1. Aha do lapatanna makkabiari Debata, jala boasa halak na makkaholongi Jahowa porlu makkabiari Ibana?

HOLONG do roha ni halak Kristen tu Debata jala dihabiari nasida do Ibana. Di parsiajaran on naeng taulas ma boasa rikkot makkabiari Debata. Aha do lapatanna halak na makkabiari Debata? Halak na makkabiari Debata, i ma halak na pasangappon Ibana. Lomo do rohana toktong marale-ale tu Debata. Jadi dang olo ibana mambahen haccit rohana.​—Ps. 111:10; Poda 8:13.

2. Hombar tu tangiang ni Raja Daud na disurat di Psalmen 86:11, aha do na lao taulas?

² Jaha Psalmen 86:11. Molo dirimangi hamu ayat on, taida ma diboto Raja Daud do rikkot situtu pasangappon Jahowa. Taulas ma songon dia hita boi mangulahon isi ni tangiangna i. Na parjolo, taulas ma boasa ikkon tapasangap goar ni Debata. Na paduahon, taulas ma songon dia hita boi pasangappon goar ni Debata di ngolutta siganup ari.

3. Pengalaman aha do na mangonjar roha ni si Musa asa toktong pasangappon goar ni Jahowa?

³ Bayakkon ma aha na dihilala si Musa tikki masuk ibana tu sada gua di dolok batu jala mangida hamuliaon ni Jahowa. Bukku Pemahaman Alkitab mandok “on do ra pengalaman  paling luar biasa na hea dihilala jolma.” Dibege si Musa ma soara ni suru-suruan na mandok, “Jahowa, Jahowa do Debata na talup jala na asi roha, lambat tarrimas, jala godang denggan basana dohot habonaronna. Na pahothon denggan basana i pola marriburibu sundut jala marpamuati rohana mida hajahaton, pangalaosion dohot dosa.” (2 Mus. 33:17-23; 34:5-7) Tottu, diingot si Musa do pengalamanna i tikki dijou ibana goar ni Jahowa. I do alana dipangido si Musa do halak Israel asa pasangappon jala makkabiari goar ni Debata i.​—5 Mus. 28:58.

4. Aha do na boi tarimangi asa lam taronjar rohatta lao pasangappon Jahowa?

⁴ Tikki tarimangi taringot goar ni Jahowa, ikkon tarimangi do Debata na songon dia do Jahowa i. Taingot ma akka parangena songon huasona, bisukna, hatigoranna, dohot holongna. Molo tarimangi akka parange on dohot parangena na asing, boi do gabe lam taronjar rohatta lao pasangappon Ibana.​—Ps. 77:12-16.

5-6. (a) Aha do lapatan ni goar ni Debata? (b) Hombar tu 2 Musa 3:13, 14 dohot Jesaya 64:7, songon dia do Jahowa pasautton sakkapna?

⁵ Aha do na boi taboto taringot lapatan ni goar ni Debata? Godang do pakar na setuju molo Jahowa lapatanna “Ibana Mambahen Ibana Pasautton”. Lapatan ni goar i gabe paingotton hita, dang adong manang aha pe na boi mangambati Jahowa lao pasautton sakkapna. Aha do maksudna?

⁶ Boi do Jahowa gabe manang aha pe na dihalomohon Ibana asa saut sakkapna. (Jaha 2 Musa 3:13, 14.) Di akka publikasinta, jotjot do hita dipaingot asa mangarimangi taringot on. Jala boi do dipakke Ibana naposona, i ma jolma na so sempurna asa gabe manang aha pe na dihaporluhon Ibana lao pasautton sakkapna. (Jaha Jesaya 64:7.) Marhite akka cara on ma, dibahen Jahowa saut sude sakkapna. Dang adong manang aha pe na boi mangabbati Ibana lao mangulahon i.​—Jes. 46:10, 11.

7. Songon dia carana asa lam taargai Jahowa?

⁷ Gabe lam taargai do Jahowa molo tarimangi akka naung diulahon Ibana jala  songon dia Ibana mangurupi hita saleleng on. Misalna, molo tarimangi akka toppaan, longang situtu do rohatta mangida sude naung dibahen Jahowa. (Ps. 8:4, 5) Jala molo tarimangi songon dia Jahowa mangurupi hita asa boi mangulahon lomo ni rohana, gabe lam taargai ma Ibana. Luar biasa do goar ni Jahowa! Sian goarna i, boi do taboto sude taringot Ibana, aha do naung diulahon Ibana, jala aha do na lao bahenonna.​—Ps. 89:8, 9.

8. Hombar tu 5 Musa 32:2,3, aha do na dihalomohon Jahowa taringot goarna?

⁸ Andorang so masuk halak Israel tu Tano na Dijanjihon, diajarhon Jahowa sada ende tu si Musa. (5 Mus. 31:19) Dung i, diajarhon si Musa do ende i tu halak Israel. (Jaha 5 Musa 32:2, 3.) Molo tarimangi ayat 2 dohot 3, takkas ma taboto dang lomo roha ni Jahowa molo goarna i ditabunihon manang gabe pabadiahu dibahen goarna. Lomo do rohana asa sude jolma mamboto goarna i! Sada hasangapon do di halak Israel ala diajarhon si Musa do tu nasida taringot goar ni Jahowa dohot parangena! Akka na diajarhon si Musa i patoguhon roha ni nasida songon ombun na mambahen tubu suan-suanan. Songon dia asa songon i caratta mangajari?

9. Songon dia hita pabadiahon goar ni Jahowa?

⁹ Tikki marbarita hita sian jabu tu jabu manang tikki kesaksian di tempat umum, tapakke do Bibel lao patandahon goar ni Debata, i ma Jahowa. Boi do talehon tu nasida akka sijahaon, tapatudu video, dohot akka bahan na asing na adong di situs webta. Di parkarejoan, di sikkola, manang tikki mardalani, tapakke do kesempatan lao paboahon taringot Jahowa dohot parangena. Tikki tapaboa aha na lao bahenon ni Jahowa tu jolma dohot tu tano on, ra on dope diboto nasida holong situtu do Jahowa tu nasida. Molo tapaboa tu akka halak hasittongan taringot Debata, gabe tapabadia do goarna. Jala taurupi do nasida asa unang be porsea tu akka gabus taringot Debata. Sude na taajarhon sian Bibel i boi do patoguhon nasida.​—Jes. 65:13, 14.

10. Tikki manguluhon parsiajaran Bibel, boasa dang sae holan mangajarhon uhum dohot paretta ni Debata?

¹⁰ Tikki manguluhon parsiajaran Bibel, lomo do rohatta mangurupi parsiajar Bibelta asa mamboto jala mamakke goar ni Jahowa. Asing ni i, lomo do rohatta mangurupi nasida asa lam mananda Jahowa. Alai sae do holan patorakkon taringot parettana dohot uhumna? Olo do ra lomo roha ni parsiajar Bibel tu uhum ni Debata. Alai, alani holongna tu Jahowa do umbahen gabe taronjar rohana lao mangulahon uhum i? Ingot ma, si Hawa pe diboto ibana do uhum ni Debata. Alai dang dihaholongi ibana Debata, songon i nang si Adam. (1 Mus. 3:1-6) Jadi, dang sae holan mangajarhon uhum dohot paretta ni Debata.

11. Songon dia hita mangurupi parsiajar Bibelta asa makkaholongi Debata jala dang holan uhumna?

¹¹ Denggan do uhum dohot sude paretta ni Jahowa. (Ps. 119:97, 111, 112) Alai dang songon i ra pakkilalaan ni parsiajar Bibelta, molo dang jolo diattusi nasida alani holong ni Jahowa do umbahen dilehon uhum i. Jadi, tasukkun ma parsiajar Bibelta, “Menurutmu, boasa dipangido Jahowa naposona mangulahon on? Boasa diorai Jahowa hita mangulahon on? Aha do na diparsiajari hamu sian on taringot Jahowa?” Molo taurupi parsiajar Bibelta asa mangarimangi taringot Jahowa jala makkaholongi goarna, gabe boi ma i hona tu roha ni nasida. Gabe dang holan uhum i na dihaholongi nasida, alai dohot do Jahowa na mangalehon uhum i. (Ps. 119:68) Gabe lam  togu ma haporseaon ni nasida, jala boi ma nasida martahan nang pe adong hasusaan.​—1 Kor. 3:12-15.

12. Songon dia do roha ni si Daud gabe tarbagi, jala aha do akibatna?

¹² Didok si Daud do di Psalmen 86:11, “Sai pasada ma rohangku.” Massai rikkot do hata on. Saleleng ngoluna, diboto si Daud do, mura hian do rohatta tarbagi jala gabe mangulahon na sala. Sada tikki, hea ma ibana mardalan di loteng ni istana. Sian loteng i, adong diida ibana istri ni halak maridi. Diboto ibana do uhum ni Jahowa na mandok, “Ndang jadi haliangan ni roham dongan saripe ni donganmu.” (2 Mus. 20:17, Bibel siganup ari) Alai, sai dibereng-bereng ibana do borua i. Gabe tarbagi ma rohana. Sasittongna, lomo do rohana mambahen las roha ni Jahowa. Alai gabe tubu ma giot-giot na sala tu si Batseba. Ujungna, gabe diulahon si Daud ma dosa na balga. Gabe roa ma goar ni Jahowa dibahen ibana. Jala dohot do susa halak na so marsala alani ibana, tarmasuk ma keluargana sandiri.​—2 Sam. 11:1-5, 14-17; 12:7-12.

13. Sian dia taboto dang tarbagi be roha ni si Daud?

¹³ Dipissang Jahowa do si Daud, jala ujungna gabe denggan ma muse parale-aleonna tu Jahowa. (2 Sam. 12:13; Ps. 51:4-6, 18) Diingot si Daud do akka hasusaan na dihilala ibana ala dipaloas ibana tarbagi rohana. Alai diurupi Jahowa do si Daud asa unang tarbagi be rohana? I do, alana di pudian ni ari, didok do di Bibel taringot si Daud, “Sian nasa rohana dioloi ibana Jahowa Debatana.”​—1 Raj. 11:4; 15:3, Bibel siganup ari.

14. Aha do na porlu tasukkun tu diritta, jala boasa?

¹⁴ Pengalaman ni si Daud on boi do patoguhon hita. Ibana pe hea do tarela-ela lao mangulahon dosa na balga, jala gabe sipasingot do on tu hita saonari. Manang sadia leleng pe hita nungnga manomba Jahowa, atik na baru dope manang nungnga martaon-taon, porlu do tarimangi, ‘Hujaga do rohakku asa unang tarbagi dibahen Sibolis?’

15. Molo makkabiari Debata hita, songon dia i manjaga rohatta tikki taida gambar na rorang?

¹⁵ Misalna, molo diida hamu gambar di TV manang Internet na boi mambahen hamu marpikkiran na rorang, aha do ulahononmuna? Olo do ra didok rohamu, dang pornografi i. Alai boi i dipakke Sibolis lao mambahen tarbagi rohamuna. (2 Kor. 2:11) Boi do akka gambar i dipatudos songon kampak na dipakke sasahalak lao mambola hau na balga.  Di mulana, diattukkon ibana do kampak i tu hau. Memang dang pittor tarbola hau i. Alai lam leleng, molo lam bagas diattukkon kampak i, gabe tarbola ma hau i. Suang songon i ma gambar i, di mulana tahilala dang pola berbahaya i. Alai lam leleng, boi do i mambahen sasahalak gabe mangulahon dosa na balga. Alani i, pasiding hamu ma manang aha pe na boi mambahen tarbagi rohamuna! Toktong ma hamu makkabiari goar ni Jahowa!

16. Tikki adong ela-ela lao mangulahon na sala, sukkun-sukkun aha do na porlu tarimangi?

¹⁶ Asing ni akka gambar na rorang, godang dope akka na asing na dipakke Sibolis lao mangela-ela hita. Ra didok rohatta, dang pola berbahaya i. Misalna, olo do ra gabe tadok, ‘Kan dang na gabe dipecat au molo huulahon i, jadi dang pola serius i.’ Sala do cara marpikkir songon i. Porlu do tarimangi sukkun-sukkun on, ‘Na dipakke Sibolis do ela-ela on asa tarbagi rohakku? Molo huulahon giot-giot na sala, boi do on mambahen roa goar ni Jahowa? Molo huulahon on, gabe lam jonok do au tu Debata manang gabe lam dao? Martangiang ma hita tu Jahowa mangido bisuk asa boi jujur hita mangalusi sukkun-sukkun i. (Jak. 1:5) Molo taulahon i, boi do i manjaga rohatta. Diurupi ma hita lao pasidikkon ela-ela jala mandok songon hata ni Jesus, “Laho ma ho Bolis!”​—Mat. 4:10.

17. Boasa dang denggan molo tarbagi rohatta? Bahen ma tudosan.

¹⁷ Dang denggan molo tarbagi rohatta. Bayakkon ma adong sada tim olahraga, alai akka anggotana dang olo kerjasama. Adong na holan makkarikkotton dirina sandiri. Adong na so olo mangihutton peraturan. Jala na asing dang olo unduk tu pelatihna. Tottu dang boi monang nasida molo songon i situasina. Alai, molo marsada do nasida boi ma nasida  monang. Suang songon i ma rohatta. Boi do hita marhasil molo tapasada pikkiratta, lomo ni rohatta dohot pakkilalaatta lao manomba Jahowa. Ingot ma, lomo do roha ni Sibolis asa tarbagi rohatta. Marsitutu do ibana mambahen asa dang sadalan pikkiran, lomo ni roha, dohot pakkilalaatta tu lomo ni roha ni Debata. Ikkon sian nasa roha do hita manomba Jahowa. (Mat. 22:36-38) Jadi unang ma tapaloas Sibolis mambahen tarbagi rohatta!

18. Hombar tu Mika 4:5, aha do na ikkon diulahon hamu?

¹⁸ Martangiang ma tu Jahowa songon si Daud, “Sai pasada ma rohangku mangkabiari goarmu.” Marsitutu ma hamu mangulahon isi ni tangiangmuna i di ngolumuna. Sian keputusan na dibahen hamu ganup ari, na gelleng nang na balga, patudu ma na dipasangap hamu goar ni Jahowa. Molo diulahon hamu i, las ma roha ni Jahowa manjou hamu Sitindangina. (Poda 27:11) Jala rap ma hita sude mandok songon hata ni panurirang Mika, “Alai anggo hita mardalan marhite-hite goar ni Jahowa Debatanta ro di saleleng ni lelengna.”​—Mika 4:5.