1. Mikangodo to Kawas o manan ko tatodong hani? Maolahay to Kawas a tamdaw hano mamikangodo ci Yihofaan hani?

TANGONGOLAY ko olah no Krisciyang to Kawas, mikangodoayho Cingraanan. Harateng no roma tamdaw o olah ato mangodoay, o masasongtolay a harateng. Kawra, Mangodo to Kawas cowa ko ciˈangiay a falocoˈ, o tangongolay ko pikangodo to Kawas. O mangodoay to Kawas a tamdaw cowa ka ciharateng sapipalakaw to kalawidang no niyah to kakarayan Wama, mansa cowa ko mamidemak to kapiliˈan Ningra a demak.—ˈOlic 111:10; Taneng 8:13.

2. Wa milengo kita to manan a tosa milingatay to ˈOlic 86:11 a demak hani?

² ˈOsien ko ˈOlic 86:11. Dotimen ita koniya sinael wa mahapinangto, madimadiay a hongti ci Tafiti mafanaˈay mikangodo ci Yihofaan o kalimlaan. Sasamaan kita misakadademak toniya sinael hani? Saka 1, wa milengo to hano kangodoen ko fangcalay ngangan no Kawas. Saka 2, wa nengnengen ita itini kaˈorip samaan paihkal to mikangodoay to fangcalay ngangan no Kawas.

3. O maanan a nalifetan ko miocoray ci Mosian padadotoc mikangodo to ngangan no Kawas hani?

³ Kina cecayay, ci Mosi milimekay itini i dihif maˈaraway ko pahadakan ni Yihofa a ˈdil. Samanay ko harateng ningra itiya. Sowal no Sapicalep Mafanaˈ to Fangcalay Cudad, ci Mosi “malifetay ko cecay kafahkaˈan a demak, alatek ˈayaw no tayni i fafekang  no sera ci Yis awaayho ko pakalifetay a tamdaw.” Dotoc i, matengilay ni Mosi ko pakaynian ni Yihofa i coyoh mihadak a sowal: ‘Yihofa, Yihofa, o siniˈadaay to tamdaw, patadoay miharateng to tamdaw a Kawas, o caay ka ranikay a maketer, iraay ko madimadiay a olah, tada soˈliˈlinay ngaˈay tiˈeren, midaˈocay ko olah to tamdaw, misododay to raraw.’ (Kasadakan 33:17-23; 34:5-7) Ano masowal ni Mosi ko ngangan ni Yihofa i, alatek miliyaway maharateng koniya nalifetan. Mansa ikorto i, mikiriwiˈay cingra palimoˈot to Israil tamdaw, mikangodo to ‘ciˈdilay ato kaciˈangian a ngangan’ no Kawas.—Limoˈot 28:58.

4. Samaan ko demak ita wa matongal ko pikangodo ci Yihofaan hani?

⁴ Maharateng ita ko ngangan ni “Yihofa” i, haharatengenho samanay a Kawas ci Yihofa. Ngaˈay miharateng kita to iraay ko maanan a makapahay capeling no Kawas, tinakoen o ˈicel, taneng, masadafdafay, olah ato roma makapahay capeling. Mihaen ko demak ita wa matongal ko pikangodo Cingraanan.—ˈOlic 77:11-15.

5-6. (1) O ngangan no Kawas o manan ko tatodong hani? (2) Pakayni i Kasadakan 3:13, 14 ato Isaya 64:8, pakaynian ni Yihofa i maanan tosa pakayraan palaˈosi to araaw no Niyah hani?

⁵ O ngangan no Kawas “ci Yihofa” o manan ko tatodong hani? ˈAlomanay mikingkiway tamdaw sanay miharateng, o “Yihofa” sanay a ngangan tatodong i, o “malaˈosiay” ko mitoroˈan alatek, sakoniya sowal i, masakenaay a demak cowa ko papakaconged ci Yihofaan palaˈosi to araaw Ningra. Hano haenen ko sowal hani?

⁶ Pakayni sapalaˈosiaw to araaw no Niyah, o kihcod a demak wa malaˈosi ni Yihofa a maemin. (ˈOsien ko Kasadakan 3:13, 14.) O mitepangan no likakawa no Kawas miceriday pakalalok kitaanan midotim tonini. Roma i, soˈlin cowa ko malefotay ko sikawdan no Kawas, wa ngaˈayho padama ci Yihofa cangranan malo ngaˈayay matayal saki Cingranan ato palaˈosiay to araaw Ningra a tamdaw. (ˈOsien ko Isaya 64:8.) Pakayniay ko Kawas toniya tosa pakayraan i fafekang palaˈosi to araaw no Niyah, ano o kihcod a demak cowa ko papakaconged ci Yihofaan.—Isaya 46:10, 11.

7. Samaan ko demak ita o mamatongal ko pikangodo to kakarayan Wama ci Yihofaan?

 ⁷ Midotim kita to midemakan ni Yihofa a kihcod, ato pakayni pipaˈicel Ningra kitaanan hato madangaray ita a demak, matongalay ko pikangodo Cingraanan. Tinakoen, midotim to kasapaan a misangaˈan ni Yihofa a maamaan, miocoray kitaanan masemer to nano demak Ningra. (ˈOlic 8:3, 4) Midotim to samanay ci Yihofa padama kitaanan milaheci to patorodan Ningra a demak kitaanan, mamitongal to mikangodoay a falocoˈ ita Cingraanan. O “Yihofa” sanay a ngangan soˈlinayto o kakangodoen! Samanen oniya ngangan mitaypiyaway to kihcod a capeling ni Yihofa, ato malaˈosiay a demak Ningra, halo papalaˈosien ko noikor a demak. —ˈOlic 89:7, 8.

8. Itini Limoˈot 32:2, 3 mitadtaday o tokel ni Yihofa to tamdaw samaan ko pinengneng to ngangan Ningra?

⁸ ˈAyaw no micomod ko Israil tamdaw i Mikiˈokan a Pala i, palimoˈotan ni Yihofa ci Mosi mitilid to cecay radiw, ikor pasifanaˈ to Israil tamdaw minanam toniya radiw. (Limoˈot 31:19; ˈosien ko Limoˈot 32:2, 3.) Midotim kita to Limoˈot 32:2, 3 a sinael, wa mahapinang, cowa ka pitokel ci Yihofa pakayni ka fangcal no ngangan Ningra matalawto kita a pangangan, telocto awato ko mafanaˈay toniya ngangan. Tokel Ningra nanay mafanaˈ ko polong a tamdaw toniya ngangan. Pakatengil ko Israil tamdaw to pipasifanaˈ ni Mosi cangranan ci Yihofaan ato fangcalay ngangan Ningra, tada o kalikoan a demak konini! O pipasifanaˈ ni Mosi pasinowayay cangranan, matongal ko tanektek no pakasoˈlinay falocoˈ, malecaday o malosoˈay no ˈorad a talod. Ano pasifanaˈ kita to tao i, mahaenay ko harateng nangra han?

9. Samaan kita misarocod a patalahkal to fangcalay ngangan no Kawas hani?

⁹ Ano mirienang kita to pakalomaˈay anca pakaˈalomanay pisawacay i, saka dademaken ko Fangcalay Cudad misiwkay to ngangan no Kawas. Ngaˈayay saka dademaken ita ko misafacoan no likakawa a cudad ika ato wangcan a lalakaw, padama to tamdaw mafanaˈ Cingranan. Kita i, itini i katayalan, picudadan anca miliwko i, mameten ko toki a pasifanaˈ to tamdaw ci Yihofaan, o matomesay ko olah a Kawas Cingra. Pasowalen ita ko tao to makapahay araaw ni Yihofa toniya cikiw i, alatek o sakinacecay pakatengil cangra to ciharatengay ci Yihofa cangraanan. Misalalangian kita to Fangcalay Cudad a padama to tamdaw mafanaˈ to sidaˈitay a Wama i kakarayan, misalof to mararaway a harateng nangra i salakat, mihaen i, o misarocoday a patalahkal to fangcalay ngangan no Kawas, wa ngaˈay pasinoway to pakatengilay to soˈlinay kimad a tamdaw!—Isaya 65:13, 14.

10. O pipasifanaˈ aca ita to pacekiwan to moecelay palinian ato safalod no Kawas hano cangoˈotayho hani?

¹⁰ Ano malalengo to Fangcalay Cudad i, padamaen ko tamdaw mafanaˈ to ngangan no Kawas, ato sasamaan a misaka dademak to ngangan Ningra, cowa konini aca, padamaenho cangra misongilaˈ a cipinang to masamanay a Kawas ci Yihofa. Ano somowal aca to limoˈot no Kawas, palinian, safalod, wa malahci ko patosokan han? O cecay ngaˈayay a pacekiwan malalokay minanam to palinian no Kawas alatek, ngaˈayay koniya palinian saan, kawra wa pakayni cingra i kaolah ci Yihofaan midofdof Cingraanan han? Haratengen ko tinakoan ni Atam aci Ifa, ihekalay ko kafanaˈ nangra to sarikec ni Yihofa, kawra cowa ka soˈlin ko falocoˈ maolah Cingranan. (Satapang 3:1-6) Mansa, o pipasifanaˈ aca ita to pacekiwan to moecelay palinian ato safalod no Kawas o cangoˈotayho.

11. Ano pasifanaˈ kita to pacekiwan to palinian no Kawas i, samanen padama cangra ho matongal ko kaolah ci Yihofaan hani?

¹¹ O palinian ni Yihofa ato pisaali sahtoay o ciepocay i kitaanan. (ˈOlic 119:97, 111, 112)  Kawra ano sakafanaˈaw ko pacekiwan tonini, wa pakahapinang to mikitiniay i olah ko pipatireng ni Yihofa toniya palinian. Mihaenay ngaˈayay licayen ita cangra: “Harateng iso hano palimoˈoten no Kawas ko tamdaw midemak to cecay demak, anca congeden ko tamdaw midemak to cecay demak hani? Paihkalay koni to maanan a capeling ni Yihofa hani?” Ano kayaten ita ko pacekiwan miharateng to masamaanay a Kawas ci Yihofa, anca padama cangranan maolah to ‘Yihofa’ sanay a ngangan, wa ngaˈay mitemer to falocoˈ nangra. Mihaen, cowa ko kaolah aca nangra to mananamay a palinian, wa soˈlin ko falocoˈ maolah to pafeliay toniya palinian a Yihofaan. (ˈOlic 119:68) Wa patanektek to pakasoˈlinay falocoˈ nangra, misiˈayaw to sapalifet wa ngaˈay mitafo to mihadidiay.—1 Korinto 3:12-15.

12. Kinacecayay, caka pisacecay ko falocoˈ ni Tafiti mangodo to Kawas, samanay ko teloc hani?

¹² Itini sakayat no Kawas, masowalay ni Tafiti i ˈOlic 86:11 ko cecay tilid ‘sacecayen ko falocoˈ ato harateng.’ Mikitini nalifetan no niyah mahapinangay ni Tafiti, ano caka pisacecay ko falocoˈ no tamdaw a mangodo to Kawas, wa madolo a mararaw. Kinacecayay, itini fadahong no lomaˈ no hongti maˈaraway ni Tafiti mainoˈay ko fafahi no tao, ci Patsipa koniya fafahiyan. Toniya tatokian, misacecayay ko falocoˈ ni Tafiti a mangodo ci Yihofaan han? Mafanaˈay cingra to sarikec ni Yihofa ‘hamaan maˈinal to fafahi no tao,’ kawra kamayan padadotoc a misamocek minengneng ci Patsipaan. (Kasadakan 20:17) Cowato pisacecay to falocoˈ cingra midemak to kaolahan ni Yihofa a demak, maˈinalay to kakapah ni Patsipa. Soˈlin maolahay ato mikangodoay ci Tafiti ci Yihofaan, kawra itini toniya demak o sapisaloaw aca to misatekeday a coos ningra ko maharatengan, telocto taˈangayay ko raraw. Oniya waywayan ningra pakangodoay to fangcalay ngangan no Kawas, malahdawayho ko ˈorip no awaay ko raraw a tamdaw, pakarorayayho to paro no lomaˈ.—2 Samuil 11:1-5, 14-17; 12:7-12.

13. Hano mafanaˈ kita ikor misacecayay ko falocoˈ ni Tafiti a mangodo to Kawas?

¹³ Mirikecan ni Yihofa ci Tafiti, ikor patikolay ngaˈay ko kalalaˈed ni Tafiti ato Kawas. (2 Samuil 12:3; ˈOlic 51:2-4, 17) Caka pisacecay ko falocoˈ ni Tafiti a mangodo ci Yihofaan, mikayatay to kaadayayan a teloc. Kawra itini i sapadama ni Yihofa, mananamay ningra ko sapasifanaˈ, pasasiyor a misafaeloh, mansa saan ko sowal no Fangcalay Cudad, ‘ci Tafiti misarocoday to falocoˈ madimadi to Kawas ningra ci Yihofaan.’—1 Hongti 11:4; 15:3.

14. O mamiharateng kita to maanan salicay hani? Misamanay?

 ¹⁴ O nalifetan ni Tafiti pakalalokay ato patalipaˈelalay to tamdaw, anini mikitini kita minanam to sapasifanaˈ. Ano satapang sanayho kita midoko ci Yihofaan, anca halafinayto micada to paputisem, o mamiharateng: “Misacecayay ko falocoˈ ako mikangodo ci Yihofaan, tanektek a miconged to sakayhid ni Satan hokira?”

15. Ano misacecay kita to falocoˈ a mikangodo to Kawas, maˈaraw ko mikidatay to mararaway a coos a sasing i sasamaan ko demak hani?

¹⁵ Haratengen hena, ano maˈaraw iso ko mikidatay to mararaway a coos a sasing i tilifi anca i wangcan alatek, wa samaan ko demak iso hani? Wa mikilim kiso to saˈading to niyah a sowal alatek, cowa ko kaacekan a lalakaw konini. Kawra coko o pakayraan ni Satan a mikayhid konini ho ecato pisacecay kita to falocoˈ a mikangodo ci Yihofaan hokira? (2 Korinto 2:11) Oniya sasing malecaday tano cihinangay a marad mipelaˈ to kilang, satapang aca mimingay ko ngalaˈ, kawra ano padotocen a misetiˈ, o mamapelaˈ ko kilang. Malecaday koya mikidatay to saka rarawaw a sasing, satapang aca cowa ka samaan, kawra ano micerid a minengneng, saikor o sakararaw ita, pakararaw ci Yihofaan. Mihaenay, aka a papicomoden i falocoˈ ita ko kihcod tatiihay a demak, oha mamisacecay kita to falocoˈ a mikangodo to fangcalay ngangan no Kawas!

16. Ano malifa ko sakayhid wa miharateng kita to manan a salicay hani?

¹⁶ Cowa ko tano mikidatay to mararaway coos aca a sasing, misaka dademakayho ci Satan to roma pakayraan a mikayhid kitaanan. Ano mahaenay i, sasamaan ko harateng ita hani? Wa mikilim kita to saˈading to niyah alatek, saan miharateng: “Midemak tonini cowa ko mamafalah, cowa ko kalimlaan konini.” O hatiniay harateng o masaka talawan. Ano tahalifa to sakayhid i mamiharateng kita: “Ciharatengay ci Satan misaka dademakan tonini ho ecato pisacecay kako to falocoˈ a mikangodo  to Kawas hokira? Ano pakihater han ako ko niyah, o papakangodo to fangcalay ngangan no Kawas han? Oniya dademaken ako a demak o papangata anca paraay ci Yihofaan han?” Sasongilaˈen a miharateng koniya salicay, micangacang ci Yihofaan pafeli kitanan to taneng, hoeca ka malipalaw ko niyah. (Yakop 1:5) Mihaen to demak i, o mamidipot kitaanan, wa ngaˈayho padama kitaanan tanektek a miconged to sakayhid, malecad ci Yisan a pasowal: ‘Satan, ka piliyas!’—Matay 4:10.

17. Misacecay to falocoˈ a mikangodo to Kawas hano tada kalimlaan hani? Tano tinakoen mitadtad.

¹⁷ Misacecay to falocoˈ a mikangodo to Kawas tada kalimlaan. Tinakoen, o cecay mimaliay a kapot a tamdaw cowa ka rihaday a malacafay, ira ko misaidahiyay tamdaw, o roma cowa kakahi midofdof to safalod a misiay, o roma tamdaw cowa ka pitengil to sakayat no singsi, oniya kapot papasangar a pakalowid. O kapot no mimaliay rihaday a malacecay ngaˈ pakalowid misiay, mahecaday, o dademaken ita a demak malecad to palinian no Fangcalay Cudad, mihaen wa ngaˈay ko pidoko ita to Kawas. Haratengen, ci Satan makalimay sapakaˈarawaw kitanan mafanaˈay to palinian ni Yihofa, kawra mitooray tono niyah a harateng midemak. Mihaenay, padadotoc kita misaˈicel misarocod midoko ci Yihofaan, aka papilowiden ci Satan!—Matay 22:36-38.

18. Pakayni i Mika 4:5, wa seteken iso ko falocoˈ midemak to maanan hani?

¹⁸ Ngaˈay kita malecad ci Tafitian mitolon ci Yihofaan sanay ko sowal, ‘Nanay sacecayen iso ko falocoˈ ako mangodo to fangcalay ngangan Iso,’ dotoc misaˈicel a palecad to sowal ato waywayan. Ano o mananto ko misaˈosian to romiˈamiˈad i, paihkal kita to tangongolay ko pikangodo to ngangan no Kawas, misawacay to o soˈlinay Misawacayay Tamdaw ni Yihofa ko niyah. (Taneng 27:11) Mihaen, wa ngaˈay kita malecad ko harateng pairasolay ci Mikaan: ‘Kita i, o tatahadaˈoc pakayni i ngangan ni Yihofa a dademak!’—Mika 4:5 ato roma pihongyak.