1-2. Which matter really dey important to us?

THE way Jehovah de rule and to make e name dey holy, na serious matter wey concern us today. This matter na really important topic wey we de like to talk about. But, the way Jehovah de rule and to make e name dey holy, na two different matter? No.

² All of us don see say the name of God must dey holy. We don still learn say people must know say the way Jehovah de rule na the best. So this two matter dey important.

3. Wetin connect with the name of God?

³ The truth na say, the name of God concern everything about God, even the way e de rule. So if we talk say e dey important to make the name of God dey holy, we still de talk say e dey important make people know say the way God de rule na the best. The name of God and the way e de rule as the King wey high pass, really connect.​—Check the box “ Things Wey Connect With This Important Matter.”

4. Wetin Psalm 135:13 talk about the name of God, and which questions we go answer for this topic?

⁴ The name Jehovah really dey special. (Read Psalm 135:13.) Wetin make the name really dey important? How they first spoil the name? How God de make e name holy? And how we fit defend the name? We go answer all this question for this topic.

5. Wetin some people fit ask when they hear say the name of God must dey holy?

⁵ Matthew 6:9 talk say: “Make your name dey holy.” Jesus  talk say this one suppose be one of the important things wey we go pray about. So, wetin e mean to make the name of God dey holy? To make something holy na to make-am clean, or pure. But some people fit ask say, ‘Since the name of God already dey holy and clean, why e still need to dey holy?’ To answer that question, we need to think about wetin name really be.

6. Wetin make name dey important?

⁶ Name no be just wetin person write for paper or call. See the thing wey Bible talk: “To get good name better pass plenty money and property.” (Prov. 22:1; Eccl. 7:1) Wetin make name dey important like this? Na because e still concern wetin people de think about the person wey get that name. So no be the way they write the name, or de call-am, dey important pass. But, na wetin de come people their mind when they see or hear that name dey important pass.

7. How people don spoil the name of God?

⁷ When people de talk lie about God, they want make other people think bad things about God. Because of this one, people fit start to blame God for the bad things wey de happen and spoil e name. The first time wey person talk bad things about God and spoil e name na for garden of Eden. Make we talk about the thing wey we learn from wetin happen that time.

8. Wetin Adam and Eve know, and which questions we fit ask?

⁸ Adam and Eve know say the name of God na Jehovah, and they still know plenty important things about the kind person wey e be. They know say na God make them, give them life, give them fine place to stay, and better marriage. (Gen. 1:26-28; 2:18) But, they continue to think about everything wey Jehovah don do for them? They continue to make their love for Jehovah strong and de thank Jehovah? The answer to this questions come dey clear when the enemy of God test them.

9. As e dey for Genesis 2:16, 17 and 3:1-5, wetin Jehovah tell Adam and Eve, and how Satan make them think bad things about Jehovah?

⁹ Read Genesis 2:16, 17 and 3:1-5.  Satan use snake ask Eve say: “God really talk say make wuna no chop fruit from any tree for the garden?” Lie dey inside this question wey Satan ask Eve, and this one make Eve start to think bad things about God. The truth be say, God tell them say they fit chop from every tree, apart from one. So Adam and Eve get plenty tree wey they fit chop from. (Gen. 2:9) True-true, Jehovah na God wey get open hand. But e tell Adam and Eve say make they no chop fruit from one tree. So the question wey Satan ask Eve fit don make Eve think bad things about Jehovah. Satan make-am be like say Jehovah no get open hand. And Eve fit don wonder say, ‘God de hide good thing from me?’

10. Which wicked lie Satan talk about Jehovah, and wetin this one cause?

¹⁰ The time wey Satan ask Eve this question, Eve still de obey Jehovah. Eve tell Satan wetin Jehovah tell them. E even add say make they no touch the tree. And Eve know say if they no obey Jehovah, they go die. But Satan tell Eve say: “Wuna no go die at all.” (Gen. 3:2-4) This time, Satan no just use cunny talk say God de lie, but this one na clear lie. E tell Eve say Jehovah de lie. Na so Satan take become devil or person wey de talk wicked lie. Satan really fool Eve and Eve believe wetin e talk. (1 Tim. 2:14) Eve trust Satan pass Jehovah. This one make-am easy for Eve to make the worse decision wey person fit ever make. E decide say e no go obey Jehovah. So e start to chop the fruit wey Jehovah say make e no chop. After, Eve give some of the fruit to Adam.​—Gen. 3:6.

11. Wetin Adam and Eve for do?

¹¹ Just think small about wetin Eve for tell Satan. Imagine say e tell Satan say: “I no know who you be o! But I know Jehovah my Papa, and I love and trust Jehovah. E don give me and Adam everything wey we get. So, who you be to talk this kind wicked thing about Jehovah? Comot for here!” How you think say Jehovah for feel if to say Eve talk about Jehovah like this, as pikin wey love e Papa? (Prov. 27:11) But Eve no get this kind love for Jehovah, and even Adam no get-am. Because Adam and Eve no get strong love for Jehovah, they no defend e name when Satan talk this kind lie.

12. How Satan make Eve doubt Jehovah, and wetin Adam and Eve no do?

¹² As we don see, Satan start to spoil the name of God for Eve mind when e make Eve begin doubt whether Jehovah na good Papa. Then, Adam and Eve no defend Jehovah when Satan talk wicked lie about e name. They listen to Satan and that one make them no obey their Papa. Satan still de do the same thing today. E de talk lie-lie to spoil the name of God. When people believe this lie, e dey easy for them to leave Jehovah and no obey e law.

13. How Ezekiel 36:23 talk wetin the main message for Bible be?

¹³ Jehovah just dey quiet, de hear this wicked lie and no defend e name? No, e no do like that! Jehovah don use Bible show say the things wey Satan talk for garden of Eden na lie. (Gen. 3:15) So we fit talk say the main message for Bible na say: Jehovah go use the Kingdom wey e Son de rule make e name dey holy, stop bad things and bring peace for this earth. When we read Bible, we go see how Jehovah go make e name dey holy.​—Read Ezekiel 36:23.

14. How Jehovah don make e name holy after they spoil e name for Eden?

¹⁴ Satan don do everything wey e fit do to stop wetin Jehovah want do. But all the things wey e don do don fail. Bible show us wetin Jehovah don do. And e still show say Jehovah na the best Papa and the way e de rule na the best. True-true, as Satan and the people wey de support-am, don spoil Jehovah name, this one don really pain Jehovah. (Ps. 78:40) But Jehovah don use sense handle this matter. E show say e dey patient and e do-am for the correct way. For many ways, e don still show say nobody power reach e own. But, the one wey dey important pass be say, e de show the kind love wey e get for everything wey e de do. (1 John 4:8) And since that time, Jehovah never stop to make e name dey holy.

15. How Satan de spoil the name of God today, and wetin this one don cause?

¹⁵ Satan still de spoil the name of God today. E want make people de doubt whether Jehovah really get power, sense, love and de do the correct thing. For example, e want make people believe say no be Jehovah make everything. And even when people believe say God dey, e de make them feel say God law too hard to follow and the law no de benefit everybody. E still de make people believe say Jehovah na wicked God wey de burn people for hellfire. When people believe this lie, e go dey easy for them to reject Jehovah. Satan go  continue to talk lie about Jehovah, until the time wey Jehovah go destroy-am. And e go want make you too reject Jehovah. You go allow Satan succeed?

16. Wetin Adam and Eve no do wey you fit do?

¹⁶ Jehovah de give everybody the chance to join-am make e name dey holy. So, you get the chance to do wetin Adam and Eve no do. Even though say plenty people for this world de lie and spoil Jehovah name, you get the chance to defend and talk the truth about Jehovah. You fit make people know say Jehovah dey holy, dey good, de always do the correct thing, and de show love. (Isa. 29:23) You fit show say you de support the way Jehovah de rule. You fit still make people know say na only Jehovah fit rule us well, and bring peace and joy for this earth.​—Ps. 37:9, 37; 146:5, 6, 10.

17. How Jesus make people know e Papa name?

¹⁷ When we defend Jehovah name, we de follow the example of Jesus Christ. (John 17:26) Jesus make people know e Papa name, and e do-am for two ways. E use the name and e still teach people the kind person wey Jehovah be. For example, wetin Jesus teach dey different from wetin the Pharisees teach. The Pharisees make-am be like say Jehovah na wicked God, and e want make we do things wey we no fit do, e no de care about us, or de show pity. Jesus make people see say Jehovah na God wey understand us, wey dey patient, de show love and de forgive. The way Jesus live e life when e dey this earth, still make people know the kind God wey Jehovah be.​—John 14:9.

18. How we fit help people know the truth about Jehovah?

¹⁸ Like Jesus, we fit tell people wetin we know about Jehovah. This one go make them know and respect the holy name, Jehovah. We fit still teach people say Jehovah de show love and e dey kind. When we de do this things we de help people know the truth about Jehovah. We fit still copy Jehovah. And we fit do-am even though they born us with sin. (Eph. 5:1, 2) When the way we de talk and do things de show people the kind person wey Jehovah  really be, we de make Jehovah name dey holy. We de prove-am say Jehovah na better Person when we de help people know the truth about e name. * We still de prove-am say even though they born us with sin, we fit hold Jehovah tight.​—Job 27:5.

19. How Isaiah 63:7 show wetin suppose be our main target when we de teach people?

¹⁹ We still get another thing wey we fit do to make Jehovah name dey holy. Plenty times, when we de teach people truth for Bible, we de teach them say na Jehovah get the right to rule heaven and earth, and that one correct. Na true say e dey important make we teach people the things wey Jehovah want make they do. But, our main target na to help them get love for Jehovah, our Papa, and to hold-am tight. So when we de teach people, make we help them see the fine-fine character wey Jehovah get. As we de do this one, we de help people know the kind person wey Jehovah be. (Read Isaiah 63:⁠7.) If we de teach people like this, we go help them love and obey Jehovah because they want be e tight friend.

20. Which question we go answer for the next topic?

²⁰ But how we fit make sure say the way we de behave and de teach go help people think good things about Jehovah when they hear e name, and make them be e friend? The next topic go answer this question.