LAHATSORATRA FIANARAN̈A 23
“Irarian̈a An̈aranao ho Masin̈y”
“Jehovah, maharitry mandrakizay an̈aranao.”—SAL. 135:13.
HIRA 10 Derao i Jehovah Andriamanitsika!
HO HITA ATO *
1-2. Ino raha aroe maventy tiantsika koran̈iny aminolo?
INO ma adihevitry maventy mahatafiditry atsika? Izio mikasiky zòny Jehovah hitondra ndreky fankamasin̈ana an̈aranany. Tiantsika Vavolombelon̈o Jehovah mare mikoran̈a izio aminolo. Fa izio ma fitondrasan̈any Jehovah ndreky fankamasin̈ana an̈aranany io raha samby isany? Aha.
2 Ten̈a mila ankamasin̈iny an̈aran̈a Zan̈ahary. Taminy atsika nianatra Baiboly tan̈y, efa nianarantsika fa Jehovah fo manan̈a zò hitondra, avio fitondrasan̈anany zaraiky fo ten̈a tsara. Hita baka amy zen̈y fa ten̈a raha maventy raha aroe zen̈y.
3. Mahatafiditry ino ma an̈aran̈a Jehovah io?
3 An̈aran̈a Jehovah io mahatafiditry raha jiaby momba Zan̈ahary, an̈isanizen̈y fomba fitondrasan̈anany. Ke atsika koa fa mivolan̈a fa ten̈a raha maventy fankamasin̈ana an̈aran̈a Zan̈ahary, dikanizen̈y, mila hainolo jiaby fa fomba fitondrasan̈any Jehovah fo ten̈a tsara. Jehovah Pitondra farany mahery, ke mifandray marikitry an̈aranany ndreky fomba fitondrasan̈anany.—Zahava “ Ino aby Raha Tadifitry amy Fankamasin̈ana An̈aran̈a Zan̈ahary?”
4. Ino raha koran̈iny Salamo 135:13 momba an̈aran̈a Zan̈ahary, baka io ino aby fan̈ontanian̈a hivaliantsika ato?
4 Miavaka mare an̈arany Jehovah io. (Vakia Salamo 135:13.) Nan̈ino ma an̈aran̈a Zan̈ahary io ten̈a raha maventy? Ombian̈a izio nisy nankaratsy voanalohany? Akory ankamasin̈any Zan̈ahary an̈aranany, baka io akory hataontsika hiaro izio? Alo zahavantsika valiny fan̈ontanian̈a aby zen̈y.
AN̈ARAN̈A—RAHA TEN̈A MAVENTY
5. Ino raha avy amy jerinolo sasany izikoa fa maharen̈y fa mila ankamasin̈iny an̈aran̈a Zan̈ahary?
5 “Irarian̈a an̈aranao ho masin̈y.” (Mat. 6:9) Jesosy nivolan̈a fa zen̈y an̈isany raha farany maventy tokony hangatahintsika koa fa mivavaka. Ino ma raha ten̈a tiany Jesosy havian̈a? Dikany mankamasin̈y zen̈y, man̈ano raha hahavy raha araiky hadio na ho masin̈y. Misy olo loso eritreritry: ‘An̈arany Jehovah ma tsy efa masin̈y? Ke nan̈ino izio mbala mila ankamasin̈iny?’ Alohany hamaliantsika fan̈ontanian̈a zen̈y, alô zahavantsika antsendriky raha tafiditry izikoa fa mikoran̈a momba an̈aran̈a.
6. Nan̈ino an̈aran̈a zen̈y ten̈a raha maventy?
6 An̈aran̈a zen̈y tsy raha natao hisoratin̈y na hiton̈onin̈y fo. Baiboly mivolan̈a: “Sitrany laza tsara tozay harian̈a marobe.” (Ohab. 22:1; Mpito. 7:1) Izikoa lamariky amy pazy ambany aminy andininy aby io zahan̈a, “laza” io koa adika arabakiteny, “an̈aran̈a” dikany. Hita baka amy zen̈y fa ten̈a raha maventy an̈aran̈a io. Tafiditry amizio lazanolo araiky ndreky fomba fahitanolo izy. Ke tsy fanoratan̈a na fanon̈onan̈a an̈aran̈a araiky ny ten̈a raha maventy, fa ino raha avy amy jerinolo koa fa maharen̈y na mahita an̈aran̈a io.
7. Karakory nataonolo nandrobaka ndreky nandoto lazany Jehovah?
7 Olo koa fa mikoran̈a raha tsy marin̈y momba Jehovah, izy tsy vitany mandrobaka lazany Jehovah fo fa mandoto an̈arany Jehovah koa. Vo nikomansy tantaranolombelon̈o tamy zaridain̈y Edena, efa nisy edy raha zen̈y. Ino marin̈y ma raha nandalo?
SOMILANY OLO NANKARATSY AN̈ARANY JEHOVAH
8. Ino ma raha efa hainy Adama ndreky Eva? Ino aby fan̈ontanian̈a mety han̈itikitiky sain̈intsika?
8 Efa hainy Adama ndreky Eva tsarabe an̈arany Jehovah. Maro koa raha maventy efa haindro momba izy. Karaha ataony izy Pamoron̈o, baka aminany fahin̈anandro, tany tsara pitrahandro, ndreky tokantran̈o lavorary nanan̈andro. (Gen. 1:26-28; 2:18) Asa mba nalendro onon̈o fo raha tsara nataony Jehovah tamindro aby zen̈y? Asa iro mbala tia Jehovah fo ndreky nankasitraka izy? Voavaly fan̈ontanian̈a aby io tamy Satana nitsapa jerindro.
9. Koa Genesisy 2:16, 17 ndreky 3:1-5 zahan̈a, akory ho Jehovah tamindry Eva, kanefa akory nandrobatany Satana jerindro?
9 Vakia Genesisy 2:16, 17 ndreky 3:1-5. Nampiasa bibilava Satana nikoran̈ana taminy Eva. Ho izy: “Izio ma marin̈y ankitin̈y fa Zan̈ahary nivolan̈a taminaro fa anaro tsy mahazo mihina voany kakazo jiaby amy zaridain̈y ato?” Efa hainy Satana tsarabe fa raha zen̈y tsy marin̈y, fotony voany kakazo araiky fo tsy nimboany Jehovah nihoanindro. Anjarandro foeky nifidy ino raha tiandro nahanin̈y. (Gen. 2:9) Jehovah tsy matity. Tiany Satana iry Eva hieritreritry raha ratsy momba Jehovah. Vandy nataony io nandrobaka jeriny Eva, ke mety loso diniky donko Eva tao: ‘Mety misy raha tsara tsy tiany Jehovah hamian̈a zahay donko an̈y!’
10. Akory nataony Satana nan̈aratsy Jehovah, baka io ino vokany?
10 Eva taminio mbala nihevitry Jehovah ho Pitondra, fotony mbala nampodiny tamy Satana didy mazava namiany Jehovah iro. Ndray iro tsy mahazo mikasiky kakazo io foeky, ho izy tamy Satana. Hainy Eva fa hofoaty iro koa mandika volan̈a Zan̈ahary. Fa ho Satana: “Anaro tsy hofoaty zen̈y.” (Gen. 3:2-4) Satana tio mira nivolan̈a fa Zan̈ahary io pavandy. Nan̈aratsy Jehovah izy. Zen̈y nahavy Satana nanjary devoly, na pan̈aratsy. Voafitaka tanteraka i Eva, ke nino vandiny Satana. (1 Tim. 2:14) Satana natokitokisany tozay Jehovah. Nanjary nan̈ano fanapahankevitry ratsy i Eva. Izy tsy nan̈araka volan̈any Jehovah, ke nihinanany voany kakazo tsy nimboany Jehovah nahanin̈y in̈y, avio nan̈amezany koa Adama.—Gen. 3:6.
11. Ino raha tokony ho nataony Adama ndreky Eva?
11 Akory eky izikoa karaha ty ho Eva tamy Satana: “Anao kony tsy haiko e, fa izikoa Jehovah, haiko loatra foeky fotony izy Babako. Ary izy tiako sady hatokisako koa. Namiany raha jiaby ilainay zahay. Ke sakinao man̈aratsy izy ankilanaka eto? Mandihana an̈y fa zaho tsy tihitandren̈y anao!” Misaora ravoravo donko Jehovah! Fotony hainy baka amy zen̈y fa zanany man̈angy io tsy mivadiky aminany sady tia izy mare. (Ohab. 27:11) Mampalahelo fa tsy zen̈y raha nataony Adama ndreky Eva. Tsy narovandro foeky an̈arany Jehovah Babandro.
12. Karakory nataony Satana namitaka Eva? Ino raha tsy nataondro roe fivadiany?
12 Efa hitantsika tio fa nataony Satana raha nahavy Eva hisalasala izikoa Jehovah io Baba be fitiavan̈a ankitin̈y. Adama ndreky Eva tsy niaro an̈arany Jehovah foeky. Nanjary volan̈any Satana ndraiky ninoandro ndreky narehandro fa tsy niny Babandro. Mbala zen̈y fo koa ataony Satana amy zioty. Man̈aratsy Jehovah izy, baka ho robaka lazany Jehovah. Mora voataon̈o hanohitry fitondrasan̈any Jehovah olo araiky izikoa mino vandiny Satana.
JEHOVAH MANKAMASIN̈Y AN̈ARANANY
13. Ino fotokevitriny Baiboly, koran̈iny Ezekiela 36:23?
13 Jehovah ma tsy niaro ten̈a fa nangin̈y fo? Ehe. Koran̈iny Baiboly fa nitady fomba fo Jehovah han̈aporofoan̈a fa diso fan̈aratsian̈a izy ta Edena in̈y. (Gen. 3:15) Karaha ty fotokevitriny Baiboly, izikoa fintin̈iny: Jehovah hankamasin̈y an̈aranany, ke hampiasa Fanjakan̈anany izy hampatanteraka zen̈y. Izio koa hampanjaka fahamarin̈ana ndreky fiadan̈ana ambony tany. Koran̈iny Baiboly ao fomba han̈anovany Zan̈ahary zen̈y.—Vakia Ezekiela 36:23.
14. Amy karakory fomba nandaminany Jehovah adihevitry ta Edena in̈y nankamasin̈y an̈aranany?
14 Nataony Satana raha tsy hampatanteraka fikasan̈any Jehovah, fa tsy nahomby foeky tetikinany. Hazavainy Baiboly fomba nankamasin̈any Zan̈ahary an̈aranany Jehovah io. Naboakany fa izy Baba be fitiavan̈a, avio izy zaraiky fo ten̈a mahay mitondra. Nalahelo mare Jehovah tamy raha nataony Satana ndreky iro olo nanohitry fitondrasan̈any aby io. (Sal. 78:40) Kanefa, nifen̈y fo izy nankamasin̈y an̈aranany. Naboakany tsarabe fa izy ten̈a misain̈y, maharidraha sady man̈ano ny rarin̈y ndreky farany mahery. Fa ny ten̈a raha maventy, hita amy raha jiaby ataony fa izy be fitiavan̈a. (1 Jaona 4:8) Mbala mankamasin̈y an̈aranany fo Jehovah firaka iziô.
Firaka iziô Satana mbala man̈aratsy Jehovah fo, karaha nataony navandy taminy Eva in̈y (Zahava fehintsoratra 9-10, 15) *
15. Karakory ataony Satana mankaratsy an̈aran̈a Zan̈ahary, amy zioty? Ino vokatranizen̈y?
15 Firaka iziô, Satana mbala mankaratsy an̈aran̈a Zan̈ahary fo. Ataony raha hahavy olo hieritreritry fa Jehovah tsy farany mahery, tsy man̈ano ny rariny, tsy misain̈y ndreky tsy be fitiavan̈a aby. Ohatra iziô, ataony Satana raha hahavy olo ho resy lahatra fa tsisy Zan̈ahary Pamoron̈o zen̈y. Iro koa fa mino fa tsisy Pamoron̈o, ataony koa raha hahavy iro hieritreritry fa tsisy raha ilan̈a Zan̈ahary zen̈y, baka io tsy mahatsara iro foeky fitsipikiny Jehovah. Ampianariny Satana iro foeky fa Zan̈ahary zen̈y ratsy fan̈ahy fotony man̈oro olo amy motrobe. Manjary manohitry fitondrasan̈any Jehovah iro koa fa mino vandy aby zen̈y. Tsy maintsy ho resy fo Satana. Fa parpavianizen̈y, hifen̈y angovo jiaby izy han̈aparitaka vandy momba Jehovah. Tadiaviny hino vandy aby zen̈y koa anao. Han̈eky fitahiny ma anao?
TAFIDITRY AMINY ADIHEVITRY IO ANAO
16. Ino raha tsy vitany Adama ndreky Eva kanefa mety ho vitanao?
16 Ambelany Jehovah mankamasin̈y an̈aranany atsika ndray tsy lavorary. Adama ndreky Eva tsy nahavita nan̈ano zen̈y, fa anao ndraiky mety hahavita. Ndray maro olo man̈aratsy Jehovah ndreky tsy man̈isy fotiny an̈aranany, ho vitanao fo hiaro izio ndreky han̈ambara aminolo fa Jehovah io Zan̈ahary masin̈y, man̈ano ny marin̈y, tsara fan̈ahy, sady be fitiavan̈a. (Isaia 29:23) Tohàn̈a zònany hitondra, ke koràn̈a aminolo fa fitondrasan̈any Jehovah zaraiky fo ten̈a tsara sady hampiadan̈a ndreky hampasambatra atsika.—Sal. 37:9, 37; 146:5, 6, 10.
17. Akory nataony Jesosy niaro an̈arany Babany?
17 Mangala tahaka Jesosy Kristy atsika koa fa miaro an̈arany Jehovah. (Jaona 17:26) Nataony raha nahaizanolo an̈arany Babany. Izy tsy vitany nampiasa an̈aran̈a Zan̈ahary fo fa naboakany tamy raha nataony koa karakory marin̈y toetriny Babany io. Nataondro Fariseo aby io baka raha nahavy olo hieritreritry fa Jehovah zen̈y Zan̈ahary masiaka ndreky sarotiny, tsy mijery olombelon̈o sady tsy mamindra fô. Kanefa niporofoeny Jesosy tsarabe fa diso raha zen̈y. Nataony koa raha hahitanolo fa Jehovah ten̈a mahay mandanjalanja, maharidraha, be fitiavan̈a ndreky be famindrampo. Nifen̈y fo izy nangala tahaka toetriny Babany io isanandra. Ke olo koa fa nahita izy, mira nahita Jehovah fo.—Jaona 14:9.
18. Akory mety han̈aboahantsika fa vandy areriky fan̈aratsian̈a Jehovah?
18 Karaha nataony Jesosy, koran̈intsika aminolo zay raha haintsika momba Jehovah. Koran̈intsika amindro fa izy ten̈a be fitiavan̈a ndreky tsara fan̈ahy. Fan̈anovantsika zen̈y han̈aporofo fa vandy areriky fan̈aratsian̈a Jehovah. Mankamasin̈y an̈aranany atsika fotony ataontsika raha hahavy olo ho resy lahatra fa an̈arany Jehovah io masin̈y ankitin̈y. Mety mangala tahaka toetriny Jehovah koa atsika. Marin̈y fa atsika tsy lavorary, kanefa ho vitantsika fo raha zen̈y. (Efes. 5:1, 2) Mila aboakantsika amy raha volan̈intsika ndreky raha ataontsika azovy marin̈y Jehovah zen̈y avio ino aby toetrinany. Ampiantsika olo baka tsy hino vandy ndreky hevitry diso aparitakanolo momba Jehovah. * Ho hita baka amy zen̈y koa fa vitanolo tsy lavorary fo tsy hivadiky amy Zan̈ahary.—Joba 27:5.
Ravoravo atsika man̈ampy olo ampianarintsika Baiboly ho resy lahatra fa Jehovah io tsara fan̈ahy ndreky be fitiavan̈a (Zahava fehintsoratra 18-19) *
19. Izikoa Isaia 63:7 zahan̈a, ino ma ten̈a tanjon̈ontsika koa fa mampianatra Baiboly?
19 Misy fomba hafa koa mety han̈amasin̈antsika an̈arany Jehovah. Lera atsika mampianatra Baiboly, mety hamafisintsika fa Jehovah manan̈a zò hitondra na hanjaka amy raha jiaby niasainy, ary raha zen̈y marin̈y. Atsika ten̈a mila mampianatra olo han̈araka lalàn̈any Jehovah, kanefa han̈ampy olo ho tia Jehovah ndreky tsy hivadiky aminany ten̈a tanjon̈ontsika. Hamafisintsika aminolo ampianarintsika koa toetry miavaka anan̈any Jehovah misy ahaizandro karakory marin̈y izy. (Vakia Isaia 63:7.) Fan̈anovantsika zen̈y han̈ampy iro ho tia Jehovah ndreky han̈araka volan̈anany, fotony iro tsy tihivadiky aminany.
20. Ino raha hidinihintsika amy lahatsoratra man̈araka?
20 Mila mitandrin̈y atsika amy fitondranten̈antsika ndreky fomba fampianarantsika olo. Hidinihintsika amy lahatsoratra man̈araka fomba han̈anovantsika zen̈y. Han̈amia voninahitry an̈arany Jehovah atsika izikoa man̈ano zen̈y, ke ho maro olo han̈iry hanompo izy.
HIRA 2 Jehovah no Anaranao
^ feh. 5 Misy adihevitry maventy mahatafiditry anjely ndreky olombelon̈o jiaby. Nan̈ino izio ten̈a raha maventy, baka io nan̈ino atsika mba tafiditry amizio? Fahaizantsika valinizen̈y han̈ampy atsika hankafatatra fihavanan̈antsika amy Jehovah.
^ feh. 18 Nivolan̈a bokintsika taloha fa an̈arany Jehovah io tsy mila hamarin̈iny, fotony tsisy olo hifamatra fa manan̈a zò hitondra an̈aran̈a io Jehovah. Kanefa nahitsy fazahoantsika raha zen̈y tamy fivorian̈a fataontsika isaka taon̈o taminy 2017. Karaha ty raha nambarany pitaridraharaha taminio: “Izikoa fintin̈iny, atsika mety mivavaka baka an̈arany Jehovah ho marin̈y, fotony mila porofoen̈a fa tsy marin̈y raha jiaby natao han̈aratsian̈a izy.”—Zahava programony Tele JW (malagasy) tamy Zanvie 2018 amy jw.org®. Mandihana amy ZAVATRA MISY > TELE JW.
^ feh. 62 FAN̈AZAVAN̈A SARY: Devoly nan̈aratsy Zan̈ahary; izy nivolan̈a taminy Eva fa Zan̈ahary io pavandy. Tan̈atiny taon̈o taon̈o, Satana nan̈aparitaka vandy zen̈y. Nivolan̈a izy fa Zan̈ahary io ratsy fan̈ahy, avio olombelon̈o tsisy namoron̈o fa navinavy ho azy.
^ feh. 64 FAN̈AZAVAN̈A SARY: Rahalahy araiky mampianatra Baiboly; hazavainy aminolo ampianariny io toetry maro tsara anan̈any Jehovah.
