MWAHA ONITHOKORERIWA 23
“Nsina Nanyu Nivuwihiwe”
“Apwiya! Atthu othene anovuwiha nsina nanyu”.—ESAL. 135:13.
NSIPO 10 Ninvuwihe Yehova, Muluku Ahu!
ELE NINROWA AHU WIIXUTTA *
1-2. Myaha xeeni sinaasivela Anamoona a Yehova othokorerya?
KHULA NIHIKU, wookhala mwaha muulupale onnihela muhina otheene ahu. Mwaha xeeni? Okhulupale ni ovuwihiwa wala otteelihiwa wa nsina na Yehova. Hiyo Anamoona a Yehova onisivela othokorerya mwaha owo. Masi, niireke okhulupale wa Muluku ni otteelihiwa wa nsina nawe itthu soovirikana? Nnaari.
2 Otheene ahu nihiixutta wira nsina na Yehova nihaana otteelihiwa moomalela. Nave noosuwela wira ti vooloka wooniherya wira okhulupale wa Yehova, eyo piiyo, enamuna onilamulela awe ti yoolokexa. Tivonto, hiyo ninvaha ahu efaita myaha iyo soomiili.
3. Nsina na Yehova ninhela muhina exeeni?
3 Tthiri nsina na Yehova ninhela muhina itthu sotheene sinivarihana ni Muluku, ohela muhina enamuna onilamulela awe. Nto vaavo ninhimya ahu wira nsina na Yehova ntteelihiwe, ninhimya omalihiwa wa itthu sotheene onootheriwa awe, okathi omosaru ninhimya-tho wira enamuna Yehova onilamulela awe ti yootepa oloka. Maana nsina na Yehova ninnivarihana ni enamuna onilamulela awe ntoko Mukhulupale oowerya sotheene.—Nwehe ekaaxa eni: “ Mipantta sa Mwaha Muulupale.”
4. Esalimo 135:13 enihimya exeeni sa nsina na Muluku? Mwaha ola, ninrowa waakhula makoho xeeni?
4 Nsina na Yehova ti na vameekhaaya. (Musome Esalimo 135:13.) Mwaha ola, ninrowa waakhula makoho ala: Xeeni nsina na Muluku nrina aya efaita yinceene? Ekwaha xeeni yoopacerya nsina na Yehova naaveehiwe aya? Muluku onvuwiha aahiiso onitteeliha sai nsina nawe? Ninrowa okhaliherya sai waakiherya nsina na Muluku?
EXEENI ENIIRIHA NSINA OKHALA NA FAITA?
5. Nikoho xeeni atthu akina anipaka aya vaavo anuupuwela aya otteelihiwa nsina na Muluku?
5 Yesu aahihimya etthu yootepa otthuneya ninreerela ahu ovekela. Owo aahimmye so: “Nsina nanyu nivuwihiwe” wala nitteelihiwe. (Math. 6:9) Ni moolumo ala, Yesu aaphavela ohimya exeeni? Nuulumo noowi nitteelihiwe nintaphulela oreeriha, okhaliha noowaarya, okhaliha nooloka wala ovuwiha. Atthu akina pooti okohaka wira: ‘Niireke nsina na Yehova khahiyo nooloka, noowaarya ni noovuwa?’ Wira naakhule nikoho nlo, nihaana wuupuwela ele enihela muhina nsina na Yehova.
6. Exeeni eniiriha nsina okhala na faita?
6 Nsina khahiyo paahi ileetera silempwale vapapheloni wala moolumo mutthu onlavula awe moorunya. Nwehe ele Biibiliya onihimya awe oriki: “Nsina nottittimiheya ti norera ovikana” mihakhu sinceene. (Mir. 22:1; Mus. 7:1) Exeeni eniiriha nsina okhalana efaita? Okhala wira nsina ninhela muhina omutthu ni etthu atthu akina anuupuwela aya vaavo aniiwa aya nsina na mutthu owo. Nto eyo enooniherya wira enamuna nsina nno ninlempwa aya ni enamuna ninromoliwa aya, khahiyo etthu yootepa otthuneya. Etthu yootepa otthuneya tiila: Ele atthu akina anuupuwela aya vaavo aniiwa aya nsina nlo.
7. Mwa enamuna xeeni atthu anihonona aya nsina na Muluku?
7 Vaavo atthu ammootherya aya Yehova itthu sootakhala, awo annihonona omutthu awe. Nto vaavo anihonona aya omutthu awe awo anneererya ohonona nsina nawe. Ekwaha yoopacerya naaphavela aya ohononiwa nsina aahiiso omutthu wa Muluku, waari ojardim wa wEdeni. Nrowe niwehe etthu nniixutta ahu ni yowiiraneya ele.
EKWAHA YOOPACERYA ONANARIHIWA NSINA NA MULUKU
8. Etthu xeeni Adamu ni Eva yaasuwela aya, ni makoho xeeni anikhumelela?
8 Ohiya paahi Adamu ni Eva osuwela nsina na Yehova, awo yaanisuwela ikeekhai sa Mwaneene nsina nno. Mwa ntakiheryo, awo yaanisuwela wira Yehova tori Mpattuxa ni itthu sotheene yaarina aya ntoko ekumi, eParayiisu, opatthani ni itthu sikina sooloka yaavahiwe ni Yehova. (Maph. 1:26-28; 2:18) Niireke Adamu ni Eva yaamurumeela muupuwelo aya woomalela wira yuupuweleke itthu sotheene sooreera Yehova aavanhe awe? Niireke yaamumphenta ni omuxukhurela Yehova? Waakhula waya waamooneya okathi nwanani a Muluku aarowa awe oweehererya.
9. Moovarihana ni Maphattuwelo 2:16, 17 ni 3:1-5, etthu xeeni Yehova aalenle awe Adamu ni Eva ni ekeekhai xeeni Satana aahononne awe?
9 Musome Maphattuwelo 2:16, 17 ni 3:1-5. Orumeelaka enowa, Satana aahimukoha Eva wira: “Ekekhai wira Muluku òhokhottiheryani olya mihokorokho sa mirí sothene sa mmatta?” Nikoho nna, Satana aahivitha wootha wuulupale ni wootakhala. Maana Muluku aahaaleela Adamu ni Eva wira yaahaana olya mihokorokho sa miri sikina, masi aakhoottinhe olya mihokorokho sa mwiri mmosa paahi. Musuweleke wira saahikhala mihokorokho sa miri soovirikana ejardim ele, seiyo yaavahiwe aya wira alyeeke. (Maph. 2:9) Tthiri eyo enooniherya wira Yehova toovaha. Hata vaari siiso, Yehova aakhoottinhe Adamu ni Eva olya mihokorokho sa mwiri mosa paahi. Masi, nikoho na Satana naahihonona ekeekhai yuulupale. Satana aaphavela wooniherya wira Muluku khonivaha aahiiso namilili. Woonasa wene, Eva uupuwenle so: ‘Kiireke Muluku onikikhoottiherya etthu yooloka?’
10. Satana aaveehale sai nsina na Yehova, ni exeeni ekhumelenle?
10 Mpakha okathi ole Satana aamukonhe awe Eva, Eva aanimwiiwelela Yehova. Etthu enooniherya eyo, okhala wira okathi Eva aamwaakhula awe Satana, owo aahihimya yooruma yooluluwanya Muluku aavanhe awe. Nave aahincererya wira khiyaareerela ovara muhokorokho ole. Tthiri Eva aanisuwela wira akhala wira khaarowa wiiwelela yooruma ya Muluku, aamookhwa. Masi Satana aahimmye so: “Nnari, khamunokhwa!” (Maph. 3:2-4) Vannooneya wira Satana khaaphavela ovitha wootha wawe. Moohaanyiherya owo aahiveeha mooluluwanya nsina na Muluku, nto vaakhala ntoko wira Satana aamuleela Eva wira Yehova nawoothe. Eyo ti etthu yaamwiirinhe Satana, okhala Diabo, eyo piiyo, nawoothe. Okhala wira Eva aaheemererya wootha wa Satana, owo aahiwokiwa vanceene. (1 Tim. 2:14) Ohiya-vo, Eva aahooniherya wira aanimuroromela vanceene Satana ohiya omuroromela Yehova. Eyo yaahimwiiriha Eva opaka yoothanla yootepexa otakhala, eyo piiyo, ohimwiiwelela Yehova. Nto Eva aahirukula ni khulya muhokorokho yoole aakhoottihiwe awe ni Yehova. Mooriipiha murima Adamu aahipaka etthu emosaru yaapanke aya amwaarawe.—Maph. 3:6.
11. Exeeni Adamu ni Eva yaakhanle aya oopaka ni exeeni yahaapanke aya?
11 Nkahaya muupuwele ele Eva aakhanle awe oomuleela Satana. Muupuwele vaakhanle wira aahimwaakhula so: “Miyo nkinoosuwelani, masi kinimusuwela Tiithi aka, Yehova. Miyo kinnimuroromela ni kinnimphenta, masi nyuwo nnaari. Itthu sotheene miyo ni Adamu nrina ahu, Yehova tonivanhe. Nto xeeni munimulavula anyu moohiloka Yehova? Khuma va!” Tthiri Yehova aamuhakalala vanceene onweha ni omwiiwa mwanawe ole olavulaka siiso! (Mir. 27:11) Masi Eva aahiyeleela eparakha eyo. Eyo enooniherya wira Adamu ni Eva khiyamphenta Yehova ni khiyaamuroromela. Mwaha wa yeeyo, Adamu ni Eva yaahihiya waakiherya nsina na Tiithi aya.
12. Satana aawenrye sai omwiiriha Eva waanyiherya, ni exeeni Adamu ni Eva yahaapanke aya?
12 Ntoko niwenhe ahu, etthu yoopacerya Satana aapanke awe waari omwiiriha Eva waanyiherya itthu aasuwela awe. Owo aahimwiiriha Eva waanyiherya akhala wira Yehova mutthu ooloka wala nnaari. Moottharelana, Adamu ni Eva khiyaawenrye waakiherya nsina ni omutthu wa Yehova. Awo yaahiwokiwa ni Satana ni khiyaamwiiwelenle Tiithi aya oophenta Yehova. Olelo-va, Satana onnirumeela olavilavi omosaru aarumenle awe wEdeni. Maana, nlelo khohiyale oveeha nsina na Muluku. Nto atthu anikupali wootha wa Satana annikhootta malamulo ni malakiheryo a xariya a Yehova.
YEHOVA ONNITTEELIHA NSINA NAWE
13. Ezekiyeli 36:23, onttittimiherya sai muhupi wa mBiibiliyani?
13 Niireke nuumala wiiwa oveeha wa Satana, Yehova oroomaala paahi? Nnaari. Biibiliya onninleela etthu Yehova onipaka awe wira otteelihe nsina nawe mwaha wa itthu sotheene onootheriwa awe ni Satana. (Maph. 3:15) Tthiri muhupi wotheene wa mBiibiliyani pooti olavuliwa mookwasa mwa enamuna ela: Orumeelaka Omwene awe, Yehova onnitteeliha nsina nawe, vano Mwanawe yoowo ori Namalamulela a Omwene owo onooruuha murettele ni exariya valaponi. Nave Biibiliya onninikhaliherya osuwela moota Yehova onrowa awe otteeliha nsina nawe.—Mmusome Ezekiyeli 36:23.
14. Hata omwareeliwe ene wEdeni, Yehova onooniherya sai wira onnitteeliha nsina nawe?
14 Satana onnipaka sotheene oniwerya awe wira yootthuna ya Yehova ehiiraneye. Masi itthu sotheene onipaka awe khasinikhumela saana. Biibiliya onnooniherya wira Yehova onnipaka etthu ni onnooniherya wira Tiithi oophenta. Ekeekhai wira, ohiiweleliwa ni Satana ni atthu akina animutakiha Satana onnimuriipiha murima Yehova. (Esal. 78:40) Masi onnivilela omwareeliwa iwo moopixa murima, ankhili ni exariya. Nave, Yehova onnooniherya owerya wawe mwa inamuna soovirikana. Ohiya-vo, itthu sotheene onipaka awe onipaka moophenta. (1 Yoh. 4:8) Tthiri, Yehova khonahiye otteeliha nsina nawe.
Satana aahimuleela itthu sowoothiwa Eva voohimya sa Yehova ni mwa iyaakha sinceene onninveeha Muluku (Nwehe ittima 9-10, 15) *
15. Olelo-va, Satana oniveeha sai nsina na Muluku, ni exeeni enikhumelela?
15 Mpakha mahiku ahu ala, nlelo Satana onniveeha nsina na Muluku. Wira opake eyo, owo onniwiiriha atthu waanyiherya akhala wira Muluku tooreera murima, oowerya sotheene, a xariya, ankhili ni oophenta. Mwa ntakiheryo, Satana onniimananiha owiiriha atthu wuupuwelaka wira Yehova khahiyo Mpattuxa. Nave hata atthu akina akupaliki wira Muluku ookhala, Satana onniwiiriha atthu awo wuupuwela wira malamulo ni malakiheryo a Yehova khahiyo a xariya ni annaakhoottiherya opuha. Nave atthu awo aniixuttiha wira Yehova tootakhala murima ni onnaapaha atthu omooroni. Nto vaavo aniiwa aya itthu iyo sowoothiwa, vannikhweya okupali ni okhootta wira Yehova namalamulela a xariya. Nlelo Satana ohinatthi opwetexiwa, owo khonrowa okumiha ifeeriya. Onnipaka eyo wira atthu akhale mpantta awe. Niireke onoowerya opaka eyo?
MUNNIHELIWA MUHINA MWAHA OLE MUULUPALE
16. Etthu xeeni mukhanle anyu oopaka yeeyo Adamu ni Eva yahaapanke aya?
16 Yehova ohaavaha apinaatamu oohimalela eparakha ya okhaliherya otteelihiwa nsina nawe. Tthiri, nyuwo munoowerya opaka ele Adamu ni Eva yahaawenrye aya opaka. Hata nikhalaka olumwenku wootakhala, yoowo atthu anceene aniveeha aya nsina na Yehova. Nto nyuwo mookhalana eparakha yoolavula ekeekhai mwaaleelaka atthu wira Yehova toowaarya, naxariya, ooreera murima ni toophenta. (Yes. 29:23) Moohaanyiherya, muhaana wooniherya wira munnikhaliherya olamulela wa Yehova. Munoowerya opaka eyo, mwaakhaliheryaka atthu akina woona wira enamuna Yehova onilamulela awe ti ya xariya ni Yehova paahi tonrowa oruuha murettele ni ohakalala wekeekhai valaponi.—Esal. 37:9, 37; 146:5, 6, 10.
17. Mwa enamuna xeeni Yesu aasuwelinhe awe nsina na Muluku?
17 Vaavo nnaakiherya ahu nsina na Yehova, hiyo ninnipaka ele Yesu aapaka awe. (Yoh. 17:26) Yesu aanaasuweliha atthu akina. Ohiya paahi waasuweliha ni orumeela nsina na Muluku, Yesu aanaakiherya omutthu wa Yehova. Mwa ntakiheryo, aFarisi yaanihonona vanceene nsina na Yehova ni yaaniwiiriha atthu ohisiveliwa ni Muluku. Maana yaaniwiiriha atthu wuupuwelaka wira Yehova toohaaxa, a mphwini, oorumexa, oohipatthaneya ni ohirina othunku. Masi Yesu khaapaka ele aFarisi yaapaka aya, maana aanaakhaliherya atthu omuthokorerya Yehova okhala Tiithi oophenta, ooreera murima, oopixa murima ni oolevelela. Ohiya paahi opaka eyo, Yesu aanitakiha moomalela mikhalelo sa Tiithi awe. Nto eyo yaanaakhaliherya atthu osuwela mikhalelo sa Yehova.—Yoh. 14:9.
18. Ninrowa owerya sai waakiherya itthu soohiloka Yehova onootheriwa awe?
18 Hiyo nnoowerya waakiherya itthu Yehova onootheriwa awe. Moota xeeni? Niimananihaka omutakiha Yesu. Nnoowerya opaka eyo naakhaliheryaka atthu osuwela wira Yehova, Muluku oophenta ni ooreera murima. Niira siiso, nnimwaakhaliherya atthu otteeliha nsina na Yehova vamurimani ni mmuupuweloni mwaya. Ohiya paahi opaka eyo, nihaana wiimananiha otakiha mikhalelo sa Yehova. Vanniweryaneya opaka eyo hata nri ene anatampi. (aÉf. 5:1, 2) Khula nihiku, moolumo ni miteko sahu sinnaakhaliherya atthu omusuwela Yehova. Muhiliyale wira opaka eyo ninnikhaliherya otteeliha nsina nawe. Nave musuweleke wira ninnikhaliherya otteeliha nsina na Yehova vaavo nnaakhaliherya ahu atthu okumiha mmuupuweloni mwaya moonelo woohiloka arina aya voohimya sa nsina na Yehova. * Ohiya-vo, ninnooniherya wira apinaatamu oohimalela anoowerya ororomeleya wa Muluku.—Yobi 27:5.
Nimphavela waakhaliherya ale nnaasomiha ahu Biibiliya osuwela wira Yehova toophenta ni ooreera murima (Nwehe ittima 18-19) *
19. Moovarihana ni Yesaya 63:7, tiivi eri yoolakela ahu yuulupale naasomihaka atthu Biibiliya?
19 Vano nwehe etthu ekina nniixutta ahu. Vaavo ninwiixuttiha ahu atthu akina ikeekhai sa mBiibiliyani, hiyo ninnittittimiherya okhulupale wa Muluku, niire so, ehakhi ya Yehova olamulela olumwenku wotheene, wiirimu ni valaponi. Eyo nimpaka ahu etthu yooloka. Masi, nnaamwi vari ene vooloka owiixuttiha atthu malamulo a Muluku, yoolakela ahu yuulupale waakhaliherya atthu omphenta Yehova Tiithi ihu ni malamulo awe. Nto okathi munaasomiha anyu atthu Biibiliya, muttittimiheryeke mikhalelo sookuxa murima sa Yehova. Nave nwooniheryeke omutthu wa Yehova ni ele nsina nawe nintaphulela aya. (Mmusome Yesaya 63:7.) Akhala wira nnoowiixuttiha mwa enamuna eyo, nnimwaakhaliherya atthu omphenta Yehova. Nto eyo enoowiiriha omuroromela ni omwiiwelela.
20. Mwaha onittharelana, ninrowa othokorerya exeeni?
20 Nihaana opaka exeeni wira mweettelo ahu ni moota ninwiixuttiha ahu atthu ovuwiheke nsina na Yehova ni owiiriha atthu omphenta? Mwaha onittharelana ninrowa waakhula nikoho nno.
NSIPO 2 Nsina Nanyu ti Yehova
^ etti. 5 Wookhala mwaha muulupale onaahela muhina apinaatamu ni malaikha. Mwaha xeeni owo? Xeeni mwaha owo ori awe wa faita yinceene? Ninheliwa sai muhina mwa mwaha owo? Ti vooloka osuwela waakhuliwa wa makoho awo ni makoho makina anivarihana ni mwaha ola, maana eyo enoonikhaliherya olipiha waataana wahu ni Yehova.
^ etti. 18 Masi okathi wa muthukumano wa mwaakha wa 2017, waahitthokiheriwa wiiwexexa wahu wa niinaano. Muhooleli a muthukumano ole aahimmye so: “Khahiyo vootthekeya ovekela wira nsina na Yehova nitteelihiwe, mwaha woowi nimphavela omaliha itthu sotheene Yehova onootheriwa awe.—Nwehe eprokrama ya Janero ya 2018 va jw.org®. Murowe opuro oni: BIBLIOTECA > JW BROADCASTING®.
^ etti. 62 OTTHOKIHERIWA WA IFOOTU: Diabo aahinveeha Muluku vaavo aamulenle awe Eva wira Muluku nawoothe. Iyaakha sinceene muhoolo mwaya, Satana onnimwarya-mwarya muupuwelo woohiloka, ntoko yowiixuttiha yoowi Muluku tootakhala ni khahiyo Mpattuxa.
^ etti. 64 OTTHOKIHERIWA WA IFOOTU: Okathi onimusomiha awe mutthu Biibiliya, munna onnittittimiherya mikhalelo ni omutthu wa Muluku.
