1-2. Ne a mataupu e tāua ‵ki eiloa ki Molimau a Ieova?

E UKE a mataupu e tāua ki a tatou i aso nei—ko te pulega a te Atua mo te fakamalugaga o tena igoa. E pelā me ne Molimau a Ieova, e fia‵fia tatou o sau‵tala ki mataupu ‵gali konā. Kae e se ko tena uiga me i te pulega a te Atua mo te fakamalugaga o tena igoa ne mea kese‵kese eiloa.

² Ko oti ne iloa ne tatou katoa me e ‵tau o faka‵ma a te igoa o te Atua mai so se fakamaseiga ne fai ki ei. E iloa foki ne tatou me e ‵tau o malamalama a tino katoa me i te pulega a Ieova ko te ‵toe pulega ‵lei eiloa. Tela la, a te avā mataupu konei e tāua ‵ki eiloa ki a tatou.

3. Ne a mea e aofia i te igoa o Ieova?

³ E tonu, e aofia i te igoa o Ieova ko mea katoa e uiga ki te ‵tou Atua, e pelā foki mo te auala e pule mai ei a ia. Tela la, kafai e fai atu tatou me e ‵tau o faka‵ma a te igoa o Ieova mai so se fakamaseiga ne fai ki ei, ko fai atu foki tatou me e ‵tau o malamalama a tino katoa me i te pulega a Ieova ko te ‵toe pulega ‵lei eiloa. E isi se sokoga pili o te igoa o Ieova mo te auala e pule mai ei a ia e pelā me ko te Pule malosi katoatoa.—Onoono ki te pokisi “ Mea e Aofia i se Kinauga Tāua.”

4. E fakamatala mai pefea i te Salamo 135:13 a te igoa o te Atua, kae ne a fesili ka tali aka i te mataupu tenei?

⁴ A te igoa o Ieova se igoa tu ‵kese. (Faitau te Salamo 135:13.) Kaia e tāua ‵ki ei te igoa o te Atua? Ne fakamasei aka pefea i te taimi muamua? E faka‵malu pefea ne te Atua a tena igoa? Kae e mafai pefea o aofia tatou i te ‵puluga o tena igoa? Ka tali aka ne tatou a fesili konā.

5. Ne a mea kāti ka mafau‵fau tatou ki ei māfai ko iloa aka me e ‵tau o fakatapu te igoa o te Atua?

⁵ “Ke tapu tou igoa.” (Mata. 6:9) Ne fai mai a Iesu me i te mea tenei se mea tāua e tasi e ‵tau o ‵talo tatou e uiga ki ei. Kae se a te uiga o pati a Iesu? Ke fakatapu se mea e fakauiga ki te faiga o te mea tenā ke ‵malu io me ‵ma pakipaki. Kae kāti ka mafau‵fau aka a nisi tino, ‘E mata, a te igoa o Ieova e se ‵malu io me ‵ma pakipaki?’ Ke maua te tali, e ‵tau o mafau‵fau ki mea e aofia i se igoa.

6. Se a te mea e fai ne ia te igoa ke tāua ‵ki?

⁶ A te igoa e sē se pati fua telā e mafai o tusi ki se pepa io me taku atu i se leo maluga. Ke mafaufau ki pati mai te Tusi Tapu: “E ‵tau o filifili ki se igoa ‵lei i lō koloa e uke.” (Faata. 22:1; Fai. 7:1) Kaia e tāua ‵ki ei te igoa o se tino? Me e aofia i ei tena ata, telā ko te kilokiloga a nisi tino ki te tino i o ia te igoa tenā. Tela la, a te auala e tusi ei se igoa—ke oko foki ki te auala e fakaleo i ei—e se tāua; a te mea telā e tāua malosi ko te tino i o ia te igoa mo te kilokiloga a nisi tino māfai e lavea io me lagona ne latou a te igoa tenā.

7. Ne fakamasei pefea ne tino a te igoa o te Atua?

⁷ Kafai e fai ne tino a pati ‵loi e uiga ki a Ieova, ko taumafai latou o fai a tino ke maua ne latou se kilokiloga sē ‵lei e uiga ki a ia. Kafai ko fai latou penā, ko fakamasei ne latou i ei tena igoa. A te taimi muamua ne fai ei ne tino a fakamaseiga ki te Atua mo tena igoa ko te kamataga o te olaga o tino. Ke mafau‵fau ki mea e tauloto ne tatou mai te fakamaseiga tenā.

8. Ne a mea ne iloa ne Atamu mo Eva, kae ne a fesili ne ‵sae aka?

⁸ Ne iloa ne Atamu mo Eva te igoa o Ieova, pelā foki mo muna‵tonu tāua e uiga ki te Tino i o ia te igoa tenā. Ne iloa ne lāua i a ia ko te Mafuaga, ko te Tino ne tuku atu ne ia te ola ki a lāua, te lā Palataiso gali, mo se avaga ‵lei katoatoa. (Kene. 1:26-28; 2:18) Kae e mata, ka fakaaoga ne lāua a lā mafaufau ‵lei katoatoa ke mafaufau ‵loto ki mea katoa ne fai ne Ieova mō lāua? E mata, ka ga‵lue lāua o ati aka te lā a‵lofa mo te loto fakafetai ki te Tino i o ia te igoa tenā? Ne tali aka a fesili konā i te taimi ne tofotofo ei lāua ne te fili o te Atua.

9. E ‵tusa mo te Kenese 2:16, 17 mo te 3:1-5, ne a pati a Ieova ne fai ki te tauavaga muamua, kae ne ‵fuli fakakotua pefea ne Satani a te munatonu?

 ⁹ Faitau te Kenese 2:16, 17 mo te 3:1-5. Mai te fakaaogaga o se gata ke faipati mō ia, ne fesili atu a Satani ki a Eva: “E tonu eiloa i te Atua ne fai atu ke mo a ma ‵kai koulua ki so se lakau i te fatoaga?” E aofia i te fesili tenā se loi sē lavea telā e fai pelā me se mea poisini fakamataku. A te tonuga loa, a te Atua ne fai atu me e mafai o ‵kai lāua ki lakau katoa, kae na ko te lakau fua e tasi. E uke ‵ki a lakau ne mafai o ‵kai ki ei a Atamu mo Eva. (Kene. 2:9) Ao, e kaimalie eiloa a Ieova. Kae ko te Atua ne fakatonu atu ki a Atamu mo Eva me tasi fua te lakau e tapu ma ‵kai lāua ki ei. Tela la, ne ‵fuli fakakotua ne te fesili a Satani a te munatonu. Ne fai ne Satani a tena fesili ke fakafoliga atu i te Atua e se kaimalie. Kāti ne mafaufau ifo a Eva, ‘E mata, e isi se mea ‵lei e ‵funa ne te Atua mai i a māua?’

10. Ne fakamasei ‵tonu atu pefea ne Satani a te igoa o te Atua, kae ne a mea ne iku mai i ei?

¹⁰ A Eva i te taimi tenā koi kilo atu eiloa ki a Ieova me ko tena Pule. Ne fai atu ne ia ki a Satani a pati katoa ne fai atu ne te Atua. Ne fai atu foki a ia me e se ‵tau eiloa mo lāua o pa‵tele ki te lakau. Ne iloa ne tou fafine a te fakatonuga a te Atua me i te sē fakalogo ka iku atu ki te mate. Kae ne tali atu a Satani: “A koulua ka se ‵mate eiloa.” (Kene. 3:2-4) Ko se fai atu ne Satani ana manatu i se auala fai lēmū. I te taimi nei, ko fakamasei ‵tonu eiloa ne ia te igoa o te Atua mai te fai atu ki a Eva i a Ieova se tino loi. Tenā ne fai ei a Satani pelā me se tiapolo, io me se tino gutu fatufatu. Ne takitaki‵segina eiloa a Eva; ne talitonu tou fafine ki a Satani. (1 Timo. 2:14) Ne talitonu atu tou fafine ki a Satani i lō Ieova. Ne fai ei ke faigofie ki a Eva ke fai ne ia te ‵toe fakaikuga masei eiloa i fakaikuga katoa. Ne fakaiku aka ne ia ke se fakalogo tou fafine ki a Ieova. Ne kamata o kai a ia ki te fuaga o te lakau telā ne fakatapu ne Ieova lāua mai i ei. Fakamuli ifo, tuku atu ei ne ia ne nai mea ki a Atamu.—Kene. 3:6.

11. Ne a mea ne mafai o fai ne ‵tou mātua muamua, kae se a te mea ne seki fai ne lāua?

¹¹ Ke mafaufau malie ki pati ne ‵tau o fai atu ne Eva ki a Satani. Mafaufau la me ne fai atu ne ia a pati konei: “E se iloa ne au koe, e iloa fua ne au toku Tamana ko Ieova, kae ko au e alofa kae talitonu ki a ia. Ne tuku mai ne ia ki a māua mo Atamu a mea katoa konei. Kaia fua la e fai ei ne koe a pati sē ‵lei e uiga ki a ia? Fano kea‵tea!” Moi penei e fiafia ‵ki eiloa a Ieova ke fakalogo ki pati fakamaoni konā mai se tama fafine alofa a ia! (Faata. 27:11) Kae ko Eva ne seki alofa fakamaoni ki a Ieova; kae seai foki se uiga penā i a Atamu. Ona ko te sē lasi o te a‵lofa o lāua ki te lā Tamana, ne seki mafai ei ne Atamu mo Eva o ‵pulu a tena igoa i te taimi ne taku fakamaseigina ei.

12. Ne ‵toki pefea ne Satani a manatu fakalotolotolua i te mafaufau o Eva, kae se a te mea ne seki mafai o fai ne Atamu mo Eva?

¹² E lavea ne tatou, me ne kamata o ‵toki ne Satani a manatu fakalotolotolua i te mafaufau o Eva. Ne fai ne ia ke fakalotolotolua tou fafine ki te Tino telā e fakaigoa ki a Ieova. Tenā ne seki mafai ei ne Atamu mo Eva o ‵pulu a te igoa mo te ata o Ieova. Ne faigofie fua ke talia ne lāua a manatu o Satani ke ‵teke atu ki te  lā Tamana. E fakaaoga foki ne Satani a togafiti tai ‵pau i aso nei. Ne taua atu a ia ki te igoa o Ieova mai te fakamasei ne ia. A tino kolā e tali‵tonu ki loi a Satani e fakakolekolegofie fua ke ‵teke atu ki te pulega amiotonu a Ieova.

13. E faka‵mafa mai pefea i te Esekielu 36:23 a te fekau tāua i te Tusi Tapu?

¹³ E mata, e talia ne Ieova a fakamaseiga konā kae sē fai ne ia se mea ke ‵pulu ei a ia? Ikai, e se talia ne ia! E faipati te Tusi Tapu kātoa ki te auala ne saga atu ei a Ieova ke faka‵ma tena igoa mai fakamaseiga kolā ne fai ki ei i te fatoaga o Etena. (Kene. 3:15) E tonu, e mafai o fakatoetoe ne tatou te fekau tāua i te Tusi Tapu penei: E faka‵malu ne Ieova a tena igoa e auala i te Malo telā e pule ne tena Tama kae toe fakafoki mai te amiotonu mo te filemu ki te lalolagi. E maua i te Tusi Tapu a fakamatalaga kolā ka fesoasoani mai ke malamalama tatou i te auala ka fakataunu ei ne Ieova a te faka‵maluga o tena igoa.—Faitau te Esekielu 36:23.

14. Ne faka‵malu pefea ne Ieova a tena igoa i te auala ne saga atu ei a ia ki te ‵tekeatuga i Etena?

¹⁴ Ko oti ne fai ne Satani so se mea e mafai o fai ne ia ke taofi a Ieova mai te fakataunuga o Tena fuafuaga. Kae ne seki manuia faeloa a Satani. E fakaasi mai i te Tusi Tapu a mea ne fai ne Ieova, kae fakamaoni mai ei me seai se tino e ‵pau mo Ieova te Atua. E tonu, ne logo‵mae malosi eiloa a Ieova i te ‵tekeatuga ne fai ne Satani mo latou kolā e ‵kau ki a ia. (Sala. 78:40) Kae ui ei, ne saga atu a ia o faka‵lei te fakalavelave tenei mo te poto, te kufaki, mo te fai mea tonu. Ne lavea atu foki i ei a tena malosi katoatoa i auala e uke. E sili atu i mea katoa, e lavea atu tena alofa i ana mea katoa e fai. (1 Ioa. 4:8) Ke oko mai nei koi galue malosi eiloa a Ieova ke faka‵malu aka tena igoa.

15. I auala fea e fakamasei ei ne Satani a te igoa o te Atua i aso nei, kae ne a mea ne iku mai i ei?

¹⁵ Koi fakamasei eiloa ne Satani a te igoa o te Atua i aso nei. E fakaloiloi ne ia a tino mai te faiga ke fakalotolotolua latou ki te malosi, te fai mea tonu, te poto, mo te alofa o te Atua. E pelā me se mea e tasi, e taumafai a Satani o fai a tino ke tali‵tonu me i a Ieova e se ko te Mafuaga. Kae kafai ko tali‵tonu a tino me isi se Atua, e taumafai a Satani o fai latou ke tali‵tonu me i te Atua ko tō faigata kae e se ‵lei e penā foki mo Ana tulaga. E akoako foki ne ia  me i a Ieova se Atua sē alofa kae masei telā e ‵sunu ne ia a tino i te afi i seoli. Kafai e tali‵tonu latou ki pati fakamasei konā, ka faigofie fua ki a latou ke ‵teke atu ki te pulega amiotonu a Ieova. Ka tumau eiloa a Satani i te faiga o ana fakamaseiga konei ke oko ki te taimi ko takavale ei a ia, kae ka taketi foki ne ia a koe. E mata, ka manuia a ia?

16. Se a te mea e mafai ne koe o fai telā ne seki mafai o fai ne Atamu mo Eva?

¹⁶ E talia ne Ieova ke aofia a tino sē ‵lei katoatoa i te faka‵maluga o tena igoa. Tela la, ko mafai o fai ne koe a te mea telā ne seki mafai o fai ne Atamu mo Eva. Faitalia me nofo atu koe i se lalolagi telā e ‵fonu i tino kolā e fakamasei kae fai a pati sē ‵tau ki te igoa o Ieova, ko maua ne koe te avanoaga ke tu o faipati e uiga ki te munatonu—me i a Ieova e tapu, e amiotonu, e ‵lei, kae alofa. (Isa. 29:23) E mafai o ‵lago koe ki tena pulega. E mafai o fesoasoani atu koe ke iloa ne tino me tenei fua te pulega telā e tonu kae amiotonu kae ka aumai ne ia te filemu mo te fiafia ki mea katoa ne faite.—Sala. 37:9, 37; 146:5, 6, 10.

17. Ne fakailoa atu pefea ne Iesu ke iloa ne tino a te igoa o tena Tamana?

¹⁷ Kafai e ‵pulu ne tatou te igoa o Ieova, ko tau‵tali eiloa tatou i te fakaakoakoga a Iesu Keliso. (Ioa. 17:26) Ne fakailoa ne Iesu a te igoa o tena Tamana ke iloa ne tino kae ‵pulu foki ne ia a Ieova. E pelā me se fakaakoakoga, ne ‵kese ‵ki a ia mo te kau Falesaio kolā ne akoako ne latou i a Ieova se Atua sē alofa, e faigata, e ‵mao mai tino, kae e se alofa fakamagalo. Ne fesoasoani atu a Iesu ke lavea ne tino me i tena Tamana e loto malamalama, e kufaki, e alofa, kae alofa fakamagalo. Ne fesoasoani atu foki a ia ke iloa ne tino a Ieova mai te ‵kilo atu ki te auala e fakaakoako ei a ia ki uiga o tena Tamana i tena olaga i aso takitasi.—Ioa. 14:9.

18. E mafai pefea o faka‵tonu aka ne tatou a loi mo fakamaseiga ne fai e uiga ki a Ieova?

¹⁸ E pelā mo Iesu, e mafai o fakailoa atu ne tatou a ‵tou mea ko iloa e uiga ki a Ieova, mai te akoako atu ki tino me i a ia se Atua alofa kae atafai. Mai te fai penā ko faka‵tonu aka ne tatou a loi mo fakamaseiga ne fai e uiga ki a Ieova. E faka‵malu ne tatou te igoa o Ieova, mai te faiga ke tapu tena igoa i mafaufau mo loto o tino. E mafai foki o fakaakoako tatou ki a Ieova. E mafai o fai tatou penā faitalia me e se ‵lei katoatoa tatou. (Efe. 5:1, 2) Kafai e fakaasi atu ne tatou ki tino i ‵tou pati mo faifaiga me ko oi tonu eiloa a Ieova, ko fesoasoani  atu eiloa tatou ki te faka‵maluga o tena igoa. E fakamaluga ne tatou te igoa tenā mai te fesoasoani atu o fakasaoloto a tino mai akoakoga sē ‵tonu kolā ko iloa ne latou. * E fakamaoni atu foki ne tatou me e mafai eiloa o tumau i te fakamaoni a tino sē ‵lei katoatoa.—Iopu 27:5.

19. E fesoasoani mai pefea te Isaia 63:7 ke lavea ne tatou te pogai tonu e akoako atu ei tatou?

¹⁹ Mafaufau ki te suā akoakoga tāua e ‵tau o fai ne tatou. Kafai e akoako ne tatou a muna‵tonu mai te Tusi Tapu ki nisi tino, e masani o faka‵mafa atu ne tatou a te pulega a te Atua, me maua ne Ieova te saolotoga ke pule ki te iunivesi, kae se mea tonu eiloa te mea tenei. Kae e tiga loa e tāua ke akoako atu a tulafono a te Atua, a te mea tāua e taumafai tatou ki ei ko te fesoasoani atu ki tino ke a‵lofa ki a Ieova, te ‵tou Tamana, kae ke fakamaoni latou ki a ia. Tela la, e ‵tau o faka‵mafa ne tatou a uiga ‵gali o Ieova, kae fakaasi atu me ko te Tino telā e fakaigoa ki a Ieova se tino pefea. (Faitau te Isaia 63:7.) Kafai e akoako atu tatou penā, ka fesoasoani tatou ki tino ke a‵lofa ki a Ieova kae faka‵logo ki a ia me ma‵nako latou o fakamaoni ki a ia.

20. Se a te mea ka fai‵pati tatou ki ei i te suā mataupu?

²⁰ E fakamautinoa aka pefea ne tatou me i ‵tou faifaiga mo ‵tou akoakoga e tuku atu i ei se ata ‵lei ki te igoa o Ieova kae fai ei ke fia fakapili‵pili atu a tino ki a ia? Ka tali aka ne te suā mataupu a te fesili tenā.