1-2. Che question le ze tanto importante par le Testimònie de Geovà?

CHE due question le ze tanto importante par noantri? La question dela sovranità e dela santificassion del nome de Dio. Le Testimònie de Geovà le ghe piase tanto de parlar sora questi assunti interessanti. La question dela sovranità e dela santificassion le ze relassionade. Cossa che questo vol dir?

² Noantri ghemo belche imparà che el nome de Dio el ga de esser santificà, o sia, ghe vol netarlo de tute le busie. Anca savemo che ghe ocore darghe una risposta ala question dela sovranità, o sia, provar che la maniera de Geovà governar la ze la meio. Alora, queste due question le ze tanto importante par noantri.

3. Cossa che l’è relassionà col nome de Geovà?

³ El nome de Geovà l’è relassionà cola so maniera de governar come Sovrano Tuto Poderoso. Alora, quando disemo che la question pi importante la ze netar el nome de Geovà, questo anca vol dir che ghe vol provar che la so maniera de governar la ze la meio. — Varda el quadro “ Come che podemo capir la granda question?”

4. (a) Cossa che el Salmo 135:13 el dise sora el nome de Dio? (b) Che domande gavaremo la risposta in questo stùdio?

⁴ El nome de Geovà l’è sensa comparassion. (Ledi Salmo 135:13. *) Parché che el nome de Dio l’è tanto importante? Quala che la ze stata la prima acusassion contra Dio? Come  che Dio l’è drio santificar el so nome? Come che podemo giutar a santificar el so nome? Adesso ndemo studiar sora questo.

5. Che domanda arquanti i se fà?

⁵ Gesù el ga mostrà che assunto ga de esser el pi importante nele nostre orassion. Lu el ga dito: “Santificà sia el to nome.” (Mat. 6:9) Cossa che vol dir la parola “santificà”? Vol dir far una roba esser santa, neta e pura. Fursi arquanti i se domanda: ‘Ma el nome de Geovà no l’è belche santo, neto e puro?’ Par risponder a questa domanda ghemo de capir tuto quel che l’è relassionà con un nome.

6. Cossa che l’è importante nte un nome?

⁶ Un nome no l’è sol una parola che se pol scriver o che se pol doperar par ciamar una persona. La pròpia Bìblia la dise: “Un bon nome el ga de pi valor de che tante richesse.” (Pro. 22:1; Ecl. 7:1) Alora pensa: Parché che un nome el ga tanto valor? Parché lu l’è relassionà con una reputassion, o sia, con quel che i altri i pensa quando i scolta el nome. Alora la maniera de scriver un nome, o la maniera de dìrghelo no la ze la roba pi importante, ma quel che importa l’è quel che le persone le pensa quando le lede o le scolta questo nome.

7. Come che arquanti i sporca el nome de Geovà?

⁷ Quando le persone le parla busie sora Geovà, lore le ze drio sporcar el so nome, o la so reputassion. La prima volta che questo ga sucedesto la ze stata nel scomìnsio dela stòria umana. Cossa che podemo imparar de questa prima acusassion?

8. (a) Cossa che Adon e Eva i savea sora Geovà? (b) Che domande le gavea bisogno de risposte?

⁸ Adon e Eva i savea che el nome de Dio l’era Geovà, ma anca i cognossea la persona che la gavea questo nome. Par esémpio, lori i savea che Geovà l’era el Creador, quel che gavea fato tuto de bel che lori i gavea, come la vita, el Paradiso e un bel matrimònio. (Gén. 1:26-28; 2:18) Ma, sarà che Adon e Eva i doperaria le so mente perfete par pensar in tuto quel che Geovà el gavea fato par lori? Sarà che lori i mostraria amor e i saria grati ala persona che gavea questo nome? Le risposte le ze vegneste fora quando lori i ze stati provadi par el nemigo de Dio.

9. (a) De acordo con Génesi 2:16, 17 e 3:1-5, cossa che Geovà el gavea dito a Adon e Eva? (b) Come che Sàtana el ga metesto in dùbio quel che Geovà el gavea dito?

 ⁹ Ledi Génesi 2:16, 17 * e 3:1-5. * Geovà el gavea dito che Adon e Eva i podea magnar dei fruti de tute le piante del giardin, sol de una che no i podea magnar e ghen’era una varietà pròpio granda de piante la ntel giardin del Èden. (Gén. 2:9) Alora Sàtana el ga fato una domanda a Eva che ga metesto in dùbio quel che Dio el gavea parlà: “L’è stà pròpio cossita che Dio el ga dito, che no gavé de magnar de tute le piante del giardin?” Par meso de questa domanda, Sàtana el ga parlà una bruta busia. Lu l’era drio dir che Geovà no l’era generoso. Con quel che Sàtana el ga parlà, fursi Eva la ga pensà: ‘Sarà che Geovà l’è drio sconder qualcossa de mi?’

10. (a) Che busia Sàtana el ga contà sora Geovà? (b) Qual che l’è stà el resultado?

¹⁰ Quando Eva la ga rispondesto ala domanda de Sàtana, la ga assà ciaro che la gavea pròpio in mente la òrdine che Dio el gavea dato a lori. Fin la ga dito che no la podea gnanca tocar nela pianta. Ela la savea che se la magnesse de quel fruto la ndaria morir. Fin quel momento lì, la ze stata obediente a Geovà. Ma dopo de questo Sàtana el ghe ga dito: “Sicuro che valtri no ndaré morir.” (Gén. 3:2-4) Con queste parole Sàtana l’era drio acusar Dio de esser un busier. Cossita Sàtana el se ga deventà el Diaol, o sia, un caluniador. Eva la ze stata imbroiada parché la ga credesto in Sàtana e la se ga fidà de pi nel Diaol de che in Geovà. (1 Tim. 2:14) Par quela, la ga fato la pedo dessision dela so vita, la ga desobedio a Geovà. Ela la ga magnà del fruto dela pianta che Geovà el gavea dito par no magnar e dopo lo ga dato anca al so omo Adon. — Gén. 3:6.

11. Cossa che Adon e Eva i gavea de far, e parché che no i ga fato?

¹¹ Férmate un pochetin par pensar sora cossa che Eva la podaria gaver dito a Sàtana. Imagina che Eva la gavesse dito cossita: “Mi no te cognosso. Mi cognosso el me pare Geovà, mi amo a Lu e me fido in Lu. Tuto quel che ghemo de bon l’è stà Geovà che el ne ga dato. Pénsito che te si chi par parlar mal de me pare? Via de qua!” Sicuro che Geovà el saria restà tanto contento de scoltar queste parole de una fiola amorosa e leal. (Pro. 27:11) Eva no la ze stata questa fiola e gnanca Adon. Par  quela che lori no i ga difendesto el nome de so pare contra la busia de Sàtana.

12. (a) Cossa che le busie de Sàtana ga fato con Eva? (b) Cossa che Adon e Eva no i ga fato?

¹² Le busie de Sàtana ga fato Eva gaver dubi sora che tipo de persona l’era Geovà. Adon e Eva i se ga assà influensar par Sàtana, no i ga difendesto el nome de Geovà e anca lori i ze restadi contra el so pare. Ancoi Sàtana el dopera le medèsime tràpole, el seita parlar busie sora Geovà. Quei che i crede in queste busie i va contra la maniera de Geovà governar.

13. Come che Ezechiel 36:23 el ne giuta a capir el assunto prinsipal dela Bìblia?

¹³ Sarà che Geovà el ga scoltà tute queste busie e no’l ga fato gnente? Sicuro che nò! Tuta la Bìblia la parla quel che Geovà l’è drio far par netar el so nome de tute le busie che Sàtana el ga parlà nel Èden. (Gén. 3:15) La Bíblia la ne giuta a capir come che Geovà el va santificar el so nome. El assunto prinsipal dela Bìblia l’è: Geovà el va santificar el so nome par meso del Regno che l’è governà par el so fiol, e gavarà pace e giustìssia nela Tera. — Ledi Ezechiel 36:23. *

14. Cossa che prova che Geovà no’l se ga mai fermà de santificar el so nome?

¹⁴ Del tempo de Adon e Eva fin ancoi, Sàtana el fà de tuto che el pol par fermar el propòsito de Geovà. Ma no l’è stà mai bon! La Bìblia la parla de tuto che Geovà l’è drio far e la mostra che Geovà l’è drio infrontar questa acusassion con sabedoria, passiensa, giustìssia e poder. (Sal. 78:40) Ma tuto quel che lu el fà l’è sempre con amor. Questo prova che Geovà l’è un pare amoroso e el meio governante. (1 Gio. 4:8) Sicuro che Geovà no’l se ga mai fermà de santificar el so nome.

15. (a) Che busie Sàtana el parla ancoi sora Geovà? (b) Cossa che sucede cole persone che le crede nele busie de Sàtana?

¹⁵ Ancoi Sàtana el continua parlar busie sora Geovà. Lu el fà le persone creder che Dio  no l’è mia poderoso, gnanca giusto, sàbio e amoroso. Come che lu l’è drio far questo? Sàtana el proa far le persone creder che Geovà no l’è el Creador de tuto. E quele che le crede in Dio, el proa farle pensar che Dio l’è mia bon. Anca lu el insegna che Geovà l’è un Dio rugno, sensa amor e che el brusa le persone nel fogo. Se le crede in queste busie, lore le va contra la maniera giusta de Geovà governar. Sàtana el va continuar parlar busie sora Geovà fin che el sia destruto. Alora el va proar far che te resti dela so banda. Càtito che el sarà bon?

16. Che oportunità Geovà el dà par noantri?

¹⁶ Geovà l’è drio dar a noantri la medèsima oportunità che el ga dato a Adon e Eva, de partissipar dela santificassion del so nome. Ma noantri podemo far una scòlia difarente de lori, stesso che vivemo in meso de persone che le parla busie sora Geovà o le parla mal de Lu. Ghemo la oportunità de restar dela banda de Geovà e apoiar el so governo e cossita provar che Geovà l’è un Dio santo, giusto, bon, e amoroso. (Isa. 29:23) Ma come che noantri podemo provar che semo dela banda de Geovà? Noantri femo questo quando giutemo le persone a capir che la maniera de Geovà governar la ze la meio, che la ze la ùnica maniera de tuti gaver pace e felicità. — Sal. 37:9, 37; 146:5, 6, 10.

17. Come che Gesù el ga giutà le persone a cognosser so pare?

¹⁷ Quando difendemo el nome de Geovà, semo drio imitar a Gesù Cristo. (Gioani 17:26) Gesù el ga giutà le persone a cognosser so pare. Come? Lu no sol el parlea sora el nome de Dio, ma anca el giutea le persone a capir chi che l’era Geovà. I lìderi religiosi nel tempo de Gesù i fea le persone pensar che Geovà l’era un Dio rugno, che no’l restea contento con gnente, che no’l gavea interesse nele persone e che no l’era amoroso. Ma Gesù l’era ben difarente dei lìderi religiosi. Lu el giutea le persone a capir che Geovà el resta contento con quel che podemo far, che Lu l’è passiente, amoroso e che el perdona. Le persone le podea capir come Geovà l’è, parché lu el imitea tute le qualità de so pare. — Gioani 14:9.

18. Come che noantri podemo giutar a santificar el nome de Geovà?

 ¹⁸ Cossita come Gesù, anca noantri podemo santificar el nome de Geovà. Come che podemo far questo? Podemo dir ai altri quel che savemo sora Geovà e mostrar che Lu l’è pròpio bondoso e amoroso e che anca se semo imperfeti podemo imitarlo. (Efe. 5:1, 2) Ghemo de mostrar che tipo de persona Geovà l’è par meso de tuto quel che parlemo e femo tuti i giorni. Quando femo tuto questo, semo drio santificar el nome de Dio, o sia, semo drio giutar le persone a veder el nome de Dio come santo e anca semo drio giutarle a capir la verità sora Lu. * Anca podemo provar che umani imperfeti i pol continuar leai. — Giò 27:5.

19. De acordo con Isaia 63:7 cossa che volemo de pi?

¹⁹ Vardemo nantra lession che podemo imparar. Quando insegnemo la Bìblia ai altri, parlemo tante volte sora la sovranità de Dio, o sia, che Lu el ga el dirito de governar el universo, e l’è giusto far cossita. L’è importante insegnar le lege de Geovà, ma quel che volemo de pi l’è giutar le persone a amar a Geovà, el nostro Pare e esser leai a Lu. Alora, sempre parla dele bele qualità de Geovà e giuta le persone a capir chi che la ze la persona che la ga questo nome. (Ledi Isaia 63:7. *) Quando femo cossita giutemo le persone a amar a Geovà. Lore le gavarà voia de esser leai a Lu e continuar obediente.

20. Cossa che ndaremo imparar nel pròssimo stùdio?

²⁰ Come che la nostra maniera de viver e de insegnar le pol dar onor a Geovà e giutar le persone a rivarse darente de Lu? El pròssimo stùdio ndarà risponder a questa domanda.