NGANI JAKULIJIGANYA 23
“Lina Lyawo Liswejesyedwe”
“Lina lyawo Ambuje lili lya yaka yosope.”—SAL. 135:13.
NYIMBO NA. 10 Tumlumbe Yehofa Mlungu Jwetu!
YACHITULIJIGANYE *
1-2. Ana yindu yapi yayili yakusosekwa mnope kwa ŵa Mboni sya Yehofa?
NGANI jakusosekwa mnope jajikutukwaya masiku agano, jili ja kuchimbichisya ulamusi wa Yehofa soni kuswejesya lina lyakwe. Ŵa Mboni sya Yehofawe, tukusanonyela kulijiganya ngani syakusangalasyasi. Nambope, ana kuchimbichisya ulamusi wa Mlungu ni kuswejesya lina lyakwe yili yakulekangana? Iyayi.
2 Wosopewe tukusayiwona kuti lina lya Mlungu likusosekwa kuswejesyedwa. Twalijiganyisyesoni kuti ulamusi wa Yehofa uli wambone mnope. Ngani syosopesi sili syakusosekwa mnope.
3. Ana lina lyakuti Yehofa likusapwatikapo chichi?
3 Lina lyakuti Yehofa likusakwayaga chilichose chakwamba jwalakwe, kupwatikapo yakusatenda pakulamulila. Myoyo, naga tukuŵecheta kuti chindu chakusosekwa mnope chili kuswejesya lina lya Yehofa, nikuti ulamusi wa jwalakwe uli wambone mnope. Lina lyakuti Yehofa likusakamulana mnope ni yakusati jwalakwe pakulamulila.—Alole libokosi lyakuti “Ngani Jakusosekwa Mnope.”
4. Ana pa Salimo 135:13 pakusasala yamtuli pakwamba ya lina lya Mlungu, soni ana chitukambilane yiwusyo yapi munganiji?
4 Lina lyakuti Yehofa lili lyapadela. (Aŵalanje Salimo 135:13.) Ligongo chichi lina lya Mlungu lili lyakusosekwa mnope? Ana linali lyanyosyedwe chamtuli kandanda? Ana Mlungu jwaliswejesye chamtuli? Soni ana m’weji mpaka tulichenjele chamtuli linali? Kwende tupate kwanga kwa yiwusyoyi.
KUSOSEKWA KWA LINA LYAKUTI YEHOFA
5. Ana ŵane mpaka awusye chiwusyo chapi papikene kuti lina lya Mlungu likusosekwa kuswejesyedwa?
5 “Lina lyawo liswejesyedwe.” (Mat. 6:9, NWT) Yesu jwasasile kuti kuswejesya linaku kuli chimo mwa yindu yakusosekwa mnope kuyipopelela. Nambo ana maloŵe ga Yesuga gakusagopolela chichi? Kuswejesya chindu chine chakwe, kukusagopolela kuchitendekasya kuti chiŵe chetakate. Ŵane mpaka aganisyeje kuti, ‘Ana ngaŵa lina lyakuti Yehofa lili kala lyeswela?’ Kuti tupate kwanga kwa chiwusyochi tukusosekwa kumanyilila yayikusapwatika pa linali.
6. Ana chichi chachikusatendekasya lina kuŵa lyakusosekwa mnope?
6 Lina nganiliŵa maloŵe gagakusagamba kulembedwa pachipepala kapena kuŵechetedwa. Baibulo jikusati, “Lina lyambone lili lyakusosekwa mnope kupunda chipanje chejinji.” (Mis. 22:1, NWT; Jwak. 7:1) Ligongo chichi lina lili lyakusosekwa mnope? Ligongo likusakwaya mbili ja mundu, soni yakusaganisya ŵandu yakwamba mundu jwakwete linalyo. Myoyo, chakusosekwa mnope nganichiŵa mwalikusawonechela lina palilembedwe kapena kakolanje kakwe, nambo yakusaganisya ŵandu pakwamba msyene linalyo.
7. Ana ŵandu akusalijimuchila chamtuli lina lya Mlungu?
7 Ŵandu pakuŵecheta yaunami yakwamba Yehofa akusaŵa kuti akonanga mbili jakwe. Kutenda yeleyi kukusatendekasya kuti ŵandu akalichimbichisyaga lina lyakwe. Kwimuchilidwa kwandanda kwa lina lya Mlungu kwatendekwe mumgunda wa Edeni. Kwende tulole yampaka tulijiganye pa kwimuchilaku.
ANA LINALI LYANYOSYEDWE CHAMTULI KANDANDA?
8. Ana Adamu ni Hawa ŵamanyililaga chichi, soni ana mpaka tuliwusye yiwusyo yapi?
8 Adamu ni Hawa ŵalimanyililaga lina lya Yehofa, nambosoni yisyesyene yakwe yakwamba jwalakwe. Jemanjaji ŵamanyililaga kuti Yehofa ni juŵapanganyisye soni kwapa umi. Ŵamanyililagasoni kuti jwalakwe ni juŵapele liŵasa lyambone soni malo gambone gakutama. (Gen. 1:26-28; 2:18) Nambo, ana jemanjaji ŵakamulichisye nganisyo syawo syamlama pakuganichisya chenene yindu yaŵapele Yehofa? Ana jemanjaji ŵapitilisye kumnonyela nambosoni kumyamichila Yehofa? Kwanga kwa yiwusyoyi kwawonechele pandaŵi jele mmagongo jwa Mlungu ŵalinjile jemanjaji.
9. (a) Mwakamulana ni Genesesi 2:16, 17 soni 3:1-5, ana Yehofa ŵalisalile yindu yapi liŵasa lyandanda? (b) Ana Satana jwatendekasisye chamtuli jemanjaji kuti atande kuganichisya yakulemwecheka yakwamba Yehofa?
9 Aŵalanje Genesesi 2:16, 17; 3:1-5. Satana ŵaŵechete kupitila mwa lijoka, ni ŵamwusisye Hawa kuti, “Ana yakuwona kuti Mlungu ŵatite mkasimlya yisogosi ya m’yitela yiliyose mu mgunda muno?” Chiwusyochi chakwete maloŵe gane gagali mpela poisoni gagamtendekasisye Hawa kumkayichila Mlungu. Yaŵaŵechete Mlungu yaliji yakuti jemanjaji alyeje yisogosi yosope ya m’yitela ya mumgundamo kulekapo yisogosi ya m’chitela chimo. Papali yitela ya yisogosi yejinji yakakomboleche Adamu ni Hawa kulyaga. (Gen. 2:9) Kusala yisyene, Yehofa ali jwakoloŵa magasa. Nambope, Mlungu ŵasalile Adamu ni Hawa kuti akalya yisogosi ya m’chitela chimpepe. Myoyo chiwusyo chaŵawusisye Satana chatendekasisye kuti yaŵasasile Mlungu yiwoneche mpela yaunami. Satana jwalosisye kuti Mlungu nganaŵa jwakoloŵa magasa. Komboleka kuti Hawa, jwaganisyaga kuti, ‘Ana nikuti Mlungu akunjima chine chakwe chambone?’
10. Ana Satana jwanyosisye chamtuli lina lya Mlungu, soni yeleyi yakwete yakuyichisya yamtuli?
10 Pandaŵi jele Satana ŵamwusyaga Hawa chiwusyo chila, Hawa jwaliji jwakulupichika kwa Yehofa. Jwalakwe ŵamjanjile Satana mwakusala malamusi gaŵapele Mlungu. Jwajonjechesyesoni kuti ngakusosekwa atamose kuchikamula chitelacho ata panandi. Jwalakwe jwamanyililaga kuti naga ngakupikanila chachiwa. Nambo Satana pakwanga jwatite, “Kuwa ngasim’wa.” (Gen. 3:2-4) Pelepa ngaŵa kuti Satana jwagambile kusala kuti Yehofa ali jwaunami, mmalo mwakwe jwalakwe jwanyosyagasoni lina lya Mlungu. Mwakutenda yeleyi, Satana jwaŵele jwakulambusya kapena kuti jwakunyosya. Hawa jwakulupilile mabosa ga Satana. (1 Tim. 2:14) Jwalakwe ŵamkulupilile mnope Satana kupunda Mlungu. Yeleyi ni yayatendekasisye kuti Hawa asagule yindu mwakulemwecheka. Jwalakwe ŵasagwile kuti akampikanila Yehofa. Hawa jwalile chisogosi chaŵalekasisye Yehofa, kaneko nombe najo Adamu ŵalile.—Gen. 3:6.
11. Ana Adamu ni Hawa ŵalepele kutenda chichi?
11 Agambe ganisya yindu yakaŵechete Hawa kwa Satana. Komboleka kuti jwalakwe akasasile yindu mpela ayi, “Ngangumanyilila kuti mmwejo mli ŵani, nambo ngwamanyilila Atati ŵangu Yehofa, soni ngusinanonyela nambosoni kwakulupilila. Ŵalakwe ŵatupele une ni Adamu yindu yosope yatukwete. Sambano ligongo chichi mmweji mkuŵecheta yakusakala yakwamba jwalakwe? Mtyoche apa!” Kusala yisyene, Yehofa akaŵele jwakusangalala mnope kupikana maloŵega kutyochela kwa Hawa. (Mis. 27:11) Nambo Hawa soni Adamu nganakola chinonyelo chisyesyene pa Yehofa. Jemanjaji ŵalepele kuliŵichila kunyuma lina lya Yehofa ligongo lyakuti nganamnonyelaga jwalakwe.
12. Ana Satana ŵamtendekasisye Hawa kuti akayichileje ya chichi, soni Adamu ni Hawa ŵalepele kutenda yindu yapi?
12 Mpela mwatuyiwonele, Satana jwatandite ni kumlambusya kaje Hawa. Jwalakwe jwawusisye chiwusyo chachatendekasisye kuti Hawa atande kumkayichila Yehofa naga ali mtati jwambone. Adamu ni Hawa ŵalepele kulichenjela lina lya Yehofa ku unami wakusakala waŵaŵechete Satana. Yeleyi yatendekasisye jemanjaji kuti ampikanile Satana soni kuti amjimuchile Yehofa. Masiku agano Satana akusakamulichisya masengo litala mpela lyeleli. Jwalakwe akusalimbana ni lina lya Yehofa mwakulitendekasya kuti linyosyedweje. Ŵandu wakusakulupilila mabosa ga Satana yikusaŵa yangasawusya kuti akane ulamusi wakulungama wa Yehofa.
YEHOFA AKUSALICHIMBICHISYA LINA LYAKWE
13. Ana lilemba lya Esekiele 36:23 likusalosya chamtuli ngani jakusosekwa mnope jajili m’Baibulo?
13 Ana Yehofa jwagambile kuyilechelela yachipongweyi ni ngalichenjela lina lyakwe? Iyayi, jwalakwe nganayilechelela. Baibulo jikusatusalila yaŵatesile Yehofa pakusaka kulosya kuti yayaŵechetedwe mu mgunda wa Edeni pakwamba jwalakwe yaliji yaunami. (Gen. 3:15) Pakusala yajikusalondesya Baibulo pangani, mpaka tugambe kuŵecheta mwakata kuti, Yehofa jwaliswejesye lina lyakwe kupitila mu Uchimwene wakulamulidwa ni mwanache jwakwe soni chachiwuchisya chilungamo chisyesyene ni mtendele pa chilambo chapasi. Baibulo mpaka jitukamuchisye kupikanichisya yaŵatesile Yehofa pakuliswejesya lina lyakwe.—Aŵalanje Esekiele 36:23.
14. Ana Yehofa jwatesile yamtuli kuti aswejesye lina lyakwe pandaŵi jele ŵandu ŵamjimuchile mumgunda wa Edeni?
14 Satana alinjile kutenda yosope yampaka akombole pakusaka kulepelekasya chakulinga cha Yehofa. Nambo jwalakwe aŵele ali mkulepela. Baibulo jikusalosya yindu yaŵele Yehofa ali mkutenda panganiji, mwamti yilosisye kuti pangali jwalijose jwampaka alandane ni Yehofa Mlungu. Kusala yisyene, kwimuchila kwa Satana soni wosope ŵali kumbali jakwe kukusampweteka mnope Yehofa. (Sal. 78:40) Jwalakwe akutenda yindu mwalunda, mwakuwusimana mtima soni mwachilungamo pakulimbana ni kwimuchilaku. Kupwatika pelepa, alosisye kuti ali jwamachiligose kwa yaka yejinji. Kwakupunda yosope, akusalosyasoni chinonyelo pa yindu yosope yakusatendaga. (1 Yoh. 4:8) Yehofa nganaleka kutenda yakomboleka kuti aswejesye lina lyakwe.
Satana ŵamsalile Hawa yindu yaunami yakwamba Yehofa, soni kwa yaka yejinji aŵele ali mkumnyosya Mlungu (Alole ndime 9-10, 15) *
15. Ana Satana akunyosya chamtuli lina lya Mlungu masiku agano, soni ana yeleyi yikwete yakuyichisya yamtuli?
15 Masiku agano Satana akupitilisyape kunyosya lina lya Mlungu. Jwalakwe akusiŵatendekasya ŵandu kuti akayichileje yakuti Mlungu ali jwamachili, jwachilungamo, jwalunda, soni jwachinonyelo. Mwachisyasyo, Satana akusalingalinga kwatendekasya ŵandu ganisya kuti Yehofa nganatupanganya m’weji. Soni ŵandu patandite kulupilila kuti Mlungu apali, Satana akusiŵatendekasya kulupilila kuti malamusi ga Mlungu gali gakusawusya soni gangali chilungamo. Jwalakwe akusayika pakwajiganya ŵandu kuti Yehofa ali jwangasa soni kuti akusiŵajocha ŵandu kumoto wa helo. Ŵandu patandite kulupilila mabosa gelega, akusatanda kuwukana ulamusi wachilungamo wa Yehofa. Satana chapitilisyepe kumnyosya Yehofa, mpaka pandaŵi jele Yehofa chachimjonanga. Kupwatika pelepa, jwalakwe chachipitilisyape kututendekasya kuti tuwukaneje ulamusi wa Yehofa. Ana yeleyi yichikomboleka?
UDINDO WATUKWETE PANGANI JAKUSWEJESYA LINA LYA YEHOFA
16. Ana mpaka tukombole kutenda yindu yapi yaŵalepele kutenda Adamu ni Hawa?
16 Yehofa akundile kuti ŵandu ŵangali umlama ajigale nawo mbali pakuswejesya lina lyakwe. Myoyo, mpaka akombole kutenda yindu yaŵalepele kutenda Adamu ni Hawa. Atamose kuti tukutama m’chilambo chegumbale ni ŵandu ŵakusanyosya lina lya Yehofa, tukwete upile wakwasalila ŵane ya lina lya Yehofa soni kwamanyisya kuti jwalakwe ali jwamswela, jwachilungamo, jwambone nambosoni jwachinonyelo. (Yes. 29:23) Mpaka akombole kukamuchisya ulamusi wakwe soni kwakamuchisya ŵane kumanyilila kuti ulamusi wa Yehofape ni wawuli wachilungamo, nambosoni ni wampaka uyikasye mtendele kwa ŵandu wosope.—Sal. 37:9, 37; 146:5, 6, 10.
17. Ana Yesu jwakamuchisye chamtuli ŵandu kumanyilila lina lya Atati ŵakwe?
17 Patukulichenjela lina lya Yehofa, tukusaŵa kuti tukukuya chisyasyo cha Yesu Klistu. (Yoh. 17:26) Yesu jwalimanyikasisye lina lya Atati ŵakwe lyakuti Yehofa mwakulikamulichisya masengo nambosoni kwajiganya ŵandu yakwamba jwalakwe. Mwachisyasyo, Yesu jwasisisye Afalisi ŵaŵatendekasyaga ŵandu kumwona Yehofa mpela jwaukali, jwangapikana ya ŵane, soni kuti jwangali chanasa. Yesu ŵakamuchisye ŵandu kuti amwoneje Yehofa kuti ali jwambone, jwakuwusimana mtima, jwachinonyelo soni jwakwakululuchila ŵandu. Kupitila mu yakutenda yakwe ya lisiku ni lisiku, Yesu ŵakamuchisye ŵandu kuti asimanyilile ndamo syambone sya Yehofa.—Yoh. 14:9.
18. Ana mpaka tulosye chamtuli kuti yindu yakusakala yakusamŵechetela ŵandu Yehofa yili yaunami?
18 Mwakulandana ni Yesu, m’wejisoni mpaka twasalile ŵandu yatukumanyilila yakwamba Yehofa. Nambosoni mpaka twajiganye kuti jwalakwe ali Mlungu jwachinonyelo soni jwambone. Patukutenda yeleyi, tukusasisya yaunami soni yachipongwe yakusamtendela ŵandu Yehofa. Tukusaliswejesya lina lya Yehofa, patukwakamuchisya ŵandu kuliwona linali kuti lili lyeswela. Atamose kuti tuli ŵangali umlama, nambope mpaka tukombole kumsyasya Yehofa. (Aef. 5:1, 2) Naga maloŵe soni yakutenda yetu yikusiyalosya ŵane mwaŵelele Yehofa, nikuti tukusakamuchisya kuswejesya lina lyakwe. Tukusaliswejesyasoni linali mwakwakamuchisya ŵandu kuti amanyilileje yisyesyene yakwamba Mlungu. * Tukusalosyasoni kuti ŵandu ŵangali umlama mpaka aŵe ŵakulupichika kwa Mlungu.—Yob. 27:5.
Tukusosekwa kwakamuchisya ŵandu ŵatukusajiganya Baibulo kupikanichisya kuti Yehofa ali jwachinonyelo soni jwachanasa (Alole ndime 18-19) *
19. Ana lilemba lya Yesaya 63:7 likusatukamuchisya chamtuli kumanyilila chakulinga chetu chekulungwa chatukusajiganyila ŵane?
19 Aganichisyesoni ya chindu chine chatukulijiganya. Patukwajiganya ŵane usyesyene wa m’Baibulo, tukusaŵa tuli mkwakamuchisya kumanyilila kuti Yehofa ali jwakuŵajilwa kulamulila chilambo chosope. Tukusitwajiganya ŵandu malamusi ga Mlungu, nambope chakulinga chetu chekulungwa chili kwakamuchisya ŵane kuti amnonyeleje Yehofa jwali Atati ŵetu ŵachinonyelo, soni kuti aŵeje ŵakulupichika kwa jwalakwe. Myoyo, tukusosekwa kwakamuchisya ŵane kumanyilila ndamo syambone sya Yehofa soni kuti amanyilile yalikusajimila lina lya Yehofa. (Aŵalanje Yesaya 63:7.) Patukwajiganya ŵandu m’litala lyeleli, tuchakamuchisya kuti amnonyeleje Yehofa soni kumpikanila ligongo lyakuti chachiŵa ŵakusachilila kuŵa ŵakulupichika kwa jwalakwe.
20. Ana tuchilijiganya chichi mungani jakuyichisya?
20 Sambano, ana mpaka tutende wuli kuti ŵandu alichimbichisyeje lina lya Mlungu kupitila mu yitendo yetu soni yindu yatukusitwajiganya? Ngani jakuyichisya jichijanga chiwusyochi.
NYIMBO NA. 2 Lina Lyawo Lili Yehofa
^ ndime 5 Ana ni ngani japi jajili jakusosekwa mnope kwa ŵandu soni malayika? Ligongo chichi nganiji jili jakusosekwa soni ana yeleyi yikutukwaya chamtuli? Kumanyilila kwanga kwa yiwusyo yeleyi nambosoni yiwusyo yine, mpaka kulimbisye unasi wetu ni Yehofa.
^ ndime 18 Kwa yaka yejinji mabuku getu gaŵele gali mkusala kuti lina lya Yehofa ngalikusosekwa kuliswejesya ligongo lyakuti pangali jwalijose jwaŵaŵechete kuti Mlungu ngakusosekwa kola lina lyakuti Yehofa. Nambope, kapikane ketu panganiji kachenjile pamsongano wapachaka wa mu 2017. Cheyamani jwasasile kuti, “Nganikuŵa kulemwa kuŵecheta kuti tukusapopelela kuti lina lya Yehofa liswejele ligongo lyakuti ŵandu ŵasakesye mbili jakwe.”—Alolele Broadcasting ja Chichewa ja Januwale 2018 jajikusimanikwa pa jw.org®. Ajawule palembile kuti LIBRARY > JW BROADCASTING®.
^ ndime 62 KULONDESYA YIWULILI: Satana jwamnyosisye Mlungu mwakumsalila Hawa kuti Mlungu ali jwaunami. Kwa yaka yejinji, Satana aŵele mkulimbikasya yindu yaunami mpela kwajiganya ŵandu kuti Mlungu ali jwangasa soni kuti jwalakwe nganiŵapanganya ŵandu.
^ ndime 64 KULONDESYA YIWULILI: M’bale pakutendesya lijiganyo lya Baibulo, akumkamuchisya mundu kupikanichisya ndamo syambone sya Yehofa.
