1-2. Eaha na tumu parau faufaa roa no te mau Ite no Iehova?

 MEA faufaa no tatou i teie mahana ia feruri i te tiaraa Arii hau ê e i te iˈoa o te Atua. Ei Ite no Iehova, e tumu parau faufaa roa tera no tatou. Ia faahiti tatou i te parau o te tiaraa Arii hau ê o te Atua, e ô atoa mai te parau o te haamoˈaraa o to ˈna iˈoa.

² Ua ite tatou paatoa e titauhia ia haamoˈa i te iˈoa o te Atua. Ua haapii atoa mai tatou e titauhia ia haapapu i te tiaraa Arii hau ê o Iehova. Mea faufaa roa ïa na tumu parau e piti no tatou paatoa.

3. Ia parauhia te iˈoa o Iehova, eaha ta tatou e manaˈo?

³ Ia parauhia te iˈoa o Iehova, eaha ta tatou e manaˈo? O te parau mau ïa no nia i to tatou Atua, oia atoa râ i ta ˈna huru faatereraa. No reira ia parau tatou mea titauhia ia haamoˈa i te iˈoa o Iehova, mea titau-atoa-hia ïa ia haapapu o Iehova anaˈe te faatere maitai roa ˈˈe. Ia faahitihia te parau o te iˈoa o Iehova, e ô atoa mai ïa te parau o to ˈna tiaraa Arii hau ê.—A hiˈo i te tumu parau “ Te ô atoa mai i roto i te haamoˈaraa o te iˈoa o Iehova.”

4. Eaha ta te Salamo 135:13 e faaite ra no nia i te iˈoa o te Atua e eaha te mau uiraa ta tatou e pahono mai?

⁴ E iˈoa taa ê roa te iˈoa Iehova. (A taio i te Salamo 135:13.) No te aha e iˈoa faufaa roa to te Atua? Mea nafea te reira i te faainoraahia? Mea nafea te Atua ia haamoˈa i to ˈna iˈoa? Eaha te titauhia ia tatou ia rave no te paturu i to ˈna iˈoa? E pahono anaˈe i tera mau uiraa?

5. Eaha te manaˈo e puta mai na roto i te parau, ia haamoˈahia te iˈoa o te Atua?

⁵ I te omuaraa o ta ˈna pure, ua parau Iesu: “Ia haamoˈahia to oe iˈoa.” (Mat. 6:9, nota) Eaha ta Iesu i hinaaro e parau? Te haamoˈaraa, o te faariroraa ïa i te tahi mea  ei mea moˈa e te mâ. E na ô paha ïa vetahi, ‘Mea moˈa e mea mâ aˈena te iˈoa o Iehova, no te aha ïa e titauhia ia haamoˈa i te reira?’ No te pahono, e hiˈo anaˈe eaha te ô mai i roto i te parau o te iˈoa o te hoê taata.

6. No te aha mea faufaa te iˈoa o te hoê taata?

⁶ Te parau ra te Bibilia: “O te iˈoa maitai tei hau i te taoˈa rahi ra.” (Mas. 22:1; Koh. 7:1) No te aha mea faufaa te iˈoa o te hoê taata? No te mea e hiti atoa mai te parau o te roo, ta vetahi ê ïa e manaˈo no nia i te taata e amo ra i tera iˈoa. Noa ˈtu mea taa ê te papairaa aore ra te faahitiraa o te tahi iˈoa, te mea faufaa, o te iteraa ïa o vai tei topahia i tera iˈoa e eaha te manaˈo e puta mai i roto i te feruriraa o vetahi ê ia faaroo ratou i tera iˈoa.

7. Mea nafea to te Atua roo i te faainoraahia?

⁷ Ia faahiti te taata i te parau haavare no nia ia Iehova, te faaino ra ïa ratou ia ˈna. E ia faaino ratou ia ˈna, te tuino ra ïa ratou i to ˈna roo. Ua faainohia te Atua no te taime matamua i roto i te ô i Edene. E hiˈopoa anaˈe te ohipa i tupu.

8. Eaha ta Adamu raua Eva i ite e eaha te mau uiraa e hiti mai?

⁸ Ua ite Adamu raua Eva o vai te iˈoa o te Atua e te parau mau no nia ia ˈna. Ua ite raua o Iehova te Atua poiete, na ˈna i horoa ˈtu i te ora, to raua nohoraa au mau e te hoê hoa faaipoipo tia roa. (Gen. 1:26-28; 2:18) Tera râ, ua tamau anei raua i te feruri maite i te mau mea atoa ta te Atua i rave no raua? Ua atuatu anei raua i to raua here e mauruuru ia Iehova? Ua ite-maitai-hia te pahonoraa a faahema ˈi te enemi o te Atua ia raua.

9. Ia au i te Genese 2:16, 17 e 3:1-5, eaha ta Iehova i parau ia Adamu raua Eva, mea nafea râ Satani i te taviriraa i te parau mau?

⁹ A taio i te Genese 2:16, 17; 3:1-5. Ma te faaohipa i te hoê ophi, ua ani Satani ia Eva: “Ua parau mai te Atua e, Eiaha orua e amu i to te mau raau atoa o te ô nei?” Na roto i tera uiraa haavarevare, ua hinaaro Satani e faataero i te feruriraa o Eva a manaˈo ino atu ai oia i te Atua. Ta te Atua râ i parau, e nehenehe raua e amu i to te mau raau atoa, hoê noa, aita. Te auraa, ua rau ïa te huru o te mau raau  ta Adamu e Eva i fanaˈo na. (Gen. 2:9) E Atua horoa noa hoi Iehova. Tera râ, ua opani oia ia Adamu raua Eva ia amu i te maa o te hoê anaˈe raau ta ˈna i maiti. Ua taviri ïa Satani i te parau mau na roto i ta ˈna uiraa ia Eva. Ua turai atu Satani ia manaˈo e ere Iehova i te hoê Atua horoa noa a na ô atu ai Eva, ‘Te faaere ra paha te Atua ia ˈu i te hoê mea maitai.’

10. Mea nafea Satani i te faainoraa i te Atua e eaha te faahopearaa?

¹⁰ I tera taime, ua faariro noa â Eva ia Iehova ei Faatere no ˈna. Ua pahono atu oia ia Satani ma te faahiti faahou i ta te Atua i faaue atu ia rave. Ua parau atoa ˈtu eiaha roa raua ia hauti noa ˈtu i te raau. Ua ite Eva o te pohe te utua ia faaroo ore raua i te Atua. Ua pahono atu râ Satani: “E ore roa orua e pohe.” (Gen. 3:2-4) E ere atura te raveraa a Satani i te mea haavarevare faahou, ua faaino roa ˈtu oia i te Atua. Mai te huru ua parau oia ia Eva e Atua haavare Iehova. Riro maira oia ei Diabolo, aore ra Pari haavare. Ua vare roa Eva, ua tiaturi aˈe o ˈna ia Satani e rave atura i te faaotiraa ino roa ˈˈe! (Tim. 1, 2:14) Ua faaroo ore Eva ia Iehova e amu aˈera i to te raau i opanihia ia amu e horoa ˈtura te tahi na Adamu.—Gen. 3:6.

11. Eaha ta Adamu raua Eva i nehenehe e rave, eaha râ ta raua i ore i rave?

¹¹ A feruri na maa taime i tei titauhia ia Eva ia pahono ia Satani. Ahani Eva i parau atu: “Aita vau ite o vai oe, to ˈu râ Metua o Iehova, ua ite mau vau i to ˈna huru. Mea here e mea tiaturi roa na ˈu ia ˈna. Na ˈna i ho mai i te mau mea atoa ia mâua Adamu ra. O vai oe no te faaino ia ˈna? A haere ê atu!” Auê paha ïa Iehova i te oaoa ahani ta ˈna tamahine here i paraparau mai tera! (Mas. 27:11) Aita râ Eva raua Adamu i ati maite ia Iehova. Te tumu ïa raua i ore ai i haamoˈa i te iˈoa o Iehova i mua i te faainoraa.

12. Mea nafea Satani i te haafeaaraa ia Eva e eaha ta Adamu raua Eva i ore i rave?

¹² Mai ta tatou i tapao mai, ua ueue na mua Satani i te huero o te feaa i roto i te feruriraa o Eva. Ua turai atu oia ia ˈna ia manaˈo e ere Iehova i te Metua maitai. Ua mamû noa Adamu raua Eva a faaino ai Satani ia Iehova! Vare atura raua ia Satani e orure hau aˈera i to raua Metua. Te tamau ra Satani i te faaohipa i tera huru raveraa no te haavare i te taata i teie mahana. Te tuino ra oia i te roo o Iehova ma te faaino ia ˈna. Ia vare te taata i te mau parau haavare a Satani, eita ratou e farii mea maitai ta Iehova huru faatereraa.

13. Mea nafea te Ezekiela 36:23 e faaite ai i te poroi tumu o te Bibilia?

¹³ Ua nafea Iehova i mua i te mau faainoraa? Te faaite ra te taatoaraa o te Bibilia  ua tamau Iehova i te haamoˈa i to ˈna iˈoa mai te taime a faainohia ˈi to ˈna iˈoa i roto i te ô i Edene. (Gen. 3:15) E nehenehe e haapoto i te poroi tumu o te Bibilia mai teie: E haamoˈa Iehova i to ˈna iˈoa na roto i te Faatereraa arii ta ˈna i tuu i te rima o ta ˈna Tamaiti e e faatupu oia i te parau-tia e te hau i nia i te fenua. Te horoa mai ra te Bibilia i te mau haamaramaramaraa atoa o te tauturu mai ia taa mea nafea Iehova ia haamoˈa i to ˈna iˈoa.—A taio i te Ezekiela 36:23.

14. Mea nafea te mau mea atoa ta Iehova i rave i te haamoˈaraa i to ˈna iˈoa?

¹⁴ Ua imi noa Satani i te mau ravea atoa ia ore te opuaraa a Iehova ia tupu. Aita roa râ oia i manuïa. Te faaite ra te Bibilia i te mau ohipa ta Iehova i rave no te haapapu e Metua î i te here oia e o ˈna anaˈe te Faatere maitai roa ˈˈe. Papu, ua peapea roa te aau o Iehova a orure hau ai Satani e te feia atoa tei pee ia ˈna. (Sal. 78:40) Noa ˈtu râ te mau faainoraa, ua haa noa Iehova ma te paari, ma te faaoromai e ma te parau-tia. Ua faaite atoa ta ˈna mau ohipa i to ˈna puai rahi. Hau atu â, e ite-atoa-hia te here i roto i te mau mea atoa ta ˈna e rave. (Ioa. 1, 4:8) Mai te tau mai â, aita Iehova i faaea i te haamoˈa i to ˈna iˈoa.

15. Mea nafea Satani ia faaino i te iˈoa o te Atua i teie mahana e eaha te faahopearaa?

¹⁵ I teie mahana, te tamau ra Satani i te faaino i te iˈoa o te Atua. Te haavare nei oia i te taata ma te turai ia ratou ia manaˈo e ere te Atua i te mea puai, parau-tia, paari e te î i te here. Ei hiˈoraa, e turai Satani i te taata ia manaˈo e ere o Iehova te Atua poiete. E ia tiaturi noa ˈtu te taata te vai ra te hoê Atua, e imi Satani i te ravea ia manaˈo ratou mea etaeta e te tano ore ta te Atua mau ture aveia. E haaparare atoa oia i te haapiiraa e Atua ino o Iehova o te huri i te taata i roto i te po auahi. Ia vare te taata i tera mau parau atoa, e ore ratou e farii mea maitai ta Iehova huru faatereraa. E faaohipa Satani i te taime e toe nei no te faaino i  te Atua e no te haavare i te taata. E manuïa anei oia i nia ia oe?

16. E nafea oe e ore ai e pee i te hiˈoraa o Adamu raua Eva?

¹⁶ Te farii ra Iehova ia haamoˈa atoa te mau taata tia ore i to ˈna iˈoa. E nehenehe ïa oe e maiti i te ore e pee i te hiˈoraa o Adamu raua Eva. Noa ˈtu ua î teie ao i te feia o te faaino i te iˈoa o Iehova, e nehenehe oe e tia i to ˈna pae e e faaite i te parau mau, oia hoi e Atua moˈa Iehova e te parau-tia, te maitai e te î i te here. (Isa. 29:23) A faaite e hinaaro oe ia ˈna ei Faatere no oe. A tauturu i te taata ia taa ta Iehova anaˈe te faatereraa o te hopoi mai i te parau-tia, te hau e te oaoa i nia i te fenua taatoa.—Sal. 37:9, 37; 146:5, 6, 10.

17. Mea nafea Iesu i te faaiteraa i te iˈoa o to ˈna Metua?

¹⁷ Ia haamoˈa tatou i te iˈoa o Iehova, te pee ra ïa tatou i te hiˈoraa o Iesu Mesia. (Ioa. 17:26) Aita noa Iesu i haamoˈa i te iˈoa o to ˈna Metua ma te faahiti i to ˈna iˈoa, ua faaite atoa râ o ˈna i te parau mau no nia ia Iehova. Ei hiˈoraa, i parau na te mau Pharisea e Atua etaeta e te aroha ore o Iehova. Ua haapapu râ Iesu mea hape ta ratou i parau ma te tauturu i te taata ia ite e Metua au noa o Iehova e te faaoromai, te î i te here e te ineine i te faaore i te hara. Ua faaite atoa oia i te taata o vai Iehova ma te faatupu i te mau huru maitatai o to ˈna Metua i te mau mahana atoa.—Ioa. 14:9.

18. E nafea tatou ia haapapu mea hape te mau faainoraa i faahitihia no nia ia Iehova?

¹⁸ E nafea tatou ia haamoˈa i te iˈoa o Iehova mai ia Iesu? E faaite anaˈe i te parau mau no nia i te Atua, oia hoi e Metua î i te here o ˈna e te maitai atoa. A na reira ˈi, te faatahuri ra tatou i te mau parau haavare e faainoraa no nia ia Iehova. E tauturu anaˈe i te taata ia haamoˈa i tera iˈoa i roto i to ratou feruriraa e aau. E faatupu atoa anaˈe i te mau huru maitatai o Iehova. E nehenehe tatou e na reira noa ˈtu to tatou huru tia ore. (Eph. 5:1, 2) E faaite anaˈe na roto i ta tatou mau parau e ohipa i te huru mau o Iehova.  E haapapu tatou i te tiaraa o to ˈna iˈoa ma te tauturu i te taata ia tiamâ mai i te mau haapiiraa hape no nia i te Atua. * E faaite papu atoa tatou e nehenehe iho â te hoê taata tia ore e tapea i to ˈna hapa ore.—Ioba 27:5.

19. Ia au i te Isaia 63:7, eaha ta tatou fa matamua roa ia haapii tatou i te taata?

¹⁹ Eaha ˈtu â ta tatou e nehenehe e rave no te haamoˈa i te iˈoa o Iehova? A haapii ai i te pue parau mau Bibilia ia vetahi ê, pinepine tatou i te haafaufaa i te mana aore ra tiaraa Arii hau ê o te Atua. Parau mau, e tiaraa iho â to Iehova no te faatere i te ao nui. Tera râ, ta tatou fa matamua roa, o te tautururaa ïa i te taata ia here i to ratou Metua ra o Iehova e ia ore e taiva ia ˈna. No reira a haapii ai tatou i ta te Atua mau faaueraa i te taata, e haapapu anaˈe i te huru mau o Iehova ma te haafaufaa i to ˈna mau huru maitatai. (A taio i te Isaia 63:7.) Ma te na reira, e tauturu tatou ia vetahi ê ia here e ia faaroo ia Iehova a ati maite atu ai tatou ia ˈna.

20. Eaha ta tatou e hiˈopoa i roto i to mua ˈtu haapiiraa?

²⁰ Te haamoˈa ra anei tatou i te iˈoa o Iehova na roto i to tatou haerea e ta tatou huru haapiiraa? Te tauturu ra anei tatou i te taata ia faafatata ia Iehova? No te papu, e hiˈopoa anaˈe i to mua ˈtu haapiiraa.