1. Bushe calola mwi ukutiina Lesa, kabili mulandu nshi ukutiina Yehova kwacindamina ku bantu abamutemwa?

ABENA Kristu balitemwa Lesa kabili balamutiina. Lelo abantu bamo kuti bakaana ukuti tatufwile ukulatiina Lesa uo twatemwa. Nomba tatulelanda pa kutiina kulya umuntu akwata nga ali no mwenso. Twalalanda pa kutiina ukwaibela. Abantu abatiina Lesa muli iyi inshila iyaibela balaba na katiina kuli ena kabili balamupeela sana umucinshi. Tabafwaya ukukalifya Shibo wa ku muulu pantu tabafwaya ukonaula bucibusa bakwata nankwe.—Amalu. 111:10; Amapi. 8:13.

2. Ukulingana na mashiwi Imfumu Davidi yalandile ayaba pa Amalumbo 86:11, fintu nshi fibili ifyo twalalandapo?

² Belengeni Amalumbo 86:11. Nga mwatontonkanya pa mashiwi yali pali ili ilembo kuti mwamona ukuti Imfumu Davidi yalishibe ico cacindamina ukutiina Yehova. Kanshi twalalanda pa fyo twingacita pa kuti tulecita ifyo Davidi alandilepo mwi pepo. Ica kubalilapo, twalalanda pali fimo ififwile ukutulenga ukucindika sana ishina lya kwa Lesa. Ne ca bubili, twalalanda pa fyo twingalanga ukuti twalicindika ishina lya kwa Lesa muli fyonse ifyo tucita cila bushiku.

3. Finshi fyacitike nalimo ifyalengele Mose alecindika sana ishina lya kwa Lesa?

³ Elenganyeni ifyo Mose aumfwile ilyo alelengela ninshi ali mu lucengo lwa cilibwe, e lyo amona ubukata bwa kwa Yehova bwapita.  Ici cali cintu icaibela ico umuntu nangu umo ashabalile amonapo ilyo Yesu ashilaisa pano isonde! Lyena Mose aumfwile ishiwi lya kwa malaika lileti: “Yehova, Yehova, Lesa wa luse kabili uwa mutembo, uukokola ukukalipa kabili uwafulisha icikuuku ne cine, uutwalilila ukulanga icikuuku ku ba makana, uwelela ifilubo na bumpulamafunde no lubembu.” (Ukufu. 33:17-23; 34:5-7) Mose afwile aleibukisha ifi fyacitike lyonse ilyo abomfya shina lya kuti Yehova. Ici e calengele Mose ebe abantu ba kwa Lesa abena Israele ukuti balingile “ukutiina ili shina lya lulumbi kabili ilya kutiinya.”—Amala. 28:58.

4. Finshi fingalenga twalatiina Yehova no ku mucindika sana?

⁴ Nga twatontonkanya pe shina lya kuti Yehova, tufwile ukutontonkanya sana na pa mwine we shina. Tufwile ukutontonkanya pa mibele yakwe pamo nga amaka, amano, umulinganya, e lyo no kutemwa. Ukutontonkanya sana pali iyi mibele e lyo na imbi kuti kwalenga twalatiina no kucindika sana Yehova.—Amalu. 77:11-15.

5-6. (a) Bushe ishina lya kwa Lesa lyalola mwi? (b) Ukulingana no Ukufuma 3:13, 14 e lyo na Esaya 64:8, bushe Yehova alenga shani ifyo alefwaya ukucitika?

⁵ Finshi twaishiba pa bupilibulo bwe shina lya kwa Lesa? Abasambilila sana abengi balisumina ukuti ishina Yehova lyalola mu kuti “E ulenga Ifintu Ukubako.” Ubu ubupilibulo butwibukishako ukuti takuli nangu cimo icingalesha Yehova ukucita ifyo alefwaya, kabili kuti alenga icili conse ukucita ukufwaya kwakwe. Cinshi twalandila ifi?

⁶ Yehova alailenga ukuba ukulingana ne fyo alefwaya pa kulenga fimo ukucitika pa kuti afikilishe ubufwayo bwakwe. (Belengeni Ukufuma 3:13, 14.) Ilingi line mu mpapulo shesu balatukoselesha ukulatontonkanya sana pali ubu ubupilibulo bwe shina lya kwa Lesa ubusuma nga nshi. Yehova na kabili kuti alenga ababomfi bakwe abashapwililika ukuba ifyo alefwaya babe pa kuti afikilishe ubufwayo bwakwe. (Belengeni Esaya 64:8.) Ifi filenga Yehova alelenga ifyo afwaya ukucitika. Takuli nangu cimo icingamulesha ukufikilisha ubufwayo bwakwe.—Esa. 46:10, 11.

7. Finshi twingacita pa kuti tuletemwa nga nshi Shifwe wa ku muulu no kulamucindika?

 ⁷ Nga tuletontonkanya sana pa fyo Shifwe wa ku muulu acita na pa fyo atulenga ukucita tukalamutemenwako. Ku ca kumwenako, nga twatontonkanya sana pa fyo Yehova abumba tulatasha sana pali fyonse ifyo acita. (Amalu. 8:3, 4) Kabili nga twatontonkanya sana pa fyo Yehova atulenga ukuba pa kuti tulecita ukufwaya kwakwe tulamucindika nga nshi. Cine cine ishina Yehova lya kutiinya! Lisanshamo fyonse ifyo Shifwe aba, fyonse ifyo acita, na fyonse ifyo akacita.—Amalu. 89:7, 8.

8. Nga fintu ilembo lya Amalango 32:2, 3 lilanda, finshi Yehova afwaya ababomfi bakwe ukucita ifyakuma ishina lyakwe?

⁸ Ilyo abena Israele tabalaingila mu Calo ca Bulayo, Yehova asambilishe Mose ulwimbo. (Amala. 31:19) Mose na o alingile ukusambilisha abena Israele ulu lwimbo. (Belengeni Amalango 32:2, 3.) Nga tuletontonkanya sana pa mashiwi yaba mu fikomo 2 na 3, kuti twamona ukuti Yehova afwaya ishina lyakwe ukwishibikwa, kabili tafwaya abantu balemona kwati tabafwile ukubomfya ishina lyakwe pa mulandu wa kuti lya mushilo. Afwaya bonse baishiba ishina lyakwe. Ala abena Israele balitemenwe icine cine ilyo Mose alebasambilisha pali Yehova na pe shina lyakwe ilisuma nga nshi! Ifyo Mose abasambilishe fyalikoseshe icitetekelo cabo kabili fyalibakoseleshe nga filya imfula iisuma ilenga ifimenwa ukukula bwino. Kuti twacita shani pa kuti na ifwe tulesambilisha bwino?

9. Kuti twa-afwilishako shani ukulenga ishina lya kwa Yehova ukuba ilya mushilo?

⁹ Ilyo tulebila imbila nsuma, kuti twabomfya Baibolo pa kulanga abantu ishina lya kwa Lesa ilya kuti Yehova. Kuti twabapeela impapulo ishisuma isho twakwata, kuti twabatambisha amavidio ayasuma, kabili kuti twabalanga ifyebo fyaba pa webusaiti yesu ifilenga Yehova ukucindikwa. Ilyo tuli ku ncito, ku sukulu, nelyo pa bulendo kuti twaebako abantu pali Lesa wesu uo twatemwa na pa fyo aaba. Kuti twabebako pa fintu ifisuma ifyo Yehova akatucitila ne fyo akalenga isonde ukuba Paradaise. Nga twabebako ifi fintu nalimo kuti baishiba ifyo Yehova atutemwa. Nga tule-ebako abantu icine pali Shifwe uwa tutemwa, ninshi tuleafwilishako ukulenga ishina lyakwe ukuba ilya mushilo. Tulalenga abantu baishiba ukuti balibasambilisha ifya bufi ifingi pali Yehova. Pa fintu fyonse ifyo abantu bengasambilila, ifyaba mu Baibolo ifyo tubasambilisha e fingalenga baba ne nsansa.—Esa. 65:13, 14.

10. Ilyo tuletungulula amasambililo ya Baibolo, mulandu nshi tushilingile ukupelela fye pa kusambilisha abasambi ifyo Lesa afwaya e lyo na mafunde yakwe?

¹⁰ Ilyo tuletungulula amasambililo ya Baibolo, tulafwaya abasambi baishiba ishina lya kwa Yehova kabili balalibomfya. Kabili tulafwaya no kuti beshibe bwino Yehova. Bushe kuti twalenga baishiba bwino Yehova nga ca kuti tulepelela fye pa kubeba ifyo balingile ukulakonka, ifyo afwaya, e lyo na mafunde yakwe? Umusambi musuma kuti asambilila amafunde ya kwa Lesa no kuyatemwa ayatemwa. Nomba bushe umusambi akalaumfwila Yehova pa mulandu wa kuti alimutemwa? Ibukisheni ukuti Efa na Adamu balishibe amafunde ya kwa Lesa nomba tabamutemenwe sana. (Ukute. 3:1-6) Kanshi tatufwile ukupelela fye pa kusambilisha abantu ifyo Lesa afwaya e lyo na pa mafunde yakwe ayalungama.

11. Kuti twa-afwa shani abo tusambilisha Baibolo ukutemwa Lesa uutupeela amafunde ilyo tulebasambilisha pa mafunde yakwe?

¹¹ Amafunde Lesa atupeela e lyo ne fyo afwaya tulecita fisuma icine cine. (Amalu. 119:97, 111, 112) Lelo abo tusambilisha Baibolo te kuti bamone ukuti yasuma nga tabeshibe ukutila ico Yehova atupeelela amafunde ni co alitutemwa. Kanshi kuti twaipusha uo tusambilisha Baibolo atuti: “Bushe mulemona ukuti cinshi Lesa ebela ababomfi bakwe ukucita ifintu fimo no kukanacita  fimo? Kabili finshi ifi fitusambilisha pali Yehova?” Nga tuleafwa abo tusambilisha Baibolo ukulatontonkanya sana pali Yehova no kutemwa ishina lyakwe ilisuma, kuti tulebafika pa mutima. Abo tusambilisha Baibolo tabakatemwe fye amafunde yakwe, lelo bakatemwa no utupeela amafunde. (Amalu. 119:68) Icitetekelo cabo cikakoselako kabili bakalashipikisha amesho ayakalamba ayo bengakwata.—1 Kor. 3:12-15.

12. Bushe inshita imo Davidi afililwe shani ukuba no mutima umo, kabili finshi fyafuminemo?

¹² Amashiwi yaba pa Amalumbo 86:11 aya kuti “Nengeni ukuba no mutima umo,” yalicindama icine cine. Yehova e waebele Imfumu Davidi ukulemba aya mashiwi. Ilyo Davidi talafwa, alimwene ukuti calyanguka ku muntu ukuba ne mitima ibili. Bushiku bumo ilyo ale-enda pa mutenge wa ng’anda yakwe amwene umukashi wa mwine alesamba. Bushe pali ilya nshita Davidi ali no mutima umo nelyo ali ne mitima ibili? Alishibe ifunde lya kwa Yehova ilitila: “Wilakumbwa umukashi wa munobe.” (Ukufu. 20:17) Lelo alitwalilile ukulolekesha umukashi wa mwine kabili ici calengele abe ne mitima ibili. Atendeke ukukumbwa umwanakashi Bati-sheba, kabili pa nshita imo ine alefwaya no kusekesha Yehova. Nangu ca kuti Davidi aletiina Yehova kabili alimutemenwe pa myaka iingi, pali iyi inshita asalilepo ukucita ifya kuisekesha. Ici calengele acite ifintu ifyabipa nga nshi. Ifyo acitile fyaliletele umuseebanya pe shina lya kwa Yehova. Davidi aliletelele na bantu abakaele ukubikako fye no lupwa lwakwe.—2 Sam. 11:1-5, 14-17; 12:7-12.

13. Twaishiba shani ukuti Davidi alishileba no mutima umo na kabili?

¹³ Yehova alisalapwile Davidi, kabili Davidi alishileba cibusa wa kwa Yehova na kabili. (2 Sam. 12:13; Amalu. 51:2-4, 17) Davidi aleibukisha amafya ne fyabipa ifyafumine muli filya afililwe ukuba no mutima umo. Amashiwi Davidi alembele pa Amalumbo 86:11 kuti twayapilibula no kuti: “Nengeni ukukaanaba ne mitima ibili.” Bushe Yehova alyafwile Davidi ukuba no mutima umo? Ee, alimwafwile pantu Icebo ca kwa Yehova cilanda pali Davidi ukuti ‘umutima wakwe onse wali kuli Yehova Lesa wakwe.’—1 Isha. 11:4; 15:3.

14. Cipusho nshi tulingile ukuyipusha, kabili mulandu nshi?

¹⁴ Ilyashi lya kwa Davidi lilatukoselesha kabili lilatusoka ku fyo tushilingile ukucita. Filya acitile ulubembu filasoka ababomfi ba kwa Lesa muno nshiku. Nampo nga e lyo tutendeke ukubombela Yehova nangu nga twalimubombela pa myaka iingi, tufwile ukuyipusha icipusho ca kuti, ‘Bushe ndacimfya amatunko ya kwa Satana ayengalenga naba ne mitima ibili?’

15. Bushe ukutiina Yehova kuti kwatucingilila shani nga ca kuti twamona ifikope pa TV nelyo pa Intaneti ifingalenga twalatontonkanya pa kucita ifyabipa?

 ¹⁵ Ku ca kumwenako, finshi mucita nga mwamona ifikope pa TV nelyo pa Intaneti ifingalenga mwalatontonkanya pa kucita ifyabipa? Nalimo kuti mwalatontonkanya amuti ifi fikope nangu iyi filimu taibipile pantu te fye shiku. Lelo Satana kuti abomfya ifi fintu pa kumulenga ukuba ne mitima ibili. (2 Kor. 2:11) Kuti twapashanya ifikope fya musango uyu ku kasembe ako umuntu engabomfya ukuputwilako icimuti icikalamba. Pa kubala kuti akoma fye akasembe akaatwa mu cimuti. Lyena nga atwalilila ukukomamo, icimuti kuti casuka caputuka. Ifi fine e fyo cingaba na kuli ifwe nga twatwalilila ukulolesha pa cikope icingalenga twalatontonkanya pa kucita ifyabipa. Umuntu nga atwalilila ukulolesha pa fikope ifyo alemona kwati tafibipile lelo ifingalenga alatontonkanya pa kucita ifyabipa kuti asuka abembukila Yehova. Kanshi mwilasuminisha ifintu ifyabipa ukwingila mu mutima wenu! Mule-esha apo mwingapesha ukulatiina ishina lya kwa Yehova no mutima wenu onse!

16. Mepusho nshi twingayipusha nga twatunkwa ukucita ifyabipa?

¹⁶ Ifikope ifingalenga twalatontonkanya pa kucita ifyabipa fyaba pa fintu ifingi ifyo Satana abomfya pa kututunka ukucita ifyabipa. Bushe mulanakila ku matunko ya kwa Satana? Calyanguka ukutontonkanya ukuti ukucita ifintu fya musango uyo takwabipa sana. Ku ca kumwenako, nalimo kuti twalatontonkanya atuti: ‘Ukucita ifi kufwile takwabipa sana pantu te kuti kulenge bantamfye mu cilonganino.’ Ukutontonkanya kwa musango uyu kubi icine cine. Kanshi kuti cawama twalayipusha amepusho pamo nga: ‘Bushe ili litunko ilyo Satana alebomfya pa kuti anenge ukuba ne mitima ibili? Bushe ukucita ifi kuti kwalenga naleta umuseebanya pe shina lya kwa Yehova? Bushe ukucita ifi kuti kwalenga  naba sana cibusa wa kwa Yehova nangu kuti kwalenga bucibusa bwandi na Yehova bwaonaika?’ Muletontonkanya sana pali aya mepusho. Mulelomba Yehova ukuti alemupeela amano pa kuti muleba abafumacumi ilyo muleasuka aya mepusho. (Yako. 1:5) Ukucita ifi kukamucingilila icine cine. Kukamwafwa ukuba abashipa no kukaana amatunko ya kwa Satana nga filya Yesu acitile ilyo alandile ukuti: “Fuma apa, we Satana!”—Mat. 4:10.

17. Cinshi cabipila ukuba ne mitima ibili? Langilileni.

¹⁷ Tacawama ukuba ne mitima ibili. Elenganyeni ifyo cingaba nga ca kuti aba mwi bumba lya bakateya wa mupila tabaleumfwana bwino. Bamo balefwaya fye ukucita ifyo abene balefwaya pa kuti abantu balebalumbanya, bambi tabalefwaya ukukonka amafunde, e lyo bambi tabaleumfwila ifyo ka kansha wabo alebeba. Ukwabula no kutwishika ibumba lya musango uyu te kuti licimfye. Lelo ibumba lya baleumfwana bwino kuti lyacimfya. Umutima wenu kuti waba nge bumba lya bakateya wa mupila abaleumfwana bwino nga ca kuti ifyo mutontonkanyapo, ifyo mufwaya, ne fyo mumfwa filenga mulebombela Yehova. Muleibukisha ukuti Satana tafwaya mulebombela Yehova no mutima umo. Afwaya cilemukosela ukucita ifyo mwaishiba ukuti e fyo Yehova afwaya pa mulandu wa kufwaisha ukucita ifya kuisekesha. Nomba mulingile ukuba no mutima umo pa kuti mulebombela bwino Yehova. (Mat. 22:36-38) Mwikaleka Satana akamulenge ukuba ne mitima ibili!

18. Ukulingana na mashiwi yaba pali Mika 4:5, finshi mulefwaisha ukulacita?

¹⁸ Mulepepa kuli Yehova nga filya Davidi apepele ukuti: “Nengeni ukuba no mutima umo.” Mule-esha apo mwingapesha ukulacita ifyo mulepepelapo. Muleshininkisha ukuti fyonse ifyo musalapo ukucita cila bushiku, nampo nga fikalamba nelyo finono, filelanga ukuti mulatiina ishina lya kwa Yehova ilya mushilo. Apo muli Nte ya kwa Yehova, nga mulecita ifi ninshi mulelanga ukuti mulemininako bwino ishina lyakwe. (Amapi. 27:11) Kabili nga tulecita ifi, ifwe bonse tukalalanda nge fyalandile kasesema Mika uwatile: “Ifwe twakulaendela mwi shina lya kwa Yehova Lesa wesu umuyayaya umuyayaya.”—Mika 4:5.