1, 2. Кыӵе юанъёсты эскерыны кельше Иеговалэн Адӟись-Ивортӥсьёсызлы?

 ИЕГОВАЛЭН Адӟись-Ивортӥсьёсызлы кельше эскерыны юанъёсты, кудъёсыз герӟаськемын Иеговалэн кивалтыны правоеныз но солэсь нимзэ чылкытатонэн. Озьы ке но малпано ӧвӧл, та кык юанъёс пӧртэмесь луо но соослэн номыр огкадез ӧвӧл шуыса.

² Ми валаськомы: Инмарлэн нимыз саптамын, соин ик сое чылкытатыны кулэ. Озьы ик ми валаськомы, макем кулэ возьматыны, Иеговалэн кивалтэтэз ваньмызлэсь умой шуыса. Кыкез ик та юанъёс туж кулэ луо.

3. Мар пыре Иегова ним пӧлы?

³ Иегова ним пӧлы пыре ваньмыз, мар герӟаськемын асьмелэн Инмаренымы, озьы ик солэн кивалтэмез но. Соин ик Инмарлэсь нимзэ саптамлэсь чылкытатон понна, вань адямиос тодыны кулэ, Иеговалэн кивалтон амалэз тужгес но умой шуыса. (Учке « Мар пыре тужгес но кулэ луись юан пӧлы?» рамкаез.)

4. Мар вераське Инмарлэн нимыз сярысь Псалтирьын 134:13? Кыӵе юанъёсты ми эскеромы та статьяын?

⁴ Инмарлэн нимыз аспӧртэмлыко. (Лыдӟе Псалтирез 134:13.) Малы со сокем кулэ луэ? Ку со нырысетӥзэ саптамын вал? Мар каре Инмар, аслэсьтыз нимзэ чылкытатон понна? Но мар карыны быгатӥськомы ми, Инмарлэсь нимзэ утён понна? Ойдолэ та юанъёслы валэктонъёс шедьтомы.

5. Кыӵе юан кылдыны быгатэ Инмарлэсь нимзэ дано карон пумысен?

⁵ Иисус валэктӥз, мар сярысь милемлы нырысь ик вӧсяськыны кулэ. Со вераз: «Тӥ тазьы вӧсяськелэ: Инмысь  Атаймы! Тынад нимыд дано мед луоз» (Матф. 6:9). Мае возьмато та кылъёс? «Дано карыны» шуэм возьматэ мае ке святой, чылкыт каремез. Нош кинлэн ке юанэз кылдыны быгатоз: «Инмарлэн нимыз дано ини ке, малы Иисус нимысьтыз пусйиз на, со дано мед луоз шуыса?» Та юанлы валэктон шедьтон понна, ойдолэ эскеромы, мае возьматэ ним.

6. Малы ним сокем кулэ луэ?

⁶ Ним — со огшоры кыл гинэ ӧвӧл, кудзэ бумага вылэ гожто яке верало. Библиын гожтэмын: «Сӥё-сано ним бадӟым узырлыклэсь вылынгес» (Мад. 22:1; Екк. 7:1). Малы ним сокем кулэ луэ? Малы ке шуоно ним герӟаськемын соин, мар мукетъёсыз малпало адями сярысь, солэсь нимзэ кылыкузы. Соин ик нимез гожтон яке веран сярысь, трослы кулэгес луэ со, мар адямиос малпало, та нимез кылыкузы.

7. Кызьы адямиос Инмарлэсь нимзэ саптало?

⁷ Куке адямиос Иегова сярысь пӧяськыса верало, мукетъёсыз Инмар сярысь урод малпаны кутско. Озьы соос Инмарлэсь ӟеч нимзэ саптало. Инмарлэн нимыз нырысетӥзэ саптамын вал Едем садын. Малпаськомы, малы со милемыз дышетыны быгатэ.

8. Мае тодӥзы Адам но Ева? Кыӵе юанъёс кылдо соин сэрен?

⁸ Адам но Ева тодӥзы, Инмарлэн нимыз Иегова шуыса. Озьы ик соослы тодмо вал со сярысь кулэ луись зэмлыкъёс. Соос тодӥзы: Инмар — со Кылдытӥсь, со соослы кузьмаз улон, тырбыдэс мугор, туж чебер рай улон инты но нокыӵе изъянтэк кузпал (Ул.-выл. 1:26—28; 2:18). Нош дунъязы-а соос ваньзэ, мар лэсьтӥз соос понна Иегова? Зэм ик-а соос Иеговаез ярато вал но солы тау каро вал? Со адӟиськиз соку, куке соосын Инмарлэн тушмонэз вераськыны кутскиз.

9. Улон-вылонэз 2:16, 17 но 3:1—5 лыдэ басьтыса, мар Иегова Адамлы но Евалы вераз но кызьы Шайтан солэсь кылъёссэ сураз-пожаз?

⁹ Лыдӟе Улон-вылонэз 2:16, 17 но 3:1—5. Кый пыр Шайтан Евалэсь юаз: «Инмар зэмзэ ик-а вераз: „Райысь нокыӵе но писпулэсь емышсэ эн сие?“» Иегова сярысь  шонертэмзэ вераса, Шайтан юан сётӥз, собере Евалэн Инмар пумысен шонертэм малпанъёсыз кылдӥзы. Зэмзэ вераса, Инмар Адамлы но Евалы шуиз, соос вань писпуослэсь емышсэс сиыны быгато шуыса, но одӥг писпулэсь гинэ емышсэ сиыны ӧз лэзьы. Нош райын туж трос пӧртэм писпуос будӥзы! (Ул.-выл. 2:9). Иегова Адамлы но Евалы туж шырыт луэмзэ возьматӥз. Инмар соослы одӥг писпулэсь гинэ емышсэ сиыны ӧз лэзьы. Соин ик, юан сётыса, Шайтан зэмлыкез сураз-пожаз. Солэн верамезъя, Инмар адямиослэсь мае ке кулэзэ ватыса возе. Ева малпаз, вылды: «Нош зэм но Инмар мынэсьтым мае ке ватыса возе ке?»

10. Кызьы Шайтан Инмарлэсь нимзэ шонерак саптаны кутскиз но кытчы со вуттӥз?

¹⁰ Со дыре Ева азьло сямен ик малпа на вал: Иегова гинэ вераны быгатэ, мар шонер, нош мар шонертэм луэ. Шайтанлэн юанэзлы со вераз Инмарлэсь валамон курон-косонзэ. Озьы ик Ева вераз, соослы писпу борды йӧтӥськыны но уг яра шуыса. Со тодӥз Инмарлэсь алонзэ, кылзӥськымтэзы понна соос кулозы шуыса. Нош Шайтан вераз: «Уд, уд кулэ» (Ул.-выл. 3:2—4). Табере Шайтан шонерак пӧяны кутскиз. Со Инмарлэсь нимзэ саптаз, куке Евалы вераз, Инмар пӧяське шуыса. Озьы Шайтан луиз Дьявол, яке кыл нуллӥсь. Ева быдэсак оскиз Шайтанлы (1 Тим. 2:14). Ева, Иеговалы сярысь, Шайтанлы тросгес оскыны кутскиз. Соин сэрен со самой урод ужпум кутӥз: Иеговалэсь курон-косонзэ тӥяны. Ева сииз емышез, кудзэ Иегова сиыны ӧз лэзьы, нош собере сое Адамлы сётӥз (Ул.-выл. 3:6).

11. Кызьы асьсэды возёно вал Адамлы но Евалы?

¹¹ Малпаське ай, мар Ева Шайтанлы вераны кулэ вал. Ева вераны быгатысал: «Мон тонэ уг тодӥськы, нош тодӥсько аслэсьтым Атайме, Иеговаез. Мон сое яратӥсько но солы оскисько. Со кузьмаз милемлы ваньзэ, мармы милям вань. Кызьы тон дӥсьтӥськод со сярысь уродзэ вераны? Кошкы татысь!» Кыӵе шумпотысал Иегова яратоно нылызлэсь таӵе кылъёссэ кылыны! (Мад. 27:11). Нош Ева, озьы ик Адам но, Иеговаез уг ярато вал но солы оскымонэсь ӧй вал. Соос Шайтанлы кыл но ӧз вералэ, Атайзылэсь ӟеч нимзэ утён понна.

12. Кыӵе шонертэм малпанъёсты Шайтан Евалы вераз но мар ӧз каре Адам но Ева?

¹² Кызьы ми адӟимы, Шайтан Евалы вераны кутскиз Инмар сярысь шонертэм малпанъёсты. Сое кылыса, Ева сокем ӧз оскы ини, Иегова умой Атай луэ шуыса. Шайтанлэсь лек пӧяськонзэ кылыса, Адам но Ева Инмарлэсь ӟеч нимзэ ӧз уте. Соин сэрен соос капчиен Шайтанэн соглаш кариськизы но Атайзылы пумит султӥзы. Туннэ но Шайтан та выллем амалэз уже кутэ. Со Инмарлэсь ӟеч нимзэ сапта. Соос, кинъёс та пӧяськонлы оско, Иеговаез кивалтӥсенызы  уг лыдъяло, соин ик солэсь шонерлыко курон-косонъёссэ капчиен тӥяло.

13. Кызьы возьматэмын Библилэн валтӥсь темаез Иезекиильлэн 36:23?

¹³ Кызьы учке Иегова Шайтанлэн кыл нуллэмез шоры? Тэк пуке-а со? Уг, уг пукы. Быдэс Библиын вераське со сярысь, мар каре Иегова, аслэсьтыз ӟеч нимзэ чылкытатон понна кыл нуллонлэсь, кудӥз Едем садын верамын вал (Ул.-выл. 3:15). Библилэсь валтӥсь темазэ тазьы вераны луэ: Иегова аслэсьтыз нимзэ чылкытатэ но музъем вылэ тупаса улон но шонерлык вае Эксэйлыкез пыр, кудаз со аслэсьтыз Пизэ Эксэй карыса пуктӥз. Библиез лыдӟыса, ми тодӥськомы, кызьы Иегова аслэсьтыз нимзэ дун-чылкыт каре. (Лыдӟе Иезекиильлэсь 36:23.)

14. Кызьы Иегова аслэсьтыз нимзэ чылкытатэ, Шайтанлэн пумит султэмез бере?

¹⁴ Шайтан лэсьтэ ваньзэ, мае быгатэ, Иеговалы аслэсьтыз эриксэ быдэстыны люкетон понна. Нош солэн номыр уг пӧрмы. Библия вера, мар каре Иегова. Солэн ужъёсыз возьмато, Иегова зэмзэ ик яратӥсь Атай но самой умой Кивалтӥсь луэ шуыса. Зэм но, Иеговалы туж вӧсь луиз, куке Шайтан но со пала кариськисьёс солы пумит султӥзы (Пс. 77:40). Озьы ке но, аслэсьтыз нимзэ чылкытатыкуз, Инмар номырин ӵошатонтэм визьлыксэ, чиданзэ но шонерлыко луэмзэ возьматэ. Со сяна, со туж трос пол аслэсьтыз бадӟым кужымзэ возьматылӥз. Нош тужгес но кулэез, Инмарлэн вань ужъёсысьтыз яратонэз адӟиське (1 Иоанн 4:8). Иегова ялан мар ке но каре, аслэсьтыз нимзэ чылкытатон понна.

15. Кызьы туннэ Шайтан Инмарлэсь нимзэ сапта но оско-а солы адямиос?

¹⁵ Шайтан туннэ но Инмарлэсь нимзэ саптаса улэ. Али со адямиосты пӧя но, соин сэрен соос сокем уг оско ини, Инмар ваньзэ быгатӥсь, шонерлыко, визьлыко но яратӥсь шуыса. Кылсярысь, Шайтан адямиосты оскытэ, Иегова Кылдытӥсь ӧвӧл шуыса. Нош Инмарлы оскись адямиосты со  оскытыны тырше, солэн курон-косонъёсыз укыр чурытэсь луо но шонерлыкоесь ӧвӧл шуыса. Со сяна, Шайтан дышетэ, Иегова жалясьтэм но лек Инмар луэ шуыса, кудӥз адямиосты адын курадӟытыса возе. Талы оскыса, адямиос капчиен Инмарлэсь палэнско. Аслаз быронэз вуытозь, Шайтан Инмарлэсь нимзэ саптаса улоз но тыршоз тросгес адямиосты Инмарлэсь палэнтыны, озьы ик тӥледыз но. Быгатоз-а со?

16. Мар карыны тӥ быгатӥськоды, Адамен но Еваен ӵошатыса?

¹⁶ Иегова тырбыдэстэм адямиослы аслэсьтыз нимзэ чылкытатыны лэзиз. Тӥ быгатӥськоды лэсьтыны сое, мае Адам но Ева ӧз лэсьтэ. Та дуннеысь адямиос Инмарлэсь нимзэ саптало. Нош тӥ быгатӥськоды солэсь нимзэ утьыны но ваньмызлы зэмлыкез вераны, Иегова дун-чылкыт, шонерлыко, ӟеч но яратӥсь Инмар шуыса (Ис. 29:23). Тӥляд возьматэмды луэ, тӥ Иеговаез Кивалтӥсеныды лыдъяськоды шуыса. Озьы ик тӥ адямиослы юрттыны быгатӥськоды валаны, Иеговалэн гинэ кивалтэтэз шонерлыко луэ но со гинэ музъем вылэ тупаса улон но шуд ваёз шуыса (Пс. 36:9, 37; 145:5, 6, 10).

17. Кызьы Иисус Инмарлэсь нимзэ усьтӥз?

¹⁷ Куке ми Инмарлэсь нимзэ утиськомы, ми лэсьтӥськомы озьы ик, кызьы Иисус Христос лэсьтӥз (Иоанн 17:26). Иисус Атаезлэсь нимзэ усьтӥз, адямиослы солэсь нимзэ вераса, озьы ик та нимез утьыса. Фарисейёс дышетӥзы, Иегова лек, чурыт но гажась-жалясьтэм Инмар шуыса. Нош Иисус адямиослы валаны юрттӥз, солэн Атаез валась, чидась, яратӥсь но простить карыны дась шуыса. Со сяна, Иисус адямиослы Иеговаез умойгес тодыны юрттӥз, котькуд нунал Атаезлэн сямъёсызлы быдэсак адӟем карыса (Иоанн 14:9).

18. Кызьы ми Иеговалэсь саптам нимзэ чылкытатыны быгатӥськомы?

¹⁸ Иисус сямен, ми но быгатӥськомы адямиослы Иегова сярысь вераны но соосты дышетыны, со яратӥсь но ӟеч сямо Инмар шуыса. Озьы ми Иеговалэсь саптам нимзэ чылкытатӥськомы. Солы луыса соос тодозы но гажалозы Иеговалэсь дун-чылкыт нимзэ. Озьы ик ми быгатӥськомы Иеговалэсь  адӟем карыны. Ми тырбыдэстэмесь ке но, милям сое лэсьтэммы луэ (Еф. 5:1, 2). Куке кылъёсысьтымы но ужъёсысьтымы адямиос адӟо, кыӵе зэмзэ но луэ Иегова, ми солэсь нимзэ чылкытатыны юрттӥськомы. Ми та нимез утиськомы, адямиослы Инмар сярысь зэмлыкез тодыны юрттыса b. Ас улонэнымы ми возьматыны быгатӥськомы, тырбыдэстэм адямиос Инмарлы оскымон луыны быгато шуыса (Иов 27:5).

19. Кызьы Исаиялэн 63:7 валаны юрттэ, кыӵе милям ужпуммы луыны кулэ, адямиосты Библиысь зэмлыкъёслы дышетыкумы?

¹⁹ Кызьы эшшо ми быгатӥськомы на Инмарлэсь нимзэ чылкытатыны? Мукетъёсты Библиысь зэмлыкъёслы дышетыкумы, ӵем дыръя ми саклыкмес висъяськомы Инмарлэн кивалтэтэзлы, быдэс дуннеын законъёсты пуктылыны Иеговалэн гинэ правоез вань шуыса. Та шонер луэ. Адямиослы Инмарлэсь катъёссэ тодыны кулэ. Озьы ке но милям валтӥсь ужпуммы — дышетыны соосты Иеговаез яратыны но солы оскымон луыны. Со понна ми адямиослы Инмарлэн туж умой сямъёсыз сярысь вераны кулэ, саклыксэс висъяса солы, кин нуллэ Иегова нимез. (Лыдӟе Исаиялэсь 63:7.) Соку ми быгатомы юрттыны соослы Иеговаез яратыны но мылкыдзэс будэтыны солэсь кылзӥськыса улыны.

20. Мае ми эскеромы вуоно статьяын?

²⁰ Нош кызьы валано, асьмеды воземмы но мукетъёссэ дышетэммы Иеговалэсь нимзэ данъя но адямиослы сое яратыны юрттэ шуыса? Та юан эскериське вуоно статьяын.