu, eska Tata Diosï no sési kámpisïnga ka eska ima no kueraaska kʼuiripuni.
^ párr. 64 AMBE ENGA XARHATAJKA IMAJENI: Erachi ma enga jorhentpini jaka Bibliaeri ambe, xarhataxati na enga jásïka Tata Diosï.
