1. Mɛni ji Mawu gbeye yemi, nɛ mɛni he je nɛ e he hia nihi nɛ a suɔ Yehowa?

KRISTOFOHI suɔ Mawu, nɛ a yeɔ lɛ gbeye hulɔ. Ni komɛ naa munyu nɛ ɔmɛ kaa a teɔ si kɛ woɔ a sibi. Se pi gbeye yemi nɛ haa nɛ nɔ fɔ̃ɔ ɔ he munyu nɛ wa ngɛ tue. Wa ma susu gbeye yemi pɔtɛɛ ko he. Nihi nɛ a yeɔ Mawu gbeye ngɛ blɔ nɛ ɔ nɔ ɔ buɔ lɛ wawɛɛ nitsɛ. A sume nɛ a pee nɔ́ ko nɛ ma ha nɛ a hiɔwe Tsɛ ɔ bua be jɔe, ejakaa a sume nɛ a puɛ huɛ bɔmi nɛ ngɛ a kɛ lɛ a kpɛti ɔ.​—La 111:10; Abɛ 8:13.

2. Ngɛ nɔ́ nɛ Matsɛ David de ngɛ La 86:11 ɔ nya a, mɛni níhi enyɔ a he wa ma susu?

² Baiblo ɔ de ke: “Oo Yehowa, moo tsɔɔ mi o blɔ ɔ. Ma nyɛɛ ngɛ o we anɔkuale ɔ mi. Moo pee ye tsui kake konɛ ma ye o biɛ ɔ gbeye.” (La 86:11, NW) Ke o ngɛ munyu nɛ ɔ he susue ɔ, o maa na heii kaa Matsɛ David le bɔ nɛ Mawu gbeye yemi he hia ha. Nyɛ ha nɛ wa susu bɔ nɛ waa kɛ nɔ́ nɛ David de ngɛ e sɔlemi ɔ mi ɔ ma tsu ní ngɛ wa si himi mi ha a he. Kekleekle ɔ, wa ma susu yi mi tomi komɛ a he je nɛ e sa nɛ waa ye Mawu biɛ ɔ gbeye ɔ he. Enyɔne ɔ, wa ma susu níhi nɛ wa maa pee ngɛ wa si himi mi daa ligbi kɛ tsɔɔ kaa wa yeɔ Mawu biɛ ɔ gbeye ɔ a he.

3. Mɛni nɛ ha nɛ eko ɔ, Mose ya nɔ nɛ e ye Mawu biɛ ɔ gbeye ɔ?

³ Mo susu bɔ nɛ Mose nu he ha benɛ e ngɛ tɛ puɔ ko mi nɛ e na Yehowa hɛ mi nyami ɔ nɛ bee ɔ. Eko ɔ, enɛ ɔ ji nyakpɛ  nɔ́ nɛ pe kulaa nɛ adesa ko na loko Yesu ba zugba a nɔ! Mose nu nɛ bɔfo ko tu munyu nɛ nyɛɛ se nɛ ɔ ngɛ Yehowa he: ‘Imi Yehowa a, Mawu mɔbɔ nalɔ, kɛ dloolɔ ji mi; ye mi mi fu we mla, nɛ ye suɔmi kɛ anɔkuale yemi hiɛ babauu. I yeɔ ye si womi nɔ kɛ haa nimli akpeakpe, nɛ i ngɔɔ a he yayami kɛ tɔmi ngɔ paa mɛ.’ (2 Mose 33:17-23; 34:5-7) Eko ɔ, Mose kaiɔ sane nɛ ɔ ke e kɛ biɛ Yehowa a ngɛ ní tsue. E be nyakpɛ kaa pee se ɔ, Mose bɔ Mawu we bi nɛ ji Israel bi ɔmɛ kɔkɔ kaa a ‘wo Yehowa, a Mawu ɔ biɛ nɛ ngɛ nyakpɛ kɛ gbeye ɔ hɛ mi nyami.’​—5 Mose 28:58.

4. Mɛni ma nyɛ maa ye bua wɔ nɛ wa ná bu nɛ mi kuɔ kɛ ha Yehowa?

⁴ Ke wa ngɛ biɛ nɛ ji Yehowa a he susue ɔ, e sa nɛ wa pue wa yi mi tɛ ngɛ Nɔ nɛ Yehowa ji nitsɛnitsɛ ɔ he. E sa nɛ wa susu e su komɛ kaa e he wami, nile, dami sane yemi kɛ suɔmi ɔ he. Ke wa susu e su nɛ ɔmɛ kɛ e su kpa komɛ a he ɔ, e maa ye bua wɔ nɛ wa ma ná bu nɛ mi kuɔ kɛ ha lɛ.​—La 77:11-15.

5-6. (a) Mɛni nɛ Mawu biɛ ɔ tsɔɔ? (b) Ngɛ 2 Mose 3:13, 14 kɛ Yesaya 64:8 ɔ nya a, mɛni blɔhi a nɔ nɛ Yehowa guɔ kɛ haa nɛ e yi mi tomi baa mi?

⁵ Mɛni wa le ngɛ nɔ́ nɛ Mawu biɛ ɔ tsɔɔ ɔ he? Ní leli fuu kplɛɛ nɔ kaa a ma nyɛ maa tsɔɔ biɛ Yehowa a sisi kaa “O Deɔ O Peeɔ.” Sisi numi nɛ ɔ kaiɔ wɔ kaa nɔ́ ko be nɛ ma nyɛ maa tsi Yehowa blɔ ngɛ nɔ́ nɛ e suɔ nɛ e pee ɔ he. Ngɛ mɛni blɔ nɔ?

⁶ Yehowa nyɛɔ nɛ e peeɔ e he nɔ́ fɛɛ nɔ́ konɛ e kɛ ha nɛ e yi mi tomi nɛ ba mi. (Kane 2 Mose 3:13, 14.) Ngɛ wa womi ɔmɛ a mi ɔ, behi fuu ɔ, a kaiɔ wɔ kaa wa susu nyɛmi nɛ ɔ nɛ Mawu ngɛ ɔ he. Yehowa ma nyɛ maa wo adesahi nɛ a yi mluku ɔ he wami nɛ a pee níhi nɛ ma ha nɛ e yi mi tomi nɛ ba mi. (Kane Yesaya 64:8.) Kɛ gu blɔ nɛ ɔmɛ a nɔ ɔ, Yehowa haa nɛ e yi mi tomi baa mi. Nɔ́ ko be nɛ ma nyɛ maa tsi Yehowa blɔ konɛ e yi mi tomi ko ba mi.​—Yes. 46:10, 11.

7. Mɛni wa ma nyɛ maa pee konɛ wa ná bu nɛ mi kuɔ kɛ ha wa hiɔwe Tsɛ ɔ nɛ wa je hɛsa kpo wawɛɛ?

⁷ Ke wa pue wa yi mi tɛ ngɛ níhi nɛ wa hiɔwe  Tsɛ ɔ pee, kɛ níhi nɛ e wo wɔ he wami nɛ wa nyɛ pee ɔ he ɔ, lɔ ɔ ma ha nɛ wa je hɛsa kpo. Kaa nɔ hyɛmi nɔ́ ɔ, ke wa susu níhi nɛ Yehowa bɔ ɔ tsuo he ɔ, wa bua maa jɔ níhi nɛ Yehowa pee ɔ tsuo he wawɛɛ. (La 8:3, 4) Nɛ ke wa pue wa yi mi tɛ ngɛ níhi nɛ Yehowa ye bua wɔ nɛ wa nyɛ nɛ wa pee ɔ he ɔ, e ma ha nɛ wa ná bu nɛ mi kuɔ kɛ ha lɛ. Niinɛ, bɔ nɛ wa Tsɛ ɔ ngɛ ha, níhi tsuo nɛ e pee kɛ níhi tsuo nɛ e maa pee ɔ haa nɛ wa naa bɔ nɛ e sa nɛ waa ye e biɛ ɔ gbeye ha!​—La 89:7, 8.

8. Ngɛ 5 Mose 32:2, 3 ɔ nya a, kɛ Yehowa suɔ nɛ e sɔmɔli nɛ a na e biɛ ɔ ha kɛɛ?

⁸ Benɛ e piɛ bɔɔ nɛ Israel bi ɔmɛ maa su Si Womi Zugba a nɔ ɔ, Yehowa tsɔɔ Mose la ko. (5 Mose 31:19) E sa nɛ Mose hu nɛ tsɔɔ Israel bi ɔmɛ la nɛ ɔ. (Kane 5 Mose 32:2, 3.) Ke wa pue wa yi mi tɛ ngɛ kuku 2 kɛ 3 ɔ he ɔ, wa naa kaa Yehowa sume nɛ a laa e biɛ ɔ nɔ, nɛ́ a bu lɛ kaa nɔ́ ko nɛ e ngɛ klɔuklɔu tsɔ nɛ e sɛ nɛ a wo ta. E suɔ nɛ nɔ fɛɛ nɔ nɛ e le e biɛ ɔ! E ji he blɔ ngua kɛ ha Israel bi ɔmɛ kaa Mose maa tsɔɔ mɛ Yehowa biɛ ɔ kɛ e hɛ mi nyami ɔ he ní! Kaa bɔ nɛ hiɔmi haa nɛ tsohi waa flɔflɔɔflɔ ɔ, nɔ́ nɛ Mose tsɔɔ Israel bi ɔmɛ ɔ wo a hemi kɛ yemi mi he wami wawɛɛ. Kɛ wa maa pee kɛ le kaa wa ní tsɔɔmi nuɔ tso jã ha kɛɛ?

9. Mɛni wa ma nyɛ maa pee kɛ ye bua konɛ Yehowa biɛ ɔ he nɛ tsɔ?

⁹ Ke wa ngɛ fiɛɛe ngɛ wehi a mi loo wa ngɛ ma nɔ odase yee ɔ, e sa nɛ waa ngɔ Baiblo ɔ kɛ tsɔɔ nihi Mawu biɛ nɛ ji Yehowa a. Wa ma nyɛ ma ha mɛ wa womi ɔmɛ eko, wa ma nyɛ ma je videohi nɛ a taa nɔ tsui he kɛ tsɔɔ mɛ, nɛ wa ma nyɛ maa tsɔɔ mɛ níhi nɛ ngɛ wa wɛbsaiti ɔ nɔ nɛ woɔ Yehowa hɛ mi nyami ɔ hulɔ. Ke wa ngɛ ní tsumi he loo sukuu aloo wa ngɛ blɔ hiae ɔ, wa ma nyɛ ma ná he blɔ kɛ tsɔɔ nihi wa Mawu nɛ ngɛ suɔmi ɔ he ní kɛ bɔ nɛ e ngɛ ha. Wa ma nyɛ maa tsɔɔ mɛ ní kpakpahi nɛ Yehowa to ngɛ adesahi kɛ zugba a he. Nɛ ke a nu ní nɛ ɔmɛ ɔ, eko ɔ, e ma ha nɛ a na bɔ nɛ Yehowa suɔ mɛ ha. Ke wa tsɔɔ ni kpahi wa Tsɛ nɛ ngɛ suɔmi ɔ he ní ɔ, lɔ ɔ tsɔɔ kaa wa ngɛ ye buae konɛ Mawu biɛ ɔ he nɛ tsɔ. Jehanɛ hu ɔ, e yeɔ bua nɛ nihi naa kaa a tsɔɔ mɛ Mawu he lakpa munyuhi fuu. Wa tsɔɔ nihi ní kpakpahi nɛ a se be nɛ ma ha nɛ a ná bua jɔmi.​—Yes. 65:13, 14.

10. Ke wa ngɛ Baiblo mi ní kasemi pee ɔ, mɛni he je nɛ e biɔ nɛ waa pee babauu pe Mawu mlaahi nɛ wa maa tsɔɔ nihi?

¹⁰ Ke waa kɛ nihi ngɛ Baiblo ɔ kasee ɔ, e sa nɛ waa ye bua mɛ nɛ a le biɛ Yehowa a nɛ a kɛ tsu ní. Jehanɛ hu ɔ, e sa nɛ waa ye bua mɛ nɛ a le Yehowa saminya. Ke wa tsɔɔ mɛ Mawu mlaahi, e blɔ tsɔɔmihi kɛ bɔ nɛ e sa nɛ a ba a je mi ha a, anɛ lɔ ɔ pɛ ma nyɛ ma ha nɛ waa su oti nɛ ɔ he lo? Baiblo kaselɔ nɛ e hɛ dɔɔ ɔ ma nyɛ maa kase Mawu mlaa amɛ nɛ e bua nɛ jɔ a he. Se anɛ e maa ye mlaa amɛ a nɔ akɛnɛ e suɔ Yehowa a he je lo? Mo kai kaa Adam kɛ Hawa le Mawu mlaa a, se a be suɔmi nɛ mi kuɔ kɛ ha Nɔ Nɛ Wo Mlaa a. (1 Mose 3:1-6) Enɛ ɔ he ɔ, e biɔ nɛ waa pee babauu pe Mawu mlaahi kɛ e blɔ tsɔɔmihi nɛ wa maa tsɔɔ nihi ɔ pɛ.

11. Ke wa ngɛ wa Baiblo kaseli ɔmɛ Mawu mlaa amɛ a he ní tsɔɔe ɔ, mɛni wa ma nyɛ maa pee kɛ ye bua mɛ konɛ a ná suɔmi kɛ ha Mlaa Wolɔ ɔ?

¹¹ Yehowa mlaa amɛ kɛ e blɔ tsɔɔmi ɔmɛ a he ngɛ se nami kɛ ha wɔ. (La 119:97, 111, 112) Se loko wa Baiblo kaseli ɔmɛ maa na kaa se nami ngɛ mlaa nɛ ɔmɛ a he ɔ, ja a nu sisi kaa suɔmi nɛ Yehowa ngɛ kɛ ha wɔ ɔ he je nɛ e wo wɔ mlaa nɛ ɔmɛ ɔ nɛ. Enɛ ɔ he ɔ, wa ma nyɛ ma bi wa Baiblo kaseli ɔmɛ ke: “Mɛni he je nɛ o susu kaa Mawu de e sɔmɔli kaa a pee nɔ́  nɛ ɔ aloo a ko pee nɔ́ nɛ ɔ? Mɛni lɔ ɔ tsɔɔ wɔ ngɛ Yehowa he?” Ke wa ye bua wa Baiblo kaseli ɔmɛ nɛ a susu Yehowa he, nɛ a ná suɔmi nɛ mi kuɔ kɛ ha e biɛ nɛ hɛ mi ngɛ nyami ɔ, e ma ha nɛ munyu ɔ maa ta a tsui he. Lɔ ɔ ma ha nɛ Baiblo kaselɔ ɔ ma ná suɔmi kɛ ha mlaa amɛ kɛ Mlaa Wolɔ ɔ hulɔ. (La 119:68) E ma ha nɛ a hemi kɛ yemi mi maa wa, nɛ a ma nyɛ maa da kahi nɛ a kɛ maa kpe ɔ nya.​—1 Kor. 3:12-15.

12. Ngɛ mɛni blɔ nɔ nɛ David ha we nɛ e tsui nɛ pee kake, nɛ mɛni je mi kɛ ba?

¹² Munyu nɛ Matsɛ David ngma ngɛ La 86:11 nɛ ji “moo pee ye tsui kake” ɔ hu he hia wawɛɛ. Ngɛ David si himi mi ɔ, e na bɔ nɛ e he wɛ kaa nɔ ko tsui mi ma gba enyɔ ha. Ligbi ko ɔ, e ngɛ e mɔ ɔ nɔ nɛ e na nɔ ko yo nɛ e ngɛ e he due. Jamɛ a be ɔ, anɛ David tsui pee kake aloo e mi gba? E le Yehowa mlaa nɛ ji: “O hɛ ko kɔ o nyɛmi e yo . . . nɔ.” (2 Mose 20:17) Se kɛ̃ ɔ, e ya nɔ nɛ e hyɛ lɛ. E ná Batsheba nɛ ji nɔ kpa yo ɔ he akɔnɔ, nɛ ngɛ jamɛ a be ɔ mi nɔuu ɔ, e suɔ nɛ e pee Yehowa suɔmi nya ní. David tsui mi gba. E ngɛ mi kaa David suɔ Yehowa, nɛ e yee lɛ gbeye mohu lɛɛ, se e ya nyɛɛ e we akɔnɔ se. Nɛ enɛ ɔ ha nɛ David pee yayamihi nɛ hɛdɔ ngɛ a he. E gbe Yehowa biɛ ɔ he guɛ. Jehanɛ hu ɔ, David ngɔ haomi kɛ ba e weku ɔ kɛ ni kpahi nɛ a li sane ɔ he nɔ́ ko ɔ a nɔ.​—2 Sam. 11:1-5, 14-17; 12:7-12.

13. Kɛ wa pee kɛɛ kɛ le kaa David tsui ba pee kake ekohu?

¹³ Yehowa tsɔse David, nɛ lɔ ɔ ha nɛ huɛ bɔmi kpakpa ba hi e kɛ lɛ a kpɛti ekohu. (2 Sam. 12:13; La 51:2-4, 17) David kai nyagbahi kɛ haomihi nɛ ba e nɔ benɛ e ha nɛ e tsui mi gba a. Eko ɔ, wa ma nyɛ maa tsɔɔ e munyu nɛ ngɛ La 86:11 ɔ sisi ke: “Ha mi tsui nɛ mi gba we.” Anɛ Yehowa ye bua David nɛ e tsui pee kake lo? Ee, Yehowa Munyu nɛ ji Baiblo ɔ tu David he munyu kaa e ji nyumu nɛ “e kɛ e tsui tsuo ha . . . Yehowa e Mawu ɔ.”​—1 Ma. 11:4; 15:3, NW.

14. Mɛni sane nɛ e sa nɛ wa bi wa he, nɛ mɛni he je?

¹⁴ David níhi a si kpami ɔ ji kɔkɔ bɔmi kɛ ha wɔ, se e woɔ nɔ he wami hulɔ. Mawu we bi tsuo ma nyɛ maa kase nɔ́ ko kɛ je yayami nɛ David pee ɔ mi. Ke kpaako wa bɔni Yehowa sɔmɔmi jio, wa ngɛ lɛ sɔmɔe be kɛkɛɛ jio, e sa nɛ wa bi wa he ke, ‘Anɛ i nyɛ nɛ i ngɛ mɔde nɛ Satan ngɛ bɔe kaa e ma ha nɛ ye tsui mi nɛ gba a nya dae lo?’

15. Mɛni blɔ nɔ nɛ Mawu gbeye yemi ma nyɛ maa po wa he piɛ ke wa na foni aloo video ko nɛ sɛ?

¹⁵ Kaa nɔ hyɛmi nɔ́ ɔ, ke o na nɔ́ ko ngɛ tiivi aloo Intanɛti ɔ nɔ nɛ ma nyɛ ma ha nɛ o ná  akɔnɔ yaya a, kɛ o peeɔ o ní ha kɛɛ? E he wɛ kaa o ma susu kaa foni ɔ aloo video ɔ nɛ o na a kɔ we ajuama bɔmi he tutuutu. Se anɛ e ma nyɛ maa pee nɔ́ ko nɛ Satan ma nyɛ maa da nɔ kɛ gba o tsui mi lo? (2 Kor. 2:11) Jamɛ a foni ɔ ma nyɛ maa pee kaa nyumu ko nɛ e kɛ dami ngɛ tso kpɔ gbae. Kekleekle ɔ, e kɛ dami ɔ maa fɔ tso kpɔ ɔ nɔ, nɛ e ma ka se. Ke e ya nɔ nɛ e ngɛ dami ɔ kae ɔ, tso kpɔ ɔ mi ma gba. Wa ma nyɛ maa ngɔ jamɛ a foni ɔ kɛ to dami nɛ a kɛ gbaa tso ɔ he. Ke nɔ ko ya nɔ nɛ e hyɛ foni nɛ ɔmɛ nɛ e susu kaa nyagba be a he tsɔ ɔ, bɔɔbɔɔbɔɔ ɔ, lɔ ɔ ma nyɛ ma gba e tsui ɔ mi, nɛ e maa pee yayami kɛ si Yehowa. Enɛ ɔ he ɔ, ko ha nɛ akɔnɔ yaya ko nɛ sɛ o tsui mi! Ha nɛ o tsui ɔ nɛ pee kake, nɛ o ye Yehowa biɛ ɔ gbeye!

16. Ke waa kɛ kahi kpe ɔ, mɛni sanehi e sa nɛ wa bi wa he?

¹⁶ Ngɛ fonihi kɛ videohi nɛ sɛ nɛ Satan kɛ kaa wɔ ɔ se ɔ, ní kpahi fuu ngɛ nɛ e yaa nɔ nɛ e kɛ kaa wɔ konɛ waa pee yayami. Kɛ wa maa pee kɛɛ kɛ da nya? E yi kaa o ma susu kaa tɔmi ko be ní nɛ ɔmɛ a he tsɔ. Kaa nɔ hyɛmi nɔ́ ɔ, eko ɔ, wa ma de wa he ke: ‘Ke i pee nɔ́ nɛ ɔ, a be mi fiee kɛ je asafo ɔ mi, lɔ ɔ he ɔ, tɔmi ko be he tsɔ.’ Susumi nɛ ɔ dɛ kulaa. E maa hi kaa wa ma bi wa he sanehi nɛ nyɛɛ se nɛ ɔmɛ: ‘Anɛ Satan ngɛ nɔ́ nɛ ɔ nɔ gue kɛ gba ye tsui mi lo? Ke i ha nɛ akɔnɔ yaya ná ye nɔ he wami ɔ, anɛ lɔ ɔ maa gbe Yehowa biɛ ɔ he guɛ lo? Anɛ ní peepee nɛ ɔ ma ha nɛ ma hɛ kɛ su Mawu he aloo e ma ha nɛ huɛ bɔmi nɛ ngɛ i kɛ Mawu wa kpɛti ɔ ma puɛ?’ Mo pue o yi mi tɛ ngɛ sane bimi nɛ ɔmɛ a he. Moo sɔle kɛ bi juɛmi konɛ o nyɛ nɛ o kɛ anɔkuale yemi nɛ ha sane bimi nɛ ɔmɛ a heto. (Yak. 1:5) Ke o pee jã a, e maa po o he piɛ. E ma nyɛ maa ye bua mo konɛ o kɛ kã nɛ da kahi a nya kaa bɔ nɛ Yesu  pee benɛ e de ke: “Satan, jee hiɛ ɔ kɛ ho!” ɔ.​—Mat. 4:10.

17. Mɛni he je nɛ se nami ko be tsui nɛ mi gba he ɔ? Ngɔɔ nɔ́ he tomi nɔ́ ko kɛ tsɔɔ mi.

¹⁷ Tsui nɛ mi gba a, se nami ko be he. Ngɔɔ lɛ kaa bɔɔlu fiami kuu ko ngɛ nɛ kake peemi be a kpɛti. A kpɛti ni komɛ suɔ hɛ mi nyami, ni komɛ kɛ bɔɔlu fiami ɔ he blɔ tsɔɔmi tsu we ní, nɛ ni komɛ hu bui coach ɔ kulaa. Ke kuu ko ngɛ jã a, e he maa wa kaa a maa ye kunimi. Se ke kake peemi ngɛ bɔɔlu fiami kuu ko mi ɔ, e he wɛ kaa a maa ye kunimi. O tsui ma nyɛ maa pee kaa bɔɔlu fiami kuu ɔ nɛ kake peemi ngɛ a kpɛti ɔ ke níhi nɛ o susuɔ he, níhi nɛ o suɔ, kɛ bɔ nɛ o nuɔ he ha kɛ Yehowa suɔmi nya ní kɔ. Mo kai kaa Satan suɔ nɛ e ha nɛ o tsui ɔ mi nɛ gba. E suɔ nɛ e ha nɛ níhi nɛ o susuɔ he, níhi nɛ o suɔ kɛ bɔ nɛ o nuɔ he ha a nɛ je kpa ngɛ Yehowa suɔmi nya ní he. E sa nɛ mo nitsɛ o bɔ mɔde konɛ o ha nɛ o tsui ɔ nɛ pee kake ngɛ Yehowa sɔmɔmi mi. (Mat. 22:36-38) Ko ha nɛ Satan nɛ gba o tsui ɔ mi kɔkɔɔkɔ!

18. Ngɛ Mika 4:5 ɔ nya a, mɛni nɛ o fia o pɛɛ si kaa o maa pee?

¹⁸ Moo sɔle kɛ ha Yehowa kaa bɔ nɛ David pee ɔ. E sɔle ke: “Moo pee ye tsui kake konɛ ma ye o biɛ ɔ gbeye.” Moo bɔ mɔde nɛ o kɛ sɔlemi nɛ ɔ mi munyu ɔmɛ nɛ tsu ní ngɛ o si himi mi. Daa ligbi ɔ, moo bɔ mɔde kaa yi mi kpɔ nɛ o maa mwɔ ngɛ ní nyafinyafihi kɛ ní nguahi tsuo a mi ɔ maa tsɔɔ kaa o yeɔ Yehowa biɛ nɛ ngɛ klɔuklɔu ɔ gbeye. Ke o ya nɔ nɛ o pee jã a, lɔ ɔ maa tsɔɔ kaa o hiɔ si ngɛ Yehowa biɛ ɔ nya kaa e we Odasefo no. (Abɛ 27:11) Nɛ wɔ tsuo wa ma nyɛ maa piɛɛ gbalɔ Mika he kɛ de ke: ‘Wɔɔ lɛɛ Yehowa, wa Mawu ɔ, ji nɔ nɛ wa ma sɔmɔ kɛ maa ya neneene.’​—Mika 4:5.